15. பரிக்கா²ரஹாரவிப⁴ங்கோ³

49. தத்த² கதமோ பரிக்கா²ரோ ஹாரோ? ‘‘யே த⁴ம்மா யம் த⁴ம்மம் ஜனயந்தீ’’தி.

யோ த⁴ம்மோ யம் த⁴ம்மம் ஜனயதி, தஸ்ஸ ஸோ பரிக்கா²ரோ. கிம்லக்க²ணோ பரிக்கா²ரோ? ஜனகலக்க²ணோ பரிக்கா²ரோ. த்³வே த⁴ம்மா ஜனயந்தி ஹேது ச பச்சயோ ச. தத்த² கிம்லக்க²ணோ ஹேது, கிம்லக்க²ணோ பச்சயோ? அஸாதா⁴ரணலக்க²ணோ ஹேது, ஸாதா⁴ரணலக்க²ணோ பச்சயோ. யதா² கிம் ப⁴வே? யதா² அங்குரஸ்ஸ நிப்³ப³த்தியா பீ³ஜம் அஸாதா⁴ரணம், பத²வீ ஆபோ ச ஸாதா⁴ரணா. அங்குரஸ்ஸ ஹி பத²வீ ஆபோ ச பச்சயோ ஸபா⁴வோ ஹேது. யதா² வா பன க⁴டே து³த்³த⁴ம் பக்கி²த்தம் த³தி⁴ ப⁴வதி, ந சத்தி² ஏககாலஸமவதா⁴னம் து³த்³த⁴ஸ்ஸ ச த³தி⁴ஸ்ஸ ச. ஏவமேவம் நத்தி² ஏககாலஸமவதா⁴னம் ஹேதுஸ்ஸ ச பச்சயஸ்ஸ ச.

அயஞ்ஹி ஸம்ஸாரோ ஸஹேது ஸப்பச்சயோ நிப்³ப³த்தோ. வுத்தம் ஹி அவிஜ்ஜாபச்சயா ஸங்கா²ரா, ஸங்கா²ரபச்சயா விஞ்ஞாணம், ஏவம் ஸப்³போ³ படிச்சஸமுப்பாதோ³. இதி அவிஜ்ஜா அவிஜ்ஜாய ஹேது அயோனிஸோ மனஸிகாரோ பச்சயோ. புரிமிகா அவிஜ்ஜா பச்சி²மிகாய அவிஜ்ஜாய ஹேது. தத்த² புரிமிகா அவிஜ்ஜா அவிஜ்ஜானுஸயோ பச்சி²மிகா அவிஜ்ஜா அவிஜ்ஜாபரியுட்டா²னம், புரிமிகோ அவிஜ்ஜானுஸயோ பச்சி²மிகஸ்ஸ அவிஜ்ஜாபரியுட்டா²னஸ்ஸ ஹேதுபூ⁴தோ பரிப்³ரூஹனாய, பீ³ஜங்குரோ விய ஸமனந்தரஹேதுதாய. யம் பன யத்த² ப²லம் நிப்³ப³த்ததி, இத³மஸ்ஸ பரம்பரஹேதுதாய ஹேதுபூ⁴தம். து³விதோ⁴ ஹி ஹேது ஸமனந்தரஹேது பரம்பரஹேது ச, ஏவம் அவிஜ்ஜாயபி து³விதோ⁴ ஹேது ஸமனந்தரஹேது பரம்பரஹேது ச.

யதா² வா பன தா²லகஞ்ச வட்டி ச தேலஞ்ச பதீ³பஸ்ஸ பச்சயபூ⁴தம் ந ஸபா⁴வஹேது, ந ஹி ஸக்கா தா²லகஞ்ச வட்டிஞ்ச தேலஞ்ச அனக்³கி³கம் தீ³பேதும் பதீ³பஸ்ஸ பச்சயபூ⁴தம். பதீ³போ விய ஸபா⁴வோ ஹேது ஹோதி. இதி ஸபா⁴வோ ஹேது, பரபா⁴வோ பச்சயோ. அஜ்ஜ²த்திகோ ஹேது, பா³ஹிரோ பச்சயோ. ஜனகோ ஹேது, பரிக்³கா³ஹகோ பச்சயோ. அஸாதா⁴ரணோ ஹேது, ஸாதா⁴ரணோ பச்சயோ.

அவுபச்சே²த³த்தோ² ஸந்ததி அத்தோ², நிப்³ப³த்தி அத்தோ² ப²லத்தோ², படிஸந்தி⁴ அத்தோ² புனப்³ப⁴வத்தோ², பலிபோ³த⁴த்தோ² பரியுட்டா²னத்தோ², அஸமுக்³கா⁴தத்தோ² அனுஸயத்தோ², அஸம்படிவேத⁴த்தோ² அவிஜ்ஜத்தோ², அபரிஞ்ஞாதத்தோ² விஞ்ஞாணஸ்ஸ பீ³ஜத்தோ². யத்த² அவுபச்சே²தோ³ தத்த² ஸந்ததி, யத்த² ஸந்ததி தத்த² நிப்³ப³த்தி, யத்த² நிப்³ப³த்தி தத்த² ப²லம், யத்த² ப²லம் தத்த² படிஸந்தி⁴, யத்த² படிஸந்தி⁴ தத்த² புனப்³ப⁴வோ, யத்த² புனப்³ப⁴வோ தத்த² பலிபோ³தோ⁴, யத்த² பலிபோ³தோ⁴ தத்த² பரியுட்டா²னம், யத்த² பரியுட்டா²னம் தத்த² அஸமுக்³கா⁴தோ. யத்த² அஸமுக்³கா⁴தோ தத்த² அனுஸயோ, யத்த² அனுஸயோ தத்த² அஸம்படிவேதோ⁴, யத்த² அஸம்படிவேதோ⁴ தத்த² அவிஜ்ஜா, யத்த² அவிஜ்ஜா தத்த² ஸாஸவம் விஞ்ஞாணம் அபரிஞ்ஞாதம், யத்த² ஸாஸவம் விஞ்ஞாணம் அபரிஞ்ஞாதம் தத்த² பீ³ஜத்தோ².

ஸீலக்க²ந்தோ⁴ ஸமாதி⁴க்க²ந்த⁴ஸ்ஸ பச்சயோ, ஸமாதி⁴க்க²ந்தோ⁴ பஞ்ஞாக்க²ந்த⁴ஸ்ஸ பச்சயோ, பஞ்ஞாக்க²ந்தோ⁴ விமுத்திக்க²ந்த⁴ஸ்ஸ பச்சயோ, விமுத்திக்க²ந்தோ⁴ விமுத்திஞாணத³ஸ்ஸனக்க²ந்த⁴ஸ்ஸ பச்சயோ. தித்த²ஞ்ஞுதா பீதஞ்ஞுதாய பச்சயோ, பீதஞ்ஞுதா பத்தஞ்ஞுதாய பச்சயோ, பத்தஞ்ஞுதா அத்தஞ்ஞுதாய பச்சயோ.

யதா² வா பன சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாணம். தத்த² சக்கு² ஆதி⁴பதேய்யபச்சயதாய பச்சயோ, ரூபா ஆரம்மணபச்சயதாய பச்சயோ. ஆலோகோ ஸன்னிஸ்ஸயதாய பச்சயோ, மனஸிகாரோ ஸபா⁴வோ ஹேது. ஸங்கா²ரா விஞ்ஞாணஸ்ஸ பச்சயோ, ஸபா⁴வோ ஹேது. விஞ்ஞாணம் நாமரூபஸ்ஸ பச்சயோ, ஸபா⁴வோ ஹேது. நாமரூபம் ஸளாயதனஸ்ஸ பச்சயோ, ஸபா⁴வோ ஹேது. ஸளாயதனம் ப²ஸ்ஸஸ்ஸ பச்சயோ, ஸபா⁴வோ ஹேது. ப²ஸ்ஸோ வேத³னாய பச்சயோ, ஸபா⁴வோ ஹேது. வேத³னா தண்ஹாய பச்சயோ, ஸபா⁴வோ ஹேது. தண்ஹா உபாதா³னஸ்ஸ பச்சயோ, ஸபா⁴வோ ஹேது. உபாதா³னம் ப⁴வஸ்ஸ பச்சயோ, ஸபா⁴வோ ஹேது. ப⁴வோ ஜாதியா பச்சயோ, ஸபா⁴வோ ஹேது. ஜாதி ஜராமரணஸ்ஸ பச்சயோ, ஸபா⁴வோ ஹேது. ஜராமரணம் ஸோகஸ்ஸ பச்சயோ, ஸபா⁴வோ ஹேது. ஸோகோ பரிதே³வஸ்ஸ பச்சயோ, ஸபா⁴வோ ஹேது. பரிதே³வோ து³க்க²ஸ்ஸ பச்சயோ, ஸபா⁴வோ ஹேது. து³க்க²ம் தோ³மனஸ்ஸஸ்ஸ பச்சயோ, ஸபா⁴வோ ஹேது. தோ³மனஸ்ஸம் உபாயாஸஸ்ஸ பச்சயோ, ஸபா⁴வோ ஹேது. ஏவம் யோ கோசி உபனிஸ்ஸயோ ஸப்³போ³ ஸோ பரிக்கா²ரோ. தேனாஹ ஆயஸ்மா மஹாகச்சாயனோ ‘‘யே த⁴ம்மா யம் த⁴ம்மம் ஜனயந்தீ’’தி.

நியுத்தோ பரிக்கா²ரோ ஹாரோ.