2. பஞ்சராஜஸுத்தம்

123. ஸாவத்தி²னிதா³னம். தேன கோ² பன ஸமயேன பஞ்சன்னம் ராஜூனம் பஸேனதி³பமுகா²னம் பஞ்சஹி காமகு³ணேஹி ஸமப்பிதானம் ஸமங்கீ³பூ⁴தானம் பரிசாரயமானானம் அயமந்தராகதா² உத³பாதி³ – ‘‘கிம் நு கோ² காமானம் அக்³க³’’ந்தி? தத்ரேகச்சே [தத்ரேகே (ஸீ. பீ.)] ஏவமாஹம்ஸு – ‘‘ரூபா காமானம் அக்³க³’’ந்தி. ஏகச்சே ஏவமாஹம்ஸு – ‘‘ஸத்³தா³ காமானம் அக்³க³’’ந்தி. ஏகச்சே ஏவமாஹம்ஸு – ‘‘க³ந்தா⁴ காமானம் அக்³க³’’ந்தி. ஏகச்சே ஏவமாஹம்ஸு – ‘‘ரஸா காமானம் அக்³க³’’ந்தி. ஏகச்சே ஏவமாஹம்ஸு – ‘‘போ²ட்ட²ப்³பா³ காமானம் அக்³க³’’ந்தி. யதோ கோ² தே ராஜானோ நாஸக்கி²ம்ஸு அஞ்ஞமஞ்ஞம் ஸஞ்ஞாபேதும்.

அத² கோ² ராஜா பஸேனதி³ கோஸலோ தே ராஜானோ ஏதத³வோச – ‘‘ஆயாம, மாரிஸா, யேன ப⁴க³வா தேனுபஸங்கமிஸ்ஸாம; உபஸங்கமித்வா ப⁴க³வந்தம் ஏதமத்த²ம் படிபுச்சி²ஸ்ஸாம. யதா² நோ ப⁴க³வா ப்³யாகரிஸ்ஸதி ததா² நம் தா⁴ரேஸ்ஸாமா’’தி [தா⁴ரேய்யாமாதி (ஸீ. ஸ்யா. கம். பீ.)]. ‘‘ஏவம், மாரிஸா’’தி கோ² தே ராஜானோ ரஞ்ஞோ பஸேனதி³ஸ்ஸ கோஸலஸ்ஸ பச்சஸ்ஸோஸும்.

அத² கோ² தே பஞ்ச ராஜானோ பஸேனதி³பமுகா² யேன ப⁴க³வா தேனுபஸங்கமிம்ஸு; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³ம்ஸு. ஏகமந்தம் நிஸின்னோ கோ² ராஜா பஸேனதி³ கோஸலோ ப⁴க³வந்தம் ஏதத³வோச – ‘‘இத⁴, ப⁴ந்தே, அம்ஹாகம் பஞ்சன்னம் ராஜூனம் பஞ்சஹி காமகு³ணேஹி ஸமப்பிதானம் ஸமங்கீ³பூ⁴தானம் பரிசாரயமானானம் அயமந்தராகதா² உத³பாதி³ – ‘கிம் நு கோ² காமானம் அக்³க³’ந்தி? ஏகச்சே ஏவமாஹம்ஸு – ‘ரூபா காமானம் அக்³க³’ந்தி. ஏகச்சே ஏவமாஹம்ஸு – ‘ஸத்³தா³ காமானம் அக்³க³’ந்தி. ஏகச்சே ஏவமாஹம்ஸு – ‘க³ந்தா⁴ காமானம் அக்³க³’ந்தி. ஏகச்சே ஏவமாஹம்ஸு – ‘ரஸா காமானம் அக்³க³’ந்தி. ஏகச்சே ஏவமாஹம்ஸு – ‘போ²ட்ட²ப்³பா³ காமானம் அக்³க³’ந்தி. கிம் நு கோ², ப⁴ந்தே, காமானம் அக்³க³’’ந்தி?

‘‘மனாபபரியந்தம் க்²வாஹம், மஹாராஜ, பஞ்சஸு காமகு³ணேஸு அக்³க³ந்தி வதா³மி. தேவ [தே ச (ஸீ. பீ. க.), யே ச (ஸ்யா. கம்.)], மஹாராஜ, ரூபா ஏகச்சஸ்ஸ மனாபா ஹோந்தி, தேவ [தே ச (ஸீ. பீ. க.)] ரூபா ஏகச்சஸ்ஸ அமனாபா ஹோந்தி. யேஹி ச யோ ரூபேஹி அத்தமனோ ஹோதி பரிபுண்ணஸங்கப்போ, ஸோ தேஹி ரூபேஹி அஞ்ஞம் ரூபம் உத்தரிதரம் வா பணீததரம் வா ந பத்தே²தி. தே தஸ்ஸ ரூபா பரமா ஹோந்தி. தே தஸ்ஸ ரூபா அனுத்தரா ஹோந்தி.

‘‘தேவ, மஹாராஜ, ஸத்³தா³ ஏகச்சஸ்ஸ மனாபா ஹோந்தி, தேவ ஸத்³தா³ ஏகச்சஸ்ஸ அமனாபா ஹோந்தி. யேஹி ச யோ ஸத்³தே³ஹி அத்தமனோ ஹோதி பரிபுண்ணஸங்கப்போ, ஸோ தேஹி ஸத்³தே³ஹி அஞ்ஞம் ஸத்³த³ம் உத்தரிதரம் வா பணீததரம் வா ந பத்தே²தி. தே தஸ்ஸ ஸத்³தா³ பரமா ஹோந்தி. தே தஸ்ஸ ஸத்³தா³ அனுத்தரா ஹோந்தி.

‘‘தேவ, மஹாராஜ, க³ந்தா⁴ ஏகச்சஸ்ஸ மனாபா ஹோந்தி, தேவ க³ந்தா⁴ ஏகச்சஸ்ஸ அமனாபா ஹோந்தி. யேஹி ச யோ க³ந்தே⁴ஹி அத்தமனோ ஹோதி பரிபுண்ணஸங்கப்போ, ஸோ தேஹி க³ந்தே⁴ஹி அஞ்ஞம் க³ந்த⁴ம் உத்தரிதரம் வா பணீததரம் வா ந பத்தே²தி. தே தஸ்ஸ க³ந்தா⁴ பரமா ஹோந்தி. தே தஸ்ஸ க³ந்தா⁴ அனுத்தரா ஹோந்தி.

‘‘தேவ, மஹாராஜ, ரஸா ஏகச்சஸ்ஸ மனாபா ஹோந்தி, தேவ ரஸா ஏகச்சஸ்ஸ அமனாபா ஹோந்தி. யேஹி ச யோ ரஸேஹி அத்தமனோ ஹோதி பரிபுண்ணஸங்கப்போ, ஸோ தேஹி ரஸேஹி அஞ்ஞம் ரஸம் உத்தரிதரம் வா பணீததரம் வா ந பத்தே²தி. தே தஸ்ஸ ரஸா பரமா ஹோந்தி. தே தஸ்ஸ ரஸா அனுத்தரா ஹோந்தி.

‘‘தேவ, மஹாராஜ, போ²ட்ட²ப்³பா³ ஏகச்சஸ்ஸ மனாபா ஹோந்தி, தேவ போ²ட்ட²ப்³பா³ ஏகச்சஸ்ஸ அமனாபா ஹோந்தி. யேஹி ச யோ போ²ட்ட²ப்³பே³ஹி அத்தமனோ ஹோதி பரிபுண்ணஸங்கப்போ, ஸோ தேஹி போ²ட்ட²ப்³பே³ஹி அஞ்ஞம் போ²ட்ட²ப்³ப³ம் உத்தரிதரம் வா பணீததரம் வா ந பத்தே²தி. தே தஸ்ஸ போ²ட்ட²ப்³பா³ பரமா ஹோந்தி. தே தஸ்ஸ போ²ட்ட²ப்³பா³ அனுத்தரா ஹோந்தீ’’தி.

தேன கோ² பன ஸமயேன சந்த³னங்க³லிகோ உபாஸகோ தஸ்ஸம் பரிஸாயம் நிஸின்னோ ஹோதி. அத² கோ² சந்த³னங்க³லிகோ உபாஸகோ உட்டா²யாஸனா ஏகம்ஸம் உத்தராஸங்க³ம் கரித்வா யேன ப⁴க³வா தேனஞ்ஜலிம் பணாமேத்வா ப⁴க³வந்தம் ஏதத³வோச – ‘‘படிபா⁴தி மம் ப⁴க³வா, படிபா⁴தி மம் ஸுக³தா’’தி. ‘‘படிபா⁴து தம் சந்த³னங்க³லிகா’’தி ப⁴க³வா அவோச.

அத² கோ² சந்த³னங்க³லிகோ உபாஸகோ ப⁴க³வதோ ஸம்முகா² தத³னுரூபாய கா³தா²ய அபி⁴த்த²வி –

‘‘பது³மம் யதா² கோகனத³ம் ஸுக³ந்த⁴ம்,

பாதோ ஸியா பு²ல்லமவீதக³ந்த⁴ம்;

அங்கீ³ரஸம் பஸ்ஸ விரோசமானம்,

தபந்தமாதி³ச்சமிவந்தலிக்கே²’’தி.

அத² கோ² தே பஞ்ச ராஜானோ சந்த³னங்க³லிகம் உபாஸகம் பஞ்சஹி உத்தராஸங்கே³ஹி அச்சா²தே³ஸும். அத² கோ² சந்த³னங்க³லிகோ உபாஸகோ தேஹி பஞ்சஹி உத்தராஸங்கே³ஹி ப⁴க³வந்தம் அச்சா²தே³ஸீதி.