5. ருக்க²ங்க³பஞ்ஹோ

5. ‘‘ப⁴ந்தே நாக³ஸேன, ‘ருக்க²ஸ்ஸ தீணி அங்கா³னி க³ஹேதப்³பா³னீ’தி யம் வதே³ஸி, கதமானி தானி தீணி அங்கா³னி க³ஹேதப்³பா³னீ’’தி? ‘‘யதா², மஹாராஜ, ருக்கோ² நாம புப்ப²ப²லத⁴ரோ, ஏவமேவ கோ², மஹாராஜ, யோகி³னா யோகா³வசரேன விமுத்திபுப்ப²ஸாமஞ்ஞப²லதா⁴ரினா ப⁴விதப்³ப³ம். இத³ம், மஹாராஜ, ருக்க²ஸ்ஸ பட²மம் அங்க³ம் க³ஹேதப்³ப³ம்.

‘‘புன சபரம், மஹாராஜ, ருக்கோ² உபக³தானமனுப்பவிட்டா²னம் ஜனானம் சா²யம் தே³தி, ஏவமேவ கோ², மஹாராஜ, யோகி³னா யோகா³வசரேன உபக³தானமனுப்பவிட்டா²னம் புக்³க³லானம் ஆமிஸப்படிஸந்தா⁴ரேன வா த⁴ம்மப்படிஸந்தா²ரேன வா படிஸந்த²ரிதப்³ப³ம். இத³ம், மஹாராஜ, ருக்க²ஸ்ஸ து³தியம் அங்க³ம் க³ஹேதப்³ப³ம்.

‘‘புன சபரம், மஹாராஜ, ருக்கோ² சா²யாவேமத்தம் ந கரோதி, ஏவமேவ கோ², மஹாராஜ, யோகி³னா யோகா³வசரேன ஸப்³ப³ஸத்தேஸு வேமத்ததா ந காதப்³பா³, சோரவத⁴கபச்சத்தி²கேஸுபி அத்தனிபி ஸமஸமா மேத்தாபா⁴வனா காதப்³பா³, ‘கிந்தி இமே ஸத்தா அவேரா அப்³யாபஜ்ஜா [அப்³யாபஜ்ஜா² (ஸீ.)] அனீகா⁴ ஸுகீ² அத்தானம் பரிஹரேய்யு’ந்தி. இத³ம், மஹாராஜ, ருக்க²ஸ்ஸ ததியம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, தே²ரேன ஸாரிபுத்தேன த⁴ம்மஸேனாபதினா –

‘‘‘வத⁴கே தே³வத³த்தம்ஹி, சோரே அங்கு³லிமாலகே;

த⁴னபாலே ராஹுலே ச, ஸப்³ப³த்த² ஸமகோ முனீ’’’தி.

ருக்க²ங்க³பஞ்ஹோ பஞ்சமோ.