5. பப்³ப³தூபமஸுத்தம்

136. ஸாவத்தி²னிதா³னம். ஏகமந்தம் நிஸின்னம் கோ² ராஜானம் பஸேனதி³ம் கோஸலம் ப⁴க³வா ஏதத³வோச – ‘‘ஹந்த³, குதோ நு த்வம், மஹாராஜ, ஆக³ச்ச²ஸி தி³வா தி³வஸ்ஸா’’தி? ‘‘யானி தானி, ப⁴ந்தே, ரஞ்ஞம் க²த்தியானம் முத்³தா⁴வஸித்தானம் இஸ்ஸரியமத³மத்தானம் காமகே³த⁴பரியுட்டி²தானம் ஜனபத³த்தா²வரியப்பத்தானம் மஹந்தம் பத²விமண்ட³லம் அபி⁴விஜிய அஜ்ஜா²வஸந்தானம் ராஜகரணீயானி ப⁴வந்தி, தேஸு க்²வாஹம், ஏதரஹி உஸ்ஸுக்கமாபன்னோ’’தி.

‘‘தம் கிம் மஞ்ஞஸி, மஹாராஜ, இத⁴ தே புரிஸோ ஆக³ச்சே²ய்ய புரத்தி²மாய தி³ஸாய ஸத்³தா⁴யிகோ பச்சயிகோ. ஸோ தம் உபஸங்கமித்வா ஏவம் வதே³ய்ய – ‘யக்³கே⁴, மஹாராஜ, ஜானேய்யாஸி, அஹம் ஆக³ச்சா²மி புரத்தி²மாய தி³ஸாய. தத்த²த்³த³ஸம் மஹந்தம் பப்³ப³தம் அப்³ப⁴ஸமம் ஸப்³பே³ பாணே நிப்போதே²ந்தோ ஆக³ச்ச²தி. யம் தே, மஹாராஜ, கரணீயம், தம் கரோஹீ’தி. அத² து³தியோ புரிஸோ ஆக³ச்சே²ய்ய பச்சி²மாய தி³ஸாய…பே… அத² ததியோ புரிஸோ ஆக³ச்சே²ய்ய உத்தராய தி³ஸாய…பே… அத² சதுத்தோ² புரிஸோ ஆக³ச்சே²ய்ய த³க்கி²ணாய தி³ஸாய ஸத்³தா⁴யிகோ பச்சயிகோ. ஸோ தம் உபஸங்கமித்வா ஏவம் வதே³ய்ய – ‘யக்³கே⁴ மஹாராஜ, ஜானேய்யாஸி, அஹம் ஆக³ச்சா²மி த³க்கி²ணாய தி³ஸாய. தத்த²த்³த³ஸம் மஹந்தம் பப்³ப³தம் அப்³ப⁴ஸமம் ஸப்³பே³ பாணே நிப்போதே²ந்தோ ஆக³ச்ச²தி. யம் தே, மஹாராஜ, கரணீயம் தம் கரோஹீ’தி. ஏவரூபே தே, மஹாராஜ, மஹதி மஹப்³ப⁴யே ஸமுப்பன்னே தா³ருணே மனுஸ்ஸக்க²யே [மனுஸ்ஸகாயே (க.)] து³ல்லபே⁴ மனுஸ்ஸத்தே கிமஸ்ஸ கரணீய’’ந்தி?

‘‘ஏவரூபே மே, ப⁴ந்தே, மஹதி மஹப்³ப⁴யே ஸமுப்பன்னே தா³ருணே மனுஸ்ஸக்க²யே து³ல்லபே⁴ மனுஸ்ஸத்தே கிமஸ்ஸ கரணீயம் அஞ்ஞத்ர த⁴ம்மசரியாய அஞ்ஞத்ர ஸமசரியாய அஞ்ஞத்ர குஸலகிரியாய அஞ்ஞத்ர புஞ்ஞகிரியாயா’’தி?

‘‘ஆரோசேமி கோ² தே, மஹாராஜ, படிவேதே³மி கோ² தே, மஹாராஜ, அதி⁴வத்ததி கோ² தம், மஹாராஜ, ஜராமரணம். அதி⁴வத்தமானே சே தே, மஹாராஜ, ஜராமரணே கிமஸ்ஸ கரணீய’’ந்தி? ‘‘அதி⁴வத்தமானே ச மே, ப⁴ந்தே, ஜராமரணே கிமஸ்ஸ கரணீயம் அஞ்ஞத்ர த⁴ம்மசரியாய ஸமசரியாய குஸலகிரியாய புஞ்ஞகிரியாய? யானி தானி, ப⁴ந்தே, ரஞ்ஞம் க²த்தியானம் முத்³தா⁴வஸித்தானம் இஸ்ஸரியமத³மத்தானம் காமகே³த⁴பரியுட்டி²தானம் ஜனபத³த்தா²வரியப்பத்தானம் மஹந்தம் பத²விமண்ட³லம் அபி⁴விஜிய அஜ்ஜா²வஸந்தானம் ஹத்தி²யுத்³தா⁴னி ப⁴வந்தி; தேஸம்பி, ப⁴ந்தே, ஹத்தி²யுத்³தா⁴னம் நத்தி² க³தி நத்தி² விஸயோ அதி⁴வத்தமானே ஜராமரணே. யானிபி தானி, ப⁴ந்தே, ரஞ்ஞம் க²த்தியானம் முத்³தா⁴வஸித்தானம்…பே… அஜ்ஜா²வஸந்தானம் அஸ்ஸயுத்³தா⁴னி ப⁴வந்தி…பே… ரத²யுத்³தா⁴னி ப⁴வந்தி …பே… பத்தியுத்³தா⁴னி ப⁴வந்தி; தேஸம்பி, ப⁴ந்தே, பத்தியுத்³தா⁴னம் நத்தி² க³தி நத்தி² விஸயோ அதி⁴வத்தமானே ஜராமரணே. ஸந்தி கோ² பன, ப⁴ந்தே, இமஸ்மிம் ராஜகுலே மந்தினோ மஹாமத்தா, யே பஹோந்தி [யேஸம் ஹோந்தி (க.)] ஆக³தே பச்சத்தி²கே மந்தேஹி பே⁴த³யிதும். தேஸம்பி, ப⁴ந்தே, மந்தயுத்³தா⁴னம் நத்தி² க³தி நத்தி² விஸயோ அதி⁴வத்தமானே ஜராமரணே. ஸம்விஜ்ஜதி கோ² பன, ப⁴ந்தே, இமஸ்மிம் ராஜகுலே பஹூதம் ஹிரஞ்ஞஸுவண்ணம் பூ⁴மிக³தஞ்சேவ வேஹாஸட்ட²ஞ்ச, யேன மயம் பஹோம ஆக³தே பச்சத்தி²கே த⁴னேன உபலாபேதும். தேஸம்பி, ப⁴ந்தே, த⁴னயுத்³தா⁴னம் நத்தி² க³தி நத்தி² விஸயோ அதி⁴வத்தமானே ஜராமரணே. அதி⁴வத்தமானே ச மே, ப⁴ந்தே, ஜராமரணே கிமஸ்ஸ கரணீயம் அஞ்ஞத்ர த⁴ம்மசரியாய ஸமசரியாய குஸலகிரியாய புஞ்ஞகிரியாயா’’தி?

‘‘ஏவமேதம், மஹாராஜ, ஏவமேதம், மஹாராஜ! அதி⁴வத்தமானே ஜராமரணே கிமஸ்ஸ கரணீயம் அஞ்ஞத்ர த⁴ம்மசரியாய ஸமசரியாய குஸலகிரியாய புஞ்ஞகிரியாயா’’தி? இத³மவோச ப⁴க³வா…பே… ஸத்தா² –

‘‘யதா²பி ஸேலா விபுலா, நப⁴ம் ஆஹச்ச பப்³ப³தா;

ஸமந்தானுபரியாயேய்யும், நிப்போதே²ந்தோ சதுத்³தி³ஸா.

‘‘ஏவம் ஜரா ச மச்சு ச, அதி⁴வத்தந்தி பாணினே [பாணினோ (ஸீ. ஸ்யா. கம். பீ.)];

க²த்தியே ப்³ராஹ்மணே வேஸ்ஸே, ஸுத்³தே³ சண்டா³லபுக்குஸே;

ந கிஞ்சி [ந கஞ்சி (?)] பரிவஜ்ஜேதி, ஸப்³ப³மேவாபி⁴மத்³த³தி.

‘‘ந தத்த² ஹத்தீ²னம் பூ⁴மி, ந ரதா²னம் ந பத்தியா;

ந சாபி மந்தயுத்³தே⁴ன, ஸக்கா ஜேதும் த⁴னேன வா.

‘‘தஸ்மா ஹி பண்டி³தோ போஸோ, ஸம்பஸ்ஸம் அத்த²மத்தனோ;

பு³த்³தே⁴ த⁴ம்மே ச ஸங்கே⁴ ச, தீ⁴ரோ ஸத்³த⁴ம் நிவேஸயே.

‘‘யோ த⁴ம்மம் சரி [த⁴ம்மசாரீ (ஸீ. ஸ்யா. கம். பீ.)] காயேன, வாசாய உத³ சேதஸா;

இதே⁴வ நம் பஸம்ஸந்தி, பேச்ச ஸக்³கே³ பமோத³தீ’’தி.

ததியோ வக்³கோ³.

தஸ்ஸுத்³தா³னம் –

புக்³க³லோ அய்யிகா லோகோ, இஸ்ஸத்தம் [இஸ்ஸத்த²ம் (ஸீ. ஸ்யா. கம்.)] பப்³ப³தூபமா;

தே³ஸிதம் பு³த்³த⁴ஸேட்டே²ன, இமம் கோஸலபஞ்சகந்தி.

கோஸலஸம்யுத்தம் ஸமத்தம்.