6. கும்மங்க³பஞ்ஹோ

6. ‘‘ப⁴ந்தே நாக³ஸேன, ‘கும்மஸ்ஸ பஞ்ச அங்கா³னி க³ஹேதப்³பா³னீ’தி யம் வதே³ஸி, கதமானி தானி பஞ்ச அங்கா³னி க³ஹேதப்³பா³னீ’’தி? ‘‘யதா², மஹாராஜ, கும்மோ உத³கசரோ உத³கேயேவ வாஸம் கப்பேதி, ஏவமேவ கோ², மஹாராஜ, யோகி³னா யோகா³வசரேன ஸப்³ப³பாணபூ⁴தபுக்³க³லானம் ஹிதானுகம்பினா மேத்தாஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாபஜ்ஜேன ஸப்³பா³வந்தம் லோகம் ப²ரித்வா விஹரிதப்³ப³ம். இத³ம், மஹாராஜ, கும்மஸ்ஸ பட²மம் அங்க³ம் க³ஹேதப்³ப³ம்.

‘‘புன சபரம், மஹாராஜ, கும்மோ உத³கே உப்பிலவந்தோ ஸீஸம் உக்கி²பித்வா யதி³ கோசி பஸ்ஸதி, தத்தே²வ நிமுஜ்ஜதி கா³ள்ஹமோகா³ஹதி ‘மா மம் தே புன பஸ்ஸேய்யு’ந்தி, ஏவமேவ கோ², மஹாராஜ, யோகி³னா யோகா³வசரேன கிலேஸேஸு ஓபதந்தேஸு ஆரம்மணஸரே நிமுஜ்ஜிதப்³ப³ம் கா³ள்ஹமோகா³ஹிதப்³ப³ம் ‘மா மம் கிலேஸா புன பஸ்ஸேய்யு’ந்தி. இத³ம், மஹாராஜ, கும்மஸ்ஸ து³தியம் அங்க³ம் க³ஹேதப்³ப³ம்.

‘‘புன சபரம், மஹாராஜ, கும்மோ உத³கதோ நிக்க²மித்வா காயம் ஓதாபேதி, ஏவமேவ கோ², மஹாராஜ, யோகி³னா யோகா³வசரேன நிஸஜ்ஜட்டா²னஸயனசங்கமதோ மானஸம் நீஹரித்வா ஸம்மப்பதா⁴னே மானஸம் ஓதாபேதப்³ப³ம். இத³ம், மஹாராஜ, கும்மஸ்ஸ ததியம் அங்க³ம் க³ஹேதப்³ப³ம்.

‘‘புன சபரம், மஹாராஜ, கும்மோ பத²விம் க²ணித்வா விவித்தே வாஸம் கப்பேதி, ஏவமேவ கோ², மஹாராஜ, யோகி³னா யோகா³வசரேன லாப⁴ஸக்காரஸிலோகம் பஜஹித்வா ஸுஞ்ஞம் விவித்தம் கானனம் வனபத்த²ம் பப்³ப³தம் கந்த³ரம் கி³ரிகு³ஹம் அப்பஸத்³த³ம் அப்பனிக்³கோ⁴ஸம் பவிவித்தமோகா³ஹித்வா விவித்தே யேவ வாஸம் உபக³ந்தப்³ப³ம். இத³ம், மஹாராஜ, கும்மஸ்ஸ சதுத்த²ம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, தே²ரேன உபஸேனேன வங்க³ந்தபுத்தேன –

‘‘‘விவித்தம் அப்பனிக்³கோ⁴ஸம், வாளமிக³னிஸேவிதம்;

ஸேவே ஸேனாஸனம் பி⁴க்கு², படிஸல்லானகாரணா’தி.

‘‘புன சபரம், மஹாராஜ, கும்மோ சாரிகம் சரமானோ யதி³ கஞ்சி பஸ்ஸதி வா, ஸத்³த³ம் ஸுணாதி வா, ஸோண்டி³பஞ்சமானி அங்கா³னி ஸகே கபாலே நித³ஹித்வா அப்போஸ்ஸுக்கோ துண்ஹீபூ⁴தோ திட்ட²தி காயமனுரக்க²ந்தோ, ஏவமேவ கோ², மஹாராஜ, யோகி³னா யோகா³வசரேன ஸப்³ப³த்த² ரூபஸத்³த³க³ந்த⁴ரஸபோ²ட்ட²ப்³ப³த⁴ம்மேஸு ஆபதந்தேஸு ச²ஸு த்³வாரேஸு ஸம்வரகவாடம் அனுக்³கா⁴டேத்வா மானஸம் ஸமோத³ஹித்வா ஸம்வரம் கத்வா ஸதேன ஸம்பஜானேன விஹாதப்³ப³ம் ஸமணத⁴ம்மம் அனுரக்க²மானேன. இத³ம், மஹாராஜ, கும்மஸ்ஸ பஞ்சமம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, ப⁴க³வதா தே³வாதிதே³வேன ஸம்யுத்தனிகாயவரே கும்மூபமஸுத்தந்தே –

‘‘‘கும்மோவ அங்கா³னி ஸகே கபாலே, ஸமோத³ஹம் பி⁴க்கு² மனோவிதக்கே;

அனிஸ்ஸிதோ அஞ்ஞமஹேட²யானோ, பரினிப்³பு³தோனூபவதே³ய்ய கஞ்சீ’’’தி.

கும்மங்க³பஞ்ஹோ ச²ட்டோ².