4. பவனங்க³பஞ்ஹோ

4. ‘‘ப⁴ந்தே நாக³ஸேன, ‘பவனஸ்ஸ பஞ்ச அங்கா³னி க³ஹேதப்³பா³னீ’தி யம் வதே³ஸி, கதமானி தானி பஞ்ச அங்கா³னி க³ஹேதப்³பா³னீ’’தி? ‘‘யதா², மஹாராஜ, பவனம் நாம அஸுசிஜனம் படிச்சா²தே³தி, ஏவமேவ கோ², மஹாராஜ, யோகி³னா யோகா³வசரேன பரேஸம் அபரத்³த⁴ம் க²லிதம் படிச்சா²தே³தப்³ப³ம் ந விவரிதப்³ப³ம். இத³ம், மஹாராஜ, பவனஸ்ஸ பட²மம் அங்க³ம் க³ஹேதப்³ப³ம்.

‘‘புன சபரம், மஹாராஜ, பவனம் ஸுஞ்ஞம் பசுரஜனேஹி, ஏவமேவ கோ², மஹாராஜ, யோகி³னா யோகா³வசரேன ராக³தோ³ஸமோஹமானதி³ட்டி²ஜாலேஹி ஸப்³பே³ஹி ச கிலேஸேஹி ஸுஞ்ஞேன ப⁴விதப்³ப³ம். இத³ம், மஹாராஜ, பவனஸ்ஸ து³தியம் அங்க³ம் க³ஹேதப்³ப³ம்.

‘‘புன சபரம், மஹாராஜ, பவனம் விவித்தம் ஜனஸம்பா³த⁴ரஹிதம், ஏவமேவ கோ², மஹாராஜ, யோகி³னா யோகா³வசரேன பாபகேஹி அகுஸலேஹி த⁴ம்மேஹி அனரியேஹி பவிவித்தேன ப⁴விதப்³ப³ம். இத³ம், மஹாராஜ, பவனஸ்ஸ ததியம் அங்க³ம் க³ஹேதப்³ப³ம்.

‘‘புன சபரம், மஹாராஜ, பவனம் ஸந்தம் பரிஸுத்³த⁴ம், ஏவமேவ கோ², மஹாராஜ, யோகி³னா யோகா³வசரேன ஸந்தேன பரிஸுத்³தே⁴ன ப⁴விதப்³ப³ம், நிப்³பு³தேன பஹீனமானேன பஹீனமக்கே²ன ப⁴விதப்³ப³ம். இத³ம், மஹாராஜ, பவனஸ்ஸ சதுத்த²ம் அங்க³ம் க³ஹேதப்³ப³ம்.

‘‘புன சபரம், மஹாராஜ, பவனம் அரியஜனஸம்ஸேவிதம், ஏவமேவ கோ², மஹாராஜ, யோகி³னா யோகா³வசரேன அரியஜனஸம்ஸேவிதேன ப⁴விதப்³ப³ம். இத³ம், மஹாராஜ, பவனஸ்ஸ பஞ்சமம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, ப⁴க³வதா தே³வாதிதே³வேன ஸம்யுத்தனிகாயவரே –

‘‘‘பவிவித்தேஹி அரியேஹி, பஹிதத்தேஹி ஜா²யிபி⁴;

நிச்சம் ஆரத்³த⁴வீரியேஹி, பண்டி³தேஹி ஸஹாவஸே’’’தி.

பவனங்க³பஞ்ஹோ சதுத்தோ².