4. இஸ்ஸத்தஸுத்தம்

135. ஸாவத்தி²னிதா³னம். ஏகமந்தம் நிஸின்னோ கோ² ராஜா பஸேனதி³ கோஸலோ ப⁴க³வந்தம் ஏதத³வோச – ‘‘கத்த² நு கோ², ப⁴ந்தே, தா³னம் தா³தப்³ப³’’ந்தி? ‘‘யத்த² கோ², மஹாராஜ, சித்தம் பஸீத³தீ’’தி. ‘‘கத்த² பன, ப⁴ந்தே, தி³ன்னம் மஹப்ப²ல’’ந்தி? ‘‘அஞ்ஞம் கோ² ஏதம், மஹாராஜ, கத்த² தா³னம் தா³தப்³ப³ம், அஞ்ஞம் பனேதம் கத்த² தி³ன்னம் மஹப்ப²லந்தி? ஸீலவதோ கோ², மஹாராஜ, தி³ன்னம் மஹப்ப²லம், நோ ததா² து³ஸ்ஸீலே. தேன ஹி, மஹாராஜ, தஞ்ஞேவேத்த² படிபுச்சி²ஸ்ஸாமி. யதா², தே க²மேய்ய, ததா² நம் ப்³யாகரேய்யாஸி. தம் கிம் மஞ்ஞஸி, மஹாராஜ, இத⁴ த்யஸ்ஸ யுத்³த⁴ம் பச்சுபட்டி²தம் ஸங்கா³மோ ஸமுபப்³யூள்ஹோ [ஸமூபப்³பூ³ள்ஹோ (ஸீ.), ஸமுபப்³பு³ள்ஹோ (பீ.)]. அத² ஆக³ச்சே²ய்ய க²த்தியகுமாரோ அஸிக்கி²தோ அகதஹத்தோ² அகதயோக்³கோ³ அகதூபாஸனோ பீ⁴ரு ச²ம்பீ⁴ உத்ராஸீ பலாயீ. ப⁴ரேய்யாஸி தம் புரிஸம், அத்தோ² ச தே தாதி³ஸேன புரிஸேனா’’தி? ‘‘நாஹம், ப⁴ந்தே, ப⁴ரேய்யம் தம் புரிஸம், ந ச மே அத்தோ² தாதி³ஸேன புரிஸேனா’’தி. ‘‘அத² ஆக³ச்சே²ய்ய ப்³ராஹ்மணகுமாரோ அஸிக்கி²தோ…பே… அத² ஆக³ச்சே²ய்ய வேஸ்ஸகுமாரோ அஸிக்கி²தோ…பே… அத² ஆக³ச்சே²ய்ய ஸுத்³த³குமாரோ அஸிக்கி²தோ…பே… ந ச மே அத்தோ² தாதி³ஸேன புரிஸேனா’’தி.

‘‘தம் கிம் மஞ்ஞஸி, மஹாராஜ, இத⁴ த்யஸ்ஸ யுத்³த⁴ம் பச்சுபட்டி²தம் ஸங்கா³மோ ஸமுபப்³யூள்ஹோ. அத² ஆக³ச்சே²ய்ய க²த்தியகுமாரோ ஸுஸிக்கி²தோ கதஹத்தோ² கதயோக்³கோ³ கதூபாஸனோ அபீ⁴ரு அச்ச²ம்பீ⁴ அனுத்ராஸீ அபலாயீ. ப⁴ரேய்யாஸி தம் புரிஸம், அத்தோ² ச தே தாதி³ஸேன புரிஸேனா’’தி? ‘‘ப⁴ரேய்யாஹம், ப⁴ந்தே, தம் புரிஸம், அத்தோ² ச மே தாதி³ஸேன புரிஸேனா’’தி. ‘‘அத² ஆக³ச்சே²ய்ய ப்³ராஹ்மணகுமாரோ…பே… அத² ஆக³ச்சே²ய்ய வேஸ்ஸகுமாரோ…பே… அத² ஆக³ச்சே²ய்ய ஸுத்³த³குமாரோ ஸுஸிக்கி²தோ கதஹத்தோ² கதயோக்³கோ³ கதூபாஸனோ அபீ⁴ரு அச்ச²ம்பீ⁴ அனுத்ராஸீ அபலாயீ. ப⁴ரேய்யாஸி தம் புரிஸம், அத்தோ² ச தே தாதி³ஸேன புரிஸேனா’’தி? ‘‘ப⁴ரேய்யாஹம், ப⁴ந்தே, தம் புரிஸம், அத்தோ² ச மே தாதி³ஸேன புரிஸேனா’’தி.

‘‘ஏவமேவ கோ², மஹாராஜ, யஸ்மா கஸ்மா சேபி [யஸ்மா சேபி (ஸீ. ஸ்யா. கம். க.)] குலா அகா³ரஸ்மா அனகா³ரியம் பப்³ப³ஜிதோ ஹோதி, ஸோ ச ஹோதி பஞ்சங்க³விப்பஹீனோ பஞ்சங்க³ஸமன்னாக³தோ, தஸ்மிம் தி³ன்னம் மஹப்ப²லம் ஹோதி. கதமானி பஞ்சங்கா³னி பஹீனானி ஹோந்தி? காமச்ச²ந்தோ³ பஹீனோ ஹோதி, ப்³யாபாதோ³ பஹீனோ ஹோதி, தி²னமித்³த⁴ம் பஹீனம் ஹோதி, உத்³த⁴ச்சகுக்குச்சம் பஹீனம் ஹோதி, விசிகிச்சா² பஹீனா ஹோதி. இமானி பஞ்சங்கா³னி பஹீனானி ஹோந்தி. கதமேஹி பஞ்சஹங்கே³ஹி ஸமன்னாக³தோ ஹோதி? அஸேக்கே²ன ஸீலக்க²ந்தே⁴ன ஸமன்னாக³தோ ஹோதி, அஸேக்கே²ன ஸமாதி⁴க்க²ந்தே⁴ன ஸமன்னாக³தோ ஹோதி, அஸேக்கே²ன பஞ்ஞாக்க²ந்தே⁴ன ஸமன்னாக³தோ ஹோதி, அஸேக்கே²ன விமுத்திக்க²ந்தே⁴ன ஸமன்னாக³தோ ஹோதி, அஸேக்கே²ன விமுத்திஞாணத³ஸ்ஸனக்க²ந்தே⁴ன ஸமன்னாக³தோ ஹோதி. இமேஹி பஞ்சஹங்கே³ஹி ஸமன்னாக³தோ ஹோதி. இதி பஞ்சங்க³விப்பஹீனே பஞ்சங்க³ஸமன்னாக³தே தி³ன்னம் மஹப்ப²ல’’ந்தி. இத³மவோச ப⁴க³வா…பே… ஸத்தா² –

‘‘இஸ்ஸத்தம் [இஸ்ஸத்த²ம் (ஸீ. ஸ்யா. கம்.)] ப³லவீரியஞ்ச [ப³லவிரியஞ்ச (ஸீ. ஸ்யா. கம். பீ.)], யஸ்மிம் விஜ்ஜேத² மாணவே;

தம் யுத்³த⁴த்தோ² ப⁴ரே ராஜா, நாஸூரம் ஜாதிபச்சயா.

‘‘ததே²வ க²ந்திஸோரச்சம், த⁴ம்மா யஸ்மிம் பதிட்டி²தா;

அரியவுத்திம் மேதா⁴விம், ஹீனஜச்சம்பி பூஜயே.

‘‘காரயே அஸ்ஸமே ரம்மே, வாஸயேத்த² ப³ஹுஸ்ஸுதே;

பபஞ்ச விவனே கயிரா, து³க்³கே³ ஸங்கமனானி ச.

‘‘அன்னம் பானம் கா²த³னீயம், வத்த²ஸேனாஸனானி ச;

த³தே³ய்ய உஜுபூ⁴தேஸு, விப்பஸன்னேன சேதஸா.

‘‘யதா² ஹி மேகோ⁴ த²னயம், விஜ்ஜுமாலீ ஸதக்ககு;

த²லம் நின்னஞ்ச பூரேதி, அபி⁴வஸ்ஸம் வஸுந்த⁴ரம்.

‘‘ததே²வ ஸத்³தோ⁴ ஸுதவா, அபி⁴ஸங்க²ச்ச போ⁴ஜனம்;

வனிப்³ப³கே தப்பயதி, அன்னபானேன பண்டி³தோ.

‘‘ஆமோத³மானோ பகிரேதி, தே³த² தே³தா²தி பா⁴ஸதி;

தம் ஹிஸ்ஸ க³ஜ்ஜிதம் ஹோதி, தே³வஸ்ஸேவ பவஸ்ஸதோ;

ஸா புஞ்ஞதா⁴ரா விபுலா, தா³தாரம் அபி⁴வஸ்ஸதீ’’தி.