6. பாஸராஸிஸுத்தம்

272. ஏவம் மே ஸுதம் – ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. அத² கோ² ப⁴க³வா புப்³ப³ண்ஹஸமயம் நிவாஸேத்வா பத்தசீவரமாதா³ய ஸாவத்தி²ம் பிண்டா³ய பாவிஸி. அத² கோ² ஸம்ப³ஹுலா பி⁴க்கூ² யேனாயஸ்மா ஆனந்தோ³ தேனுபஸங்கமிம்ஸு; உபஸங்கமித்வா ஆயஸ்மந்தம் ஆனந்த³ம் ஏதத³வோசும் – ‘‘சிரஸ்ஸுதா நோ, ஆவுஸோ ஆனந்த³, ப⁴க³வதோ ஸம்முகா² த⁴ம்மீ கதா². ஸாது⁴ மயம், ஆவுஸோ ஆனந்த³, லபே⁴ய்யாம ப⁴க³வதோ ஸம்முகா² த⁴ம்மிம் கத²ம் ஸவனாயா’’தி. ‘‘தேன ஹாயஸ்மந்தோ யேன ரம்மகஸ்ஸ ப்³ராஹ்மணஸ்ஸ அஸ்ஸமோ தேனுபஸங்கமத²; அப்பேவ நாம லபே⁴ய்யாத² ப⁴க³வதோ ஸம்முகா² த⁴ம்மிம் கத²ம் ஸவனாயா’’தி. ‘‘ஏவமாவுஸோ’’தி கோ² தே பி⁴க்கூ² ஆயஸ்மதோ ஆனந்த³ஸ்ஸ பச்சஸ்ஸோஸும்.

அத² கோ² ப⁴க³வா ஸாவத்தி²யம் பிண்டா³ய சரித்வா பச்சா²ப⁴த்தம் பிண்ட³பாதபடிக்கந்தோ ஆயஸ்மந்தம் ஆனந்த³ம் ஆமந்தேஸி – ‘‘ஆயாமானந்த³, யேன புப்³பா³ராமோ மிகா³ரமாதுபாஸாதோ³ தேனுபஸங்கமிஸ்ஸாம தி³வாவிஹாராயா’’தி. ‘‘ஏவம், ப⁴ந்தே’’தி கோ² ஆயஸ்மா ஆனந்தோ³ ப⁴க³வதோ பச்சஸ்ஸோஸி. அத² கோ² ப⁴க³வா ஆயஸ்மதா ஆனந்தே³ன ஸத்³தி⁴ம் யேன புப்³பா³ராமோ மிகா³ரமாதுபாஸாதோ³ தேனுபஸங்கமி தி³வாவிஹாராய. அத² கோ² ப⁴க³வா ஸாயன்ஹஸமயம் படிஸல்லானா வுட்டி²தோ ஆயஸ்மந்தம் ஆனந்த³ம் ஆமந்தேஸி – ‘‘ஆயாமானந்த³, யேன புப்³ப³கோட்ட²கோ தேனுபஸங்கமிஸ்ஸாம க³த்தானி பரிஸிஞ்சிது’’ந்தி. ‘‘ஏவம், ப⁴ந்தே’’தி கோ² ஆயஸ்மா ஆனந்தோ³ ப⁴க³வதோ பச்சஸ்ஸோஸி.

273. அத² கோ² ப⁴க³வா ஆயஸ்மதா ஆனந்தே³ன ஸத்³தி⁴ம் யேன புப்³ப³கோட்ட²கோ தேனுபஸங்கமி க³த்தானி பரிஸிஞ்சிதும். புப்³ப³கோட்ட²கே க³த்தானி பரிஸிஞ்சித்வா பச்சுத்தரித்வா ஏகசீவரோ அட்டா²ஸி க³த்தானி புப்³பா³பயமானோ. அத² கோ² ஆயஸ்மா ஆனந்தோ³ ப⁴க³வந்தம் ஏதத³வோச – ‘‘அயம், ப⁴ந்தே, ரம்மகஸ்ஸ ப்³ராஹ்மணஸ்ஸ அஸ்ஸமோ அவிதூ³ரே. ரமணீயோ, ப⁴ந்தே, ரம்மகஸ்ஸ ப்³ராஹ்மணஸ்ஸ அஸ்ஸமோ; பாஸாதி³கோ, ப⁴ந்தே, ரம்மகஸ்ஸ ப்³ராஹ்மணஸ்ஸ அஸ்ஸமோ. ஸாது⁴, ப⁴ந்தே, ப⁴க³வா யேன ரம்மகஸ்ஸ ப்³ராஹ்மணஸ்ஸ அஸ்ஸமோ தேனுபஸங்கமது அனுகம்பம் உபாதா³யா’’தி. அதி⁴வாஸேஸி ப⁴க³வா துண்ஹீபா⁴வேன.

அத² கோ² ப⁴க³வா யேன ரம்மகஸ்ஸ ப்³ராஹ்மணஸ்ஸ அஸ்ஸமோ தேனுபஸங்கமி. தேன கோ² பன ஸமயேன ஸம்ப³ஹுலா பி⁴க்கூ² ரம்மகஸ்ஸ ப்³ராஹ்மணஸ்ஸ அஸ்ஸமே த⁴ம்மியா கதா²ய ஸன்னிஸின்னா ஹோந்தி. அத² கோ² ப⁴க³வா ப³ஹித்³வாரகோட்ட²கே அட்டா²ஸி கதா²பரியோஸானம் ஆக³மயமானோ. அத² கோ² ப⁴க³வா கதா²பரியோஸானம் விதி³த்வா உக்காஸித்வா அக்³க³ளம் ஆகோடேஸி. விவரிம்ஸு கோ² தே பி⁴க்கூ² ப⁴க³வதோ த்³வாரம். அத² கோ² ப⁴க³வா ரம்மகஸ்ஸ ப்³ராஹ்மணஸ்ஸ அஸ்ஸமம் பவிஸித்வா பஞ்ஞத்தே ஆஸனே நிஸீதி³. நிஸஜ்ஜ கோ² ப⁴க³வா பி⁴க்கூ² ஆமந்தேஸி – ‘‘காயனுத்த², பி⁴க்க²வே, ஏதரஹி கதா²ய ஸன்னிஸின்னா? கா ச பன வோ அந்தராகதா² விப்பகதா’’தி? ‘‘ப⁴க³வந்தமேவ கோ² நோ, ப⁴ந்தே, ஆரப்³ப⁴ த⁴ம்மீ கதா² விப்பகதா, அத² ப⁴க³வா அனுப்பத்தோ’’தி. ‘‘ஸாது⁴, பி⁴க்க²வே! ஏதம் கோ², பி⁴க்க²வே, தும்ஹாகம் பதிரூபம் குலபுத்தானம் ஸத்³தா⁴ அகா³ரஸ்மா அனகா³ரியம் பப்³ப³ஜிதானம் யம் தும்ஹே த⁴ம்மியா கதா²ய ஸன்னிஸீதே³ய்யாத². ஸன்னிபதிதானம் வோ, பி⁴க்க²வே, த்³வயம் கரணீயம் – த⁴ம்மீ வா கதா², அரியோ வா துண்ஹீபா⁴வோ’’.

274. ‘‘த்³வேமா, பி⁴க்க²வே, பரியேஸனா – அரியா ச பரியேஸனா, அனரியா ச பரியேஸனா.

‘‘கதமா ச, பி⁴க்க²வே, அனரியா பரியேஸனா? இத⁴, பி⁴க்க²வே, ஏகச்சோ அத்தனா ஜாதித⁴ம்மோ ஸமானோ ஜாதித⁴ம்மம்யேவ பரியேஸதி, அத்தனா ஜராத⁴ம்மோ ஸமானோ ஜராத⁴ம்மம்யேவ பரியேஸதி, அத்தனா ப்³யாதி⁴த⁴ம்மோ ஸமானோ ப்³யாதி⁴த⁴ம்மம்யேவ பரியேஸதி, அத்தனா மரணத⁴ம்மோ ஸமானோ மரணத⁴ம்மம்யேவ பரியேஸதி, அத்தனா ஸோகத⁴ம்மோ ஸமானோ ஸோகத⁴ம்மம்யேவ பரியேஸதி, அத்தனா ஸம்கிலேஸத⁴ம்மோ ஸமானோ ஸம்கிலேஸத⁴ம்மம்யேவ பரியேஸதி.

‘‘கிஞ்ச, பி⁴க்க²வே, ஜாதித⁴ம்மம் வதே³த²? புத்தப⁴ரியம், பி⁴க்க²வே, ஜாதித⁴ம்மம், தா³ஸிதா³ஸம் ஜாதித⁴ம்மம், அஜேளகம் ஜாதித⁴ம்மம், குக்குடஸூகரம் ஜாதித⁴ம்மம், ஹத்தி²க³வாஸ்ஸவளவம் ஜாதித⁴ம்மம், ஜாதரூபரஜதம் ஜாதித⁴ம்மம். ஜாதித⁴ம்மா ஹேதே, பி⁴க்க²வே, உபத⁴யோ. ஏத்தா²யம் க³தி²தோ [க³தீ⁴தோ (ஸ்யா. க.)] முச்சி²தோ அஜ்ஜா²பன்னோ அத்தனா ஜாதித⁴ம்மோ ஸமானோ ஜாதித⁴ம்மம்யேவ பரியேஸதி.

‘‘கிஞ்ச, பி⁴க்க²வே, ஜராத⁴ம்மம் வதே³த²? புத்தப⁴ரியம், பி⁴க்க²வே, ஜராத⁴ம்மம், தா³ஸிதா³ஸம் ஜராத⁴ம்மம், அஜேளகம் ஜராத⁴ம்மம், குக்குடஸூகரம் ஜராத⁴ம்மம், ஹத்தி²க³வாஸ்ஸவளவம் ஜராத⁴ம்மம், ஜாதரூபரஜதம் ஜராத⁴ம்மம். ஜராத⁴ம்மா ஹேதே, பி⁴க்க²வே, உபத⁴யோ. ஏத்தா²யம் க³தி²தோ முச்சி²தோ அஜ்ஜா²பன்னோ அத்தனா ஜராத⁴ம்மோ ஸமானோ ஜராத⁴ம்மம்யேவ பரியேஸதி.

‘‘கிஞ்ச, பி⁴க்க²வே, ப்³யாதி⁴த⁴ம்மம் வதே³த²? புத்தப⁴ரியம், பி⁴க்க²வே, ப்³யாதி⁴த⁴ம்மம், தா³ஸிதா³ஸம் ப்³யாதி⁴த⁴ம்மம், அஜேளகம் ப்³யாதி⁴த⁴ம்மம், குக்குடஸூகரம் ப்³யாதி⁴த⁴ம்மம், ஹத்தி²க³வாஸ்ஸவளவம் ப்³யாதி⁴த⁴ம்மம். ப்³யாதி⁴த⁴ம்மா ஹேதே, பி⁴க்க²வே, உபத⁴யோ. ஏத்தா²யம் க³தி²தோ முச்சி²தோ அஜ்ஜா²பன்னோ அத்தனா ப்³யாதி⁴த⁴ம்மோ ஸமானோ ப்³யாதி⁴த⁴ம்மம்யேவ பரியேஸதி.

‘‘கிஞ்ச, பி⁴க்க²வே, மரணத⁴ம்மம் வதே³த²? புத்தப⁴ரியம், பி⁴க்க²வே, மரணத⁴ம்மம், தா³ஸிதா³ஸம் மரணத⁴ம்மம், அஜேளகம் மரணத⁴ம்மம், குக்குடஸூகரம் மரணத⁴ம்மம், ஹத்தி²க³வாஸ்ஸவளவம் மரணத⁴ம்மம். மரணத⁴ம்மா ஹேதே, பி⁴க்க²வே, உபத⁴யோ. ஏத்தா²யம் க³தி²தோ முச்சி²தோ அஜ்ஜா²பன்னோ அத்தனா மரணத⁴ம்மோ ஸமானோ மரணத⁴ம்மம்யேவ பரியேஸதி.

‘‘கிஞ்ச, பி⁴க்க²வே, ஸோகத⁴ம்மம் வதே³த²? புத்தப⁴ரியம், பி⁴க்க²வே, ஸோகத⁴ம்மம், தா³ஸிதா³ஸம் ஸோகத⁴ம்மம், அஜேளகம் ஸோகத⁴ம்மம், குக்குடஸூகரம் ஸோகத⁴ம்மம், ஹத்தி²க³வாஸ்ஸவளவம் ஸோகத⁴ம்மம். ஸோகத⁴ம்மா ஹேதே, பி⁴க்க²வே, உபத⁴யோ. ஏத்தா²யம் க³தி²தோ முச்சி²தோ அஜ்ஜா²பன்னோ அத்தனா ஸோகத⁴ம்மோ ஸமானோ ஸோகத⁴ம்மம்யேவ பரியேஸதி.

‘‘கிஞ்ச, பி⁴க்க²வே, ஸம்கிலேஸத⁴ம்மம் வதே³த²? புத்தப⁴ரியம், பி⁴க்க²வே, ஸம்கிலேஸத⁴ம்மம், தா³ஸிதா³ஸம் ஸம்கிலேஸத⁴ம்மம், அஜேளகம் ஸம்கிலேஸத⁴ம்மம், குக்குடஸூகரம் ஸம்கிலேஸத⁴ம்மம், ஹத்தி²க³வாஸ்ஸவளவம் ஸம்கிலேஸத⁴ம்மம், ஜாதரூபரஜதம் ஸம்கிலேஸத⁴ம்மம். ஸம்கிலேஸத⁴ம்மா ஹேதே, பி⁴க்க²வே, உபத⁴யோ. ஏத்தா²யம் க³தி²தோ முச்சி²தோ அஜ்ஜா²பன்னோ அத்தனா ஸம்கிலேஸத⁴ம்மோ ஸமானோ ஸம்கிலேஸத⁴ம்மம்யேவ பரியேஸதி. அயம், பி⁴க்க²வே, அனரியா பரியேஸனா.

275. ‘‘கதமா ச, பி⁴க்க²வே, அரியா பரியேஸனா? இத⁴, பி⁴க்க²வே, ஏகச்சோ அத்தனா ஜாதித⁴ம்மோ ஸமானோ ஜாதித⁴ம்மே ஆதீ³னவம் விதி³த்வா அஜாதம் அனுத்தரம் யோக³க்கே²மம் நிப்³பா³னம் பரியேஸதி, அத்தனா ஜராத⁴ம்மோ ஸமானோ ஜராத⁴ம்மே ஆதீ³னவம் விதி³த்வா அஜரம் அனுத்தரம் யோக³க்கே²மம் நிப்³பா³னம் பரியேஸதி, அத்தனா ப்³யாதி⁴த⁴ம்மோ ஸமானோ ப்³யாதி⁴த⁴ம்மே ஆதீ³னவம் விதி³த்வா அப்³யாதி⁴ம் அனுத்தரம் யோக³க்கே²மம் நிப்³பா³னம் பரியேஸதி, அத்தனா மரணத⁴ம்மோ ஸமானோ மரணத⁴ம்மே ஆதீ³னவம் விதி³த்வா அமதம் அனுத்தரம் யோக³க்கே²மம் நிப்³பா³னம் பரியேஸதி, அத்தனா ஸோகத⁴ம்மோ ஸமானோ ஸோகத⁴ம்மே ஆதீ³னவம் விதி³த்வா அஸோகம் அனுத்தரம் யோக³க்கே²மம் நிப்³பா³னம் பரியேஸதி, அத்தனா ஸம்கிலேஸத⁴ம்மோ ஸமானோ ஸம்கிலேஸத⁴ம்மே ஆதீ³னவம் விதி³த்வா அஸம்கிலிட்ட²ம் அனுத்தரம் யோக³க்கே²மம் நிப்³பா³னம் பரியேஸதி. அயம், பி⁴க்க²வே, அரியா பரியேஸனா.

276. ‘‘அஹம்பி ஸுத³ம், பி⁴க்க²வே, புப்³பே³வ ஸம்போ³தா⁴ அனபி⁴ஸம்பு³த்³தோ⁴ போ³தி⁴ஸத்தோவ ஸமானோ அத்தனா ஜாதித⁴ம்மோ ஸமானோ ஜாதித⁴ம்மம்யேவ பரியேஸாமி, அத்தனா ஜராத⁴ம்மோ ஸமானோ ஜராத⁴ம்மம்யேவ பரியேஸாமி, அத்தனா ப்³யாதி⁴த⁴ம்மோ ஸமானோ ப்³யாதி⁴த⁴ம்மம்யேவ பரியேஸாமி, அத்தனா மரணத⁴ம்மோ ஸமானோ மரணத⁴ம்மம்யேவ பரியேஸாமி, அத்தனா ஸோகத⁴ம்மோ ஸமானோ ஸோகத⁴ம்மம்யேவ பரியேஸாமி, அத்தனா ஸம்கிலேஸத⁴ம்மோ ஸமானோ ஸம்கிலேஸத⁴ம்மம்யேவ பரியேஸாமி. தஸ்ஸ மய்ஹம், பி⁴க்க²வே, ஏதத³ஹோஸி – ‘கிம் நு கோ² அஹம் அத்தனா ஜாதித⁴ம்மோ ஸமானோ ஜாதித⁴ம்மம்யேவ பரியேஸாமி, அத்தனா ஜராத⁴ம்மோ ஸமானோ…பே… ப்³யாதி⁴த⁴ம்மோ ஸமானோ… மரணத⁴ம்மோ ஸமானோ… ஸோகத⁴ம்மோ ஸமானோ… அத்தனா ஸம்கிலேஸத⁴ம்மோ ஸமானோ ஸம்கிலேஸத⁴ம்மம்யேவ பரியேஸாமி? யம்னூனாஹம் அத்தனா ஜாதித⁴ம்மோ ஸமானோ ஜாதித⁴ம்மே ஆதீ³னவம் விதி³த்வா அஜாதம் அனுத்தரம் யோக³க்கே²மம் நிப்³பா³னம் பரியேஸேய்யம், அத்தனா ஜராத⁴ம்மோ ஸமானோ ஜராத⁴ம்மே ஆதீ³னவம் விதி³த்வா அஜரம் அனுத்தரம் யோக³க்கே²மம் நிப்³பா³னம் பரியேஸேய்யம், அத்தனா ப்³யாதி⁴த⁴ம்மோ ஸமானோ ப்³யாதி⁴த⁴ம்மே ஆதீ³னவம் விதி³த்வா அப்³யாதி⁴ம் அனுத்தரம் யோக³க்கே²மம் நிப்³பா³னம் பரியேஸேய்யம், அத்தனா மரணத⁴ம்மோ ஸமானோ மரணத⁴ம்மே ஆதீ³னவம் விதி³த்வா அமதம் அனுத்தரம் யோக³க்கே²மம் நிப்³பா³னம் பரியேஸேய்யம், அத்தனா ஸோகத⁴ம்மோ ஸமானோ ஸோகத⁴ம்மே ஆதீ³னவம் விதி³த்வா அஸோகம் அனுத்தரம் யோக³க்கே²மம் நிப்³பா³னம் பரியேஸேய்யம், அத்தனா ஸம்கிலேஸத⁴ம்மோ ஸமானோ ஸம்கிலேஸத⁴ம்மே ஆதீ³னவம் விதி³த்வா அஸம்கிலிட்ட²ம் அனுத்தரம் யோக³க்கே²மம் நிப்³பா³னம் பரியேஸேய்ய’ந்தி.

277. ‘‘ஸோ கோ² அஹம், பி⁴க்க²வே, அபரேன ஸமயேன த³ஹரோவ ஸமானோ ஸுஸுகாளகேஸோ, ப⁴த்³ரேன யோப்³ப³னேன ஸமன்னாக³தோ பட²மேன வயஸா அகாமகானம் மாதாபிதூனம் அஸ்ஸுமுகா²னம் ருத³ந்தானம் கேஸமஸ்ஸும் ஓஹாரேத்வா காஸாயானி வத்தா²னி அச்சா²தே³த்வா அகா³ரஸ்மா அனகா³ரியம் பப்³ப³ஜிம். ஸோ ஏவம் பப்³ப³ஜிதோ ஸமானோ கிம் குஸலக³வேஸீ [கிம்குஸலம்க³வேஸீ (க.)] அனுத்தரம் ஸந்திவரபத³ம் பரியேஸமானோ யேன ஆளாரோ காலாமோ தேனுபஸங்கமிம். உபஸங்கமித்வா ஆளாரம் காலாமம் ஏதத³வோசம் – ‘இச்சா²மஹம், ஆவுஸோ காலாம, இமஸ்மிம் த⁴ம்மவினயே ப்³ரஹ்மசரியம் சரிது’ந்தி. ஏவம் வுத்தே, பி⁴க்க²வே, ஆளாரோ காலாமோ மம் ஏதத³வோச – ‘விஹரதாயஸ்மா; தாதி³ஸோ அயம் த⁴ம்மோ யத்த² விஞ்ஞூ புரிஸோ நசிரஸ்ஸேவ ஸகம் ஆசரியகம் ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரேய்யா’தி. ஸோ கோ² அஹம், பி⁴க்க²வே, நசிரஸ்ஸேவ கி²ப்பமேவ தம் த⁴ம்மம் பரியாபுணிம். ஸோ கோ² அஹம், பி⁴க்க²வே, தாவதகேனேவ ஓட்ட²பஹதமத்தேன லபிதலாபனமத்தேன ஞாணவாத³ஞ்ச வதா³மி தே²ரவாத³ஞ்ச, ‘ஜானாமி பஸ்ஸாமீ’தி ச படிஜானாமி அஹஞ்சேவ அஞ்ஞே ச. தஸ்ஸ மய்ஹம், பி⁴க்க²வே, ஏதத³ஹோஸி – ‘ந கோ² ஆளாரோ காலாமோ இமம் த⁴ம்மம் கேவலம் ஸத்³தா⁴மத்தகேன ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹராமீதி பவேதே³தி; அத்³தா⁴ ஆளாரோ காலாமோ இமம் த⁴ம்மம் ஜானம் பஸ்ஸம் விஹரதீ’தி.

‘‘அத² க்²வாஹம், பி⁴க்க²வே, யேன ஆளாரோ காலாமோ தேனுபஸங்கமிம்; உபஸங்கமித்வா ஆளாரம் காலாமம் ஏதத³வோசம் – ‘கித்தாவதா நோ, ஆவுஸோ காலாம, இமம் த⁴ம்மம் ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹராமீதி பவேதே³ஸீ’தி [உபஸம்பஜ்ஜ பவேதே³ஸீதி (ஸீ. ஸ்யா. பீ.)]? ஏவம் வுத்தே, பி⁴க்க²வே, ஆளாரோ காலாமோ ஆகிஞ்சஞ்ஞாயதனம் பவேதே³ஸி. தஸ்ஸ மய்ஹம், பி⁴க்க²வே, ஏதத³ஹோஸி – ‘ந கோ² ஆளாரஸ்ஸேவ காலாமஸ்ஸ அத்தி² ஸத்³தா⁴, மய்ஹம்பத்தி² ஸத்³தா⁴; ந கோ² ஆளாரஸ்ஸேவ காலாமஸ்ஸ அத்தி² வீரியம், மய்ஹம்பத்தி² வீரியம்; ந கோ² ஆளாரஸ்ஸேவ காலாமஸ்ஸ அத்தி² ஸதி, மய்ஹம்பத்தி² ஸதி; ந கோ² ஆளாரஸ்ஸேவ காலாமஸ்ஸ அத்தி² ஸமாதி⁴, மய்ஹம்பத்தி² ஸமாதி⁴; ந கோ² ஆளாரஸ்ஸேவ காலாமஸ்ஸ அத்தி² பஞ்ஞா, மய்ஹம்பத்தி² பஞ்ஞா. யம்னூனாஹம் யம் த⁴ம்மம் ஆளாரோ காலாமோ ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹராமீதி பவேதே³தி, தஸ்ஸ த⁴ம்மஸ்ஸ ஸச்சி²கிரியாய பத³ஹேய்ய’ந்தி. ஸோ கோ² அஹம், பி⁴க்க²வே, நசிரஸ்ஸேவ கி²ப்பமேவ தம் த⁴ம்மம் ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹாஸிம்.

‘‘அத² க்²வாஹம், பி⁴க்க²வே, யேன ஆளாரோ காலாமோ தேனுபஸங்கமிம்; உபஸங்கமித்வா ஆளாரம் காலாமம் ஏதத³வோசம் –

‘ஏத்தாவதா நோ, ஆவுஸோ காலாம, இமம் த⁴ம்மம் ஸயம் அபி⁴ஞ்ஞா ஸச்சி²கத்வா உபஸம்பஜ்ஜ பவேதே³ஸீ’தி?

‘ஏத்தாவதா கோ² அஹம், ஆவுஸோ, இமம் த⁴ம்மம் ஸயம் அபி⁴ஞ்ஞா ஸச்சி²கத்வா உபஸம்பஜ்ஜ பவேதே³மீ’தி.

‘அஹம்பி கோ², ஆவுஸோ, ஏத்தாவதா இமம் த⁴ம்மம் ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹராமீ’தி.

‘லாபா⁴ நோ, ஆவுஸோ, ஸுலத்³த⁴ம் நோ, ஆவுஸோ, யே மயம் ஆயஸ்மந்தம் தாதி³ஸம் ஸப்³ரஹ்மசாரிம் பஸ்ஸாம. இதி யாஹம் த⁴ம்மம் ஸயம் அபி⁴ஞ்ஞா ஸச்சி²கத்வா உபஸம்பஜ்ஜ பவேதே³மி தம் த்வம் த⁴ம்மம் ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரஸி. யம் த்வம் த⁴ம்மம் ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரஸி தமஹம் த⁴ம்மம் ஸயம் அபி⁴ஞ்ஞா ஸச்சி²கத்வா உபஸம்பஜ்ஜ பவேதே³மி. இதி யாஹம் த⁴ம்மம் ஜானாமி தம் த்வம் த⁴ம்மம் ஜானாஸி, யம் த்வம் த⁴ம்மம் ஜானாஸி தமஹம் த⁴ம்மம் ஜானாமி. இதி யாதி³ஸோ அஹம் தாதி³ஸோ துவம், யாதி³ஸோ துவம் தாதி³ஸோ அஹம். ஏஹி தா³னி, ஆவுஸோ, உபோ⁴வ ஸந்தா இமம் க³ணம் பரிஹராமா’தி. இதி கோ², பி⁴க்க²வே, ஆளாரோ காலாமோ ஆசரியோ மே ஸமானோ (அத்தனோ) [( ) நத்தி² (ஸீ. ஸ்யா. பீ.)] அந்தேவாஸிம் மம் ஸமானம் அத்தனா [அத்தனோ (ஸீ. பீ.)] ஸமஸமம் ட²பேஸி, உளாராய ச மம் பூஜாய பூஜேஸி. தஸ்ஸ மய்ஹம், பி⁴க்க²வே, ஏதத³ஹோஸி – ‘நாயம் த⁴ம்மோ நிப்³பி³தா³ய ந விராகா³ய ந நிரோதா⁴ய ந உபஸமாய ந அபி⁴ஞ்ஞாய ந ஸம்போ³தா⁴ய ந நிப்³பா³னாய ஸம்வத்ததி, யாவதே³வ ஆகிஞ்சஞ்ஞாயதனூபபத்தியா’தி. ஸோ கோ² அஹம், பி⁴க்க²வே, தம் த⁴ம்மம் அனலங்கரித்வா தஸ்மா த⁴ம்மா நிப்³பி³ஜ்ஜ அபக்கமிம்.

278. ‘‘ஸோ கோ² அஹம், பி⁴க்க²வே, கிம் குஸலக³வேஸீ அனுத்தரம் ஸந்திவரபத³ம் பரியேஸமானோ யேன உத³கோ [உத்³த³கோ (ஸீ. ஸ்யா. பீ.)] ராமபுத்தோ தேனுபஸங்கமிம்; உபஸங்கமித்வா உத³கம் ராமபுத்தம் ஏதத³வோசம் – ‘இச்சா²மஹம், ஆவுஸோ [ஆவுஸோ ராம (ஸீ. ஸ்யா. க.) மஹாஸத்தோ ராமபுத்தமேவ அவோச, ந ராமம், ராமோ ஹி தத்த² க³ணாசரியோ ப⁴வேய்ய, ததா³ ச காலங்கதோ அஸந்தோ. தேனேவேத்த² ராமாயத்தானி க்ரியபதா³னி அதீதகாலவஸேன ஆக³தானி, உத³கோ ச ராமபுத்தோ மஹாஸத்தஸ்ஸ ஸப்³ரஹ்மசாரீத்வேவ வுத்தோ, ந ஆசரியோதி. டீகாயம் ச ‘‘பாளியம் ராமஸ்ஸேவ ஸமாபத்திலாபி⁴தா ஆக³தா ந உத³கஸ்ஸா’’தி ஆதி³ பச்சா²பா⁴கே³ பகாஸிதா], இமஸ்மிம் த⁴ம்மவினயே ப்³ரஹ்மசரியம் சரிது’ந்தி. ஏவம் வுத்தே, பி⁴க்க²வே, உத³கோ ராமபுத்தோ மம் ஏதத³வோச – ‘விஹரதாயஸ்மா; தாதி³ஸோ அயம் த⁴ம்மோ யத்த² விஞ்ஞூ புரிஸோ நசிரஸ்ஸேவ ஸகம் ஆசரியகம் ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரேய்யா’தி. ஸோ கோ² அஹம், பி⁴க்க²வே, நசிரஸ்ஸேவ கி²ப்பமேவ தம் த⁴ம்மம் பரியாபுணிம். ஸோ கோ² அஹம், பி⁴க்க²வே, தாவதகேனேவ ஓட்ட²பஹதமத்தேன லபிதலாபனமத்தேன ஞாணவாத³ஞ்ச வதா³மி தே²ரவாத³ஞ்ச, ‘ஜானாமி பஸ்ஸாமீ’தி ச படிஜானாமி அஹஞ்சேவ அஞ்ஞே ச. தஸ்ஸ மய்ஹம், பி⁴க்க²வே, ஏதத³ஹோஸி – ‘ந கோ² ராமோ இமம் த⁴ம்மம் கேவலம் ஸத்³தா⁴மத்தகேன ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹராமீதி பவேதே³ஸி; அத்³தா⁴ ராமோ இமம் த⁴ம்மம் ஜானம் பஸ்ஸம் விஹாஸீ’தி.

‘‘அத² க்²வாஹம், பி⁴க்க²வே, யேன உத³கோ ராமபுத்தோ தேனுபஸங்கமிம்; உபஸங்கமித்வா உத³கம் ராமபுத்தம் ஏதத³வோசம் – ‘கித்தாவதா நோ, ஆவுஸோ, ராமோ இமம் த⁴ம்மம் ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹராமீதி பவேதே³ஸீ’தி? ஏவம் வுத்தே, பி⁴க்க²வே, உத³கோ ராமபுத்தோ நேவஸஞ்ஞானாஸஞ்ஞாயதனம் பவேதே³ஸி. தஸ்ஸ மய்ஹம், பி⁴க்க²வே, ஏதத³ஹோஸி – ‘ந கோ² ராமஸ்ஸேவ அஹோஸி ஸத்³தா⁴, மய்ஹம்பத்தி² ஸத்³தா⁴; ந கோ² ராமஸ்ஸேவ அஹோஸி வீரியம், மய்ஹம்பத்தி² வீரியம்; ந கோ² ராமஸ்ஸேவ அஹோஸி ஸதி, மய்ஹம்பத்தி² ஸதி; ந கோ² ராமஸ்ஸேவ அஹோஸி ஸமாதி⁴, மய்ஹம்பத்தி² ஸமாதி⁴, ந கோ² ராமஸ்ஸேவ அஹோஸி பஞ்ஞா, மய்ஹம்பத்தி² பஞ்ஞா. யம்னூனாஹம் யம் த⁴ம்மம் ராமோ ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹராமீதி பவேதே³ஸி, தஸ்ஸ த⁴ம்மஸ்ஸ ஸச்சி²கிரியாய பத³ஹேய்ய’ந்தி. ஸோ கோ² அஹம், பி⁴க்க²வே, நசிரஸ்ஸேவ கி²ப்பமேவ தம் த⁴ம்மம் ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹாஸிம்.

‘‘அத² க்²வாஹம், பி⁴க்க²வே, யேன உத³கோ ராமபுத்தோ தேனுபஸங்கமிம்; உபஸங்கமித்வா உத³கம் ராமபுத்தம் ஏதத³வோசம் –

‘ஏத்தாவதா நோ, ஆவுஸோ, ராமோ இமம் த⁴ம்மம் ஸயம் அபி⁴ஞ்ஞா ஸச்சி²கத்வா உபஸம்பஜ்ஜ பவேதே³ஸீ’தி?

‘ஏத்தாவதா கோ², ஆவுஸோ, ராமோ இமம் த⁴ம்மம் ஸயம் அபி⁴ஞ்ஞா ஸச்சி²கத்வா உபஸம்பஜ்ஜ பவேதே³ஸீ’தி.

‘அஹம்பி கோ², ஆவுஸோ, ஏத்தாவதா இமம் த⁴ம்மம் ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹராமீ’தி.

‘லாபா⁴ நோ, ஆவுஸோ, ஸுலத்³த⁴ம் நோ, ஆவுஸோ, யே மயம் ஆயஸ்மந்தம் தாதி³ஸம் ஸப்³ரஹ்மசாரிம் பஸ்ஸாம. இதி யம் த⁴ம்மம் ராமோ ஸயம் அபி⁴ஞ்ஞா ஸச்சி²கத்வா உபஸம்பஜ்ஜ பவேதே³ஸி, தம் த்வம் த⁴ம்மம் ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரஸி. யம் த்வம் த⁴ம்மம் ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரஸி, தம் த⁴ம்மம் ராமோ ஸயம் அபி⁴ஞ்ஞா ஸச்சி²கத்வா உபஸம்பஜ்ஜ பவேதே³ஸி. இதி யம் த⁴ம்மம் ராமோ அபி⁴ஞ்ஞாஸி தம் த்வம் த⁴ம்மம் ஜானாஸி, யம் த்வம் த⁴ம்மம் ஜானாஸி, தம் த⁴ம்மம் ராமோ அபி⁴ஞ்ஞாஸி. இதி யாதி³ஸோ ராமோ அஹோஸி தாதி³ஸோ துவம், யாதி³ஸோ துவம் தாதி³ஸோ ராமோ அஹோஸி. ஏஹி தா³னி, ஆவுஸோ, துவம் இமம் க³ணம் பரிஹரா’தி. இதி கோ², பி⁴க்க²வே, உத³கோ ராமபுத்தோ ஸப்³ரஹ்மசாரீ மே ஸமானோ ஆசரியட்டா²னே மம் ட²பேஸி, உளாராய ச மம் பூஜாய பூஜேஸி. தஸ்ஸ மய்ஹம், பி⁴க்க²வே, ஏதத³ஹோஸி – ‘நாயம் த⁴ம்மோ நிப்³பி³தா³ய ந விராகா³ய ந நிரோதா⁴ய ந உபஸமாய ந அபி⁴ஞ்ஞாய ந ஸம்போ³தா⁴ய ந நிப்³பா³னாய ஸம்வத்ததி, யாவதே³வ நேவஸஞ்ஞானாஸஞ்ஞாயதனூபபத்தியா’தி. ஸோ கோ² அஹம், பி⁴க்க²வே, தம் த⁴ம்மம் அனலங்கரித்வா தஸ்மா த⁴ம்மா நிப்³பி³ஜ்ஜ அபக்கமிம்.

279. ‘‘ஸோ கோ² அஹம், பி⁴க்க²வே, கிம் குஸலக³வேஸீ அனுத்தரம் ஸந்திவரபத³ம் பரியேஸமானோ மக³தே⁴ஸு அனுபுப்³பே³ன சாரிகம் சரமானோ யேன உருவேலா ஸேனானிக³மோ தத³வஸரிம். தத்த²த்³த³ஸம் ரமணீயம் பூ⁴மிபா⁴க³ம், பாஸாதி³கஞ்ச வனஸண்ட³ம், நதி³ஞ்ச ஸந்த³ந்திம் ஸேதகம் ஸுபதித்த²ம் ரமணீயம், ஸமந்தா [ஸாமந்தா (?)] ச கோ³சரகா³மம். தஸ்ஸ மய்ஹம், பி⁴க்க²வே, ஏதத³ஹோஸி – ‘ரமணீயோ வத, போ⁴, பூ⁴மிபா⁴கோ³, பாஸாதி³கோ ச வனஸண்டோ³, நதீ³ ச ஸந்த³தி ஸேதகா ஸுபதித்தா² ரமணீயா, ஸமந்தா ச கோ³சரகா³மோ. அலம் வதித³ம் குலபுத்தஸ்ஸ பதா⁴னத்தி²கஸ்ஸ பதா⁴னாயா’தி. ஸோ கோ² அஹம், பி⁴க்க²வே, தத்தே²வ நிஸீதி³ம் – அலமித³ம் பதா⁴னாயாதி.

280. ‘‘ஸோ கோ² அஹம், பி⁴க்க²வே, அத்தனா ஜாதித⁴ம்மோ ஸமானோ ஜாதித⁴ம்மே ஆதீ³னவம் விதி³த்வா அஜாதம் அனுத்தரம் யோக³க்கே²மம் நிப்³பா³னம் பரியேஸமானோ அஜாதம் அனுத்தரம் யோக³க்கே²மம் நிப்³பா³னம் அஜ்ஜ²க³மம், அத்தனா ஜராத⁴ம்மோ ஸமானோ ஜராத⁴ம்மே ஆதீ³னவம் விதி³த்வா அஜரம் அனுத்தரம் யோக³க்கே²மம் நிப்³பா³னம் பரியேஸமானோ அஜரம் அனுத்தரம் யோக³க்கே²மம் நிப்³பா³னம் அஜ்ஜ²க³மம், அத்தனா ப்³யாதி⁴த⁴ம்மோ ஸமானோ ப்³யாதி⁴த⁴ம்மே ஆதீ³னவம் விதி³த்வா அப்³யாதி⁴ம் அனுத்தரம் யோக³க்கே²மம் நிப்³பா³னம் பரியேஸமானோ அப்³யாதி⁴ம் அனுத்தரம் யோக³க்கே²மம் நிப்³பா³னம் அஜ்ஜ²க³மம், அத்தனா மரணத⁴ம்மோ ஸமானோ மரணத⁴ம்மே ஆதீ³னவம் விதி³த்வா அமதம் அனுத்தரம் யோக³க்கே²மம் நிப்³பா³னம் அஜ்ஜ²க³மம், அத்தனா ஸோகத⁴ம்மோ ஸமானோ ஸோகத⁴ம்மே ஆதீ³னவம் விதி³த்வா அஸோகம் அனுத்தரம் யோக³க்கே²மம் நிப்³பா³னம் அஜ்ஜ²க³மம், அத்தனா ஸம்கிலேஸத⁴ம்மோ ஸமானோ ஸம்கிலேஸத⁴ம்மே ஆதீ³னவம் விதி³த்வா அஸம்கிலிட்ட²ம் அனுத்தரம் யோக³க்கே²மம் நிப்³பா³னம் பரியேஸமானோ அஸம்கிலிட்ட²ம் அனுத்தரம் யோக³க்கே²மம் நிப்³பா³னம் அஜ்ஜ²க³மம். ஞாணஞ்ச பன மே த³ஸ்ஸனம் உத³பாதி³ – ‘அகுப்பா மே விமுத்தி, அயமந்திமா ஜாதி, நத்தி² தா³னி புனப்³ப⁴வோ’தி.

281. ‘‘தஸ்ஸ மய்ஹம், பி⁴க்க²வே, ஏதத³ஹோஸி – ‘அதி⁴க³தோ கோ² ம்யாயம் த⁴ம்மோ க³ம்பீ⁴ரோ து³த்³த³ஸோ து³ரனுபோ³தோ⁴ ஸந்தோ பணீதோ அதக்காவசரோ நிபுணோ பண்டி³தவேத³னீயோ. ஆலயராமா கோ² பனாயம் பஜா ஆலயரதா ஆலயஸம்முதி³தா. ஆலயராமா கோ² பனாயம் பஜா ஆலயரதாய ஆலயஸம்முதி³தாய து³த்³த³ஸம் இத³ம் டா²னம் யதி³த³ம் – இத³ப்பச்சயதா படிச்சஸமுப்பாதோ³. இத³ம்பி கோ² டா²னம் து³த்³த³ஸம் யதி³த³ம் – ஸப்³ப³ஸங்கா²ரஸமதோ² ஸப்³பூ³பதி⁴படினிஸ்ஸக்³கோ³ தண்ஹாக்க²யோ விராகோ³ நிரோதோ⁴ நிப்³பா³னம். அஹஞ்சேவ கோ² பன த⁴ம்மம் தே³ஸேய்யம், பரே ச மே ந ஆஜானேய்யும், ஸோ மமஸ்ஸ கிலமதோ², ஸா மமஸ்ஸ விஹேஸா’தி. அபிஸ்ஸு மம், பி⁴க்க²வே, இமா அனச்ச²ரியா கா³தா²யோ படிப⁴ம்ஸு புப்³பே³ அஸ்ஸுதபுப்³பா³ –

‘கிச்சே²ன மே அதி⁴க³தம், ஹலம் தா³னி பகாஸிதும்;

ராக³தோ³ஸபரேதேஹி, நாயம் த⁴ம்மோ ஸுஸம்பு³தோ⁴.

‘படிஸோதகா³மிம் நிபுணம், க³ம்பீ⁴ரம் து³த்³த³ஸம் அணும்;

ராக³ரத்தா ந த³க்க²ந்தி, தமோக²ந்தே⁴ன ஆவுடா’’’தி [ஆவடாதி (ஸீ.), ஆவுதா (ஸ்யா.)].

282. ‘‘இதிஹ மே, பி⁴க்க²வே, படிஸஞ்சிக்க²தோ அப்போஸ்ஸுக்கதாய சித்தம் நமதி, நோ த⁴ம்மதே³ஸனாய. அத² கோ², பி⁴க்க²வே, ப்³ரஹ்முனோ ஸஹம்பதிஸ்ஸ மம சேதஸா சேதோபரிவிதக்கமஞ்ஞாய ஏதத³ஹோஸி – ‘நஸ்ஸதி வத போ⁴ லோகோ, வினஸ்ஸதி வத போ⁴ லோகோ, யத்ர ஹி நாம ததா²க³தஸ்ஸ அரஹதோ ஸம்மாஸம்பு³த்³த⁴ஸ்ஸ அப்போஸ்ஸுக்கதாய சித்தம் நமதி [நமிஸ்ஸதி (?)], நோ த⁴ம்மதே³ஸனாயா’தி. அத² கோ², பி⁴க்க²வே, ப்³ரஹ்மா ஸஹம்பதி – ஸேய்யதா²பி நாம ப³லவா புரிஸோ ஸமிஞ்ஜிதம் வா பா³ஹம் பஸாரேய்ய, பஸாரிதம் வா பா³ஹம் ஸமிஞ்ஜேய்ய, ஏவமேவ – ப்³ரஹ்மலோகே அந்தரஹிதோ மம புரதோ பாதுரஹோஸி. அத² கோ², பி⁴க்க²வே, ப்³ரஹ்மா ஸஹம்பதி ஏகம்ஸம் உத்தராஸங்க³ம் கரித்வா யேனாஹம் தேனஞ்ஜலிம் பணாமேத்வா மம் ஏதத³வோச – ‘தே³ஸேது, ப⁴ந்தே, ப⁴க³வா த⁴ம்மம், தே³ஸேது ஸுக³தோ த⁴ம்மம். ஸந்தி ஸத்தா அப்பரஜக்க²ஜாதிகா, அஸ்ஸவனதா த⁴ம்மஸ்ஸ பரிஹாயந்தி. ப⁴விஸ்ஸந்தி த⁴ம்மஸ்ஸ அஞ்ஞாதாரோ’தி. இத³மவோச, பி⁴க்க²வே, ப்³ரஹ்மா ஸஹம்பதி. இத³ம் வத்வா அதா²பரம் ஏதத³வோச –

‘பாதுரஹோஸி மக³தே⁴ஸு புப்³பே³,

த⁴ம்மோ அஸுத்³தோ⁴ ஸமலேஹி சிந்திதோ;

அபாபுரேதம் [அவாபுரேதம் (ஸீ.)] அமதஸ்ஸ த்³வாரம்,

ஸுணந்து த⁴ம்மம் விமலேனானுபு³த்³த⁴ம்.

‘ஸேலே யதா² பப்³ப³தமுத்³த⁴னிட்டி²தோ,

யதா²பி பஸ்ஸே ஜனதம் ஸமந்ததோ;

ததூ²பமம் த⁴ம்மமயம் ஸுமேத⁴,

பாஸாத³மாருய்ஹ ஸமந்தசக்கு²;

ஸோகாவதிண்ணம் [ஸோகாவகிண்ணம் (ஸ்யா.)] ஜனதமபேதஸோகோ,

அவேக்க²ஸ்ஸு ஜாதிஜராபி⁴பூ⁴தம்.

‘உட்டே²ஹி வீர விஜிதஸங்கா³ம,

ஸத்த²வாஹ அணண விசர லோகே;

தே³ஸஸ்ஸு [தே³ஸேது (ஸ்யா. க.)] ப⁴க³வா த⁴ம்மம்,

அஞ்ஞாதாரோ ப⁴விஸ்ஸந்தீ’’’தி.

283. ‘‘அத² கோ² அஹம், பி⁴க்க²வே, ப்³ரஹ்முனோ ச அஜ்ஜே²ஸனம் விதி³த்வா ஸத்தேஸு ச காருஞ்ஞதம் படிச்ச பு³த்³த⁴சக்கு²னா லோகம் வோலோகேஸிம். அத்³த³ஸம் கோ² அஹம், பி⁴க்க²வே, பு³த்³த⁴சக்கு²னா லோகம் வோலோகேந்தோ ஸத்தே அப்பரஜக்கே² மஹாரஜக்கே², திக்கி²ந்த்³ரியே முதி³ந்த்³ரியே, ஸ்வாகாரே த்³வாகாரே, ஸுவிஞ்ஞாபயே து³விஞ்ஞாபயே, அப்பேகச்சே பரலோகவஜ்ஜப⁴யத³ஸ்ஸாவினே [த³ஸ்ஸாவினோ (ஸ்யா. கம். க.)] விஹரந்தே, அப்பேகச்சே ந பரலோகவஜ்ஜப⁴யத³ஸ்ஸாவினே [த³ஸ்ஸாவினோ (ஸ்யா. கம். க.)] விஹரந்தே. ஸேய்யதா²பி நாம உப்பலினியம் வா பது³மினியம் வா புண்ட³ரீகினியம் வா அப்பேகச்சானி உப்பலானி வா பது³மானி வா புண்ட³ரீகானி வா உத³கே ஜாதானி உத³கே ஸம்வட்³டா⁴னி உத³கானுக்³க³தானி அந்தோனிமுக்³க³போஸீனி, அப்பேகச்சானி உப்பலானி வா பது³மானி வா புண்ட³ரீகானி வா உத³கே ஜாதானி உத³கே ஸம்வட்³டா⁴னி உத³கானுக்³க³தானி ஸமோத³கம் டி²தானி, அப்பேகச்சானி உப்பலானி வா பது³மானி வா புண்ட³ரீகானி வா உத³கே ஜாதானி உத³கே ஸம்வட்³டா⁴னி உத³கம் அச்சுக்³க³ம்ம டி²தானி [திட்ட²ந்தி (ஸீ. ஸ்யா. பீ.)] அனுபலித்தானி உத³கேன; ஏவமேவ கோ² அஹம், பி⁴க்க²வே, பு³த்³த⁴சக்கு²னா லோகம் வோலோகேந்தோ அத்³த³ஸம் ஸத்தே அப்பரஜக்கே² மஹாரஜக்கே², திக்கி²ந்த்³ரியே முதி³ந்த்³ரியே, ஸ்வாகாரே த்³வாகாரே, ஸுவிஞ்ஞாபயே து³விஞ்ஞாபயே, அப்பேகச்சே பரலோகவஜ்ஜப⁴யத³ஸ்ஸாவினே விஹரந்தே, அப்பேகச்சே ந பரலோகவஜ்ஜப⁴யத³ஸ்ஸாவினே விஹரந்தே. அத² க்²வாஹம், பி⁴க்க²வே, ப்³ரஹ்மானம் ஸஹம்பதிம் கா³தா²ய பச்சபா⁴ஸிம் –

‘அபாருதா தேஸம் அமதஸ்ஸ த்³வாரா,

யே ஸோதவந்தோ பமுஞ்சந்து ஸத்³த⁴ம்;

விஹிம்ஸஸஞ்ஞீ பகு³ணம் ந பா⁴ஸிம்,

த⁴ம்மம் பணீதம் மனுஜேஸு ப்³ரஹ்மே’’’தி.

‘‘அத² கோ², பி⁴க்க²வே, ப்³ரஹ்மா ஸஹம்பதி ‘கதாவகாஸோ கோ²ம்ஹி ப⁴க³வதா த⁴ம்மதே³ஸனாயா’தி மம் அபி⁴வாதே³த்வா பத³க்கி²ணம் கத்வா தத்தே²வந்தரதா⁴யி.

284. ‘‘தஸ்ஸ மய்ஹம், பி⁴க்க²வே, ஏதத³ஹோஸி – ‘கஸ்ஸ நு கோ² அஹம் பட²மம் த⁴ம்மம் தே³ஸேய்யம்; கோ இமம் த⁴ம்மம் கி²ப்பமேவ ஆஜானிஸ்ஸதீ’தி? தஸ்ஸ மய்ஹம், பி⁴க்க²வே, ஏதத³ஹோஸி – ‘அயம் கோ² ஆளாரோ காலாமோ பண்டி³தோ வியத்தோ மேதா⁴வீ தீ³க⁴ரத்தம் அப்பரஜக்க²ஜாதிகோ. யம்னூனாஹம் ஆளாரஸ்ஸ காலாமஸ்ஸ பட²மம் த⁴ம்மம் தே³ஸேய்யம். ஸோ இமம் த⁴ம்மம் கி²ப்பமேவ ஆஜானிஸ்ஸதீ’தி. அத² கோ² மம், பி⁴க்க²வே, தே³வதா உபஸங்கமித்வா ஏதத³வோச – ‘ஸத்தாஹகாலங்கதோ, ப⁴ந்தே, ஆளாரோ காலாமோ’தி. ஞாணஞ்ச பன மே த³ஸ்ஸனம் உத³பாதி³ – ‘ஸத்தாஹகாலங்கதோ ஆளாரோ காலாமோ’தி. தஸ்ஸ மய்ஹம், பி⁴க்க²வே, ஏதத³ஹோஸி – ‘மஹாஜானியோ கோ² ஆளாரோ காலாமோ. ஸசே ஹி ஸோ இமம் த⁴ம்மம் ஸுணேய்ய, கி²ப்பமேவ ஆஜானேய்யா’தி.

‘‘தஸ்ஸ மய்ஹம், பி⁴க்க²வே, ஏதத³ஹோஸி – ‘கஸ்ஸ நு கோ² அஹம் பட²மம் த⁴ம்மம் தே³ஸேய்யம்; கோ இமம் த⁴ம்மம் கி²ப்பமேவ ஆஜானிஸ்ஸதீ’தி? தஸ்ஸ மய்ஹம், பி⁴க்க²வே, ஏதத³ஹோஸி – ‘அயம் கோ² உத³கோ ராமபுத்தோ பண்டி³தோ வியத்தோ மேதா⁴வீ தீ³க⁴ரத்தம் அப்பரஜக்க²ஜாதிகோ. யம்னூனாஹம் உத³கஸ்ஸ ராமபுத்தஸ்ஸ பட²மம் த⁴ம்மம் தே³ஸேய்யம். ஸோ இமம் த⁴ம்மம் கி²ப்பமேவ ஆஜானிஸ்ஸதீ’தி. அத² கோ² மம், பி⁴க்க²வே, தே³வதா உபஸங்கமித்வா ஏதத³வோச – ‘அபி⁴தோ³ஸகாலங்கதோ, ப⁴ந்தே, உத³கோ ராமபுத்தோ’தி. ஞாணஞ்ச பன மே த³ஸ்ஸனம் உத³பாதி³ – ‘அபி⁴தோ³ஸகாலங்கதோ உத³கோ ராமபுத்தோ’தி. தஸ்ஸ மய்ஹம், பி⁴க்க²வே, ஏதத³ஹோஸி – ‘மஹாஜானியோ கோ² உத³கோ ராமபுத்தோ. ஸசே ஹி ஸோ இமம் த⁴ம்மம் ஸுணேய்ய, கி²ப்பமேவ ஆஜானேய்யா’தி.

‘‘தஸ்ஸ மய்ஹம், பி⁴க்க²வே, ஏதத³ஹோஸி – ‘கஸ்ஸ நு கோ² அஹம் பட²மம் த⁴ம்மம் தே³ஸேய்யம்; கோ இமம் த⁴ம்மம் கி²ப்பமேவ ஆஜானிஸ்ஸதீ’தி? தஸ்ஸ மய்ஹம், பி⁴க்க²வே, ஏதத³ஹோஸி – ‘ப³ஹுகாரா கோ² மே பஞ்சவக்³கி³யா பி⁴க்கூ², யே மம் பதா⁴னபஹிதத்தம் உபட்ட²ஹிம்ஸு. யம்னூனாஹம் பஞ்சவக்³கி³யானம் பி⁴க்கூ²னம் பட²மம் த⁴ம்மம் தே³ஸேய்ய’ந்தி. தஸ்ஸ மய்ஹம், பி⁴க்க²வே, ஏதத³ஹோஸி – ‘கஹம் நு கோ² ஏதரஹி பஞ்சவக்³கி³யா பி⁴க்கூ² விஹரந்தீ’தி? அத்³த³ஸம் கோ² அஹம், பி⁴க்க²வே, தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன பஞ்சவக்³கி³யே பி⁴க்கூ² பா³ராணஸியம் விஹரந்தே இஸிபதனே மிக³தா³யே. அத² க்²வாஹம், பி⁴க்க²வே, உருவேலாயம் யதா²பி⁴ரந்தம் விஹரித்வா யேன பா³ராணஸீ தேன சாரிகம் பக்கமிம் [பக்காமிம் (ஸ்யா. பீ. க.)].

285. ‘‘அத்³த³ஸா கோ² மம், பி⁴க்க²வே, உபகோ ஆஜீவகோ அந்தரா [ஆஜீவிகோ (ஸீ. பீ. க.)] ச க³யம் அந்தரா ச போ³தி⁴ம் அத்³தா⁴னமக்³க³ப்படிபன்னம். தி³ஸ்வான மம் ஏதத³வோச – ‘விப்பஸன்னானி கோ² தே, ஆவுஸோ, இந்த்³ரியானி, பரிஸுத்³தோ⁴ ச²விவண்ணோ பரியோதா³தோ! கம்ஸி த்வம், ஆவுஸோ, உத்³தி³ஸ்ஸ பப்³ப³ஜிதோ, கோ வா தே ஸத்தா², கஸ்ஸ வா த்வம் த⁴ம்மம் ரோசேஸீ’தி? ஏவம் வுத்தே, அஹம், பி⁴க்க²வே, உபகம் ஆஜீவகம் கா³தா²ஹி அஜ்ஜ²பா⁴ஸிம் –

‘ஸப்³பா³பி⁴பூ⁴ ஸப்³ப³விதூ³ஹமஸ்மி, ஸப்³பே³ஸு த⁴ம்மேஸு அனூபலித்தோ;

ஸப்³ப³ஞ்ஜஹோ தண்ஹாக்க²யே விமுத்தோ, ஸயம் அபி⁴ஞ்ஞாய கமுத்³தி³ஸேய்யம்.

‘ந மே ஆசரியோ அத்தி², ஸதி³ஸோ மே ந விஜ்ஜதி;

ஸதே³வகஸ்மிம் லோகஸ்மிம், நத்தி² மே படிபுக்³க³லோ.

‘அஹஞ்ஹி அரஹா லோகே, அஹம் ஸத்தா² அனுத்தரோ;

ஏகோம்ஹி ஸம்மாஸம்பு³த்³தோ⁴, ஸீதிபூ⁴தோஸ்மி நிப்³பு³தோ.

‘த⁴ம்மசக்கம் பவத்தேதும், க³ச்சா²மி காஸினம் புரம்;

அந்தீ⁴பூ⁴தஸ்மிம் [அந்த⁴பூ⁴தஸ்மிம் (ஸீ. ஸ்யா. பீ.)] லோகஸ்மிம், ஆஹஞ்ச²ம் அமதது³ந்து³பி⁴’ந்தி.

‘யதா² கோ² த்வம், ஆவுஸோ, படிஜானாஸி, அரஹஸி அனந்தஜினோ’தி!

‘மாதி³ஸா வே ஜினா ஹோந்தி, யே பத்தா ஆஸவக்க²யம்;

ஜிதா மே பாபகா த⁴ம்மா, தஸ்மாஹமுபக ஜினோ’தி.

‘‘ஏவம் வுத்தே, பி⁴க்க²வே, உபகோ ஆஜீவகோ ‘ஹுபேய்யபாவுஸோ’தி [ஹுவேய்யபாவுஸோ (ஸீ. பீ.), ஹுவேய்யாவுஸோ (ஸ்யா.)] வத்வா ஸீஸம் ஓகம்பேத்வா உம்மக்³க³ம் க³ஹேத்வா பக்காமி.

286. ‘‘அத² க்²வாஹம், பி⁴க்க²வே, அனுபுப்³பே³ன சாரிகம் சரமானோ யேன பா³ராணஸீ இஸிபதனம் மிக³தா³யோ யேன பஞ்சவக்³கி³யா பி⁴க்கூ² தேனுபஸங்கமிம். அத்³த³ஸம்ஸு கோ² மம், பி⁴க்க²வே, பஞ்சவக்³கி³யா பி⁴க்கூ² தூ³ரதோ ஆக³ச்ச²ந்தம். தி³ஸ்வான அஞ்ஞமஞ்ஞம் ஸண்ட²பேஸும் [அஞ்ஞமஞ்ஞம் கதிகம் ஸண்ட²பேஸும் (வினயபிடகே மஹாவக்³கே³)] – ‘அயம் கோ², ஆவுஸோ, ஸமணோ கோ³தமோ ஆக³ச்ச²தி பா³ஹுல்லிகோ [பா³ஹுலிகோ (ஸீ. பீ.) ஸாரத்த²தீ³பனீடீகாய ஸமேதி] பதா⁴னவிப்³ப⁴ந்தோ ஆவத்தோ பா³ஹுல்லாய. ஸோ நேவ அபி⁴வாதே³தப்³போ³, ந பச்சுட்டா²தப்³போ³; நாஸ்ஸ பத்தசீவரம் படிக்³க³ஹேதப்³ப³ம். அபி ச கோ² ஆஸனம் ட²பேதப்³ப³ம், ஸசே ஆகங்கி²ஸ்ஸதி நிஸீதி³ஸ்ஸதீ’தி. யதா² யதா² கோ² அஹம், பி⁴க்க²வே, உபஸங்கமிம் ததா² ததா² பஞ்சவக்³கி³யா பி⁴க்கூ² நாஸக்கி²ம்ஸு ஸகாய கதிகாய ஸண்டா²தும். அப்பேகச்சே மம் பச்சுக்³க³ந்த்வா பத்தசீவரம் படிக்³க³ஹேஸும், அப்பேகச்சே ஆஸனம் பஞ்ஞபேஸும், அப்பேகச்சே பாதோ³த³கம் உபட்ட²பேஸும். அபி ச கோ² மம் நாமேன ச ஆவுஸோவாதே³ன ச ஸமுதா³சரந்தி.

‘‘ஏவம் வுத்தே, அஹம், பி⁴க்க²வே, பஞ்சவக்³கி³யே பி⁴க்கூ² ஏதத³வோசம் – ‘மா, பி⁴க்க²வே, ததா²க³தம் நாமேன ச ஆவுஸோவாதே³ன ச ஸமுதா³சரத² [ஸமுதா³சரித்த² (ஸீ. ஸ்யா. பீ.)]. அரஹம், பி⁴க்க²வே, ததா²க³தோ ஸம்மாஸம்பு³த்³தோ⁴. ஓத³ஹத², பி⁴க்க²வே, ஸோதம், அமதமதி⁴க³தம், அஹமனுஸாஸாமி, அஹம் த⁴ம்மம் தே³ஸேமி. யதா²னுஸிட்ட²ம் ததா² படிபஜ்ஜமானா நசிரஸ்ஸேவ – யஸ்ஸத்தா²ய குலபுத்தா ஸம்மதே³வ அகா³ரஸ்மா அனகா³ரியம் பப்³ப³ஜந்தி தத³னுத்தரம் – ப்³ரஹ்மசரியபரியோஸானம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரிஸ்ஸதா²’தி. ஏவம் வுத்தே, பி⁴க்க²வே, பஞ்சவக்³கி³யா பி⁴க்கூ² மம் ஏதத³வோசும் – ‘தாயபி கோ² த்வம், ஆவுஸோ கோ³தம, இரியாய தாய படிபதா³ய தாய து³க்கரகாரிகாய நாஜ்ஜ²க³மா உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸம், கிம் பன த்வம் ஏதரஹி பா³ஹுல்லிகோ பதா⁴னவிப்³ப⁴ந்தோ ஆவத்தோ பா³ஹுல்லாய அதி⁴க³மிஸ்ஸஸி உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸ’ந்தி? ஏவம் வுத்தே, அஹம், பி⁴க்க²வே, பஞ்சவக்³கி³யே பி⁴க்கூ² ஏதத³வோசம் – ‘ந, பி⁴க்க²வே, ததா²க³தோ பா³ஹுல்லிகோ, ந பதா⁴னவிப்³ப⁴ந்தோ, ந ஆவத்தோ பா³ஹுல்லாய. அரஹம், பி⁴க்க²வே, ததா²க³தோ ஸம்மாஸம்பு³த்³தோ⁴. ஓத³ஹத², பி⁴க்க²வே, ஸோதம், அமதமதி⁴க³தம், அஹமனுஸாஸாமி, அஹம் த⁴ம்மம் தே³ஸேமி. யதா²னுஸிட்ட²ம் ததா² படிபஜ்ஜமானா நசிரஸ்ஸேவ – யஸ்ஸத்தா²ய குலபுத்தா ஸம்மதே³வ அகா³ரஸ்மா அனகா³ரியம் பப்³ப³ஜந்தி தத³னுத்தரம் – ப்³ரஹ்மசரியபரியோஸானம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரிஸ்ஸதா²’தி. து³தியம்பி கோ², பி⁴க்க²வே, பஞ்சவக்³கி³யா பி⁴க்கூ² மம் ஏதத³வோசும் – ‘தாயபி கோ² த்வம், ஆவுஸோ கோ³தம, இரியாய தாய படிபதா³ய தாய து³க்கரகாரிகாய நாஜ்ஜ²க³மா உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸம், கிம் பன த்வம் ஏதரஹி பா³ஹுல்லிகோ பதா⁴னவிப்³ப⁴ந்தோ ஆவத்தோ பா³ஹுல்லாய அதி⁴க³மிஸ்ஸஸி உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸ’ந்தி? து³தியம்பி கோ² அஹம், பி⁴க்க²வே, பஞ்சவக்³கி³யே பி⁴க்கூ² ஏதத³வோசம் – ‘ந, பி⁴க்க²வே, ததா²க³தோ பா³ஹுல்லிகோ…பே… உபஸம்பஜ்ஜ விஹரிஸ்ஸதா²’தி. ததியம்பி கோ², பி⁴க்க²வே, பஞ்சவக்³கி³யா பி⁴க்கூ² மம் ஏதத³வோசும் – ‘தாயபி கோ² த்வம், ஆவுஸோ கோ³தம, இரியாய தாய படிபதா³ய தாய து³க்கரகாரிகாய நாஜ்ஜ²க³மா உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸம், கிம் பன த்வம் ஏதரஹி பா³ஹுல்லிகோ பதா⁴னவிப்³ப⁴ந்தோ ஆவத்தோ பா³ஹுல்லாய அதி⁴க³மிஸ்ஸஸி உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸ’ந்தி?

‘‘ஏவம் வுத்தே, அஹம், பி⁴க்க²வே, பஞ்சவக்³கி³யே பி⁴க்கூ² ஏதத³வோசம் – ‘அபி⁴ஜானாத² மே நோ தும்ஹே, பி⁴க்க²வே, இதோ புப்³பே³ ஏவரூபம் பபா⁴விதமேத’ந்தி [பா⁴ஸிதமேதந்தி (ஸீ. ஸ்யா. வினயேபி)]? ‘நோ ஹேதம், ப⁴ந்தே’. ‘அரஹம், பி⁴க்க²வே, ததா²க³தோ ஸம்மாஸம்பு³த்³தோ⁴. ஓத³ஹத², பி⁴க்க²வே, ஸோதம், அமதமதி⁴க³தம், அஹமனுஸாஸாமி, அஹம் த⁴ம்மம் தே³ஸேமி. யதா²னுஸிட்ட²ம் ததா² படிபஜ்ஜமானா நசிரஸ்ஸேவ – யஸ்ஸத்தா²ய குலபுத்தா ஸம்மதே³வ அகா³ரஸ்மா அனகா³ரியம் பப்³ப³ஜந்தி தத³னுத்தரம் – ப்³ரஹ்மசரியபரியோஸானம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரிஸ்ஸதா²’தி.

‘‘அஸக்கி²ம் கோ² அஹம், பி⁴க்க²வே, பஞ்சவக்³கி³யே பி⁴க்கூ² ஸஞ்ஞாபேதும். த்³வேபி ஸுத³ம், பி⁴க்க²வே, பி⁴க்கூ² ஓவதா³மி, தயோ பி⁴க்கூ² பிண்டா³ய சரந்தி. யம் தயோ பி⁴க்கூ² பிண்டா³ய சரித்வா ஆஹரந்தி தேன ச²ப்³ப³க்³கி³யா [ச²ப்³ப³க்³கா³ (ஸீ. ஸ்யா.)] யாபேம. தயோபி ஸுத³ம், பி⁴க்க²வே, பி⁴க்கூ² ஓவதா³மி, த்³வே பி⁴க்கூ² பிண்டா³ய சரந்தி. யம் த்³வே பி⁴க்கூ² பிண்டா³ய சரித்வா ஆஹரந்தி தேன ச²ப்³ப³க்³கி³யா யாபேம. அத² கோ², பி⁴க்க²வே, பஞ்சவக்³கி³யா பி⁴க்கூ² மயா ஏவம் ஓவதி³யமானா ஏவம் அனுஸாஸியமானா அத்தனா ஜாதித⁴ம்மா ஸமானா ஜாதித⁴ம்மே ஆதீ³னவம் விதி³த்வா அஜாதம் அனுத்தரம் யோக³க்கே²மம் நிப்³பா³னம் பரியேஸமானா அஜாதம் அனுத்தரம் யோக³க்கே²மம் நிப்³பா³னம் அஜ்ஜ²க³மம்ஸு, அத்தனா ஜராத⁴ம்மா ஸமானா ஜராத⁴ம்மே ஆதீ³னவம் விதி³த்வா அஜரம் அனுத்தரம் யோக³க்கே²மம் நிப்³பா³னம் பரியேஸமானா அஜரம் அனுத்தரம் யோக³க்கே²மம் நிப்³பா³னம் அஜ்ஜ²க³மம்ஸு, அத்தனா ப்³யாதி⁴த⁴ம்மா ஸமானா…பே… அத்தனா மரணத⁴ம்மா ஸமானா… அத்தனா ஸோகத⁴ம்மா ஸமானா… அத்தனா ஸம்கிலேஸத⁴ம்மா ஸமானா ஸம்கிலேஸத⁴ம்மே ஆதீ³னவம் விதி³த்வா அஸம்கிலிட்ட²ம் அனுத்தரம் யோக³க்கே²மம் நிப்³பா³னம் பரியேஸமானா அஸம்கிலிட்ட²ம் அனுத்தரம் யோக³க்கே²மம் நிப்³பா³னம் அஜ்ஜ²க³மம்ஸு. ஞாணஞ்ச பன நேஸம் த³ஸ்ஸனம் உத³பாதி³ – ‘அகுப்பா நோ விமுத்தி [அகுப்பா நேஸம் விமுத்தி (க.)], அயமந்திமா ஜாதி, நத்தி² தா³னி புனப்³ப⁴வோ’தி.

287. ‘‘பஞ்சிமே, பி⁴க்க²வே, காமகு³ணா. கதமே பஞ்ச? சக்கு²விஞ்ஞேய்யா ரூபா இட்டா² கந்தா மனாபா பியரூபா காமூபஸம்ஹிதா ரஜனீயா, ஸோதவிஞ்ஞேய்யா ஸத்³தா³…பே… கா⁴னவிஞ்ஞேய்யா க³ந்தா⁴… ஜிவ்ஹாவிஞ்ஞேய்யா ரஸா… காயவிஞ்ஞேய்யா போ²ட்ட²ப்³பா³ இட்டா² கந்தா மனாபா பியரூபா காமூபஸம்ஹிதா ரஜனீயா. இமே கோ², பி⁴க்க²வே, பஞ்ச காமகு³ணா. யே ஹி கேசி, பி⁴க்க²வே, ஸமணா வா ப்³ராஹ்மணா வா இமே பஞ்ச காமகு³ணே க³தி²தா முச்சி²தா அஜ்ஜோ²பன்னா அனாதீ³னவத³ஸ்ஸாவினோ அனிஸ்ஸரணபஞ்ஞா பரிபு⁴ஞ்ஜந்தி, தே ஏவமஸ்ஸு வேதி³தப்³பா³ – ‘அனயமாபன்னா ப்³யஸனமாபன்னா யதா²காமகரணீயா பாபிமதோ’ [பாபிமதோ’’தி (?)]. ‘ஸேய்யதா²பி, பி⁴க்க²வே, ஆரஞ்ஞகோ மகோ³ ப³த்³தோ⁴ பாஸராஸிம் அதி⁴ஸயேய்ய. ஸோ ஏவமஸ்ஸ வேதி³தப்³போ³ – அனயமாபன்னோ ப்³யஸனமாபன்னோ யதா²காமகரணீயோ லுத்³த³ஸ்ஸ. ஆக³ச்ச²ந்தே ச பன லுத்³தே³ யேன காமம் ந பக்கமிஸ்ஸதீ’தி. ஏவமேவ கோ², பி⁴க்க²வே, யே ஹி கேசி ஸமணா வா ப்³ராஹ்மணா வா இமே பஞ்ச காமகு³ணே க³தி²தா முச்சி²தா அஜ்ஜோ²பன்னா அனாதீ³னவத³ஸ்ஸாவினோ அனிஸ்ஸரணபஞ்ஞா பரிபு⁴ஞ்ஜந்தி, தே ஏவமஸ்ஸு வேதி³தப்³பா³ – ‘அனயமாபன்னா ப்³யஸனமாபன்னா யதா²காமகரணீயா பாபிமதோ’. யே ச கோ² கேசி, பி⁴க்க²வே, ஸமணா வா ப்³ராஹ்மணா வா இமே பஞ்ச காமகு³ணே அக³தி²தா அமுச்சி²தா அனஜ்ஜோ²பன்னா ஆதீ³னவத³ஸ்ஸாவினோ நிஸ்ஸரணபஞ்ஞா பரிபு⁴ஞ்ஜந்தி, தே ஏவமஸ்ஸு வேதி³தப்³பா³ – ‘ந அனயமாபன்னா ந ப்³யஸனமாபன்னா ந யதா²காமகரணீயா பாபிமதோ’.

‘‘ஸேய்யதா²பி, பி⁴க்க²வே, ஆரஞ்ஞகோ மகோ³ அப³த்³தோ⁴ பாஸராஸிம் அதி⁴ஸயேய்ய. ஸோ ஏவமஸ்ஸ வேதி³தப்³போ³ – ‘ந அனயமாபன்னோ ந ப்³யஸனமாபன்னோ ந யதா²காமகரணீயோ லுத்³த³ஸ்ஸ. ஆக³ச்ச²ந்தே ச பன லுத்³தே³ யேன காமம் பக்கமிஸ்ஸதீ’தி. ஏவமேவ கோ², பி⁴க்க²வே, யே ஹி கேசி ஸமணா வா ப்³ராஹ்மணா வா இமே பஞ்ச காமகு³ணே அக³தி²தா அமுச்சி²தா அனஜ்ஜோ²பன்னா ஆதீ³னவத³ஸ்ஸாவினோ நிஸ்ஸரணபஞ்ஞா பரிபு⁴ஞ்ஜந்தி, தே ஏவமஸ்ஸு வேதி³தப்³பா³ – ‘ந அனயமாபன்னா ந ப்³யஸனமாபன்னா ந யதா²காமகரணீயா பாபிமதோ’.

‘‘ஸேய்யதா²பி, பி⁴க்க²வே, ஆரஞ்ஞகோ மகோ³ அரஞ்ஞே பவனே சரமானோ விஸ்ஸத்தோ² க³ச்ச²தி, விஸ்ஸத்தோ² திட்ட²தி, விஸ்ஸத்தோ² நிஸீத³தி, விஸ்ஸத்தோ² ஸேய்யம் கப்பேதி. தம் கிஸ்ஸ ஹேது? அனாபாத²க³தோ, பி⁴க்க²வே, லுத்³த³ஸ்ஸ. ஏவமேவ கோ², பி⁴க்க²வே, பி⁴க்கு² விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கம் ஸவிசாரம் விவேகஜம் பீதிஸுக²ம் பட²மம் ஜா²னம் உபஸம்பஜ்ஜ விஹரதி. அயம் வுச்சதி, பி⁴க்க²வே, பி⁴க்கு² அந்த⁴மகாஸி மாரம் அபத³ம், வதி⁴த்வா மாரசக்கு²ம் அத³ஸ்ஸனம் க³தோ பாபிமதோ.

‘‘புன சபரம், பி⁴க்க²வே, பி⁴க்கு² விதக்கவிசாரானம் வூபஸமா அஜ்ஜ²த்தம் ஸம்பஸாத³னம் சேதஸோ ஏகோதி³பா⁴வம் அவிதக்கம் அவிசாரம் ஸமாதி⁴ஜம் பீதிஸுக²ம் து³தியம் ஜா²னம் உபஸம்பஜ்ஜ விஹரதி. அயம் வுச்சதி, பி⁴க்க²வே…பே… பாபிமதோ.

‘‘புன சபரம், பி⁴க்க²வே, பி⁴க்கு² பீதியா ச விராகா³ உபேக்க²கோ ச விஹரதி, ஸதோ ச ஸம்பஜானோ, ஸுக²ஞ்ச காயேன படிஸம்வேதே³தி யம் தம் அரியா ஆசிக்க²ந்தி ‘உபேக்க²கோ ஸதிமா ஸுக²விஹாரீ’தி ததியம் ஜா²னம் உபஸம்பஜ்ஜ விஹரதி. அயம் வுச்சதி, பி⁴க்க²வே…பே… பாபிமதோ.

‘‘புன சபரம், பி⁴க்க²வே, பி⁴க்கு² ஸுக²ஸ்ஸ ச பஹானா து³க்க²ஸ்ஸ ச பஹானா புப்³பே³வ ஸோமனஸ்ஸதோ³மனஸ்ஸானம் அத்த²ங்க³மா அது³க்க²மஸுக²ம் உபேக்கா²ஸதிபாரிஸுத்³தி⁴ம் சதுத்த²ம் ஜா²னம் உபஸம்பஜ்ஜ விஹரதி. அயம் வுச்சதி, பி⁴க்க²வே…பே… பாபிமதோ.

‘‘புன சபரம், பி⁴க்க²வே, பி⁴க்கு² ஸப்³ப³ஸோ ரூபஸஞ்ஞானம் ஸமதிக்கமா படிக⁴ஸஞ்ஞானம் அத்த²ங்க³மா நானத்தஸஞ்ஞானம் அமனஸிகாரா ‘அனந்தோ ஆகாஸோ’தி ஆகாஸானஞ்சாயதனம் உபஸம்பஜ்ஜ விஹரதி. அயம் வுச்சதி, பி⁴க்க²வே…பே… பாபிமதோ.

‘‘புன சபரம், பி⁴க்க²வே, பி⁴க்கு² ஸப்³ப³ஸோ ஆகாஸானஞ்சாயதனம் ஸமதிக்கம்ம ‘அனந்தம் விஞ்ஞாண’ந்தி விஞ்ஞாணஞ்சாயதனம் உபஸம்பஜ்ஜ விஹரதி. அயம் வுச்சதி, பி⁴க்க²வே…பே… பாபிமதோ.

‘‘புன சபரம், பி⁴க்க²வே, பி⁴க்கு² ஸப்³ப³ஸோ விஞ்ஞாணஞ்சாயதனம் ஸமதிக்கம்ம ‘நத்தி² கிஞ்சீ’தி ஆகிஞ்சஞ்ஞாயதனம் உபஸம்பஜ்ஜ விஹரதி. அயம் வுச்சதி, பி⁴க்க²வே…பே… பாபிமதோ.

‘‘புன சபரம், பி⁴க்க²வே, பி⁴க்கு² ஸப்³ப³ஸோ ஆகிஞ்சஞ்ஞாயதனம் ஸமதிக்கம்ம நேவஸஞ்ஞானாஸஞ்ஞாயதனம் உபஸம்பஜ்ஜ விஹரதி. அயம் வுச்சதி, பி⁴க்க²வே…பே… பாபிமதோ.

‘‘புன சபரம், பி⁴க்க²வே, பி⁴க்கு² ஸப்³ப³ஸோ நேவஸஞ்ஞானாஸஞ்ஞாயதனம் ஸமதிக்கம்ம ஸஞ்ஞாவேத³யிதனிரோத⁴ம் உபஸம்பஜ்ஜ விஹரதி, பஞ்ஞாய சஸ்ஸ தி³ஸ்வா ஆஸவா பரிக்கீ²ணா ஹோந்தி. அயம் வுச்சதி, பி⁴க்க²வே, பி⁴க்கு² அந்த⁴மகாஸி மாரம் அபத³ம், வதி⁴த்வா மாரசக்கு²ம் அத³ஸ்ஸனம் க³தோ பாபிமதோ. திண்ணோ லோகே விஸத்திகம் விஸ்ஸத்தோ² க³ச்ச²தி, விஸ்ஸத்தோ² திட்ட²தி, விஸ்ஸத்தோ² நிஸீத³தி, விஸ்ஸத்தோ² ஸேய்யம் கப்பேதி. தம் கிஸ்ஸ ஹேது? அனாபாத²க³தோ, பி⁴க்க²வே, பாபிமதோ’’தி.

இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதம் அபி⁴னந்து³ந்தி.

பாஸராஸிஸுத்தம் நிட்டி²தம் ச²ட்ட²ம்.