10. து³தியஅபுத்தகஸுத்தம்

131. அத² கோ² ராஜா பஸேனதி³ கோஸலோ தி³வா தி³வஸ்ஸ யேன ப⁴க³வா தேனுபஸங்கமி; உபஸங்கமித்வா ஏகமந்தம் நிஸின்னம் கோ² ராஜானம் பஸேனதி³ம் கோஸலம் ப⁴க³வா ஏதத³வோச – ‘‘ஹந்த³, குதோ நு த்வம், மஹாராஜ, ஆக³ச்ச²ஸி தி³வா தி³வஸ்ஸா’’தி?

‘‘இத⁴, ப⁴ந்தே, ஸாவத்தி²யம் ஸேட்டி² க³ஹபதி காலங்கதோ. தமஹம் அபுத்தகம் ஸாபதேய்யம் ராஜந்தேபுரம் அதிஹரித்வா ஆக³ச்சா²மி. ஸதம், ப⁴ந்தே, ஸதஸஹஸ்ஸானி ஹிரஞ்ஞஸ்ஸேவ, கோ பன வாதோ³ ரூபியஸ்ஸ! தஸ்ஸ கோ² பன, ப⁴ந்தே, ஸேட்டி²ஸ்ஸ க³ஹபதிஸ்ஸ ஏவரூபோ ப⁴த்தபோ⁴கோ³ அஹோஸி – கணாஜகம் பு⁴ஞ்ஜதி பி³லங்க³து³தியம். ஏவரூபோ வத்த²போ⁴கோ³ அஹோஸி – ஸாணம் தா⁴ரேதி திபக்க²வஸனம். ஏவரூபோ யானபோ⁴கோ³ அஹோஸி – ஜஜ்ஜரரத²கேன யாதி பண்ணச²த்தகேன தா⁴ரியமானேனா’’தி.

‘‘ஏவமேதம், மஹாராஜ, ஏவமேதம், மஹாராஜ! பூ⁴தபுப்³ப³ம் ஸோ, மஹாராஜ, ஸேட்டி² க³ஹபதி தக்³க³ரஸிகி²ம் நாம பச்சேகஸம்பு³த்³த⁴ம் பிண்ட³பாதேன படிபாதே³ஸி. ‘தே³த² ஸமணஸ்ஸ பிண்ட³’ந்தி வத்வா உட்டா²யாஸனா பக்காமி. த³த்வா ச பன பச்சா² விப்படிஸாரீ அஹோஸி – ‘வரமேதம் பிண்ட³பாதம் தா³ஸா வா கம்மகரா வா பு⁴ஞ்ஜேய்யு’ந்தி. பா⁴து ச பன ஏகபுத்தகம் ஸாபதேய்யஸ்ஸ காரணா ஜீவிதா வோரோபேஸி.

‘‘யம் கோ² ஸோ, மஹாராஜ, ஸேட்டி² க³ஹபதி தக்³க³ரஸிகி²ம் பச்சேகஸம்பு³த்³த⁴ம் பிண்ட³பாதேன படிபாதே³ஸி, தஸ்ஸ கம்மஸ்ஸ விபாகேன ஸத்தக்க²த்தும் ஸுக³திம் ஸக்³க³ம் லோகம் உபபஜ்ஜி. தஸ்ஸேவ கம்மஸ்ஸ விபாகாவஸேஸேன இமிஸ்ஸாயேவ ஸாவத்தி²யா ஸத்தக்க²த்தும் ஸேட்டி²த்தம் காரேஸி. யம் கோ² ஸோ, மஹாராஜ, ஸேட்டி² க³ஹபதி த³த்வா பச்சா² விப்படிஸாரீ அஹோஸி – ‘வரமேதம் பிண்ட³பாதம் தா³ஸா வா கம்மகரா வா பு⁴ஞ்ஜேய்யு’ந்தி, தஸ்ஸ கம்மஸ்ஸ விபாகேன நாஸ்ஸுளாராய ப⁴த்தபோ⁴கா³ய சித்தம் நமதி, நாஸ்ஸுளாராய வத்த²போ⁴கா³ய சித்தம் நமதி, நாஸ்ஸுளாராய யானபோ⁴கா³ய சித்தம் நமதி, நாஸ்ஸுளாரானம் பஞ்சன்னம் காமகு³ணானம் போ⁴கா³ய சித்தம் நமதி. யம் கோ² ஸோ, மஹாராஜ, ஸேட்டி² க³ஹபதி பா⁴து ச பன ஏகபுத்தகம் ஸாபதேய்யஸ்ஸ காரணா ஜீவிதா வோரோபேஸி, தஸ்ஸ கம்மஸ்ஸ விபாகேன ப³ஹூனி வஸ்ஸானி ப³ஹூனி வஸ்ஸஸதானி ப³ஹூனி வஸ்ஸஸஹஸ்ஸானி ப³ஹூனி வஸ்ஸஸதஸஹஸ்ஸானி நிரயே பச்சித்த². தஸ்ஸேவ கம்மஸ்ஸ விபாகாவஸேஸேன இத³ம் ஸத்தமம் அபுத்தகம் ஸாபதேய்யம் ராஜகோஸம் பவேஸேதி. தஸ்ஸ கோ², மஹாராஜ, ஸேட்டி²ஸ்ஸ க³ஹபதிஸ்ஸ புராணஞ்ச புஞ்ஞம் பரிக்கீ²ணம், நவஞ்ச புஞ்ஞம் அனுபசிதம். அஜ்ஜ பன, மஹாராஜ, ஸேட்டி² க³ஹபதி மஹாரோருவே நிரயே பச்சதீ’’தி. ‘‘ஏவம், ப⁴ந்தே, ஸேட்டி² க³ஹபதி மஹாரோருவம் நிரயம் உபபன்னோ’’தி. ‘‘ஏவம், மஹாராஜ, ஸேட்டி² க³ஹபதி மஹாரோருவம் நிரயம் உபபன்னோ’’தி. இத³மவோச…பே….

‘‘த⁴ஞ்ஞம் த⁴னம் ரஜதம் ஜாதரூபம், பரிக்³க³ஹம் வாபி யத³த்தி² கிஞ்சி;

தா³ஸா கம்மகரா பேஸ்ஸா, யே சஸ்ஸ அனுஜீவினோ.

‘‘ஸப்³ப³ம் நாதா³ய க³ந்தப்³ப³ம், ஸப்³ப³ம் நிக்கி²ப்பகா³மினம் [நிக்கீ²பகா³மினம் (ஸ்யா. கம். க.)];

யஞ்ச கரோதி காயேன, வாசாய உத³ சேதஸா.

‘‘தஞ்ஹி தஸ்ஸ ஸகம் ஹோதி, தஞ்ச ஆதா³ய க³ச்ச²தி;

தஞ்சஸ்ஸ அனுக³ம் ஹோதி, சா²யாவ அனபாயினீ.

‘‘தஸ்மா கரேய்ய கல்யாணம், நிசயம் ஸம்பராயிகம்;

புஞ்ஞானி பரலோகஸ்மிம், பதிட்டா² ஹோந்தி பாணின’’ந்தி.

து³தியோ வக்³கோ³.

தஸ்ஸுத்³தா³னம் –

ஜடிலா பஞ்ச ராஜானோ, தோ³ணபாககுரேன ச;

ஸங்கா³மேன த்³வே வுத்தானி, மல்லிகா [தீ⁴தரா (ப³ஹூஸு)] த்³வே அப்பமாதே³ன ச;

அபுத்தகேன த்³வே வுத்தா, வக்³கோ³ தேன பவுச்சதீதி.