5. து³தியஸங்கா³மஸுத்தம்

126. [ஏத்த² ‘‘அத² கோ² ராஜா பஸேனதி³ கோஸலோ சதுரங்கி³னிம் ஸேனம் ஸன்னய்ஹித்வா ராஜானம் மாக³த⁴ம் அஜாதஸத்தும் வேதே³ஹிபுத்தம் அப்³பு⁴ய்யாஸீ’’தி ஆதி³னா பாடே²ன ப⁴விதப்³ப³ம். அட்ட²கதா²யம் ஹி ‘‘அப்³பு⁴ய்யாஸீதி பராஜயே க³ரஹப்பத்தோ…பே… வுத்தஜயகாரணம் ஸுத்வா அபி⁴உய்யாஸீ’’தி வுத்தம்] அத² கோ² ராஜா மாக³தோ⁴ அஜாதஸத்து வேதே³ஹிபுத்தோ சதுரங்கி³னிம் ஸேனம் ஸன்னய்ஹித்வா ராஜானம் பஸேனதி³ம் கோஸலம் அப்³பு⁴ய்யாஸி யேன காஸி. அஸ்ஸோஸி கோ² ராஜா பஸேனதி³ கோஸலோ – ‘‘ராஜா கிர மாக³தோ⁴ அஜாதஸத்து வேதே³ஹிபுத்தோ சதுரங்கி³னிம் ஸேனம் ஸன்னய்ஹித்வா மமம் அப்³பு⁴ய்யாதோ யேன காஸீ’’தி. அத² கோ² ராஜா பஸேனதி³ கோஸலோ சதுரங்கி³னிம் ஸேனம் ஸன்னய்ஹித்வா ராஜானம் மாக³த⁴ம் அஜாதஸத்தும் வேதே³ஹிபுத்தம் பச்சுய்யாஸி யேன காஸி. அத² கோ² ராஜா ச மாக³தோ⁴ அஜாதஸத்து வேதே³ஹிபுத்தோ ராஜா ச பஸேனதி³ கோஸலோ ஸங்கா³மேஸும். தஸ்மிம் கோ² பன ஸங்கா³மே ராஜா பஸேனதி³ கோஸலோ ராஜானம் மாக³த⁴ம் அஜாதஸத்தும் வேதே³ஹிபுத்தம் பராஜேஸி, ஜீவக்³கா³ஹஞ்ச நம் அக்³க³ஹேஸி. அத² கோ² ரஞ்ஞோ பஸேனதி³ஸ்ஸ கோஸலஸ்ஸ ஏதத³ஹோஸி – ‘‘கிஞ்சாபி கோ² ம்யாயம் ராஜா மாக³தோ⁴ அஜாதஸத்து வேதே³ஹிபுத்தோ அது³ப்³ப⁴ந்தஸ்ஸ து³ப்³ப⁴தி, அத² ச பன மே பா⁴கி³னேய்யோ ஹோதி. யம்னூனாஹம் ரஞ்ஞோ மாக³த⁴ஸ்ஸ அஜாதஸத்துனோ வேதே³ஹிபுத்தஸ்ஸ ஸப்³ப³ம் ஹத்தி²காயம் பரியாதி³யித்வா ஸப்³ப³ம் அஸ்ஸகாயம் பரியாதி³யித்வா ஸப்³ப³ம் ரத²காயம் பரியாதி³யித்வா ஸப்³ப³ம் பத்திகாயம் பரியாதி³யித்வா ஜீவந்தமேவ நம் ஓஸஜ்ஜேய்ய’’ந்தி [ஓஸ்ஸஜ்ஜேய்யந்தி (ஸீ. ஸ்யா. கம். பீ.)].

அத² கோ² ராஜா பஸேனதி³ கோஸலோ ரஞ்ஞோ மாக³த⁴ஸ்ஸ அஜாதஸத்துனோ வேதே³ஹிபுத்தஸ்ஸ ஸப்³ப³ம் ஹத்தி²காயம் பரியாதி³யித்வா ஸப்³ப³ம் அஸ்ஸகாயம் பரியாதி³யித்வா ஸப்³ப³ம் ரத²காயம் பரியாதி³யித்வா ஸப்³ப³ம் பத்திகாயம் பரியாதி³யித்வா ஜீவந்தமேவ நம் ஓஸஜ்ஜி [ஓஸ்ஸஜி (ஸீ.), ஓஸ்ஸஜ்ஜி (ஸ்யா. கம். பீ.)].

அத² கோ² ஸம்ப³ஹுலா பி⁴க்கூ² புப்³ப³ண்ஹஸமயம் நிவாஸேத்வா பத்தசீவரமாதா³ய ஸாவத்தி²ம் பிண்டா³ய பவிஸிம்ஸு. ஸாவத்தி²யம் பிண்டா³ய சரித்வா பச்சா²ப⁴த்தம் பிண்ட³பாதபடிக்கந்தா யேன ப⁴க³வா தேனுபஸங்கமிம்ஸு; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³ம்ஸு. ஏகமந்தம் நிஸின்னா கோ² தே பி⁴க்கூ² ப⁴க³வந்தம் ஏதத³வோசும் –

‘‘இத⁴, ப⁴ந்தே, ராஜா மாக³தோ⁴ அஜாதஸத்து வேதே³ஹிபுத்தோ சதுரங்கி³னிம் ஸேனம் ஸன்னய்ஹித்வா ராஜானம் பஸேனதி³ம் கோஸலம் அப்³பு⁴ய்யாஸி யேன காஸி. அஸ்ஸோஸி கோ², ப⁴ந்தே, ராஜா பஸேனதி³ கோஸலோ – ‘ராஜா கிர மாக³தோ⁴ அஜாதஸத்து வேதே³ஹிபுத்தோ சதுரங்கி³னிம் ஸேனம் ஸன்னய்ஹித்வா மமம் அப்³பு⁴ய்யாதோ யேன காஸீ’தி. அத² கோ², ப⁴ந்தே, ராஜா பஸேனதி³ கோஸலோ சதுரங்கி³னிம் ஸேனம் ஸன்னய்ஹித்வா ராஜானம் மாக³த⁴ம் அஜாதஸத்தும் வேதே³ஹிபுத்தம் பச்சுய்யாஸி யேன காஸி. அத² கோ², ப⁴ந்தே, ராஜா ச மாக³தோ⁴ அஜாதஸத்து வேதே³ஹிபுத்தோ ராஜா ச பஸேனதி³ கோஸலோ ஸங்கா³மேஸும். தஸ்மிம் கோ² பன, ப⁴ந்தே, ஸங்கா³மே ராஜா பஸேனதி³ கோஸலோ ராஜானம் மாக³த⁴ம் அஜாதஸத்தும் வேதே³ஹிபுத்தம் பராஜேஸி, ஜீவக்³கா³ஹஞ்ச நம் அக்³க³ஹேஸி. அத² கோ², ப⁴ந்தே, ரஞ்ஞோ பஸேனதி³ஸ்ஸ கோஸலஸ்ஸ ஏதத³ஹோஸி – ‘கிஞ்சாபி கோ² ம்யாயம் ராஜா மாக³தோ⁴ அஜாதஸத்து வேதே³ஹிபுத்தோ அது³ப்³ப⁴ந்தஸ்ஸ து³ப்³ப⁴தி, அத² ச பன மே பா⁴கி³னேய்யோ ஹோதி. யம்னூனாஹம் ரஞ்ஞோ மாக³த⁴ஸ்ஸ அஜாதஸத்துனோ வேதே³ஹிபுத்தஸ்ஸ ஸப்³ப³ம் ஹத்தி²காயம் பரியாதி³யித்வா ஸப்³ப³ம் அஸ்ஸகாயம் ஸப்³ப³ம் ரத²காயம் ஸப்³ப³ம் பத்திகாயம் பரியாதி³யித்வா ஜீவந்தமேவ நம் ஓஸஜ்ஜேய்ய’’’ந்தி.

‘‘அத² கோ², ப⁴ந்தே, ராஜா பஸேனதி³ கோஸலோ ரஞ்ஞோ மாக³த⁴ஸ்ஸ அஜாதஸத்துனோ வேதே³ஹிபுத்தஸ்ஸ ஸப்³ப³ம் ஹத்தி²காயம் பரியாதி³யித்வா ஸப்³ப³ம் அஸ்ஸகாயம் பரியாதி³யித்வா ஸப்³ப³ம் ரத²காயம் பரியாதி³யித்வா ஸப்³ப³ம் பத்திகாயம் பரியாதி³யித்வா ஜீவந்தமேவ நம் ஓஸஜ்ஜீ’’தி. அத² கோ² ப⁴க³வா ஏதமத்த²ம் விதி³த்வா தாயம் வேலாயம் இமா கா³தா²யோ அபா⁴ஸி –

‘‘விலும்பதேவ புரிஸோ, யாவஸ்ஸ உபகப்பதி;

யதா³ சஞ்ஞே விலும்பந்தி, ஸோ விலுத்தோ விலுப்பதி [விலும்பதி (ஸீ. பீ. க.)].

‘‘டா²னஞ்ஹி மஞ்ஞதி பா³லோ, யாவ பாபம் ந பச்சதி;

யதா³ ச பச்சதி பாபம், அத² து³க்க²ம் நிக³ச்ச²தி.

‘‘ஹந்தா லப⁴தி [லப⁴தி ஹந்தா (ஸீ. ஸ்யா. கம்.)] ஹந்தாரம், ஜேதாரம் லப⁴தே ஜயம்;

அக்கோஸகோ ச அக்கோஸம், ரோஸேதாரஞ்ச ரோஸகோ;

அத² கம்மவிவட்டேன, ஸோ விலுத்தோ விலுப்பதீ’’தி.