14. குக்குளவக்³கோ³

1. குக்குளஸுத்தம்

136. ஸாவத்தி²னிதா³னம். ‘‘ரூபம், பி⁴க்க²வே, குக்குளம், வேத³னா குக்குளா, ஸஞ்ஞா குக்குளா, ஸங்கா²ரா குக்குளா, விஞ்ஞாணம் குக்குளம். ஏவம் பஸ்ஸம், பி⁴க்க²வே, ஸுதவா அரியஸாவகோ ரூபஸ்மிம்பி நிப்³பி³ந்த³தி, வேத³னாயபி நிப்³பி³ந்த³தி, ஸஞ்ஞாயபி நிப்³பி³ந்த³தி, ஸங்கா²ரேஸுபி நிப்³பி³ந்த³தி, விஞ்ஞாணஸ்மிம்பி நிப்³பி³ந்த³தி. நிப்³பி³ந்த³ம் விரஜ்ஜதி; விராகா³ விமுச்சதி. விமுத்தஸ்மிம் விமுத்தமிதி ஞாணம் ஹோதி. ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயா’தி பஜானாதீ’’தி. பட²மம்.

2. அனிச்சஸுத்தம்

137. ஸாவத்தி²னிதா³னம். ‘‘யம், பி⁴க்க²வே, அனிச்சம்; தத்ர வோ ச²ந்தோ³ பஹாதப்³போ³. கிஞ்ச, பி⁴க்க²வே, அனிச்சம்? ரூபம், பி⁴க்க²வே, அனிச்சம்; தத்ர வோ ச²ந்தோ³ பஹாதப்³போ³. வேத³னா அனிச்சா…பே… ஸஞ்ஞா… ஸங்கா²ரா… விஞ்ஞாணம் அனிச்சம்; தத்ர வோ ச²ந்தோ³ பஹாதப்³போ³. யம், பி⁴க்க²வே, அனிச்சம்; தத்ர வோ ச²ந்தோ³ பஹாதப்³போ³’’தி. து³தியம்.

3. து³தியஅனிச்சஸுத்தம்

138. ஸாவத்தி²னிதா³னம். ‘‘யம், பி⁴க்க²வே, அனிச்சம்; தத்ர வோ ராகோ³ பஹாதப்³போ³. கிஞ்ச, பி⁴க்க²வே, அனிச்சம்? ரூபம், பி⁴க்க²வே, அனிச்சம்; தத்ர வோ ராகோ³ பஹாதப்³போ³. வேத³னா அனிச்சா… ஸஞ்ஞா… ஸங்கா²ரா… விஞ்ஞாணம் அனிச்சம்; தத்ர வோ ராகோ³ பஹாதப்³போ³. யம், பி⁴க்க²வே, அனிச்சம்; தத்ர வோ ராகோ³ பஹாதப்³போ³’’தி. ததியம்.

4. ததியஅனிச்சஸுத்தம்

139. ஸாவத்தி²னிதா³னம். ‘‘யம், பி⁴க்க²வே, அனிச்சம்; தத்ர வோ ச²ந்த³ராகோ³ பஹாதப்³போ³. கிஞ்ச, பி⁴க்க²வே, அனிச்சம்? ரூபம், பி⁴க்க²வே, அனிச்சம், தத்ர வோ ச²ந்த³ராகோ³ பஹாதப்³போ³. வேத³னா அனிச்சா… ஸஞ்ஞா… ஸங்கா²ரா… விஞ்ஞாணம் அனிச்சம்; தத்ர வோ ச²ந்த³ராகோ³ பஹாதப்³போ³. யம், பி⁴க்க²வே, அனிச்சம்; தத்ர வோ ச²ந்த³ராகோ³ பஹாதப்³போ³’’தி. சதுத்த²ம்.

5. து³க்க²ஸுத்தம்

140. ஸாவத்தி²னிதா³னம். ‘‘யம், பி⁴க்க²வே, து³க்க²ம்; தத்ர வோ ச²ந்தோ³ பஹாதப்³போ³…பே… யம், பி⁴க்க²வே, து³க்க²ம்; தத்ர வோ ச²ந்தோ³ பஹாதப்³போ³’’தி. பஞ்சமம்.

6. து³தியது³க்க²ஸுத்தம்

141. ஸாவத்தி²னிதா³னம். ‘‘யம், பி⁴க்க²வே, து³க்க²ம்; தத்ர வோ ராகோ³ பஹாதப்³போ³…பே… யம், பி⁴க்க²வே, து³க்க²ம்; தத்ர வோ ராகோ³ பஹாதப்³போ³’’தி. ச²ட்ட²ம்.

7. ததியது³க்க²ஸுத்தம்

142. ஸாவத்தி²னிதா³னம். ‘‘யம், பி⁴க்க²வே, து³க்க²ம்; தத்ர வோ ச²ந்த³ராகோ³ பஹாதப்³போ³…பே… யம், பி⁴க்க²வே, து³க்க²ம்; தத்ர வோ ச²ந்த³ராகோ³ பஹாதப்³போ³’’தி. ஸத்தமம்.

8. அனத்தஸுத்தம்

143. ஸாவத்தி²னிதா³னம். ‘‘யோ, பி⁴க்க²வே, அனத்தா; தத்ர வோ ச²ந்தோ³ பஹாதப்³போ³. கோ ச, பி⁴க்க²வே, அனத்தா? ரூபம், பி⁴க்க²வே, அனத்தா; தத்ர வோ ச²ந்தோ³ பஹாதப்³போ³. வேத³னா அனத்தா… ஸஞ்ஞா… ஸங்கா²ரா… விஞ்ஞாணம் அனத்தா; தத்ர வோ ச²ந்தோ³ பஹாதப்³போ³. யோ, பி⁴க்க²வே, அனத்தா; தத்ர வோ ச²ந்தோ³ பஹாதப்³போ³’’தி. அட்ட²மம்.

9. து³தியஅனத்தஸுத்தம்

144. ஸாவத்தி²னிதா³னம். ‘‘யோ, பி⁴க்க²வே, அனத்தா; தத்ர வோ ராகோ³ பஹாதப்³போ³. கோ ச, பி⁴க்க²வே, அனத்தா? ரூபம், பி⁴க்க²வே, அனத்தா; தத்ர வோ ராகோ³ பஹாதப்³போ³. வேத³னா அனத்தா… ஸஞ்ஞா… ஸங்கா²ரா… விஞ்ஞாணம் அனத்தா; தத்ர வோ ராகோ³ பஹாதப்³போ³. யோ, பி⁴க்க²வே, அனத்தா; தத்ர வோ ராகோ³ பஹாதப்³போ³’’தி. நவமம்.

10. ததியஅனத்தஸுத்தம்

145. ஸாவத்தி²னிதா³னம். ‘‘யோ, பி⁴க்க²வே, அனத்தா; தத்ர வோ ச²ந்த³ராகோ³ பஹாதப்³போ³. கோ ச, பி⁴க்க²வே, அனத்தா? ரூபம், பி⁴க்க²வே, அனத்தா; தத்ர வோ ச²ந்த³ராகோ³ பஹாதப்³போ³. வேத³னா அனத்தா… ஸஞ்ஞா… ஸங்கா²ரா… விஞ்ஞாணம் அனத்தா; தத்ர வோ ச²ந்த³ராகோ³ பஹாதப்³போ³. யோ, பி⁴க்க²வே, அனத்தா; தத்ர வோ ச²ந்த³ராகோ³ பஹாதப்³போ³’’தி. த³ஸமம்.

11. நிப்³பி³தா³ப³ஹுலஸுத்தம்

146. ஸாவத்தி²னிதா³னம். ‘‘ஸத்³தா⁴பப்³ப³ஜிதஸ்ஸ, பி⁴க்க²வே, குலபுத்தஸ்ஸ அயமனுத⁴ம்மோ ஹோதி – யம் ரூபே நிப்³பி³தா³ப³ஹுலோ [நிப்³பி³தா³ப³ஹுலம் (ஸ்யா. கம். பீ. க.)] விஹரேய்ய. வேத³னாய…பே… ஸஞ்ஞாய… ஸங்கா²ரேஸு… விஞ்ஞாணே நிப்³பி³தா³ப³ஹுலோ விஹரேய்ய. யோ ரூபே நிப்³பி³தா³ப³ஹுலோ விஹரந்தோ, வேத³னாய… ஸஞ்ஞாய… ஸங்கா²ரேஸு… விஞ்ஞாணே நிப்³பி³தா³ப³ஹுலோ விஹரந்தோ ரூபம் பரிஜானாதி, வேத³னம்… ஸஞ்ஞம்… ஸங்கா²ரே… விஞ்ஞாணம் பரிஜானாதி; ஸோ ரூபம் பரிஜானம் வேத³னம் பரிஜானம் ஸஞ்ஞம் பரிஜானம் ஸங்கா²ரே பரிஜானம் விஞ்ஞாணம் பரிஜானம் பரிமுச்சதி ரூபம்ஹா, பரிமுச்சதி வேத³னாய, பரிமுச்சதி ஸஞ்ஞாய, பரிமுச்சதி ஸங்கா²ரேஹி, பரிமுச்சதி விஞ்ஞாணம்ஹா, பரிமுச்சதி ஜாதியா ஜராய மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி; ‘பரிமுச்சதி து³க்க²ஸ்மா’தி வதா³மீ’’தி. ஏகாத³ஸமம்.

12. அனிச்சானுபஸ்ஸீஸுத்தம்

147. ஸாவத்தி²னிதா³னம். ‘‘ஸத்³தா⁴பப்³ப³ஜிதஸ்ஸ, பி⁴க்க²வே, குலபுத்தஸ்ஸ அயமனுத⁴ம்மோ ஹோதி – யம் ரூபே அனிச்சானுபஸ்ஸீ விஹரேய்ய. வேத³னாய… ஸஞ்ஞாய… ஸங்கா²ரேஸு… விஞ்ஞாணே அனிச்சானுபஸ்ஸீ விஹரேய்ய…பே… ‘பரிமுச்சதி து³க்க²ஸ்மா’தி வதா³மீ’’தி. த்³வாத³ஸமம்.

13. து³க்கா²னுபஸ்ஸீஸுத்தம்

148. ஸாவத்தி²னிதா³னம். ‘‘ஸத்³தா⁴பப்³ப³ஜிதஸ்ஸ, பி⁴க்க²வே, குலபுத்தஸ்ஸ அயமனுத⁴ம்மோ ஹோதி – யம் ரூபே து³க்கா²னுபஸ்ஸீ விஹரேய்ய. வேத³னாய… ஸஞ்ஞாய… ஸங்கா²ரேஸு… விஞ்ஞாணே து³க்கா²னுபஸ்ஸீ விஹரேய்ய…பே… ‘பரிமுச்சதி து³க்க²ஸ்மா’தி வதா³மீ’’தி. தேரஸமம்.

14. அனத்தானுபஸ்ஸீஸுத்தம்

149. ஸாவத்தி²னிதா³னம். ‘‘ஸத்³தா⁴பப்³ப³ஜிதஸ்ஸ, பி⁴க்க²வே, குலபுத்தஸ்ஸ அயமனுத⁴ம்மோ ஹோதி – யம் ரூபே அனத்தானுபஸ்ஸீ விஹரேய்ய. வேத³னாய… ஸஞ்ஞாய… ஸங்கா²ரேஸு… விஞ்ஞாணே அனத்தானுபஸ்ஸீ விஹரேய்ய. (ஸோ ரூபே) அனத்தானுபஸ்ஸீ விஹரந்தோ, வேத³னாய… ஸஞ்ஞாய… ஸங்கா²ரேஸு… விஞ்ஞாணே அனத்தானுபஸ்ஸீ விஹரந்தோ ரூபம் பரிஜானாதி, வேத³னம்…பே… ஸஞ்ஞம்… ஸங்கா²ரே… விஞ்ஞாணம் பரிஜானாதி. ஸோ ரூபம் பரிஜானம் வேத³னம் பரிஜானம் ஸஞ்ஞம் பரிஜானம் ஸங்கா²ரே பரிஜானம் விஞ்ஞாணம் பரிஜானம் பரிமுச்சதி ரூபம்ஹா, பரிமுச்சதி வேத³னாய, பரிமுச்சதி ஸஞ்ஞாய, பரிமுச்சதி ஸங்கா²ரேஹி, பரிமுச்சதி விஞ்ஞாணம்ஹா, பரிமுச்சதி ஜாதியா ஜராய மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி; ‘பரிமுச்சதி து³க்க²ஸ்மா’தி வதா³மீ’’தி. சுத்³த³ஸமம்.

குக்குளவக்³கோ³ சுத்³த³ஸமோ.

தஸ்ஸுத்³தா³னம் –

குக்குளா தயோ அனிச்சேன, து³க்கே²ன அபரே தயோ;

அனத்தேன தயோ வுத்தா, குலபுத்தேன த்³வே து³காதி.