5. பு³த்³த⁴லாப⁴ந்தராயபஞ்ஹோ

5. ‘‘ப⁴ந்தே நாக³ஸேன, தும்ஹே ப⁴ணத² ‘லாபீ⁴ ததா²க³தோ சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரான’ந்தி. புன ச ததா²க³தோ பஞ்சஸாலம் ப்³ராஹ்மணகா³மம் பிண்டா³ய பவிஸித்வா கிஞ்சிதே³வ அலபி⁴த்வா யதா²தோ⁴தேன பத்தேன நிக்க²ந்தோதி. யதி³, ப⁴ந்தே நாக³ஸேன, ததா²க³தோ லாபீ⁴ சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரானம், தேன ஹி பஞ்சஸாலம் ப்³ராஹ்மணகா³மம் பிண்டா³ய பவிஸித்வா கிஞ்சிதே³வ அலபி⁴த்வா யதா²தோ⁴தேன பத்தேன நிக்க²ந்தோதி யம் வசனம், தம் மிச்சா². யதி³ பஞ்சஸாலம் ப்³ராஹ்மணகா³மம் பிண்டா³ய பவிஸித்வா கிஞ்சிதே³வ அலபி⁴த்வா யதா²தோ⁴தேன பத்தேன நிக்க²ந்தோ, தேன ஹி லாபீ⁴ ததா²க³தோ சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரானந்தி தம்பி வசனம் மிச்சா². அயம்பி உப⁴தோ கோடிகோ பஞ்ஹோ ஸுமஹந்தோ து³ன்னிப்³பே³டோ² தவானுப்பத்தோ, ஸோ தயா நிப்³பா³ஹிதப்³போ³’’தி.

‘‘லாபீ⁴, மஹாராஜ, ததா²க³தோ சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரானம், பஞ்சஸாலஞ்ச ப்³ராஹ்மணகா³மம் பிண்டா³ய பவிஸித்வா கிஞ்சிதே³வ அலபி⁴த்வா யதா²தோ⁴தேன பத்தேன நிக்க²ந்தோ, தஞ்ச பன மாரஸ்ஸ பாபிமதோ காரணா’’தி. ‘‘தேன ஹி, ப⁴ந்தே நாக³ஸேன, ப⁴க³வதோ க³ணனபத²ம் வீதிவத்தகப்பே [க³ணனபத²வீதிவத்தே கப்பே (ஸீ.)] அபி⁴ஸங்க²தம் குஸலம் கிந்தி நிட்டி²தம், அது⁴னுட்டி²தேன மாரேன பாபிமதா தஸ்ஸ குஸலஸ்ஸ ப³லவேக³ம் [தம் குஸலப³லவேக³விப்பா²ரம் (ஸீ.)] கிந்தி பிஹிதம், தேன ஹி, ப⁴ந்தே நாக³ஸேன, தஸ்மிம் வத்து²ஸ்மிம் த்³வீஸு டா²னேஸு உபவாதோ³ ஆக³ச்ச²தி, குஸலதோபி அகுஸலம் ப³லவதரம் ஹோதி, பு³த்³த⁴ப³லதோபி மாரப³லம் ப³லவதரம் ஹோதீதி, தேன ஹி ருக்க²ஸ்ஸ மூலதோபி அக்³க³ம் பா⁴ரதரம் ஹோதி, கு³ணஸம்பரிகிண்ணதோபி பாபியம் ப³லவதரம் ஹோதீ’’தி. ‘‘ந, மஹாராஜ, தாவதகேன குஸலதோபி அகுஸலம் ப³லவதரம் நாம ஹோதி, ந பு³த்³த⁴ப³லதோபி மாரப³லம் ப³லவதரம் நாம ஹோதி. அபி சேத்த² காரணம் இச்சி²தப்³ப³ம்.

‘‘யதா², மஹாராஜ, புரிஸோ ரஞ்ஞோ சக்கவத்திஸ்ஸ மது⁴ம் வா மது⁴பிண்டி³கம் வா அஞ்ஞம் வா உபாயனம் அபி⁴ஹரேய்ய, தமேனம் ரஞ்ஞோ த்³வாரபாலோ ஏவம் வதே³ய்ய ‘அகாலோ, போ⁴, அயம் ரஞ்ஞோ த³ஸ்ஸனாய, தேன ஹி, போ⁴, தவ உபாயனம் க³ஹேத்வா ஸீக⁴ஸீக⁴ம் படினிவத்த, புரே தவ ராஜா த³ண்ட³ம் தா⁴ரேஸ்ஸதீ’தி [மா தே ராஜா த³ண்ட³ம் பாபேய்யாதி (ஸீ.)]. ததோ ஸோ புரிஸோ த³ண்ட³ப⁴யா தஸிதோ உப்³பி³க்³கோ³ தம் உபாயனம் ஆதா³ய ஸீக⁴ஸீக⁴ம் படினிவத்தேய்ய, அபி நு கோ² ஸோ, மஹாராஜ, ராஜா சக்கவத்தீ தாவதகேன உபாயனவிகலமத்தகேன த்³வாரபாலதோ து³ப்³ப³லதரோ நாம ஹோதி, அஞ்ஞம் வா பன கிஞ்சி உபாயனம் ந லபே⁴ய்யா’’தி? ‘‘ந ஹி, ப⁴ந்தே, இஸ்ஸாபகதோ ஸோ, ப⁴ந்தே, த்³வாரபாலோ உபாயனம் நிவாரேஸி, அஞ்ஞேன பன த்³வாரேன ஸதஸஹஸ்ஸகு³ணம்பி ரஞ்ஞோ உபாயனம் உபேதீ’’தி. ‘‘ஏவமேவ கோ², மஹாராஜ, இஸ்ஸாபகதோ மாரோ பாபிமா பஞ்சஸாலகே ப்³ராஹ்மணக³ஹபதிகே அன்வாவிஸி, அஞ்ஞானி பன அனேகானி தே³வதாஸதஸஹஸ்ஸானி அமதம் தி³ப்³ப³ம் ஓஜம் க³ஹேத்வா உபக³தானி ‘ப⁴க³வதோ காயே ஓஜம் ஓத³ஹிஸ்ஸாமா’தி ப⁴க³வந்தம் நமஸ்ஸமானானி பஞ்ஜலிகானி டி²தானீ’’தி.

‘‘ஹோது, ப⁴ந்தே நாக³ஸேன, ஸுலபா⁴ ப⁴க³வதோ சத்தாரோ பச்சயா லோகே உத்தமபுரிஸஸ்ஸ, யாசிதோவ ப⁴க³வா தே³வமனுஸ்ஸோஹி சத்தாரோ பச்சயே பரிபு⁴ஞ்ஜதி, அபி ச கோ² பன மாரஸ்ஸ யோ அதி⁴ப்பாயோ, ஸோ தாவதகேன ஸித்³தோ⁴, யம் ஸோ ப⁴க³வதோ போ⁴ஜனஸ்ஸ அந்தராயமகாஸி. ஏத்த² மே, ப⁴ந்தே, கங்கா² ந சி²ஜ்ஜதி, விமதிஜாதோஹம் தத்த² ஸம்ஸயபக்க²ந்தோ³. ந மே தத்த² மானஸம் பக்க²ந்த³தி, யம் ததா²க³தஸ்ஸ அரஹதோ ஸம்மாஸம்பு³த்³த⁴ஸ்ஸ ஸதே³வகே லோகே அக்³க³புக்³க³லவரஸ்ஸ குஸலவரபுஞ்ஞஸம்ப⁴வஸ்ஸ அஸமஸமஸ்ஸ அனுபமஸ்ஸ அப்படிஸமஸ்ஸ ச²வகம் லாமகம் பரித்தம் பாபம் அனரியம் விபன்னம் மாரோ லாப⁴ந்தராயமகாஸீ’’தி.

‘‘சத்தாரோ கோ², மஹாராஜ, அந்தராயா அதி³ட்ட²ந்தராயோ உத்³தி³ஸ்ஸ கதந்தராயோ உபக்க²டந்தராயோ பரிபோ⁴க³ந்தராயோதி. தத்த² கதமோ அதி³ட்ட²ந்தராயோ? அனோதி³ஸ்ஸ அத³ஸ்ஸனேன அனபி⁴ஸங்க²தம் கோசி அந்தராயம் கரோதி ‘கிம் பரஸ்ஸ தி³ன்னேனா’தி, அயம் அதி³ட்ட²ந்தராயோ நாம.

‘‘கதமோ உத்³தி³ஸ்ஸ கதந்தராயோ? இதே⁴கச்சம் புக்³க³லம் உபதி³ஸித்வா உத்³தி³ஸ்ஸ போ⁴ஜனம் படியத்தம் ஹோதி, தம் கோசி அந்தராயம் கரோதி, அயம் உத்³தி³ஸ்ஸ கதந்தராயோ நாம.

‘‘கதமோ உபக்க²டந்தராயோ? இத⁴ யம் கிஞ்சி உபக்க²டம் ஹோதி அப்படிக்³க³ஹிதம், தத்த² கோசி அந்தராயம் கரோதி, அயம் உபக்க²டந்தராயோ நாம.

‘‘கதமோ பரிபோ⁴க³ந்தராயோ? இத⁴ யம் கிஞ்சி பரிபோ⁴க³ம், தத்த² கோசி அந்தராயம் கரோதி, அயம் பரிபோ⁴க³ந்தராயோ நாம. இமே கோ², மஹாராஜ, சத்தாரோ அந்தராயா.

‘‘யம் பன மாரோ பாபிமா பஞ்சஸாலகே ப்³ராஹ்மணக³ஹபதிகே அன்வாவிஸி, தம் நேவ ப⁴க³வதோ பரிபோ⁴க³ம் ந உபக்க²டம் ந உத்³தி³ஸ்ஸகதம், அனாக³தம் அஸம்பத்தம் அத³ஸ்ஸனேன அந்தராயம் கதம், தம் பன நேகஸ்ஸ ப⁴க³வதோ யேவ, அத² கோ² யே தே தேன ஸமயேன நிக்க²ந்தா அப்³பா⁴க³தா, ஸப்³பே³பி தே தம் தி³வஸம் போ⁴ஜனம் ந லபி⁴ம்ஸு, நாஹம் தம், மஹாராஜ, பஸ்ஸாமி ஸதே³வகே லோகே ஸமாரகே ஸப்³ரஹ்மகே ஸஸ்ஸமணப்³ராஹ்மணியா பஜாய ஸதே³வமனுஸ்ஸாய, யோ தஸ்ஸ ப⁴க³வதோ உத்³தி³ஸ்ஸ கதம் உபக்க²டம் பரிபோ⁴க³ம் அந்தராயம் கரேய்ய. ஸசே கோசி இஸ்ஸாய உத்³தி³ஸ்ஸ கதம் உபக்க²டம் பரிபோ⁴க³ம் அந்தராயம் கரேய்ய, ப²லேய்ய தஸ்ஸ முத்³தா⁴ ஸததா⁴ வா ஸஹஸ்ஸதா⁴ வா.

‘‘சத்தாரோமே, மஹாராஜ, ததா²க³தஸ்ஸ கேனசி அனாவரணீயா கு³ணா. கதமே சத்தாரோ? லாபோ⁴, மஹாராஜ, ப⁴க³வதோ உத்³தி³ஸ்ஸ கதோ உபக்க²டோ ந ஸக்கா கேனசி அந்தராயம் காதும்; ஸரீரானுக³தா, மஹாராஜ, ப⁴க³வதோ ப்³யாமப்பபா⁴ ந ஸக்கா கேனசி அந்தராயம் காதும்; ஸப்³ப³ஞ்ஞுதம், மஹாராஜ, ப⁴க³வதோ ஞாணரதனம் ந ஸக்கா கேனசி அந்தராயம் காதும்; ஜீவிதம், மஹாராஜ, ப⁴க³வதோ ந ஸக்கா கேனசி அந்தராயம் காதும். இமே கோ², மஹாராஜ, சத்தாரோ ததா²க³தஸ்ஸ கேனசி அனாவரணீயா கு³ணா, ஸப்³பே³பேதே, மஹாராஜ, கு³ணா ஏகரஸா அரோகா³ அகுப்பா அபரூபக்கமா அபு²ஸானி கிரியானி. அத³ஸ்ஸனேன, மஹாராஜ, மாரோ பாபிமா நிலீயித்வா பஞ்சஸாலகே ப்³ராஹ்மணக³ஹபதிகே அன்வாவிஸி.

‘‘யதா², மஹாராஜ, ரஞ்ஞோ பச்சந்தே தே³ஸே விஸமே அத³ஸ்ஸனேன நிலீயித்வா சோரா பந்த²ம் தூ³ஸேந்தி. யதி³ பன ராஜா தே சோரே பஸ்ஸேய்ய, அபி நு கோ² தே சோரா ஸோத்தி²ம் லபே⁴ய்யு’’ந்தி? ‘‘ந ஹி, ப⁴ந்தே, ப²ரஸுனா பா²லாபேய்ய ஸததா⁴ வா ஸஹஸ்ஸதா⁴ வா’’தி. ‘‘ஏவமேவ கோ², மஹாராஜ, அத³ஸ்ஸனேன மாரோ பாபிமா நிலீயித்வா பஞ்சஸாலகே ப்³ராஹ்மணக³ஹபதிகே அன்வாவிஸி.

‘‘யதா² வா பன, மஹாராஜ, இத்தீ² ஸபதிகா அத³ஸ்ஸனேன நிலீயித்வா பரபுரிஸம் ஸேவதி, ஏவமேவ கோ², மஹாராஜ, அத³ஸ்ஸனேன மாரோ பாபிமா நிலீயித்வா பஞ்சஸாலகே ப்³ராஹ்மணக³ஹபதிகே அன்வாவிஸி. யதி³, மஹாராஜ, இத்தீ² ஸாமிகஸ்ஸ ஸம்முகா² பரபுரிஸம் ஸேவதி, அபி நு கோ² ஸா இத்தீ² ஸோத்தி²ம் லபே⁴ய்யா’’தி? ‘‘ந ஹி, ப⁴ந்தே, ஹனேய்யாபி தம், ப⁴ந்தே, ஸாமிகோ வதே⁴ய்யாபி ப³ந்தே⁴ய்யாபி தா³ஸித்தம் வா உபனேய்யா’’தி. ‘‘ஏவமேவ கோ², மஹாராஜ, அத³ஸ்ஸனேன மாரோ பாபிமா நிலீயித்வா பஞ்சஸாலகே ப்³ராஹ்மணக³ஹபதிகே அன்வாவிஸி. யதி³, மஹாராஜ, மாரோ பாபிமா ப⁴க³வதோ உத்³தி³ஸ்ஸ கதம் உபக்க²டம் பரிபோ⁴க³ம் அந்தராயம் கரேய்ய, ப²லேய்ய தஸ்ஸ முத்³தா⁴ ஸததா⁴ வா ஸஹஸ்ஸதா⁴ வா’’தி. ‘‘ஏவமேதம், ப⁴ந்தே நாக³ஸேன, சோரிகாய கதம் மாரேன பாபிமதா, நிலீயித்வா மாரோ பாபிமா பஞ்சஸாலகே ப்³ராஹ்மணக³ஹபதிகே அன்வாவிஸி. ஸசே ஸோ, ப⁴ந்தே, மாரோ பாபிமா ப⁴க³வதோ உத்³தி³ஸ்ஸ கதம் உபக்க²டம் பரிபோ⁴க³ம் அந்தராயம் கரேய்ய, முத்³தா⁴ வாஸ்ஸ ப²லேய்ய ஸததா⁴ வா ஸஹஸ்ஸதா⁴ வா, காயோ வாஸ்ஸ பு⁴ஸமுட்டி² விய விகிரேய்ய, ஸாது⁴, ப⁴ந்தே நாக³ஸேன, ஏவமேதம் ததா² ஸம்படிச்சா²மீ’’தி.

பு³த்³த⁴லாப⁴ந்தராயபஞ்ஹோ பஞ்சமோ.