3. பத²வீவக்³கோ³

1. பத²வீஅங்க³பஞ்ஹோ

1. ‘‘ப⁴ந்தே நாக³ஸேன, ‘பத²வியா பஞ்ச அங்கா³னி க³ஹேதப்³பா³னீ’தி யம் வதே³ஸி, கதமானி தானி பஞ்ச அங்கா³னி க³ஹேதப்³பா³னீ’’தி? ‘‘யதா², மஹாராஜ, பத²வீ இட்டா²னிட்டா²னி கப்பூராக³ருதக³ரசந்த³னகுங்குமாதீ³னி ஆகிரந்தேபி பித்தஸேம்ஹபுப்³ப³ருஹிரஸேத³மேத³கே²ளஸிங்கா⁴ணிகலஸிக- முத்தகரீஸாதீ³னி ஆகிரந்தேபி தாதி³ஸா யேவ, ஏவமேவ கோ², மஹாராஜ, யோகி³னா யோகா³வசரேன இட்டா²னிட்டே² லாபா⁴லாபே⁴ யஸாயஸே நிந்தா³பஸம்ஸாய ஸுக²து³க்கே² ஸப்³ப³த்த² தாதி³னா யேவ ப⁴விதப்³ப³ம். இத³ம், மஹாராஜ, பத²வியா பட²மம் அங்க³ம் க³ஹேதப்³ப³ம்.

‘‘புன சபரம், மஹாராஜ, பத²வீ மண்ட³னவிபூ⁴ஸனாபக³தா ஸகக³ந்த⁴பரிபா⁴விதா, ஏவமேவ கோ², மஹாராஜ, யோகி³னா யோகா³வசரேன விபூ⁴ஸனாபக³தேன ஸகஸீலக³ந்த⁴பரிபா⁴விதேன ப⁴விதப்³ப³ம். இத³ம், மஹாராஜ, பத²வியா து³தியம் அங்க³ம் க³ஹேதப்³ப³ம்.

‘‘புன சபரம், மஹாராஜ, பத²வீ நிரந்தரா அக²ண்ட³ச்சி²த்³தா³ அஸுஸிரா ப³ஹலா க⁴னா வித்தி²ண்ணா, ஏவமேவ கோ², மஹாராஜ, யோகி³னா யோகா³வசரேன நிரந்தரமக²ண்ட³ச்சி²த்³த³மஸுஸிரப³ஹலக⁴னவித்தி²ண்ணஸீலேன ப⁴விதப்³ப³ம். இத³ம், மஹாராஜ, பத²வியா ததியம் அங்க³ம் க³ஹேதப்³ப³ம்.

‘‘புன சபரம், மஹாராஜ, பத²வீ கா³மனிக³மனக³ரஜனபத³ருக்க²பப்³ப³தனதீ³தளாகபோக்க²ரணீமிக³பக்கி²மனுஜனரனாரிக³ணம் தா⁴ரேந்தீபி அகிலாஸு ஹோதி, ஏவமேவ கோ², மஹாராஜ, யோகி³னா யோகா³வசரேன ஓவத³ந்தேனபி அனுஸாஸந்தேனபி விஞ்ஞாபேந்தேனபி ஸந்த³ஸ்ஸேந்தேனபி ஸமாத³பேந்தேனபி ஸமுத்தேஜேந்தேனபி ஸம்பஹம்ஸேந்தேனபி த⁴ம்மதே³ஸனாஸு அகிலாஸுனா ப⁴விதப்³ப³ம். இத³ம், மஹாராஜ, பத²வியா சதுத்த²ம் அங்க³ம் க³ஹேதப்³ப³ம்.

‘‘புன சபரம், மஹாராஜ, பத²வீ அனுனயப்படிக⁴விப்பமுத்தா, ஏவமேவ கோ², மஹாராஜ, யோகி³னா யோகா³வசரேன அனுனயப்படிக⁴விப்பமுத்தேன பத²விஸமேன சேதஸா விஹரிதப்³ப³ம். இத³ம், மஹாராஜ, பத²வியா பஞ்சமம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, உபாஸிகாய சூளஸுப⁴த்³தா³ய ஸகஸமணே பரிகித்தயமானாய –

‘‘‘ஏகஞ்சே பா³ஹம் வாஸியா, தச்சே² குபிதமானஸா [குபிதமானஸோ (க.)];

ஏகஞ்சேபா³ஹம் க³ந்தே⁴ன, ஆலிம்பேய்ய பமோதி³தா [பமோதி³தோ (க.)].

‘‘‘அமுஸ்மிம் படிகோ⁴ நத்தி², ராகோ³ அஸ்மிம் ந விஜ்ஜதி;

பத²வீஸமசித்தா தே, தாதி³ஸா ஸமணா மமா’’’தி.

பத²வீஅங்க³பஞ்ஹோ பட²மோ.

2. ஆபங்க³பஞ்ஹோ

2. ‘‘ப⁴ந்தே நாக³ஸேன, ‘ஆபஸ்ஸ பஞ்ச அங்கா³னி க³ஹேதப்³பா³னீ’தி யம் வதே³ஸி, கதமானி தானி பஞ்ச அங்கா³னி க³ஹேதப்³பா³னீ’’தி? ‘‘யதா², மஹாராஜ, ஆபோ ஸுஸண்டி²தமகம்பிதமலுளிதஸபா⁴வபரிஸுத்³தோ⁴, ஏவமேவ கோ², மஹாராஜ, யோகி³னா யோகா³வசரேன குஹனலபனனேமித்தகனிப்பேஸிகதம் அபனேத்வா ஸுஸண்டி²தமகம்பிதமலுளிதஸபா⁴வபரிஸுத்³தா⁴சாரேன ப⁴விதப்³ப³ம். இத³ம், மஹாராஜ, ஆபஸ்ஸ பட²மம் அங்க³ம் க³ஹேதப்³ப³ம்.

‘‘புன சபரம், மஹாராஜ, ஆபோ ஸீதலஸபா⁴வஸண்டி²தோ, ஏவமேவ கோ², மஹாராஜ, யோகி³னா யோகா³வசரேன ஸப்³ப³ஸத்தேஸு க²ந்திமேத்தானுத்³த³யஸம்பன்னேன ஹிதேஸினா அனுகம்பகேன ப⁴விதப்³ப³ம். இத³ம், மஹாராஜ, ஆபஸ்ஸ து³தியம் அங்க³ம் க³ஹேதப்³ப³ம்.

‘‘புன சபரம், மஹாராஜ, ஆபோ அஸுசிம் ஸுசிம் கரோதி, ஏவமேவ கோ², மஹாராஜ, யோகி³னா யோகா³வசரேன கா³மே வா அரஞ்ஞே வா உபஜ்ஜா²யே உபஜ்ஜா²யமத்தேஸு ஆசரியே ஆசரியமத்தேஸு ஸப்³ப³த்த² அனதி⁴கரணேன ப⁴விதப்³ப³ம் அனவஸேஸகாரினா. இத³ம், மஹாராஜ, ஆபஸ்ஸ ததியம் அங்க³ம் க³ஹேதப்³ப³ம்.

‘‘புன சபரம், மஹாராஜ, ஆபோ ப³ஹுஜனபத்தி²தோ, ஏவமேவ கோ², மஹாராஜ, யோகி³னா யோகா³வசரேன அப்பிச்ச²ஸந்துட்ட²பவிவித்தபடிஸல்லானேன ஸததம் ஸப்³ப³லோகமபி⁴பத்தி²தேன ப⁴விதப்³ப³ம். இத³ம், மஹாராஜ, ஆபஸ்ஸ சதுத்த²ம் அங்க³ம் க³ஹேதப்³ப³ம்.

‘‘புன சபரம், மஹாராஜ, ஆபோ ந கஸ்ஸசி அஹிதமுபத³ஹதி, ஏவமேவ கோ², மஹாராஜ, யோகி³னா யோகா³வசரேன பரப⁴ண்ட³னகலஹவிக்³க³ஹவிவாத³ரித்தஜ்ஜா²னஅரதிஜனனம் காயவசீசித்தேஹி பாபகம் ந கரணீயம். இத³ம், மஹாராஜ, ஆபஸ்ஸ பஞ்சமம் அங்க³ம் க³ஹேதப்³ப³ம். பா⁴ஸிதம்பேதம் மஹாராஜ, ப⁴க³வதா, தே³வாதிதே³வேன கண்ஹஜாதகே –

‘‘‘வரஞ்சே மே அதோ³ ஸக்க, ஸப்³ப³பூ⁴தானமிஸ்ஸர;

ந மனோ வா ஸரீரம் வா, மம்-கதே ஸக்க கஸ்ஸசி;

கதா³சி உபஹஞ்ஞேத², ஏதம் ஸக்க வரம் வரே’’’தி.

ஆபங்க³பஞ்ஹோ து³தியோ.

3. தேஜங்க³பஞ்ஹோ

3. ‘‘ப⁴ந்தே நாக³ஸேன, ‘தேஜஸ்ஸ பஞ்ச அங்கா³னி க³ஹேதப்³பா³னீ’தி யம் வதே³ஸி, கதமானி தானி பஞ்ச அங்கா³னி க³ஹேதப்³பா³னீ’’தி? ‘‘யதா², மஹாராஜ, தேஜோ திணகட்ட²ஸாகா²பலாஸம் ட³ஹதி, ஏவமேவ கோ², மஹாராஜ, யோகி³னா யோகா³வசரேன யே தே அப்³ப⁴ந்தரா வா பா³ஹிரா வா கிலேஸா இட்டா²னிட்டா²ரம்மணானுப⁴வனா, ஸப்³பே³ தே ஞாணக்³கி³னா ட³ஹிதப்³பா³. இத³ம், மஹாராஜ, தேஜஸ்ஸ பட²மம் அங்க³ம் க³ஹேதப்³ப³ம்.

‘‘புன சபரம், மஹாராஜ, தேஜோ நித்³த³யோ அகாருணிகோ, ஏவமேவ கோ², மஹாராஜ, யோகி³னா யோகா³வசரேன ஸப்³ப³கிலேஸேஸு காருஞ்ஞானுத்³த³யா ந காதப்³பா³. இத³ம், மஹாராஜ, தேஜஸ்ஸ து³தியம் அங்க³ம் க³ஹேதப்³ப³ம்.

‘‘புன சபரம், மஹாராஜ, தேஜோ ஸீதம் படிஹனதி, ஏவமேவ கோ², மஹாராஜ, யோகி³னா யோகா³வசரேன வீரியஸந்தாபதேஜம் அபி⁴ஜனேத்வா கிலேஸா படிஹந்தப்³பா³. இத³ம், மஹாராஜ, தேஜஸ்ஸ ததியம் அங்க³ம் க³ஹேதப்³ப³ம்.

‘‘புன சபரம், மஹாராஜ, தேஜோ அனுனயப்படிக⁴விப்பமுத்தோ உண்ஹமபி⁴ஜனேதி, ஏவமேவ கோ², மஹாராஜ, யோகி³னா யோகா³வசரேன அனுனயப்படிக⁴விப்பமுத்தேன தேஜோஸமேன சேதஸா விஹரிதப்³ப³ம். இத³ம், மஹாராஜ, தேஜஸ்ஸ சதுத்த²ம் அங்க³ம் க³ஹேதப்³ப³ம்.

‘‘புன சபரம், மஹாராஜ, தேஜோ அந்த⁴காரம் வித⁴மித்வா [வித⁴மதி (ஸீ. பீ. க.)] ஆலோகம் த³ஸ்ஸயதி, ஏவமேவ கோ², மஹாராஜ, யோகி³னா யோகா³வசரேன அவிஜ்ஜந்த⁴காரம் வித⁴மித்வா ஞாணாலோகம் த³ஸ்ஸயிதப்³ப³ம். இத³ம், மஹாராஜ, தேஜஸ்ஸ பஞ்சமம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, ப⁴க³வதா தே³வாதிதே³வேன ஸகம் புத்தம் ராஹுலம் ஓவத³ந்தேன –

‘தேஜோஸமம் [ம. நி. 2.119], ராஹுல, பா⁴வனம் பா⁴வேஹி, தேஜோஸமம் ஹி தே, ராஹுல, பா⁴வனம் பா⁴வயதோ உப்பன்னா? மனாபாமனாபா ப²ஸ்ஸா சித்தம் ந பரியாதா³ய ட²ஸ்ஸந்தீ’’’தி.

தேஜங்க³பஞ்ஹோ ததியோ.

4. வாயுங்க³பஞ்ஹோ

4. ‘‘ப⁴ந்தே நாக³ஸேன, ‘வாயுஸ்ஸ பஞ்ச அங்கா³னி க³ஹேதப்³பா³னீ’தி யம் வதே³ஸி, கதமானி தானி பஞ்ச அங்கா³னி க³ஹேதப்³பா³னீ’’தி? ‘‘யதா², மஹாராஜ, வாயு ஸுபுப்பி²தவனஸண்ட³ந்தரம் அபி⁴வாயதி, ஏவமேவ கோ², மஹாராஜ, யோகி³னா யோகா³வசரேன விமுத்திவரகுஸுமபுப்பி²தாரம்மணவனந்தரே ரமிதப்³ப³ம். இத³ம், மஹாராஜ, வாயுஸ்ஸ பட²மம் அங்க³ம் க³ஹேதப்³ப³ம்.

‘‘புன சபரம், மஹாராஜ, வாயு த⁴ரணீருஹபாத³பக³ணே மத²யதி, ஏவமேவ கோ², மஹாராஜ, யோகி³னா யோகா³வசரேன வனந்தரக³தேன ஸங்கா²ரே விசினந்தேன கிலேஸா மத²யிதப்³பா³. இத³ம், மஹாராஜ, வாயுஸ்ஸ து³தியம் அங்க³ம் க³ஹேதப்³ப³ம்.

‘‘புன சபரம், மஹாராஜ, வாயு ஆகாஸே சரதி, ஏவமேவ கோ², மஹாராஜ, யோகி³னா யோகா³வசரேன லோகுத்தரத⁴ம்மேஸு மானஸம் ஸஞ்சாரயிதப்³ப³ம். இத³ம், மஹாராஜ, வாயுஸ்ஸ ததியம் அங்க³ம் க³ஹேதப்³ப³ம்.

‘‘புன சபரம், மஹாராஜ, வாயு க³ந்த⁴ம் அனுப⁴வதி, ஏவமேவ கோ², மஹாராஜ, யோகி³னா யோகா³வசரேன அத்தனோ ஸீலவரஸுரபி⁴க³ந்தோ⁴ [ஸீலஸுரபி⁴க³ந்தோ³ (ஸீ. பீ.)] அனுப⁴விதப்³போ³. இத³ம், மஹாராஜ, வாயுஸ்ஸ சதுத்த²ம் அங்க³ம் க³ஹேதப்³ப³ம்.

‘‘புன சபரம், மஹாராஜ, வாயு நிராலயோ அனிகேதவாஸீ, ஏவமேவ கோ², மஹாராஜ, யோகி³னா யோகா³வசரேன நிராலயமனிகேதமஸந்த²வேன ஸப்³ப³த்த² விமுத்தேன ப⁴விதப்³ப³ம். இத³ம், மஹாராஜ, வாயுஸ்ஸ பஞ்சமம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, ப⁴க³வதா தே³வாதிதே³வேன ஸுத்தனிபாதே –

‘‘‘ஸந்த²வாதோ ப⁴யம் ஜாதம், நிகேதா ஜாயதே ரஜோ;

அனிகேதமஸந்த²வம், ஏதம் வே முனித³ஸ்ஸன’’’ந்தி.

வாயுங்க³பஞ்ஹோ சதுத்தோ².

5. பப்³ப³தங்க³பஞ்ஹோ

5. ‘‘ப⁴ந்தே நாக³ஸேன, ‘பப்³ப³தஸ்ஸ பஞ்ச அங்கா³னி க³ஹேதப்³பா³னீ’தி யம் வதே³ஸி, கதமானி தானி பஞ்ச அங்கா³னி க³ஹேதப்³பா³னீ’’தி? ‘‘யதா², மஹாராஜ, பப்³ப³தோ அசலோ அகம்பிதோ [அகம்பியோ (ஸீ. பீ.)] அஸம்பவேதீ⁴, ஏவமேவ கோ², மஹாராஜ, யோகி³னா யோகா³வசரேன ஸம்மானனே விமானனே ஸக்காரே அஸக்காரே க³ருகாரே அக³ருகாரே யஸே அயஸே நிந்தா³ய பஸம்ஸாய ஸுகே² து³க்கே² இட்டா²னிட்டே²ஸு ஸப்³ப³த்த² ரூபஸத்³த³க³ந்த⁴ரஸபோ²ட்ட²ப்³ப³த⁴ம்மேஸு ரஜனீயேஸு ந ரஜ்ஜிதப்³ப³ம், து³ஸ்ஸனீயேஸு ந து³ஸ்ஸிதப்³ப³ம், முய்ஹனீயேஸு ந முய்ஹிதப்³ப³ம், ந கம்பிதப்³ப³ம் ந சலிதப்³ப³ம், பப்³ப³தேன விய அசலேன ப⁴விதப்³ப³ம். இத³ம், மஹாராஜ, பப்³ப³தஸ்ஸ பட²மம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, ப⁴க³வதா தே³வாதிதே³வேன –

‘‘‘ஸேலோ யதா² ஏகக⁴னோ [ஏகக்³க⁴னோ (க.) த⁴. ப. 81 த⁴ம்மபதே³], வாதேன ந ஸமீரதி;

ஏவம் நிந்தா³பஸம்ஸாஸு, ந ஸமிஞ்ஜந்தி பண்டி³தா’தி.

‘‘புன சபரம், மஹாராஜ, பப்³ப³தோ த²த்³தோ⁴ ந கேனசி ஸம்ஸட்டோ², ஏவமேவ கோ², மஹாராஜ, யோகி³னா யோகா³வசரேன த²த்³தே⁴ன அஸம்ஸட்டே²ன ப⁴விதப்³ப³ம், ந கேனசி ஸம்ஸக்³கோ³ கரணீயோ. இத³ம், மஹாராஜ, பப்³ப³தஸ்ஸ து³தியம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, ப⁴க³வதா தே³வாதிதே³வேன –

‘‘‘அஸம்ஸட்ட²ம் க³ஹட்டே²ஹி, அனாகா³ரேஹி சூப⁴யம்;

அனோகஸாரிமப்பிச்ச²ம், தமஹம் ப்³ரூமி ப்³ராஹ்மண’ந்தி.

‘‘புன சபரம், மஹாராஜ, பப்³ப³தே பீ³ஜம் ந விரூஹதி, ஏவமேவ கோ², மஹாராஜ, யோகி³னா யோகா³வசரேன ஸகமானஸே கிலேஸா ந விரூஹாபேதப்³பா³. இத³ம், மஹாராஜ, பப்³ப³தஸ்ஸ ததியம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, தே²ரேன ஸுபூ⁴தினா –

‘‘‘ராகூ³பஸம்ஹிதம் சித்தம், யதா³ உப்பஜ்ஜதே மம;

ஸயம்வ பச்சவேக்கா²மி [பச்சவேக்கி²த்வா (ஸப்³ப³த்த²)], ஏகக்³கோ³ [ஏககோ (ஸப்³ப³த்த²)] தம் த³மேமஹம்.

‘‘‘ரஜ்ஜஸே [ரஜ்ஜஸி (ஸீ.), ரஞ்ஜஸி (பீ.)] ரஜனீயே ச, து³ஸ்ஸனீயே ச து³ஸ்ஸஸே;

முய்ஹஸே [முய்ஹஸி (ஸீ.)] மோஹனீயே ச, நிக்க²மஸ்ஸு வனா துவம்.

‘‘‘விஸுத்³தா⁴னம் அயம் வாஸோ, நிம்மலானம் தபஸ்ஸினம்;

மா கோ² விஸுத்³த⁴ம் தூ³ஸேஸி, நிக்க²மஸ்ஸு வனா துவ’ந்தி.

‘‘புன சபரம், மஹாராஜ, பப்³ப³தோ அச்சுக்³க³தோ, ஏவமேவ கோ², மஹாராஜ, யோகி³னா யோகா³வசரேன ஞாணச்சுக்³க³தேன ப⁴விதப்³ப³ம். இத³ம், மஹாராஜ, பப்³ப³தஸ்ஸ சதுத்த²ம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, ப⁴க³வதா தே³வாதிதே³வேன –

‘‘‘பமாத³ம் அப்பமாதே³ன, யதா³ நுத³தி பண்டி³தோ;

பஞ்ஞாபாஸாத³மாருய்ஹ, அஸோகோ ஸோகினிம் பஜம்;

பப்³ப³தட்டோ²வ பூ⁴மட்டே² [பு⁴ம்மட்டே² (ஸீ. பீ.)], தீ⁴ரோ பா³லே அவேக்க²தீ’தி.

‘‘புன சபரம், மஹாராஜ, பப்³ப³தோ அனுன்னதோ அனோனதோ, ஏவமேவ கோ², மஹாராஜ, யோகி³னா யோகா³வசரேன உன்னதாவனதி ந கரணீயா. இத³ம், மஹாராஜ, பப்³ப³தஸ்ஸ பஞ்சமம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, உபாஸிகாய சூளஸுப⁴த்³தா³ய ஸகஸமணே பரிகித்தயமானாய –

‘‘‘லாபே⁴ன உன்னதோ லோகோ, அலாபே⁴ன ச ஓனதோ;

லாபா⁴லாபே⁴ன ஏகத்தா² [ஏகட்டா² (ஸீ. பீ.)], தாதி³ஸா ஸமணா மமா’’’தி.

பப்³ப³தங்க³பஞ்ஹோ பஞ்சமோ.

6. ஆகாஸங்க³பஞ்ஹோ

6. ‘‘ப⁴ந்தே நாக³ஸேன, ‘ஆகாஸஸ்ஸ பஞ்ச அங்கா³னி க³ஹேதப்³பா³னீ’தி யம் வதே³ஸி, கதமானி தானி பஞ்ச அங்கா³னி க³ஹேதப்³பா³னீ’’தி? ‘‘யதா², மஹாராஜ, ஆகாஸோ ஸப்³ப³ஸோ அக³ய்ஹோ, ஏவமேவ கோ², மஹாராஜ, யோகி³னா யோகா³வசரேன ஸப்³ப³ஸோ கிலேஸேஹி அக³ய்ஹேன ப⁴விதப்³ப³ம். இத³ம், மஹாராஜ, ஆகாஸஸ்ஸ பட²மம் அங்க³ம் க³ஹேதப்³ப³ம்.

‘‘புன சபரம், மஹாராஜ, ஆகாஸோ இஸிதாபஸபூ⁴ததி³ஜக³ணானுஸஞ்சரிதோ, ஏவமேவ கோ², மஹாராஜ, யோகி³னா யோகா³வசரேன ‘அனிச்சம் து³க்க²ம் அனத்தா’தி ஸங்கா²ரேஸு மானஸம் ஸஞ்சாரயிதப்³ப³ம். இத³ம், மஹாராஜ, ஆகாஸஸ்ஸ து³தியம் அங்க³ம் க³ஹேதப்³ப³ம்.

‘‘புன சபரம், மஹாராஜ, ஆகாஸோ ஸந்தாஸனீயோ, ஏவமேவ கோ², மஹாராஜ, யோகி³னா யோகா³வசரேன ஸப்³ப³ப⁴வபடிஸந்தீ⁴ஸு மானஸம் உப்³பே³ஜயிதப்³ப³ம், அஸ்ஸாதோ³ ந காதப்³போ³. இத³ம், மஹாராஜ, ஆகாஸஸ்ஸ ததியம் அங்க³ம் க³ஹேதப்³ப³ம்.

‘‘புன சபரம், மஹாராஜ, ஆகாஸோ அனந்தோ அப்பமாணோ அபரிமேய்யோ, ஏவமேவ கோ², மஹாராஜ, யோகி³னா யோகா³வசரேன அனந்தஸீலேன அபரிமிதஞாணேன ப⁴விதப்³ப³ம். இத³ம், மஹாராஜ, ஆகாஸஸ்ஸ சதுத்த²ம் அங்க³ம் க³ஹேதப்³ப³ம்.

‘‘புன சபரம், மஹாராஜ, ஆகாஸோ அலக்³கோ³ அஸத்தோ அப்பதிட்டி²தோ அபலிபு³த்³தோ⁴, ஏவமேவ கோ², மஹாராஜ, யோகி³னா யோகா³வசரேன குலே க³ணே லாபே⁴ ஆவாஸே பலிபோ³தே⁴ பச்சயே ஸப்³ப³கிலேஸேஸு ச ஸப்³ப³த்த² அலக்³கே³ன ப⁴விதப்³ப³ம், அனாஸத்தேன அப்பதிட்டி²தேன அபலிபு³த்³தே⁴ன ப⁴விதப்³ப³ம். இத³ம், மஹாராஜ, ஆகாஸஸ்ஸ பஞ்சமம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, ப⁴க³வதா தே³வாதிதே³வேன ஸகம் புத்தம் ராஹுலம் ஓவத³ந்தேன – ‘ஸேய்யதா²பி, ராஹுல [ம. நி. 2.119], ஆகாஸோ ந கத்த²சி பதிட்டி²தோ, ஏவமேவ கோ² த்வம், ராஹுல, ஆகாஸஸமம் பா⁴வனம் பா⁴வேஹி, ஆகாஸஸமம் ஹி தே, ராஹுல, பா⁴வனம் பா⁴வயதோ உப்பன்னா மனாபாமனாபா ப²ஸ்ஸா சித்தம் பரியாதா³ய ட²ஸ்ஸந்தீ’’’தி.

ஆகாஸங்க³பஞ்ஹோ ச²ட்டோ².

7. சந்த³ங்க³பஞ்ஹோ

7. ‘‘ப⁴ந்தே நாக³ஸேன, ‘சந்த³ஸ்ஸ பஞ்ச அங்கா³னி க³ஹேதப்³பா³னீ’தி யம் வதே³ஸி, கதமானி தானி பஞ்ச அங்கா³னி க³ஹேதப்³பா³னீ’’தி? ‘‘யதா², மஹாராஜ, சந்தோ³ ஸுக்கபக்கே² உத³யந்தோ உத்தருத்தரிம் வட்³ட⁴தி, ஏவமேவ கோ², மஹாராஜ, யோகி³னா யோகா³வசரேன ஆசாரஸீலகு³ணவத்தப்படிபத்தியா ஆக³மாதி⁴க³மே படிஸல்லானே ஸதிபட்டா²னே இந்த்³ரியேஸு கு³த்தத்³வாரதாய போ⁴ஜனே மத்தஞ்ஞுதாய ஜாக³ரியானுயோகே³ உத்தருத்தரிம் வட்³டி⁴தப்³ப³ம். இத³ம், மஹாராஜ, சந்த³ஸ்ஸ பட²மம் அங்க³ம் க³ஹேதப்³ப³ம்.

‘‘புன சபரம், மஹாராஜ, சந்தோ³ உளாராதி⁴பதி, ஏவமேவ கோ², மஹாராஜ, யோகி³னா யோகா³வசரேன உளாரேன ச²ந்தா³தி⁴பதினா ப⁴விதப்³ப³ம். இத³ம், மஹாராஜ, சந்த³ஸ்ஸ து³தியம் அங்க³ம் க³ஹேதப்³ப³ம்.

‘‘புன சபரம், மஹாராஜ, சந்தோ³ நிஸாய சரதி, ஏவமேவ கோ², மஹாராஜ, யோகி³னா யோகா³வசரேன பவிவித்தேன ப⁴விதப்³ப³ம். இத³ம், மஹாராஜ, சந்த³ஸ்ஸ ததியம் அங்க³ம் க³ஹேதப்³ப³ம்.

‘‘புன சபரம், மஹாராஜ, சந்தோ³ விமானகேது, ஏவமேவ கோ², மஹாராஜ, யோகி³னா யோகா³வசரேன ஸீலகேதுனா ப⁴விதப்³ப³ம். இத³ம், மஹாராஜ, சந்த³ஸ்ஸ சதுத்த²ம் அங்க³ம் க³ஹேதப்³ப³ம்.

‘‘புன சபரம், மஹாராஜ, சந்தோ³ ஆயாசிதபத்தி²தோ உதே³தி, ஏவமேவ கோ², மஹாராஜ, யோகி³னா யோகா³வசரேன ஆயாசிதபத்தி²தேன குலானி உபஸங்கமிதப்³பா³னி. இத³ம், மஹாராஜ, சந்த³ஸ்ஸ பஞ்சமம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, ப⁴க³வதா தே³வாதிதே³வேன ஸம்யுத்தனிகாயவரே ‘சந்தூ³பமா, பி⁴க்க²வே, குலானி உபஸங்கமத², அபகஸ்ஸேவ காயம் அபகஸ்ஸ சித்தம் நிச்சனவகா குலேஸு அப்பக³ப்³பா⁴’’’தி [அப்பக³ப்³பா³தி (க.) ஸம். நி. 2.146].

சந்த³ங்க³பஞ்ஹோ ஸத்தமோ.

8. ஸூரியங்க³பஞ்ஹோ

8. ‘‘ப⁴ந்தே நாக³ஸேன, ‘ஸூரியஸ்ஸ [ஸுரியஸ்ஸ (ஸீ. ஸ்யா. பீ.)] ஸத்த அங்கா³னி க³ஹேதப்³பா³னீ’தி யம் வதே³ஸி, கதமானி தானி ஸத்த அங்கா³னி க³ஹேதப்³பா³னீ’’தி? ‘‘யதா², மஹாராஜ, ஸூரியோ ஸப்³ப³ம் உத³கம் பரிஸோஸேதி, ஏவமேவ கோ², மஹாராஜ, யோகி³னா யோகா³வசரேன ஸப்³ப³கிலேஸா அனவஸேஸம் பரிஸோஸேதப்³பா³. இத³ம், மஹாராஜ, ஸூரியஸ்ஸ பட²மம் அங்க³ம் க³ஹேதப்³ப³ம்.

‘‘புன சபரம், மஹாராஜ, ஸூரியோ தமந்த⁴காரம் வித⁴மதி, ஏவமேவ கோ², மஹாராஜ, யோகி³னா யோகா³வசரேன ஸப்³ப³ம் ராக³தமம் தோ³ஸதமம் மோஹதமம் மானதமம் தி³ட்டி²தமம் கிலேஸதமம் ஸப்³ப³ம் து³ச்சரிததமம் வித⁴மயிதப்³ப³ம். இத³ம், மஹாராஜ, ஸூரியஸ்ஸ து³தியம் அங்க³ம் க³ஹேதப்³ப³ம்.

‘‘புன சபரம், மஹாராஜ, ஸூரியோ அபி⁴க்க²ணம் சரதி, ஏவமேவ கோ², மஹாராஜ, யோகி³னா யோகா³வசரேன அபி⁴க்க²ணம் யோனிஸோ மனஸிகாரோ காதப்³போ³. இத³ம், மஹாராஜ, ஸூரியஸ்ஸ ததியம் அங்க³ம் க³ஹேதப்³ப³ம்.

‘‘புன சபரம், மஹாராஜ, ஸூரியோ ரம்ஸிமாலீ, ஏவமேவ கோ², மஹாராஜ, யோகி³னா யோகா³வசரேன ஆரம்மணமாலினா ப⁴விதப்³ப³ம். இத³ம், மஹாராஜ, ஸூரியஸ்ஸ சதுத்த²ம் அங்க³ம் க³ஹேதப்³ப³ம்.

‘‘புன சபரம், மஹாராஜ, ஸூரியோ மஹாஜனகாயம் ஸந்தாபேந்தோ சரதி, ஏவமேவ கோ², மஹாராஜ, யோகி³னா யோகா³வசரேன ஆசாரஸீலகு³ணவத்தப்படிபத்தியா ஜா²னவிமோக்க²ஸமாதி⁴ஸமாபத்திஇந்த்³ரியப³லபோ³ஜ்ஜ²ங்க³ஸதிபட்டா²னஸம்மப்பதா⁴னஇத்³தி⁴பாதே³ஹி ஸதே³வகோ லோகோ ஸந்தாபயிதப்³போ³. இத³ம், மஹாராஜ, ஸூரியஸ்ஸ பஞ்சமம் அங்க³ம் க³ஹேதப்³ப³ம்.

‘‘புன சபரம், மஹாராஜ, ஸூரியோ ராஹுப⁴யா பீ⁴தோ சரதி, ஏவமேவ கோ², மஹாராஜ, யோகி³னா யோகா³வசரேன து³ச்சரிதது³க்³க³திவிஸமகந்தாரவிபாகவினிபாதகிலேஸஜாலஜடிதே தி³ட்டி²ஸங்கா⁴டபடிமுக்கே குபத²பக்க²ந்தே³ கும்மக்³க³படிபன்னே [குமக்³க³படிபன்னே (ஸ்யா. க.)] ஸத்தே தி³ஸ்வா மஹதா ஸம்வேக³ப⁴யேன மானஸம் ஸம்வேஜேதப்³ப³ம். இத³ம், மஹாராஜ, ஸூரியஸ்ஸ ச²ட்ட²ம் அங்க³ம் க³ஹேதப்³ப³ம்.

‘‘புன சபரம், மஹாராஜ, ஸூரியோ கல்யாணபாபகே த³ஸ்ஸேதி, ஏவமேவ கோ², மஹாராஜ, யோகி³னா யோகா³வசரேன இந்த்³ரியப³லபோ³ஜ்ஜ²ங்க³ஸதிபட்டா²னஸம்மப்பதா⁴னஇத்³தி⁴பாத³லோகியலோகுத்தரத⁴ம்மா த³ஸ்ஸேதப்³பா³. இத³ம், மஹாராஜ, ஸூரியஸ்ஸ ஸத்தமம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, தே²ரேன வங்கீ³ஸேன –

‘‘‘யதா²பி ஸூரியோ உத³யந்தோ, ரூபம் த³ஸ்ஸேதி பாணினம்;

ஸுசிஞ்ச அஸுசிஞ்சாபி, கல்யாணஞ்சாபி பாபகம்.

‘‘‘ததா² பி⁴க்கு² த⁴ம்மத⁴ரோ, அவிஜ்ஜாபிஹிதம் ஜனம்;

பத²ம் த³ஸ்ஸேதி விவித⁴ம், ஆதி³ச்சோவுத³யம் யதா²’’’தி.

ஸூரியங்க³பஞ்ஹோ அட்ட²மோ.

9. ஸக்கங்க³பஞ்ஹோ

9. ‘‘ப⁴ந்தே நாக³ஸேன, ‘ஸக்கஸ்ஸ தீணி அங்கா³னி க³ஹேதப்³பா³னீ’தி யம் வதே³ஸி, கதமானி தானி தீணி அங்கா³னி க³ஹேதப்³பா³னீ’’தி? ‘‘யதா², மஹாராஜ, ஸக்கோ ஏகந்தஸுக²ஸமப்பிதோ, ஏவமேவ கோ², மஹாராஜ, யோகி³னா யோகா³வசரேன ஏகந்தபவிவேகஸுகா²பி⁴ரதேன ப⁴விதப்³ப³ம். இத³ம், மஹாராஜ, ஸக்கஸ்ஸ பட²மம் அங்க³ம் க³ஹேதப்³ப³ம்.

‘‘புன சபரம், மஹாராஜ, ஸக்கோ தே³வே தி³ஸ்வா பக்³க³ண்ஹாதி, ஹாஸமபி⁴ஜனேதி, ஏவமேவ கோ², மஹாராஜ, யோகி³னா யோகா³வசரேன குஸலேஸு த⁴ம்மேஸு அலீனமதந்தி³தம் ஸந்தம் மானஸம் பக்³க³ஹேதப்³ப³ம், ஹாஸமபி⁴ஜனேதப்³ப³ம், உட்ட²ஹிதப்³ப³ம் க⁴டிதப்³ப³ம் வாயமிதப்³ப³ம். இத³ம், மஹாராஜ, ஸக்கஸ்ஸ து³தியம் அங்க³ம் க³ஹேதப்³ப³ம்.

‘‘புன சபரம், மஹாராஜ, ஸக்கஸ்ஸ அனபி⁴ரதி நுப்பஜ்ஜதி, ஏவமேவ கோ², மஹாராஜ, யோகி³னா யோகா³வசரேன ஸுஞ்ஞாகா³ரே அனபி⁴ரதி ந உப்பாதே³தப்³பா³. இத³ம், மஹாராஜ, ஸக்கஸ்ஸ ததியம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, தே²ரேன ஸுபூ⁴தினா –

‘‘‘ஸாஸனே தே மஹாவீர, யதோ பப்³ப³ஜிதோ அஹம்;

நாபி⁴ஜானாமி உப்பன்னம், மானஸம் காமஸம்ஹித’’’ந்தி.

ஸக்கங்க³பஞ்ஹோ நவமோ.

10. சக்கவத்திங்க³பஞ்ஹோ

10. ‘‘ப⁴ந்தே நாக³ஸேன, ‘சக்கவத்திஸ்ஸ சத்தாரி அங்கா³னி க³ஹேதப்³பா³னீ’தி யம் வதே³ஸி, கதமானி தானி சத்தாரி அங்கா³னி க³ஹேதப்³பா³னீ’’தி? ‘‘யதா², மஹாராஜ, சக்கவத்தீ சதூஹி ஸங்க³ஹவத்தூ²ஹி ஜனம் ஸங்க³ண்ஹாதி, ஏவமேவ கோ², மஹாராஜ, யோகி³னா யோகா³வசரேன சதஸ்ஸன்னம் பரிஸானம் மானஸம் ஸங்க³ஹேதப்³ப³ம் அனுக்³க³ஹேதப்³ப³ம் ஸம்பஹம்ஸேதப்³ப³ம். இத³ம், மஹாராஜ, சக்கவத்திஸ்ஸ பட²மம் அங்க³ம் க³ஹேதப்³ப³ம்.

‘‘புன சபரம், மஹாராஜ, சக்கவத்திஸ்ஸ விஜிதே சோரா ந உட்ட²ஹந்தி, ஏவமேவ கோ², மஹாராஜ, யோகி³னா யோகா³வசரேன காமராக³ப்³யாபாத³விஹிம்ஸாவிதக்கா ந உப்பாதே³தப்³பா³. இத³ம், மஹாராஜ, சக்கவத்திஸ்ஸ து³தியம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, ப⁴க³வதா தே³வாதிதே³வேன –

‘‘‘விதக்கூபஸமே ச யோ ரதோ, அஸுப⁴ம் பா⁴வயதே [பா⁴வயதீ (ஸ்யா.) த⁴. ப. 350 த⁴ம்மபதே³] ஸதா³ ஸதோ;

ஏஸ கோ² ப்³யந்திகாஹிதி, ஏஸ சே²ச்ச²தி மாரப³ந்த⁴ன’ந்தி.

‘‘புன சபரம், மஹாராஜ, சக்கவத்தீ தி³வஸே தி³வஸே ஸமுத்³த³பரியந்தம் மஹாபத²விம் அனுயாயதி கல்யாணபாபகானி விசினமானோ, ஏவமேவ கோ², மஹாராஜ, யோகி³னா யோகா³வசரேன காயகம்மம் வசீகம்மம் மனோகம்மம் தி³வஸே தி³வஸே பச்சவேக்கி²தப்³ப³ம் ‘கிம் நு கோ² மே இமேஹி தீஹி டா²னேஹி அனுபவஜ்ஜஸ்ஸ தி³வஸோ வீதிவத்ததீ’தி. இத³ம், மஹாராஜ, சக்கவத்திஸ்ஸ ததியம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, ப⁴க³வதா தே³வாதிதே³வேன அங்கு³த்தரனிகாயவரே –

‘கத²ம்பூ⁴தஸ்ஸ மே ரத்திந்தி³வா வீதிவத்தந்தீதி [வீதிபதந்தீதி (ஸீ. பீ.)] பப்³ப³ஜிதேன அபி⁴ண்ஹம் பச்சவேக்கி²தப்³ப³’ந்தி.

‘‘புன சபரம், மஹாராஜ, சக்கவத்திஸ்ஸ அப்³ப⁴ந்தரபா³ஹிராரக்கா² ஸுஸம்விஹிதா ஹோதி, ஏவமேவ கோ², மஹாராஜ, யோகி³னா யோகா³வசரேன அப்³ப⁴ந்தரானம் பா³ஹிரானம் கிலேஸானம் ஆரக்கா²ய ஸதிதோ³வாரிகோ ட²பேதப்³போ³. இத³ம், மஹாராஜ, சக்கவத்திஸ்ஸ சதுத்த²ம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, ப⁴க³வதா தே³வாதிதே³வேன –

‘ஸதிதோ³வாரிகோ, பி⁴க்க²வே, அரியஸாவகோ அகுஸலம் பஜஹதி குஸலம் பா⁴வேதி, ஸாவஜ்ஜம் பஜஹதி, அனவஜ்ஜம் பா⁴வேதி, ஸுத்³த⁴மத்தானம் பரிஹரதீ’’’தி.

சக்கவத்திங்க³பஞ்ஹோ த³ஸமோ.

பத²வீவக்³கோ³ ததியோ.

தஸ்ஸுத்³தா³னம் –

பத²வீ ஆபோ ச தேஜோ ச, வாயோ ச பப்³ப³தேன ச;

ஆகாஸோ சந்த³ஸூரியோ ச, ஸக்கோ ச சக்கவத்தினாதி.