8. கோ³ரூபங்க³பஞ்ஹோ

8. ‘‘ப⁴ந்தே நாக³ஸேன, ‘கோ³ரூபஸ்ஸ சத்தாரி அங்கா³னி க³ஹேதப்³பா³னீ’தி யம் வதே³ஸி, கதமானி தானி சத்தாரி அங்கா³னி க³ஹேதப்³பா³னீ’’தி? ‘‘யதா², மஹாராஜ, கோ³ரூபோ ஸகம் கே³ஹம் ந விஜஹதி, ஏவமேவ கோ², மஹாராஜ, யோகி³னா யோகா³வசரேன ஸகோ காயோ ந விஜஹிதப்³போ³ ‘அனிச்சுச்சா²த³னபரிமத்³த³னபே⁴த³னவிகிரணவித்³த⁴ம்ஸனத⁴ம்மோ அயம் காயோ’தி. இத³ம், மஹாராஜ, கோ³ரூபஸ்ஸ பட²மம் அங்க³ம் க³ஹேதப்³ப³ம்.

‘‘புன சபரம், மஹாராஜ, கோ³ரூபோ ஆதி³ன்னது⁴ரோ ஸுக²து³க்கே²ன து⁴ரம் வஹதி, ஏவமேவ கோ², மஹாராஜ, யோகி³னா யோகா³வசரேன ஆதி³ன்னப்³ரஹ்மசரியேன ஸுக²து³க்கே²ன யாவ ஜீவிதபரியாதா³னா ஆபாணகோடிகம் ப்³ரஹ்மசரியம் சரிதப்³ப³ம். இத³ம், மஹாராஜ, கோ³ரூபஸ்ஸ து³தியம் அங்க³ம் க³ஹேதப்³ப³ம்.

‘‘புன சபரம், மஹாராஜ, கோ³ரூபோ ச²ந்தே³ன கா⁴யமானோ பானீயம் பிவதி, ஏவமேவ கோ², மஹாராஜ, யோகி³னா யோகா³வசரேன ஆசரியுபஜ்ஜா²யானம் அனுஸிட்டி² ச²ந்தே³ன பேமேன பஸாதே³ன கா⁴யமானேன படிக்³க³ஹேதப்³பா³. இத³ம், மஹாராஜ, கோ³ரூபஸ்ஸ ததியம் அங்க³ம் க³ஹேதப்³ப³ம்.

‘‘புன சபரம், மஹாராஜ, கோ³ரூபோ யேன கேனசி வாஹியமானோ வஹதி, ஏவமேவ கோ², மஹாராஜ, யோகி³னா யோகா³வசரேன தே²ரனவமஜ்ஜி²மபி⁴க்கூ²னம்பி கி³ஹிஉபாஸகஸ்ஸாபி ஓவாதா³னுஸாஸனீ ஸிரஸா ஸம்படிச்சி²தப்³பா³. இத³ம், மஹாராஜ, கோ³ரூபஸ்ஸ சதுத்த²ம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, தே²ரேன ஸாரிபுத்தேன த⁴ம்மஸேனாபதினா –

‘‘‘தத³ஹு பப்³ப³ஜிதோ ஸந்தோ, ஜாதியா ஸத்தவஸ்ஸிகோ;

ஸோபி மம் அனுஸாஸேய்ய, ஸம்படிச்சா²மி மத்த²கே [முத்³த⁴னா (ஸீ.)].

‘‘‘திப்³ப³ம் ச²ந்த³ஞ்ச பேமஞ்ச, தஸ்மிம் தி³ஸ்வா உபட்ட²பே;

ட²பேய்யாசரியட்டா²னே, ஸக்கச்ச நம் புனப்புன’’’ந்தி.

கோ³ரூபங்க³பஞ்ஹோ அட்ட²மோ.