5. நிவாபஸுத்தம்

261. ஏவம் மே ஸுதம் – ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி. ‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸும். ப⁴க³வா ஏதத³வோச –

‘‘ந, பி⁴க்க²வே, நேவாபிகோ நிவாபம் நிவபதி மிக³ஜாதானம் – ‘இமம் மே நிவாபம் நிவுத்தம் மிக³ஜாதா பரிபு⁴ஞ்ஜந்தா தீ³கா⁴யுகா வண்ணவந்தோ சிரம் தீ³க⁴மத்³தா⁴னம் யாபேந்தூ’தி. ஏவஞ்ச கோ², பி⁴க்க²வே, நேவாபிகோ நிவாபம் நிவபதி மிக³ஜாதானம் – ‘இமம் மே நிவாபம் நிவுத்தம் மிக³ஜாதா அனுபக²ஜ்ஜ முச்சி²தா போ⁴ஜனானி பு⁴ஞ்ஜிஸ்ஸந்தி, அனுபக²ஜ்ஜ முச்சி²தா போ⁴ஜனானி பு⁴ஞ்ஜமானா மத³ம் ஆபஜ்ஜிஸ்ஸந்தி, மத்தா ஸமானா பமாத³ம் ஆபஜ்ஜிஸ்ஸந்தி, பமத்தா ஸமானா யதா²காமகரணீயா ப⁴விஸ்ஸந்தி இமஸ்மிம் நிவாபே’தி.

262. ‘‘தத்ர, பி⁴க்க²வே, பட²மா மிக³ஜாதா அமும் நிவாபம் நிவுத்தம் நேவாபிகஸ்ஸ அனுபக²ஜ்ஜ முச்சி²தா போ⁴ஜனானி பு⁴ஞ்ஜிம்ஸு, தே தத்த² அனுபக²ஜ்ஜ முச்சி²தா போ⁴ஜனானி பு⁴ஞ்ஜமானா மத³ம் ஆபஜ்ஜிம்ஸு, மத்தா ஸமானா பமாத³ம் ஆபஜ்ஜிம்ஸு, பமத்தா ஸமானா யதா²காமகரணீயா அஹேஸும் நேவாபிகஸ்ஸ அமுஸ்மிம் நிவாபே. ஏவஞ்ஹி தே, பி⁴க்க²வே, பட²மா மிக³ஜாதா ந பரிமுச்சிம்ஸு நேவாபிகஸ்ஸ இத்³தா⁴னுபா⁴வா.

263. ‘‘தத்ர, பி⁴க்க²வே, து³தியா மிக³ஜாதா ஏவம் ஸமசிந்தேஸும் – ‘யே கோ² தே பட²மா மிக³ஜாதா அமும் நிவாபம் நிவுத்தம் நேவாபிகஸ்ஸ அனுபக²ஜ்ஜ முச்சி²தா போ⁴ஜனானி பு⁴ஞ்ஜிம்ஸு. தே தத்த² அனுபக²ஜ்ஜ முச்சி²தா போ⁴ஜனானி பு⁴ஞ்ஜமானா மத³ம் ஆபஜ்ஜிம்ஸு, மத்தா ஸமானா பமாத³ம் ஆபஜ்ஜிம்ஸு, பமத்தா ஸமானா யதா²காமகரணீயா அஹேஸும் நேவாபிகஸ்ஸ அமுஸ்மிம் நிவாபே. ஏவஞ்ஹி தே பட²மா மிக³ஜாதா ந பரிமுச்சிம்ஸு நேவாபிகஸ்ஸ இத்³தா⁴னுபா⁴வா. யம்னூன மயம் ஸப்³ப³ஸோ நிவாபபோ⁴ஜனா படிவிரமேய்யாம, ப⁴யபோ⁴கா³ படிவிரதா அரஞ்ஞாயதனானி அஜ்ஜோ²கா³ஹேத்வா விஹரேய்யாமா’தி. தே ஸப்³ப³ஸோ நிவாபபோ⁴ஜனா படிவிரமிம்ஸு, ப⁴யபோ⁴கா³ படிவிரதா அரஞ்ஞாயதனானி அஜ்ஜோ²கா³ஹேத்வா விஹரிம்ஸு. தேஸம் கி³ம்ஹானம் பச்சி²மே மாஸே, திணோத³கஸங்க²யே, அதி⁴மத்தகஸிமானம் பத்தோ காயோ ஹோதி. தேஸம் அதி⁴மத்தகஸிமானம் பத்தகாயானம் ப³லவீரியம் பரிஹாயி. ப³லவீரியே பரிஹீனே தமேவ நிவாபம் நிவுத்தம் நேவாபிகஸ்ஸ பச்சாக³மிம்ஸு. தே தத்த² அனுபக²ஜ்ஜ முச்சி²தா போ⁴ஜனானி பு⁴ஞ்ஜிம்ஸு. தே தத்த² அனுபக²ஜ்ஜ முச்சி²தா போ⁴ஜனானி பு⁴ஞ்ஜமானா மத³ம் ஆபஜ்ஜிம்ஸு, மத்தா ஸமானா பமாத³ம் ஆபஜ்ஜிம்ஸு, பமத்தா ஸமானா யதா²காமகரணீயா அஹேஸும் நேவாபிகஸ்ஸ அமுஸ்மிம் நிவாபே. ஏவஞ்ஹி தே, பி⁴க்க²வே, து³தியாபி மிக³ஜாதா ந பரிமுச்சிம்ஸு நேவாபிகஸ்ஸ இத்³தா⁴னுபா⁴வா.

264. ‘‘தத்ர, பி⁴க்க²வே, ததியா மிக³ஜாதா ஏவம் ஸமசிந்தேஸும் – ‘யே கோ² தே பட²மா மிக³ஜாதா அமும் நிவாபம் நிவுத்தம் நேவாபிகஸ்ஸ…பே… ஏவஞ்ஹி தே பட²மா மிக³ஜாதா ந பரிமுச்சிம்ஸு நேவாபிகஸ்ஸ இத்³தா⁴னுபா⁴வா. யேபி தே து³தியா மிக³ஜாதா ஏவம் ஸமசிந்தேஸும் – யே கோ² தே பட²மா மிக³ஜாதா அமும் நிவாபம் நிவுத்தம் நேவாபிகஸ்ஸ…பே… ஏவஞ்ஹி தே பட²மா மிக³ஜாதா ந பரிமுச்சிம்ஸு நேவாபிகஸ்ஸ இத்³தா⁴னுபா⁴வா. யம்னூன மயம் ஸப்³ப³ஸோ நிவாபபோ⁴ஜனா படிவிரமேய்யாம, ப⁴யபோ⁴கா³ படிவிரதா அரஞ்ஞாயதனானி அஜ்ஜோ²கா³ஹேத்வா விஹரேய்யாமாதி. தே ஸப்³ப³ஸோ நிவாபபோ⁴ஜனா படிவிரமிம்ஸு, ப⁴யபோ⁴கா³ படிவிரதா அரஞ்ஞாயதனானி அஜ்ஜோ²கா³ஹேத்வா விஹரிம்ஸு. தேஸம் கி³ம்ஹானம் பச்சி²மே மாஸே திணோத³கஸங்க²யே அதி⁴மத்தகஸிமானம் பத்தோ காயோ ஹோதி. தேஸம் அதி⁴மத்தகஸிமானம் பத்தகாயானம் ப³லவீரியம் பரிஹாயி. ப³லவீரியே பரிஹீனே தமேவ நிவாபம் நிவுத்தம் நேவாபிகஸ்ஸ பச்சாக³மிம்ஸு. தே தத்த² அனுபக²ஜ்ஜ முச்சி²தா போ⁴ஜனானி பு⁴ஞ்ஜிம்ஸு. தே தத்த² அனுபக²ஜ்ஜ முச்சி²தா போ⁴ஜனானி பு⁴ஞ்ஜமானா மத³ம் ஆபஜ்ஜிம்ஸு, மத்தா ஸமானா பமாத³ம் ஆபஜ்ஜிம்ஸு, பமத்தா ஸமானா யதா²காமகரணீயா அஹேஸும் நேவாபிகஸ்ஸ அமுஸ்மிம் நிவாபே. ஏவஞ்ஹி தே து³தியாபி மிக³ஜாதா ந பரிமுச்சிம்ஸு நேவாபிகஸ்ஸ இத்³தா⁴னுபா⁴வா. யம்னூன மயம் அமும் நிவாபம் நிவுத்தம் நேவாபிகஸ்ஸ உபனிஸ்ஸாய ஆஸயம் கப்பேய்யாம. தத்ராஸயம் கப்பேத்வா அமும் நிவாபம் நிவுத்தம் நேவாபிகஸ்ஸ அனனுபக²ஜ்ஜ அமுச்சி²தா போ⁴ஜனானி பு⁴ஞ்ஜிஸ்ஸாம, அனனுபக²ஜ்ஜ அமுச்சி²தா போ⁴ஜனானி பு⁴ஞ்ஜமானா ந மத³ம் ஆபஜ்ஜிஸ்ஸாம, அமத்தா ஸமானா ந பமாத³ம் ஆபஜ்ஜிஸ்ஸாம, அப்பமத்தா ஸமானா ந யதா²காமகரணீயா ப⁴விஸ்ஸாம நேவாபிகஸ்ஸ அமுஸ்மிம் நிவாபே’தி. தே அமும் நிவாபம் நிவுத்தம் நேவாபிகஸ்ஸ உபனிஸ்ஸாய ஆஸயம் கப்பயிம்ஸு. தத்ராஸயம் கப்பேத்வா அமும் நிவாபம் நிவுத்தம் நேவாபிகஸ்ஸ அனனுபக²ஜ்ஜ அமுச்சி²தா போ⁴ஜனானி பு⁴ஞ்ஜிம்ஸு, தே தத்த² அனனுபக²ஜ்ஜ அமுச்சி²தா போ⁴ஜனானி பு⁴ஞ்ஜமானா ந மத³ம் ஆபஜ்ஜிம்ஸு, அமத்தா ஸமானா ந பமாத³ம் ஆபஜ்ஜிம்ஸு, அப்பமத்தா ஸமானா ந யதா²காமகரணீயா அஹேஸும் நேவாபிகஸ்ஸ அமுஸ்மிம் நிவாபே.

‘‘தத்ர, பி⁴க்க²வே, நேவாபிகஸ்ஸ ச நேவாபிகபரிஸாய ச ஏதத³ஹோஸி – ‘ஸடா²ஸ்ஸுனாமிமே ததியா மிக³ஜாதா கேதபி³னோ, இத்³தி⁴மந்தாஸ்ஸுனாமிமே ததியா மிக³ஜாதா பரஜனா; இமஞ்ச நாம நிவாபம் நிவுத்தம் பரிபு⁴ஞ்ஜந்தி, ந ச நேஸம் ஜானாம ஆக³திம் வா க³திம் வா. யம்னூன மயம் இமம் நிவாபம் நிவுத்தம் மஹதீஹி த³ண்ட³வாகராஹி [த³ண்ட³வாகு³ராஹி (ஸ்யா.)] ஸமந்தா ஸப்பதே³ஸம் அனுபரிவாரேய்யாம – அப்பேவ நாம ததியானம் மிக³ஜாதானம் ஆஸயம் பஸ்ஸேய்யாம, யத்த² தே கா³ஹம் க³ச்சே²ய்யு’ந்தி. தே அமும் நிவாபம் நிவுத்தம் மஹதீஹி த³ண்ட³வாகராஹி ஸமந்தா ஸப்பதே³ஸம் அனுபரிவாரேஸும். அத்³த³ஸம்ஸு கோ², பி⁴க்க²வே, நேவாபிகோ ச நேவாபிகபரிஸா ச ததியானம் மிக³ஜாதானம் ஆஸயம், யத்த² தே கா³ஹம் அக³மம்ஸு. ஏவஞ்ஹி தே, பி⁴க்க²வே, ததியாபி மிக³ஜாதா ந பரிமுச்சிம்ஸு நேவாபிகஸ்ஸ இத்³தா⁴னுபா⁴வா.

265. ‘‘தத்ர, பி⁴க்க²வே, சதுத்தா² மிக³ஜாதா ஏவம் ஸமசிந்தேஸும் – ‘யே கோ² தே பட²மா மிக³ஜாதா…பே… ஏவஞ்ஹி தே பட²மா மிக³ஜாதா ந பரிமுச்சிம்ஸு நேவாபிகஸ்ஸ இத்³தா⁴னுபா⁴வா. யேபி தே து³தியா மிக³ஜாதா ஏவம் ஸமசிந்தேஸும் ‘யே கோ² தே பட²மா மிக³ஜாதா…பே… ஏவஞ்ஹி தே பட²மா மிக³ஜாதா ந பரிமுச்சிம்ஸு நேவாபிகஸ்ஸ இத்³தா⁴னுபா⁴வா. யம்னூன மயம் ஸப்³ப³ஸோ நிவாபபோ⁴ஜனா படிவிரமேய்யாம, ப⁴யபோ⁴கா³ படிவிரதா அரஞ்ஞாயதனானி அஜ்ஜோ²கா³ஹேத்வா விஹரேய்யாமா’தி. தே ஸப்³ப³ஸோ நிவாபபோ⁴ஜனா படிவிரமிம்ஸு…பே… ஏவஞ்ஹி தே து³தியாபி மிக³ஜாதா ந பரிமுச்சிம்ஸு நேவாபிகஸ்ஸ இத்³தா⁴னுபா⁴வா. யேபி தே ததியா மிக³ஜாதா ஏவம் ஸமசிந்தேஸும் ‘யே கோ² தே பட²மா மிக³ஜாதா…பே… ஏவஞ்ஹி தே பட²மா மிக³ஜாதா ந பரிமுச்சிம்ஸு நேவாபிகஸ்ஸ இத்³தா⁴னுபா⁴வா. யேபி தே து³தியா மிக³ஜாதா ஏவம் ஸமசிந்தேஸும் ‘யே கோ² தே பட²மா மிக³ஜாதா…பே… ஏவஞ்ஹி தே பட²மா மிக³ஜாதா ந பரிமுச்சிம்ஸு நேவாபிகஸ்ஸ இத்³தா⁴னுபா⁴வா. யம்னூன மயம் ஸப்³ப³ஸோ நிவாபபோ⁴ஜனா படிவிரமேய்யாம, ப⁴யபோ⁴கா³ படிவிரதா அரஞ்ஞாயதனானி அஜ்ஜோ²கா³ஹேத்வா விஹரேய்யாமா’தி. தே ஸப்³ப³ஸோ நிவாபபோ⁴ஜனா படிவிரமிம்ஸு…பே… ஏவஞ்ஹி தே து³தியாபி மிக³ஜாதா ந பரிமுச்சிம்ஸு நேவாபிகஸ்ஸ இத்³தா⁴னுபா⁴வா. யம்னூன மயம் அமும் நிவாபம் நிவுத்தம் நேவாபிகஸ்ஸ உபனிஸ்ஸாய ஆஸயம் கப்பேய்யாம, தத்ராஸயம் கப்பேத்வா அமும் நிவாபம் நிவுத்தம் நேவாபிகஸ்ஸ அனனுபக²ஜ்ஜ அமுச்சி²தா போ⁴ஜனானி பு⁴ஞ்ஜிஸ்ஸாம, அனனுபக²ஜ்ஜ அமுச்சி²தா போ⁴ஜனானி பு⁴ஞ்ஜமானா ந மத³ம் ஆபஜ்ஜிஸ்ஸாம, அமத்தா ஸமானா ந பமாத³ம் ஆபஜ்ஜிஸ்ஸாம, அப்பமத்தா ஸமானா ந யதா²காமகரணீயா ப⁴விஸ்ஸாம நேவாபிகஸ்ஸ அமுஸ்மிம் நிவாபே’தி. தே அமும் நிவாபம் நிவுத்தம் நேவாபிகஸ்ஸ உபனிஸ்ஸாய ஆஸயம் கப்பயிம்ஸு, தத்ராஸயம் கப்பேத்வா அமும் நிவாபம் நிவுத்தம் நேவாபிகஸ்ஸ அனனுபக²ஜ்ஜ அமுச்சி²தா போ⁴ஜனானி பு⁴ஞ்ஜிம்ஸு, தே தத்த² அனனுபக²ஜ்ஜ அமுச்சி²தா போ⁴ஜனானி பு⁴ஞ்ஜமானா ந மத³ம் ஆபஜ்ஜிம்ஸு, அமத்தா ஸமானா ந பமாத³ம் ஆபஜ்ஜிம்ஸு, அப்பமத்தா ஸமானா ந யதா²காமகரணீயா அஹேஸும் நேவாபிகஸ்ஸ அமுஸ்மிம் நிவாபே.

‘‘தத்ர நேவாபிகஸ்ஸ ச நேவாபிகபரிஸாய ச ஏதத³ஹோஸி – ‘ஸடா²ஸ்ஸுனாமிமே ததியா மிக³ஜாதா கேதபி³னோ, இத்³தி⁴மந்தாஸ்ஸுனாமிமே ததியா மிக³ஜாதா பரஜனா, இமஞ்ச நாம நிவாபம் நிவுத்தம் பரிபு⁴ஞ்ஜந்தி. ந ச நேஸம் ஜானாம ஆக³திம் வா க³திம் வா. யம்னூன மயம் இமம் நிவாபம் நிவுத்தம் மஹதீதி த³ண்ட³வாகராஹி ஸமந்தா ஸப்பதே³ஸம் அனுபரிவாரேய்யாம, அப்பேவ நாம ததியானம் மிக³ஜாதானம் ஆஸயம் பஸ்ஸேய்யாம, யத்த² தே கா³ஹம் க³ச்சே²ய்யு’ந்தி. தே அமும் நிவாபம் நிவுத்தம் மஹதீதி த³ண்ட³வாகராஹி ஸமந்தா ஸப்பதே³ஸம் அனுபரிவாரேஸும். அத்³த³ஸம்ஸு கோ² நேவாபிகோ ச நேவாபிகபரிஸா ச ததியானம் மிக³ஜாதானம் ஆஸயம், யத்த² தே கா³ஹம் அக³மம்ஸு. ஏவஞ்ஹி தே ததியாபி மிக³ஜாதா ந பரிமுச்சிம்ஸு நேவாபிகஸ்ஸ இத்³தா⁴னுபா⁴வா. யம்னூன மயம் யத்த² அக³தி நேவாபிகஸ்ஸ ச நேவாபிகபரிஸாய ச தத்ராஸயம் கப்பேய்யாம, தத்ராஸயம் கப்பேத்வா அமும் நிவாபம் நிவுத்தம் நேவாபிகஸ்ஸ அனனுபக²ஜ்ஜ அமுச்சி²தா போ⁴ஜனானி பு⁴ஞ்ஜிஸ்ஸாம, அனனுபக²ஜ்ஜ அமுச்சி²தா போ⁴ஜனானி பு⁴ஞ்ஜமானா ந மத³ம் ஆபஜ்ஜிஸ்ஸாம, அமத்தா ஸமானா ந பமாத³ம் ஆபஜ்ஜிஸ்ஸாம, அப்பமத்தா ஸமானா ந யதா²காமகரணீயா ப⁴விஸ்ஸாம நேவாபிகஸ்ஸ அமுஸ்மிம் நிவாபே’தி. தே யத்த² அக³தி நேவாபிகஸ்ஸ ச நேவாபிகபரிஸாய ச தத்ராஸயம் கப்பயிம்ஸு. தத்ராஸயம் கப்பேத்வா அமும் நிவாபம் நிவுத்தம் நேவாபிகஸ்ஸ அனனுபக²ஜ்ஜ அமுச்சி²தா போ⁴ஜனானி பு⁴ஞ்ஜிம்ஸு, தே தத்த² அனனுபக²ஜ்ஜ அமுச்சி²தா போ⁴ஜனானி பு⁴ஞ்ஜமானா ந மத³ம் ஆபஜ்ஜிம்ஸு, அமத்தா ஸமானா ந பமாத³ம் ஆபஜ்ஜிம்ஸு, அப்பமத்தா ஸமானா ந யதா²காமகரணீயா அஹேஸும் நேவாபிகஸ்ஸ அமுஸ்மிம் நிவாபே.

‘‘தத்ர, பி⁴க்க²வே, நேவாபிகஸ்ஸ ச நேவாபிகபரிஸாய ச ஏதத³ஹோஸி – ‘ஸடா²ஸ்ஸுனாமிமே சதுத்தா² மிக³ஜாதா கேதபி³னோ, இத்³தி⁴மந்தாஸ்ஸுனாமிமே சதுத்தா² மிக³ஜாதா பரஜனா. இமஞ்ச நாம நிவாபம் நிவுத்தம் பரிபு⁴ஞ்ஜந்தி, ந ச நேஸம் ஜானாம ஆக³திம் வா க³திம் வா. யம்னூன மயம் இமம் நிவாபம் நிவுத்தம் மஹதீஹி த³ண்ட³வாகராஹி ஸமந்தா ஸப்பதே³ஸம் அனுபரிவாரேய்யாம, அப்பேவ நாம சதுத்தா²னம் மிக³ஜாதானம் ஆஸயம் பஸ்ஸேய்யாம யத்த² தே கா³ஹம் க³ச்சே²ய்யு’ந்தி. தே அமும் நிவாபம் நிவுத்தம் மஹதீஹி த³ண்ட³வாகராஹி ஸமந்தா ஸப்பதே³ஸம் அனுபரிவாரேஸும். நேவ கோ², பி⁴க்க²வே, அத்³த³ஸம்ஸு நேவாபிகோ ச நேவாபிகபரிஸா ச சதுத்தா²னம் மிக³ஜாதானம் ஆஸயம், யத்த² தே கா³ஹம் க³ச்சே²ய்யும். தத்ர, பி⁴க்க²வே, நேவாபிகஸ்ஸ ச நேவாபிகபரிஸாய ச ஏதத³ஹோஸி – ‘ஸசே கோ² மயம் சதுத்தே² மிக³ஜாதே க⁴ட்டேஸ்ஸாம, தே க⁴ட்டிதா அஞ்ஞே க⁴ட்டிஸ்ஸந்தி தே க⁴ட்டிதா அஞ்ஞே க⁴ட்டிஸ்ஸந்தி. ஏவம் இமம் நிவாபம் நிவுத்தம் ஸப்³ப³ஸோ மிக³ஜாதா பரிமுஞ்சிஸ்ஸந்தி. யம்னூன மயம் சதுத்தே² மிக³ஜாதே அஜ்ஜு²பேக்கே²ய்யாமா’தி. அஜ்ஜு²பேக்கி²ம்ஸு கோ², பி⁴க்க²வே, நேவாபிகோ ச நேவாபிகபரிஸா ச சதுத்தே² மிக³ஜாதே. ஏவஞ்ஹி தே, பி⁴க்க²வே, சதுத்தா² மிக³ஜாதா பரிமுச்சிம்ஸு நேவாபிகஸ்ஸ இத்³தா⁴னுபா⁴வா.

266. ‘‘உபமா கோ² மே அயம், பி⁴க்க²வே, கதா அத்த²ஸ்ஸ விஞ்ஞாபனாய. அயம் சேவேத்த² அத்தோ² – நிவாபோதி கோ², பி⁴க்க²வே, பஞ்சன்னேதம் காமகு³ணானம் அதி⁴வசனம். நேவாபிகோதி கோ², பி⁴க்க²வே, மாரஸ்ஸேதம் பாபிமதோ அதி⁴வசனம். நேவாபிகபரிஸாதி கோ², பி⁴க்க²வே, மாரபரிஸாயேதம் அதி⁴வசனம். மிக³ஜாதாதி கோ², பி⁴க்க²வே, ஸமணப்³ராஹ்மணானமேதம் அதி⁴வசனம்.

267. ‘‘தத்ர, பி⁴க்க²வே, பட²மா ஸமணப்³ராஹ்மணா அமும் நிவாபம் நிவுத்தம் மாரஸ்ஸ அமூனி ச லோகாமிஸானி அனுபக²ஜ்ஜ முச்சி²தா போ⁴ஜனானி பு⁴ஞ்ஜிம்ஸு. தே தத்த² அனுபக²ஜ்ஜ முச்சி²தா போ⁴ஜனானி பு⁴ஞ்ஜமானா மத³ம் ஆபஜ்ஜிம்ஸு, மத்தா ஸமானா பமாத³ம் ஆபஜ்ஜிம்ஸு, பமத்தா ஸமானா யதா²காமகரணீயா அஹேஸும் மாரஸ்ஸ அமுஸ்மிம் நிவாபே அமுஸ்மிஞ்ச லோகாமிஸே. ஏவஞ்ஹி தே, பி⁴க்க²வே, பட²மா ஸமணப்³ராஹ்மணா ந பரிமுச்சிம்ஸு மாரஸ்ஸ இத்³தா⁴னுபா⁴வா. ஸேய்யதா²பி தே, பி⁴க்க²வே, பட²மா மிக³ஜாதா ததூ²பமே அஹம் இமே பட²மே ஸமணப்³ராஹ்மணே வதா³மி.

268. ‘‘தத்ர, பி⁴க்க²வே, து³தியா ஸமணப்³ராஹ்மணா ஏவம் ஸமசிந்தேஸும் – ‘யே கோ² தே பட²மா ஸமணப்³ராஹ்மணா அமும் நிவாபம் நிவுத்தம் மாரஸ்ஸ அமூனி ச லோகாமிஸானி அனுபக²ஜ்ஜ முச்சி²தா போ⁴ஜனானி பு⁴ஞ்ஜிம்ஸு. தே தத்த² அனுபக²ஜ்ஜ முச்சி²தா போ⁴ஜனானி பு⁴ஞ்ஜமானா மத³ம் ஆபஜ்ஜிம்ஸு, மத்தா ஸமானா பமாத³ம் ஆபஜ்ஜிம்ஸு, பமத்தா ஸமானா யதா²காமகரணீயா அஹேஸும் மாரஸ்ஸ அமுஸ்மிம் நிவாபே அமுஸ்மிஞ்ச லோகாமிஸே. ஏவஞ்ஹி தே பட²மா ஸமணப்³ராஹ்மணா ந பரிமுச்சிம்ஸு மாரஸ்ஸ இத்³தா⁴னுபா⁴வா. யம்னூன மயம் ஸப்³ப³ஸோ நிவாபபோ⁴ஜனா லோகாமிஸா படிவிரமேய்யாம, ப⁴யபோ⁴கா³ படிவிரதா அரஞ்ஞாயதனானி அஜ்ஜோ²கா³ஹேத்வா விஹரேய்யாமா’தி. தே ஸப்³ப³ஸோ நிவாபபோ⁴ஜனா லோகாமிஸா படிவிரமிம்ஸு, ப⁴யபோ⁴கா³ படிவிரதா அரஞ்ஞாயதனானி அஜ்ஜோ²கா³ஹேத்வா விஹரேய்யாமாதி. தே ஸப்³ப³ஸோ நிவாபபோ⁴ஜனா லோகாமிஸா படிவிரமிம்ஸு, ப⁴யபோ⁴கா³ படிவிரதா அரஞ்ஞாயதனானி அஜ்ஜோ²கா³ஹேத்வா விஹரிம்ஸு. தே தத்த² ஸாகப⁴க்கா²பி அஹேஸும், ஸாமாகப⁴க்கா²பி அஹேஸும், நீவாரப⁴க்கா²பி அஹேஸும், த³த்³து³லப⁴க்கா²பி அஹேஸும், ஹடப⁴க்கா²பி அஹேஸும், கணப⁴க்கா²பி அஹேஸும், ஆசாமப⁴க்கா²பி அஹேஸும், பிஞ்ஞாகப⁴க்கா²பி அஹேஸும், திணப⁴க்கா²பி அஹேஸும், கோ³மயப⁴க்கா²பி அஹேஸும், வனமூலப²லாஹாரா யாபேஸும் பவத்தப²லபோ⁴ஜீ.

‘‘தேஸம் கி³ம்ஹானம் பச்சி²மே மாஸே, திணோத³கஸங்க²யே, அதி⁴மத்தகஸிமானம் பத்தோ காயோ ஹோதி. தேஸம் அதி⁴மத்தகஸிமானம் பத்தகாயானம் ப³லவீரியம் பரிஹாயி. ப³லவீரியே பரிஹீனே சேதோவிமுத்தி பரிஹாயி. சேதோவிமுத்தியா பரிஹீனாய தமேவ நிவாபம் நிவுத்தம் மாரஸ்ஸ பச்சாக³மிம்ஸு தானி ச லோகாமிஸானி. தே தத்த² அனுபக²ஜ்ஜ முச்சி²தா போ⁴ஜனானி பு⁴ஞ்ஜிம்ஸு. தே தத்த² அனுபக²ஜ்ஜ முச்சி²தா போ⁴ஜனானி பு⁴ஞ்ஜமானா மத³ம் ஆபஜ்ஜிம்ஸு, மத்தா ஸமானா பமாத³ம் ஆபஜ்ஜிம்ஸு, பமத்தா ஸமானா யதா²காமகரணீயா அஹேஸும் மாரஸ்ஸ அமுஸ்மிம் நிவாபே அமுஸ்மிஞ்ச லோகாமிஸே. ஏவஞ்ஹி தே, பி⁴க்க²வே, து³தியாபி ஸமணப்³ராஹ்மணா ந பரிமுச்சிம்ஸு மாரஸ்ஸ இத்³தா⁴னுபா⁴வா. ஸேய்யதா²பி தே, பி⁴க்க²வே, து³தியா மிக³ஜாதா ததூ²பமே அஹம் இமே து³தியே ஸமணப்³ராஹ்மணே வதா³மி.

269. ‘‘தத்ர, பி⁴க்க²வே, ததியா ஸமணப்³ராஹ்மணா ஏவம் ஸமசிந்தேஸும் – ‘யே கோ² தே பட²மா ஸமணப்³ராஹ்மணா அமும் நிவாபம் நிவுத்தம் மாரஸ்ஸ அமூனி ச லோகாமிஸானி…பே…. ஏவஞ்ஹி தே பட²மா ஸமணப்³ராஹ்மணா ந பரிமுச்சிம்ஸு மாரஸ்ஸ இத்³தா⁴னுபா⁴வா. யேபி தே து³தியா ஸமணப்³ராஹ்மணா ஏவம் ஸமசிந்தேஸும் – ‘யே கோ² தே பட²மா ஸமணப்³ராஹ்மணா அமும் நிவாபம் நிவுத்தம் மாரஸ்ஸ அமூனி ச லோகாமிஸானி…பே…. ஏவஞ்ஹி தே பட²மா ஸமணப்³ராஹ்மணா ந பரிமுச்சிம்ஸு மாரஸ்ஸ இத்³தா⁴னுபா⁴வா. யம்னூன மயம் ஸப்³ப³ஸோ நிவாபபோ⁴ஜனா லோகாமிஸா படிவிரமேய்யாம, ப⁴யபோ⁴கா³ படிவிரதா அரஞ்ஞாயதனானி அஜ்ஜோ²கா³ஹேத்வா விஹரேய்யாமா’தி. தே ஸப்³ப³ஸோ நிவாபபோ⁴ஜனா லோகாமிஸா படிவிரமிம்ஸு. ப⁴யபோ⁴கா³ படிவிரதா அரஞ்ஞாயதனானி அஜ்ஜோ²கா³ஹேத்வா விஹரிம்ஸு. தே தத்த² ஸாகப⁴க்கா²பி அஹேஸும்…பே… பவத்தப²லபோ⁴ஜீ. தேஸம் கி³ம்ஹானம் பச்சி²மே மாஸே திணோத³கஸங்க²யே அதி⁴மத்தகஸிமானம் பத்தோ காயோ ஹோதி. தேஸம் அதி⁴மத்தகஸிமானம் பத்தகாயானம் ப³லவீரியம் பரிஹாயி, ப³லவீரியே பரிஹீனே சேதோவிமுத்தி பரிஹாயி, சேதோவிமுத்தியா பரிஹீனாய தமேவ நிவாபம் நிவுத்தம் மாரஸ்ஸ பச்சாக³மிம்ஸு தானி ச லோகாமிஸானி. தே தத்த² அனுபக²ஜ்ஜ முச்சி²தா போ⁴ஜனானி பு⁴ஞ்ஜிம்ஸு. தே தத்த² அனுபக²ஜ்ஜ முச்சி²தா போ⁴ஜனானி பு⁴ஞ்ஜமானா மத³ம் ஆபஜ்ஜிம்ஸு, மத்தா ஸமானா பமாத³ம் ஆபஜ்ஜிம்ஸு, பமத்தா ஸமானா யதா²காமகரணீயா அஹேஸும் மாரஸ்ஸ அமுஸ்மிம் நிவாபே அமுஸ்மிஞ்ச லோகாமிஸே. ஏவஞ்ஹி தே து³தியாபி ஸமணப்³ராஹ்மணா ந பரிமுச்சிம்ஸு மாரஸ்ஸ இத்³தா⁴னுபா⁴வா. யம்னூன மயம் அமும் நிவாபம் நிவுத்தம் மாரஸ்ஸ அமூனி ச லோகாமிஸானி உபனிஸ்ஸாய ஆஸயம் கப்பேய்யாம, தத்ராஸயம் கப்பேத்வா அமும் நிவாபம் நிவுத்தம் மாரஸ்ஸ அமூனி ச லோகாமிஸானி அனனுபக²ஜ்ஜ அமுச்சி²தா போ⁴ஜனானி பு⁴ஞ்ஜிஸ்ஸாம, அனனுபக²ஜ்ஜ அமுச்சி²தா போ⁴ஜனானி பு⁴ஞ்ஜமானா ந மத³ம் ஆபஜ்ஜிஸ்ஸாம, அமத்தா ஸமானா ந பமாத³ம் ஆபஜ்ஜிஸ்ஸாம, அப்பமத்தா ஸமானா ந யதா²காமகரணீயா ப⁴விஸ்ஸாம மாரஸ்ஸ அமுஸ்மிம் நிவாபே அமுஸ்மிஞ்ச லோகாமிஸே’’தி.

‘‘தே அமும் நிவாபம் நிவுத்தம் மாரஸ்ஸ அமூனி ச லோகாமிஸானி உபனிஸ்ஸாய ஆஸயம் கப்பயிம்ஸு. தத்ராஸயம் கப்பேத்வா அமும் நிவாபம் நிவுத்தம் மாரஸ்ஸ அமூனி ச லோகாமிஸானி அனனுபக²ஜ்ஜ அமுச்சி²தா போ⁴ஜனானி பு⁴ஞ்ஜிம்ஸு. தே தத்த² அனனுபக²ஜ்ஜ அமுச்சி²தா போ⁴ஜனானி பு⁴ஞ்ஜமானா ந மத³ம் ஆபஜ்ஜிம்ஸு, அமத்தா ஸமானா ந பமாத³ம் ஆபஜ்ஜிம்ஸு, அப்பமத்தா ஸமானா ந யதா²காமகரணீயா அஹேஸும் மாரஸ்ஸ அமுஸ்மிம் நிவாபே அமுஸ்மிஞ்ச லோகாமிஸே. அபி ச கோ² ஏவம்தி³ட்டி²கா அஹேஸும் – ஸஸ்ஸதோ லோகோ இதிபி, அஸஸ்ஸதோ லோகோ இதிபி; அந்தவா லோகோ இதிபி, அனந்தவா லோகோ இதிபி; தம் ஜீவம் தம் ஸரீரம் இதிபி, அஞ்ஞம் ஜீவம் அஞ்ஞம் ஸரீரம் இதிபி; ஹோதி ததா²க³தோ பரம் மரணா இதிபி, ந ஹோதி ததா²க³தோ பரம் மரணா இதிபி, ஹோதி ச ந ச ஹோதி ததா²க³தோ பரம் மரணா இதிபி, நேவ ஹோதி ந ந ஹோதி ததா²க³தோ பரம் மரணா இதிபி. ஏவஞ்ஹி தே, பி⁴க்க²வே, ததியாபி ஸமணப்³ராஹ்மணா ந பரிமுச்சிம்ஸு மாரஸ்ஸ இத்³தா⁴னுபா⁴வா. ஸேய்யதா²பி தே, பி⁴க்க²வே, ததியா மிக³ஜாதா ததூ²பமே அஹம் இமே ததியே ஸமணப்³ராஹ்மணே வதா³மி.

270. ‘‘தத்ர, பி⁴க்க²வே, சதுத்தா² ஸமணப்³ராஹ்மணா ஏவம் ஸமசிந்தேஸும் – ‘யே கோ² தே பட²மா ஸமணப்³ராஹ்மணா அமும் நிவாபம் நிவுத்தம் மாரஸ்ஸ…பே…. ஏவஞ்ஹி தே பட²மா ஸமணப்³ராஹ்மணா ந பரிமுச்சிம்ஸு மாரஸ்ஸ இத்³தா⁴னுபா⁴வா. யேபி தே து³தியா ஸமணப்³ராஹ்மணா ஏவம் ஸமசிந்தேஸும் – ‘யே கோ² தே பட²மா ஸமணப்³ராஹ்மணா…பே…. ஏவஞ்ஹி தே பட²மா ஸமணப்³ராஹ்மணா ந பரிமுச்சிம்ஸு மாரஸ்ஸ இத்³தா⁴னுபா⁴வா. யம்னூன மயம் ஸப்³ப³ஸோ நிவாபபோ⁴ஜனா லோகாமிஸா படிவிரமேய்யாம ப⁴யபோ⁴கா³ படிவிரதா அரஞ்ஞாயதனானி அஜ்ஜோ²கா³ஹேத்வா விஹரேய்யாமா’தி. தே ஸப்³ப³ஸோ நிவாபபோ⁴ஜனா லோகாமிஸா படிவிரமிம்ஸு…பே…. ஏவஞ்ஹி தே து³தியாபி ஸமணப்³ராஹ்மணா ந பரிமுச்சிம்ஸு மாரஸ்ஸ இத்³தா⁴னுபா⁴வா. யேபி தே ததியா ஸமணப்³ராஹ்மணா ஏவம் ஸமசிந்தேஸும் யே கோ² தே பட²மா ஸமணப்³ராஹ்மணா …பே…. ஏவஞ்ஹி தே பட²மா ஸமணப்³ராஹ்மணா ந பரிமுச்சிம்ஸு மாரஸ்ஸ இத்³தா⁴னுபா⁴வா. யேபி தே து³தியா ஸமணப்³ராஹ்மணா ஏவம் ஸமசிந்தேஸும் யே கோ² தே பட²மா ஸமணப்³ராஹ்மணா…பே…. ஏவஞ்ஹி தே பட²மா ஸமணப்³ராஹ்மணா ந பரிமுச்சிம்ஸு மாரஸ்ஸ இத்³தா⁴னுபா⁴வா. யம்னூன மயம் ஸப்³ப³ஸோ நிவாபபோ⁴ஜனா லோகாமிஸா படிவிரமேய்யாம, ப⁴யபோ⁴கா³ படிவிரதா அரஞ்ஞாயதனானி அஜ்ஜோ²கா³ஹேத்வா விஹரேய்யாமா’தி. தே ஸப்³ப³ஸோ நிவாபபோ⁴ஜனா லோகாமிஸா படிவிரமிம்ஸு…பே…. ஏவஞ்ஹி தே து³தியாபி ஸமணப்³ராஹ்மணா ந பரிமுச்சிம்ஸு மாரஸ்ஸ இத்³தா⁴னுபா⁴வா. யம்னூன மயம் அமும் நிவாபம் நிவுத்தம் மாரஸ்ஸ அமூனி ச லோகாமிஸானி உபனிஸ்ஸாய ஆஸயம் கப்பேய்யாம. தத்ராஸயம் கப்பேத்வா அமும் நிவாபம் நிவுத்தம் மாரஸ்ஸ அமூனி ச லோகாமிஸானி அனனுபக²ஜ்ஜ அமுச்சி²தா போ⁴ஜனானி பு⁴ஞ்ஜிஸ்ஸாம, அனனுபக²ஜ்ஜ அமுச்சி²தா போ⁴ஜனானி பு⁴ஞ்ஜமானா ந மத³ம் ஆபஜ்ஜிஸ்ஸாம, அமத்தா ஸமானா ந பமாத³ம் ஆபஜ்ஜிஸ்ஸாம, அப்பமத்தா ஸமானா ந யதா²காமகரணீயா ப⁴விஸ்ஸாம மாரஸ்ஸ அமுஸ்மிம் நிவாபே அமுஸ்மிஞ்ச லோகாமிஸேதி.

‘‘தே அமும் நிவாபம் நிவுத்தம் மாரஸ்ஸ அமூனி ச லோகாமிஸானி உபனிஸ்ஸாய ஆஸயம் கப்பயிம்ஸு. தத்ராஸயம் கப்பேத்வா அமும் நிவாபம் நிவுத்தம் மாரஸ்ஸ அமூனி ச லோகாமிஸானி அனனுபக²ஜ்ஜ அமுச்சி²தா போ⁴ஜனானி பு⁴ஞ்ஜிம்ஸு. தே தத்த² அனனுபக²ஜ்ஜ அமுச்சி²தா போ⁴ஜனானி பு⁴ஞ்ஜமானா ந மத³ம் ஆபஜ்ஜிம்ஸு. அமத்தா ஸமானா ந பமாத³ம் ஆபஜ்ஜிம்ஸு. அப்பமத்தா ஸமானா ந யதா²காமகரணீயா அஹேஸும் மாரஸ்ஸ அமுஸ்மிம் நிவாபே அமுஸ்மிஞ்ச லோகாமிஸே. அபி ச கோ² ஏவம்தி³ட்டி²கா அஹேஸும் ஸஸ்ஸதோ லோகோ இதிபி…பே… நேவ ஹோதி ந ந ஹோதி ததா²க³தோ பரம் மரணா இதிபி. ஏவஞ்ஹி தே ததியாபி ஸமணப்³ராஹ்மணா ந பரிமுச்சிம்ஸு மாரஸ்ஸ இத்³தா⁴னுபா⁴வா. யம்னூன மயம் யத்த² அக³தி மாரஸ்ஸ ச மாரபரிஸாய ச தத்ராஸயம் கப்பேயாம. தத்ராஸயம் கப்பேத்வா அமும் நிவாபம் நிவுத்தம் மாரஸ்ஸ அமூனி ச லோகாமிஸானி அனனுபக²ஜ்ஜ அமுச்சி²தா போ⁴ஜனானி பு⁴ஞ்ஜிஸ்ஸாம, அனனுபக²ஜ்ஜ அமுச்சி²தா போ⁴ஜனானி பு⁴ஞ்ஜமானா ந மத³ம் ஆபஜ்ஜிஸ்ஸாம, அமத்தா ஸமானா ந பமாத³ம் ஆபஜ்ஜிஸ்ஸாம, அப்பமத்தா ஸமானா ந யதா²காமகரணீயா ப⁴விஸ்ஸாம மாரஸ்ஸ அமுஸ்மிம் நிவாபே அமுஸ்மிஞ்ச லோகாமிஸேதி.

‘‘தே யத்த² அக³தி மாரஸ்ஸ ச மாரபரிஸாய ச தத்ராஸயம் கப்பயிம்ஸு. தத்ராஸயம் கப்பேத்வா அமும் நிவாபம் நிவுத்தம் மாரஸ்ஸ அமூனி ச லோகாமிஸானி அனனுபக²ஜ்ஜ அமுச்சி²தா போ⁴ஜனானி பு⁴ஞ்ஜிம்ஸு, தே தத்த² அனனுபக²ஜ்ஜ அமுச்சி²தா போ⁴ஜனானி பு⁴ஞ்ஜமானா ந மத³ம் ஆபஜ்ஜிம்ஸு, அமத்தா ஸமானா ந பமாத³ம் ஆபஜ்ஜிம்ஸு, அப்பமத்தா ஸமானா ந யதா²காமகரணீயா அஹேஸும் மாரஸ்ஸ அமுஸ்மிம் நிவாபே அமுஸ்மிஞ்ச லோகாமிஸே. ஏவஞ்ஹி தே, பி⁴க்க²வே, சதுத்தா² ஸமணப்³ராஹ்மணா பரிமுச்சிம்ஸு மாரஸ்ஸ இத்³தா⁴னுபா⁴வா. ஸேய்யதா²பி தே, பி⁴க்க²வே, சதுத்தா² மிக³ஜாதா ததூ²பமே அஹம் இமே சதுத்தே² ஸமணப்³ராஹ்மணே வதா³மி.

271. ‘‘கத²ஞ்ச, பி⁴க்க²வே, அக³தி மாரஸ்ஸ ச மாரபரிஸாய ச? இத⁴, பி⁴க்க²வே, பி⁴க்கு² விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கம் ஸவிசாரம் விவேகஜம் பீதிஸுக²ம் பட²மம் ஜா²னம் உபஸம்பஜ்ஜ விஹரதி. அயம் வுச்சதி, பி⁴க்க²வே, பி⁴க்கு² அந்த⁴மகாஸி மாரம், அபத³ம் வதி⁴த்வா மாரசக்கு²ம் அத³ஸ்ஸனம் க³தோ பாபிமதோ.

‘‘புன சபரம், பி⁴க்க²வே, பி⁴க்கு² விதக்கவிசாரானம் வூபஸமா அஜ்ஜ²த்தம் ஸம்பஸாத³னம் சேதஸோ ஏகோதி³பா⁴வம் அவிதக்கம் அவிசாரம் ஸமாதி⁴ஜம் பீதிஸுக²ம் து³தியம் ஜா²னம் உபஸம்பஜ்ஜ விஹரதி. அயம் வுச்சதி, பி⁴க்க²வே…பே… பாபிமதோ.

‘‘புன சபரம், பி⁴க்க²வே, பி⁴க்கு² பீதியா ச விராகா³ உபேக்க²கோ ச விஹரதி ஸதோ ச ஸம்பஜானோ, ஸுக²ஞ்ச காயேன படிஸம்வேதே³தி யம் தம் அரியா ஆசிக்க²ந்தி ‘உபேக்க²கோ ஸதிமா ஸுக²விஹாரீ’தி ததியம் ஜா²னம் உபஸம்பஜ்ஜ விஹரதி. அயம் வுச்சதி, பி⁴க்க²வே…பே… பாபிமதோ.

‘‘புன சபரம், பி⁴க்க²வே, பி⁴க்கு² ஸுக²ஸ்ஸ ச பஹானா து³க்க²ஸ்ஸ ச பஹானா, புப்³பே³வ ஸோமனஸ்ஸதோ³மனஸ்ஸானம் அத்த²ங்க³மா, அது³க்க²மஸுக²ம் உபேக்கா²ஸதிபாரிஸுத்³தி⁴ம் சதுத்த²ம் ஜா²னம் உபஸம்பஜ்ஜ விஹரதி. அயம் வுச்சதி, பி⁴க்க²வே…பே… பாபிமதோ.

‘‘புன சபரம், பி⁴க்க²வே, பி⁴க்கு² ஸப்³ப³ஸோ ரூபஸஞ்ஞானம் ஸமதிக்கமா படிக⁴ஸஞ்ஞானம் அத்த²ங்க³மா நானத்தஸஞ்ஞானம் அமனஸிகாரா ‘அனந்தோ ஆகாஸோ’தி ஆகாஸானஞ்சாயதனம் உபஸம்பஜ்ஜ விஹரதி. அயம் வுச்சதி, பி⁴க்க²வே…பே… பாபிமதோ.

‘‘புன சபரம், பி⁴க்க²வே, பி⁴க்கு² ஸப்³ப³ஸோ ஆகாஸானஞ்சாயதனம் ஸமதிக்கம்ம ‘அனந்தம் விஞ்ஞாண’ந்தி விஞ்ஞாணஞ்சாயதனம் உபஸம்பஜ்ஜ விஹரதி. அயம் வுச்சதி, பி⁴க்க²வே…பே… பாபிமதோ.

‘‘புன சபரம், பி⁴க்க²வே, பி⁴க்கு² ஸப்³ப³ஸோ விஞ்ஞாணஞ்சாயதனம் ஸமதிக்கம்ம ‘நத்தி² கிஞ்சீ’தி ஆகிஞ்சஞ்ஞாயதனம் உபஸம்பஜ்ஜ விஹரதி. அயம் வுச்சதி, பி⁴க்க²வே…பே… பாபிமதோ.

‘‘புன சபரம், பி⁴க்க²வே, பி⁴க்கு² ஸப்³ப³ஸோ ஆகிஞ்சஞ்ஞாயதனம் ஸமதிக்கம்ம நேவஸஞ்ஞானாஸஞ்ஞாயதனம் உபஸம்பஜ்ஜ விஹரதி. அயம் வுச்சதி, பி⁴க்க²வே…பே… பாபிமதோ.

‘‘புன சபரம், பி⁴க்க²வே, பி⁴க்கு² ஸப்³ப³ஸோ நேவஸஞ்ஞானாஸஞ்ஞாயதனம் ஸமதிக்கம்ம ஸஞ்ஞாவேத³யிதனிரோத⁴ம் உபஸம்பஜ்ஜ விஹரதி. பஞ்ஞாய சஸ்ஸ தி³ஸ்வா ஆஸவா பரிக்கீ²ணா ஹோந்தி. அயம் வுச்சதி, பி⁴க்க²வே, பி⁴க்கு² அந்த⁴மகாஸி மாரம், அபத³ம் வதி⁴த்வா மாரசக்கு²ம் அத³ஸ்ஸனம் க³தோ பாபிமதோ திண்ணோ லோகே விஸத்திக’’ந்தி.

இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதம் அபி⁴னந்து³ந்தி.

நிவாபஸுத்தம் நிட்டி²தம் பஞ்சமம்.