5. அனுமானஸுத்தம்

181. ஏவம் மே ஸுதம் – ஏகம் ஸமயம் ஆயஸ்மா மஹாமோக்³க³ல்லானோ ப⁴க்³கே³ஸு விஹரதி ஸுஸுமாரகி³ரே [ஸும்ஸுமாரகி³ரே (ஸீ. ஸ்யா. பீ.)] பே⁴ஸகளாவனே மிக³தா³யே. தத்ர கோ² ஆயஸ்மா மஹாமோக்³க³ல்லானோ பி⁴க்கூ² ஆமந்தேஸி – ‘‘ஆவுஸோ, பி⁴க்க²வோ’’தி. ‘‘ஆவுஸோ’’தி கோ² தே பி⁴க்கூ² ஆயஸ்மதோ மஹாமோக்³க³ல்லானஸ்ஸ பச்சஸ்ஸோஸும். ஆயஸ்மா மஹாமோக்³க³ல்லானோ ஏதத³வோச –

‘‘பவாரேதி சேபி, ஆவுஸோ, பி⁴க்கு² – ‘வத³ந்து மம் ஆயஸ்மந்தோ, வசனீயோம்ஹி ஆயஸ்மந்தேஹீ’தி, ஸோ ச ஹோதி து³ப்³ப³சோ, தோ³வசஸ்ஸகரணேஹி த⁴ம்மேஹி ஸமன்னாக³தோ, அக்க²மோ அப்பத³க்கி²ணக்³கா³ஹீ அனுஸாஸனிம், அத² கோ² நம் ஸப்³ரஹ்மசாரீ ந சேவ வத்தப்³ப³ம் மஞ்ஞந்தி, ந ச அனுஸாஸிதப்³ப³ம் மஞ்ஞந்தி, ந ச தஸ்மிம் புக்³க³லே விஸ்ஸாஸம் ஆபஜ்ஜிதப்³ப³ம் மஞ்ஞந்தி.

‘‘கதமே சாவுஸோ, தோ³வசஸ்ஸகரணா த⁴ம்மா? இதா⁴வுஸோ, பி⁴க்கு² பாபிச்சோ² ஹோதி, பாபிகானம் இச்சா²னம் வஸம் க³தோ. யம்பாவுஸோ, பி⁴க்கு² பாபிச்சோ² ஹோதி, பாபிகானம் இச்சா²னம் வஸம் க³தோ – அயம்பி த⁴ம்மோ தோ³வசஸ்ஸகரணோ.

‘‘புன சபரம், ஆவுஸோ, பி⁴க்கு² அத்துக்கம்ஸகோ ஹோதி பரவம்பீ⁴. யம்பாவுஸோ, பி⁴க்கு² அத்துக்கம்ஸகோ ஹோதி பரவம்பீ⁴ – அயம்பி த⁴ம்மோ தோ³வசஸ்ஸகரணோ.

‘‘புன சபரம், ஆவுஸோ, பி⁴க்கு² கோத⁴னோ ஹோதி கோதா⁴பி⁴பூ⁴தோ. யம்பாவுஸோ, பி⁴க்கு² கோத⁴னோ ஹோதி கோதா⁴பி⁴பூ⁴தோ – அயம்பி த⁴ம்மோ தோ³வசஸ்ஸகரணோ.

‘‘புன சபரம், ஆவுஸோ, பி⁴க்கு² கோத⁴னோ ஹோதி கோத⁴ஹேது உபனாஹீ. யம்பாவுஸோ, பி⁴க்கு² கோத⁴னோ ஹோதி கோத⁴ஹேது உபனாஹீ – அயம்பி த⁴ம்மோ தோ³வசஸ்ஸகரணோ.

‘‘புன சபரம், ஆவுஸோ, பி⁴க்கு² கோத⁴னோ ஹோதி கோத⁴ஹேது அபி⁴ஸங்கீ³. யம்பாவுஸோ, பி⁴க்கு² கோத⁴னோ ஹோதி கோத⁴ஹேது அபி⁴ஸங்கீ³ – அயம்பி த⁴ம்மோ தோ³வசஸ்ஸகரணோ.

‘‘புன சபரம், ஆவுஸோ, பி⁴க்கு² கோத⁴னோ ஹோதி கோத⁴ஸாமந்தா [கோத⁴ஸாமந்தம் (ஸ்யா. பீ. க.)] வாசம் நிச்சா²ரேதா. யம்பாவுஸோ, பி⁴க்கு² கோத⁴னோ ஹோதி கோத⁴ஸாமந்தா வாசம் நிச்சா²ரேதா – அயம்பி த⁴ம்மோ தோ³வசஸ்ஸகரணோ.

‘‘புன சபரம், ஆவுஸோ, பி⁴க்கு² சோதி³தோ [சுதி³தோ (ஸீ. ஸ்யா. பீ.)] சோத³கேன சோத³கம் படிப்ப²ரதி. யம்பாவுஸோ, பி⁴க்கு² சோதி³தோ சோத³கேன சோத³கம் படிப்ப²ரதி – அயம்பி த⁴ம்மோ தோ³வசஸ்ஸகரணோ.

‘‘புன சபரம், ஆவுஸோ, பி⁴க்கு² சோதி³தோ சோத³கேன சோத³கம் அபஸாதே³தி. யம்பாவுஸோ, பி⁴க்கு² சோதி³தோ சோத³கேன சோத³கம் அபஸாதே³தி – அயம்பி த⁴ம்மோ தோ³வசஸ்ஸகரணோ.

‘‘புன சபரம், ஆவுஸோ, பி⁴க்கு² சோதி³தோ சோத³கேன சோத³கஸ்ஸ பச்சாரோபேதி. யம்பாவுஸோ, பி⁴க்கு² சோதி³தோ சோத³கேன சோத³கஸ்ஸ பச்சாரோபேதி – அயம்பி த⁴ம்மோ தோ³வசஸ்ஸகரணோ.

‘‘புன சபரம், ஆவுஸோ, பி⁴க்கு² சோதி³தோ சோத³கேன அஞ்ஞேனஞ்ஞம் படிசரதி, ப³ஹித்³தா⁴ கத²ம் அபனாமேதி, கோபஞ்ச தோ³ஸஞ்ச அப்பச்சயஞ்ச பாதுகரோதி. யம்பாவுஸோ, பி⁴க்கு² சோதி³தோ சோத³கேன அஞ்ஞேனஞ்ஞம் படிசரதி, ப³ஹித்³தா⁴ கத²ம் அபனாமேதி, கோபஞ்ச தோ³ஸஞ்ச அப்பச்சயஞ்ச பாதுகரோதி – அயம்பி த⁴ம்மோ தோ³வசஸ்ஸகரணோ.

‘‘புன சபரம், ஆவுஸோ, பி⁴க்கு² சோதி³தோ சோத³கேன அபதா³னே ந ஸம்பாயதி. யம்பாவுஸோ, பி⁴க்கு² சோதி³தோ சோத³கேன அபதா³னே ந ஸம்பாயதி – அயம்பி த⁴ம்மோ தோ³வசஸ்ஸகரணோ.

‘‘புன சபரம், ஆவுஸோ, பி⁴க்கு² மக்கீ² ஹோதி பளாஸீ. யம்பாவுஸோ, பி⁴க்கு² மக்கீ² ஹோதி பளாஸீ – அயம்பி த⁴ம்மோ தோ³வசஸ்ஸகரணோ.

‘‘புன சபரம், ஆவுஸோ, பி⁴க்கு² இஸ்ஸுகீ ஹோதி மச்ச²ரீ. யம்பாவுஸோ, பி⁴க்கு² இஸ்ஸுகீ ஹோதி மச்ச²ரீ – அயம்பி த⁴ம்மோ தோ³வசஸ்ஸகரணோ.

‘‘புன சபரம், ஆவுஸோ, பி⁴க்கு² ஸடோ² ஹோதி மாயாவீ. யம்பாவுஸோ, பி⁴க்கு² ஸடோ² ஹோதி மாயாவீ – அயம்பி த⁴ம்மோ தோ³வசஸ்ஸகரணோ.

‘‘புன சபரம், ஆவுஸோ, பி⁴க்கு² த²த்³தோ⁴ ஹோதி அதிமானீ. யம்பாவுஸோ, பி⁴க்கு² த²த்³தோ⁴ ஹோதி அதிமானீ – அயம்பி த⁴ம்மோ தோ³வசஸ்ஸகரணோ.

‘‘புன சபரம், ஆவுஸோ, பி⁴க்கு² ஸந்தி³ட்டி²பராமாஸீ ஹோதி ஆதா⁴னக்³கா³ஹீ து³ப்படினிஸ்ஸக்³கீ³. யம்பாவுஸோ, பி⁴க்கு² ஸந்தி³ட்டி²பராமாஸீ ஹோதி ஆதா⁴னக்³கா³ஹீ து³ப்படினிஸ்ஸக்³கீ³ – அயம்பி த⁴ம்மோ தோ³வசஸ்ஸகரணோ. இமே வுச்சந்தாவுஸோ, தோ³வசஸ்ஸகரணா த⁴ம்மா.

182. ‘‘நோ சேபி, ஆவுஸோ, பி⁴க்கு² பவாரேதி – ‘வத³ந்து மம் ஆயஸ்மந்தோ, வசனீயோம்ஹி ஆயஸ்மந்தேஹீ’தி, ஸோ ச ஹோதி ஸுவசோ, ஸோவசஸ்ஸகரணேஹி த⁴ம்மேஹி ஸமன்னாக³தோ, க²மோ பத³க்கி²ணக்³கா³ஹீ அனுஸாஸனிம், அத² கோ² நம் ஸப்³ரஹ்மசாரீ வத்தப்³ப³ஞ்சேவ மஞ்ஞந்தி, அனுஸாஸிதப்³ப³ஞ்ச மஞ்ஞந்தி, தஸ்மிஞ்ச புக்³க³லே விஸ்ஸாஸம் ஆபஜ்ஜிதப்³ப³ம் மஞ்ஞந்தி.

‘‘கதமே சாவுஸோ, ஸோவசஸ்ஸகரணா த⁴ம்மா? இதா⁴வுஸோ, பி⁴க்கு² ந பாபிச்சோ² ஹோதி, ந பாபிகானம் இச்சா²னம் வஸம் க³தோ. யம்பாவுஸோ, பி⁴க்கு² ந பாபிச்சோ² ஹோதி ந பாபிகானம் இச்சா²னம் வஸம் க³தோ – அயம்பி த⁴ம்மோ ஸோவசஸ்ஸகரணோ.

‘‘புன சபரம், ஆவுஸோ, பி⁴க்கு² அனத்துக்கம்ஸகோ ஹோதி அபரவம்பீ⁴. யம்பாவுஸோ, பி⁴க்கு² அனத்துக்கம்ஸகோ ஹோதி அபரவம்பீ⁴ – அயம்பி த⁴ம்மோ ஸோவசஸ்ஸகரணோ.

‘‘புன சபரம், ஆவுஸோ, பி⁴க்கு² ந கோத⁴னோ ஹோதி ந கோதா⁴பி⁴பூ⁴தோ. யம்பாவுஸோ, பி⁴க்கு² ந கோத⁴னோ ஹோதி ந கோதா⁴பி⁴பூ⁴தோ – அயம்பி த⁴ம்மோ ஸோவசஸ்ஸகரணோ.

‘‘புன சபரம், ஆவுஸோ, பி⁴க்கு² ந கோத⁴னோ ஹோதி ந கோத⁴ஹேது உபனாஹீ. யம்பாவுஸோ, பி⁴க்கு² ந கோத⁴னோ ஹோதி ந கோத⁴ஹேது உபனாஹீ – அயம்பி த⁴ம்மோ ஸோவசஸ்ஸகரணோ.

‘‘புன சபரம், ஆவுஸோ, பி⁴க்கு² ந கோத⁴னோ ஹோதி ந கோத⁴ஹேது அபி⁴ஸங்கீ³. யம்பாவுஸோ, பி⁴க்கு² ந கோத⁴னோ ஹோதி ந கோத⁴ஹேது அபி⁴ஸங்கீ³ – அயம்பி த⁴ம்மோ ஸோவசஸ்ஸகரணோ.

‘‘புன சபரம், ஆவுஸோ, பி⁴க்கு² ந கோத⁴னோ ஹோதி ந கோத⁴ஸாமந்தா வாசம் நிச்சா²ரேதா. யம்பாவுஸோ, பி⁴க்கு² ந கோத⁴னோ ஹோதி ந கோத⁴ஸாமந்தா வாசம் நிச்சா²ரேதா – அயம்பி த⁴ம்மோ ஸோவசஸ்ஸகரணோ.

‘‘புன சபரம், ஆவுஸோ, பி⁴க்கு² சோதி³தோ சோத³கேன சோத³கம் நப்படிப்ப²ரதி. யம்பாவுஸோ, பி⁴க்கு² சோதி³தோ சோத³கேன சோத³கம் நப்படிப்ப²ரதி – அயம்பி த⁴ம்மோ ஸோவசஸ்ஸகரணோ.

‘‘புன சபரம், ஆவுஸோ, பி⁴க்கு² சோதி³தோ சோத³கேன சோத³கம் ந அபஸாதே³தி. யம்பாவுஸோ, பி⁴க்கு² சோதி³தோ சோத³கேன சோத³கம் ந அபஸாதே³தி – அயம்பி த⁴ம்மோ ஸோவசஸ்ஸகரணோ.

‘‘புன சபரம், ஆவுஸோ, பி⁴க்கு² சோதி³தோ சோத³கேன சோத³கஸ்ஸ ந பச்சாரோபேதி. யம்பாவுஸோ, பி⁴க்கு² சோதி³தோ சோத³கேன சோத³கஸ்ஸ ந பச்சாரோபேதி – அயம்பி த⁴ம்மோ ஸோவசஸ்ஸகரணோ.

‘‘புன சபரம், ஆவுஸோ, பி⁴க்கு² சோதி³தோ சோத³கேன ந அஞ்ஞேனஞ்ஞம் படிசரதி, ந ப³ஹித்³தா⁴ கத²ம் அபனாமேதி, ந கோபஞ்ச தோ³ஸஞ்ச அப்பச்சயஞ்ச பாதுகரோதி. யம்பாவுஸோ, பி⁴க்கு² சோதி³தோ சோத³கேன ந அஞ்ஞேனஞ்ஞம் படிசரதி, ந ப³ஹித்³தா⁴ கத²ம் அபனாமேதி, ந கோபஞ்ச தோ³ஸஞ்ச அப்பச்சயஞ்ச பாதுகரோதி – அயம்பி த⁴ம்மோ ஸோவசஸ்ஸகரணோ.

‘‘புன சபரம், ஆவுஸோ, பி⁴க்கு² சோதி³தோ சோத³கேன அபதா³னே ஸம்பாயதி. யம்பாவுஸோ, பி⁴க்கு² சோதி³தோ சோத³கேன அபதா³னே ஸம்பாயதி – அயம்பி த⁴ம்மோ ஸோவசஸ்ஸகரணோ.

‘‘புன சபரம், ஆவுஸோ, பி⁴க்கு² அமக்கீ² ஹோதி அபளாஸீ. யம்பாவுஸோ, பி⁴க்கு² அமக்கீ² ஹோதி அபளாஸீ – அயம்பி த⁴ம்மோ ஸோவசஸ்ஸகரணோ.

‘‘புன சபரம், ஆவுஸோ, பி⁴க்கு² அனிஸ்ஸுகீ ஹோதி அமச்ச²ரீ. யம்பாவுஸோ, பி⁴க்கு² அனிஸ்ஸுகீ ஹோதி அமச்ச²ரீ – அயம்பி த⁴ம்மோ ஸோவசஸ்ஸகரணோ.

‘‘புன சபரம், ஆவுஸோ, பி⁴க்கு² அஸடோ² ஹோதி அமாயாவீ. யம்பாவுஸோ, பி⁴க்கு² அஸடோ² ஹோதி அமாயாவீ – அயம்பி த⁴ம்மோ ஸோவசஸ்ஸகரணோ.

‘‘புன சபரம், ஆவுஸோ, பி⁴க்கு² அத்த²த்³தோ⁴ ஹோதி அனதிமானீ. யம்பாவுஸோ, பி⁴க்கு² அத்த²த்³தோ⁴ ஹோதி அனதிமானீ – அயம்பி த⁴ம்மோ ஸோவசஸ்ஸகரணோ.

‘‘புன சபரம், ஆவுஸோ, பி⁴க்கு² அஸந்தி³ட்டி²பராமாஸீ ஹோதி அனாதா⁴னக்³கா³ஹீ ஸுப்படினிஸ்ஸக்³கீ³. யம்பாவுஸோ, பி⁴க்கு² அஸந்தி³ட்டி²பராமாஸீ ஹோதி, அனாதா⁴னக்³கா³ஹீ ஸுப்படினிஸ்ஸக்³கீ³ – அயம்பி த⁴ம்மோ ஸோவசஸ்ஸகரணோ. இமே வுச்சந்தாவுஸோ, ஸோவசஸ்ஸகரணா த⁴ம்மா.

183. ‘‘தத்ராவுஸோ, பி⁴க்கு²னா அத்தனாவ அத்தானம் ஏவம் அனுமினிதப்³ப³ம் [அனுமானிதப்³ப³ம் (ஸீ.)] – ‘யோ க்²வாயம் புக்³க³லோ பாபிச்சோ², பாபிகானம் இச்சா²னம் வஸம் க³தோ, அயம் மே புக்³க³லோ அப்பியோ அமனாபோ; அஹஞ்சேவ கோ² பனஸ்ஸம் பாபிச்சோ² பாபிகானம் இச்சா²னம் வஸம் க³தோ, அஹம்பாஸ்ஸம் பரேஸம் அப்பியோ அமனாபோ’தி. ஏவம் ஜானந்தேனாவுஸோ, பி⁴க்கு²னா ‘ந பாபிச்சோ² ப⁴விஸ்ஸாமி, ந பாபிகானம் இச்சா²னம் வஸம் க³தோ’தி சித்தம் உப்பாதே³தப்³ப³ம்.

‘‘‘யோ க்²வாயம் புக்³க³லோ அத்துக்கம்ஸகோ பரவம்பீ⁴, அயம் மே புக்³க³லோ அப்பியோ அமனாபோ; அஹஞ்சேவ கோ² பனஸ்ஸம் அத்துக்கம்ஸகோ பரவம்பீ⁴, அஹம்பாஸ்ஸம் பரேஸம் அப்பியோ அமனாபோ’தி. ஏவம் ஜானந்தேனாவுஸோ, பி⁴க்கு²னா ‘அனத்துக்கம்ஸகோ ப⁴விஸ்ஸாமி அபரவம்பீ⁴’தி சித்தம் உப்பாதே³தப்³ப³ம்.

‘‘‘யோ க்²வாயம் புக்³க³லோ கோத⁴னோ கோதா⁴பி⁴பூ⁴தோ, அயம் மே புக்³க³லோ அப்பியோ அமனாபோ. அஹஞ்சேவ கோ² பனஸ்ஸம் கோத⁴னோ கோதா⁴பி⁴பூ⁴தோ, அஹம்பாஸ்ஸம் பரேஸம் அப்பியோ அமனாபோ’தி. ஏவம் ஜானந்தேனாவுஸோ, பி⁴க்கு²னா ‘ந கோத⁴னோ ப⁴விஸ்ஸாமி ந கோதா⁴பி⁴பூ⁴தோ’தி சித்தம் உப்பாதே³தப்³ப³ம்.

‘‘‘யோ க்²வாயம் புக்³க³லோ கோத⁴னோ கோத⁴ஹேது உபனாஹீ, அயம் மே புக்³க³லோ அப்பியோ அமனாபோ; அஹஞ்சேவ கோ² பனஸ்ஸம் கோத⁴னோ கோத⁴ஹேது உபனாஹீ, அஹம்பாஸ்ஸம் பரேஸம் அப்பியோ அமனாபோ’தி. ஏவம் ஜானந்தேனாவுஸோ, பி⁴க்கு²னா ‘ந கோத⁴னோ ப⁴விஸ்ஸாமி ந கோத⁴ஹேது உபனாஹீ’தி சித்தம் உப்பாதே³தப்³ப³ம்.

‘‘‘யோ க்²வாயம் புக்³க³லோ கோத⁴னோ கோத⁴ஹேது அபி⁴ஸங்கீ³, அயம் மே புக்³க³லோ அப்பியோ அமனாபோ; அஹஞ்சேவ கோ² பனஸ்ஸம் கோத⁴னோ கோத⁴ஹேது அபி⁴ஸங்கீ³, அஹம்பாஸ்ஸம் பரேஸம் அப்பியோ அமனாபோ’தி. ஏவம் ஜானந்தேனாவுஸோ, பி⁴க்கு²னா ‘ந கோத⁴னோ ப⁴விஸ்ஸாமி ந கோத⁴ஹேது அபி⁴ஸங்கீ³’தி சித்தம் உப்பாதே³தப்³ப³ம்.

‘‘‘யோ க்²வாயம் புக்³க³லோ கோத⁴னோ கோத⁴ஸாமந்தா வாசம் நிச்சா²ரேதா, அயம் மே புக்³க³லோ அப்பியோ அமனாபோ; அஹஞ்சேவ கோ² பனஸ்ஸம் கோத⁴னோ கோத⁴ஸாமந்தா வாசம் நிச்சா²ரேதா, அஹம்பாஸ்ஸம் பரேஸம் அப்பியோ அமனாபோ’தி. ஏவம் ஜானந்தேனாவுஸோ, பி⁴க்கு²னா ‘ந கோத⁴னோ ப⁴விஸ்ஸாமி ந கோத⁴ஸாமந்தா வாசம் நிச்சா²ரேஸ்ஸாமீ’தி சித்தம் உப்பாதே³தப்³ப³ம்.

‘‘‘யோ க்²வாயம் புக்³க³லோ சோதி³தோ சோத³கேன சோத³கம் படிப்ப²ரதி, அயம் மே புக்³க³லோ அப்பியோ அமனாபோ; அஹஞ்சேவ கோ² பன சோதி³தோ சோத³கேன சோத³கம் படிப்ப²ரேய்யம், அஹம்பாஸ்ஸம் பரேஸம் அப்பியோ அமனாபோ’தி. ஏவம் ஜானந்தேனாவுஸோ, பி⁴க்கு²னா ‘சோதி³தோ சோத³கேன சோத³கம் நப்படிப்ப²ரிஸ்ஸாமீ’தி சித்தம் உப்பாதே³தப்³ப³ம்.

‘‘‘யோ க்²வாயம் புக்³க³லோ சோதி³தோ சோத³கேன சோத³கம் அபஸாதே³தி, அயம் மே புக்³க³லோ அப்பியோ அமனாபோ; அஹஞ்சேவ கோ² பன சோதி³தோ சோத³கேன சோத³கம் அபஸாதே³ய்யம், அஹம்பாஸ்ஸம் பரேஸம் அப்பியோ அமனாபோ’தி. ஏவம் ஜானந்தேனாவுஸோ, பி⁴க்கு²னா ‘சோதி³தோ சோத³கேன சோத³கம் ந அபஸாதே³ஸ்ஸாமீ’தி சித்தம் உப்பாதே³தப்³ப³ம்.

‘‘‘யோ க்²வாயம் புக்³க³லோ சோதி³தோ சோத³கேன சோத³கஸ்ஸ பச்சாரோபேதி, அயம் மே புக்³க³லோ அப்பியோ அமனாபோ; அஹஞ்சேவ கோ² பன சோதி³தோ சோத³கேன சோத³கஸ்ஸ பச்சாரோபேய்யம், அஹம்பாஸ்ஸம் பரேஸம் அப்பியோ அமனாபோ’தி. ஏவம் ஜானந்தேனாவுஸோ, பி⁴க்கு²னா ‘சோதி³தோ சோத³கேன சோத³கஸ்ஸ ந பச்சாரோபேஸ்ஸாமீ’தி சித்தம் உப்பாதே³தப்³ப³ம்.

‘‘‘யோ க்²வாயம் புக்³க³லோ சோதி³தோ சோத³கேன அஞ்ஞேனஞ்ஞம் படிசரதி, ப³ஹித்³தா⁴ கத²ம் அபனாமேதி, கோபஞ்ச தோ³ஸஞ்ச அப்பச்சயஞ்ச பாதுகரோதி, அயம் மே புக்³க³லோ அப்பியோ அமனாபோ; அஹஞ்சேவ கோ² பன சோதி³தோ சோத³கேன அஞ்ஞேனஞ்ஞம் படிசரேய்யம், ப³ஹித்³தா⁴ கத²ம் அபனாமேய்யம், கோபஞ்ச தோ³ஸஞ்ச அப்பச்சயஞ்ச பாதுகரேய்யம், அஹம்பாஸ்ஸம் பரேஸம் அப்பியோ அமனாபோ’தி. ஏவம் ஜானந்தேனாவுஸோ, பி⁴க்கு²னா ‘சோதி³தோ சோத³கேன ந அஞ்ஞேனஞ்ஞம் படிசரிஸ்ஸாமி, ந ப³ஹித்³தா⁴ கத²ம் அபனாமேஸ்ஸாமி, ந கோபஞ்ச தோ³ஸஞ்ச அப்பச்சயஞ்ச பாதுகரிஸ்ஸாமீ’தி சித்தம் உப்பாதே³தப்³ப³ம்.

‘‘‘யோ க்²வாயம் புக்³க³லோ சோதி³தோ சோத³கேன அபதா³னே ந ஸம்பாயதி, அயம் மே புக்³க³லோ அப்பியோ அமனாபோ; அஹஞ்சேவ கோ² பன சோதி³தோ சோத³கேன அபதா³னே ந ஸம்பாயேய்யம், அஹம்பாஸ்ஸம் பரேஸம் அப்பியோ அமனாபோ’தி. ஏவம் ஜானந்தேனாவுஸோ, பி⁴க்கு²னா ‘சோதி³தோ சோத³கேன அபதா³னே ஸம்பாயிஸ்ஸாமீ’தி சித்தம் உப்பாதே³தப்³ப³ம்.

‘‘‘யோ க்²வாயம் புக்³க³லோ மக்கீ² பளாஸீ, அயம் மே புக்³க³லோ அப்பியோ அமனாபோ; அஹஞ்சேவ கோ² பனஸ்ஸம் மக்கீ² பளாஸீ, அஹம்பாஸ்ஸம் பரேஸம் அப்பியோ அமனாபோ’தி. ஏவம் ஜானந்தேனாவுஸோ, பி⁴க்கு²னா ‘அமக்கீ² ப⁴விஸ்ஸாமி அபளாஸீ’தி சித்தம் உப்பாதே³தப்³ப³ம்.

‘‘‘யோ க்²வாயம் புக்³க³லோ இஸ்ஸுகீ மச்ச²ரீ, அயம் மே புக்³க³லோ அப்பியோ அமனாபோ; அஹஞ்சேவ கோ² பனஸ்ஸம் இஸ்ஸுகீ மச்ச²ரீ, அஹம்பாஸ்ஸம் பரேஸம் அப்பியோ அமனாபோ’தி. ஏவம் ஜானந்தேனாவுஸோ, பி⁴க்கு²னா ‘அனிஸ்ஸுகீ ப⁴விஸ்ஸாமி அமச்ச²ரீ’தி சித்தம் உப்பாதே³தப்³ப³ம்.

‘‘‘யோ க்²வாயம் புக்³க³லோ ஸடோ² மாயாவீ, அயம் மே புக்³க³லோ அப்பியோ அமனாபோ; அஹஞ்சேவ கோ² பனஸ்ஸம் ஸடோ² மாயாவீ, அஹம்பாஸ்ஸம் பரேஸம் அப்பியோ அமனாபோ’தி. ஏவம் ஜானந்தேனாவுஸோ, பி⁴க்கு²னா ‘அஸடோ² ப⁴விஸ்ஸாமி அமாயாவீ’தி சித்தம் உப்பாதே³தப்³ப³ம்.

‘‘‘யோ க்²வாயம் புக்³க³லோ த²த்³தோ⁴ அதிமானீ, அயம் மே புக்³க³லோ அப்பியோ அமனாபோ; அஹஞ்சேவ கோ² பனஸ்ஸம் த²த்³தோ⁴ அதிமானீ, அஹம்பாஸ்ஸம் பரேஸம் அப்பியோ அமனாபோ’தி. ஏவம் ஜானந்தேனாவுஸோ, பி⁴க்கு²னா ‘அத்த²த்³தோ⁴ ப⁴விஸ்ஸாமி அனதிமானீ’தி சித்தம் உப்பாதே³தப்³ப³ம்.

‘‘‘யோ க்²வாயம் புக்³க³லோ ஸந்தி³ட்டி²பராமாஸீ ஆதா⁴னக்³கா³ஹீ து³ப்படினிஸ்ஸக்³கீ³, அயம் மே புக்³க³லோ அப்பியோ அமனாபோ; அஹஞ்சேவ கோ² பனஸ்ஸம் ஸந்தி³ட்டி²பராமாஸீ ஆதா⁴னக்³கா³ஹீ து³ப்படினிஸ்ஸக்³கீ³, அஹம்பாஸ்ஸம் பரேஸம் அப்பியோ அமனாபோ’தி. ஏவம் ஜானந்தேனாவுஸோ, பி⁴க்கு²னா ‘அஸந்தி³ட்டி²பராமாஸீ ப⁴விஸ்ஸாமி அனாதா⁴னக்³கா³ஹீ ஸுப்படினிஸ்ஸக்³கீ³’தி சித்தம் உப்பாதே³தப்³ப³ம்.

184. ‘‘தத்ராவுஸோ, பி⁴க்கு²னா அத்தனாவ அத்தானம் ஏவம் பச்சவேக்கி²தப்³ப³ம் – ‘கிம் நு கோ²ம்ஹி பாபிச்சோ², பாபிகானம் இச்சா²னம் வஸம் க³தோ’தி? ஸசே, ஆவுஸோ, பி⁴க்கு² பச்சவேக்க²மானோ ஏவம் ஜானாதி – ‘பாபிச்சோ² கோ²ம்ஹி, பாபிகானம் இச்சா²னம் வஸம் க³தோ’தி, தேனாவுஸோ, பி⁴க்கு²னா தேஸம்யேவ பாபகானம் அகுஸலானம் த⁴ம்மானம் பஹானாய வாயமிதப்³ப³ம். ஸசே பனாவுஸோ, பி⁴க்கு² பச்சவேக்க²மானோ ஏவம் ஜானாதி – ‘ந கோ²ம்ஹி பாபிச்சோ², ந பாபிகானம் இச்சா²னம் வஸம் க³தோ’தி, தேனாவுஸோ, பி⁴க்கு²னா தேனேவ பீதிபாமோஜ்ஜேன விஹாதப்³ப³ம் அஹோரத்தானுஸிக்கி²னா குஸலேஸு த⁴ம்மேஸு.

‘‘புன சபரம், ஆவுஸோ, பி⁴க்கு²னா அத்தனாவ அத்தானம் ஏவம் பச்சவேக்கி²தப்³ப³ம் – ‘கிம் நு கோ²ம்ஹி அத்துக்கம்ஸகோ பரவம்பீ⁴’தி? ஸசே, ஆவுஸோ, பி⁴க்கு² பச்சவேக்க²மானோ ஏவம் ஜானாதி – ‘அத்துக்கம்ஸகோ கோ²ம்ஹி பரவம்பீ⁴’தி, தேனாவுஸோ, பி⁴க்கு²னா தேஸம்யேவ பாபகானம் அகுஸலானம் த⁴ம்மானம் பஹானாய வாயமிதப்³ப³ம். ஸசே பனாவுஸோ, பி⁴க்கு² பச்சவேக்க²மானோ ஏவம் ஜானாதி – ‘அனத்துக்கம்ஸகோ கோ²ம்ஹி அபரவம்பீ⁴’தி, தேனாவுஸோ, பி⁴க்கு²னா தேனேவ பீதிபாமோஜ்ஜேன விஹாதப்³ப³ம் அஹோரத்தானுஸிக்கி²னா குஸலேஸு த⁴ம்மேஸு.

‘‘புன சபரம், ஆவுஸோ, பி⁴க்கு²னா அத்தனாவ அத்தானம் ஏவம் பச்சவேக்கி²தப்³ப³ம் – ‘கிம் நு கோ²ம்ஹி கோத⁴னோ கோதா⁴பி⁴பூ⁴தோ’தி? ஸசே, ஆவுஸோ, பி⁴க்கு² பச்சவேக்க²மானோ ஏவம் ஜானாதி – ‘கோத⁴னோ கோ²ம்ஹி கோதா⁴பி⁴பூ⁴தோ’தி, தேனாவுஸோ, பி⁴க்கு²னா தேஸம்யேவ பாபகானம் அகுஸலானம் த⁴ம்மானம் பஹானாய வாயமிதப்³ப³ம். ஸசே பனாவுஸோ, பி⁴க்கு² பச்சவேக்க²மானோ ஏவம் ஜானாதி – ‘ந கோ²ம்ஹி கோத⁴னோ கோதா⁴பி⁴பூ⁴தோ’தி, தேனாவுஸோ, பி⁴க்கு²னா தேனேவ பீதிபாமோஜ்ஜேன விஹாதப்³ப³ம் அஹோரத்தானுஸிக்கி²னா குஸலேஸு த⁴ம்மேஸு.

‘‘புன சபரம், ஆவுஸோ, பி⁴க்கு²னா அத்தனாவ அத்தானம் ஏவம் பச்சவேக்கி²தப்³ப³ம் – ‘கிம் நு கோ²ம்ஹி கோத⁴னோ கோத⁴ஹேது உபனாஹீ’தி? ஸசே, ஆவுஸோ, பி⁴க்கு² பச்சவேக்க²மானோ ஏவம் ஜானாதி ‘கோத⁴னோ கோ²ம்ஹி கோத⁴ஹேது உபனாஹீ’தி, தேனாவுஸோ, பி⁴க்கு²னா தேஸம்யேவ பாபகானம் அகுஸலானம் த⁴ம்மானம் பஹானாய வாயமிதப்³ப³ம். ஸசே பனாவுஸோ, பி⁴க்கு² பச்சவேக்க²மானோ ஏவம் ஜானாதி ‘ந கோ²ம்ஹி கோத⁴னோ கோத⁴ஹேது உபனாஹீ’தி, தேனாவுஸோ, பி⁴க்கு²னா தேனேவ பீதிபாமோஜ்ஜேன விஹாதப்³ப³ம் அஹோரத்தானுஸிக்கி²னா குஸலேஸு த⁴ம்மேஸு.

‘‘புன சபரம், ஆவுஸோ, பி⁴க்கு²னா அத்தனாவ அத்தானம் ஏவம் பச்சவேக்கி²தப்³ப³ம் – ‘கிம் நு கோ²ம்ஹி கோத⁴னோ கோத⁴ஹேது அபி⁴ஸங்கீ³’தி? ஸசே, ஆவுஸோ, பி⁴க்கு² பச்சவேக்க²மானோ ஏவம் ஜானாதி – ‘கோத⁴னோ கோ²ம்ஹி கோத⁴ஹேது அபி⁴ஸங்கீ³’தி, தேனாவுஸோ, பி⁴க்கு²னா தேஸம்யேவ பாபகானம் அகுஸலானம் த⁴ம்மானம் பஹானாய வாயமிதப்³ப³ம். ஸசே பனாவுஸோ, பி⁴க்கு² பச்சவேக்க²மானோ ஏவம் ஜானாதி – ‘ந கோ²ம்ஹி கோத⁴னோ கோத⁴ஹேது அபி⁴ஸங்கீ³’தி, தேனாவுஸோ, பி⁴க்கு²னா தேனேவ பீதிபாமோஜ்ஜேன விஹாதப்³ப³ம் அஹோரத்தானுஸிக்கி²னா குஸலேஸு த⁴ம்மேஸு.

‘‘புன சபரம், ஆவுஸோ, பி⁴க்கு²னா அத்தனாவ அத்தானம் ஏவம் பச்சவேக்கி²தப்³ப³ம் – ‘கிம் நு கோ²ம்ஹி கோத⁴னோ கோத⁴ஸாமந்தா வாசம் நிச்சா²ரேதா’தி? ஸசே, ஆவுஸோ, பி⁴க்கு² பச்சவேக்க²மானோ ஏவம் ஜானாதி – ‘கோத⁴னோ கோ²ம்ஹி கோத⁴ஸாமந்தா வாசம் நிச்சா²ரேதா’தி, தேனாவுஸோ, பி⁴க்கு²னா தேஸம்யேவ பாபகானம் அகுஸலானம் த⁴ம்மானம் பஹானாய வாயமிதப்³ப³ம். ஸசே பனாவுஸோ, பி⁴க்கு² பச்சவேக்க²மானோ ஏவம் ஜானாதி – ‘ந கோ²ம்ஹி கோத⁴னோ கோத⁴ஸாமந்தா வாசம் நிச்சா²ரேதா’தி, தேனாவுஸோ, பி⁴க்கு²னா தேனேவ பீதிபாமோஜ்ஜேன விஹாதப்³ப³ம் அஹோரத்தானுஸிக்கி²னா குஸலேஸு த⁴ம்மேஸு.

‘‘புன சபரம், ஆவுஸோ, பி⁴க்கு²னா அத்தனாவ அத்தானம் ஏவம் பச்சவேக்கி²தப்³ப³ம் – ‘கிம் நு கோ²ம்ஹி சோதி³தோ சோத³கேன சோத³கம் படிப்ப²ராமீ’தி? ஸசே, ஆவுஸோ, பி⁴க்கு² பச்சவேக்க²மானோ ஏவம் ஜானாதி ‘சோதி³தோ கோ²ம்ஹி சோத³கேன சோத³கம் படிப்ப²ராமீ’தி, தேனாவுஸோ, பி⁴க்கு²னா தேஸம்யேவ பாபகானம் அகுஸலானம் த⁴ம்மானம் பஹானாய வாயமிதப்³ப³ம். ஸசே பனாவுஸோ, பி⁴க்கு² பச்சவேக்க²மானோ ஏவம் ஜானாதி – ‘சோதி³தோ கோ²ம்ஹி சோத³கேன சோத³கம் நப்படிப்ப²ராமீ’தி, தேனாவுஸோ, பி⁴க்கு²னா தேனேவ பீதிபாமோஜ்ஜேன விஹாதப்³ப³ம் அஹோரத்தானுஸிக்கி²னா குஸலேஸு த⁴ம்மேஸு.

‘‘புன சபரம், ஆவுஸோ, பி⁴க்கு²னா அத்தனாவ அத்தானம் ஏவம் பச்சவேக்கி²தப்³ப³ம் – ‘கிம் நு கோ²ம்ஹி சோதி³தோ சோத³கேன சோத³கம் அபஸாதே³மீ’தி? ஸசே, ஆவுஸோ, பி⁴க்கு² பச்சவேக்க²மானோ ஏவம் ஜானாதி ‘சோதி³தோ கோ²ம்ஹி சோத³கேன சோத³கம் அபஸாதே³மீ’தி, தேனாவுஸோ, பி⁴க்கு²னா தேஸம்யேவ பாபகானம் அகுஸலானம் த⁴ம்மானம் பஹானாய வாயமிதப்³ப³ம். ஸசே பனாவுஸோ, பி⁴க்கு² பச்சவேக்க²மானோ ஏவம் ஜானாதி – ‘சோதி³தோ கோ²ம்ஹி சோத³கேன சோத³கம் ந அபஸாதே³மீ’தி, தேனாவுஸோ, பி⁴க்கு²னா தேனேவ பீதிபாமோஜ்ஜேன விஹாதப்³ப³ம் அஹோரத்தானுஸிக்கி²னா குஸலேஸு த⁴ம்மேஸு.

‘‘புன சபரம், ஆவுஸோ, பி⁴க்கு²னா அத்தனாவ அத்தானம் ஏவம் பச்சவேக்கி²தப்³ப³ம் – ‘கிம் நு கோ²ம்ஹி சோதி³தோ சோத³கேன சோத³கஸ்ஸ பச்சாரோபேமீ’தி? ஸசே, ஆவுஸோ, பி⁴க்கு² பச்சவேக்க²மானோ ஏவம் ஜானாதி – ‘சோதி³தோ கோ²ம்ஹி சோத³கேன சோத³கஸ்ஸ பச்சாரோபேமீ’தி, தேனாவுஸோ, பி⁴க்கு²னா தேஸம்யேவ பாபகானம் அகுஸலானம் த⁴ம்மானம் பஹானாய வாயமிதப்³ப³ம். ஸசே பனாவுஸோ, பி⁴க்கு² பச்சவேக்க²மானோ ஏவம் ஜானாதி – ‘சோதி³தோ கோ²ம்ஹி சோத³கேன சோத³கஸ்ஸ ந பச்சாரோபேமீ’தி, தேனாவுஸோ, பி⁴க்கு²னா தேனேவ பீதிபாமோஜ்ஜேன விஹாதப்³ப³ம் அஹோரத்தானுஸிக்கி²னா குஸலேஸு த⁴ம்மேஸு.

‘‘புன சபரம், ஆவுஸோ, பி⁴க்கு²னா அத்தனாவ அத்தானம் ஏவம் பச்சவேக்கி²தப்³ப³ம் – ‘கிம் நு கோ²ம்ஹி சோதி³தோ சோத³கேன அஞ்ஞேனஞ்ஞம் படிசராமி, ப³ஹித்³தா⁴ கத²ம் அபனாமேமி, கோபஞ்ச தோ³ஸஞ்ச அப்பச்சயஞ்ச பாதுகரோமீ’தி? ஸசே, ஆவுஸோ, பி⁴க்கு² பச்சவேக்க²மானோ ஏவம் ஜானாதி – ‘சோதி³தோ கோ²ம்ஹி சோத³கேன அஞ்ஞேனஞ்ஞம் படிசராமி, ப³ஹித்³தா⁴ கத²ம் அபனாமேமி, கோபஞ்ச தோ³ஸஞ்ச அப்பச்சயஞ்ச பாதுகரோமீ’தி, தேனாவுஸோ, பி⁴க்கு²னா தேஸம்யேவ பாபகானம் அகுஸலானம் த⁴ம்மானம் பஹானாய வாயமிதப்³ப³ம். ஸசே பனாவுஸோ, பி⁴க்கு² பச்சவேக்க²மானோ ஏவம் ஜானாதி – ‘சோதி³தோ கோ²ம்ஹி சோத³கேன ந அஞ்ஞேனஞ்ஞம் படிசராமி, ந ப³ஹித்³தா⁴ கத²ம் அபனாமேமி, ந கோபஞ்ச தோ³ஸஞ்ச அப்பச்சயஞ்ச பாதுகரோமீ’தி, தேனாவுஸோ, பி⁴க்கு²னா தேனேவ பீதிபாமோஜ்ஜேன விஹாதப்³ப³ம் அஹோரத்தானுஸிக்கி²னா குஸலேஸு த⁴ம்மேஸு.

‘‘புன சபரம், ஆவுஸோ, பி⁴க்கு²னா அத்தனாவ அத்தானம் ஏவம் பச்சவேக்கி²தப்³ப³ம் – ‘கிம் நு கோ²ம்ஹி சோதி³தோ சோத³கேன அபதா³னே ந ஸம்பாயாமீ’தி? ஸசே, ஆவுஸோ, பி⁴க்கு² பச்சவேக்க²மானோ ஏவம் ஜானாதி – ‘சோதி³தோ கோ²ம்ஹி சோத³கேன அபதா³னே ந ஸம்பாயாமீ’தி, தேனாவுஸோ, பி⁴க்கு²னா தேஸம்யேவ பாபகானம் அகுஸலானம் த⁴ம்மானம் பஹானாய வாயமிதப்³ப³ம். ஸசே பனாவுஸோ, பி⁴க்கு² பச்சவேக்க²மானோ ஏவம் ஜானாதி – ‘சோதி³தோ கோ²ம்ஹி சோத³கேன அபதா³னே ஸம்பாயாமீ’தி, தேனாவுஸோ, பி⁴க்கு²னா தேனேவ பீதிபாமோஜ்ஜேன விஹாதப்³ப³ம் அஹோரத்தானுஸிக்கி²னா குஸலேஸு த⁴ம்மேஸு.

‘‘புன சபரம், ஆவுஸோ, பி⁴க்கு²னா அத்தனாவ அத்தானம் ஏவம் பச்சவேக்கி²தப்³ப³ம் – ‘கிம் நு கோ²ம்ஹி மக்கீ² பளாஸீ’தி? ஸசே, ஆவுஸோ, பி⁴க்கு² பச்சவேக்க²மானோ ஏவம் ஜானாதி – ‘மக்கீ² கோ²ம்ஹி பளாஸீ’தி, தேனாவுஸோ, பி⁴க்கு²னா தேஸம்யேவ பாபகானம் அகுஸலானம் த⁴ம்மானம் பஹானாய வாயமிதப்³ப³ம். ஸசே பனாவுஸோ, பி⁴க்கு² பச்சவேக்க²மானோ ஏவம் ஜானாதி – ‘அமக்கீ² கோ²ம்ஹி அபளாஸீ’தி, தேனாவுஸோ, பி⁴க்கு²னா தேனேவ பீதிபாமோஜ்ஜேன விஹாதப்³ப³ம் அஹோரத்தானுஸிக்கி²னா குஸலேஸு த⁴ம்மேஸு.

‘‘புன சபரம், ஆவுஸோ, பி⁴க்கு²னா அத்தனாவ அத்தானம் ஏவம் பச்சவேக்கி²தப்³ப³ம் – ‘கிம் நு கோ²ம்ஹி இஸ்ஸுகீ மச்ச²ரீ’தி? ஸசே, ஆவுஸோ, பி⁴க்கு² பச்சவேக்க²மானோ ஏவம் ஜானாதி – ‘இஸ்ஸுகீ கோ²ம்ஹி மச்ச²ரீ’தி, தேனாவுஸோ, பி⁴க்கு²னா தேஸம்யேவ பாபகானம் அகுஸலானம் த⁴ம்மானம் பஹானாய வாயமிதப்³ப³ம். ஸசே பனாவுஸோ, பி⁴க்கு² பச்சவேக்க²மானோ ஏவம் ஜானாதி – ‘அனிஸ்ஸுகீ கோ²ம்ஹி அமச்ச²ரீ’தி, தேனாவுஸோ, பி⁴க்கு²னா தேனேவ பீதிபாமோஜ்ஜேன விஹாதப்³ப³ம் அஹோரத்தானுஸிக்கி²னா குஸலேஸு த⁴ம்மேஸு.

‘‘புன சபரம், ஆவுஸோ, பி⁴க்கு²னா அத்தனாவ அத்தானம் ஏவம் பச்சவேக்கி²தப்³ப³ம் – ‘கிம் நு கோ²ம்ஹி ஸடோ² மாயாவீ’தி? ஸசே, ஆவுஸோ, பி⁴க்கு² பச்சவேக்க²மானோ ஏவம் ஜானாதி – ‘ஸடோ² கோ²ம்ஹி மாயாவீ’தி, தேனாவுஸோ, பி⁴க்கு²னா தேஸம்யேவ பாபகானம் அகுஸலானம் த⁴ம்மானம் பஹானாய வாயமிதப்³ப³ம். ஸசே பனாவுஸோ, பி⁴க்கு² பச்சவேக்க²மானோ ஏவம் ஜானாதி – ‘அஸடோ² கோ²ம்ஹி அமாயாவீ’தி, தேனாவுஸோ, பி⁴க்கு²னா தேனேவ பீதிபாமோஜ்ஜேன விஹாதப்³ப³ம் அஹோரத்தானுஸிக்கி²னா குஸலேஸு த⁴ம்மேஸு.

‘‘புன சபரம், ஆவுஸோ, பி⁴க்கு²னா அத்தனாவ அத்தானம் ஏவம் பச்சவேக்கி²தப்³ப³ம் – ‘கிம் நு கோ²ம்ஹி த²த்³தோ⁴ அதிமானீ’தி? ஸசே, ஆவுஸோ, பி⁴க்கு² பச்சவேக்க²மானோ ஏவம் ஜானாதி – ‘த²த்³தோ⁴ கோ²ம்ஹி அதிமானீ’தி, தேனாவுஸோ, பி⁴க்கு²னா தேஸம்யேவ பாபகானம் அகுஸலானம் த⁴ம்மானம் பஹானாய வாயமிதப்³ப³ம். ஸசே பனாவுஸோ, பி⁴க்கு² பச்சவேக்க²மானோ ஏவம் ஜானாதி – ‘அத்த²த்³தோ⁴ கோ²ம்ஹி அனதிமானீ’தி, தேனாவுஸோ, பி⁴க்கு²னா தேனேவ பீதிபாமோஜ்ஜேன விஹாதப்³ப³ம் அஹோரத்தானுஸிக்கி²னா குஸலேஸு த⁴ம்மேஸு.

‘‘புன சபரம், ஆவுஸோ, பி⁴க்கு²னா அத்தனாவ அத்தானம் ஏவம் பச்சவேக்கி²தப்³ப³ம் – ‘கிம் நு கோ²ம்ஹி ஸந்தி³ட்டி²பராமாஸீ ஆதா⁴னக்³கா³ஹீ து³ப்படினிஸ்ஸக்³கீ³’தி? ஸசே, ஆவுஸோ, பி⁴க்கு² பச்சவேக்க²மானோ ஏவம் ஜானாதி – ‘ஸந்தி³ட்டி²பராமாஸீ கோ²ம்ஹி ஆதா⁴னக்³கா³ஹீ து³ப்படினிஸ்ஸக்³கீ³’தி, தேனாவுஸோ, பி⁴க்கு²னா தேஸம்யேவ பாபகானம் அகுஸலானம் த⁴ம்மானம் பஹானாய வாயமிதப்³ப³ம். ஸசே பனாவுஸோ, பி⁴க்கு² பச்சவேக்க²மானோ ஏவம் ஜானாதி – ‘அஸந்தி³ட்டி²பராமாஸீ கோ²ம்ஹி அனாதா⁴னக்³கா³ஹீ ஸுப்படினிஸ்ஸக்³கீ³’தி, தேனாவுஸோ, பி⁴க்கு²னா தேனேவ பீதிபாமோஜ்ஜேன விஹாதப்³ப³ம் அஹோரத்தானுஸிக்கி²னா குஸலேஸு த⁴ம்மேஸு.

‘‘ஸசே, ஆவுஸோ, பி⁴க்கு² பச்சவேக்க²மானோ ஸப்³பே³பிமே பாபகே அகுஸலே த⁴ம்மே அப்பஹீனே அத்தனி ஸமனுபஸ்ஸதி, தேனாவுஸோ, பி⁴க்கு²னா ஸப்³பே³ஸம்யேவ இமேஸம் பாபகானம் அகுஸலானம் த⁴ம்மானம் பஹானாய வாயமிதப்³ப³ம். ஸசே பனாவுஸோ, பி⁴க்கு² பச்சவேக்க²மானோ ஸப்³பே³பிமே பாபகே அகுஸலே த⁴ம்மே பஹீனே அத்தனி ஸமனுபஸ்ஸதி, தேனாவுஸோ, பி⁴க்கு²னா தேனேவ பீதிபாமோஜ்ஜேன விஹாதப்³ப³ம், அஹோரத்தானுஸிக்கி²னா குஸலேஸு த⁴ம்மேஸு.

‘‘ஸேய்யதா²பி, ஆவுஸோ, இத்தீ² வா புரிஸோ வா, த³ஹரோ யுவா மண்ட³னஜாதிகோ, ஆதா³ஸே வா பரிஸுத்³தே⁴ பரியோதா³தே, அச்சே² வா உத³கபத்தே, ஸகம் முக²னிமித்தம் பச்சவேக்க²மானோ, ஸசே தத்த² பஸ்ஸதி ரஜம் வா அங்க³ணம் வா, தஸ்ஸேவ ரஜஸ்ஸ வா அங்க³ணஸ்ஸ வா பஹானாய வாயமதி; நோ சே தத்த² பஸ்ஸதி ரஜம் வா அங்க³ணம் வா, தேனேவ அத்தமனோ ஹோதி – ‘லாபா⁴ வத மே, பரிஸுத்³த⁴ம் வத மே’தி. ஏவமேவ கோ², ஆவுஸோ, ஸசே பி⁴க்கு² பச்சவேக்க²மானோ ஸப்³பே³பிமே பாபகே அகுஸலே த⁴ம்மே அப்பஹீனே அத்தனி ஸமனுபஸ்ஸதி, தேனாவுஸோ, பி⁴க்கு²னா ஸப்³பே³ஸம்யேவ இமேஸம் பாபகானம் அகுஸலானம் த⁴ம்மானம் பஹானாய வாயமிதப்³ப³ம். ஸசே பனாவுஸோ, பி⁴க்கு² பச்சவேக்க²மானோ ஸப்³பே³பிமே பாபகே அகுஸலே த⁴ம்மே பஹீனே அத்தனி ஸமனுபஸ்ஸதி, தேனாவுஸோ, பி⁴க்கு²னா தேனேவ பீதிபாமோஜ்ஜேன விஹாதப்³ப³ம், அஹோரத்தானுஸிக்கி²னா குஸலேஸு த⁴ம்மேஸூ’’தி.

இத³மவோசாயஸ்மா மஹாமோக்³க³ல்லானோ. அத்தமனா தே பி⁴க்கூ² ஆயஸ்மதோ மஹாமோக்³க³ல்லானஸ்ஸ பா⁴ஸிதம் அபி⁴னந்து³ந்தி.

அனுமானஸுத்தம் நிட்டி²தம் பஞ்சமம்.