10. ததியகோட்டி²கஸுத்தம்

135. தஞ்ஞேவ நிதா³னம். ஏகமந்தம் நிஸின்னோ கோ² ஆயஸ்மா ஸாரிபுத்தோ ஆயஸ்மந்தம் மஹாகோட்டி²கம் ஏதத³வோச – ‘‘‘அவிஜ்ஜா, அவிஜ்ஜா’தி, ஆவுஸோ கோட்டி²க, வுச்சதி. கதமா நு கோ², ஆவுஸோ, அவிஜ்ஜா, கித்தாவதா ச அவிஜ்ஜாக³தோ ஹோதீ’’தி?

‘‘இதா⁴வுஸோ, அஸ்ஸுதவா புது²ஜ்ஜனோ ரூபம் நப்பஜானாதி, ரூபஸமுத³யம் நப்பஜானாதி, ரூபனிரோத⁴ம் நப்பஜானாதி, ரூபனிரோத⁴கா³மினிம் படிபத³ம் நப்பஜானாதி. வேத³னம் நப்பஜானாதி…பே… ஸஞ்ஞம்… ஸங்கா²ரே… விஞ்ஞாணம் நப்பஜானாதி, விஞ்ஞாணஸமுத³யம் நப்பஜானாதி, விஞ்ஞாணனிரோத⁴ம் நப்பஜானாதி, விஞ்ஞாணனிரோத⁴கா³மினிம் படிபத³ம் நப்பஜானாதி. அயம் வுச்சதாவுஸோ, அவிஜ்ஜா; ஏத்தாவதா ச அவிஜ்ஜாக³தோ ஹோதீ’’தி.

ஏவம் வுத்தே, ஆயஸ்மா ஸாரிபுத்தோ ஆயஸ்மந்தம் மஹாகோட்டி²கம் ஏதத³வோச – ‘‘‘விஜ்ஜா, விஜ்ஜா’தி, ஆவுஸோ கோட்டி²க, வுச்சதி. கதமா நு கோ², ஆவுஸோ, விஜ்ஜா, கித்தாவதா ச விஜ்ஜாக³தோ ஹோதீ’’தி? ‘‘இதா⁴வுஸோ, ஸுதவா அரியஸாவகோ ரூபம் பஜானாதி, ரூபஸமுத³யம் பஜானாதி, ரூபனிரோத⁴ம் பஜானாதி, ரூபனிரோத⁴கா³மினிம் படிபத³ம் பஜானாதி. வேத³னம்… ஸஞ்ஞம்… ஸங்கா²ரே… விஞ்ஞாணம் பஜானாதி, விஞ்ஞாணஸமுத³யம் பஜானாதி, விஞ்ஞாணனிரோத⁴ம் பஜானாதி, விஞ்ஞாணனிரோத⁴கா³மினிம் படிபத³ம் பஜானாதி. அயம் வுச்சதாவுஸோ, விஜ்ஜா; ஏத்தாவதா ச விஜ்ஜாக³தோ ஹோதீ’’தி. த³ஸமம்.

அவிஜ்ஜாவக்³கோ³ தேரஸமோ.

தஸ்ஸுத்³தா³னம் –

ஸமுத³யத⁴ம்மே தீணி, அஸ்ஸாதோ³ அபரே து³வே;

ஸமுத³யே ச த்³வே வுத்தா, கோட்டி²கே அபரே தயோதி.