7. இஸ்ஸாஸங்க³பஞ்ஹோ

7. ‘‘ப⁴ந்தே நாக³ஸேன, ‘இஸ்ஸாஸஸ்ஸ சத்தாரி அங்கா³னி க³ஹேதப்³பா³னீ’தி யம் வதே³ஸி, கதமானி தானி சத்தாரி அங்கா³னி க³ஹேதப்³பா³னீ’’தி? ‘‘யதா², மஹாராஜ, இஸ்ஸாஸோ ஸரே பாதயந்தோ உபோ⁴ பாதே³ பத²வியம் த³ள்ஹம் பதிட்டா²பேதி, ஜண்ணுஅவேகல்லம் கரோதி, ஸரகலாபம் கடிஸந்தி⁴ம்ஹி ட²பேதி, காயம் உபத்த²த்³த⁴ம் கரோதி, த்³வே ஹத்தே² ஸந்தி⁴ட்டா²னம் ஆரோபேதி, முட்டி²ம் பீளயதி, அங்கு³லியோ நிரந்தரம் கரோதி, கீ³வம் பக்³க³ண்ஹாதி, சக்கூ²னி முக²ஞ்ச பித³ஹதி, நிமித்தம் உஜும் கரோதி, ஹாஸமுப்பாதே³தி ‘விஜ்ஜி²ஸ்ஸாமீ’தி, ஏவமேவ கோ², மஹாராஜ, யோகி³னா யோகா³வசரேன ஸீலபத²வியம் வீரியபாதே³ பதிட்டா²பேதப்³ப³ம், க²ந்திஸோரச்சம் அவேகல்லம் காதப்³ப³ம், ஸம்வரே சித்தம் ட²பேதப்³ப³ம், ஸம்யமனியமே அத்தா உபனேதப்³போ³, இச்சா² முச்சா² பீளயிதப்³பா³, யோனிஸோ மனஸிகாரே சித்தம் நிரந்தரம் காதப்³ப³ம், வீரியம் பக்³க³ஹேதப்³ப³ம், ச² த்³வாரா பித³ஹிதப்³பா³, ஸதி உபட்ட²பேதப்³பா³, ஹாஸமுப்பாதே³தப்³ப³ம் ‘ஸப்³ப³கிலேஸே ஞாணனாராசேன விஜ்ஜி²ஸ்ஸாமீ’தி. இத³ம், மஹாராஜ, இஸ்ஸாஸஸ்ஸ பட²மம் அங்க³ம் க³ஹேதப்³ப³ம்.

‘‘புன சபரம், மஹாராஜ, இஸ்ஸாஸோ ஆளகம் பரிஹரதி வங்கஜிம்ஹகுடிலனாராசஸ்ஸ உஜுகரணாய. ஏவமேவ கோ², மஹாராஜ, யோகி³னா யோகா³வசரேன இமஸ்மிம் காயே ஸதிபட்டா²னஆளகம் பரிஹரிதப்³ப³ம் வங்கஜிம்ஹகுடிலசித்தஸ்ஸ உஜுகரணாய. இத³ம், மஹாராஜ, இஸ்ஸாஸஸ்ஸ து³தியம் அங்க³ம் க³ஹேதப்³ப³ம்.

‘‘புன சபரம், மஹாராஜ, இஸ்ஸாஸோ லக்கே² உபாஸேதி, ஏவமேவ கோ², மஹாராஜ, யோகி³னா யோகா³வசரேன இமஸ்மிம் காயே உபாஸிதப்³ப³ம். கத²ம் மஹாராஜ யோகி³னா யோகா³வசரேன இமஸ்மிம் காயே உபாஸிதப்³ப³ம்? அனிச்சதோ உபாஸிதப்³ப³ம், து³க்க²தோ உபாஸிதப்³ப³ம், அனத்ததோ உபாஸிதப்³ப³ம், ரோக³தோ…பே… க³ண்ட³தோ…பே… ஸல்லதோ…பே… அக⁴தோ…பே… ஆபா³த⁴தோ…பே… பரதோ…பே… பலோகதோ…பே… ஈதிதோ…பே… உபத்³த³வதோ…பே… ப⁴யதோ…பே… உபஸக்³க³தோ…பே… சலதோ…பே… பப⁴ங்கு³தோ…பே… அத்³து⁴வதோ…பே… அதாணதோ…பே… அலேணதோ…பே… அஸரணதோ…பே… ரித்ததோ…பே… துச்ச²தோ…பே… ஸுஞ்ஞதோ…பே… ஆதீ³னவதோ…பே… விபரிணாமத⁴ம்மதோ…பே… அஸாரதோ …பே… அக⁴மூலதோ…பே… வத⁴கதோ…பே… விப⁴வதோ…பே… ஸாஸவதோ…பே… ஸங்க²ததோ…பே… மாராமிஸதோ…பே… ஜாதித⁴ம்மதோ…பே… ஜராத⁴ம்மதோ…பே… ப்³யாதி⁴த⁴ம்மதோ…பே… மரணத⁴ம்மதோ…பே… ஸோகத⁴ம்மதோ…பே… பரிதே³வத⁴ம்மதோ…பே… உபாயாஸத⁴ம்மதோ…பே… ஸம்கிலேஸத⁴ம்மதோ…பே… ஏவம் கோ², மஹாராஜ, யோகி³னா யோகா³வசரேன இமஸ்மிம் காயே உபாஸிதப்³ப³ம். இத³ம், மஹாராஜ, இஸ்ஸாஸஸ்ஸ ததியம் அங்க³ம் க³ஹேதப்³ப³ம்.

‘‘புன சபரம், மஹாராஜ, இஸ்ஸாஸோ ஸாயம் பாதம் உபாஸதி. ஏவமேவ கோ², மஹாராஜ, யோகி³னா யோகா³வசரேன ஸாயம் பாதம் ஆரம்மணே உபாஸிதப்³ப³ம். இத³ம், மஹாராஜ, இஸ்ஸாஸஸ்ஸ சதுத்த²ம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, தே²ரேன ஸாரிபுத்தேன த⁴ம்மஸேனாபதினா –

‘‘‘யதா² இஸ்ஸாஸகோ நாம, ஸாயம் பாதம் உபாஸதி;

உபாஸனம் அரிஞ்சந்தோ [ந ரிச்ச²ந்தோ (ஸீ. க.)], லப⁴தே ப⁴த்தவேதனம்.

‘‘‘ததே²வ பு³த்³த⁴புத்தோபி, கரோதி காயுபாஸனம்;

காயுபாஸனம் அரிஞ்சந்தோ, அரஹத்தமதி⁴க³ச்ச²தீ’’’தி.

இஸ்ஸாஸங்க³பஞ்ஹோ ஸத்தமோ.

கும்ப⁴வக்³கோ³ ஸத்தமோ [இதோ பரம் ராஜங்க³பஞ்ஹாதி³கா அட்ட²திம்ஸ பஞ்ஹா வினட்டா², யேஹி தா தி³ட்டா²,§தேஹி நோ ஆரோசேதப்³பா³ புன முத்³தா³பனகாலே பக்கி²பனத்தா²யாதி (ந, பு³, ஸ)].

தஸ்ஸுத்³தா³னம் –

கும்போ⁴ ச காளாயஸோ ச, ச²த்தம் கே²த்தஞ்ச அக³தோ³;

போ⁴ஜனேன ச இஸ்ஸாஸோ, வுத்தம் தா³னி விதூ³ஹீதி.

ஓபம்மகதா²பஞ்ஹோ நிட்டி²தோ.