10. விதக்கஸண்டா²னஸுத்தம்

216. ஏவம் மே ஸுதம் – ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி. ‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸும். ப⁴க³வா ஏதத³வோச –

‘‘அதி⁴சித்தமனுயுத்தேன, பி⁴க்க²வே, பி⁴க்கு²னா பஞ்ச நிமித்தானி காலேன காலம் மனஸி காதப்³பா³னி. கதமானி பஞ்ச? இத⁴, பி⁴க்க²வே, பி⁴க்கு²னோ யம் நிமித்தம் ஆக³ம்ம யம் நிமித்தம் மனஸிகரோதோ உப்பஜ்ஜந்தி பாபகா அகுஸலா விதக்கா ச²ந்தூ³பஸம்ஹிதாபி தோ³ஸூபஸம்ஹிதாபி மோஹூபஸம்ஹிதாபி, தேன, பி⁴க்க²வே, பி⁴க்கு²னா தம்ஹா நிமித்தா அஞ்ஞம் நிமித்தம் மனஸி காதப்³ப³ம் குஸலூபஸம்ஹிதம். தஸ்ஸ தம்ஹா நிமித்தா அஞ்ஞம் நிமித்தம் மனஸிகரோதோ குஸலூபஸம்ஹிதம் யே பாபகா அகுஸலா விதக்கா ச²ந்தூ³பஸம்ஹிதாபி தோ³ஸூபஸம்ஹிதாபி மோஹூபஸம்ஹிதாபி தே பஹீயந்தி தே அப்³ப⁴த்த²ம் க³ச்ச²ந்தி. தேஸம் பஹானா அஜ்ஜ²த்தமேவ சித்தம் ஸந்திட்ட²தி ஸன்னிஸீத³தி ஏகோதி³ ஹோதி [ஏகோதி³போ⁴தி (ஸ்யா. க.)] ஸமாதி⁴யதி. ஸேய்யதா²பி, பி⁴க்க²வே, த³க்கோ² பலக³ண்டோ³ வா பலக³ண்ட³ந்தேவாஸீ வா ஸுகு²மாய ஆணியா ஓளாரிகம் ஆணிம் அபி⁴னிஹனேய்ய அபி⁴னீஹரேய்ய அபி⁴னிவத்தேய்ய [அபி⁴னிவஜ்ஜேய்ய (ஸீ. பீ.)]; ஏவமேவ கோ², பி⁴க்க²வே, பி⁴க்கு²னோ யம் நிமித்தம் ஆக³ம்ம யம் நிமித்தம் மனஸிகரோதோ உப்பஜ்ஜந்தி பாபகா அகுஸலா விதக்கா ச²ந்தூ³பஸம்ஹிதாபி தோ³ஸூபஸம்ஹிதாபி மோஹூபஸம்ஹிதாபி, தேன, பி⁴க்க²வே, பி⁴க்கு²னா தம்ஹா நிமித்தா அஞ்ஞம் நிமித்தம் மனஸி காதப்³ப³ம் குஸலூபஸம்ஹிதம். தஸ்ஸ தம்ஹா நிமித்தா அஞ்ஞம் நிமித்தம் மனஸிகரோதோ குஸலூபஸம்ஹிதம் யே பாபகா அகுஸலா விதக்கா ச²ந்தூ³பஸம்ஹிதாபி தோ³ஸூபஸம்ஹிதாபி மோஹூபஸம்ஹிதாபி தே பஹீயந்தி தே அப்³ப⁴த்த²ம் க³ச்ச²ந்தி. தேஸம் பஹானா அஜ்ஜ²த்தமேவ சித்தம் ஸந்திட்ட²தி ஸன்னிஸீத³தி ஏகோதி³ ஹோதி ஸமாதி⁴யதி.

217. ‘‘தஸ்ஸ சே, பி⁴க்க²வே, பி⁴க்கு²னோ தம்ஹா நிமித்தா அஞ்ஞம் நிமித்தம் மனஸிகரோதோ குஸலூபஸம்ஹிதம் உப்பஜ்ஜந்தேவ பாபகா அகுஸலா விதக்கா ச²ந்தூ³பஸம்ஹிதாபி தோ³ஸூபஸம்ஹிதாபி மோஹூபஸம்ஹிதாபி, தேன, பி⁴க்க²வே, பி⁴க்கு²னா தேஸம் விதக்கானம் ஆதீ³னவோ உபபரிக்கி²தப்³போ³ – ‘இதிபிமே விதக்கா அகுஸலா, இதிபிமே விதக்கா ஸாவஜ்ஜா, இதிபிமே விதக்கா து³க்க²விபாகா’தி. தஸ்ஸ தேஸம் விதக்கானம் ஆதீ³னவம் உபபரிக்க²தோ யே பாபகா அகுஸலா விதக்கா ச²ந்தூ³பஸம்ஹிதாபி தோ³ஸூபஸம்ஹிதாபி மோஹூபஸம்ஹிதாபி தே பஹீயந்தி தே அப்³ப⁴த்த²ம் க³ச்ச²ந்தி. தேஸம் பஹானா அஜ்ஜ²த்தமேவ சித்தம் ஸந்திட்ட²தி ஸன்னிஸீத³தி ஏகோதி³ ஹோதி ஸமாதி⁴யதி. ஸேய்யதா²பி, பி⁴க்க²வே, இத்தீ² வா புரிஸோ வா த³ஹரோ யுவா மண்ட³னகஜாதிகோ அஹிகுணபேன வா குக்குரகுணபேன வா மனுஸ்ஸகுணபேன வா கண்டே² ஆஸத்தேன அட்டியேய்ய ஹராயேய்ய ஜிகு³ச்சே²ய்ய; ஏவமேவ கோ², பி⁴க்க²வே, தஸ்ஸ சே பி⁴க்கு²னோ தம்ஹாபி நிமித்தா அஞ்ஞம் நிமித்தம் மனஸிகரோதோ குஸலூபஸம்ஹிதம் உப்பஜ்ஜந்தேவ பாபகா அகுஸலா விதக்கா ச²ந்தூ³பஸம்ஹிதாபி தோ³ஸூபஸம்ஹிதாபி மோஹூபஸம்ஹிதாபி, தேன, பி⁴க்க²வே, பி⁴க்கு²னா தேஸம் விதக்கானம் ஆதீ³னவோ உபபரிக்கி²தப்³போ³ – ‘இதிபிமே விதக்கா அகுஸலா, இதிபிமே விதக்கா ஸாவஜ்ஜா, இதிபிமே விதக்கா து³க்க²விபாகா’தி. தஸ்ஸ தேஸம் விதக்கானம் ஆதீ³னவம் உபபரிக்க²தோ யே பாபகா அகுஸலா விதக்கா ச²ந்தூ³பஸம்ஹிதாபி தோ³ஸூபஸம்ஹிதாபி மோஹூபஸம்ஹிதாபி தே பஹீயந்தி தே அப்³ப⁴த்த²ம் க³ச்ச²ந்தி. தேஸம் பஹானா அஜ்ஜ²த்தமேவ சித்தம் ஸந்திட்ட²தி ஸன்னிஸீத³தி ஏகோதி³ ஹோதி ஸமாதி⁴யதி.

218. ‘‘தஸ்ஸ சே, பி⁴க்க²வே, பி⁴க்கு²னோ தேஸம்பி விதக்கானம் ஆதீ³னவம் உபபரிக்க²தோ உப்பஜ்ஜந்தேவ பாபகா அகுஸலா விதக்கா ச²ந்தூ³பஸம்ஹிதாபி தோ³ஸூபஸம்ஹிதாபி மோஹூபஸம்ஹிதாபி, தேன, பி⁴க்க²வே, பி⁴க்கு²னா தேஸம் விதக்கானம் அஸதிஅமனஸிகாரோ ஆபஜ்ஜிதப்³போ³. தஸ்ஸ தேஸம் விதக்கானம் அஸதிஅமனஸிகாரம் ஆபஜ்ஜதோ யே பாபகா அகுஸலா விதக்கா ச²ந்தூ³பஸம்ஹிதாபி தோ³ஸூபஸம்ஹிதாபி மோஹூபஸம்ஹிதாபி தே பஹீயந்தி தே அப்³ப⁴த்த²ம் க³ச்ச²ந்தி. தேஸம் பஹானா அஜ்ஜ²த்தமேவ சித்தம் ஸந்திட்ட²தி ஸன்னிஸீத³தி ஏகோதி³ ஹோதி ஸமாதி⁴யதி. ஸேய்யதா²பி, பி⁴க்க²வே, சக்கு²மா புரிஸோ ஆபாத²க³தானம் ரூபானம் அத³ஸ்ஸனகாமோ அஸ்ஸ; ஸோ நிமீலேய்ய வா அஞ்ஞேன வா அபலோகேய்ய. ஏவமேவ கோ², பி⁴க்க²வே, தஸ்ஸ சே பி⁴க்கு²னோ தேஸம்பி விதக்கானம் ஆதீ³னவம் உபபரிக்க²தோ உப்பஜ்ஜந்தேவ பாபகா அகுஸலா விதக்கா ச²ந்தூ³பஸம்ஹிதாபி தோ³ஸூபஸம்ஹிதாபி மோஹூபஸம்ஹிதாபி, தே பஹீயந்தி தே அப்³ப⁴த்த²ம் க³ச்ச²ந்தி. தேஸம் பஹானா அஜ்ஜ²த்தமேவ சித்தம் ஸந்திட்ட²தி ஸன்னிஸீத³தி ஏகோதி³ ஹோதி ஸமாதி⁴யதி.

219. ‘‘தஸ்ஸ சே, பி⁴க்க²வே, பி⁴க்கு²னோ தேஸம்பி விதக்கானம் அஸதிஅமனஸிகாரம் ஆபஜ்ஜதோ உப்பஜ்ஜந்தேவ பாபகா அகுஸலா விதக்கா ச²ந்தூ³பஸம்ஹிதாபி தோ³ஸூபஸம்ஹிதாபி மோஹூபஸம்ஹிதாபி, தேன, பி⁴க்க²வே, பி⁴க்கு²னா தேஸம் விதக்கானம் விதக்கஸங்கா²ரஸண்டா²னம் மனஸிகாதப்³ப³ம். தஸ்ஸ தேஸம் விதக்கானம் விதக்கஸங்கா²ரஸண்டா²னம் மனஸிகரோதோ யே பாபகா அகுஸலா விதக்கா ச²ந்தூ³பஸம்ஹிதாபி தோ³ஸூபஸம்ஹிதாபி மோஹூபஸம்ஹிதாபி தே பஹீயந்தி தே அப்³ப⁴த்த²ம் க³ச்ச²ந்தி. தேஸம் பஹானா அஜ்ஜ²த்தமேவ சித்தம் ஸந்திட்ட²தி ஸன்னிஸீத³தி ஏகோதி³ ஹோதி ஸமாதி⁴யதி. ஸேய்யதா²பி, பி⁴க்க²வே, புரிஸோ ஸீக⁴ம் க³ச்சே²ய்ய. தஸ்ஸ ஏவமஸ்ஸ – ‘கிம் நு கோ² அஹம் ஸீக⁴ம் க³ச்சா²மி? யம்னூனாஹம் ஸணிகம் க³ச்சே²ய்ய’ந்தி. ஸோ ஸணிகம் க³ச்சே²ய்ய. தஸ்ஸ ஏவமஸ்ஸ – ‘கிம் நு கோ² அஹம் ஸணிகம் க³ச்சா²மி? யம்னூனாஹம் திட்டே²ய்ய’ந்தி. ஸோ திட்டே²ய்ய. தஸ்ஸ ஏவமஸ்ஸ – ‘கிம் நு கோ² அஹம் டி²தோ? யம்னூனாஹம் நிஸீதே³ய்ய’ந்தி. ஸோ நிஸீதே³ய்ய. தஸ்ஸ ஏவமஸ்ஸ – ‘கிம் நு கோ² அஹம் நிஸின்னோ? யம்னூனாஹம் நிபஜ்ஜேய்ய’ந்தி. ஸோ நிபஜ்ஜேய்ய. ஏவஞ்ஹி ஸோ, பி⁴க்க²வே, புரிஸோ ஓளாரிகம் ஓளாரிகம் இரியாபத²ம் அபி⁴னிவஜ்ஜேத்வா [அபி⁴னிஸ்ஸஜ்ஜேத்வா (ஸ்யா.)] ஸுகு²மம் ஸுகு²மம் இரியாபத²ம் கப்பேய்ய. ஏவமேவ கோ², பி⁴க்க²வே, தஸ்ஸ சே பி⁴க்கு²னோ தேஸம்பி விதக்கானம் அஸதிஅமனஸிகாரம் ஆபஜ்ஜதோ உப்பஜ்ஜந்தேவ பாபகா அகுஸலா விதக்கா ச²ந்தூ³பஸம்ஹிதாபி தோ³ஸூபஸம்ஹிதாபி மோஹூபஸம்ஹிதாபி தே பஹீயந்தி தே அப்³ப⁴த்த²ம் க³ச்ச²ந்தி. தேஸம் பஹானா அஜ்ஜ²த்தமேவ சித்தம் ஸந்திட்ட²தி ஸன்னிஸீத³தி ஏகோதி³ ஹோதி ஸமாதி⁴யதி.

220. ‘‘தஸ்ஸ சே, பி⁴க்க²வே, பி⁴க்கு²னோ தேஸம்பி விதக்கானம் விதக்கஸங்கா²ரஸண்டா²னம் மனஸிகரோதோ உப்பஜ்ஜந்தேவ பாபகா அகுஸலா விதக்கா ச²ந்தூ³பஸம்ஹிதாபி தோ³ஸூபஸம்ஹிதாபி மோஹூபஸம்ஹிதாபி. தேன, பி⁴க்க²வே, பி⁴க்கு²னா த³ந்தேபி⁴த³ந்தமாதா⁴ய [த³ந்தே + அபி⁴த³ந்தம் + ஆதா⁴யாதி டீகாயம் பத³ச்சே²தோ³, த³ந்தேபீ⁴தி பனேத்த² கரணத்தோ² யுத்தோ விய தி³ஸ்ஸதி] ஜிவ்ஹாய தாலும் ஆஹச்ச சேதஸா சித்தம் அபி⁴னிக்³க³ண்ஹிதப்³ப³ம் அபி⁴னிப்பீளேதப்³ப³ம் அபி⁴ஸந்தாபேதப்³ப³ம். தஸ்ஸ த³ந்தேபி⁴த³ந்தமாதா⁴ய ஜிவ்ஹாய தாலும் ஆஹச்ச சேதஸா சித்தம் அபி⁴னிக்³க³ண்ஹதோ அபி⁴னிப்பீளயதோ அபி⁴ஸந்தாபயதோ யே பாபகா அகுஸலா விதக்கா ச²ந்தூ³பஸம்ஹிதாபி தோ³ஸூபஸம்ஹிதாபி மோஹூபஸம்ஹிதாபி தே பஹீயந்தி தே அப்³ப⁴த்த²ம் க³ச்ச²ந்தி. தேஸம் பஹானா அஜ்ஜ²த்தமேவ சித்தம் ஸந்திட்ட²தி ஸன்னிஸீத³தி ஏகோதி³ ஹோதி ஸமாதி⁴யதி. ஸேய்யதா²பி, பி⁴க்க²வே, ப³லவா புரிஸோ து³ப்³ப³லதரம் புரிஸம் ஸீஸே வா க³லே வா க²ந்தே⁴ வா க³ஹேத்வா அபி⁴னிக்³க³ண்ஹேய்ய அபி⁴னிப்பீளேய்ய அபி⁴ஸந்தாபேய்ய; ஏவமேவ கோ², பி⁴க்க²வே, தஸ்ஸ சே பி⁴க்கு²னோ தேஸம்பி விதக்கானம் விதக்கஸங்கா²ரஸண்டா²னம் மனஸிகரோதோ உப்பஜ்ஜந்தேவ பாபகா அகுஸலா விதக்கா ச²ந்தூ³பஸம்ஹிதாபி தோ³ஸூபஸம்ஹிதாபி மோஹூபஸம்ஹிதாபி. தேன, பி⁴க்க²வே, பி⁴க்கு²னா த³ந்தேபி⁴த³ந்தமாதா⁴ய ஜிவ்ஹாய தாலும் ஆஹச்ச சேதஸா சித்தம் அபி⁴னிக்³க³ண்ஹிதப்³ப³ம் அபி⁴னிப்பீளேதப்³ப³ம் அபி⁴ஸந்தாபேதப்³ப³ம். தஸ்ஸ த³ந்தேபி⁴த³ந்தமாதா⁴ய ஜிவ்ஹாய தாலும் ஆஹச்ச சேதஸா சித்தம் அபி⁴னிக்³க³ண்ஹதோ அபி⁴னிப்பீளயதோ அபி⁴ஸந்தாபயதோ யே பாபகா அகுஸலா விதக்கா ச²ந்தூ³பஸம்ஹிதாபி தோ³ஸூபஸம்ஹிதாபி மோஹூபஸம்ஹிதாபி தே பஹீயந்தி தே அப்³ப⁴த்த²ம் க³ச்ச²ந்தி. தேஸம் பஹானா அஜ்ஜ²த்தமேவ சித்தம் ஸந்திட்ட²தி ஸன்னிஸீத³தி ஏகோதி³ ஹோதி ஸமாதி⁴யதி.

221. ‘‘யதோ கோ² [யதோ ச கோ² (ஸ்யா. க.)], பி⁴க்க²வே, பி⁴க்கு²னோ யம் நிமித்தம் ஆக³ம்ம யம் நிமித்தம் மனஸிகரோதோ உப்பஜ்ஜந்தி பாபகா அகுஸலா விதக்கா ச²ந்தூ³பஸம்ஹிதாபி தோ³ஸூபஸம்ஹிதாபி மோஹூபஸம்ஹிதாபி, தஸ்ஸ தம்ஹா நிமித்தா அஞ்ஞம் நிமித்தம் மனஸிகரோதோ குஸலூபஸம்ஹிதம் யே பாபகா அகுஸலா விதக்கா ச²ந்தூ³பஸம்ஹிதாபி தோ³ஸூபஸம்ஹிதாபி மோஹூபஸம்ஹிதாபி தே பஹீயந்தி தே அப்³ப⁴த்த²ம் க³ச்ச²ந்தி. தேஸம் பஹானா அஜ்ஜ²த்தமேவ சித்தம் ஸந்திட்ட²தி ஸன்னிஸீத³தி ஏகோதி³ ஹோதி ஸமாதி⁴யதி. தேஸம்பி விதக்கானம் ஆதீ³னவம் உபபரிக்க²தோ யே பாபகா அகுஸலா விதக்கா ச²ந்தூ³பஸம்ஹிதாபி தோ³ஸூபஸம்ஹிதாபி மோஹூபஸம்ஹிதாபி தே பஹீயந்தி தே அப்³ப⁴த்த²ம் க³ச்ச²ந்தி. தேஸம் பஹானா அஜ்ஜ²த்தமேவ சித்தம் ஸந்திட்ட²தி ஸன்னிஸீத³தி ஏகோதி³ ஹோதி ஸமாதி⁴யதி. தேஸம்பி விதக்கானம் அஸதிஅமனஸிகாரம் ஆபஜ்ஜதோ யே பாபகா அகுஸலா விதக்கா ச²ந்தூ³பஸம்ஹிதாபி தோ³ஸூபஸம்ஹிதாபி மோஹூபஸம்ஹிதாபி தே பஹீயந்தி தே அப்³ப⁴த்த²ம் க³ச்ச²ந்தி. தேஸம் பஹானா அஜ்ஜ²த்தமேவ சித்தம் ஸந்திட்ட²தி ஸன்னிஸீத³தி ஏகோதி³ ஹோதி ஸமாதி⁴யதி. தேஸம்பி விதக்கானம் விதக்கஸங்கா²ரஸண்டா²னம் மனஸிகரோதோ யே பாபகா அகுஸலா விதக்கா ச²ந்தூ³பஸம்ஹிதாபி தோ³ஸூபஸம்ஹிதாபி மோஹூபஸம்ஹிதாபி தே பஹீயந்தி தே அப்³ப⁴த்த²ம் க³ச்ச²ந்தி. தேஸம் பஹானா அஜ்ஜ²த்தமேவ சித்தம் ஸந்திட்ட²தி ஸன்னிஸீத³தி ஏகோதி³ ஹோதி ஸமாதி⁴யதி. த³ந்தேபி⁴த³ந்தமாதா⁴ய ஜிவ்ஹாய தாலும் ஆஹச்ச சேதஸா சித்தம் அபி⁴னிக்³க³ண்ஹதோ அபி⁴னிப்பீளயதோ அபி⁴ஸந்தாபயதோ யே பாபகா அகுஸலா விதக்கா ச²ந்தூ³பஸம்ஹிதாபி தோ³ஸூபஸம்ஹிதாபி மோஹூபஸம்ஹிதாபி தே பஹீயந்தி தே அப்³ப⁴த்த²ம் க³ச்ச²ந்தி. தேஸம் பஹானா அஜ்ஜ²த்தமேவ சித்தம் ஸந்திட்ட²தி ஸன்னிஸீத³தி ஏகோதி³ ஹோதி ஸமாதி⁴யதி. அயம் வுச்சதி, பி⁴க்க²வே, பி⁴க்கு² வஸீ விதக்கபரியாயபதே²ஸு. யம் விதக்கம் ஆகங்கி²ஸ்ஸதி தம் விதக்கம் விதக்கேஸ்ஸதி, யம் விதக்கம் நாகங்கி²ஸ்ஸதி ந தம் விதக்கம் விதக்கேஸ்ஸதி. அச்சே²ச்சி² தண்ஹம், விவத்தயி [வாவத்தயி (ஸீ. பீ.)] ஸம்யோஜனம், ஸம்மா மானாபி⁴ஸமயா அந்தமகாஸி து³க்க²ஸ்ஸா’’தி.

இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதம் அபி⁴னந்து³ந்தி.

விதக்கஸண்டா²னஸுத்தம் நிட்டி²தம் த³ஸமம்.

ஸீஹனாத³வக்³கோ³ நிட்டி²தோ து³தியோ.