7. மிக³ங்க³பஞ்ஹோ

7. ‘‘ப⁴ந்தே நாக³ஸேன, ‘மிக³ஸ்ஸ தீணி அங்கா³னி க³ஹேதப்³பா³னீ’தி யம் வதே³ஸி, கதமானி தானி தீணி அங்கா³னி க³ஹேதப்³பா³னீ’’தி? ‘‘யதா², மஹாராஜ, மிகோ³ தி³வா அரஞ்ஞே சரதி, ரத்திம் அப்³போ⁴காஸே, ஏவமேவ கோ², மஹாராஜ, யோகி³னா யோகா³வசரேன தி³வா அரஞ்ஞே விஹரிதப்³ப³ம், ரத்திம் அப்³போ⁴காஸே. இத³ம், மஹாராஜ, மிக³ஸ்ஸ பட²மம் அங்க³ம் க³ஹேதப்³ப³ம்.

‘‘பா⁴ஸிதம்பேதம், மஹாராஜ, ப⁴க³வதா தே³வாதிதே³வேன லோமஹம்ஸனபரியாயே –

‘ஸோ கோ² அஹம், ஸாரிபுத்த, யா தா ரத்தியோ ஸீதா ஹேமந்திகா அந்தரட்ட²கா ஹிமபாதஸமயா [அந்தரட்ட²கே ஹிமபாதஸமயே (ஸீ. பீ. க.)], ததா²ரூபாஸு ரத்தீஸு ரத்திம் அப்³போ⁴காஸே விஹராமி, தி³வா வனஸண்டே³. கி³ம்ஹானம் பச்சி²மே மாஸே தி³வா அப்³போ⁴காஸே விஹராமி, ரத்திம் வனஸண்டே³’தி.

‘‘புன சபரம், மஹாராஜ, மிகோ³ ஸத்திம்ஹி வா ஸரே வா ஓபதந்தே வஞ்சேதி [வஜ்ஜேதி (க.)] பலாயதி, ந காயமுபனேதி, ஏவமேவ கோ², மஹாராஜ, யோகி³னா யோகா³வசரேன கிலேஸேஸு ஓபதந்தேஸு வஞ்சயிதப்³ப³ம் [வஜ்ஜயிதப்³ப³ம் (க.)] பலாயிதப்³ப³ம், ந சித்தமுபனேதப்³ப³ம். இத³ம், மஹாராஜ, மிக³ஸ்ஸ து³தியம் அங்க³ம் க³ஹேதப்³ப³ம்.

‘‘புன சபரம், மஹாராஜ, மிகோ³ மனுஸ்ஸே தி³ஸ்வா யேன வா தேன வா பலாயதி ‘மா மம் தே அத்³த³ஸம்ஸூ’தி, ஏவமேவ கோ², மஹாராஜ, யோகி³னா யோகா³வசரேன ப⁴ண்ட³னகலஹவிக்³க³ஹவிவாத³ஸீலே து³ஸ்ஸீலே குஸீதே ஸங்க³ணிகாராமே தி³ஸ்வா யேன வா தேன வா பலாயிதப்³ப³ம் ‘மா மம் தே அத்³த³ஸம்ஸு, அஹஞ்ச தே மா அத்³த³ஸ’ந்தி. இத³ம், மஹாராஜ, மிக³ஸ்ஸ ததியம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, தே²ரேன ஸாரிபுத்தேன த⁴ம்மஸேனாபதினா –

‘‘‘மா மே கதா³சி பாபிச்சோ², குஸீதோ ஹீனவீரியோ;

அப்பஸ்ஸுதோ அனாசாரோ, ஸம்மதோ [ஸமேதோ (ஸீ. பீ.)] அஹு கத்த²சீ’’’தி.

மிக³ங்க³பஞ்ஹோ ஸத்தமோ.