3. தோ³ணபாகஸுத்தம்

124. ஸாவத்தி²னிதா³னம். தேன கோ² பன ஸமயேன ராஜா பஸேனதி³ கோஸலோ தோ³ணபாககுரம் [தோ³ணபாகஸுத³ம் (ஸீ.), தோ³ணபாகம் ஸுத³ம் (பீ.)] பு⁴ஞ்ஜதி. அத² கோ² ராஜா பஸேனதி³ கோஸலோ பு⁴த்தாவீ மஹஸ்ஸாஸீ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³.

அத² கோ² ப⁴க³வா ராஜானம் பஸேனதி³ம் கோஸலம் பு⁴த்தாவிம் மஹஸ்ஸாஸிம் விதி³த்வா தாயம் வேலாயம் இமம் கா³த²ம் அபா⁴ஸி –

‘‘மனுஜஸ்ஸ ஸதா³ ஸதீமதோ,

மத்தம் ஜானதோ லத்³த⁴போ⁴ஜனே;

தனுகஸ்ஸ [தனு தஸ்ஸ (ஸீ. பீ.)] ப⁴வந்தி வேத³னா,

ஸணிகம் ஜீரதி ஆயுபாலய’’ந்தி.

தேன கோ² பன ஸமயேன ஸுத³ஸ்ஸனோ மாணவோ ரஞ்ஞோ பஸேனதி³ஸ்ஸ கோஸலஸ்ஸ பிட்டி²தோ டி²தோ ஹோதி. அத² கோ² ராஜா பஸேனதி³ கோஸலோ ஸுத³ஸ்ஸனம் மாணவம் ஆமந்தேஸி – ‘‘ஏஹி த்வம், தாத ஸுத³ஸ்ஸன, ப⁴க³வதோ ஸந்திகே இமம் கா³த²ம் பரியாபுணித்வா மம ப⁴த்தாபி⁴ஹாரே (ப⁴த்தாபி⁴ஹாரே) [( ) ஸீ. ஸ்யா. கம். பீ. போத்த²கேஸு நத்தி²] பா⁴ஸ. அஹஞ்ச தே தே³வஸிகம் கஹாபணஸதம் (கஹாபணஸதம்) [( ) ஸீ. ஸ்யா. கம். போத்த²கேஸு நத்தி²] நிச்சம் பி⁴க்க²ம் பவத்தயிஸ்ஸாமீ’’தி. ‘‘ஏவம் தே³வா’’தி கோ² ஸுத³ஸ்ஸனோ மாணவோ ரஞ்ஞோ பஸேனதி³ஸ்ஸ கோஸலஸ்ஸ படிஸ்ஸுத்வா ப⁴க³வதோ ஸந்திகே இமம் கா³த²ம் பரியாபுணித்வா ரஞ்ஞோ பஸேனதி³ஸ்ஸ கோஸலஸ்ஸ ப⁴த்தாபி⁴ஹாரே ஸுத³ம் பா⁴ஸதி –

‘‘மனுஜஸ்ஸ ஸதா³ ஸதீமதோ,

மத்தம் ஜானதோ லத்³த⁴போ⁴ஜனே;

தனுகஸ்ஸ ப⁴வந்தி வேத³னா,

ஸணிகம் ஜீரதி ஆயுபாலய’’ந்தி.

அத² கோ² ராஜா பஸேனதி³ கோஸலோ அனுபுப்³பே³ன நாளிகோத³னபரமதாய [நாளிகோத³னமத்தாய (க.)] ஸண்டா²ஸி. அத² கோ² ராஜா பஸேனதி³ கோஸலோ அபரேன ஸமயேன ஸுஸல்லிகி²தக³த்தோ பாணினா க³த்தானி அனுமஜ்ஜந்தோ தாயம் வேலாயம் இமம் உதா³னம் உதா³னேஸி – ‘‘உப⁴யேன வத மம் ஸோ ப⁴க³வா அத்தே²ன அனுகம்பி – தி³ட்ட²த⁴ம்மிகேன சேவ அத்தே²ன ஸம்பராயிகேன சா’’தி.