16. ஸமாரோபனஹாரவிப⁴ங்கோ³

50. தத்த² கதமோ ஸமாரோபனோ ஹாரோ? ‘‘யே த⁴ம்மா யம்மூலா, யே சேகத்தா² பகாஸிதா முனினா’’தி.

ஏகஸ்மிம் பத³ட்டா²னே யத்தகானி பத³ட்டா²னானி ஓதரந்தி, ஸப்³பா³னி தானி ஸமாரோபயிதப்³பா³னி. யதா² ஆவட்டே ஹாரே ப³ஹுகானி பத³ட்டா²னானி ஓதரந்தீதி. தத்த² ஸமாரோபனா சதுப்³பி³தா⁴ பத³ட்டா²னம், வேவசனம், பா⁴வனா, பஹானமிதி.

தத்த² கதமா பத³ட்டா²னேன ஸமாரோபனா?

‘‘ஸப்³ப³பாபஸ்ஸ அகரணம், குஸலஸ்ஸ உபஸம்பதா³;

ஸசித்தபரியோத³பனம், ஏதம் பு³த்³தா⁴ன ஸாஸன’’ந்தி.

தஸ்ஸ கிம் பத³ட்டா²னம்? தீணி ஸுசரிதானி – காயஸுசரிதம் வசீஸுசரிதம் மனோஸுசரிதம் – இத³ம் பத³ட்டா²னம்; தத்த² யம் காயிகஞ்ச வாசஸிகஞ்ச ஸுசரிதம், அயம் ஸீலக்க²ந்தோ⁴. மனோஸுசரிதே யா அனபி⁴ஜ்ஜா² அப்³யாபாதோ³ ச, அயம் ஸமாதி⁴க்க²ந்தோ⁴. யா ஸம்மாதி³ட்டி², அயம் பஞ்ஞாக்க²ந்தோ⁴. இத³ம் பத³ட்டா²னம், தத்த² ஸீலக்க²ந்தோ⁴ ச ஸமாதி⁴க்க²ந்தோ⁴ ச ஸமதோ², பஞ்ஞாக்க²ந்தோ⁴ விபஸ்ஸனா. இத³ம் பத³ட்டா²னம், தத்த² ஸமத²ஸ்ஸ ப²லம் ராக³விராகா³ சேதோவிமுத்தி, விபஸ்ஸனா ப²லம் அவிஜ்ஜாவிராகா³ பஞ்ஞாவிமுத்தி. இத³ம் பத³ட்டா²னம்.

வனம் வனத²ஸ்ஸ பத³ட்டா²னம். கிஞ்ச வனம்? கோ ச வனதோ²? வனம் நாம பஞ்ச காமகு³ணா, தண்ஹா வனதோ². இத³ம் பத³ட்டா²னம். வனம் நாம நிமித்தக்³கா³ஹோ ‘‘இத்தீ²’’தி வா ‘‘புரிஸோ’’தி வா. வனதோ² நாம தேஸம் தேஸம் அங்க³பச்சங்கா³னம் அனுப்³யஞ்ஜனக்³கா³ஹோ ‘‘அஹோ சக்கு², அஹோ ஸோதம், அஹோ கா⁴னம், அஹோ ஜிவ்ஹா, அஹோ காயோ, இதி. இத³ம் பத³ட்டா²னம். வனம் நாம ச² அஜ்ஜ²த்திகபா³ஹிரானி ஆயதனானி அபரிஞ்ஞாதானி. யம் தது³ப⁴யம் படிச்ச உப்பஜ்ஜதி ஸம்யோஜனம், அயம் வனதோ². இத³ம் பத³ட்டா²னம். வனம் நாம அனுஸயோ. வனதோ² நாம பரியுட்டா²னம். இத³ம் பத³ட்டா²னம். தேனாஹ ப⁴க³வா ‘‘சே²த்வா வனஞ்ச வனத²ஞ்சா’’தி. அயம் பத³ட்டா²னேன ஸமாரோபனா.

51. தத்த² கதமா வேவசனேன ஸமாரோபனா? ராக³விராகா³ சேதோவிமுத்தி ஸேக்க²ப²லம்; அவிஜ்ஜாவிராகா³ பஞ்ஞாவிமுத்தி அஸேக்க²ப²லம். இத³ம் வேவசனம். ராக³விராகா³ சேதோவிமுத்தி அனாகா³மிப²லம்; அவிஜ்ஜாவிராகா³ பஞ்ஞாவிமுத்தி அக்³க³ப²லம் அரஹத்தம். இத³ம் வேவசனம். ராக³விராகா³ சேதோவிமுத்தி காமதா⁴துஸமதிக்கமனம்; அவிஜ்ஜாவிராகா³ பஞ்ஞாவிமுத்தி தேதா⁴துஸமதிக்கமனம். இத³ம் வேவசனம். பஞ்ஞிந்த்³ரியம், பஞ்ஞாப³லம், அதி⁴பஞ்ஞாஸிக்கா², பஞ்ஞாக்க²ந்தோ⁴, த⁴ம்மவிசயஸம்போ³ஜ்ஜ²ங்கோ³, உபேக்கா²ஸம்போ³ஜ்ஜ²ங்கோ³, ஞாணம், ஸம்மாதி³ட்டி², தீரணா, ஸந்தீரணா, ஹிரீ, விபஸ்ஸனா, த⁴ம்மே ஞாணம், ஸப்³ப³ம், இத³ம் வேவசனம். அயம் வேவசனேன ஸமாரோபனா.

தத்த² கதமா பா⁴வனாய ஸமாரோபனா? யதா²ஹ ப⁴க³வா ‘‘தஸ்மாதிஹ த்வம் பி⁴க்கு² காயே காயானுபஸ்ஸீ விஹராஹி, ஆதாபீ ஸம்பஜானோ ஸதிமா வினேய்ய லோகே அபி⁴ஜ்ஜா²தோ³மனஸ்ஸம்’’. ஆதாபீதி வீரியிந்த்³ரியம். ஸம்பஜானோதி பஞ்ஞிந்த்³ரியம். ஸதிமாதி ஸதிந்த்³ரியம். வினேய்ய லோகே அபி⁴ஜ்ஜா²தோ³மனஸ்ஸந்தி ஸமாதி⁴ந்த்³ரியம். ஏவம் காயே காயானுபஸ்ஸினோ விஹரதோ சத்தாரோ ஸதிபட்டா²னா பா⁴வனாபாரிபூரிம் க³ச்ச²ந்தி. கேன காரணேன? ஏகலக்க²ணத்தா சதுன்னம் இந்த்³ரியானம். சதூஸு ஸதிபட்டா²னேஸு பா⁴வியமானேஸு சத்தாரோ ஸம்மப்பதா⁴னா பா⁴வனாபாரிபூரிம் க³ச்ச²ந்தி. சதூஸு ஸம்மப்பதா⁴னேஸு பா⁴வியமானேஸு சத்தாரோ இத்³தி⁴பாதா³ பா⁴வனாபாரிபூரிம் க³ச்ச²ந்தி. சதூஸு இத்³தி⁴பாதே³ஸு பா⁴வியமானேஸு பஞ்சிந்த்³ரியானி பா⁴வனாபாரிபூரிம் க³ச்ச²ந்தி. ஏவம் ஸப்³பே³. கேன காரணேன? ஸப்³பே³ ஹி போ³த⁴ங்க³மா த⁴ம்மா போ³தி⁴பக்கி²யா நிய்யானிகலக்க²ணேன ஏகலக்க²ணா, தே ஏகலக்க²ணத்தா பா⁴வனாபாரிபூரிம் க³ச்ச²ந்தி. அயம் பா⁴வனாய ஸமாரோபனா.

தத்த² கதமா பஹானேன ஸமாரோபனா? காயே காயானுபஸ்ஸீ விஹரந்தோ ‘‘அஸுபே⁴ ஸுப⁴’’ந்தி விபல்லாஸம் பஜஹதி, கப³ளீகாரோ சஸ்ஸ ஆஹாரோ பரிஞ்ஞம் க³ச்ச²தி, காமுபாதா³னேன ச அனுபாதா³னோ ப⁴வதி, காமயோகே³ன ச விஸம்யுத்தோ ப⁴வதி, அபி⁴ஜ்ஜா²காயக³ந்தே²ன ச விப்பயுஜ்ஜதி, காமாஸவேன ச அனாஸவோ ப⁴வதி, காமோக⁴ஞ்ச உத்திண்ணோ ப⁴வதி, ராக³ஸல்லேன ச விஸல்லோ ப⁴வதி, ரூபூபிகா [ரூபுபிகா (க.) ஏவமுபரிபி] சஸ்ஸ விஞ்ஞாணட்டி²தி பரிஞ்ஞம் க³ச்ச²தி, ரூபதா⁴துயம் சஸ்ஸ ராகோ³ பஹீனோ ப⁴வதி, ந ச ச²ந்தா³க³திம் க³ச்ச²தி.

வேத³னாஸு வேத³னானுபஸ்ஸீ விஹரந்தோ ‘‘து³க்கே² ஸுக²’’ந்தி விபல்லாஸம் பஜஹதி, ப²ஸ்ஸோ சஸ்ஸ ஆஹாரோ பரிஞ்ஞம் க³ச்ச²தி, ப⁴வூபாதா³னேன ச அனுபாதா³னோ ப⁴வதி, ப⁴வயோகே³ன ச விஸம்யுத்தோ ப⁴வதி, ப்³யாபாத³காயக³ந்தே²ன ச விப்பயுஜ்ஜதி, ப⁴வாஸவேன ச அனாஸவோ ப⁴வதி, ப⁴வோக⁴ஞ்ச உத்திண்ணோ ப⁴வதி, தோ³ஸஸல்லேன ச விஸல்லோ ப⁴வதி, வேத³னூபிகா சஸ்ஸ விஞ்ஞாணட்டி²தி பரிஞ்ஞம் க³ச்ச²தி, வேத³னாதா⁴துயம் சஸ்ஸ ராகோ³ பஹீனோ ப⁴வதி, ந ச தோ³ஸாக³திம் க³ச்ச²தி.

சித்தே சித்தானுபஸ்ஸீ விஹரந்தோ ‘‘அனிச்சே நிச்ச’’ந்தி விபல்லாஸம் பஜஹதி, விஞ்ஞாணம் சஸ்ஸ ஆஹாரோ பரிஞ்ஞம் க³ச்ச²தி, தி³ட்டு²பாதா³னேன ச அனுபாதா³னோ ப⁴வதி, தி³ட்டி²யோகே³ன ச விஸம்யுத்தோ ப⁴வதி, ஸீலப்³ப³தபராமாஸகாயக³ந்தே²ன ச விப்பயுஜ்ஜதி, தி³ட்டா²ஸவேன ச அனாஸவோ ப⁴வதி, தி³ட்டோ²க⁴ஞ்ச உத்திண்ணோ ப⁴வதி, மானஸல்லேன ச விஸல்லோ ப⁴வதி, ஸஞ்ஞூபிகா சஸ்ஸ விஞ்ஞாணட்டி²தி பரிஞ்ஞம் க³ச்ச²தி, ஸஞ்ஞாதா⁴துயம் சஸ்ஸ ராகோ³ பஹீனோ ப⁴வதி, ந ச ப⁴யாக³திம் க³ச்ச²தி.

த⁴ம்மேஸு த⁴ம்மானுபஸ்ஸீ விஹரந்தோ ‘‘அனத்தனி [அனத்தனியே (ஸீ.) பஸ்ஸ அ. நி. 4.49] அத்தா’’தி விபல்லாஸம் பஜஹதி, மனோஸஞ்சேதனா சஸ்ஸ ஆஹாரோ பரிஞ்ஞம் க³ச்ச²தி, அத்தவாது³பாதா³னேன ச அனுபாதா³னோ ப⁴வதி, அவிஜ்ஜாயோகே³ன ச விஸம்யுத்தோ ப⁴வதி, இத³ம்ஸச்சாபி⁴னிவேஸகாயக³ந்தே²ன ச விப்பயுஜ்ஜதி, அவிஜ்ஜாஸவேன ச அனாஸவோ ப⁴வதி, அவிஜ்ஜோக⁴ஞ்ச உத்திண்ணோ ப⁴வதி, மோஹஸல்லேன ச விஸல்லோ ப⁴வதி, ஸங்கா²ரூபிகா சஸ்ஸ விஞ்ஞாணட்டி²தி பரிஞ்ஞம் க³ச்ச²தி, ஸங்கா²ரதா⁴துயம் சஸ்ஸ ராகோ³ பஹீனோ ப⁴வதி, ந ச மோஹாக³திம் க³ச்ச²தி. அயம் பஹானேன ஸமாரோபனா.

தேனாஹ ஆயஸ்மா மஹாகச்சாயனோ –

‘‘யே த⁴ம்மா யம் மூலா, யே சேகத்தா² பகாஸிதா முனினா;

தே ஸமாரோபயிதப்³பா³, ஏஸ ஸமாரோபனோ ஹாரோ’’தி.

நியுத்தோ ஸமாரோபனோ ஹாரோ.

நிட்டி²தோ ச ஹாரவிப⁴ங்கோ³.