1. நதீ³ஸுத்தம்

93. ஸாவத்தி²னிதா³னம். ‘‘ஸேய்யதா²பி, பி⁴க்க²வே, நதீ³ பப்³ப³தேய்யா ஓஹாரினீ தூ³ரங்க³மா ஸீக⁴ஸோதா. தஸ்ஸா உபோ⁴ஸு தீரேஸு [உப⁴தோ தீரே (ஸீ.), உப⁴தோ தீரேஸு (ஸ்யா. கம்.)] காஸா சேபி ஜாதா அஸ்ஸு, தே நம் அஜ்ஜோ²லம்பே³ய்யும்; குஸா சேபி ஜாதா அஸ்ஸு, தே நம் அஜ்ஜோ²லம்பே³ய்யும்; பப்³ப³ஜா [ப³ப்³ப³ஜா (ஸீ. பீ.)] சேபி ஜாதா அஸ்ஸு, தே நம் அஜ்ஜோ²லம்பே³ய்யும்; பீ³ரணா சேபி ஜாதா அஸ்ஸு, தே நம் அஜ்ஜோ²லம்பே³ய்யும்; ருக்கா² சேபி ஜாதா அஸ்ஸு, தே நம் அஜ்ஜோ²லம்பே³ய்யும். தஸ்ஸா புரிஸோ ஸோதேன வுய்ஹமானோ காஸே சேபி க³ண்ஹேய்ய, தே பலுஜ்ஜேய்யும். ஸோ ததோனிதா³னம் அனயப்³யஸனம் ஆபஜ்ஜேய்ய. குஸே சேபி க³ண்ஹேய்ய, பப்³ப³ஜே சேபி க³ண்ஹேய்ய, பீ³ரணே சேபி க³ண்ஹேய்ய, ருக்கே² சேபி க³ண்ஹேய்ய, தே பலுஜ்ஜேய்யும். ஸோ ததோனிதா³னம் அனயப்³யஸனம் ஆபஜ்ஜேய்ய. ஏவமேவ கோ², பி⁴க்க²வே, அஸ்ஸுதவா புது²ஜ்ஜனோ அரியானம் அத³ஸ்ஸாவீ அரியத⁴ம்மஸ்ஸ அகோவிதோ³ அரியத⁴ம்மே அவினீதோ, ஸப்புரிஸானம் அத³ஸ்ஸாவீ ஸப்புரிஸத⁴ம்மஸ்ஸ அகோவிதோ³ ஸப்புரிஸத⁴ம்மே அவினீதோ ரூபம் அத்ததோ ஸமனுபஸ்ஸதி, ரூபவந்தம் வா அத்தானம்; அத்தனி வா ரூபம், ரூபஸ்மிம் வா அத்தானம். தஸ்ஸ தம் ரூபம் பலுஜ்ஜதி. ஸோ ததோனிதா³னம் அனயப்³யஸனம் ஆபஜ்ஜதி. வேத³னம்… ஸஞ்ஞம்… ஸங்கா²ரே… விஞ்ஞாணம் அத்ததோ ஸமனுபஸ்ஸதி, விஞ்ஞாணவந்தம் வா அத்தானம்; அத்தனி வா விஞ்ஞாணம், விஞ்ஞாணஸ்மிம் வா அத்தானம். தஸ்ஸ தம் விஞ்ஞாணம் பலுஜ்ஜதி. ஸோ ததோனிதா³னம் அனயப்³யஸனம் ஆபஜ்ஜதி. தம் கிம் மஞ்ஞத², பி⁴க்க²வே, ரூபம் நிச்சம் வா அனிச்சம் வா’’தி? ‘‘அனிச்சம் ப⁴ந்தே’’. ‘‘வேத³னா… ஸஞ்ஞா… ஸங்கா²ரா… விஞ்ஞாணம் நிச்சம் வா அனிச்சம் வா’’தி? ‘‘அனிச்சம் ப⁴ந்தே’’. ‘‘தஸ்மாதிஹ…பே… ஏவம் பஸ்ஸம்…பே… நாபரம் இத்த²த்தாயாதி பஜானாதீ’’தி. பட²மம்.