2. ஸமுத்³த³வக்³கோ³

1. லாபு³லதங்க³பஞ்ஹோ

1. ‘‘ப⁴ந்தே நாக³ஸேன, ‘லாபு³லதாய ஏகம் அங்க³ம் க³ஹேதப்³ப³’ந்தி யம் வதே³ஸி, கதமம் தம் ஏகம் அங்க³ம் க³ஹேதப்³ப³’’ந்தி? ‘‘யதா², மஹாராஜ, லாபு³லதா திணே வா கட்டே² வா லதாய வா ஸோண்டி³காஹி ஆலம்பி³த்வா தஸ்ஸூபரி வட்³ட⁴தி, ஏவமேவ கோ², மஹாராஜ, யோகி³னா யோகா³வசரேன அரஹத்தே அபி⁴வட்³டி⁴துகாமேன மனஸா ஆரம்மணம் ஆலம்பி³த்வா அரஹத்தே அபி⁴வட்³டி⁴தப்³ப³ம். இத³ம், மஹாராஜ, லாபு³லதாய ஏகம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, தே²ரேன ஸாரிபுத்தேன த⁴ம்மஸேனாபதினா –

‘‘‘யதா² லாபு³லதா நாம, திணே கட்டே² லதாய வா;

ஆலம்பி³த்வா ஸோண்டி³காஹி, ததோ வட்³ட⁴தி உப்பரி.

‘‘‘ததே²வ பு³த்³த⁴புத்தேன, அரஹத்தப²லகாமினா;

ஆரம்மணம் ஆலம்பி³த்வா, வட்³டி⁴தப்³ப³ம் அஸேக்க²ப²லே’’’தி.

லாபு³லதங்க³பஞ்ஹோ பட²மோ.

2. பது³மங்க³பஞ்ஹோ

2. ‘‘ப⁴ந்தே நாக³ஸேன, ‘பது³மஸ்ஸ தீணி அங்கா³னி க³ஹேதப்³பா³னீ’தி யம் வதே³ஸி, கதமானி தானி தீணி அங்கா³னி க³ஹேதப்³பா³னீ’’தி? ‘‘யதா², மஹாராஜ, பது³மம் உத³கே ஜாதம் உத³கே ஸம்வத்³த⁴ம் அனுபலித்தம் உத³கேன, ஏவமேவ கோ², மஹாராஜ, யோகி³னா யோகா³வசரேன குலே க³ணே லாபே⁴ யஸே ஸக்காரே ஸம்மானனாய பரிபோ⁴க³பச்சயேஸு ச ஸப்³ப³த்த² அனுபலித்தேன ப⁴விதப்³ப³ம். இத³ம், மஹாராஜ, பது³மஸ்ஸ பட²மம் அங்க³ம் க³ஹேதப்³ப³ம்.

‘‘புன சபரம், மஹாராஜ, பது³மம் உத³கா அச்சுக்³க³ம்ம டா²தி. ஏவமேவ கோ², மஹாராஜ, யோகி³னா யோகா³வசரேன ஸப்³ப³லோகம் அபி⁴ப⁴வித்வா அச்சுக்³க³ம்ம லோகுத்தரத⁴ம்மே டா²தப்³ப³ம். இத³ம், மஹாராஜ, பது³மஸ்ஸ து³தியம் அங்க³ம் க³ஹேதப்³ப³ம்.

‘‘புன சபரம், மஹாராஜ, பது³மம் அப்பமத்தகேனபி அனிலேன ஏரிதம் சலதி. ஏவமேவ கோ², மஹாராஜ, யோகி³னா யோகா³வசரேன அப்பமத்தகேஸுபி கிலேஸேஸு ஸம்யமோ கரணீயோ, ப⁴யத³ஸ்ஸாவினா விஹரிதப்³ப³ம். இத³ம், மஹாராஜ, பது³மஸ்ஸ ததியம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, ப⁴க³வதா தே³வாதிதே³வேன ‘அணுமத்தேஸு வஜ்ஜேஸு ப⁴யத³ஸ்ஸாவீ ஸமாதா³ய ஸிக்க²தி ஸிக்கா²பதே³ஸூ’தி.

பது³மங்க³பஞ்ஹோ து³தியோ.

3. பீ³ஜங்க³பஞ்ஹோ

3. ‘‘ப⁴ந்தே நாக³ஸேன, ‘பீ³ஜஸ்ஸ த்³வே அங்கா³னி க³ஹேதப்³பா³னீ’தி யம் வதே³ஸி, கதமானி தானி த்³வே அங்கா³னி க³ஹேதப்³பா³னீ’’தி? ‘‘யதா², மஹாராஜ, பீ³ஜம் அப்பகம்பி ஸமானம் ப⁴த்³த³கே கே²த்தே வுத்தம் தே³வே ஸம்மா தா⁴ரம் பவேச்ச²ந்தே ஸுப³ஹூனி ப²லானி அனுத³ஸ்ஸதி, ஏவமேவ கோ², மஹாராஜ, யோகி³னா யோகா³வசரேன யதா² படிபாதி³தம் ஸீலம் கேவலம் ஸாமஞ்ஞப²லமனுத³ஸ்ஸதி. ஏவம் ஸம்மா படிபஜ்ஜிதப்³ப³ம். இத³ம், மஹாராஜ, பீ³ஜஸ்ஸ பட²மம் அங்க³ம் க³ஹேதப்³ப³ம்.

‘‘புன சபரம், மஹாராஜ, பீ³ஜம் ஸுபரிஸோதி⁴தே கே²த்தே ரோபிதம் கி²ப்பமேவ ஸம்விரூஹதி, ஏவமேவ கோ², மஹாராஜ, யோகி³னா யோகா³வசரேன மானஸம் ஸுபரிக்³க³ஹிதம் ஸுஞ்ஞாகா³ரே பரிஸோதி⁴தம் ஸதிபட்டா²னகே²த்தவரே கி²த்தம் கி²ப்பமேவ விரூஹதி. இத³ம், மஹாராஜ, பீ³ஜஸ்ஸ து³தியம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, தே²ரேன அனுருத்³தே⁴ன –

‘‘‘யதா²பி கே²த்தே [யதா² கே²த்தே (ஸீ.)] பரிஸுத்³தே⁴, பீ³ஜஞ்சஸ்ஸ பதிட்டி²தம்;

விபுலம் தஸ்ஸ ப²லம் ஹோதி, அபி தோஸேதி கஸ்ஸகம்.

‘‘‘ததே²வ யோகி³னோ சித்தம், ஸுஞ்ஞாகா³ரே விஸோதி⁴தம்;

ஸதிபட்டா²னகே²த்தம்ஹி, கி²ப்பமேவ விரூஹதீ’’’தி.

பீ³ஜங்க³பஞ்ஹோ ததியோ.

4. ஸாலகல்யாணிகங்க³பஞ்ஹோ

4. ‘‘ப⁴ந்தே நாக³ஸேன, ‘ஸாலகல்யாணிகாய ஏகம் அங்க³ம் க³ஹேதப்³ப³’ந்தி யம் வதே³ஸி, கதமம் தம் ஏகம் அங்க³ம் க³ஹேதப்³ப³’’ந்தி? ‘‘யதா², மஹாராஜ, ஸாலகல்யாணிகா நாம அந்தோபத²வியம் யேவ அபி⁴வட்³ட⁴தி ஹத்த²ஸதம்பி பி⁴ய்யோபி, ஏவமேவ கோ², மஹாராஜ, யோகி³னா யோகா³வசரேன சத்தாரி ஸாமஞ்ஞப²லானி சதஸ்ஸோ படிஸம்பி⁴தா³ ச²ளபி⁴ஞ்ஞாயோ கேவலஞ்ச ஸமணத⁴ம்மம் ஸுஞ்ஞாகா³ரே யேவ பரிபூரயிதப்³ப³ம். இத³ம், மஹாராஜ, ஸாலகல்யாணிகாய ஏகம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, தே²ரேன ராஹுலேன –

‘‘‘ஸாலகல்யாணிகா நாம, பாத³போ த⁴ரணீருஹோ;

அந்தோபத²வியம் யேவ, ஸதஹத்தோ²பி வட்³ட⁴தி.

‘‘‘யதா² காலம்ஹி ஸம்பத்தே, பரிபாகேன ஸோ து³மோ;

உக்³க³ஞ்சி²த்வான ஏகாஹம், ஸதஹத்தோ²பி வட்³ட⁴தி.

‘‘‘ஏவமேவாஹம் மஹாவீர, ஸாலகல்யாணிகா விய;

அப்³ப⁴ந்தரே ஸுஞ்ஞாகா³ரே, த⁴ம்மதோ அபி⁴வட்³ட⁴யி’’’ந்தி.

ஸாலகல்யாணிகங்க³பஞ்ஹோ சதுத்தோ².

5. நாவங்க³பஞ்ஹோ

5. ‘‘ப⁴ந்தே நாக³ஸேன, ‘நாவாய தீணி அங்கா³னி க³ஹேதப்³பா³னீ’தி யம் வதே³ஸி, கதமானி தானி தீணி அங்கா³னி க³ஹேதப்³பா³னீ’’தி? ‘‘யதா², மஹாராஜ, நாவா ப³ஹுவித⁴தா³ருஸங்கா⁴டஸமவாயேன ப³ஹும்பி ஜனம் தாரயதி, ஏவமேவ கோ², மஹாராஜ, யோகி³னா யோகா³வசரேன ஆசாரஸீலகு³ணவத்தப்படிவத்தப³ஹுவித⁴த⁴ம்மஸங்கா⁴டஸமவாயேன ஸதே³வகோ லோகோ தாரயிதப்³போ³. இத³ம், மஹாராஜ, நாவாய பட²மம் அங்க³ம் க³ஹேதப்³ப³ம்.

‘‘புன சபரம், மஹாராஜ, நாவா ப³ஹுவித⁴ஊமித்த²னிதவேக³விஸடமாவட்டவேக³ம் ஸஹதி, ஏவமேவ கோ², மஹாராஜ, யோகி³னா யோகா³வசரேன ப³ஹுவித⁴கிலேஸஊமிவேக³ம் லாப⁴ஸக்காரயஸஸிலோகபூஜனவந்த³னா பரகுலேஸு நிந்தா³பஸம்ஸாஸுக²து³க்க²ஸம்மானனவிமானனப³ஹுவித⁴தோ³ஸஊமிவேக³ஞ்ச ஸஹிதப்³ப³ம். இத³ம், மஹாராஜ, நாவாய து³தியம் அங்க³ம் க³ஹேதப்³ப³ம்.

‘‘புன சபரம், மஹாராஜ, நாவா அபரிமிதமனந்தமபாரமக்கோ²பி⁴தக³ம்பீ⁴ரே மஹதிமஹாகோ⁴ஸே திமிதிமிங்க³லமகரமச்ச²க³ணாகுலே மஹதிமஹாஸமுத்³தே³ சரதி, ஏவமேவ கோ², மஹாராஜ, யோகி³னா யோகா³வசரேன திபரிவட்ட த்³வாத³ஸாகார சதுஸச்சாபி⁴ஸமயப்படிவேதே⁴ மானஸம் ஸஞ்சாரயிதப்³ப³ம். இத³ம், மஹாராஜ, நாவாய ததியம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, ப⁴க³வதா தே³வாதிதே³வேன ஸம்யுத்தனிகாயவரே ஸச்சஸம்யுத்தே –

‘‘‘விதக்கேந்தா ச கோ² தும்ஹே, பி⁴க்க²வே, ‘‘இத³ம் து³க்க²’’ந்தி விதக்கேய்யாத², ‘‘அயம் து³க்க²ஸமுத³யோ’’தி விதக்கேய்யாத², ‘‘அயம் து³க்க²னிரோதோ⁴’’தி விதக்கேய்யாத², ‘‘அயம் து³க்க²னிரோத⁴கா³மினீ படிபதா³’’தி விதக்கேய்யாதா²’’’தி.

நாவங்க³பஞ்ஹோ பஞ்சமோ.

6. நாவாலக்³க³னகங்க³பஞ்ஹோ

6. ‘‘ப⁴ந்தே நாக³ஸேன, ‘நாவாலக்³க³னகஸ்ஸ த்³வே அங்கா³னி க³ஹேதப்³பா³னீ’தி யம் வதே³ஸி, கதமானி தானி த்³வே அங்கா³னி க³ஹேதப்³பா³னீ’’தி? ‘‘யதா², மஹாராஜ, நாவாலக்³க³னகம் ப³ஹுஊமிஜாலாகுலவிக்கோ²பி⁴தஸலிலதலே மஹதிமஹாஸமுத்³தே³ நாவம் லக்³கே³தி ட²பேதி, ந தே³தி தி³ஸாவிதி³ஸம் ஹரிதும், ஏவமேவ கோ², மஹாராஜ, யோகி³னா யோகா³வசரேன ராக³தோ³ஸமோஹூமிஜாலே மஹதிமஹாவிதக்கஸம்பஹாரே சித்தம் லக்³கே³தப்³ப³ம், ந தா³தப்³ப³ம் தி³ஸாவிதி³ஸம் ஹரிதும். இத³ம், மஹாராஜ, நாவாலக்³க³னகஸ்ஸ பட²மம் அங்க³ம் க³ஹேதப்³ப³ம்.

‘‘புன சபரம், மஹாராஜ, நாவாலக்³க³னகம் ந ப்லவதி [ந பிலவதி (ஸீ. பீ.)] விஸீத³தி, ஹத்த²ஸதேபி உத³கே நாவம் லக்³கே³தி டா²னமுபனேதி, ஏவமேவ கோ², மஹாராஜ, யோகி³னா யோகா³வசரேன லாப⁴யஸஸக்காரமானனவந்த³னபூஜனஅபசிதீஸு லாப⁴க்³க³யஸக்³கே³பி ந ப்லவிதப்³ப³ம், ஸரீரயாபனமத்தகே யேவ சித்தம் ட²பேதப்³ப³ம். இத³ம், மஹாராஜ, நாவாலக்³க³னகஸ்ஸ து³தியம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, தே²ரேன ஸாரிபுத்தேன த⁴ம்மஸேனாபதினா –

‘‘‘யதா² ஸமுத்³தே³ லக்³க³னகம், ந ப்லவதி விஸீத³தி;

ததே²வ லாப⁴ஸக்காரே, மா ப்லவத² விஸீத³தா²’’’தி.

நாவாலக்³க³னகங்க³பஞ்ஹோ ச²ட்டோ².

7. கூபங்க³பஞ்ஹோ

7. ‘‘ப⁴ந்தே நாக³ஸேன, ‘கூபஸ்ஸ ஏகம் அங்க³ம் க³ஹேதப்³ப³’ந்தி யம் வதே³ஸி, கதமம் தம் ஏகம் அங்க³ம் க³ஹேதப்³ப³’’ந்தி? ‘‘யதா², மஹாராஜ, கூபோ ரஜ்ஜுஞ்ச வரத்தஞ்ச லங்காரஞ்ச தா⁴ரேதி, ஏவமேவ கோ², மஹாராஜ, யோகி³னா யோகா³வசரேன ஸதிஸம்பஜஞ்ஞஸமன்னாக³தேன ப⁴விதப்³ப³ம், அபி⁴க்கந்தே படிக்கந்தே ஆலோகிதே விலோகிதே ஸமிஞ்ஜிதே பஸாரிதே ஸங்கா⁴டிபத்தசீவரதா⁴ரணே அஸிதே பீதே கா²யிதே ஸாயிதே உச்சாரபஸ்ஸாவகம்மே க³தே டி²தே நிஸின்னே ஸுத்தே ஜாக³ரிதே பா⁴ஸிதே துண்ஹீபா⁴வே ஸம்பஜானகாரினா ப⁴விதப்³ப³ம். இத³ம், மஹாராஜ, கூபஸ்ஸ ஏகம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, ப⁴க³வதா தே³வாதிதே³வேன ‘ஸதோ, பி⁴க்க²வே, பி⁴க்கு² விஹரேய்ய ஸம்பஜானோ, அயம் வோ அம்ஹாகம் அனுஸாஸனீ’’’தி.

கூபங்க³பஞ்ஹோ ஸத்தமோ.

8. நியாமகங்க³பஞ்ஹோ

8. ‘‘ப⁴ந்தே நாக³ஸேன, ‘நியாமகஸ்ஸ தீணி அங்கா³னி க³ஹேதப்³பா³னீ’தி யம் வதே³ஸி, கதமானி தானி தீணி அங்கா³னி க³ஹேதப்³பா³னீ’’தி? ‘‘யதா², மஹாராஜ, நியாமகோ ரத்திந்தி³வம் ஸததம் ஸமிதம் அப்பமத்தோ யத்தப்பயத்தோ நாவம் ஸாரேதி, ஏவமேவ கோ², மஹாராஜ, யோகி³னா யோகா³வசரேன சித்தம் நியாமயமானேன ரத்திந்தி³வம் ஸததம் ஸமிதம் அப்பமத்தேன யத்தப்பயத்தேன யோனிஸோ மனஸிகாரேன சித்தம் நியாமேதப்³ப³ம். இத³ம், மஹாராஜ, நியாமகஸ்ஸ பட²மம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, ப⁴க³வதா தே³வாதிதே³வேன த⁴ம்மபதே³ –

‘‘‘அப்பமாத³ரதா ஹோத², ஸசித்தமனுரக்க²த²;

து³க்³கா³ உத்³த⁴ரத²த்தானம், பங்கே ஸன்னோவ [ஸத்தோவ (ஸீ. பீ.)] குஞ்ஜரோ’தி.

‘‘புன சபரம், மஹாராஜ, நியாமகஸ்ஸ யம் கிஞ்சி மஹாஸமுத்³தே³ கல்யாணம் வா பாபகம் வா, ஸப்³ப³ம் தம் விதி³தம் ஹோதி, ஏவமேவ கோ², மஹாராஜ, யோகி³னா யோகா³வசரேன குஸலாகுஸலம் ஸாவஜ்ஜானவஜ்ஜம் ஹீனப்பணீதம் கண்ஹஸுக்கஸப்படிபா⁴க³ம் விஜானிதப்³ப³ம். இத³ம், மஹாராஜ, நியாமகஸ்ஸ து³தியம் அங்க³ம் க³ஹேதப்³ப³ம்.

‘‘புன சபரம், மஹாராஜ, நியாமகோ யந்தே முத்³தி³கம் தே³தி ‘மா கோசி யந்தம் ஆமஸித்தா²’தி, ஏவமேவ கோ², மஹாராஜ, யோகி³னா யோகா³வசரேன சித்தே ஸம்வரமுத்³தி³கா தா³தப்³பா³ ‘மா கிஞ்சி பாபகம் அகுஸலவிதக்கம் விதக்கேஸீ’தி, இத³ம், மஹாராஜ, நியாமகஸ்ஸ ததியம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, ப⁴க³வதா தே³வாதிதே³வேன ஸம்யுத்தனிகாயவரே ‘மா, பி⁴க்க²வே, பாபகே அகுஸலே விதக்கே விதக்கேய்யாத², ஸேய்யதீ²த³ம், காமவிதக்கம் ப்³யாபாத³விதக்கம் விஹிம்ஸாவிதக்க’’’ந்தி.

நியாமகங்க³பஞ்ஹோ அட்ட²மோ.

9. கம்மகாரங்க³பஞ்ஹோ

9. ‘‘ப⁴ந்தே நாக³ஸேன, ‘கம்மகாரஸ்ஸ ஏகம் அங்க³ம் க³ஹேதப்³ப³’ந்தி யம் வதே³ஸி, கதமம் தம் ஏகம் அங்க³ம் க³ஹேதப்³ப³’’ந்தி? ‘‘யதா², மஹாராஜ, கம்மகாரோ ஏவம் சிந்தயதி ‘ப⁴தகோ அஹம் இமாய நாவாய கம்மம் கரோமி, இமாயாஹம் நாவாய வாஹஸா ப⁴த்தவேதனம் லபா⁴மி, ந மே பமாதோ³ கரணீயோ, அப்பமாதே³ன மே அயம் நாவா வாஹேதப்³பா³’தி, ஏவமேவ கோ², மஹாராஜ, யோகி³னா யோகா³வசரேன ஏவம் சிந்தயிதப்³ப³ம் ‘இமம் கோ² அஹம் சாதுமஹாபூ⁴திகம் காயம் ஸம்மஸந்தோ ஸததம் ஸமிதம் அப்பமத்தோ உபட்டி²தஸ்ஸதி ஸதோ ஸம்பஜானோ ஸமாஹிதோ ஏகக்³க³சித்தோ ஜாதிஜராப்³யாதி⁴மரணஸோகபரிதே³வது³க்க²தோ³மனஸ்ஸுபாயாஸேஹி பரிமுச்சிஸ்ஸாமீதி அப்பமாதோ³ மே கரணீயோ’தி, இத³ம், மஹாராஜ, கம்மகாரஸ்ஸ ஏகம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, தே²ரேன ஸாரிபுத்தேன த⁴ம்மஸேனாபதினா –

‘‘‘காயம் இமம் ஸம்மஸத², பரிஜானாத² புனப்புனம்;

காயே ஸபா⁴வம் தி³ஸ்வான, து³க்க²ஸ்ஸந்தம் கரிஸ்ஸதா²’தி.

கம்மகாரங்க³பஞ்ஹோ நவமோ.

10. ஸமுத்³த³ங்க³பஞ்ஹோ

10. ‘‘ப⁴ந்தே நாக³ஸேன, ‘ஸமுத்³த³ஸ்ஸ பஞ்ச அங்கா³னி க³ஹேதப்³பா³னீ’தி யம் வதே³ஸி, கதமானி தானி பஞ்ச அங்கா³னி க³ஹேதப்³பா³னீ’’தி? ‘‘யதா², மஹாராஜ, மஹாஸமுத்³தோ³ மதேன குணபேன ஸத்³தி⁴ம் ந ஸம்வஸதி, ஏவமேவ கோ², மஹாராஜ, யோகி³னா யோகா³வசரேன ராக³தோ³ஸமோஹமானதி³ட்டி²மக்க²பளாஸஇஸ்ஸாமச்ச²ரியமாயாஸாடே²ய்யகுடிலவிஸமது³ச்சரிதகிலேஸமலேஹி ஸத்³தி⁴ம் ந ஸம்வஸிதப்³ப³ம். இத³ம், மஹாராஜ, ஸமுத்³த³ஸ்ஸ பட²மம் அங்க³ம் க³ஹேதப்³ப³ம்.

‘‘புன சபரம், மஹாராஜ, மஹாஸமுத்³தோ³ முத்தாமணிவேளுரியஸங்க²ஸிலாபவாளப²லிகமணிவிவித⁴ரதனனிசயம் தா⁴ரேந்தோ பித³ஹதி, ந ப³ஹி விகிரதி. ஏவமேவ கோ², மஹாராஜ, யோகி³னா யோகா³வசரேன மக்³க³ப²லஜா²னவிமோக்க²ஸமாதி⁴ஸமாபத்திவிபஸ்ஸனாபி⁴ஞ்ஞாவிவித⁴கு³ணரதனானி அதி⁴க³ந்த்வா பித³ஹிதப்³பா³னி, ந ப³ஹி நீஹரிதப்³பா³னி. இத³ம், மஹாராஜ, ஸமுத்³த³ஸ்ஸ து³தியம் அங்க³ம் க³ஹேதப்³ப³ம்.

‘‘புன சபரம், மஹாராஜ, மஹாஸமுத்³தோ³ மஹந்தேஹி மஹாபூ⁴தேஹி ஸத்³தி⁴ம் ஸம்வஸதி. ஏவமேவ கோ², மஹாராஜ, யோகி³னா யோகா³வசரேன அப்பிச்ச²ம் ஸந்துட்ட²ம் து⁴தவாத³ம் ஸல்லேக²வுத்திம் ஆசாரஸம்பன்னம் லஜ்ஜிம் பேஸலம் க³ரும் பா⁴வனீயம் வத்தாரம் வசனக்க²மம் சோத³கம் பாபக³ரஹிம் ஓவாத³கம் அனுஸாஸகம் விஞ்ஞாபகம் ஸந்த³ஸ்ஸகம் ஸமாத³பகம் ஸமுத்தேஜகம் ஸம்பஹம்ஸகம் கல்யாணமித்தம் ஸப்³ரஹ்மசாரிம் நிஸ்ஸாய வஸிதப்³ப³ம். இத³ம், மஹாராஜ, மஹாஸமுத்³த³ஸ்ஸ ததியம் அங்க³ம் க³ஹேதப்³ப³ம்.

‘‘புன சபரம், மஹாராஜ, மஹாஸமுத்³தோ³ நவஸலிலஸம்புண்ணாஹி க³ங்கா³யமுனாஅசிரவதீஸரபூ⁴மஹீஆதீ³ஹி நதீ³ஸதஸஹஸ்ஸேஹி அந்தலிக்கே² ஸலிலதா⁴ராஹி ச பூரிதோபி ஸகம் வேலம் நாதிவத்ததி. ஏவமேவ கோ², மஹாராஜ, யோகி³னா யோகா³வசரேன லாப⁴ஸக்காரஸிலோகவந்த³னமானனபூஜனகாரணா ஜீவிதஹேதுபி ஸஞ்சிச்ச ஸிக்கா²பத³வீதிக்கமோ ந கரணீயோ. இத³ம், மஹாராஜ, மஹாஸமுத்³த³ஸ்ஸ சதுத்த²ம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, ப⁴க³வதா தே³வாதிதே³வேன –

‘ஸேய்யதா²பி, மஹாராஜ [பஹாராத⁴ (ஸீ. பீ.)], மஹாஸமுத்³தோ³ டி²தத⁴ம்மோ வேலம் நாதிக்கமதி, ஏவமேவ கோ², மஹாராஜ, யம் மஹா ஸாவகானம் ஸிக்கா²பத³ம் பஞ்ஞத்தம், தம் மம ஸாவகா ஜீவிதஹேதுபி நாதிக்கமந்தீ’தி.

‘‘புன சபரம், மஹாராஜ, மஹாஸமுத்³தோ³ ஸப்³ப³ஸவந்தீஹி க³ங்கா³யமுனாஅசிரவதீஸரபூ⁴மஹீஹி அந்தலிக்கே² உத³கதா⁴ராஹிபி ந பரிபூரதி. ஏவமேவ கோ², மஹாராஜ, யோகி³னா யோகா³வசரேன உத்³தே³ஸபரிபுச்சா²ஸவனதா⁴ரணவினிச்ச²யஅபி⁴த⁴ம்மவினயகா³ள்ஹஸுத்தந்தவிக்³க³ஹபத³னிக்கே²பபத³ஸந்தி⁴ பத³விப⁴த்தினவங்க³ஜினஸாஸனவரம் ஸுணந்தேனாபி ந தப்பிதப்³ப³ம். இத³ம், மஹாராஜ, மஹாஸமுத்³த³ஸ்ஸ பஞ்சமம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, ப⁴க³வதா தே³வாதிதே³வேன ஸுதஸோமஜாதகே –

‘‘‘அக்³கி³ யதா² திணகட்ட²ம் த³ஹந்தோ, ந தப்பதி ஸாக³ரோ வா நதீ³ஹி;

ஏவம்பி சே [ஏவம்பி வே (ஸ்யா.), ஏவம் ஹி மே (க.) ஜா. 1 அஸீதினிபாதே] பண்டி³தா ராஜஸேட்ட², ஸுத்வா ந தப்பந்தி ஸுபா⁴ஸிதேனா’’’தி.

ஸமுத்³த³ங்க³பஞ்ஹோ த³ஸமோ.ஸமுத்³த³வக்³கோ³ து³தியோ.

தஸ்ஸுத்³தா³னம் –

லாபு³லதா ச பது³மம், பீ³ஜம் ஸாலகல்யாணிகா;

நாவா ச நாவாலக்³க³னம், கூபோ நியாமகோ ததா²;

கம்மகாரோ ஸமுத்³தோ³ ச, வக்³கோ³ தேன பவுச்சதீதி.