2. புப்ப²ஸுத்தம்

94. ஸாவத்தி²னிதா³னம். ‘‘நாஹம், பி⁴க்க²வே, லோகேன விவதா³மி, லோகோவ மயா விவத³தி. ந, பி⁴க்க²வே, த⁴ம்மவாதீ³ கேனசி லோகஸ்மிம் விவத³தி. யம், பி⁴க்க²வே, நத்தி²ஸம்மதம் லோகே பண்டி³தானம், அஹம்பி தம் ‘நத்தீ²’தி வதா³மி. யம், பி⁴க்க²வே, அத்தி²ஸம்மதம் லோகே பண்டி³தானம், அஹம்பி தம் ‘அத்தீ²’தி வதா³மி’’.

‘‘கிஞ்ச, பி⁴க்க²வே, நத்தி²ஸம்மதம் லோகே பண்டி³தானம், யமஹம் ‘நத்தீ²’தி வதா³மி? ரூபம், பி⁴க்க²வே, நிச்சம் து⁴வம் ஸஸ்ஸதம் அவிபரிணாமத⁴ம்மம் நத்தி²ஸம்மதம் லோகே பண்டி³தானம்; அஹம்பி தம் ‘நத்தீ²’தி வதா³மி. வேத³னா… ஸஞ்ஞா… ஸங்கா²ரா… விஞ்ஞாணம் நிச்சம் து⁴வம் ஸஸ்ஸதம் அவிபரிணாமத⁴ம்மம் நத்தி²ஸம்மதம் லோகே பண்டி³தானம்; அஹம்பி தம் ‘நத்தீ²’தி வதா³மி. இத³ம் கோ², பி⁴க்க²வே, நத்தி²ஸம்மதம் லோகே பண்டி³தானம்; அஹம்பி தம் ‘நத்தீ²’தி வதா³மி’’.

‘‘கிஞ்ச, பி⁴க்க²வே, அத்தி²ஸம்மதம் லோகே பண்டி³தானம், யமஹம் ‘அத்தீ²’தி வதா³மி? ரூபம், பி⁴க்க²வே, அனிச்சம் து³க்க²ம் விபரிணாமத⁴ம்மம் அத்தி²ஸம்மதம் லோகே பண்டி³தானம்; அஹம்பி தம் ‘அத்தீ²’தி வதா³மி. வேத³னா அனிச்சா…பே… விஞ்ஞாணம் அனிச்சம் து³க்க²ம் விபரிணாமத⁴ம்மம் அத்தி²ஸம்மதம் லோகே பண்டி³தானம்; அஹம்பி தம் ‘அத்தீ²’தி வதா³மி. இத³ம் கோ², பி⁴க்க²வே, அத்தி²ஸம்மதம் லோகே பண்டி³தானம்; அஹம்பி தம் ‘அத்தீ²’தி வதா³மி’’.

‘‘அத்தி², பி⁴க்க²வே, லோகே லோகத⁴ம்மோ, தம் ததா²க³தோ அபி⁴ஸம்பு³ஜ்ஜ²தி அபி⁴ஸமேதி; அபி⁴ஸம்பு³ஜ்ஜி²த்வா அபி⁴ஸமேத்வா தம் ஆசிக்க²தி தே³ஸேதி பஞ்ஞபேதி பட்ட²பேதி விவரதி விப⁴ஜதி உத்தானீகரோதி.

‘‘கிஞ்ச, பி⁴க்க²வே, லோகே லோகத⁴ம்மோ, தம் ததா²க³தோ அபி⁴ஸம்பு³ஜ்ஜ²தி அபி⁴ஸமேதி, அபி⁴ஸம்பு³ஜ்ஜி²த்வா அபி⁴ஸமேத்வா ஆசிக்க²தி தே³ஸேதி பஞ்ஞபேதி பட்ட²பேதி விவரதி விப⁴ஜதி உத்தானீகரோதி? ரூபம், பி⁴க்க²வே, லோகே லோகத⁴ம்மோ தம் ததா²க³தோ அபி⁴ஸம்பு³ஜ்ஜ²தி அபி⁴ஸமேதி. அபி⁴ஸம்பு³ஜ்ஜி²த்வா அபி⁴ஸமேத்வா ஆசிக்க²தி தே³ஸேதி பஞ்ஞபேதி பட்ட²பேதி விவரதி விப⁴ஜதி உத்தானீகரோதி.

‘‘யோ, பி⁴க்க²வே, ததா²க³தேன ஏவம் ஆசிக்கி²யமானே தே³ஸியமானே பஞ்ஞபியமானே பட்ட²பியமானே விவரியமானே விப⁴ஜியமானே உத்தானீகரியமானே ந ஜானாதி ந பஸ்ஸதி தமஹம், பி⁴க்க²வே, பா³லம் புது²ஜ்ஜனம் அந்த⁴ம் அசக்கு²கம் அஜானந்தம் அபஸ்ஸந்தம் கிந்தி கரோமி! வேத³னா, பி⁴க்க²வே, லோகே லோகத⁴ம்மோ…பே… ஸஞ்ஞா, பி⁴க்க²வே… ஸங்கா²ரா, பி⁴க்க²வே… விஞ்ஞாணம், பி⁴க்க²வே, லோகே லோகத⁴ம்மோ தம் ததா²க³தோ அபி⁴ஸம்பு³ஜ்ஜ²தி அபி⁴ஸமேதி. அபி⁴ஸம்பு³ஜ்ஜி²த்வா அபி⁴ஸமேத்வா ஆசிக்க²தி தே³ஸேதி பஞ்ஞபேதி பட்ட²பேதி விவரதி விப⁴ஜதி உத்தானீகரோதி.

‘‘யோ, பி⁴க்க²வே, ததா²க³தேன ஏவம் ஆசிக்கி²யமானே தே³ஸியமானே பஞ்ஞபியமானே பட்ட²பியமானே விவரியமானே விப⁴ஜியமானே உத்தானீகரியமானே ந ஜானாதி ந பஸ்ஸதி தமஹம், பி⁴க்க²வே, பா³லம் புது²ஜ்ஜனம் அந்த⁴ம் அசக்கு²கம் அஜானந்தம் அபஸ்ஸந்தம் கிந்தி கரோமி!

‘‘ஸேய்யதா²பி, பி⁴க்க²வே, உப்பலம் வா பது³மம் வா புண்ட³ரீகம் வா உத³கே ஜாதம் உத³கே ஸம்வட்³ட⁴ம் உத³கா அச்சுக்³க³ம்ம டா²தி [திட்ட²ந்தம் (க.)] அனுபலித்தம் உத³கேன; ஏவமேவ கோ², பி⁴க்க²வே, ததா²க³தோ லோகே ஜாதோ லோகே ஸம்வட்³டோ⁴ லோகம் அபி⁴பு⁴ய்ய விஹரதி அனுபலித்தோ லோகேனா’’தி. து³தியம்.