10. வேவசனஹாரவிப⁴ங்கோ³

37. தத்த² கதமோ வேவசனோ ஹாரோ? ‘‘வேவசனானி ப³ஹூனீ’’தி. யதா² ஏகம் ப⁴க³வா த⁴ம்மம் அஞ்ஞமஞ்ஞேஹி வேவசனேஹி நித்³தி³ஸதி. யதா²ஹ ப⁴க³வா –

‘‘ஆஸா ச பிஹா அபி⁴னந்த³னா ச, அனேகதா⁴தூஸு ஸரா பதிட்டி²தா;

அஞ்ஞாணமூலப்பப⁴வா பஜப்பிதா, ஸப்³பா³ மயா ப்³யந்திகதா ஸமூலிகா’’தி.

ஆஸா நாம வுச்சதி யா ப⁴விஸ்ஸஸ்ஸ அத்த²ஸ்ஸ ஆஸீஸனா [ஆஸிம்ஸனா (ஸீ.)] அவஸ்ஸம் ஆக³மிஸ்ஸதீதி ஆஸாஸ்ஸ உப்பஜ்ஜதி. பிஹா நாம யா வத்தமானஸ்ஸ [வத்தமானகஸ்ஸ (ஸீ.)] அத்த²ஸ்ஸ பத்த²னா, ஸேய்யதரம் வா தி³ஸ்வா ‘‘ஏதி³ஸோ ப⁴வேய்ய’’ந்தி பிஹாஸ்ஸ உப்பஜ்ஜதி. அத்த²னிப்ப²த்திபடிபாலனா அபி⁴னந்த³னா நாம, பியம் வா ஞாதிம் அபி⁴னந்த³தி, பியம் வா த⁴ம்மம் அபி⁴னந்த³தி, அப்படிகூலதோ வா அபி⁴னந்த³தி.

அனேகதா⁴தூதி சக்கு²தா⁴து ரூபதா⁴து சக்கு²விஞ்ஞாணதா⁴து, ஸோததா⁴து ஸத்³த³தா⁴து ஸோதவிஞ்ஞாணதா⁴து, கா⁴னதா⁴து க³ந்த⁴தா⁴து கா⁴னவிஞ்ஞாணதா⁴து, ஜிவ்ஹாதா⁴து ரஸதா⁴து ஜிவ்ஹாவிஞ்ஞாணதா⁴து, காயதா⁴து போ²ட்ட²ப்³ப³தா⁴து காயவிஞ்ஞாணதா⁴து, மனோதா⁴து த⁴ம்மதா⁴து மனோவிஞ்ஞாணதா⁴து.

ஸராதி கேசி ரூபாதி⁴முத்தா கேசி ஸத்³தா³தி⁴முத்தா கேசி க³ந்தா⁴தி⁴முத்தா கேசி ரஸாதி⁴முத்தா கேசி போ²ட்ட²ப்³பா³தி⁴முத்தா கேசி த⁴ம்மாதி⁴முத்தா. தத்த² யானி ச² கே³ஹஸிதானி தோ³மனஸ்ஸானி யானி ச ச² கே³ஹஸிதானி ஸோமனஸ்ஸானி யானி ச ச² நேக்க²ம்மஸிதானி தோ³மனஸ்ஸானி யானி ச ச² நேக்க²ம்மஸிதானி ஸோமனஸ்ஸானி, இமானி சதுவீஸபதா³னி தண்ஹாபக்கோ², தண்ஹாய ஏதம் வேவசனம். யா ச² உபேக்கா² கே³ஹஸிதா, அயம் தி³ட்டி²பக்கோ².

38. ஸாயேவ பத்த²னாகாரேன த⁴ம்மனந்தீ³ த⁴ம்மபேமம் த⁴ம்மஜ்ஜோ²ஸானந்தி தண்ஹாய ஏதம் வேவசனம். சித்தம் மனோ விஞ்ஞாணந்தி சித்தஸ்ஸ ஏதம் வேவசனம். மனிந்த்³ரியம் மனோதா⁴து மனாயதனம் விஜானனாதி மனஸ்ஸேதம் வேவசனம். பஞ்ஞிந்த்³ரியம் பஞ்ஞாப³லம் அதி⁴பஞ்ஞா ஸிக்கா² பஞ்ஞா பஞ்ஞாக்க²ந்தோ⁴ த⁴ம்மவிசயஸம்போ³ஜ்ஜ²ங்கோ³ ஞாணம் ஸம்மாதி³ட்டி² தீரணா விபஸ்ஸனா த⁴ம்மே ஞாணம் அத்தே² ஞாணம் அன்வயே ஞாணம் க²யே ஞாணம் அனுப்பாதே³ ஞாணம் அனஞ்ஞாதஞ்ஞஸ்ஸாமீதிந்த்³ரியம் அஞ்ஞிந்த்³ரியம் அஞ்ஞாதாவிந்த்³ரியம் சக்கு² விஜ்ஜா பு³த்³தி⁴ பூ⁴ரி மேதா⁴ ஆலோகோ, யம் வா பன யம் கிஞ்சி அஞ்ஞம்பி ஏவம் ஜாதியம், பஞ்ஞாய ஏதம் வேவசனம். பஞ்சிந்த்³ரியானி லோகுத்தரானி, ஸப்³பா³ பஞ்ஞா. அபி ச ஆதி⁴பதேய்யட்டே²ன ஸத்³தா⁴, ஆரம்ப⁴ட்டே²ன வீரியம், அபிலாபனட்டே²ன ஸதி, அவிக்கே²பட்டே²ன ஸமாதி⁴, பஜானனட்டே²ன பஞ்ஞா.

யதா² ச பு³த்³தா⁴னுஸ்ஸதியம் வுத்தம் இதிபி ஸோ ப⁴க³வா அரஹம் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானம் பு³த்³தோ⁴ ப⁴க³வா. ப³லனிப்ப²த்திக³தோ வேஸாரஜ்ஜப்பத்தோ அதி⁴க³தப்படிஸம்பி⁴தோ³ சதுயோக³விப்பஹீனோ அக³திக³மனவீதிவத்தோ உத்³த⁴டஸல்லோ நிரூள்ஹவணோ மத்³தி³தகண்ட³கோ நிப்³பா³பிதபரியுட்டா²னோ [நிப்³பா³ஹித … (க.)] ப³ந்த⁴னாதீதோ க³ந்த²வினிவேட²னோ அஜ்ஜா²ஸயவீதிவத்தோ பி⁴ன்னந்த⁴காரோ சக்கு²மா லோகத⁴ம்மஸமதிக்கந்தோ அனுரோத⁴விரோத⁴விப்பயுத்தோ இட்டா²னிட்டே²ஸு த⁴ம்மேஸு அஸங்கே²பக³தோ ப³ந்த⁴னாதிவத்தோ ட²பிதஸங்கா³மோ அபி⁴க்கந்ததரோ உக்காத⁴ரோ ஆலோககரோ பஜ்ஜோதகரோ தமோனுதோ³ ரணஞ்ஜஹோ அபரிமாணவண்ணோ அப்பமேய்யவண்ணோ அஸங்கே²ய்யவண்ணோ ஆப⁴ம்கரோ பப⁴ம்கரோ த⁴ம்மோபா⁴ஸபஜ்ஜோதகரோதி ச பு³த்³தா⁴ ப⁴க³வந்தோதி ச பு³த்³தா⁴னுஸ்ஸதியா ஏதம் வேவசனம்.

யதா² ச த⁴ம்மானுஸ்ஸதியம் வுத்தம் ஸ்வாக்கா²தோ ப⁴க³வதா த⁴ம்மோ ஸந்தி³ட்டி²கோ அகாலிகோ ஏஹிபஸ்ஸிகோ ஓபனேய்யிகோ [ஓபனயிகோ (ஸீ.)] பச்சத்தம் வேதி³தப்³போ³ விஞ்ஞூஹி. யதி³த³ம் மத³னிம்மத³னோ பிபாஸவினயோ ஆலயஸமுக்³கா⁴டோ வட்டூபச்சே²தோ³ ஸுஞ்ஞதோ அதிது³ல்லபோ⁴ தண்ஹக்க²யோ விராகோ³ நிரோதோ⁴ நிப்³பா³னம்.

‘‘அஸங்க²தம் அனதம் [அஸங்க²தம் நந்த … (ஸீ.) பஸ்ஸ ஸம். நி. 4.409] அனாஸவஞ்ச, ஸச்சஞ்ச பாரம் நிபுணம் ஸுது³த்³த³ஸம்;

அஜஜ்ஜரம் து⁴வம் அபலோகிதம் [அபலோகியம் (ஸீ. க.)], அனித³ஸ்ஸனம் நிப்பபஞ்ச ஸந்தம்.

‘‘அமதம் பணீதஞ்ச ஸிவஞ்ச கே²மம், தண்ஹாக்க²யோ அச்ச²ரியஞ்ச அப்³பு⁴தம்;

அனீதிகம் அனீதிகத⁴ம்மம் [நீதிகத⁴ம்மமேவ வா (ஸீ. க.) பஸ்ஸ ஸம். நி. 4.409], நிப்³பா³னமேதம் ஸுக³தேன தே³ஸிதம்.

‘‘அஜாதம் அபூ⁴தம் அனுபத்³த³வஞ்ச, அகதம் அஸோகஞ்ச அதோ² விஸோகம்;

அனூபஸக்³க³ம்னுபஸக்³க³த⁴ம்மம், நிப்³பா³னமேதம் ஸுக³தேன தே³ஸிதம்.

‘‘க³ம்பீ⁴ரஞ்சேவ து³ப்பஸ்ஸம், உத்தரஞ்ச அனுத்தரம்;

அஸமம் அப்படிஸமம், ஜேட்ட²ம் ஸேட்ட²ந்தி வுச்சதி.

‘‘லேணஞ்ச தாணம் அரணம் அனங்க³ணம், அகாச மேதம் விமலந்தி வுச்சதி;

தீ³போ ஸுக²ம் அப்பமாணம் பதிட்டா², அகிஞ்சனம் அப்பபஞ்சந்தி வுத்த’’ந்தி.

த⁴ம்மானுஸ்ஸதியா ஏதம் வேவசனம்.

யதா² ச ஸங்கா⁴னுஸ்ஸதியம் வுத்தம் ஸுப்படிபன்னோ உஜுப்படிபன்னோ ஞாயப்படிபன்னோ ஸாமீசிப்படிபன்னோ யதி³த³ம் சத்தாரி புரிஸயுகா³னி அட்ட² புரிஸபுக்³க³லா ஏஸ ப⁴க³வதோ ஸாவகஸங்கோ⁴ ஆஹுனேய்யோ பாஹுனேய்யோ த³க்கி²ணேய்யோ அஞ்ஜலிகரணீயோ அனுத்தரம் புஞ்ஞக்கே²த்தம் லோகஸ்ஸ, ஸீலஸம்பன்னோ ஸமாதி⁴ஸம்பன்னோ பஞ்ஞாஸம்பன்னோ விமுத்திஸம்பன்னோ விமுத்திஞாணத³ஸ்ஸனஸம்பன்னோ ஸத்தானம் ஸாரோ ஸத்தானம் மண்டோ³ ஸத்தானம் உத்³தா⁴ரோ ஸத்தானம் ஏஸிகா [ஏஸிகோ (க.)] ஸத்தானம் ஸுரபி⁴பஸூனம் புஜ்ஜோ தே³வானஞ்ச மனுஸ்ஸானஞ்சாதி ஸங்கா⁴னுஸ்ஸதியா ஏதம் வேவசனம்.

யதா² ச ஸீலானுஸ்ஸதியம் வுத்தம் யானி தானி ஸீலானி அக²ண்டா³னி அச்சி²த்³தா³னி அஸப³லானி அகம்மாஸானி அரியானி அரியகந்தானி பு⁴ஜிஸ்ஸானி விஞ்ஞுப்பஸத்தா²னி அபராமட்டா²னி ஸமாதி⁴ஸம்வத்தனிகானி, அலங்காரோ ச ஸீலம் உத்தமங்கோ³பஸோப⁴ணதாய, நிதா⁴னஞ்ச ஸீலம் ஸப்³ப³தோ³ப⁴க்³க³ஸமதிக்கமனட்டே²ன, ஸிப்பஞ்ச ஸீலம் அக்க²ணவேதி⁴தாய, வேலா ச ஸீலம் அனதிக்கமனட்டே²ன, த⁴ஞ்ஞஞ்ச ஸீலம் த³லித்³தோ³பச்சே²த³னட்டே²ன [த³ளித்³தோ³… (ஸீ.)], ஆதா³ஸோ ச ஸீலம் த⁴ம்மவோலோகனதாய, பாஸாதோ³ ச ஸீலம் வோலோகனட்டே²ன, ஸப்³ப³பூ⁴மானுபரிவத்தி ச ஸீலம் அமதபரியோஸானந்தி ஸீலானுஸ்ஸதியா ஏதம் வேவசனம்.

யதா² ச சாகா³னுஸ்ஸதியம் வுத்தம் யஸ்மிம் ஸமயே அரியஸாவகோ அகா³ரம் அஜ்ஜா²வஸதி முத்தசாகோ³ பயதபாணி வோஸ்ஸக்³க³ரதோ யாசயோகோ³ தா³னஸம்விபா⁴க³ரதோதி சாகா³னுஸ்ஸதியா ஏதம் வேவசனம். தேனாஹ ஆயஸ்மா மஹாகச்சாயனோ ‘‘வேவசனானி ப³ஹூனீ’’தி.

நியுத்தோ வேவசனோ ஹாரோ.