6. மேக⁴ங்க³பஞ்ஹோ

6. ‘‘ப⁴ந்தே நாக³ஸேன, ‘மேக⁴ஸ்ஸ பஞ்ச அங்கா³னி க³ஹேதப்³பா³னீ’தி யம் வதே³ஸி, கதமானி தானி பஞ்ச அங்கா³னி க³ஹேதப்³பா³னீ’’தி? ‘‘யதா², மஹாராஜ, மேகோ⁴ உப்பன்னம் ரஜோஜல்லம் வூபஸமேதி, ஏவமேவ கோ², மஹாராஜ, யோகி³னா யோகா³வசரேன உப்பன்னம் கிலேஸரஜோஜல்லம் வூபஸமேதப்³ப³ம். இத³ம், மஹாராஜ, மேக⁴ஸ்ஸ பட²மம் அங்க³ம் க³ஹேதப்³ப³ம்.

‘‘புன சபரம், மஹாராஜ, மேகோ⁴ பத²வியா உண்ஹம் நிப்³பா³பேதி, ஏவமேவ கோ², மஹாராஜ, யோகி³னா யோகா³வசரேன மேத்தாபா⁴வனாய ஸதே³வகோ லோகோ நிப்³பா³பேதப்³போ³. இத³ம், மஹாராஜ, மேக⁴ஸ்ஸ து³தியம் அங்க³ம் க³ஹேதப்³ப³ம்.

‘‘புன சபரம், மஹாராஜ, மேகோ⁴ ஸப்³ப³பீ³ஜானி விருஹாபேதி, ஏவமேவ கோ², மஹாராஜ, யோகி³னா யோகா³வசரேன ஸப்³ப³ஸத்தானம் ஸத்³த⁴ம் உப்பாதே³த்வா தம் ஸத்³தா⁴பீ³ஜம் தீஸு ஸம்பத்தீஸு ரோபேதப்³ப³ம், தி³ப்³ப³மானுஸிகாஸு ஸுக²ஸம்பத்தீஸு யாவபரமத்த²னிப்³பா³னஸுக²ஸம்பத்தி. இத³ம், மஹாராஜ, மேக⁴ஸ்ஸ ததியம் அங்க³ம் க³ஹேதப்³ப³ம்.

‘‘புன சபரம், மஹாராஜ, மேகோ⁴ உதுதோ ஸமுட்ட²ஹித்வா த⁴ரணிதலருஹே திணருக்க²லதாகு³ம்ப³ஓஸதி⁴வனப்பதயோ பரிரக்க²தி, ஏவமேவ கோ², மஹாராஜ, யோகி³னா யோகா³வசரேன யோனிஸோ மனஸிகாரம் நிப்³ப³த்தேத்வா தேன யோனிஸோ மனஸிகாரேன ஸமணத⁴ம்மோ பரிரக்கி²தப்³போ³, யோனிஸோ மனஸிகாரமூலகா ஸப்³பே³ குஸலா த⁴ம்மா. இத³ம், மஹாராஜ, மேக⁴ஸ்ஸ சதுத்த²ம் அங்க³ம் க³ஹேதப்³ப³ம்.

‘‘புன சபரம், மஹாராஜ, மேகோ⁴ வஸ்ஸமானோ நதி³தளாகபோக்க²ரணியோ கந்த³ரபத³ரஸரஸோப்³ப⁴உத³பானானி ச பரிபூரேதி உத³கதா⁴ராஹி, ஏவமேவ கோ², மஹாராஜ, யோகி³னா யோகா³வசரேன ஆக³மபரியத்தியா த⁴ம்மமேக⁴மபி⁴வஸ்ஸயித்வா அதி⁴க³மகாமானம் மானஸம் பரிபூரயிதப்³ப³ம். இத³ம், மஹாராஜ, மேக⁴ஸ்ஸ பஞ்சமம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, தே²ரேன ஸாரிபுத்தேன த⁴ம்மஸேனாபதினா –

‘‘‘போ³த⁴னேய்யம் ஜனம் தி³ஸ்வா, ஸதஸஹஸ்ஸேபி யோஜனே;

க²ணேன உபக³ந்த்வான, போ³தே⁴தி தம் மஹாமுனீ’’’தி.

மேக⁴ங்க³பஞ்ஹோ ச²ட்டோ².