10. து³தியஸினேருபப்³ப³தராஜஸுத்தம்

1120. ‘‘ஸேய்யதா²பி, பி⁴க்க²வே, ஸினேருபப்³ப³தராஜாயம் பரிக்க²யம் பரியாதா³னம் க³ச்சே²ய்ய, ட²பேத்வா ஸத்த முக்³க³மத்தியோ பாஸாணஸக்க²ரா. தம் கிம் மஞ்ஞத², பி⁴க்க²வே, கதமம் நு கோ² ப³ஹுதரம் – யம் வா ஸினேருஸ்ஸ பப்³ப³தராஜஸ்ஸ பரிக்கீ²ணம் பரியாதி³ன்னம், யா வா ஸத்த முக்³க³மத்தியோ பாஸாணஸக்க²ரா அவஸிட்டா²’’தி? ‘‘ஏததே³வ, ப⁴ந்தே, ப³ஹுதரம் ஸினேருஸ்ஸ பப்³ப³தராஜஸ்ஸ யதி³த³ம் பரிக்கீ²ணம் பரியாதி³ன்னம்; அப்பமத்திகா ஸத்த முக்³க³மத்தியோ பாஸாணஸக்க²ரா அவஸிட்டா². ஸங்க²ம்பி ந உபேந்தி, உபனித⁴ம்பி ந உபேந்தி, கலபா⁴க³ம்பி ந உபேந்தி ஸினேருஸ்ஸ பப்³ப³தராஜஸ்ஸ பரிக்கீ²ணம் பரியாதி³ன்னம் உபனிதா⁴ய ஸத்த முக்³க³மத்தியோ பாஸாணஸக்க²ரா அவஸிட்டா²’’தி. ‘‘ஏவமேவ கோ², பி⁴க்க²வே, அரியஸாவகஸ்ஸ தி³ட்டி²ஸம்பன்னஸ்ஸ புக்³க³லஸ்ஸ அபி⁴ஸமேதாவினோ ஏததே³வ ப³ஹுதரம் து³க்க²ம் யதி³த³ம் பரிக்கீ²ணம் பரியாதி³ன்னம்; அப்பமத்தகம் அவஸிட்ட²ம். ஸங்க²ம்பி ந உபேதி, உபனித⁴ம்பி ந உபேதி, கலபா⁴க³ம்பி ந உபேதி, புரிமம் து³க்க²க்க²ந்த⁴ம் பரிக்கீ²ணம் பரியாதி³ன்னம் உபனிதா⁴ய யதி³த³ம் ஸத்தக்க²த்துபரமதா; யோ ‘இத³ம் து³க்க²’ந்தி யதா²பூ⁴தம் பஜானாதி…பே… ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் பஜானாதி’’.

‘‘தஸ்மாதிஹ, பி⁴க்க²வே, ‘இத³ம் து³க்க²’ந்தி யோகோ³ கரணீயோ…பே… ‘அயம் து³க்க²னிரோத⁴கா³மினீ படிபதா³’தி யோகோ³ கரணீயோ’’தி. த³ஸமம்.

பபாதவக்³கோ³ பஞ்சமோ.

தஸ்ஸுத்³தா³னம் –

சிந்தா பபாதோ பரிளாஹோ, கூடம் வாலந்த⁴காரோ ச;

சி²க்³க³ளேன ச த்³வே வுத்தா, ஸினேரு அபரே து³வேதி.