9. து³தியகோட்டி²கஸுத்தம்

134. பா³ராணஸியம் விஹரந்தி இஸிபதனே மிக³தா³யே…பே… ‘‘‘அவிஜ்ஜா, அவிஜ்ஜா’தி, ஆவுஸோ கோட்டி²க, வுச்சதி. கதமா நு கோ², ஆவுஸோ, அவிஜ்ஜா, கித்தாவதா ச அவிஜ்ஜாக³தோ ஹோதீ’’தி?

‘‘இதா⁴வுஸோ, அஸ்ஸுதவா புது²ஜ்ஜனோ ரூபஸ்ஸ ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் நப்பஜானாதி. வேத³னாய…பே… ஸஞ்ஞாய… ஸங்கா²ரானம்… விஞ்ஞாணஸ்ஸ ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் நப்பஜானாதி. அயம் வுச்சதாவுஸோ, அவிஜ்ஜா; ஏத்தாவதா ச அவிஜ்ஜாக³தோ ஹோதீ’’தி.

ஏவம் வுத்தே, ஆயஸ்மா ஸாரிபுத்தோ ஆயஸ்மந்தம் மஹாகோட்டி²கம் ஏதத³வோச – ‘‘‘விஜ்ஜா, விஜ்ஜா’தி, ஆவுஸோ கோட்டி²க, வுச்சதி. கதமா நு கோ², ஆவுஸோ, விஜ்ஜா, கித்தாவதா ச விஜ்ஜாக³தோ ஹோதீ’’தி?

‘‘இதா⁴வுஸோ, ஸுதவா அரியஸாவகோ ரூபஸ்ஸ ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் பஜானாதி. வேத³னாய…பே… ஸஞ்ஞாய… ஸங்கா²ரானம்… விஞ்ஞாணஸ்ஸ ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் பஜானாதி. அயம் வுச்சதாவுஸோ, விஜ்ஜா; ஏத்தாவதா ச விஜ்ஜாக³தோ ஹோதீ’’தி. நவமம்.