4. பட²மஸங்கா³மஸுத்தம்

125. ஸாவத்தி²னிதா³னம். அத² கோ² ராஜா மாக³தோ⁴ அஜாதஸத்து வேதே³ஹிபுத்தோ சதுரங்கி³னிம் ஸேனம் ஸன்னய்ஹித்வா ராஜானம் பஸேனதி³ம் கோஸலம் அப்³பு⁴ய்யாஸி யேன காஸி. அஸ்ஸோஸி கோ² ராஜா பஸேனதி³ கோஸலோ – ‘‘ராஜா கிர மாக³தோ⁴ அஜாதஸத்து வேதே³ஹிபுத்தோ சதுரங்கி³னிம் ஸேனம் ஸன்னய்ஹித்வா மமம் அப்³பு⁴ய்யாதோ யேன காஸீ’’தி. அத² கோ² ராஜா பஸேனதி³ கோஸலோ சதுரங்கி³னிம் ஸேனம் ஸன்னய்ஹித்வா ராஜானம் மாக³த⁴ம் அஜாதஸத்தும் வேதே³ஹிபுத்தம் பச்சுய்யாஸி யேன காஸி. அத² கோ² ராஜா ச மாக³தோ⁴ அஜாதஸத்து வேதே³ஹிபுத்தோ ராஜா ச பஸேனதி³ கோஸலோ ஸங்கா³மேஸும். தஸ்மிம் கோ² பன ஸங்கா³மே ராஜா மாக³தோ⁴ அஜாதஸத்து வேதே³ஹிபுத்தோ ராஜானம் பஸேனதி³ம் கோஸலம் பராஜேஸி. பராஜிதோ ச ராஜா பஸேனதி³ கோஸலோ ஸகமேவ [ஸங்கா³மா (க.)] ராஜதா⁴னிம் ஸாவத்தி²ம் பச்சுய்யாஸி [பாயாஸி (ஸீ. பீ.)].

அத² கோ² ஸம்ப³ஹுலா பி⁴க்கூ² புப்³ப³ண்ஹஸமயம் நிவாஸேத்வா பத்தசீவரமாதா³ய ஸாவத்தி²ம் பிண்டா³ய பவிஸிம்ஸு. ஸாவத்தி²யம் பிண்டா³ய சரித்வா பச்சா²ப⁴த்தம் பிண்ட³பாதபடிக்கந்தா யேன ப⁴க³வா தேனுபஸங்கமிம்ஸு; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³ம்ஸு. ஏகமந்தம் நிஸின்னா கோ² தே பி⁴க்கூ² ப⁴க³வந்தம் ஏதத³வோசும் –

‘‘இத⁴, ப⁴ந்தே, ராஜா மாக³தோ⁴ அஜாதஸத்து வேதே³ஹிபுத்தோ சதுரங்கி³னிம் ஸேனம் ஸன்னய்ஹித்வா ராஜானம் பஸேனதி³ம் கோஸலம் அப்³பு⁴ய்யாஸி யேன காஸி. அஸ்ஸோஸி கோ², ப⁴ந்தே, ராஜா பஸேனதி³ கோஸலோ – ‘ராஜா கிர மாக³தோ⁴ அஜாதஸத்து வேதே³ஹிபுத்தோ சதுரங்கி³னிம் ஸேனம் ஸன்னய்ஹித்வா மமம் அப்³பு⁴ய்யாதோ யேன காஸீ’தி. அத² கோ², ப⁴ந்தே, ராஜா பஸேனதி³ கோஸலோ சதுரங்கி³னிம் ஸேனம் ஸன்னய்ஹித்வா ராஜானம் மாக³த⁴ம் அஜாதஸத்தும் வேதே³ஹிபுத்தம் பச்சுய்யாஸி யேன காஸி. அத² கோ², ப⁴ந்தே, ராஜா ச மாக³தோ⁴ அஜாதஸத்து வேதே³ஹிபுத்தோ ராஜா ச பஸேனதி³ கோஸலோ ஸங்கா³மேஸும். தஸ்மிம் கோ² பன, ப⁴ந்தே, ஸங்கா³மே ராஜா மாக³தோ⁴ அஜாதஸத்து வேதே³ஹிபுத்தோ ராஜானம் பஸேனதி³ம் கோஸலம் பராஜேஸி. பராஜிதோ ச, ப⁴ந்தே, ராஜா பஸேனதி³ கோஸலோ ஸகமேவ ராஜதா⁴னிம் ஸாவத்தி²ம் பச்சுய்யாஸீ’’தி.

‘‘ராஜா, பி⁴க்க²வே, மாக³தோ⁴ அஜாதஸத்து வேதே³ஹிபுத்தோ பாபமித்தோ பாபஸஹாயோ பாபஸம்பவங்கோ; ராஜா ச கோ², பி⁴க்க²வே, பஸேனதி³ கோஸலோ கல்யாணமித்தோ கல்யாணஸஹாயோ கல்யாணஸம்பவங்கோ. அஜ்ஜேவ [அஜ்ஜதஞ்ச (ஸீ. பீ.), அஜ்ஜேவம் (ஸ்யா. கம்.)], பி⁴க்க²வே, ராஜா பஸேனதி³ கோஸலோ இமம் ரத்திம் து³க்க²ம் ஸேதி பராஜிதோ’’தி. இத³மவோச…பே…

‘‘ஜயம் வேரம் பஸவதி, து³க்க²ம் ஸேதி பராஜிதோ;

உபஸந்தோ ஸுக²ம் ஸேதி, ஹித்வா ஜயபராஜய’’ந்தி.