1. க³த்³ரப⁴வக்³கோ³

1. க³த்³ரப⁴ங்க³பஞ்ஹோ

1. ‘‘ப⁴ந்தே நாக³ஸேன, ‘க³த்³ரப⁴ஸ்ஸ ஏகம் அங்க³ம் க³ஹேதப்³ப³’ந்தி யம் வதே³ஸி, கதமம் தம் ஏகம் அங்க³ம் க³ஹேதப்³ப³’’ந்தி? ‘‘யதா², மஹாராஜ, க³த்³ரபோ⁴ நாம ஸங்காரகூடேபி சதுக்கேபி ஸிங்கா⁴டகேபி கா³மத்³வாரேபி து²ஸராஸிம்ஹிபி யத்த² கத்த²சி ஸயதி, ந ஸயனப³ஹுலோ ஹோதி, ஏவமேவ கோ², மஹாராஜ, யோகி³னா யோகா³வசரேன திணஸந்தா²ரேபி பண்ணஸந்தா²ரேபி கட்ட²மஞ்சகேபி ச²மாயபி யத்த² கத்த²சி சம்மக²ண்ட³ம் பத்த²ரித்வா யத்த² கத்த²சி ஸயிதப்³ப³ம், ந ஸயனப³ஹுலேன ப⁴விதப்³ப³ம். இத³ம், மஹாராஜ, க³த்³ரப⁴ஸ்ஸ ஏகம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, ப⁴க³வதா தே³வாதிதே³வேன ‘கலிங்க³ரூபதா⁴னா, பி⁴க்க²வே, ஏதரஹி மம ஸாவகா விஹரந்தி அப்பமத்தா ஆதாபினோ பதா⁴னஸ்மி’ந்தி. பா⁴ஸிதம்பேதம், மஹாராஜ, தே²ரேன ஸாரிபுத்தேன த⁴ம்மஸேனாபதினாபி –

‘‘‘பல்லங்கேன நிஸின்னஸ்ஸ, ஜண்ணுகேனாபி⁴வஸ்ஸதி;

அலம் பா²ஸுவிஹாராய, பஹிதத்தஸ்ஸ பி⁴க்கு²னோ’’’தி.

க³த்³ரப⁴ங்க³பஞ்ஹோ பட²மோ.

2. குக்குடங்க³பஞ்ஹோ

2. ‘‘ப⁴ந்தே நாக³ஸேன, ‘குக்குடஸ்ஸ பஞ்ச அங்கா³னி க³ஹேதப்³பா³னீ’தி யம் வதே³ஸி, கதமானி தானி பஞ்ச அங்கா³னி க³ஹேதப்³பா³னீ’’தி? ‘‘யதா², மஹாராஜ, குக்குடோ காலேன ஸமயேன படிஸல்லீயதி, ஏவமேவ கோ², மஹாராஜ, யோகி³னா யோகா³வசரேன காலேன ஸமயேனேவ சேதியங்க³ணம் ஸம்மஜ்ஜித்வா பானீயம் பரிபோ⁴ஜனீயம் உபட்ட²பேத்வா ஸரீரம் படிஜக்³கி³த்வா நஹாயித்வா சேதியம் வந்தி³த்வா வுட்³டா⁴னம் பி⁴க்கூ²னம் த³ஸ்ஸனாய க³ந்த்வா காலேன ஸமயேன ஸுஞ்ஞாகா³ரம் பவிஸிதப்³ப³ம். இத³ம், மஹாராஜ, குக்குடஸ்ஸ பட²மம் அங்க³ம் க³ஹேதப்³ப³ம்.

‘‘புன சபரம், மஹாராஜ, குக்குடோ காலேன ஸமயேனேவ வுட்டா²தி. ஏவமேவ கோ², மஹாராஜ, யோகி³னா யோகா³வசரேன காலேன ஸமயேனேவ வுட்ட²ஹித்வா சேதியங்க³ணம் ஸம்மஜ்ஜித்வா பானீயம் பரிபோ⁴ஜனீயம் உபட்ட²பேத்வா ஸரீரம் படிஜக்³கி³த்வா சேதியம் வந்தி³த்வா புனதே³வ ஸுஞ்ஞாகா³ரம் பவிஸிதப்³ப³ம். இத³ம், மஹாராஜ, குக்குடஸ்ஸ து³தியம் அங்க³ம் க³ஹேதப்³ப³ம்.

‘‘புன சபரம், மஹாராஜ, குக்குடோ பத²விம் க²ணித்வா க²ணித்வா அஜ்ஜோ²ஹாரம் அஜ்ஜோ²ஹரதி. ஏவமேவ கோ², மஹாராஜ, யோகி³னா யோகா³வசரேன பச்சவேக்கி²த்வா பச்சவேக்கி²த்வா அஜ்ஜோ²ஹாரம் அஜ்ஜோ²ஹரிதப்³ப³ம் ‘நேவ த³வாய ந மதா³ய ந மண்ட³னாய ந விபூ⁴ஸனாய, யாவதே³வ இமஸ்ஸ காயஸ்ஸ டி²தியா யாபனாய விஹிம்ஸூபரதியா ப்³ரஹ்மசரியானுக்³க³ஹாய, இதி புராணஞ்ச வேத³னம் படிஹங்கா²மி நவஞ்ச வேத³னம் ந உப்பாதே³ஸ்ஸாமி, யாத்ரா ச மே ப⁴விஸ்ஸதி அனவஜ்ஜதா ச பா²ஸுவிஹாரோ சா’தி. இத³ம், மஹாராஜ, குக்குடஸ்ஸ ததியம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, ப⁴க³வதா தே³வாதிதே³வேன –

‘‘‘கந்தாரே புத்தமம்ஸம்வ, அக்க²ஸ்ஸப்³ப⁴ஞ்ஜனம் யதா²;

ஏவம் ஆஹரி ஆஹாரம், யாபனத்த²மமுச்சி²தோ’தி.

‘‘புன சபரம், மஹாராஜ, குக்குடோ ஸசக்கு²கோபி ரத்திம் அந்தோ⁴ ஹோதி. ஏவமேவ கோ², மஹாராஜ, யோகி³னா யோகா³வசரேன அனந்தே⁴னேவ அந்தே⁴ன விய ப⁴விதப்³ப³ம், அரஞ்ஞேபி கோ³சரகா³மே பிண்டா³ய சரந்தேனபி ரஜனீயேஸு ரூபஸத்³த³க³ந்த⁴ரஸபோ²ட்ட²ப்³ப³த⁴ம்மேஸு அந்தே⁴ன ப³தி⁴ரேன மூகே³ன விய ப⁴விதப்³ப³ம், ந நிமித்தம் க³ஹேதப்³ப³ம், நானுப்³யஞ்ஜனம் க³ஹேதப்³ப³ம். இத³ம், மஹாராஜ, குக்குடஸ்ஸ சதுத்த²ம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, தே²ரேன மஹாகச்சாயனேன –

‘சக்கு²மாஸ்ஸ யதா² அந்தோ⁴, ஸோதவா ப³தி⁴ரோ யதா²;

பஞ்ஞவாஸ்ஸ [ஜிவ்ஹாவஸ்ஸ (ஸீ. பீ.)] யதா² மூகோ³, ப³லவா து³ப்³ப³லோரிவ;

அத்தஅத்தே² [அத² அத்தே² (ஸீ. பீ.)] ஸமுப்பன்னே, ஸயேத² மதஸாயிக’ந்தி.

‘‘புன சபரம், மஹாராஜ, குக்குடோ லேட்³டு³த³ண்ட³லகு³ளமுக்³க³ரேஹி பரிபாதியந்தோபி ஸகம் கே³ஹம் ந விஜஹதி. ஏவமேவ கோ², மஹாராஜ, யோகி³னா யோகா³வசரேன சீவரகம்மம் கரோந்தேனபி நவகம்மம் கரோந்தேனபி வத்தப்படிவத்தம் கரோந்தேனபி உத்³தி³ஸந்தேனபி உத்³தி³ஸாபேந்தேனபி யோனிஸோ மனஸிகாரோ ந விஜஹிதப்³போ³, ஸகம் கோ² பனேதம், மஹாராஜ, யோகி³னோ கே³ஹம், யதி³த³ம் யோனிஸோ மனஸிகாரோ. இத³ம், மஹாராஜ, குக்குடஸ்ஸ பஞ்சமம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, ப⁴க³வதா தே³வாதிதே³வேன ‘கோ ச, பி⁴க்க²வே, பி⁴க்கு²னோ கோ³சரோ ஸகோ பேத்திகோ விஸயோ? யதி³த³ம் சத்தாரோ ஸதிபட்டா²னா’தி. பா⁴ஸிதம்பேதம், மஹாராஜ, தே²ரேன ஸாரிபுத்தேன த⁴ம்மஸேனாபதினாபி –

‘‘‘யதா² ஸுத³ந்தோ மாதங்கோ³, ஸகம் ஸோண்ட³ம் ந மத்³த³தி;

ப⁴க்கா²ப⁴க்க²ம் விஜானாதி, அத்தனோ வுத்திகப்பனம்.

‘‘‘ததே²வ பு³த்³த⁴புத்தேன, அப்பமத்தேன வா பன;

ஜினவசனம் ந மத்³தி³தப்³ப³ம், மனஸிகாரவருத்தம’’’ந்தி.

குக்குடங்க³பஞ்ஹோ து³தியோ.

3. கலந்த³கங்க³பஞ்ஹோ

3. ‘‘ப⁴ந்தே நாக³ஸேன, ‘கலந்த³கஸ்ஸ ஏகம் அங்க³ம் க³ஹேதப்³ப³’ந்தி யம் வதே³ஸி, கதமம் தம் ஏகம் அங்க³ம் க³ஹேதப்³ப³’’ந்தி? ‘‘யதா², மஹாராஜ, கலந்த³கோ படிஸத்தும்ஹி ஓபதந்தே நங்கு³ட்ட²ம் பப்போ²டேத்வா மஹந்தம் கத்வா தேனேவ நங்கு³ட்ட²லகு³ளேன படிஸத்தும் படிபா³ஹதி, ஏவமேவ கோ², மஹாராஜ, யோகி³னா யோகா³வசரேன கிலேஸஸத்தும்ஹி ஓபதந்தே ஸதிபட்டா²னலகு³ளம் பப்போ²டேத்வா மஹந்தம் கத்வா தேனேவ ஸதிபட்டா²னலகு³ளேன ஸப்³ப³கிலேஸா படிபா³ஹிதப்³பா³. இத³ம், மஹாராஜ, கலந்த³கஸ்ஸ ஏகம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, தே²ரேன சூளபந்த²கேன –

‘யதா³ கிலேஸா ஓபதந்தி, ஸாமஞ்ஞகு³ணத⁴ம்ஸனா;

ஸதிபட்டா²னலகு³ளேன, ஹந்தப்³பா³ தே புனப்புன’’’ந்தி.

கலந்த³கங்க³பஞ்ஹோ ததியோ.

4. தீ³பினியங்க³பஞ்ஹோ

4. ‘‘ப⁴ந்தே நாக³ஸேன, ‘தீ³பினியா ஏகம் அங்க³ம் க³ஹேதப்³ப³’ந்தி யம் வதே³ஸி, கதமம் தம் ஏகம் அங்க³ம் க³ஹேதப்³ப³’’ந்தி? ‘‘யதா², மஹாராஜ, தீ³பினீ ஸகிம் யேவ க³ப்³ப⁴ம் க³ண்ஹாதி, ந புனப்புனம் புரிஸம் உபேதி? ஏவமேவ கோ², மஹாராஜ, யோகி³னா யோகா³வசரேன ஆயதிம் படிஸந்தி⁴ம் உப்பத்திம் க³ப்³ப⁴ஸேய்யம் சுதிம் பே⁴த³ம் க²யம் வினாஸம் ஸம்ஸாரப⁴யம் து³க்³க³திம் விஸமம் ஸம்பீளிதம் தி³ஸ்வா ‘புனப்³ப⁴வே நப்படிஸந்த³ஹிஸ்ஸாமீ’தி யோனிஸோ மனஸிகாரோ கரணீயோ. இத³ம், மஹாராஜ, தீ³பினியா ஏகம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, ப⁴க³வதா தே³வாதிதே³வேன ஸுத்தனிபாதே த⁴னியகோ³பாலகஸுத்தே –

‘‘‘உஸபோ⁴ரிவ சே²த்வ ப³ந்த⁴னானி, நாகோ³ பூதிலதம்வ தா³லயித்வா;

நாஹம் புனுபேஸ்ஸம் க³ப்³ப⁴ஸேய்யம், அத² சே பத்த²யஸீ பவஸ்ஸ தே³வா’’’தி.

தீ³பினியங்க³பஞ்ஹோ சதுத்தோ².

5. தீ³பிகங்க³பஞ்ஹோ

5. ‘‘ப⁴ந்தே நாக³ஸேன, ‘தீ³பிகஸ்ஸ த்³வே அங்கா³னி க³ஹேதப்³பா³னீ’தி யம் வதே³ஸி, கதமானி தானி த்³வே அங்கா³னி க³ஹேதப்³பா³னீ’’தி? ‘‘யதா², மஹாராஜ, தீ³பிகோ அரஞ்ஞே திணக³ஹனம் வா வனக³ஹனம் வா பப்³ப³தக³ஹனம் வா நிஸ்ஸாய நிலீயித்வா மிகே³ க³ண்ஹாதி, ஏவமேவ கோ², மஹாராஜ, யோகி³னா யோகா³வசரேன விவேகம் ஸேவிதப்³ப³ம் அரஞ்ஞம் ருக்க²மூலம் பப்³ப³தம் கந்த³ரம் கி³ரிகு³ஹம் ஸுஸானம் வனபத்த²ம் அப்³போ⁴காஸம் பலாலபுஞ்ஜம் அப்பஸத்³த³ம் அப்பனிக்³கோ⁴ஸம் விஜனவாதம் மனுஸ்ஸராஹஸேய்யகம் படிஸல்லானஸாருப்பம்; விவேகம் ஸேவமானோ ஹி, மஹாராஜ, யோகீ³ யோகா³வசரோ நசிரஸ்ஸேவ ச²ளபி⁴ஞ்ஞாஸு ச வஸிபா⁴வம் பாபுணாதி. இத³ம், மஹாராஜ, தீ³பிகஸ்ஸ பட²மம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, தே²ரேஹி த⁴ம்மஸங்கா³ஹகேஹி –

‘‘‘யதா²பி தீ³பிகோ நாம, நிலீயித்வா க³ண்ஹதே [க³ண்ஹதீ (ஸீ. பீ.)] மிகே³;

ததே²வாயம் பு³த்³த⁴புத்தோ, யுத்தயோகோ³ விபஸ்ஸகோ;

அரஞ்ஞம் பவிஸித்வான, க³ண்ஹாதி ப²லமுத்தம’ந்தி.

‘‘புன சபரம், மஹாராஜ, தீ³பிகோ யம் கிஞ்சி பஸும் வதி⁴த்வா வாமேன பஸ்ஸேன பதிதம் ந ப⁴க்கே²தி. ஏவமேவ கோ², மஹாராஜ, யோகி³னா யோகா³வசரேன வேளுதா³னேன வா பத்ததா³னேன வா புப்ப²தா³னேன வா ப²லதா³னேன வா ஸினானதா³னேன வா மத்திகாதா³னேன வா சுண்ணதா³னேன வா த³ந்தகட்ட²தா³னேன வா முகோ²த³கதா³னேன வா சாதுகம்யதாய வா முக்³க³ஸுப்யதாய [முக்³க³ஸுப்பதாய (ஸீ. பீ.)] வா பாரிப⁴ட [பாரிப⁴ட்டதாய (ஸீ. பீ.)] யதாய வா ஜங்க⁴பேஸனீயேன வா வேஜ்ஜகம்மேன வா தூ³தகம்மேன வா பஹிணக³மனேன வா பிண்ட³படிபிண்டே³ன வா தா³னானுப்பதா³னேன வா வத்து²விஜ்ஜாய வா நக்க²த்தவிஜ்ஜாய வா அங்க³விஜ்ஜாய [நக³விஜ்ஜாய (க.)] வா அஞ்ஞதரஞ்ஞதரேன வா பு³த்³த⁴ப்படிகுட்டே²ன மிச்சா²ஜீவேன நிப்பா²தி³தம் போ⁴ஜனம் ந பு⁴ஞ்ஜிதப்³ப³ம் [பரிபு⁴ஞ்ஜிதப்³ப³ம் (ஸீ. பீ.)] வாமேன பஸ்ஸேன பதிதம் பஸும் விய தீ³பிகோ. இத³ம், மஹாராஜ, தீ³பிகஸ்ஸ து³தியம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, தே²ரேன ஸாரிபுத்தேன த⁴ம்மஸேனாபதினா –

‘‘‘வசீவிஞ்ஞத்திவிப்பா²ரா, உப்பன்னம் மது⁴பாயஸம்;

ஸசே பு⁴த்தோ ப⁴வேய்யாஹம், ஸாஜீவோ க³ரஹிதோ மம.

‘‘‘யதி³பி மே அந்தகு³ணம், நிக்க²மித்வா ப³ஹீ சரே;

நேவ பி⁴ந்தே³ய்யமாஜீவம், சஜமானோபி ஜீவித’’’ந்தி.

தீ³பிகங்க³பஞ்ஹோ பஞ்சமோ.

6. கும்மங்க³பஞ்ஹோ

6. ‘‘ப⁴ந்தே நாக³ஸேன, ‘கும்மஸ்ஸ பஞ்ச அங்கா³னி க³ஹேதப்³பா³னீ’தி யம் வதே³ஸி, கதமானி தானி பஞ்ச அங்கா³னி க³ஹேதப்³பா³னீ’’தி? ‘‘யதா², மஹாராஜ, கும்மோ உத³கசரோ உத³கேயேவ வாஸம் கப்பேதி, ஏவமேவ கோ², மஹாராஜ, யோகி³னா யோகா³வசரேன ஸப்³ப³பாணபூ⁴தபுக்³க³லானம் ஹிதானுகம்பினா மேத்தாஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாபஜ்ஜேன ஸப்³பா³வந்தம் லோகம் ப²ரித்வா விஹரிதப்³ப³ம். இத³ம், மஹாராஜ, கும்மஸ்ஸ பட²மம் அங்க³ம் க³ஹேதப்³ப³ம்.

‘‘புன சபரம், மஹாராஜ, கும்மோ உத³கே உப்பிலவந்தோ ஸீஸம் உக்கி²பித்வா யதி³ கோசி பஸ்ஸதி, தத்தே²வ நிமுஜ்ஜதி கா³ள்ஹமோகா³ஹதி ‘மா மம் தே புன பஸ்ஸேய்யு’ந்தி, ஏவமேவ கோ², மஹாராஜ, யோகி³னா யோகா³வசரேன கிலேஸேஸு ஓபதந்தேஸு ஆரம்மணஸரே நிமுஜ்ஜிதப்³ப³ம் கா³ள்ஹமோகா³ஹிதப்³ப³ம் ‘மா மம் கிலேஸா புன பஸ்ஸேய்யு’ந்தி. இத³ம், மஹாராஜ, கும்மஸ்ஸ து³தியம் அங்க³ம் க³ஹேதப்³ப³ம்.

‘‘புன சபரம், மஹாராஜ, கும்மோ உத³கதோ நிக்க²மித்வா காயம் ஓதாபேதி, ஏவமேவ கோ², மஹாராஜ, யோகி³னா யோகா³வசரேன நிஸஜ்ஜட்டா²னஸயனசங்கமதோ மானஸம் நீஹரித்வா ஸம்மப்பதா⁴னே மானஸம் ஓதாபேதப்³ப³ம். இத³ம், மஹாராஜ, கும்மஸ்ஸ ததியம் அங்க³ம் க³ஹேதப்³ப³ம்.

‘‘புன சபரம், மஹாராஜ, கும்மோ பத²விம் க²ணித்வா விவித்தே வாஸம் கப்பேதி, ஏவமேவ கோ², மஹாராஜ, யோகி³னா யோகா³வசரேன லாப⁴ஸக்காரஸிலோகம் பஜஹித்வா ஸுஞ்ஞம் விவித்தம் கானனம் வனபத்த²ம் பப்³ப³தம் கந்த³ரம் கி³ரிகு³ஹம் அப்பஸத்³த³ம் அப்பனிக்³கோ⁴ஸம் பவிவித்தமோகா³ஹித்வா விவித்தே யேவ வாஸம் உபக³ந்தப்³ப³ம். இத³ம், மஹாராஜ, கும்மஸ்ஸ சதுத்த²ம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, தே²ரேன உபஸேனேன வங்க³ந்தபுத்தேன –

‘‘‘விவித்தம் அப்பனிக்³கோ⁴ஸம், வாளமிக³னிஸேவிதம்;

ஸேவே ஸேனாஸனம் பி⁴க்கு², படிஸல்லானகாரணா’தி.

‘‘புன சபரம், மஹாராஜ, கும்மோ சாரிகம் சரமானோ யதி³ கஞ்சி பஸ்ஸதி வா, ஸத்³த³ம் ஸுணாதி வா, ஸோண்டி³பஞ்சமானி அங்கா³னி ஸகே கபாலே நித³ஹித்வா அப்போஸ்ஸுக்கோ துண்ஹீபூ⁴தோ திட்ட²தி காயமனுரக்க²ந்தோ, ஏவமேவ கோ², மஹாராஜ, யோகி³னா யோகா³வசரேன ஸப்³ப³த்த² ரூபஸத்³த³க³ந்த⁴ரஸபோ²ட்ட²ப்³ப³த⁴ம்மேஸு ஆபதந்தேஸு ச²ஸு த்³வாரேஸு ஸம்வரகவாடம் அனுக்³கா⁴டேத்வா மானஸம் ஸமோத³ஹித்வா ஸம்வரம் கத்வா ஸதேன ஸம்பஜானேன விஹாதப்³ப³ம் ஸமணத⁴ம்மம் அனுரக்க²மானேன. இத³ம், மஹாராஜ, கும்மஸ்ஸ பஞ்சமம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, ப⁴க³வதா தே³வாதிதே³வேன ஸம்யுத்தனிகாயவரே கும்மூபமஸுத்தந்தே –

‘‘‘கும்மோவ அங்கா³னி ஸகே கபாலே, ஸமோத³ஹம் பி⁴க்கு² மனோவிதக்கே;

அனிஸ்ஸிதோ அஞ்ஞமஹேட²யானோ, பரினிப்³பு³தோனூபவதே³ய்ய கஞ்சீ’’’தி.

கும்மங்க³பஞ்ஹோ ச²ட்டோ².

7. வம்ஸங்க³பஞ்ஹோ

7. ‘‘ப⁴ந்தே நாக³ஸேன, ‘வம்ஸஸ்ஸ ஏகம் அங்க³ம் க³ஹேதப்³ப³’ந்தி யம் வதே³ஸி, கதமம் தம் ஏகம் அங்க³ம் க³ஹேதப்³ப³’’ந்தி? ‘‘யதா², மஹாராஜ, வம்ஸோ யத்த² வாதோ, தத்த² அனுலோமேதி, நாஞ்ஞத்த²மனுதா⁴வதி, ஏவமேவ கோ², மஹாராஜ, யோகி³னா யோகா³வசரேன யம் பு³த்³தே⁴ன ப⁴க³வதா பா⁴ஸிதம் நவங்க³ம் ஸத்து² ஸாஸனம், தம் அனுலோமயித்வா கப்பியே அனவஜ்ஜே ட²த்வா ஸமணத⁴ம்மம் யேவ பரியேஸிதப்³ப³ம். இத³ம், மஹாராஜ, வம்ஸஸ்ஸ ஏகம் அங்க³ம் க³ஹேதப்³ப³ம். பா⁴ஸிதம்பேதம் மஹாராஜ தே²ரேன ராஹுலேன –

‘‘‘நவங்க³ம் பு³த்³த⁴வசனம், அனுலோமேத்வான ஸப்³ப³தா³;

கப்பியே அனவஜ்ஜஸ்மிம், ட²த்வாபாயம் ஸமுத்தரி’’’ந்தி.

வம்ஸங்க³பஞ்ஹோ ஸத்தமோ.

8. சாபங்க³பஞ்ஹோ

8. ‘‘ப⁴ந்தே நாக³ஸேன, ‘சாபஸ்ஸ ஏகம் அங்க³ம் க³ஹேதப்³ப³’ந்தி யம் வதே³ஸி, கதமம் தம் ஏகம் அங்க³ம் க³ஹேதப்³ப³’’ந்தி? ‘‘யதா², மஹாராஜ, சாபோ ஸுதச்சி²தோ நமிதோ [மிதோ (ஸீ. பீ. க.)] யாவக்³க³மூலம் ஸமகமேவ அனுனமதி நப்படித்த²ம்ப⁴தி, ஏவமேவ கோ², மஹாராஜ, யோகி³னா யோகா³வசரேன தே²ரனவமஜ்ஜி²மஸமகேஸு அனுனமிதப்³ப³ம் நப்படிப²ரிதப்³ப³ம். இத³ம், மஹாராஜ, சாபஸ்ஸ ஏகம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, ப⁴க³வதா தே³வாதிதே³வேன விது⁴ர [புண்ணக] ஜாதகே –

‘‘‘சாபோவூனுத³ரோ தீ⁴ரோ, வம்ஸோ வாபி பகம்பயே [சாபோ வா நுன மே தீ⁴ரோ, வம்ஸோவ அனுலோமயம் (ஸீ. பீ. க.)];

படிலோமம் ந வத்தேய்ய, ஸ ராஜவஸதிம் வஸே’’’தி.

சாபங்க³பஞ்ஹோ அட்ட²மோ.

9. வாயஸங்க³பஞ்ஹோ

9. ‘‘ப⁴ந்தே நாக³ஸேன, ‘வாயஸஸ்ஸ த்³வே அங்கா³னி க³ஹேதப்³பா³னீ’தி யம் வதே³ஸி, கதமானி தானி த்³வே அங்கா³னி க³ஹேதப்³பா³னீ’’தி? ‘‘யதா², மஹாராஜ, வாயஸோ ஆஸங்கிதபரிஸங்கிதோ யத்தப்பயத்தோ சரதி, ஏவமேவ கோ², மஹாராஜ, யோகி³னா யோகா³வசரேன ஆஸங்கிதபரிஸங்கிதேன யத்தபயத்தேன உபட்டி²தாய ஸதியா ஸம்வுதேஹி இந்த்³ரியேஹி சரிதப்³ப³ம். இத³ம், மஹாராஜ, வாயஸஸ்ஸ பட²மம் அங்க³ம் க³ஹேதப்³ப³ம்.

‘‘புன சபரம், மஹாராஜ, வாயஸோ யம் கிஞ்சி போ⁴ஜனம் தி³ஸ்வா ஞாதீஹி ஸம்விப⁴ஜித்வா பு⁴ஞ்ஜதி, ஏவமேவ கோ², மஹாராஜ, யோகி³னா யோகா³வசரேன யே தே லாபா⁴ த⁴ம்மிகா த⁴ம்மலத்³தா⁴ அந்தமஸோ பத்தபரியாபன்னமத்தம்பி, ததா²ரூபேஹி லாபே⁴ஹி படிவிப⁴த்தபோ⁴கி³னா ப⁴விதப்³ப³ம் ஸீலவந்தேஹி ஸப்³ரஹ்மசாரீஹி. இத³ம், மஹாராஜ, வாயஸஸ்ஸ து³தியம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, தே²ரேன ஸாரிபுத்தேன த⁴ம்மஸேனாபதினா –

‘‘‘ஸசே மே உபனாமேந்தி, யதா²லத்³த⁴ம் தபஸ்ஸினோ;

ஸப்³பே³ ஸம்விப⁴ஜித்வான, ததோ பு⁴ஞ்ஜாமி போ⁴ஜன’’’ந்தி.

வாயஸங்க³பஞ்ஹோ நவமோ.

10. மக்கடங்க³பஞ்ஹோ

10. ‘‘ப⁴ந்தே நாக³ஸேன, ‘மக்கடஸ்ஸ த்³வே அங்கா³னி க³ஹேதப்³பா³னீ’தி யம் வதே³ஸி, கதமானி தானி த்³வே அங்கா³னி க³ஹேதப்³பா³னீ’’தி? ‘‘யதா², மஹாராஜ, மக்கடோ வாஸமுபக³ச்ச²ந்தோ ததா²ரூபே ஓகாஸே மஹதிமஹாருக்கே² பவிவித்தே ஸப்³ப³ட்ட²கஸாகே² [ஸப்³ப³த்த²கஸாகே² (ஸ்யா.), ஸப்³ப³ட்ட²ஸாகே² (க.)] பீ⁴ருத்தாணே வாஸமுபக³ச்ச²தி, ஏவமேவ கோ², மஹாராஜ, யோகி³னா யோகா³வசரேன லஜ்ஜிம் பேஸலம் ஸீலவந்தம் கல்யாணத⁴ம்மம் ப³ஹுஸ்ஸுதம் த⁴ம்மத⁴ரம் வினயத⁴ரம் பியம் க³ருபா⁴வனீயம் வத்தாரம் வசனக்க²மம் ஓவாத³கம் விஞ்ஞாபகம் ஸந்த³ஸ்ஸகம் ஸமாத³பகம் ஸமுத்தேஜகம் ஸம்பஹம்ஸகம் ஏவரூபம் கல்யாணமித்தம் ஆசரியம் நிஸ்ஸாய விஹரிதப்³ப³ம். இத³ம், மஹாராஜ, மக்கடஸ்ஸ பட²மம் அங்க³ம் க³ஹேதப்³ப³ம்.

‘‘புன சபரம், மஹாராஜ, மக்கடோ ருக்கே² யேவ சரதி திட்ட²தி நிஸீத³தி, யதி³ நித்³த³ம் ஓக்கமதி, தத்தே²வ ரத்திம் வாஸமனுப⁴வதி. ஏவமேவ கோ², மஹாராஜ, யோகி³னா யோகா³வசரேன பவனாபி⁴முகே²ன ப⁴விதப்³ப³ம், பவனே யேவ டா²னசங்கமனிஸஜ்ஜாஸயனம் நித்³த³ம் ஓக்கமிதப்³ப³ம், தத்தே²வ ஸதிபட்டா²னமனுப⁴விதப்³ப³ம். இத³ம், மஹாராஜ, மக்கடஸ்ஸ து³தியம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, தே²ரேன ஸாரிபுத்தேன த⁴ம்மஸேனாபதினா –

‘‘‘சங்கமந்தோபி திட்ட²ந்தோ, நிஸஜ்ஜாஸயனேன வா;

பவனே ஸோப⁴தே பி⁴க்கு², பவனந்தம்வ வண்ணித’’’ந்தி.

மக்கடங்க³பஞ்ஹோ த³ஸமோ.

க³த்³ரப⁴வக்³கோ³ பட²மோ.

தஸ்ஸுத்³தா³னம் –

க³த்³ரபோ⁴ சேவ [கோ⁴ரஸ்ஸரோ ச (ஸீ. ஸ்யா. பீ.)] குக்குடோ, கலந்தோ³ தீ³பினி தீ³பிகோ;

கும்மோ வம்ஸோ ச சாபோ ச, வாயஸோ அத² மக்கடோதி.