9. பட²மஸினேருபப்³ப³தராஜஸுத்தம்

1119. ‘‘ஸேய்யதா²பி, பி⁴க்க²வே, புரிஸோ ஸினேருஸ்ஸ பப்³ப³தராஜஸ்ஸ ஸத்த முக்³க³மத்தியோ பாஸாணஸக்க²ரா உபனிக்கி²பேய்ய. தம் கிம் மஞ்ஞத², பி⁴க்க²வே, கதமம் நு கோ² ப³ஹுதரம் – யா வா [யா ச] ஸத்த முக்³க³மத்தியோ பாஸாணஸக்க²ரா உபனிக்கி²த்தா, யோ வா [யோ ச (ஸ்யா. கம். பீ. க.) ஸம். நி. 2.84] ஸினேருபப்³ப³தராஜா’’தி? ‘‘ஏததே³வ, ப⁴ந்தே, ப³ஹுதரம், யதி³த³ம் – ஸினேருபப்³ப³தராஜா; அப்பமத்திகா ஸத்த முக்³க³மத்தியோ பாஸாணஸக்க²ரா உபனிக்கி²த்தா. ஸங்க²ம்பி ந உபேந்தி, உபனித⁴ம்பி ந உபேந்தி, கலபா⁴க³ம்பி ந உபேந்தி ஸினேருபப்³ப³தராஜானம் உபனிதா⁴ய ஸத்த முக்³க³மத்தியோ பாஸாணஸக்க²ரா உபனிக்கி²த்தா’’தி. ‘‘ஏவமேவ கோ², பி⁴க்க²வே, அரியஸாவகஸ்ஸ தி³ட்டி²ஸம்பன்னஸ்ஸ புக்³க³லஸ்ஸ அபி⁴ஸமேதாவினோ ஏததே³வ ப³ஹுதரம் து³க்க²ம் யதி³த³ம் பரிக்கீ²ணம் பரியாதி³ன்னம்; அப்பமத்தகம் அவஸிட்ட²ம். ஸங்க²ம்பி ந உபேதி, உபனித⁴ம்பி ந உபேதி, கலபா⁴க³ம்பி ந உபேதி, புரிமம் து³க்க²க்க²ந்த⁴ம் பரிக்கீ²ணம் பரியாதி³ன்னம் உபனிதா⁴ய யதி³த³ம் ஸத்தக்க²த்துபரமதா; யோ ‘இத³ம் து³க்க²’ந்தி யதா²பூ⁴தம் பஜானாதி…பே… ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் பஜானாதி’’.

‘‘தஸ்மாதிஹ, பி⁴க்க²வே, ‘இத³ம் து³க்க²’ந்தி யோகோ³ கரணீயோ…பே… ‘அயம் து³க்க²னிரோத⁴கா³மினீ படிபதா³’தி யோகோ³ கரணீயோ’’தி. நவமம்.