6. ஓபம்மகதா²பஞ்ஹோ
மாதிகா
ப⁴ந்தே நாக³ஸேன, கதிஹங்கே³ஹி ஸமன்னாக³தோ பி⁴க்கு² அரஹத்தம் ஸச்சி²கரோதீதி?
இத⁴, மஹாராஜ, அரஹத்தம் ஸச்சி²காதுகாமேன பி⁴க்கு²னா –
க³த்³ரப⁴ஸ்ஸ [கோ⁴ரஸ்ஸரஸ்ஸ (ஸீ. ஸ்யா. பீ.)] ஏகம் அங்க³ம் க³ஹேதப்³ப³ம்.
குக்குடஸ்ஸ பஞ்ச அங்கா³னி க³ஹேதப்³பா³னி.
கலந்த³கஸ்ஸ ஏகம் அங்க³ம் க³ஹேதப்³ப³ம்.
தீ³பினியா ஏகம் அங்க³ம் க³ஹேதப்³ப³ம்.
தீ³பிகஸ்ஸ த்³வே அங்கா³னி க³ஹேதப்³பா³னி.
கும்மஸ்ஸ பஞ்ச அங்கா³னி க³ஹேதப்³பா³னி.
வம்ஸஸ்ஸ ஏகம் அங்க³ம் க³ஹேதப்³ப³ம்.
சாபஸ்ஸ ஏகம் அங்க³ம் க³ஹேதப்³ப³ம்.
வாயஸஸ்ஸ த்³வே அங்கா³னி க³ஹேதப்³பா³னி.
மக்கடஸ்ஸ த்³வே அங்கா³னி க³ஹேதப்³பா³னி.
க³த்³ரப⁴வக்³கோ³ பட²மோ.
லாபு³லதாய ஏகம் அங்க³ம் க³ஹேதப்³ப³ம்.
பது³மஸ்ஸ தீணி அங்கா³னி க³ஹேதப்³பா³னி.
பீ³ஜஸ்ஸ த்³வே அங்கா³னி க³ஹேதப்³பா³னி.
ஸாலகல்யாணிகாய ஏகம் அங்க³ம் க³ஹேதப்³ப³ம்.
நாவாய தீணி அங்கா³னி க³ஹேதப்³பா³னி.
நாவாலக்³க³னகஸ்ஸ [நாவாலக³னகஸ்ஸ (ஸீ. பீ.)] த்³வே அங்கா³னி க³ஹேதப்³பா³னி.
கூபஸ்ஸ [கூபகஸ்ஸ (க.)] ஏகம் அங்க³ம் க³ஹேதப்³ப³ம்.
நியாமகஸ்ஸ தீணி அங்கா³னி க³ஹேதப்³பா³னி.
கம்மகாரஸ்ஸ ஏகம் அங்க³ம் க³ஹேதப்³ப³ம்.
ஸமுத்³த³ஸ்ஸ பஞ்ச அங்கா³னி க³ஹேதப்³பா³னி.
ஸமுத்³த³வக்³கோ³ து³தியோ.
பத²வியா பஞ்ச அங்கா³னி க³ஹேதப்³பா³னி.
ஆபஸ்ஸ பஞ்ச அங்கா³னி க³ஹேதப்³பா³னி.
தேஜஸ்ஸ பஞ்ச அங்கா³னி க³ஹேதப்³பா³னி.
வாயுஸ்ஸ பஞ்ச அங்கா³னி க³ஹேதப்³பா³னி.
பப்³ப³தஸ்ஸ பஞ்ச அங்கா³னி க³ஹேதப்³பா³னி.
ஆகாஸஸ்ஸ பஞ்ச அங்கா³னி க³ஹேதப்³பா³னி.
சந்த³ஸ்ஸ பஞ்ச அங்கா³னி க³ஹேதப்³பா³னி.
ஸூரியஸ்ஸ ஸத்த அங்கா³னி க³ஹேதப்³பா³னி.
ஸக்கஸ்ஸ தீணி அங்கா³னி க³ஹேதப்³பா³னி.
சக்கவத்திஸ்ஸ சத்தாரி அங்கா³னி க³ஹேதப்³பா³னி.
பத²வீவக்³கோ³ ததியோ.
உபசிகாய ஏகம் அங்க³ம் க³ஹேதப்³ப³ம்.
பி³ளாரஸ்ஸ த்³வே அங்கா³னி க³ஹேதப்³பா³னி.
உந்தூ³ரஸ்ஸ ஏகம் அங்க³ம் க³ஹேதப்³ப³ம்.
விச்சி²கஸ்ஸ ஏகம் அங்க³ம் க³ஹேதப்³ப³ம்.
நகுலஸ்ஸ ஏகம் அங்க³ம் க³ஹேதப்³ப³ம்.
ஜரஸிங்கா³லஸ்ஸ த்³வே அங்கா³னி க³ஹேதப்³பா³னி.
மிக³ஸ்ஸ தீணி அங்கா³னி க³ஹேதப்³பா³னி.
கோ³ரூபஸ்ஸ சத்தாரி அங்கா³னி க³ஹேதப்³பா³னி.
வராஹஸ்ஸ த்³வே அங்கா³னி க³ஹேதப்³பா³னி.
ஹத்தி²ஸ்ஸ பஞ்ச அங்கா³னி க³ஹேதப்³பா³னி.
உபசிகாவக்³கோ³ சதுத்தோ².
ஸீஹஸ்ஸ ஸத்த அங்கா³னி க³ஹேதப்³பா³னி.
சக்கவாகஸ்ஸ தீணி அங்கா³னி க³ஹேதப்³பா³னி.
பேணாஹிகாய த்³வே அங்கா³னி க³ஹேதப்³பா³னி.
க⁴ரகபோதஸ்ஸ ஏகம் அங்க³ம் க³ஹேதப்³ப³ம்.
உலூகஸ்ஸ த்³வே அங்கா³னி க³ஹேதப்³பா³னி.
ஸதபத்தஸ்ஸ ஏகம் அங்க³ம் க³ஹேதப்³ப³ம்.
வக்³கு³லிஸ்ஸ த்³வே அங்கா³னி க³ஹேதப்³பா³னி.
ஜலூகாய ஏகம் அங்க³ம் க³ஹேதப்³ப³ம்.
ஸப்பஸ்ஸ தீணி அங்கா³னி க³ஹேதப்³பா³னி.
அஜக³ரஸ்ஸ ஏகம் அங்க³ம் க³ஹேதப்³ப³ம்.
ஸீஹவக்³கோ³ பஞ்சமோ.
பந்த²மக்கடகஸ்ஸ ஏகம் அங்க³ம் க³ஹேதப்³ப³ம்.
த²னஸிததா³ரகஸ்ஸ [த²னபீததா³ரகஸ்ஸ (ஸ்யா.)] ஏகம் அங்க³ம் க³ஹேதப்³ப³ம்.
சித்தகத⁴ரகும்மஸ்ஸ [சித்தகத²லகும்மஸ்ஸ (க.)] ஏகம் அங்க³ம் க³ஹேதப்³ப³ம்.
பவனஸ்ஸ பஞ்ச அங்கா³னி க³ஹேதப்³பா³னி.
ருக்க²ஸ்ஸ தீணி அங்கா³னி க³ஹேதப்³பா³னி.
மேக⁴ஸ்ஸ பஞ்ச அங்கா³னி க³ஹேதப்³பா³னி.
மணிரதனஸ்ஸ தீணி அங்கா³னி க³ஹேதப்³பா³னி.
மாக³விகஸ்ஸ சத்தாரி அங்கா³னி க³ஹேதப்³பா³னி.
பா³ளிஸிகஸ்ஸ த்³வே அங்கா³னி க³ஹேதப்³பா³னி.
தச்ச²கஸ்ஸ த்³வே அங்கா³னி க³ஹேதப்³பா³னி.
மக்கடவக்³கோ³ ச²ட்டோ².
கும்ப⁴ஸ்ஸ ஏகம் அங்க³ம் க³ஹேதப்³ப³ம்.
காளாயஸஸ்ஸ [காளஹம்ஸஸ்ஸ (க.)] த்³வே அங்கா³னி க³ஹேதப்³பா³னி.
ச²த்தஸ்ஸ தீணி அங்கா³னி க³ஹேதப்³பா³னி.
கே²த்தஸ்ஸ தீணி அங்கா³னி க³ஹேதப்³பா³னி.
அக³த³ஸ்ஸ த்³வே அங்கா³னி க³ஹேதப்³பா³னி.
போ⁴ஜனஸ்ஸ தீணி அங்கா³னி க³ஹேதப்³பா³னி.
இஸ்ஸாஸஸ்ஸ சத்தாரி அங்கா³னி க³ஹேதப்³பா³னி.
கும்ப⁴வக்³கோ³ ஸத்தமோ.
ரஞ்ஞோ சத்தாரி அங்கா³னி க³ஹேதப்³பா³னி.
தோ³வாரிகஸ்ஸ த்³வே அங்கா³னி க³ஹேதப்³பா³னி.
நிஸதா³ய ஏகம் அங்க³ம் க³ஹேதப்³ப³ம்.
பதீ³பஸ்ஸ த்³வே அங்கா³னி க³ஹேதப்³பா³னி.
மயூரஸ்ஸ த்³வே அங்கா³னி க³ஹேதப்³பா³னி.
துரங்க³ஸ்ஸ த்³வே அங்கா³னி க³ஹேதப்³பா³னி.
ஸோண்டி³கஸ்ஸ த்³வே அங்கா³னி க³ஹேதப்³பா³னி.
இந்த³கீ²லஸ்ஸ த்³வே அங்கா³னி க³ஹேதப்³பா³னி.
துலாய ஏகம் அங்க³ம் க³ஹேதப்³ப³ம்.
க²க்³க³ஸ்ஸ த்³வே அங்கா³னி க³ஹேதப்³பா³னி.
மச்ச²ஸ்ஸ த்³வே அங்கா³னி க³ஹேதப்³பா³னி.
இணக்³கா³ஹகஸ்ஸ ஏகம் அங்க³ம் க³ஹேதப்³ப³ம்.
ப்³யாதி⁴தஸ்ஸ த்³வே அங்கா³னி க³ஹேதப்³பா³னி.
மதஸ்ஸ த்³வே அங்கா³னி க³ஹேதப்³பா³னி.
நதி³யா த்³வே அங்கா³னி க³ஹேதப்³பா³னி.
உஸப⁴ஸ்ஸ ஏகம் அங்க³ம் க³ஹேதப்³ப³ம்.
மக்³க³ஸ்ஸ த்³வே அங்கா³னி க³ஹேதப்³பா³னி.
ஸுங்கஸாயிகஸ்ஸ ஏகம் அங்க³ம் க³ஹேதப்³ப³ம்.
சோரஸ்ஸ தீணி அங்கா³னி க³ஹேதப்³பா³னி.
ஸகுணக்³கி⁴யா ஏகம் அங்க³ம் க³ஹேதப்³ப³ம்.
ஸுனக²ஸ்ஸ ஏகம் அங்க³ம் க³ஹேதப்³ப³ம்.
திகிச்ச²கஸ்ஸ தீணி அங்கா³னி க³ஹேதப்³பா³னி.
க³ப்³பி⁴னியா த்³வே அங்கா³னி க³ஹேதப்³பா³னி.
சமரியா ஏகம் அங்க³ம் க³ஹேதப்³ப³ம்.
கிகியா த்³வே அங்கா³னி க³ஹேதப்³பா³னி.
கபோதிகாய தீணி அங்கா³னி க³ஹேதப்³பா³னி.
ஏகனயனஸ்ஸ த்³வே அங்கா³னி க³ஹேதப்³பா³னி.
கஸ்ஸகஸ்ஸ தீணி அங்கா³னி க³ஹேதப்³பா³னி.
ஜம்பு³கஸிங்கா³லியா ஏகம் அங்க³ம் க³ஹேதப்³ப³ம்.
சங்க³வாரகஸ்ஸ த்³வே அங்கா³னி க³ஹேதப்³பா³னி.
த³ப்³பி³யா ஏகம் அங்க³ம் க³ஹேதப்³ப³ம்.
இணஸாத⁴கஸ்ஸ தீணி அங்கா³னி க³ஹேதப்³பா³னி.
அனுவிசினகஸ்ஸ ஏகம் அங்க³ம் க³ஹேதப்³ப³ம்.
ஸாரதி²ஸ்ஸ த்³வே அங்கா³னி க³ஹேதப்³பா³னி.
போ⁴ஜகஸ்ஸ த்³வே அங்கா³னி க³ஹேதப்³பா³னி.
துன்னவாயஸ்ஸ ஏகம் அங்க³ம் க³ஹேதப்³ப³ம்.
நாவிகஸ்ஸ ஏகம் அங்க³ம் க³ஹேதப்³ப³ம்.
ப⁴மரஸ்ஸ த்³வே அங்கா³னி க³ஹேதப்³பா³னீதி.
மாதிகா நிட்டி²தா.
1. க³த்³ரப⁴வக்³கோ³
1. க³த்³ரப⁴ங்க³பஞ்ஹோ
1. ‘‘ப⁴ந்தே நாக³ஸேன, ‘க³த்³ரப⁴ஸ்ஸ ஏகம் அங்க³ம் க³ஹேதப்³ப³’ந்தி யம் வதே³ஸி, கதமம் தம் ஏகம் அங்க³ம் க³ஹேதப்³ப³’’ந்தி? ‘‘யதா², மஹாராஜ, க³த்³ரபோ⁴ நாம ஸங்காரகூடேபி சதுக்கேபி ஸிங்கா⁴டகேபி கா³மத்³வாரேபி து²ஸராஸிம்ஹிபி யத்த² கத்த²சி ஸயதி, ந ஸயனப³ஹுலோ ஹோதி, ஏவமேவ கோ², மஹாராஜ, யோகி³னா யோகா³வசரேன திணஸந்தா²ரேபி பண்ணஸந்தா²ரேபி கட்ட²மஞ்சகேபி ச²மாயபி யத்த² கத்த²சி சம்மக²ண்ட³ம் பத்த²ரித்வா யத்த² கத்த²சி ஸயிதப்³ப³ம், ந ஸயனப³ஹுலேன ப⁴விதப்³ப³ம். இத³ம், மஹாராஜ, க³த்³ரப⁴ஸ்ஸ ஏகம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, ப⁴க³வதா தே³வாதிதே³வேன ‘கலிங்க³ரூபதா⁴னா, பி⁴க்க²வே, ஏதரஹி மம ஸாவகா விஹரந்தி அப்பமத்தா ஆதாபினோ பதா⁴னஸ்மி’ந்தி. பா⁴ஸிதம்பேதம், மஹாராஜ, தே²ரேன ஸாரிபுத்தேன த⁴ம்மஸேனாபதினாபி –
‘‘‘பல்லங்கேன நிஸின்னஸ்ஸ, ஜண்ணுகேனாபி⁴வஸ்ஸதி;
அலம் பா²ஸுவிஹாராய, பஹிதத்தஸ்ஸ பி⁴க்கு²னோ’’’தி.
க³த்³ரப⁴ங்க³பஞ்ஹோ பட²மோ.
2. குக்குடங்க³பஞ்ஹோ
2. ‘‘ப⁴ந்தே நாக³ஸேன, ‘குக்குடஸ்ஸ பஞ்ச அங்கா³னி க³ஹேதப்³பா³னீ’தி யம் வதே³ஸி, கதமானி தானி பஞ்ச அங்கா³னி க³ஹேதப்³பா³னீ’’தி? ‘‘யதா², மஹாராஜ, குக்குடோ காலேன ஸமயேன படிஸல்லீயதி, ஏவமேவ கோ², மஹாராஜ, யோகி³னா யோகா³வசரேன காலேன ஸமயேனேவ சேதியங்க³ணம் ஸம்மஜ்ஜித்வா பானீயம் பரிபோ⁴ஜனீயம் உபட்ட²பேத்வா ஸரீரம் படிஜக்³கி³த்வா நஹாயித்வா சேதியம் வந்தி³த்வா வுட்³டா⁴னம் பி⁴க்கூ²னம் த³ஸ்ஸனாய க³ந்த்வா காலேன ஸமயேன ஸுஞ்ஞாகா³ரம் பவிஸிதப்³ப³ம். இத³ம், மஹாராஜ, குக்குடஸ்ஸ பட²மம் அங்க³ம் க³ஹேதப்³ப³ம்.
‘‘புன சபரம், மஹாராஜ, குக்குடோ காலேன ஸமயேனேவ வுட்டா²தி. ஏவமேவ கோ², மஹாராஜ, யோகி³னா யோகா³வசரேன காலேன ஸமயேனேவ வுட்ட²ஹித்வா சேதியங்க³ணம் ஸம்மஜ்ஜித்வா பானீயம் பரிபோ⁴ஜனீயம் உபட்ட²பேத்வா ஸரீரம் படிஜக்³கி³த்வா சேதியம் வந்தி³த்வா புனதே³வ ஸுஞ்ஞாகா³ரம் பவிஸிதப்³ப³ம். இத³ம், மஹாராஜ, குக்குடஸ்ஸ து³தியம் அங்க³ம் க³ஹேதப்³ப³ம்.
‘‘புன சபரம், மஹாராஜ, குக்குடோ பத²விம் க²ணித்வா க²ணித்வா அஜ்ஜோ²ஹாரம் அஜ்ஜோ²ஹரதி. ஏவமேவ கோ², மஹாராஜ, யோகி³னா யோகா³வசரேன பச்சவேக்கி²த்வா பச்சவேக்கி²த்வா அஜ்ஜோ²ஹாரம் அஜ்ஜோ²ஹரிதப்³ப³ம் ‘நேவ த³வாய ந மதா³ய ந மண்ட³னாய ந விபூ⁴ஸனாய, யாவதே³வ இமஸ்ஸ காயஸ்ஸ டி²தியா யாபனாய விஹிம்ஸூபரதியா ப்³ரஹ்மசரியானுக்³க³ஹாய, இதி புராணஞ்ச வேத³னம் படிஹங்கா²மி நவஞ்ச வேத³னம் ந உப்பாதே³ஸ்ஸாமி, யாத்ரா ச மே ப⁴விஸ்ஸதி அனவஜ்ஜதா ச பா²ஸுவிஹாரோ சா’தி. இத³ம், மஹாராஜ, குக்குடஸ்ஸ ததியம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, ப⁴க³வதா தே³வாதிதே³வேன –
‘‘‘கந்தாரே புத்தமம்ஸம்வ, அக்க²ஸ்ஸப்³ப⁴ஞ்ஜனம் யதா²;
ஏவம் ஆஹரி ஆஹாரம், யாபனத்த²மமுச்சி²தோ’தி.
‘‘புன சபரம், மஹாராஜ, குக்குடோ ஸசக்கு²கோபி ரத்திம் அந்தோ⁴ ஹோதி. ஏவமேவ கோ², மஹாராஜ, யோகி³னா யோகா³வசரேன அனந்தே⁴னேவ அந்தே⁴ன விய ப⁴விதப்³ப³ம், அரஞ்ஞேபி கோ³சரகா³மே பிண்டா³ய சரந்தேனபி ரஜனீயேஸு ரூபஸத்³த³க³ந்த⁴ரஸபோ²ட்ட²ப்³ப³த⁴ம்மேஸு அந்தே⁴ன ப³தி⁴ரேன மூகே³ன விய ப⁴விதப்³ப³ம், ந நிமித்தம் க³ஹேதப்³ப³ம், நானுப்³யஞ்ஜனம் க³ஹேதப்³ப³ம். இத³ம், மஹாராஜ, குக்குடஸ்ஸ சதுத்த²ம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, தே²ரேன மஹாகச்சாயனேன –
‘சக்கு²மாஸ்ஸ யதா² அந்தோ⁴, ஸோதவா ப³தி⁴ரோ யதா²;
பஞ்ஞவாஸ்ஸ [ஜிவ்ஹாவஸ்ஸ (ஸீ. பீ.)] யதா² மூகோ³, ப³லவா து³ப்³ப³லோரிவ;
அத்தஅத்தே² [அத² அத்தே² (ஸீ. பீ.)] ஸமுப்பன்னே, ஸயேத² மதஸாயிக’ந்தி.
‘‘புன சபரம், மஹாராஜ, குக்குடோ லேட்³டு³த³ண்ட³லகு³ளமுக்³க³ரேஹி பரிபாதியந்தோபி ஸகம் கே³ஹம் ந விஜஹதி. ஏவமேவ கோ², மஹாராஜ, யோகி³னா யோகா³வசரேன சீவரகம்மம் கரோந்தேனபி நவகம்மம் கரோந்தேனபி வத்தப்படிவத்தம் கரோந்தேனபி உத்³தி³ஸந்தேனபி உத்³தி³ஸாபேந்தேனபி யோனிஸோ மனஸிகாரோ ந விஜஹிதப்³போ³, ஸகம் கோ² பனேதம், மஹாராஜ, யோகி³னோ கே³ஹம், யதி³த³ம் யோனிஸோ மனஸிகாரோ. இத³ம், மஹாராஜ, குக்குடஸ்ஸ பஞ்சமம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, ப⁴க³வதா தே³வாதிதே³வேன ‘கோ ச, பி⁴க்க²வே, பி⁴க்கு²னோ கோ³சரோ ஸகோ பேத்திகோ விஸயோ? யதி³த³ம் சத்தாரோ ஸதிபட்டா²னா’தி. பா⁴ஸிதம்பேதம், மஹாராஜ, தே²ரேன ஸாரிபுத்தேன த⁴ம்மஸேனாபதினாபி –
‘‘‘யதா² ஸுத³ந்தோ மாதங்கோ³, ஸகம் ஸோண்ட³ம் ந மத்³த³தி;
ப⁴க்கா²ப⁴க்க²ம் விஜானாதி, அத்தனோ வுத்திகப்பனம்.
‘‘‘ததே²வ பு³த்³த⁴புத்தேன, அப்பமத்தேன வா பன;
ஜினவசனம் ந மத்³தி³தப்³ப³ம், மனஸிகாரவருத்தம’’’ந்தி.
குக்குடங்க³பஞ்ஹோ து³தியோ.
3. கலந்த³கங்க³பஞ்ஹோ
3. ‘‘ப⁴ந்தே நாக³ஸேன, ‘கலந்த³கஸ்ஸ ஏகம் அங்க³ம் க³ஹேதப்³ப³’ந்தி யம் வதே³ஸி, கதமம் தம் ஏகம் அங்க³ம் க³ஹேதப்³ப³’’ந்தி? ‘‘யதா², மஹாராஜ, கலந்த³கோ படிஸத்தும்ஹி ஓபதந்தே நங்கு³ட்ட²ம் பப்போ²டேத்வா மஹந்தம் கத்வா தேனேவ நங்கு³ட்ட²லகு³ளேன படிஸத்தும் படிபா³ஹதி, ஏவமேவ கோ², மஹாராஜ, யோகி³னா யோகா³வசரேன கிலேஸஸத்தும்ஹி ஓபதந்தே ஸதிபட்டா²னலகு³ளம் பப்போ²டேத்வா மஹந்தம் கத்வா தேனேவ ஸதிபட்டா²னலகு³ளேன ஸப்³ப³கிலேஸா படிபா³ஹிதப்³பா³. இத³ம், மஹாராஜ, கலந்த³கஸ்ஸ ஏகம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, தே²ரேன சூளபந்த²கேன –
‘யதா³ கிலேஸா ஓபதந்தி, ஸாமஞ்ஞகு³ணத⁴ம்ஸனா;
ஸதிபட்டா²னலகு³ளேன, ஹந்தப்³பா³ தே புனப்புன’’’ந்தி.
கலந்த³கங்க³பஞ்ஹோ ததியோ.
4. தீ³பினியங்க³பஞ்ஹோ
4. ‘‘ப⁴ந்தே நாக³ஸேன, ‘தீ³பினியா ஏகம் அங்க³ம் க³ஹேதப்³ப³’ந்தி யம் வதே³ஸி, கதமம் தம் ஏகம் அங்க³ம் க³ஹேதப்³ப³’’ந்தி? ‘‘யதா², மஹாராஜ, தீ³பினீ ஸகிம் யேவ க³ப்³ப⁴ம் க³ண்ஹாதி, ந புனப்புனம் புரிஸம் உபேதி? ஏவமேவ கோ², மஹாராஜ, யோகி³னா யோகா³வசரேன ஆயதிம் படிஸந்தி⁴ம் உப்பத்திம் க³ப்³ப⁴ஸேய்யம் சுதிம் பே⁴த³ம் க²யம் வினாஸம் ஸம்ஸாரப⁴யம் து³க்³க³திம் விஸமம் ஸம்பீளிதம் தி³ஸ்வா ‘புனப்³ப⁴வே நப்படிஸந்த³ஹிஸ்ஸாமீ’தி யோனிஸோ மனஸிகாரோ கரணீயோ. இத³ம், மஹாராஜ, தீ³பினியா ஏகம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, ப⁴க³வதா தே³வாதிதே³வேன ஸுத்தனிபாதே த⁴னியகோ³பாலகஸுத்தே –
‘‘‘உஸபோ⁴ரிவ சே²த்வ ப³ந்த⁴னானி, நாகோ³ பூதிலதம்வ தா³லயித்வா;
நாஹம் புனுபேஸ்ஸம் க³ப்³ப⁴ஸேய்யம், அத² சே பத்த²யஸீ பவஸ்ஸ தே³வா’’’தி.
தீ³பினியங்க³பஞ்ஹோ சதுத்தோ².