1. சூளகோ³ஸிங்க³ஸுத்தம்

325. ஏவம் மே ஸுதம் – ஏகம் ஸமயம் ப⁴க³வா நாதிகே [நாதி³கே (ஸீ. ஸ்யா. பீ.), ஞாதிகே (க.)] விஹரதி கி³ஞ்ஜகாவஸதே². தேன கோ² பன ஸமயேன ஆயஸ்மா ச அனுருத்³தோ⁴ ஆயஸ்மா ச நந்தி³யோ ஆயஸ்மா ச கிமிலோ [கிம்பி³லோ (ஸீ. பீ. க.)] கோ³ஸிங்க³ஸாலவனதா³யே விஹரந்தி. அத² கோ² ப⁴க³வா ஸாயன்ஹஸமயம் படிஸல்லானா வுட்டி²தோ யேன கோ³ஸிங்க³ஸாலவனதா³யோ தேனுபஸங்கமி. அத்³த³ஸா கோ² தா³யபாலோ ப⁴க³வந்தம் தூ³ரதோவ ஆக³ச்ச²ந்தம். தி³ஸ்வான ப⁴க³வந்தம் ஏதத³வோச – ‘‘மா, ஸமண, ஏதம் தா³யம் பாவிஸி. ஸந்தேத்த² தயோ குலபுத்தா அத்தகாமரூபா விஹரந்தி. மா தேஸம் அபா²ஸுமகாஸீ’’தி.

அஸ்ஸோஸி கோ² ஆயஸ்மா அனுருத்³தோ⁴ தா³யபாலஸ்ஸ ப⁴க³வதா ஸத்³தி⁴ம் மந்தயமானஸ்ஸ. ஸுத்வான தா³யபாலம் ஏதத³வோச – ‘‘மா, ஆவுஸோ தா³யபால, ப⁴க³வந்தம் வாரேஸி. ஸத்தா² நோ ப⁴க³வா அனுப்பத்தோ’’தி. அத² கோ² ஆயஸ்மா அனுருத்³தோ⁴ யேனாயஸ்மா ச நந்தி³யோ ஆயஸ்மா ச கிமிலோ தேனுபஸங்கமி; உபஸங்கமித்வா ஆயஸ்மந்தஞ்ச நந்தி³யம் ஆயஸ்மந்தஞ்ச கிமிலம் ஏதத³வோச – ‘‘அபி⁴க்கமதா²யஸ்மந்தோ, அபி⁴க்கமதா²யஸ்மந்தோ, ஸத்தா² நோ ப⁴க³வா அனுப்பத்தோ’’தி. அத² கோ² ஆயஸ்மா ச அனுருத்³தோ⁴ ஆயஸ்மா ச நந்தி³யோ ஆயஸ்மா ச கிமிலோ ப⁴க³வந்தம் பச்சுக்³க³ந்த்வா – ஏகோ ப⁴க³வதோ பத்தசீவரம் படிக்³க³ஹேஸி, ஏகோ ஆஸனம் பஞ்ஞபேஸி, ஏகோ பாதோ³த³கம் உபட்டா²பேஸி. நிஸீதி³ ப⁴க³வா பஞ்ஞத்தே ஆஸனே. நிஸஜ்ஜ கோ² ப⁴க³வா பாதே³ பக்கா²லேஸி. தேபி கோ² ஆயஸ்மந்தோ ப⁴க³வந்தம் அபி⁴வாதே³த்வா ஏகமந்தம் நிஸீதி³ம்ஸு. ஏகமந்தம் நிஸின்னம் கோ² ஆயஸ்மந்தம் அனுருத்³த⁴ம் ப⁴க³வா ஏதத³வோச –

326. ‘‘கச்சி வோ, அனுருத்³தா⁴, க²மனீயம், கச்சி யாபனீயம், கச்சி பிண்ட³கேன ந கிலமதா²’’தி? ‘‘க²மனீயம், ப⁴க³வா, யாபனீயம், ப⁴க³வா; ந ச மயம், ப⁴ந்தே, பிண்ட³கேன கிலமாமா’’தி. ‘‘கச்சி பன வோ, அனுருத்³தா⁴, ஸமக்³கா³ ஸம்மோத³மானா அவிவத³மானா கீ²ரோத³கீபூ⁴தா அஞ்ஞமஞ்ஞம் பியசக்கூ²ஹி ஸம்பஸ்ஸந்தா விஹரதா²’’தி? ‘‘தக்³க⁴ மயம், ப⁴ந்தே, ஸமக்³கா³ ஸம்மோத³மானா அவிவத³மானா கீ²ரோத³கீபூ⁴தா அஞ்ஞமஞ்ஞம் பியசக்கூ²ஹி ஸம்பஸ்ஸந்தா விஹராமா’’தி. ‘‘யதா² கத²ம் பன தும்ஹே, அனுருத்³தா⁴, ஸமக்³கா³ ஸம்மோத³மானா அவிவத³மானா கீ²ரோத³கீபூ⁴தா அஞ்ஞமஞ்ஞம் பியசக்கூ²ஹி ஸம்பஸ்ஸந்தா விஹரதா²’’தி? ‘‘இத⁴ மய்ஹம், ப⁴ந்தே, ஏவம் ஹோதி – ‘லாபா⁴ வத மே, ஸுலத்³த⁴ம் வத மே, யோஹம் ஏவரூபேஹி ஸப்³ரஹ்மசாரீஹி ஸத்³தி⁴ம் விஹராமீ’தி. தஸ்ஸ மய்ஹம், ப⁴ந்தே, இமேஸு ஆயஸ்மந்தேஸு மேத்தம் காயகம்மம் பச்சுபட்டி²தம் ஆவி சேவ ரஹோ ச; மேத்தம் வசீகம்மம் பச்சுபட்டி²தம் ஆவி சேவ ரஹோ ச; மேத்தம் மனோகம்மம் பச்சுபட்டி²தம் ஆவி சேவ ரஹோ ச. தஸ்ஸ மய்ஹம், ப⁴ந்தே, ஏவம் ஹோதி – ‘யம்னூனாஹம் ஸகம் சித்தம் நிக்கி²பித்வா இமேஸம்யேவ ஆயஸ்மந்தானம் சித்தஸ்ஸ வஸேன வத்தேய்ய’ந்தி. ஸோ கோ² அஹம், ப⁴ந்தே, ஸகம் சித்தம் நிக்கி²பித்வா இமேஸம்யேவ ஆயஸ்மந்தானம் சித்தஸ்ஸ வஸேன வத்தாமி. நானா ஹி கோ² நோ, ப⁴ந்தே, காயா ஏகஞ்ச பன மஞ்ஞே சித்த’’ந்தி.

ஆயஸ்மாபி கோ² நந்தி³யோ…பே… ஆயஸ்மாபி கோ² கிமிலோ ப⁴க³வந்தம் ஏதத³வோச – ‘‘மய்ஹம்பி, ப⁴ந்தே, ஏவம் ஹோதி – ‘லாபா⁴ வத மே, ஸுலத்³த⁴ம் வத மே, யோஹம் ஏவரூபேஹி ஸப்³ரஹ்மசாரீஹி ஸத்³தி⁴ம் விஹராமீ’தி. தஸ்ஸ மய்ஹம், ப⁴ந்தே, இமேஸு ஆயஸ்மந்தேஸு மேத்தம் காயகம்மம் பச்சுபட்டி²தம் ஆவி சேவ ரஹோ ச, மேத்தம் வசீகம்மம் பச்சுபட்டி²தம் ஆவி சேவ ரஹோ ச, மேத்தம் மனோகம்மம் பச்சுபட்டி²தம் ஆவி சேவ ரஹோ ச. தஸ்ஸ மய்ஹம், ப⁴ந்தே, ஏவம் ஹோதி – ‘யம்னூனாஹம் ஸகம் சித்தம் நிக்கி²பித்வா இமேஸம்யேவ ஆயஸ்மந்தானம் சித்தஸ்ஸ வஸேன வத்தேய்ய’ந்தி. ஸோ கோ² அஹம், ப⁴ந்தே, ஸகம் சித்தம் நிக்கி²பித்வா இமேஸம்யேவ ஆயஸ்மந்தானம் சித்தஸ்ஸ வஸேன வத்தாமி. நானா ஹி கோ² நோ, ப⁴ந்தே, காயா ஏகஞ்ச பன மஞ்ஞே சித்தந்தி.

‘‘ஏவம் கோ² மயம், ப⁴ந்தே, ஸமக்³கா³ ஸம்மோத³மானா அவிவத³மானா கீ²ரோத³கீபூ⁴தா அஞ்ஞமஞ்ஞம் பியசக்கூ²ஹி ஸம்பஸ்ஸந்தா விஹராமா’’தி.

327. ‘‘ஸாது⁴ ஸாது⁴, அனுருத்³தா⁴! கச்சி பன வோ, அனுருத்³தா⁴, அப்பமத்தா ஆதாபினோ பஹிதத்தா விஹரதா²’’தி? ‘‘தக்³க⁴ மயம், ப⁴ந்தே, அப்பமத்தா ஆதாபினோ பஹிதத்தா விஹராமா’’தி. ‘‘யதா² கத²ம் பன தும்ஹே, அனுருத்³தா⁴, அப்பமத்தா ஆதாபினோ பஹிதத்தா விஹரதா²’’தி? ‘‘இத⁴, ப⁴ந்தே, அம்ஹாகம் யோ பட²மம் கா³மதோ பிண்டா³ய படிக்கமதி ஸோ ஆஸனானி பஞ்ஞபேதி, பானீயம் பரிபோ⁴ஜனீயம் உபட்டா²பேதி, அவக்காரபாதிம் உபட்டா²பேதி. யோ பச்சா² கா³மதோ பிண்டா³ய படிக்கமதி, ஸசே ஹோதி பு⁴த்தாவஸேஸோ ஸசே ஆகங்க²தி பு⁴ஞ்ஜதி, நோ சே ஆகங்க²தி அப்பஹரிதே வா ச²ட்³டே³தி, அப்பாணகே வா உத³கே ஓபிலாபேதி. ஸோ ஆஸனானி படிஸாமேதி, பானீயம் பரிபோ⁴ஜனீயம் படிஸாமேதி, அவக்காரபாதிம் படிஸாமேதி, ப⁴த்தக்³க³ம் ஸம்மஜ்ஜதி. யோ பஸ்ஸதி பானீயக⁴டம் வா பரிபோ⁴ஜனீயக⁴டம் வா வச்சக⁴டம் வா ரித்தம் துச்ச²ம் ஸோ உபட்டா²பேதி. ஸசஸ்ஸ ஹோதி அவிஸய்ஹம், ஹத்த²விகாரேன து³தியம் ஆமந்தேத்வா ஹத்த²விலங்க⁴கேன உபட்டா²பேம, ந த்வேவ மயம், ப⁴ந்தே, தப்பச்சயா வாசம் பி⁴ந்தா³ம. பஞ்சாஹிகம் கோ² பன மயம், ப⁴ந்தே, ஸப்³ப³ரத்திகம் த⁴ம்மியா கதா²ய ஸன்னிஸீதா³ம. ஏவம் கோ² மயம், ப⁴ந்தே, அப்பமத்தா ஆதாபினோ பஹிதத்தா விஹராமா’’தி.

328. ‘‘ஸாது⁴ ஸாது⁴, அனுருத்³தா⁴! அத்தி² பன வோ, அனுருத்³தா⁴, ஏவம் அப்பமத்தானம் ஆதாபீனம் பஹிதத்தானம் விஹரந்தானம் உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸோ அதி⁴க³தோ பா²ஸுவிஹாரோ’’தி? ‘‘கிஞ்ஹி நோ ஸியா, ப⁴ந்தே! இத⁴ மயம், ப⁴ந்தே, யாவதே³வ ஆகங்கா²ம விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கம் ஸவிசாரம் விவேகஜம் பீதிஸுக²ம் பட²மம் ஜா²னம் உபஸம்பஜ்ஜ விஹராம. அயம் கோ² நோ, ப⁴ந்தே, அம்ஹாகம் அப்பமத்தானம் ஆதாபீனம் பஹிதத்தானம் விஹரந்தானம் உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸோ அதி⁴க³தோ பா²ஸுவிஹாரோ’’தி.

‘‘ஸாது⁴ ஸாது⁴, அனுருத்³தா⁴! ஏதஸ்ஸ பன வோ, அனுருத்³தா⁴, விஹாரஸ்ஸ ஸமதிக்கமாய ஏதஸ்ஸ விஹாரஸ்ஸ படிப்பஸ்ஸத்³தி⁴யா அத்த²ஞ்ஞோ உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸோ அதி⁴க³தோ பா²ஸுவிஹாரோ’’தி? ‘‘கிஞ்ஹி நோ ஸியா, ப⁴ந்தே! இத⁴ மயம், ப⁴ந்தே, யாவதே³வ ஆகங்கா²ம விதக்கவிசாரானம் வூபஸமா அஜ்ஜ²த்தம் ஸம்பஸாத³னம் சேதஸோ ஏகோதி³பா⁴வம் அவிதக்கம் அவிசாரம் ஸமாதி⁴ஜம் பீதிஸுக²ம் து³தியம் ஜா²னம் உபஸம்பஜ்ஜ விஹராம. ஏதஸ்ஸ, ப⁴ந்தே, விஹாரஸ்ஸ ஸமதிக்கமாய ஏதஸ்ஸ விஹாரஸ்ஸ படிப்பஸ்ஸத்³தி⁴யா அயமஞ்ஞோ உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸோ அதி⁴க³தோ பா²ஸுவிஹாரோ’’தி.

‘‘ஸாது⁴ ஸாது⁴, அனுருத்³தா⁴! ஏதஸ்ஸ பன வோ, அனுருத்³தா⁴, விஹாரஸ்ஸ ஸமதிக்கமாய ஏதஸ்ஸ விஹாரஸ்ஸ படிப்பஸ்ஸத்³தி⁴யா அத்த²ஞ்ஞோ உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸோ அதி⁴க³தோ பா²ஸுவிஹாரோ’’தி? ‘‘கிஞ்ஹி நோ ஸியா, ப⁴ந்தே! இத⁴ மயம், ப⁴ந்தே, யாவதே³வ ஆகங்கா²ம பீதியா ச விராகா³ உபேக்க²கா ச விஹராம, ஸதா ச ஸம்பஜானா, ஸுக²ஞ்ச காயேன படிஸம்வேதே³ம, யம் தம் அரியா ஆசிக்க²ந்தி – ‘உபேக்க²கோ ஸதிமா ஸுக²விஹாரீ’தி ததியம் ஜா²னம் உபஸம்பஜ்ஜ விஹராம. ஏதஸ்ஸ, ப⁴ந்தே, விஹாரஸ்ஸ ஸமதிக்கமாய ஏதஸ்ஸ விஹாரஸ்ஸ படிப்பஸ்ஸத்³தி⁴யா அயமஞ்ஞோ உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸோ அதி⁴க³தோ பா²ஸுவிஹாரோ’’தி.

‘‘ஸாது⁴ ஸாது⁴, அனுருத்³தா⁴! ஏதஸ்ஸ பன வோ, அனுருத்³தா⁴, விஹாரஸ்ஸ ஸமதிக்கமாய ஏதஸ்ஸ விஹாரஸ்ஸ படிப்பஸ்ஸத்³தி⁴யா அத்த²ஞ்ஞோ உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸோ அதி⁴க³தோ பா²ஸுவிஹாரோ’’தி? ‘‘கிஞ்ஹி நோ ஸியா, ப⁴ந்தே! இத⁴ மயம், ப⁴ந்தே, யாவதே³வ ஆகங்கா²ம ஸுக²ஸ்ஸ ச பஹானா து³க்க²ஸ்ஸ ச பஹானா, புப்³பே³வ ஸோமனஸ்ஸதோ³மனஸ்ஸானம் அத்த²ங்க³மா, அது³க்க²மஸுக²ம் உபேக்கா²ஸதிபாரிஸுத்³தி⁴ம் சதுத்த²ம் ஜா²னம் உபஸம்பஜ்ஜ விஹராம. ஏதஸ்ஸ, ப⁴ந்தே, விஹாரஸ்ஸ ஸமதிக்கமாய ஏதஸ்ஸ விஹாரஸ்ஸ படிப்பஸ்ஸத்³தி⁴யா அயமஞ்ஞோ உத்தரி மனுஸ்ஸத⁴ம்மா அலமரியஞாணத³ஸ்ஸனவிஸேஸோ அதி⁴க³தோ பா²ஸுவிஹாரோ’’தி.

‘‘ஸாது⁴ ஸாது⁴, அனுருத்³தா⁴! ஏதஸ்ஸ பன வோ, அனுருத்³தா⁴, விஹாரஸ்ஸ ஸமதிக்கமாய ஏதஸ்ஸ விஹாரஸ்ஸ படிப்பஸ்ஸத்³தி⁴யா அத்த²ஞ்ஞோ உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸோ அதி⁴க³தோ பா²ஸுவிஹாரோ’’தி? ‘‘கிஞ்ஹி நோ ஸியா, ப⁴ந்தே! இத⁴ மயம், ப⁴ந்தே, யாவதே³வ ஆகங்கா²ம ஸப்³ப³ஸோ ரூபஸஞ்ஞானம் ஸமதிக்கமா படிக⁴ஸஞ்ஞானம் அத்த²ங்க³மா நானத்தஸஞ்ஞானம் அமனஸிகாரா ‘அனந்தோ ஆகாஸோ’தி ஆகாஸானஞ்சாயதனம் உபஸம்பஜ்ஜ விஹராம. ஏதஸ்ஸ, ப⁴ந்தே, விஹாரஸ்ஸ ஸமதிக்கமாய ஏதஸ்ஸ விஹாரஸ்ஸ படிப்பஸ்ஸத்³தி⁴யா அயமஞ்ஞோ உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸோ அதி⁴க³தோ பா²ஸுவிஹாரோ’’தி.

‘‘ஸாது⁴ ஸாது⁴, அனுருத்³தா⁴! ஏதஸ்ஸ பன வோ, அனுருத்³தா⁴, விஹாரஸ்ஸ ஸமதிக்கமாய ஏதஸ்ஸ விஹாரஸ்ஸ படிப்பஸ்ஸத்³தி⁴யா அத்த²ஞ்ஞோ உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸோ அதி⁴க³தோ பா²ஸுவிஹாரோ’’தி? ‘‘கிஞ்ஹி நோ ஸியா, ப⁴ந்தே! இத⁴ மயம், ப⁴ந்தே, யாவதே³வ ஆகங்கா²ம ஸப்³ப³ஸோ ஆகாஸானஞ்சாயதனம் ஸமதிக்கம்ம ‘அனந்தம் விஞ்ஞாண’ந்தி விஞ்ஞாணஞ்சாயதனம் உபஸம்பஜ்ஜ விஹராம…பே… ஸப்³ப³ஸோ விஞ்ஞாணஞ்சாயதனம் ஸமதிக்கம்ம ‘நத்தி² கிஞ்சீ’தி ஆகிஞ்சஞ்ஞாயதனம் உபஸம்பஜ்ஜ விஹராம…பே… ஸப்³ப³ஸோ ஆகிஞ்சஞ்ஞாயதனம் ஸமதிக்கம்ம நேவஸஞ்ஞானாஸஞ்ஞாயதனம் உபஸம்பஜ்ஜ விஹராம. ஏதஸ்ஸ, ப⁴ந்தே, விஹாரஸ்ஸ ஸமதிக்கமாய ஏதஸ்ஸ விஹாரஸ்ஸ படிப்பஸ்ஸத்³தி⁴யா அயமஞ்ஞோ உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸோ அதி⁴க³தோ பா²ஸுவிஹாரோ’’தி.

329. ‘‘ஸாது⁴ ஸாது⁴, அனுருத்³தா⁴! ஏதஸ்ஸ பன வோ, அனுருத்³தா⁴, விஹாரஸ்ஸ ஸமதிக்கமாய ஏதஸ்ஸ விஹாரஸ்ஸ படிப்பஸ்ஸத்³தி⁴யா அத்த²ஞ்ஞோ உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸோ அதி⁴க³தோ பா²ஸுவிஹாரோ’’தி? ‘‘கிஞ்ஹி நோ ஸியா, ப⁴ந்தே! இத⁴ மயம், ப⁴ந்தே, யாவதே³வ ஆகங்கா²ம ஸப்³ப³ஸோ நேவஸஞ்ஞானாஸஞ்ஞாயதனம் ஸமதிக்கம்ம ஸஞ்ஞாவேத³யிதனிரோத⁴ம் உபஸம்பஜ்ஜ விஹராம, பஞ்ஞாய ச நோ தி³ஸ்வா ஆஸவா பரிக்கீ²ணா. ஏதஸ்ஸ, ப⁴ந்தே, விஹாரஸ்ஸ ஸமதிக்கமாய ஏதஸ்ஸ விஹாரஸ்ஸ படிப்பஸ்ஸத்³தி⁴யா அயமஞ்ஞோ உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸோ அதி⁴க³தோ பா²ஸுவிஹாரோ. இமம்ஹா ச மயம், ப⁴ந்தே, பா²ஸுவிஹாரா அஞ்ஞம் பா²ஸுவிஹாரம் உத்தரிதரம் வா பணீததரம் வா ந ஸமனுபஸ்ஸாமா’’தி. ‘‘ஸாது⁴ ஸாது⁴, அனுருத்³தா⁴! இமம்ஹா பா²ஸுவிஹாரா உத்தரிதரோ வா பணீததரோ வா பா²ஸுவிஹாரோ நத்தீ²’’தி.

330. அத² கோ² ப⁴க³வா ஆயஸ்மந்தஞ்ச அனுருத்³த⁴ம் ஆயஸ்மந்தஞ்ச நந்தி³யம் ஆயஸ்மந்தஞ்ச கிமிலம் த⁴ம்மியா கதா²ய ஸந்த³ஸ்ஸேத்வா ஸமாத³பேத்வா ஸமுத்தேஜேத்வா ஸம்பஹம்ஸேத்வா உட்டா²யாஸனா பக்காமி. அத² கோ² ஆயஸ்மா ச அனுருத்³தோ⁴ ஆயஸ்மா ச நந்தி³யோ ஆயஸ்மா ச கிமிலோ ப⁴க³வந்தம் அனுஸம்யாயித்வா [அனுஸம்ஸாவேத்வா (ஸீ.), அனுஸாவேத்வா (டீகா)] ததோ படினிவத்தித்வா ஆயஸ்மா ச நந்தி³யோ ஆயஸ்மா ச கிமிலோ ஆயஸ்மந்தம் அனுருத்³த⁴ம் ஏதத³வோசும் – ‘‘கிம் நு கோ² மயம் ஆயஸ்மதோ அனுருத்³த⁴ஸ்ஸ ஏவமாரோசிம்ஹ – ‘இமாஸஞ்ச இமாஸஞ்ச விஹாரஸமாபத்தீனம் மயம் லாபி⁴னோ’தி, யம் நோ ஆயஸ்மா அனுருத்³தோ⁴ ப⁴க³வதோ ஸம்முகா² யாவ ஆஸவானம் க²யா பகாஸேதீ’’தி? ‘‘ந கோ² மே ஆயஸ்மந்தோ ஏவமாரோசேஸும் – ‘இமாஸஞ்ச இமாஸஞ்ச விஹாரஸமாபத்தீனம் மயம் லாபி⁴னோ’தி, அபி ச மே ஆயஸ்மந்தானம் சேதஸா சேதோ பரிச்ச விதி³தோ – ‘இமாஸஞ்ச இமாஸஞ்ச விஹாரஸமாபத்தீனம் இமே ஆயஸ்மந்தோ லாபி⁴னோ’தி. தே³வதாபி மே ஏதமத்த²ம் ஆரோசேஸும் – ‘இமாஸஞ்ச இமாஸஞ்ச விஹாரஸமாபத்தீனம் இமே ஆயஸ்மந்தோ லாபி⁴னோ’தி. தமேனம் ப⁴க³வதா பஞ்ஹாபி⁴புட்டே²ன ப்³யாகத’’ந்தி.

331. அத² கோ² தீ³கோ⁴ பரஜனோ யக்கோ² யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் அட்டா²ஸி. ஏகமந்தம் டி²தோ கோ² தீ³கோ⁴ பரஜனோ யக்கோ² ப⁴க³வந்தம் ஏதத³வோச – ‘‘லாபா⁴ வத, ப⁴ந்தே, வஜ்ஜீனம், ஸுலத்³த⁴லாபா⁴ வஜ்ஜிபஜாய, யத்த² ததா²க³தோ விஹரதி அரஹம் ஸம்மாஸம்பு³த்³தோ⁴, இமே ச தயோ குலபுத்தா – ஆயஸ்மா ச அனுருத்³தோ⁴, ஆயஸ்மா ச நந்தி³யோ, ஆயஸ்மா ச கிமிலோ’’தி. தீ³க⁴ஸ்ஸ பரஜனஸ்ஸ யக்க²ஸ்ஸ ஸத்³த³ம் ஸுத்வா பு⁴ம்மா தே³வா ஸத்³த³மனுஸ்ஸாவேஸும் – ‘லாபா⁴ வத, போ⁴, வஜ்ஜீனம், ஸுலத்³த⁴லாபா⁴ வஜ்ஜிபஜாய, யத்த² ததா²க³தோ விஹரதி அரஹம் ஸம்மாஸம்பு³த்³தோ⁴, இமே ச தயோ குலபுத்தா – ஆயஸ்மா ச அனுருத்³தோ⁴, ஆயஸ்மா ச நந்தி³யோ, ஆயஸ்மா ச கிமிலோ’தி. பு⁴ம்மானம் தே³வானம் ஸத்³த³ம் ஸுத்வா சாதுமஹாராஜிகா தே³வா…பே… தாவதிம்ஸா தே³வா…பே… யாமா தே³வா…பே… துஸிதா தே³வா…பே… நிம்மானரதீ தே³வா…பே… பரனிம்மிதவஸவத்தீ தே³வா…பே… ப்³ரஹ்மகாயிகா தே³வா ஸத்³த³மனுஸ்ஸாவேஸும் – ‘‘லாபா⁴ வத, போ⁴, வஜ்ஜீனம், ஸுலத்³த⁴லாபா⁴ வஜ்ஜிபஜாய, யத்த² ததா²க³தோ விஹரதி அரஹம் ஸம்மாஸம்பு³த்³தோ⁴, இமே ச தயோ குலபுத்தா – ஆயஸ்மா ச அனுருத்³தோ⁴, ஆயஸ்மா ச நந்தி³யோ, ஆயஸ்மா ச கிமிலோ’’தி. இதிஹ தே ஆயஸ்மந்தோ தேன க²ணேன (தேன லயேன) [( ) ஸீ. ஸ்யா. பீ. போத்த²கேஸு நத்தி²] தேன முஹுத்தேன யாவப்³ரஹ்மலோகா விதி³தா [ஸம்விதி³தா (க.)] அஹேஸும்.

‘‘ஏவமேதம், தீ³க⁴, ஏவமேதம், தீ³க⁴! யஸ்மாபி, தீ³க⁴, குலா ஏதே தயோ குலபுத்தா அகா³ரஸ்மா அனகா³ரியம் பப்³ப³ஜிதா, தஞ்சேபி குலம் ஏதே தயோ குலபுத்தே பஸன்னசித்தம் அனுஸ்ஸரேய்ய, தஸ்ஸபாஸ்ஸ குலஸ்ஸ தீ³க⁴ரத்தம் ஹிதாய ஸுகா²ய. யஸ்மாபி, தீ³க⁴, குலபரிவட்டா ஏதே தயோ குலபுத்தா அகா³ரஸ்மா அனகா³ரியம் பப்³ப³ஜிதா, ஸோ சேபி குலபரிவட்டோ ஏதே தயோ குலபுத்தே பஸன்னசித்தோ அனுஸ்ஸரேய்ய, தஸ்ஸபாஸ்ஸ குலபரிவட்டஸ்ஸ தீ³க⁴ரத்தம் ஹிதாய ஸுகா²ய. யஸ்மாபி, தீ³க⁴, கா³மா ஏதே தயோ குலபுத்தா அகா³ரஸ்மா அனகா³ரியம் பப்³ப³ஜிதா, ஸோ சேபி கா³மோ ஏதே தயோ குலபுத்தே பஸன்னசித்தோ அனுஸ்ஸரேய்ய, தஸ்ஸபாஸ்ஸ கா³மஸ்ஸ தீ³க⁴ரத்தம் ஹிதாய ஸுகா²ய. யஸ்மாபி, தீ³க⁴, நிக³மா ஏதே தயோ குலபுத்தா அகா³ரஸ்மா அனகா³ரியம் பப்³ப³ஜிதா, ஸோ சேபி நிக³மோ ஏதே தயோ குலபுத்தே பஸன்னசித்தோ அனுஸ்ஸரேய்ய, தஸ்ஸபாஸ்ஸ நிக³மஸ்ஸ தீ³க⁴ரத்தம் ஹிதாய ஸுகா²ய. யஸ்மாபி, தீ³க⁴, நக³ரா ஏதே தயோ குலபுத்தா அகா³ரஸ்மா அனகா³ரியம் பப்³ப³ஜிதா, தஞ்சேபி நக³ரம் ஏதே தயோ குலபுத்தே பஸன்னசித்தம் அனுஸ்ஸரேய்ய, தஸ்ஸபாஸ்ஸ நக³ரஸ்ஸ தீ³க⁴ரத்தம் ஹிதாய ஸுகா²ய. யஸ்மாபி, தீ³க⁴, ஜனபதா³ ஏதே தயோ குலபுத்தா அகா³ரஸ்மா அனகா³ரியம் பப்³ப³ஜிதா, ஸோ சேபி ஜனபதோ³ ஏதே தயோ குலபுத்தே பஸன்னசித்தோ அனுஸ்ஸரேய்ய, தஸ்ஸபாஸ்ஸ ஜனபத³ஸ்ஸ தீ³க⁴ரத்தம் ஹிதாய ஸுகா²ய. ஸப்³பே³ சேபி, தீ³க⁴, க²த்தியா ஏதே தயோ குலபுத்தே பஸன்னசித்தா அனுஸ்ஸரேய்யும், ஸப்³பே³ஸானம்பாஸ்ஸ க²த்தியானம் தீ³க⁴ரத்தம் ஹிதாய ஸுகா²ய. ஸப்³பே³ சேபி, தீ³க⁴, ப்³ராஹ்மணா…பே… ஸப்³பே³ சேபி, தீ³க⁴, வேஸ்ஸா…பே… ஸப்³பே³ சேபி, தீ³க⁴, ஸுத்³தா³ ஏதே தயோ குலபுத்தே பஸன்னசித்தா அனுஸ்ஸரேய்யும், ஸப்³பே³ஸானம்பாஸ்ஸ ஸுத்³தா³னம் தீ³க⁴ரத்தம் ஹிதாய ஸுகா²ய. ஸதே³வகோ சேபி, தீ³க⁴, லோகோ ஸமாரகோ ஸப்³ரஹ்மகோ ஸஸ்ஸமணப்³ராஹ்மணீ பஜா ஸதே³வமனுஸ்ஸா ஏதே தயோ குலபுத்தே பஸன்னசித்தா அனுஸ்ஸரேய்ய, ஸதே³வகஸ்ஸபாஸ்ஸ லோகஸ்ஸ ஸமாரகஸ்ஸ ஸப்³ரஹ்மகஸ்ஸ ஸஸ்ஸமணப்³ராஹ்மணியா பஜாய ஸதே³வமனுஸ்ஸாய தீ³க⁴ரத்தம் ஹிதாய ஸுகா²ய. பஸ்ஸ, தீ³க⁴, யாவ ஏதே தயோ குலபுத்தா ப³ஹுஜனஹிதாய படிபன்னா ப³ஹுஜனஸுகா²ய லோகானுகம்பாய, அத்தா²ய ஹிதாய ஸுகா²ய தே³வமனுஸ்ஸான’’ந்தி.

இத³மவோச ப⁴க³வா. அத்தமனோ தீ³கோ⁴ பரஜனோ யக்கோ² ப⁴க³வதோ பா⁴ஸிதம் அபி⁴னந்தீ³தி.

சூளகோ³ஸிங்க³ஸுத்தம் நிட்டி²தம் பட²மம்.