6. சேதோகி²லஸுத்தம்

185. ஏவம் மே ஸுதம் – ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி. ‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸும். ப⁴க³வா ஏதத³வோச –

‘‘யஸ்ஸ கஸ்ஸசி, பி⁴க்க²வே, பி⁴க்கு²னோ பஞ்ச சேதோகி²லா அப்பஹீனா, பஞ்ச சேதஸோவினிப³ந்தா⁴ [சேதஸோவினிப³த்³தா⁴ (ஸீ.), சேதோவினிப³த்³தா⁴ (ஸாரத்த²தீ³பனீடீகா)] அஸமுச்சி²ன்னா, ஸோ வதிமஸ்மிம் த⁴ம்மவினயே வுத்³தி⁴ம் விரூள்ஹிம் வேபுல்லம் ஆபஜ்ஜிஸ்ஸதீதி – நேதம் டா²னம் விஜ்ஜதி.

‘‘கதமாஸ்ஸ பஞ்ச சேதோகி²லா அப்பஹீனா ஹோந்தி? இத⁴, பி⁴க்க²வே, பி⁴க்கு² ஸத்த²ரி கங்க²தி விசிகிச்ச²தி நாதி⁴முச்சதி ந ஸம்பஸீத³தி. யோ ஸோ, பி⁴க்க²வே, பி⁴க்கு² ஸத்த²ரி கங்க²தி விசிகிச்ச²தி நாதி⁴முச்சதி ந ஸம்பஸீத³தி தஸ்ஸ சித்தம் ந நமதி ஆதப்பாய அனுயோகா³ய ஸாதச்சாய பதா⁴னாய. யஸ்ஸ சித்தம் ந நமதி ஆதப்பாய அனுயோகா³ய ஸாதச்சாய பதா⁴னாய, ஏவமஸ்ஸாயம் பட²மோ சேதோகி²லோ அப்பஹீனோ ஹோதி.

‘‘புன சபரம், பி⁴க்க²வே, பி⁴க்கு² த⁴ம்மே கங்க²தி விசிகிச்ச²தி நாதி⁴முச்சதி ந ஸம்பஸீத³தி…பே… ஏவமஸ்ஸாயம் து³தியோ சேதோகி²லோ அப்பஹீனோ ஹோதி.

‘‘புன சபரம், பி⁴க்க²வே, பி⁴க்கு² ஸங்கே⁴ கங்க²தி விசிகிச்ச²தி நாதி⁴முச்சதி ந ஸம்பஸீத³தி…பே… ஏவமஸ்ஸாயம் ததியோ சேதோகி²லோ அப்பஹீனோ ஹோதி.

‘‘புன சபரம், பி⁴க்க²வே, பி⁴க்கு² ஸிக்கா²ய கங்க²தி விசிகிச்ச²தி நாதி⁴முச்சதி ந ஸம்பஸீத³தி. யோ ஸோ, பி⁴க்க²வே, பி⁴க்கு² ஸிக்கா²ய கங்க²தி விசிகிச்ச²தி நாதி⁴முச்சதி ந ஸம்பஸீத³தி, தஸ்ஸ சித்தம் ந நமதி ஆதப்பாய அனுயோகா³ய ஸாதச்சாய பதா⁴னாய. யஸ்ஸ சித்தம் ந நமதி ஆதப்பாய அனுயோகா³ய ஸாதச்சாய பதா⁴னாய, ஏவமஸ்ஸாயம் சதுத்தோ² சேதோகி²லோ அப்பஹீனோ ஹோதி.

‘‘புன சபரம், பி⁴க்க²வே, பி⁴க்கு² ஸப்³ரஹ்மசாரீஸு குபிதோ ஹோதி அனத்தமனோ ஆஹதசித்தோ கி²லஜாதோ. யோ ஸோ, பி⁴க்க²வே, பி⁴க்கு² ஸப்³ரஹ்மசாரீஸு குபிதோ ஹோதி அனத்தமனோ ஆஹதசித்தோ கி²லஜாதோ, தஸ்ஸ சித்தம் ந நமதி ஆதப்பாய அனுயோகா³ய ஸாதச்சாய பதா⁴னாய. யஸ்ஸ சித்தம் ந நமதி ஆதப்பாய அனுயோகா³ய ஸாதச்சாய பதா⁴னாய, ஏவமஸ்ஸாயம் பஞ்சமோ சேதோகி²லோ அப்பஹீனோ ஹோதி. இமாஸ்ஸ பஞ்ச சேதோகி²லா அப்பஹீனா ஹோந்தி.

186. ‘‘கதமாஸ்ஸ பஞ்ச சேதஸோவினிப³ந்தா⁴ அஸமுச்சி²ன்னா ஹோந்தி? இத⁴, பி⁴க்க²வே, பி⁴க்கு² காமே அவீதராகோ³ [அவிக³தராகோ³ (கத்த²சி)] ஹோதி அவிக³தச்ச²ந்தோ³ அவிக³தபேமோ அவிக³தபிபாஸோ அவிக³தபரிளாஹோ அவிக³ததண்ஹோ. யோ ஸோ, பி⁴க்க²வே, பி⁴க்கு² காமே அவீதராகோ³ ஹோதி அவிக³தச்ச²ந்தோ³ அவிக³தபேமோ அவிக³தபிபாஸோ அவிக³தபரிளாஹோ அவிக³ததண்ஹோ, தஸ்ஸ சித்தம் ந நமதி ஆதப்பாய அனுயோகா³ய ஸாதச்சாய பதா⁴னாய. யஸ்ஸ சித்தம் ந நமதி ஆதப்பாய அனுயோகா³ய ஸாதச்சாய பதா⁴னாய, ஏவமஸ்ஸாயம் பட²மோ சேதஸோவினிப³ந்தோ⁴ அஸமுச்சி²ன்னோ ஹோதி.

‘‘புன சபரம், பி⁴க்க²வே, பி⁴க்கு² காயே அவீதராகோ³ ஹோதி…பே… ஏவமஸ்ஸாயம் து³தியோ சேதஸோவினிப³ந்தோ⁴ அஸமுச்சி²ன்னோ ஹோதி.

‘‘புன சபரம், பி⁴க்க²வே, பி⁴க்கு² ரூபே அவீதராகோ³ ஹோதி…பே… ஏவமஸ்ஸாயம் ததியோ சேதஸோவினிப³ந்தோ⁴ அஸமுச்சி²ன்னோ ஹோதி.

‘‘புன சபரம், பி⁴க்க²வே, பி⁴க்கு² யாவத³த்த²ம் உத³ராவதே³ஹகம் பு⁴ஞ்ஜித்வா ஸேய்யஸுக²ம் பஸ்ஸஸுக²ம் மித்³த⁴ஸுக²ம் அனுயுத்தோ விஹரதி. யோ ஸோ, பி⁴க்க²வே, பி⁴க்கு² யாவத³த்த²ம் உத³ராவதே³ஹகம் பு⁴ஞ்ஜித்வா ஸேய்யஸுக²ம் பஸ்ஸஸுக²ம் மித்³த⁴ஸுக²ம் அனுயுத்தோ விஹரதி, தஸ்ஸ சித்தம் ந நமதி ஆதப்பாய அனுயோகா³ய ஸாதச்சாய பதா⁴னாய. யஸ்ஸ சித்தம் ந நமதி ஆதப்பாய அனுயோகா³ய ஸாதச்சாய பதா⁴னாய, ஏவமஸ்ஸாயம் சதுத்தோ² சேதஸோவினிப³ந்தோ⁴ அஸமுச்சி²ன்னோ ஹோதி.

‘‘புன சபரம், பி⁴க்க²வே, பி⁴க்கு² அஞ்ஞதரம் தே³வனிகாயம் பணிதா⁴ய ப்³ரஹ்மசரியம் சரதி – ‘இமினாஹம் ஸீலேன வா வதேன வா தபேன வா ப்³ரஹ்மசரியேன வா தே³வோ வா ப⁴விஸ்ஸாமி தே³வஞ்ஞதரோ வா’தி. யோ ஸோ, பி⁴க்க²வே, பி⁴க்கு² அஞ்ஞதரம் தே³வனிகாயம் பணிதா⁴ய ப்³ரஹ்மசரியம் சரதி – ‘இமினாஹம் ஸீலேன வா வதேன வா தபேன வா ப்³ரஹ்மசரியேன வா தே³வோ வா ப⁴விஸ்ஸாமி தே³வஞ்ஞதரோ வா’தி, தஸ்ஸ சித்தம் ந நமதி ஆதப்பாய அனுயோகா³ய ஸாதச்சாய பதா⁴னாய. யஸ்ஸ சித்தம் ந நமதி ஆதப்பாய அனுயோகா³ய ஸாதச்சாய பதா⁴னாய, ஏவமஸ்ஸாயம் பஞ்சமோ சேதஸோவினிப³ந்தோ⁴ அஸமுச்சி²ன்னோ ஹோதி. இமாஸ்ஸ பஞ்ச சேதஸோவினிப³ந்தா⁴ அஸமுச்சி²ன்னா ஹோந்தி.

‘‘யஸ்ஸ கஸ்ஸசி, பி⁴க்க²வே, பி⁴க்கு²னோ இமே பஞ்ச சேதோகி²லா அப்பஹீனா, இமே பஞ்ச சேதஸோவினிப³ந்தா⁴ அஸமுச்சி²ன்னா, ஸோ வதிமஸ்மிம் த⁴ம்மவினயே வுத்³தி⁴ம் விரூள்ஹிம் வேபுல்லம் ஆபஜ்ஜிஸ்ஸதீதி – நேதம் டா²னம் விஜ்ஜதி.

187. ‘‘யஸ்ஸ கஸ்ஸசி, பி⁴க்க²வே, பி⁴க்கு²னோ பஞ்ச சேதோகி²லா பஹீனா, பஞ்ச சேதஸோவினிப³ந்தா⁴ ஸுஸமுச்சி²ன்னா, ஸோ வதிமஸ்மிம் த⁴ம்மவினயே வுத்³தி⁴ம் விரூள்ஹிம் வேபுல்லம் ஆபஜ்ஜிஸ்ஸதீதி – டா²னமேதம் விஜ்ஜதி.

‘‘கதமாஸ்ஸ பஞ்ச சேதோகி²லா பஹீனா ஹோந்தி? இத⁴, பி⁴க்க²வே, பி⁴க்கு² ஸத்த²ரி ந கங்க²தி ந விசிகிச்ச²தி அதி⁴முச்சதி ஸம்பஸீத³தி. யோ ஸோ, பி⁴க்க²வே, பி⁴க்கு² ஸத்த²ரி ந கங்க²தி ந விசிகிச்ச²தி அதி⁴முச்சதி ஸம்பஸீத³தி, தஸ்ஸ சித்தம் நமதி ஆதப்பாய அனுயோகா³ய ஸாதச்சாய பதா⁴னாய. யஸ்ஸ சித்தம் நமதி ஆதப்பாய அனுயோகா³ய ஸாதச்சாய பதா⁴னாய, ஏவமஸ்ஸாயம் பட²மோ சேதோகி²லோ பஹீனோ ஹோதி.

‘‘புன சபரம், பி⁴க்க²வே, பி⁴க்கு² த⁴ம்மே ந கங்க²தி ந விசிகிச்ச²தி அதி⁴முச்சதி ஸம்பஸீத³தி…பே… ஏவமஸ்ஸாயம் து³தியோ சேதோகி²லோ பஹீனோ ஹோதி.

‘‘புன சபரம், பி⁴க்க²வே, பி⁴க்கு² ஸங்கே⁴ ந கங்க²தி ந விசிகிச்ச²தி அதி⁴முச்சதி ஸம்பஸீத³தி…பே… ஏவமஸ்ஸாயம் ததியோ சேதோகி²லோ பஹீனோ ஹோதி.

‘‘புன சபரம், பி⁴க்க²வே, பி⁴க்கு² ஸிக்கா²ய ந கங்க²தி ந விசிகிச்ச²தி அதி⁴முச்சதி ஸம்பஸீத³தி…பே… ஏவமஸ்ஸாயம் சதுத்தோ² சேதோகி²லோ பஹீனோ ஹோதி.

‘‘புன சபரம், பி⁴க்க²வே, பி⁴க்கு² ஸப்³ரஹ்மசாரீஸு ந குபிதோ ஹோதி ந அனத்தமனோ [அத்தமனோ (ஸீ. பீ.)] அனாஹதசித்தோ அகி²லஜாதோ. யோ ஸோ, பி⁴க்க²வே, பி⁴க்கு² ஸப்³ரஹ்மசாரீஸு ந குபிதோ ஹோதி ந அனத்தமனோ அனாஹதசித்தோ அகி²லஜாதோ, தஸ்ஸ சித்தம் நமதி ஆதப்பாய அனுயோகா³ய ஸாதச்சாய பதா⁴னாய. யஸ்ஸ சித்தம் நமதி ஆதப்பாய அனுயோகா³ய ஸாதச்சாய பதா⁴னாய, ஏவமஸ்ஸாயம் பஞ்சமோ சேதோகி²லோ பஹீனோ ஹோதி. இமாஸ்ஸ பஞ்ச சேதோகி²லா பஹீனா ஹோந்தி.

188. ‘‘கதமாஸ்ஸ பஞ்ச சேதஸோவினிப³ந்தா⁴ ஸுஸமுச்சி²ன்னா ஹோந்தி? இத⁴, பி⁴க்க²வே, பி⁴க்கு² காமே வீதராகோ³ ஹோதி விக³தச்ச²ந்தோ³ விக³தபேமோ விக³தபிபாஸோ விக³தபரிளாஹோ விக³ததண்ஹோ. யோ ஸோ, பி⁴க்க²வே, பி⁴க்கு² காமே வீதராகோ³ ஹோதி விக³தச்ச²ந்தோ³ விக³தபேமோ விக³தபிபாஸோ விக³தபரிளாஹோ விக³ததண்ஹோ, தஸ்ஸ சித்தம் நமதி ஆதப்பாய அனுயோகா³ய ஸாதச்சாய பதா⁴னாய. யஸ்ஸ சித்தம் நமதி ஆதப்பாய அனுயோகா³ய ஸாதச்சாய பதா⁴னாய, ஏவமஸ்ஸாயம் பட²மோ சேதஸோவினிப³ந்தோ⁴ ஸுஸமுச்சி²ன்னோ ஹோதி.

‘‘புன சபரம், பி⁴க்க²வே, பி⁴க்கு² காயே வீதராகோ³ ஹோதி…பே… ரூபே வீதராகோ³ ஹோதி…பே… ந யாவத³த்த²ம் உத³ராவதே³ஹகம் பு⁴ஞ்ஜித்வா ஸேய்யஸுக²ம் பஸ்ஸஸுக²ம் மித்³த⁴ஸுக²ம் அனுயுத்தோ விஹரதி. யோ ஸோ, பி⁴க்க²வே, பி⁴க்கு² ந யாவத³த்த²ம் உத³ராவதே³ஹகம் பு⁴ஞ்ஜித்வா ஸேய்யஸுக²ம் பஸ்ஸஸுக²ம் மித்³த⁴ஸுக²ம் அனுயுத்தோ விஹரதி, தஸ்ஸ சித்தம் நமதி ஆதப்பாய அனுயோகா³ய ஸாதச்சாய பதா⁴னாய. யஸ்ஸ சித்தம் நமதி ஆதப்பாய அனுயோகா³ய ஸாதச்சாய பதா⁴னாய, ஏவமஸ்ஸாயம் சதுத்தோ² சேதஸோவினிப³ந்தோ⁴ ஸுஸமுச்சி²ன்னோ ஹோதி.

‘‘புன சபரம், பி⁴க்க²வே, பி⁴க்கு² ந அஞ்ஞதரம் தே³வனிகாயம் பணிதா⁴ய ப்³ரஹ்மசரியம் சரதி – ‘இமினாஹம் ஸீலேன வா வதேன வா தபேன வா ப்³ரஹ்மசரியேன வா தே³வோ வா ப⁴விஸ்ஸாமி தே³வஞ்ஞதரோ வா’தி. யோ ஸோ, பி⁴க்க²வே, பி⁴க்கு² ந அஞ்ஞதரம் தே³வனிகாயம் பணிதா⁴ய ப்³ரஹ்மசரியம் சரதி – ‘இமினாஹம் ஸீலேன வா வதேன வா தபேன வா ப்³ரஹ்மசரியேன வா தே³வோ வா ப⁴விஸ்ஸாமி தே³வஞ்ஞதரோ வா’தி, தஸ்ஸ சித்தம் நமதி ஆதப்பாய அனுயோகா³ய ஸாதச்சாய பதா⁴னாய. யஸ்ஸ சித்தம் நமதி ஆதப்பாய அனுயோகா³ய ஸாதச்சாய பதா⁴னாய, ஏவமஸ்ஸாயம் பஞ்சமோ சேதஸோவினிப³ந்தோ⁴ ஸுஸமுச்சி²ன்னோ ஹோதி. இமாஸ்ஸ பஞ்ச சேதஸோவினிப³ந்தா⁴ ஸுஸமுச்சி²ன்னா ஹோந்தி.

‘‘யஸ்ஸ கஸ்ஸசி, பி⁴க்க²வே, பி⁴க்கு²னோ இமே பஞ்ச சேதோகி²லா பஹீனா, இமே பஞ்ச சேதஸோவினிப³ந்தா⁴ ஸுஸமுச்சி²ன்னா, ஸோ வதிமஸ்மிம் த⁴ம்மவினயே வுத்³தி⁴ம் விரூள்ஹிம் வேபுல்லம் ஆபஜ்ஜிஸ்ஸதீதி – டா²னமேதம் விஜ்ஜதி.

189. ‘‘ஸோ ச²ந்த³ஸமாதி⁴பதா⁴னஸங்கா²ரஸமன்னாக³தம் இத்³தி⁴பாத³ம் பா⁴வேதி, வீரியஸமாதி⁴பதா⁴னஸங்கா²ரஸமன்னாக³தம் இத்³தி⁴பாத³ம் பா⁴வேதி, சித்தஸமாதி⁴பதா⁴னஸங்கா²ரஸமன்னாக³தம் இத்³தி⁴பாத³ம் பா⁴வேதி, வீமம்ஸாஸமாதி⁴பதா⁴னஸங்கா²ரஸமன்னாக³தம் இத்³தி⁴பாத³ம் பா⁴வேதி, உஸ்ஸோள்ஹீயேவ பஞ்சமீ. ஸ கோ² ஸோ, பி⁴க்க²வே, ஏவம் உஸ்ஸோள்ஹீபன்னரஸங்க³ஸமன்னாக³தோ பி⁴க்கு² ப⁴ப்³போ³ அபி⁴னிப்³பி³தா³ய, ப⁴ப்³போ³ ஸம்போ³தா⁴ய, ப⁴ப்³போ³ அனுத்தரஸ்ஸ யோக³க்கே²மஸ்ஸ அதி⁴க³மாய. ஸேய்யதா²பி, பி⁴க்க²வே, குக்குடியா அண்டா³னி அட்ட² வா த³ஸ வா த்³வாத³ஸ வா. தானஸ்ஸு குக்குடியா ஸம்மா அதி⁴ஸயிதானி ஸம்மா பரிஸேதி³தானி ஸம்மா பரிபா⁴விதானி. கிஞ்சாபி தஸ்ஸா குக்குடியா ந ஏவம் இச்சா² உப்பஜ்ஜேய்ய – ‘அஹோ வதிமே குக்குடபோதகா பாத³னக²ஸிகா²ய வா முக²துண்ட³கேன வா அண்ட³கோஸம் பதா³லேத்வா ஸோத்தி²னா அபி⁴னிப்³பி⁴ஜ்ஜேய்யு’ந்தி. அத² கோ² ப⁴ப்³பா³வ தே குக்குடபோதகா பாத³னக²ஸிகா²ய வா முக²துண்ட³கேன வா அண்ட³கோஸம் பதா³லேத்வா ஸோத்தி²னா அபி⁴னிப்³பி⁴ஜ்ஜிதும். ஏவமேவ கோ², பி⁴க்க²வே, ஏவம் உஸ்ஸோள்ஹிபன்னரஸங்க³ஸமன்னாக³தோ பி⁴க்கு² ப⁴ப்³போ³ அபி⁴னிப்³பி³தா³ய, ப⁴ப்³போ³ ஸம்போ³தா⁴ய, ப⁴ப்³போ³ அனுத்தரஸ்ஸ யோக³க்கே²மஸ்ஸ அதி⁴க³மாயா’’தி.

இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதம் அபி⁴னந்து³ந்தி.

சேதோகி²லஸுத்தம் நிட்டி²தம் ச²ட்ட²ம்.