2. அபே⁴ஜ்ஜவக்³கோ³

1. கு²த்³தா³னுகு²த்³த³கபஞ்ஹோ

1. ‘‘ப⁴ந்தே நாக³ஸேன, பா⁴ஸிதம்பேதம் ப⁴க³வதா ‘அபி⁴ஞ்ஞாயாஹம், பி⁴க்க²வே, த⁴ம்மம் தே³ஸேமி நோ அனபி⁴ஞ்ஞாயா’தி. புன ச வினயபஞ்ஞத்தியா ஏவம் ப⁴ணிதம் ‘ஆகங்க²மானோ, ஆனந்த³, ஸங்கோ⁴ மமச்சயேன கு²த்³தா³னுகு²த்³த³கானி ஸிக்கா²பதா³னி ஸமூஹனதூ’தி. கிம் நு கோ², ப⁴ந்தே நாக³ஸேன, கு²த்³தா³னுகு²த்³த³கானி ஸிக்கா²பதா³னி து³ப்பஞ்ஞத்தானி, உதா³ஹு அவத்து²ஸ்மிம் அஜானித்வா பஞ்ஞத்தானி, யம் ப⁴க³வா அத்தனோ அச்சயேன கு²த்³தா³னுகு²த்³த³கானி ஸிக்கா²பதா³னி ஸமூஹனாபேதி? யதி³, ப⁴ந்தே நாக³ஸேன, ப⁴க³வதா ப⁴ணிதம் ‘அபி⁴ஞ்ஞாயாஹம், பி⁴க்க²வே, த⁴ம்மம் தே³ஸேமி நோ அனபி⁴ஞ்ஞாயா’தி, தேன ஹி ‘ஆகங்க²மானோ, ஆனந்த³, ஸங்கோ⁴ மமச்சயேன கு²த்³தா³னுகு²த்³த³கானி ஸிக்கா²பதா³னி ஸமூஹனதூ’தி யம் வசனம், தம் மிச்சா². யதி³ ததா²க³தே வினயபஞ்ஞத்தியா ஏவம் ப⁴ணிதம் ‘ஆகங்க²மானோ, ஆனந்த³, ஸங்கோ⁴ மமச்சயேன கு²த்³தா³னுகு²த்³த³கானி ஸிக்கா²பதா³னி ஸமூஹனதூ’தி தேன ஹி ‘அபி⁴ஞ்ஞாயாஹம், பி⁴க்க²வே, த⁴ம்மம் தே³ஸேமி நோ அனபி⁴ஞ்ஞாயா’தி தம்பி வசனம் மிச்சா². அயம்பி உப⁴தோ கோடிகோ பஞ்ஹோ ஸுகு²மோ நிபுணோ க³ம்பீ⁴ரோ ஸுக³ம்பீ⁴ரோ து³ன்னிஜ்ஜா²பயோ, ஸோ தவானுப்பத்தோ, தத்த² தே ஞாணப³லவிப்பா²ரம் த³ஸ்ஸேஹீ’’தி.

‘‘பா⁴ஸிதம்பேதம், மஹாராஜ, ப⁴க³வதா ‘அபி⁴ஞ்ஞாயாஹம், பி⁴க்க²வே, த⁴ம்மம் தே³ஸேமி நோ அனபி⁴ஞ்ஞாயா’தி, வினயபஞ்ஞத்தியாபி ஏவம் ப⁴ணிதம் ‘ஆகங்க²மானோ, ஆனந்த³, ஸங்கோ⁴ மமச்சயேன கு²த்³தா³னுகு²த்³த³கானி ஸிக்கா²பதா³னி ஸமூஹனதூ’தி, தம் பன, மஹாராஜ, ததா²க³தோ பி⁴க்கூ² வீமம்ஸமானோ ஆஹ ‘உக்கலேஸ்ஸந்தி [உக்கட்³டி⁴ஸ்ஸந்தி (ஸீ.), உஸ்ஸக்கிஸ்ஸந்தி (ஸ்யா.)] நு கோ² மம ஸாவகா மயா விஸ்ஸஜ்ஜாபீயமானா மமச்சயேன கு²த்³தா³னுகு²த்³த³கானி ஸிக்கா²பதா³னி, உதா³ஹு ஆதி³யிஸ்ஸந்தீ’தி.

‘‘யதா², மஹாராஜ, சக்கவத்தீ ராஜா புத்தே ஏவம் வதே³ய்ய ‘அயம் கோ², தாதா, மஹாஜனபதோ³ ஸப்³ப³தி³ஸாஸு ஸாக³ரபரியந்தோ, து³க்கரோ, தாதா, தாவதகேன ப³லேன தா⁴ரேதும், ஏத² தும்ஹே, தாதா, மமச்சயேன பச்சந்தே பச்சந்தே தே³ஸே பஜஹதா²’தி. அபி நு கோ² தே, மஹாராஜ, குமாரா பிதுஅச்சயேன ஹத்த²க³தே ஜனபதே³ ஸப்³பே³ தே பச்சந்தே பச்சந்தே தே³ஸே முஞ்சேய்யு’’ந்தி? ‘‘ந ஹி ப⁴ந்தே, ராஜதோ [ராஜானோ (ஸீ. பீ.)], ப⁴ந்தே, லுத்³த⁴தரா [லத்³த⁴தரா (க.)] குமாரா ரஜ்ஜலோபே⁴ன தது³த்தரிம் தி³கு³ணதிகு³ணம் ஜனபத³ம் பரிக்³க³ண்ஹேய்யும் [பரிகட்³டே⁴ய்யும் (ஸீ. பீ.)], கிம் பன தே ஹத்த²க³தம் ஜனபத³ம் முஞ்சேய்யு’’ந்தி? ‘‘ஏவமேவ கோ², மஹாராஜ, ததா²க³தோ பி⁴க்கூ² வீமம்ஸமானோ ஏவமாஹ ‘ஆகங்க²மானோ, ஆனந்த³, ஸங்கோ⁴ மமச்சயேன கு²த்³தா³னுகு²த்³த³கானி ஸிக்கா²பதா³னி ஸமூஹனதூ’தி. து³க்க²பரிமுத்தியா, மஹாராஜ, பு³த்³த⁴புத்தா த⁴ம்மலோபே⁴ன அஞ்ஞம்பி உத்தரிம் தி³யட்³ட⁴ஸிக்கா²பத³ஸதம் கோ³பேய்யும், கிம் பன பகதிபஞ்ஞத்தம் ஸிக்கா²பத³ம் முஞ்சேய்யு’’ந்தி?

‘‘ப⁴ந்தே நாக³ஸேன, யம் ப⁴க³வா ஆஹ ‘கு²த்³தா³னுகு²த்³த³கானி ஸிக்கா²பதா³னீ’தி, ஏத்தா²யம் ஜனோ ஸம்மூள்ஹோ விமதிஜாதோ அதி⁴கதோ ஸம்ஸயபக்க²ந்தோ³. கதமானி தானி கு²த்³த³கானி ஸிக்கா²பதா³னி, கதமானி அனுகு²த்³த³கானி ஸிக்கா²பதா³னீதி? து³க்கடம், மஹாராஜ, கு²த்³த³கம் ஸிக்கா²பத³ம், து³ப்³பா⁴ஸிதம் அனுகு²த்³த³கம் ஸிக்கா²பத³ம், இமானி த்³வே கு²த்³தா³னுகு²த்³த³கானி ஸிக்கா²பதா³னி, புப்³ப³கேஹிபி, மஹாராஜ, மஹாதே²ரேஹி ஏத்த² விமதி உப்பாதி³தா, தேஹிபி ஏகஜ்ஜ²ம் ந கதோ த⁴ம்மஸண்டி²திபரியாயே ப⁴க³வதா ஏஸோ பஞ்ஹோ உபதி³ட்டோ²தி. சிரனிக்கி²த்தம், ப⁴ந்தே நாக³ஸேன, ஜினரஹஸ்ஸம் அஜ்ஜேதரஹி லோகே விவடம் பாகடம் கத’’ந்தி.

கு²த்³தா³னுகு²த்³த³கபஞ்ஹோ பட²மோ.

2. அப்³யாகரணீயபஞ்ஹோ

2. ‘‘ப⁴ந்தே நாக³ஸேன, பா⁴ஸிதம்பேதம் ப⁴க³வதா ‘நத்தா²னந்த³ ததா²க³தஸ்ஸ த⁴ம்மேஸு ஆசரியமுட்டீ²’தி, புன ச தே²ரேன மாலுக்யபுத்தேன [மாலுங்க்யபுத்தேன (ஸீ. ஸ்யா. பீ.) ஸம். நி. 4.95; அ. நி. 1.4.257 பஸ்ஸிதப்³ப³ம்] பஞ்ஹம் புட்டோ² ந ப்³யாகாஸி. ஏஸோ கோ², ப⁴ந்தே நாக³ஸேன, பஞ்ஹோ த்³வயந்தோ [த்³வயதோ (ஸீ.)] ஏகந்தனிஸ்ஸிதோ ப⁴விஸ்ஸதி அஜானனேன வா கு³ய்ஹகரணேன வா. யதி³, ப⁴ந்தே நாக³ஸேன, ப⁴க³வதா ப⁴ணிதம் ‘நத்தா²னந்த³ ததா²க³தஸ்ஸ த⁴ம்மேஸு ஆசரியமுட்டீ²’தி, தேன ஹி தே²ரஸ்ஸ மாலுக்யபுத்தஸ்ஸ அஜானந்தேன ந ப்³யாகதம். யதி³ ஜானந்தேன ந ப்³யாகதம், தேன ஹி அத்தி² ததா²க³தஸ்ஸ த⁴ம்மேஸு ஆசரியமுட்டி². அயம்பி உப⁴தோ கோடிகோ பஞ்ஹோ தவானுப்பத்தோ, ஸோ தயா நிப்³பா³ஹிதப்³போ³’’தி.

‘‘பா⁴ஸிதம்பேதம், மஹாராஜ, ப⁴க³வதா ‘நத்தா²னந்த³ ததா²க³தஸ்ஸ த⁴ம்மேஸு ஆசரியமுட்டீ²’தி, அப்³யாகதோ ச தே²ரேன மாலுக்யபுத்தேன புச்சி²தோ பஞ்ஹோ, தஞ்ச பன ந அஜானந்தேன ந கு³ய்ஹகரணேன. சத்தாரிமானி, மஹாராஜ, பஞ்ஹப்³யாகரணானி. கதமானி சத்தாரி? ஏகம்ஸப்³யாகரணீயோ பஞ்ஹோ விப⁴ஜ்ஜப்³யாகரணீயோ பஞ்ஹோ படிபுச்சா²ப்³யாகரணீயோ பஞ்ஹோ ட²பனீயோ பஞ்ஹோதி.

‘‘கதமோ ச, மஹாராஜ, ஏகம்ஸப்³யாகரணீயோ பஞ்ஹோ? ‘ரூபம் அனிச்ச’ந்தி ஏகம்ஸப்³யாகரணீயோ பஞ்ஹோ, ‘வேத³னா அனிச்சா’தி…பே… ‘ஸஞ்ஞா அனிச்சா’தி…பே… ‘ஸங்கா²ரா அனிச்சா’தி…பே… ‘விஞ்ஞாணம் அனிச்ச’’ந்தி ஏகம்ஸப்³யாகரணீயோ பஞ்ஹோ, அயம் ஏகம்ஸப்³யாகரணீயோ பஞ்ஹோ.

‘‘கதமோ விப⁴ஜ்ஜப்³யாகரணீயோ பஞ்ஹோ? ‘அனிச்சம் பன ரூப’ந்தி விப⁴ஜ்ஜப்³யாகரணீயோ பஞ்ஹோ, ‘அனிச்சா பன வேத³னா’தி…பே… ‘அனிச்சா பன ஸஞ்ஞா’தி…பே… ‘அனிச்சா பன ஸங்கா²ரா’தி…பே… ‘அனிச்சம் பன விஞ்ஞாண’ந்தி விப⁴ஜ்ஜப்³யாகரணீயோ பஞ்ஹோ, அயம் விப⁴ஜ்ஜப்³யாகரணீயோ பஞ்ஹோ.

‘‘கதமோ படிபுச்சா²ப்³யாகரணீயோ பஞ்ஹோ? ‘கிம் நு கோ² சக்கு²னா ஸப்³ப³ம் விஜானாதீ’தி அயம் படிபுச்சா²ப்³யாகரணீயோ பஞ்ஹோ.

‘‘கதமோ ட²பனீயோ பஞ்ஹோ? ‘ஸஸ்ஸதோ லோகோ’தி ட²பனீயோ பஞ்ஹோ, ‘அஸஸ்ஸதோ லோகோ’தி. ‘அந்தவா லோகோ’தி. ‘அனந்தவா லோகோ’தி. ‘அந்தவா ச அனந்தவா ச லோகோ’தி. ‘நேவந்தவா நானந்தவா லோகோ’தி. ‘தம் ஜீவம் தம் ஸரீர’ந்தி. ‘அஞ்ஞம் ஜீவம் அஞ்ஞம் ஸரீர’ந்தி. ‘ஹோதி ததா²க³தோ பரம் மரணா’தி. ‘ந ஹோதி ததா²க³தோ பரம் மரணா’தி. ‘ஹோதி ச ந ச ஹோதி ததா²க³தோ பரம் மரணா’தி. ‘நேவ ஹோதி ந ந ஹோதி ததா²க³தோ பரம் மரணா’தி ட²பனீயோ பஞ்ஹோ, அயம் ட²பனீயோ பஞ்ஹோ.

‘‘ப⁴க³வா, மஹாராஜ, தே²ரஸ்ஸ மாலுக்யபுத்தஸ்ஸ தம் ட²பனீயம் பஞ்ஹம் ந ப்³யாகாஸி. ஸோ பன பஞ்ஹோ கிம் காரணா ட²பனீயோ? ந தஸ்ஸ தீ³பனாய ஹேது வா காரணம் வா அத்தி², தஸ்மா ஸோ பஞ்ஹோ ட²பனீயோ. நத்தி² பு³த்³தா⁴னம் ப⁴க³வந்தானம் அகாரணமஹேதுகம் கி³ரமுதீ³ரண’’ந்தி. ‘‘ஸாது⁴, ப⁴ந்தே நாக³ஸேன, ஏவமேதம் ததா² ஸம்படிச்சா²மீ’’தி.

அப்³யாகரணீயபஞ்ஹோ து³தியோ.

3. மச்சுபா⁴யனாபா⁴யனபஞ்ஹோ

3. ‘‘ப⁴ந்தே நாக³ஸேன, பா⁴ஸிதம்பேதம் ப⁴க³வதா ‘ஸப்³பே³ தஸந்தி த³ண்ட³ஸ்ஸ, ஸப்³பே³ பா⁴யந்தி மச்சுனோ’தி, புன ப⁴ணிதம் ‘அரஹா ஸப்³ப³ப⁴யமதிக்கந்தோ’தி. கிம் நு கோ², ப⁴ந்தே நாக³ஸேன, அரஹா த³ண்ட³ப⁴யா தஸதி, நிரயே வா நேரயிகா ஸத்தா ஜலிதா குதி²தா தத்தா ஸந்தத்தா தம்ஹா ஜலிதக்³கி³ஜாலகா மஹானிரயா சவமானா மச்சுனோ பா⁴யந்தி. யதி³, ப⁴ந்தே நாக³ஸேன, ப⁴க³வதா ப⁴ணிதம் ‘ஸப்³பே³ தஸந்தி த³ண்ட³ஸ்ஸ, ஸப்³பே³ பா⁴யந்தி மச்சுனோ’தி, தேன ஹி ‘அரஹா ஸப்³ப³ப⁴யமதிக்கந்தோ’தி யம் வசனம், தம் மிச்சா². யதி³ ப⁴க³வதா ப⁴ணிதம் ‘அரஹா ஸப்³ப³ப⁴யமதிக்கந்தோ’தி, தேன ஹி ‘ஸப்³பே³ தஸந்தி த³ண்ட³ஸ்ஸ, ஸப்³பே³ பா⁴யந்தி மச்சுனோ’தி தம்பி வசனம் மிச்சா². அயம் உப⁴தோ கோடிகோ பஞ்ஹோ தவானுப்பத்தோ, ஸோ தயா நிப்³பா³ஹிதப்³போ³’’தி.

‘‘நேதம், மஹாராஜ, வசனம் ப⁴க³வதா அரஹந்தே உபாதா³ய ப⁴ணிதம் ‘ஸப்³பே³ தஸந்தி த³ண்ட³ஸ்ஸ, ஸப்³பே³ பா⁴யந்தி மச்சுனோ’தி. ட²பிதோ அரஹா தஸ்மிம் வத்து²ஸ்மிம், ஸமூஹதோ ப⁴யஹேது அரஹதோ. யே தே, மஹாராஜ, ஸத்தா ஸகிலேஸா, யேஸஞ்ச அதி⁴மத்தா அத்தானுதி³ட்டி², யே ச ஸுக²து³க்கே²ஸு உன்னதாவனதா, தே உபாதா³ய ப⁴க³வதா ப⁴ணிதம் ‘ஸப்³பே³ தஸந்தி த³ண்ட³ஸ்ஸ, ஸப்³பே³ பா⁴யந்தி மச்சுனோ’தி. அரஹதோ, மஹாராஜ, ஸப்³ப³க³தி உபச்சி²ன்னா, யோனி வித்³த⁴ம்ஸிதா, படிஸந்தி⁴ உபஹதா, ப⁴க்³கா³ பா²ஸுகா, ஸமூஹதா ஸப்³ப³ப⁴வாலயா, ஸமுச்சி²ன்னா ஸப்³ப³ஸங்கா²ரா, ஹதம் குஸலாகுஸலம், விஹதா அவிஜ்ஜா, அபீ³ஜம் விஞ்ஞாணம் கதம், த³ட்³டா⁴ ஸப்³ப³கிலேஸா, அதிவத்தா லோகத⁴ம்மா, தஸ்மா அரஹா ந தஸதி ஸப்³ப³ப⁴யேஹி.

‘‘இத⁴, மஹாராஜ, ரஞ்ஞோ சத்தாரோ மஹாமத்தா ப⁴வேய்யும் அனுரக்கா² லத்³த⁴யஸா விஸ்ஸாஸிகா ட²பிதா மஹதி இஸ்ஸரியே டா²னே. அத² ராஜா கிஸ்மிஞ்சி தே³வ கரணீயே ஸமுப்பன்னே யாவதா ஸகவிஜிதே ஸப்³ப³ஜனஸ்ஸ ஆணாபேய்ய ‘ஸப்³பே³வ மே ப³லிம் கரோந்து, ஸாதே⁴த² தும்ஹே சத்தாரோ மஹாமத்தா தம் கரணீய’ந்தி. அபி நு கோ², மஹாராஜ, தேஸம் சதுன்னம் மஹாமத்தானம் ப³லிப⁴யா ஸந்தாஸோ உப்பஜ்ஜேய்யா’’தி? ‘‘ந ஹி ப⁴ந்தே’’தி. ‘‘கேன காரணேன மஹாராஜா’’தி. ‘‘ட²பிதா தே, ப⁴ந்தே, ரஞ்ஞா உத்தமட்டா²னே, நத்தி² தேஸம் ப³லி, ஸமதிக்கந்தப³லினோ தே, அவஸேஸே உபாதா³ய ரஞ்ஞா ஆணாபிதம் ‘ஸப்³பே³வ மே ப³லிம் கரோந்தூ’தி. ‘‘ஏவமேவ கோ², மஹாராஜ, நேதம் வசனம் ப⁴க³வதா அரஹந்தே உபாதா³ய ப⁴ணிதம், ட²பிதோ அரஹா தஸ்மிம் வத்து²ஸ்மிம், ஸமூஹதோ ப⁴யஹேது அரஹதோ, யே தே, மஹாராஜ, ஸத்தா ஸகிலேஸா, யேஸஞ்ச அதி⁴மத்தா அத்தானுதி³ட்டி², யே ச ஸுக²து³க்கே²ஸு உன்னதாவனதா, தே உபாதா³ய ப⁴க³வதா ப⁴ணிதம் ‘ஸப்³பே³ தஸந்தி த³ண்ட³ஸ்ஸ, ஸப்³பே³ பா⁴யந்தி மச்சுனோ’தி. தஸ்மா அரஹா ந தஸதி ஸப்³ப³ப⁴யேஹீ’’தி.

‘‘நேதம், ப⁴ந்தே நாக³ஸேன, வசனம் ஸாவஸேஸம், நிரவஸேஸவசனமேதம் ‘ஸப்³பே³’தி. தத்த² மே உத்தரிம் காரணம் ப்³ரூஹி தம் வசனம் பதிட்டா²பேது’’ந்தி.

‘‘இத⁴, மஹாராஜ, கா³மே கா³மஸ்ஸாமிகோ ஆணாபகம் ஆணாபேய்ய ‘ஏஹி, போ⁴ ஆணாபக, யாவதா கா³மே கா³மிகா, தே ஸப்³பே³ ஸீக⁴ம் மம ஸந்திகே ஸன்னிபாதேஹீ’தி. ஸோ ‘ஸாது⁴ ஸாமீ’தி ஸம்படிச்சி²த்வா கா³மமஜ்ஜே² ட²த்வா திக்க²த்தும் ஸத்³த³மனுஸ்ஸாவேய்ய ‘யாவதா கா³மே கா³மிகா, தே ஸப்³பே³ ஸீக⁴ஸீக⁴ம் ஸாமினோ ஸந்திகே ஸன்னிபதந்தூ’தி. ததோ தே கா³மிகா ஆணாபகஸ்ஸ வசனேன துரிததுரிதா ஸன்னிபதித்வா கா³மஸ்ஸாமிகஸ்ஸ ஆரோசேந்தி ‘ஸன்னிபதிதா, ஸாமி, ஸப்³பே³ கா³மிகா, யம் தே கரணீயம் தம் கரோஹீ’தி. இதி ஸோ, மஹாராஜ, கா³மஸ்ஸாமிகோ குடிபுரிஸே ஸன்னிபாதேந்தோ ஸப்³பே³ கா³மிகே ஆணாபேதி, தே ச ஆணத்தா ந ஸப்³பே³ ஸன்னிபதந்தி, குடிபுரிஸா யேவ ஸன்னிபதந்தி, ‘ஏத்தகா யேவ மே கா³மிகா’தி கா³மஸ்ஸாமிகோ ச ததா² ஸம்படிச்ச²தி, அஞ்ஞே ப³ஹுதரா அனாக³தா இத்தி²புரிஸா தா³ஸிதா³ஸா ப⁴தகா கம்மகரா கா³மிகா கி³லானா கோ³மஹிம்ஸா அஜேளகா ஸுவானா, யே அனாக³தா, ஸப்³பே³ தே அக³ணிதா, குடிபுரிஸே யேவ உபாதா³ய ஆணாபிதத்தா ‘ஸப்³பே³ ஸன்னிபதந்தூ’தி. ஏவமேவ கோ², மஹாராஜ, நேதம் வசனம் ப⁴க³வதா அரஹந்தே உபாதா³ய ப⁴ணிதம், ட²பிதோ அரஹா தஸ்மிம் வத்து²ஸ்மிம், ஸமூஹதோ ப⁴யஹேது அரஹதோ, யே தே, மஹாராஜ, ஸத்தா ஸகிலேஸா, யேஸஞ்ச அதி⁴மத்தா அத்தானுதி³ட்டி², யே ச ஸுக²து³க்கே²ஸு உன்னதாவனதா, தே உபாதா³ய ப⁴க³வதா ப⁴ணிதம் ‘ஸப்³பே³ தஸந்தி த³ண்ட³ஸ்ஸ, ஸப்³பே³ பா⁴யந்தி மச்சுனோ’தி. தஸ்மா அரஹா ந தஸதி ஸப்³ப³ப⁴யேஹி.

‘‘அத்தி², மஹாராஜ, ஸாவஸேஸம் வசனம் ஸாவஸேஸோ அத்தோ², அத்தி² ஸாவஸேஸம் வசனம் நிரவஸேஸோ அத்தோ², அத்தி² நிரவஸேஸம் வசனம் ஸாவஸேஸோ அத்தோ², அத்தி² நிரவஸேஸம் வசனம் நிரவஸேஸோ அத்தோ². தேன தேன அத்தோ² ஸம்படிச்சி²தப்³போ³.

‘‘பஞ்சவிதே⁴ஹி, மஹாராஜ, காரணேஹி அத்தோ² ஸம்படிச்சி²தப்³போ³ ஆஹச்சபதே³ன ரஸேன ஆசரியவம்ஸேன [ஆசரியவம்ஸதாய (பீ. க.)] அதி⁴ப்பாயா காரணுத்தரியதாய. ஏத்த² ஹி ஆஹச்சபத³ந்தி ஸுத்தம் அதி⁴ப்பேதம். ரஸோதி ஸுத்தானுலோமம். ஆசரியவம்ஸோதி ஆசரியவாதோ³. அதி⁴ப்பாயோதி அத்தனோ மதி. காரணுத்தரியதாதி இமேஹி சதூஹி ஸமேந்தம் [ஸமேதம் (ஸீ.)] காரணம். இமேஹி கோ², மஹாராஜ, பஞ்சஹி காரணேஹி அத்தோ² ஸம்படிச்சி²தப்³போ³. ஏவமேஸோ பஞ்ஹோ ஸுவினிச்சி²தோ ஹோதீ’’தி.

‘‘ஹோது, ப⁴ந்தே நாக³ஸேன, ததா² தம் ஸம்படிச்சா²மி. ட²பிதோ ஹோது அரஹா தஸ்மிம் வத்து²ஸ்மிம், தஸந்து அவஸேஸா ஸத்தா, நிரயே பன நேரயிகா ஸத்தா து³க்கா² திப்³பா³ கடுகா வேத³னா வேத³யமானா ஜலிதபஜ்ஜலிதஸப்³ப³ங்க³பச்சங்கா³ ருண்ணகாருஞ்ஞகந்தி³தபரிதே³விதலாலப்பிதமுகா² அஸய்ஹதிப்³ப³து³க்கா²பி⁴பூ⁴தா அதாணா அஸரணா அஸரணீபூ⁴தா அனப்பஸோகாதுரா அந்திமபச்சி²மக³திகா ஏகந்தஸோகபராயணா உண்ஹதிகி²ணசண்ட³க²ரதபனதேஜவந்தோ பீ⁴மப⁴யஜனகனினாத³மஹாஸத்³தா³ ஸம்ஸிப்³பி³தச²ப்³பி³த⁴ஜாலாமாலாகுலா ஸமந்தா ஸதயோஜனானுப²ரணச்சிவேகா³ கத³ரியா தபனா மஹானிரயா சவமானா மச்சுனோ பா⁴யந்தீ’’தி? ‘‘ஆம, மஹாராஜா’’தி.

‘‘நனு, ப⁴ந்தே நாக³ஸேன, நிரயோ ஏகந்தது³க்க²வேத³னீயோ, கிஸ்ஸ பன தே நேரயிகா ஸத்தா ஏகந்தது³க்க²வேத³னீயா நிரயா சவமானா மச்சுனோ பா⁴யந்தி, கிஸ்ஸ நிரயே ரமந்தீ’’தி? ‘‘ந தே, மஹாராஜ, நேரயிகா ஸத்தா நிரயே ரமந்தி, முஞ்சிதுகாமாவ தே நிரயா. மரணஸ்ஸேவ ஸோ [மரணஸ்ஸேஸோ (ஸீ. பீ.)], மஹாராஜ, ஆனுபா⁴வோ, யேன தேஸம் ஸந்தாஸோ உப்பஜ்ஜதீ’’தி. ‘‘ஏதம் கோ², ப⁴ந்தே நாக³ஸேன, ந ஸத்³த³ஹாமி, யம் முச்சிதுகாமானம் சுதியா ஸந்தாஸோ உப்பஜ்ஜதீதி, ஹாஸனீயம், ப⁴ந்தே நாக³ஸேன, தம் டா²னம், யம் தே பத்தி²தம் லப⁴ந்தி, காரணேன மம் ஸஞ்ஞாபேஹீ’’தி.

‘‘மரணந்தி கோ², மஹாராஜ, ஏதம் அதி³ட்ட²ஸச்சானம் தாஸனீயட்டா²னம், ஏத்தா²யம் ஜனோ தஸதி ச உப்³பி³ஜ்ஜதி ச. யோ ச, மஹாராஜ, கண்ஹஸப்பஸ்ஸ பா⁴யதி, ஸோ மரணஸ்ஸ பா⁴யந்தோ கண்ஹஸப்பஸ்ஸ பா⁴யதி. யோ ச ஹத்தி²ஸ்ஸ பா⁴யதி…பே… ஸீஹஸ்ஸ…பே… ப்³யக்³க⁴ஸ்ஸ…பே… தீ³பிஸ்ஸ…பே… அச்ச²ஸ்ஸ…பே… தரச்ச²ஸ்ஸ…பே… மஹிம்ஸஸ்ஸ…பே… க³வயஸ்ஸ…பே… அக்³கி³ஸ்ஸ…பே… உத³கஸ்ஸ…பே… கா²ணுகஸ்ஸ…பே… கண்டகஸ்ஸ பா⁴யதி. யோ ச ஸத்தியா பா⁴யதி, ஸோ மரணஸ்ஸ பா⁴யந்தோ ஸத்தியா பா⁴யதி. மரணஸ்ஸேவ ஸோ [மரணஸ்ஸேஸோ (ஸீ. பீ.)], மஹாராஜ, ஸரஸஸபா⁴வதேஜோ [ஸரஸபா⁴வதேஜோ (ஸீ. பீ.)], தஸ்ஸ ஸரஸஸபா⁴வதேஜேன ஸகிலேஸா ஸத்தா மரணஸ்ஸ தஸந்தி பா⁴யந்தி, முச்சிதுகாமாபி, மஹாராஜ, நேரயிகா ஸத்தா மரணஸ்ஸ தஸந்தி பா⁴யந்தி.

‘‘இத⁴, மஹாராஜ, புரிஸஸ்ஸ காயே மேதோ³ க³ண்டி² உப்பஜ்ஜேய்ய. ஸோ தேன ரோகே³ன து³க்கி²தோ உபத்³த³வா பரிமுச்சிதுகாமோ பி⁴ஸக்கம் ஸல்லகத்தம் ஆமந்தாபேய்ய. தஸ்ஸ வசனம் ஸோ பி⁴ஸக்கோ ஸல்லகத்தோ ஸம்படிச்சி²த்வா தஸ்ஸ ரோக³ஸ்ஸ உத்³த⁴ரணாய உபகரணம் உபட்டா²பேய்ய, ஸத்த²கம் திகி²ணம் கரேய்ய, யமகஸலாகா [த³ஹனஸலாகம் (க.)] அக்³கி³ம்ஹி பக்கி²பேய்ய, கா²ரலவணம் நிஸதா³ய பிஸாபேய்ய, அபி நு கோ², மஹாராஜ, தஸ்ஸ ஆதுரஸ்ஸ திகி²ணஸத்த²கச்சே²த³னேன யமகஸலாகாத³ஹனேன கா²ரலோணப்பவேஸனேன தாஸோ உப்பஜ்ஜேய்யா’’தி? ‘‘ஆம ப⁴ந்தே’’தி. ‘‘இதி, மஹாராஜ, தஸ்ஸ ஆதுரஸ்ஸ ரோகா³ முச்சிதுகாமஸ்ஸாபி வேத³னாப⁴யா ஸந்தாஸோ உப்பஜ்ஜதி. ஏவமேவ கோ², மஹாராஜ, நிரயா முச்சிதுகாமானம்பி நேரயிகானம் ஸத்தானம் மரணப⁴யா ஸந்தாஸோ உப்பஜ்ஜதி.

‘‘இத⁴, மஹாராஜ, புரிஸோ இஸ்ஸராபராதி⁴கோ ப³த்³தோ⁴ ஸங்க²லிகப³ந்த⁴னேன க³ப்³பே⁴ பக்கி²த்தோ பரிமுச்சிதுகாமோ அஸ்ஸ, தமேனம் ஸோ இஸ்ஸரோ மோசேதுகாமோ பக்கோஸாபேய்ய. அபி நு கோ², மஹாராஜ, தஸ்ஸ இஸ்ஸராபராதி⁴கஸ்ஸ புரிஸஸ்ஸ ‘கததோ³ஸோ அஹ’ந்தி ஜானந்தஸ்ஸ இஸ்ஸரத³ஸ்ஸனேன ஸந்தாஸோ உப்பஜ்ஜேய்யா’’தி? ‘‘ஆம ப⁴ந்தே’’தி. ‘‘இதி, மஹாராஜ, தஸ்ஸ இஸ்ஸராபராதி⁴கஸ்ஸ புரிஸஸ்ஸ பரிமுச்சிதுகாமாஸ்ஸாபி இஸ்ஸரப⁴யா ஸந்தாஸோ உப்பஜ்ஜதி. ஏவமேவ கோ², மஹாராஜ, நிரயா முச்சிதுகாமானம்பி நேரயிகானம் ஸத்தானம் மரணப⁴யா ஸந்தாஸோ உப்பஜ்ஜதீ’’தி.

‘‘அபரம்பி, ப⁴ந்தே, உத்தரிம் காரணம் ப்³ரூஹி, யேனாஹம் காரணேன ஓகப்பேய்ய’’ந்தி. ‘‘இத⁴, மஹாராஜ, புரிஸோ த³ட்ட²விஸேன ஆஸீவிஸேன த³ட்டோ² ப⁴வேய்ய, ஸோ தேன விஸவிகாரேன பதேய்ய உப்பதேய்ய வட்டேய்ய பவட்டேய்ய, அத²ஞ்ஞதரோ புரிஸோ ப³லவந்தேன மந்தபதே³ன தம் த³ட்ட²விஸம் ஆஸீவிஸம் ஆனேத்வா தம் த³ட்ட²விஸம் பச்சாசமாபேய்ய, அபி நு கோ², மஹாராஜ, தஸ்ஸ விஸக³தஸ்ஸ புரிஸஸ்ஸ தஸ்மிம் த³ட்ட²விஸே ஸப்பே ஸோத்தி²ஹேது உபக³ச்ச²ந்தே ஸந்தாஸோ உப்பஜ்ஜேய்யா’’தி? ‘‘ஆம ப⁴ந்தே’’தி. இதி, மஹாராஜ, ததா²ரூபே அஹிம்ஹி ஸோத்தி²ஹேதுபி உபக³ச்ச²ந்தே தஸ்ஸ ஸந்தாஸோ உப்பஜ்ஜதி. ஏவமேவ கோ², மஹாராஜ, நிரயா முச்சிதுகாமானம்பி நேரயிகானம் ஸந்தானம் மரணப⁴யா ஸந்தாஸோ உப்பஜ்ஜதி. அனிட்ட²ம், மஹாராஜ, ஸப்³ப³ஸத்தானம் மரணம், தஸ்மா நேரயிகா ஸத்தா நிரயா பரிமுச்சிதுகாமாபி மச்சுனோ பா⁴யந்தீ’’தி. ‘‘ஸாது⁴, ப⁴ந்தே நாக³ஸேன, ஏவமேதம் ததா² ஸம்படிச்சா²மீ’’தி.

மச்சுபா⁴யனாபா⁴யனபஞ்ஹோ ததியோ.

4. மச்சுபாஸமுத்திபஞ்ஹோ

4. ‘‘ப⁴ந்தே நாக³ஸேன, பா⁴ஸிதம்பேதம் ப⁴க³வதா –

‘‘‘ந அந்தலிக்கே² ந ஸமுத்³த³மஜ்ஜே², ந பப்³ப³தானம் விவரம் பவிஸ்ஸ;

ந விஜ்ஜதீ ஸோ ஜக³திப்பதே³ஸோ, யத்த²ட்டி²தோ முச்சேய்ய மச்சுபாஸா’தி.

‘‘புன ப⁴க³வதா பரித்தா ச உத்³தி³ட்டா². ஸேய்யதி²த³ம், ரதனஸுத்தம் மேத்தஸுத்தம் க²ந்த⁴பரித்தம் மோரபரித்தம் த⁴ஜக்³க³பரித்தம் ஆடானாடியபரித்தம் அங்கு³லிமாலபரித்தம். யதி³, ப⁴ந்தே நாக³ஸேன, ஆகாஸக³தோபி ஸமுத்³த³மஜ்ஜ²க³தோபி பாஸாத³குடிலேணகு³ஹாபப்³பா⁴ரத³ரிபி³லகி³ரி விவரபப்³ப³தந்தரக³தோபி ந முச்சதி மச்சுபாஸா, தேன ஹி பரித்தகம்மம் மிச்சா². யதி³ பரித்தகரணேன மச்சுபாஸா பரிமுத்தி ப⁴வதி, தேன ஹி ‘ந அந்தலிக்கே²…பே… மச்சுபாஸா’தி தம்பி வசனம் மிச்சா². அயம்பி உப⁴தோ கோடிகோ பஞ்ஹோ க³ண்டி²தோபி க³ண்டி²தரோ தவானுப்பத்தோ, ஸோ தயா நிப்³பா³ஹிதப்³போ³’’தி.

‘‘பா⁴ஸிதம்பேதம், மஹாராஜ, ப⁴க³வதா ‘ந அந்தலிக்கே²…பே… மச்சுபாஸா’தி, பரித்தா ச ப⁴க³வதா உத்³தி³ட்டா², தஞ்ச பன ஸாவஸேஸாயுகஸ்ஸ வயஸம்பன்னஸ்ஸ அபேதகம்மாவரணஸ்ஸ, நத்தி², மஹாராஜ, கீ²ணாயுகஸ்ஸ டி²தியா கிரியா வா உபக்கமோ வா.

‘‘யதா² மஹாராஜ மதஸ்ஸ ருக்க²ஸ்ஸ ஸுக்க²ஸ்ஸ கோளாபஸ்ஸ நிஸ்னேஹஸ்ஸ உபருத்³த⁴ஜீவிதஸ்ஸ க³தாயுஸங்கா²ரஸ்ஸ கும்ப⁴ஸஹஸ்ஸேனபி உத³கே ஆகிரந்தே அல்லத்தம் வா பல்லவிதஹரிதபா⁴வோ வா ந ப⁴வேய்ய. ஏவமேவ கோ², மஹாராஜ, பே⁴ஸஜ்ஜபரித்தகம்மேன நத்தி² கீ²ணாயுகஸ்ஸ டி²தியா கிரியா வா உபக்கமோ வா, யானி தானி, மஹாராஜ, மஹியா ஓஸதா⁴னி பே⁴ஸஜ்ஜானி, தானிபி கீ²ணாயுகஸ்ஸ அகிச்சகரானி ப⁴வந்தி. ஸாவஸேஸாயுகம், மஹாராஜ, வயஸம்பன்னம் அபேதகம்மாவரணம் பரித்தம் ரக்க²தி கோ³பேதி, தஸ்ஸத்தா²ய ப⁴க³வதா பரித்தா உத்³தி³ட்டா².

‘‘யதா², மஹாராஜ, கஸ்ஸகோ பரிபக்கே த⁴ஞ்ஞே மதே ஸஸ்ஸனாளே உத³கப்பவேஸனம் வாரேய்ய, யம் பன ஸஸ்ஸம் தருணம் மேக⁴ஸன்னிப⁴ம் வயஸம்பன்னம், தம் உத³கவட்³டி⁴யா வட்³ட⁴தி. ஏவமேவ கோ², மஹாராஜ, கீ²ணாயுகஸ்ஸ பே⁴ஸஜ்ஜபரித்தகிரியா ட²பிதா படிக்கி²த்தா, யே பன தே மனுஸ்ஸா ஸாவஸேஸாயுகா வயஸம்பன்னா, தேஸம் அத்தா²ய பரித்தபே⁴ஸஜ்ஜானி ப⁴ணிதானி, தே பரித்தபே⁴ஸஜ்ஜேஹி வட்³ட⁴ந்தீ’’தி.

‘‘யதி³, ப⁴ந்தே நாக³ஸேன, கீ²ணாயுகோ மரதி, ஸாவஸேஸாயுகோ ஜீவதி, தேன ஹி பரித்தபே⁴ஸஜ்ஜானி நிரத்த²கானி ஹோந்தீ’’தி? ‘‘தி³ட்ட²புப்³போ³ பன தயா, மஹாராஜ, கோசி ரோகோ³ பே⁴ஸஜ்ஜேஹி படினிவத்திதோ’’தி? ‘‘ஆம, ப⁴ந்தே, அனேகஸதானி தி³ட்டா²னீ’’தி. ‘‘தேன ஹி, மஹாராஜ, ‘பரித்தபே⁴ஸஜ்ஜகிரியா நிரத்த²கா’தி யம் வசனம், தம் மிச்சா² ப⁴வதீ’’தி.

‘‘தி³ஸ்ஸந்தி, ப⁴ந்தே நாக³ஸேன, வேஜ்ஜானம் உபக்கமா பே⁴ஸஜ்ஜபானானுலேபா, தேன தேஸம் உபக்கமேன ரோகோ³ படினிவத்ததீ’’தி. ‘‘பரித்தானம்பி, மஹாராஜ, பவத்தீயமானானம் ஸத்³தோ³ ஸுய்யதி, ஜிவ்ஹா ஸுக்க²தி, ஹத³யம் ப்³யாவட்டதி, கண்டோ² ஆதுரதி. தேன தேஸம் பவத்தேன ஸப்³பே³ ப்³யாத⁴யோ வூபஸமந்தி, ஸப்³பா³ ஈதியோ அபக³ச்ச²ந்தீதி.

‘‘தி³ட்ட²புப்³போ³ பன தயா, மஹாராஜ, கோசி அஹினா த³ட்டோ² மந்தபதே³ன விஸம் பாதீயமானோ விஸம் சிக்க²ஸ்ஸந்தோ உத்³த⁴மதோ⁴ ஆசமயமானோ’’தி? ‘‘ஆம, ப⁴ந்தே, அஜ்ஜேதரஹிபி தம் லோகே வத்ததீ’’தி. ‘‘தேன ஹி, மஹாராஜ, ‘பரித்தபே⁴ஸஜ்ஜகிரியா நிரத்த²கா’தி யம் வசனம், தம் மிச்சா² ப⁴வதி. கதபரித்தஞ்ஹி, மஹாராஜ, புரிஸம் ட³ம்ஸிதுகாமோ அஹி ந ட³ம்ஸதி, விவடம் முக²ம் பித³ஹதி, சோரானம் உக்கி²த்தலகு³ளம்பி ந ஸம்ப⁴வதி, தே லகு³ளம் முஞ்சித்வா பேமம் கரோந்தி, குபிதோபி ஹத்தி²னாகோ³ ஸமாக³ந்த்வா உபரமதி, பஜ்ஜலிதமஹாஅக்³கி³க்க²ந்தோ⁴பி உபக³ந்த்வா நிப்³பா³யதி, விஸம் ஹலாஹலம்பி கா²யிதம் அக³த³ம் ஸம்பஜ்ஜதி, ஆஹாரத்த²ம் வா ப²ரதி, வத⁴கா ஹந்துகாமா உபக³ந்த்வா தா³ஸபூ⁴தா ஸம்பஜ்ஜந்தி, அக்கந்தோபி பாஸோ ந ஸம்வரதி [ந ஸம்சரதி (ஸீ.)].

‘‘ஸுதபுப்³ப³ம் பன தயா, மஹாராஜ, ‘மோரஸ்ஸ கதபரித்தஸ்ஸ ஸத்தவஸ்ஸஸதானி லுத்³த³கோ நாஸக்கி² பாஸம் உபனேதும், அகதபரித்தஸ்ஸ தம் யேவ தி³வஸம் பாஸம் உபனேஸீ’’தி? ‘‘ஆம, ப⁴ந்தே, ஸுய்யதி, அப்³பு⁴க்³க³தோ ஸோ ஸத்³தோ³ ஸதே³வகே லோகே’’தி. ‘‘தேன ஹி, மஹாராஜ ‘பரித்தபே⁴ஸஜ்ஜகிரியா நிரத்த²கா’தி யம் வசனம், தம் மிச்சா² ப⁴வதி.

‘‘ஸுதபுப்³ப³ம் பன தயா, மஹாராஜ, ‘தா³னவோ ப⁴ரியம் பரிரக்க²ந்தோ ஸமுக்³கே³ பக்கி²பித்வா கி³லித்வா குச்சி²னா பரிஹரதி, அதே²கோ விஜ்ஜாத⁴ரோ தஸ்ஸ தா³னவஸ்ஸ முகே²ன பவிஸித்வா தாய ஸத்³தி⁴ம் அபி⁴ரமதி, யதா³ ஸோ தா³னவோ அஞ்ஞாஸி, அத² ஸமுக்³க³ம் வமித்வா விவரி, ஸஹ ஸமுக்³கே³ விவடே விஜ்ஜாத⁴ரோ யதா²காமம் [யேன காமம் (க.)] பக்காமீ’’தி? ‘‘ஆம, ப⁴ந்தே, ஸுய்யதி, அப்³பு⁴க்³க³தோ ஸோபி ஸத்³தோ³ ஸதே³வகே லோகே’’தி. ‘‘நனு ஸோ, மஹாராஜ, விஜ்ஜாத⁴ரோ பரித்தப³லேன [மந்தப³லேன (?)] க³ஹணா முத்தோ’’தி. ‘‘ஆம ப⁴ந்தே’’தி. ‘‘தேன ஹி, மஹாராஜ, அத்தி² பரித்தப³லம்.

‘‘ஸுதபுப்³ப³ம் பன தயா, மஹாராஜ, ‘அபரோபி விஜ்ஜாத⁴ரோ பா³ராணஸிரஞ்ஞோ அந்தேபுரே மஹேஸியா ஸத்³தி⁴ம் ஸம்பது³ட்டோ² [ஸம்ஸட்டோ² (ஸீ.)] க³ஹணப்பத்தோ ஸமானோ க²ணேன அத³ஸ்ஸனம் க³தோ மந்தப³லேனா’’தி. ‘‘ஆம, ப⁴ந்தே, ஸுய்யதீ’’தி. ‘‘நனு ஸோ, மஹாராஜ, விஜ்ஜாத⁴ரோ பரித்தப³லேன க³ஹணா முத்தோ’’தி? ‘‘ஆம ப⁴ந்தே’’தி. ‘‘தேன ஹி, மஹாராஜ, அத்தி² பரித்தப³ல’’ந்தி.

‘‘ப⁴ந்தே நாக³ஸேன, ‘கிம் ஸப்³பே³ யேவ பரித்தம் ரக்க²தீ’தி? ‘‘ஏகச்சே, மஹாராஜ, ரக்க²தி, ஏகச்சே ந ரக்க²தீ’’தி. ‘‘தேன ஹி, ப⁴ந்தே நாக³ஸேன, பரித்தம் ந ஸப்³ப³த்தி²க’’ந்தி? ‘‘அபி நு கோ², மஹாராஜ, போ⁴ஜனம் ஸப்³பே³ஸம் ஜீவிதம் ரக்க²தீ’’தி? ‘‘ஏகச்சே, ப⁴ந்தே, ரக்க²தி, ஏகச்சே ந ரக்க²தீ’’தி. ‘‘கிம் காரணா’’தி. ‘‘யதோ, ப⁴ந்தே, ஏகச்சே தம் யேவ போ⁴ஜனம் அதிபு⁴ஞ்ஜித்வா விஸூசிகாய மரந்தீ’’தி. ‘‘தேன ஹி, மஹாராஜ, போ⁴ஜனம் ந ஸப்³பே³ஸம் ஜீவிதம் ரக்க²தீ’’தி? ‘‘த்³வீஹி, ப⁴ந்தே நாக³ஸேன, காரணேஹி போ⁴ஜனம் ஜீவிதம் ஹரதி அதிபு⁴த்தேன வா உஸ்மாது³ப்³ப³லதாய வா, ஆயுத³த³ம், ப⁴ந்தே நாக³ஸேன, போ⁴ஜனம் து³ருபசாரேன ஜீவிதம் ஹரதீ’’தி. ‘‘ஏவமேவ கோ², மஹாராஜ, பரித்தம் ஏகச்சே ரக்க²தி, ஏகச்சே ந ரக்க²தி.

‘‘தீஹி, மஹாராஜ, காரணேஹி பரித்தம் ந ரக்க²தி கம்மாவரணேன, கிலேஸாவரணேன, அஸத்³த³ஹனதாய. ஸத்தானுரக்க²ணம், மஹாராஜ, பரித்தம் அத்தனா கதேன ஆரக்க²ம் ஜஹதி, யதா², மஹாராஜ, மாதா புத்தம் குச்சி²க³தம் போஸேதி, ஹிதேன உபசாரேன ஜனேதி, ஜனயித்வா அஸுசிமலஸிங்கா⁴ணிகமபனேத்வா உத்தமவரஸுக³ந்த⁴ம் உபலிம்பதி, ஸோ அபரேன ஸமயேன பரேஸம் புத்தே அக்கோஸந்தே வா பஹரந்தே வா பஹாரம் தே³தி. தே தஸ்ஸ குஜ்ஜி²த்வா பரிஸாய ஆகட்³டி⁴த்வா தம் க³ஹேத்வா ஸாமினோ உபனேந்தி, யதி³ பன தஸ்ஸா புத்தோ அபரத்³தோ⁴ ஹோதி வேலாதிவத்தோ. அத² நம் ஸாமினோ மனுஸ்ஸா ஆகட்³ட⁴யமானா த³ண்ட³முக்³க³ரஜாணுமுட்டீ²ஹி தாளேந்தி போதே²ந்தி, அபி நு கோ², மஹாராஜ, தஸ்ஸ மாதா லப⁴தி ஆகட்³ட⁴னபரிகட்³ட⁴னம் கா³ஹம் ஸாமினோ உபனயனம் காது’’ந்தி? ‘‘ந ஹி ப⁴ந்தே’’தி. ‘‘கேன காரணேன, மஹாராஜா’’தி. ‘‘அத்தனோ, ப⁴ந்தே, அபராதே⁴னா’’தி. ‘‘ஏவமேவ கோ², மஹாராஜ, ஸத்தானம் ஆரக்க²ம் பரித்தம் அத்தனோ அபராதே⁴ன வஞ்ஜ²ம் கரோதீ’’தி [காரேதீதி (ஸீ.)]. ‘‘ஸாது⁴, ப⁴ந்தே நாக³ஸேன, ஸுவினிச்சி²தோ பஞ்ஹோ, க³ஹனம் அக³ஹனம் கதம், அந்த⁴காரோ ஆலோகோ கதோ, வினிவேடி²தம் தி³ட்டி²ஜாலம், த்வம் க³ணிவரபவரமாஸஜ்ஜா’’தி.

மச்சுபாஸமுத்திபஞ்ஹோ சதுத்தோ².

5. பு³த்³த⁴லாப⁴ந்தராயபஞ்ஹோ

5. ‘‘ப⁴ந்தே நாக³ஸேன, தும்ஹே ப⁴ணத² ‘லாபீ⁴ ததா²க³தோ சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரான’ந்தி. புன ச ததா²க³தோ பஞ்சஸாலம் ப்³ராஹ்மணகா³மம் பிண்டா³ய பவிஸித்வா கிஞ்சிதே³வ அலபி⁴த்வா யதா²தோ⁴தேன பத்தேன நிக்க²ந்தோதி. யதி³, ப⁴ந்தே நாக³ஸேன, ததா²க³தோ லாபீ⁴ சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரானம், தேன ஹி பஞ்சஸாலம் ப்³ராஹ்மணகா³மம் பிண்டா³ய பவிஸித்வா கிஞ்சிதே³வ அலபி⁴த்வா யதா²தோ⁴தேன பத்தேன நிக்க²ந்தோதி யம் வசனம், தம் மிச்சா². யதி³ பஞ்சஸாலம் ப்³ராஹ்மணகா³மம் பிண்டா³ய பவிஸித்வா கிஞ்சிதே³வ அலபி⁴த்வா யதா²தோ⁴தேன பத்தேன நிக்க²ந்தோ, தேன ஹி லாபீ⁴ ததா²க³தோ சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரானந்தி தம்பி வசனம் மிச்சா². அயம்பி உப⁴தோ கோடிகோ பஞ்ஹோ ஸுமஹந்தோ து³ன்னிப்³பே³டோ² தவானுப்பத்தோ, ஸோ தயா நிப்³பா³ஹிதப்³போ³’’தி.

‘‘லாபீ⁴, மஹாராஜ, ததா²க³தோ சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரானம், பஞ்சஸாலஞ்ச ப்³ராஹ்மணகா³மம் பிண்டா³ய பவிஸித்வா கிஞ்சிதே³வ அலபி⁴த்வா யதா²தோ⁴தேன பத்தேன நிக்க²ந்தோ, தஞ்ச பன மாரஸ்ஸ பாபிமதோ காரணா’’தி. ‘‘தேன ஹி, ப⁴ந்தே நாக³ஸேன, ப⁴க³வதோ க³ணனபத²ம் வீதிவத்தகப்பே [க³ணனபத²வீதிவத்தே கப்பே (ஸீ.)] அபி⁴ஸங்க²தம் குஸலம் கிந்தி நிட்டி²தம், அது⁴னுட்டி²தேன மாரேன பாபிமதா தஸ்ஸ குஸலஸ்ஸ ப³லவேக³ம் [தம் குஸலப³லவேக³விப்பா²ரம் (ஸீ.)] கிந்தி பிஹிதம், தேன ஹி, ப⁴ந்தே நாக³ஸேன, தஸ்மிம் வத்து²ஸ்மிம் த்³வீஸு டா²னேஸு உபவாதோ³ ஆக³ச்ச²தி, குஸலதோபி அகுஸலம் ப³லவதரம் ஹோதி, பு³த்³த⁴ப³லதோபி மாரப³லம் ப³லவதரம் ஹோதீதி, தேன ஹி ருக்க²ஸ்ஸ மூலதோபி அக்³க³ம் பா⁴ரதரம் ஹோதி, கு³ணஸம்பரிகிண்ணதோபி பாபியம் ப³லவதரம் ஹோதீ’’தி. ‘‘ந, மஹாராஜ, தாவதகேன குஸலதோபி அகுஸலம் ப³லவதரம் நாம ஹோதி, ந பு³த்³த⁴ப³லதோபி மாரப³லம் ப³லவதரம் நாம ஹோதி. அபி சேத்த² காரணம் இச்சி²தப்³ப³ம்.

‘‘யதா², மஹாராஜ, புரிஸோ ரஞ்ஞோ சக்கவத்திஸ்ஸ மது⁴ம் வா மது⁴பிண்டி³கம் வா அஞ்ஞம் வா உபாயனம் அபி⁴ஹரேய்ய, தமேனம் ரஞ்ஞோ த்³வாரபாலோ ஏவம் வதே³ய்ய ‘அகாலோ, போ⁴, அயம் ரஞ்ஞோ த³ஸ்ஸனாய, தேன ஹி, போ⁴, தவ உபாயனம் க³ஹேத்வா ஸீக⁴ஸீக⁴ம் படினிவத்த, புரே தவ ராஜா த³ண்ட³ம் தா⁴ரேஸ்ஸதீ’தி [மா தே ராஜா த³ண்ட³ம் பாபேய்யாதி (ஸீ.)]. ததோ ஸோ புரிஸோ த³ண்ட³ப⁴யா தஸிதோ உப்³பி³க்³கோ³ தம் உபாயனம் ஆதா³ய ஸீக⁴ஸீக⁴ம் படினிவத்தேய்ய, அபி நு கோ² ஸோ, மஹாராஜ, ராஜா சக்கவத்தீ தாவதகேன உபாயனவிகலமத்தகேன த்³வாரபாலதோ து³ப்³ப³லதரோ நாம ஹோதி, அஞ்ஞம் வா பன கிஞ்சி உபாயனம் ந லபே⁴ய்யா’’தி? ‘‘ந ஹி, ப⁴ந்தே, இஸ்ஸாபகதோ ஸோ, ப⁴ந்தே, த்³வாரபாலோ உபாயனம் நிவாரேஸி, அஞ்ஞேன பன த்³வாரேன ஸதஸஹஸ்ஸகு³ணம்பி ரஞ்ஞோ உபாயனம் உபேதீ’’தி. ‘‘ஏவமேவ கோ², மஹாராஜ, இஸ்ஸாபகதோ மாரோ பாபிமா பஞ்சஸாலகே ப்³ராஹ்மணக³ஹபதிகே அன்வாவிஸி, அஞ்ஞானி பன அனேகானி தே³வதாஸதஸஹஸ்ஸானி அமதம் தி³ப்³ப³ம் ஓஜம் க³ஹேத்வா உபக³தானி ‘ப⁴க³வதோ காயே ஓஜம் ஓத³ஹிஸ்ஸாமா’தி ப⁴க³வந்தம் நமஸ்ஸமானானி பஞ்ஜலிகானி டி²தானீ’’தி.

‘‘ஹோது, ப⁴ந்தே நாக³ஸேன, ஸுலபா⁴ ப⁴க³வதோ சத்தாரோ பச்சயா லோகே உத்தமபுரிஸஸ்ஸ, யாசிதோவ ப⁴க³வா தே³வமனுஸ்ஸோஹி சத்தாரோ பச்சயே பரிபு⁴ஞ்ஜதி, அபி ச கோ² பன மாரஸ்ஸ யோ அதி⁴ப்பாயோ, ஸோ தாவதகேன ஸித்³தோ⁴, யம் ஸோ ப⁴க³வதோ போ⁴ஜனஸ்ஸ அந்தராயமகாஸி. ஏத்த² மே, ப⁴ந்தே, கங்கா² ந சி²ஜ்ஜதி, விமதிஜாதோஹம் தத்த² ஸம்ஸயபக்க²ந்தோ³. ந மே தத்த² மானஸம் பக்க²ந்த³தி, யம் ததா²க³தஸ்ஸ அரஹதோ ஸம்மாஸம்பு³த்³த⁴ஸ்ஸ ஸதே³வகே லோகே அக்³க³புக்³க³லவரஸ்ஸ குஸலவரபுஞ்ஞஸம்ப⁴வஸ்ஸ அஸமஸமஸ்ஸ அனுபமஸ்ஸ அப்படிஸமஸ்ஸ ச²வகம் லாமகம் பரித்தம் பாபம் அனரியம் விபன்னம் மாரோ லாப⁴ந்தராயமகாஸீ’’தி.

‘‘சத்தாரோ கோ², மஹாராஜ, அந்தராயா அதி³ட்ட²ந்தராயோ உத்³தி³ஸ்ஸ கதந்தராயோ உபக்க²டந்தராயோ பரிபோ⁴க³ந்தராயோதி. தத்த² கதமோ அதி³ட்ட²ந்தராயோ? அனோதி³ஸ்ஸ அத³ஸ்ஸனேன அனபி⁴ஸங்க²தம் கோசி அந்தராயம் கரோதி ‘கிம் பரஸ்ஸ தி³ன்னேனா’தி, அயம் அதி³ட்ட²ந்தராயோ நாம.

‘‘கதமோ உத்³தி³ஸ்ஸ கதந்தராயோ? இதே⁴கச்சம் புக்³க³லம் உபதி³ஸித்வா உத்³தி³ஸ்ஸ போ⁴ஜனம் படியத்தம் ஹோதி, தம் கோசி அந்தராயம் கரோதி, அயம் உத்³தி³ஸ்ஸ கதந்தராயோ நாம.

‘‘கதமோ உபக்க²டந்தராயோ? இத⁴ யம் கிஞ்சி உபக்க²டம் ஹோதி அப்படிக்³க³ஹிதம், தத்த² கோசி அந்தராயம் கரோதி, அயம் உபக்க²டந்தராயோ நாம.

‘‘கதமோ பரிபோ⁴க³ந்தராயோ? இத⁴ யம் கிஞ்சி பரிபோ⁴க³ம், தத்த² கோசி அந்தராயம் கரோதி, அயம் பரிபோ⁴க³ந்தராயோ நாம. இமே கோ², மஹாராஜ, சத்தாரோ அந்தராயா.

‘‘யம் பன மாரோ பாபிமா பஞ்சஸாலகே ப்³ராஹ்மணக³ஹபதிகே அன்வாவிஸி, தம் நேவ ப⁴க³வதோ பரிபோ⁴க³ம் ந உபக்க²டம் ந உத்³தி³ஸ்ஸகதம், அனாக³தம் அஸம்பத்தம் அத³ஸ்ஸனேன அந்தராயம் கதம், தம் பன நேகஸ்ஸ ப⁴க³வதோ யேவ, அத² கோ² யே தே தேன ஸமயேன நிக்க²ந்தா அப்³பா⁴க³தா, ஸப்³பே³பி தே தம் தி³வஸம் போ⁴ஜனம் ந லபி⁴ம்ஸு, நாஹம் தம், மஹாராஜ, பஸ்ஸாமி ஸதே³வகே லோகே ஸமாரகே ஸப்³ரஹ்மகே ஸஸ்ஸமணப்³ராஹ்மணியா பஜாய ஸதே³வமனுஸ்ஸாய, யோ தஸ்ஸ ப⁴க³வதோ உத்³தி³ஸ்ஸ கதம் உபக்க²டம் பரிபோ⁴க³ம் அந்தராயம் கரேய்ய. ஸசே கோசி இஸ்ஸாய உத்³தி³ஸ்ஸ கதம் உபக்க²டம் பரிபோ⁴க³ம் அந்தராயம் கரேய்ய, ப²லேய்ய தஸ்ஸ முத்³தா⁴ ஸததா⁴ வா ஸஹஸ்ஸதா⁴ வா.

‘‘சத்தாரோமே, மஹாராஜ, ததா²க³தஸ்ஸ கேனசி அனாவரணீயா கு³ணா. கதமே சத்தாரோ? லாபோ⁴, மஹாராஜ, ப⁴க³வதோ உத்³தி³ஸ்ஸ கதோ உபக்க²டோ ந ஸக்கா கேனசி அந்தராயம் காதும்; ஸரீரானுக³தா, மஹாராஜ, ப⁴க³வதோ ப்³யாமப்பபா⁴ ந ஸக்கா கேனசி அந்தராயம் காதும்; ஸப்³ப³ஞ்ஞுதம், மஹாராஜ, ப⁴க³வதோ ஞாணரதனம் ந ஸக்கா கேனசி அந்தராயம் காதும்; ஜீவிதம், மஹாராஜ, ப⁴க³வதோ ந ஸக்கா கேனசி அந்தராயம் காதும். இமே கோ², மஹாராஜ, சத்தாரோ ததா²க³தஸ்ஸ கேனசி அனாவரணீயா கு³ணா, ஸப்³பே³பேதே, மஹாராஜ, கு³ணா ஏகரஸா அரோகா³ அகுப்பா அபரூபக்கமா அபு²ஸானி கிரியானி. அத³ஸ்ஸனேன, மஹாராஜ, மாரோ பாபிமா நிலீயித்வா பஞ்சஸாலகே ப்³ராஹ்மணக³ஹபதிகே அன்வாவிஸி.

‘‘யதா², மஹாராஜ, ரஞ்ஞோ பச்சந்தே தே³ஸே விஸமே அத³ஸ்ஸனேன நிலீயித்வா சோரா பந்த²ம் தூ³ஸேந்தி. யதி³ பன ராஜா தே சோரே பஸ்ஸேய்ய, அபி நு கோ² தே சோரா ஸோத்தி²ம் லபே⁴ய்யு’’ந்தி? ‘‘ந ஹி, ப⁴ந்தே, ப²ரஸுனா பா²லாபேய்ய ஸததா⁴ வா ஸஹஸ்ஸதா⁴ வா’’தி. ‘‘ஏவமேவ கோ², மஹாராஜ, அத³ஸ்ஸனேன மாரோ பாபிமா நிலீயித்வா பஞ்சஸாலகே ப்³ராஹ்மணக³ஹபதிகே அன்வாவிஸி.

‘‘யதா² வா பன, மஹாராஜ, இத்தீ² ஸபதிகா அத³ஸ்ஸனேன நிலீயித்வா பரபுரிஸம் ஸேவதி, ஏவமேவ கோ², மஹாராஜ, அத³ஸ்ஸனேன மாரோ பாபிமா நிலீயித்வா பஞ்சஸாலகே ப்³ராஹ்மணக³ஹபதிகே அன்வாவிஸி. யதி³, மஹாராஜ, இத்தீ² ஸாமிகஸ்ஸ ஸம்முகா² பரபுரிஸம் ஸேவதி, அபி நு கோ² ஸா இத்தீ² ஸோத்தி²ம் லபே⁴ய்யா’’தி? ‘‘ந ஹி, ப⁴ந்தே, ஹனேய்யாபி தம், ப⁴ந்தே, ஸாமிகோ வதே⁴ய்யாபி ப³ந்தே⁴ய்யாபி தா³ஸித்தம் வா உபனேய்யா’’தி. ‘‘ஏவமேவ கோ², மஹாராஜ, அத³ஸ்ஸனேன மாரோ பாபிமா நிலீயித்வா பஞ்சஸாலகே ப்³ராஹ்மணக³ஹபதிகே அன்வாவிஸி. யதி³, மஹாராஜ, மாரோ பாபிமா ப⁴க³வதோ உத்³தி³ஸ்ஸ கதம் உபக்க²டம் பரிபோ⁴க³ம் அந்தராயம் கரேய்ய, ப²லேய்ய தஸ்ஸ முத்³தா⁴ ஸததா⁴ வா ஸஹஸ்ஸதா⁴ வா’’தி. ‘‘ஏவமேதம், ப⁴ந்தே நாக³ஸேன, சோரிகாய கதம் மாரேன பாபிமதா, நிலீயித்வா மாரோ பாபிமா பஞ்சஸாலகே ப்³ராஹ்மணக³ஹபதிகே அன்வாவிஸி. ஸசே ஸோ, ப⁴ந்தே, மாரோ பாபிமா ப⁴க³வதோ உத்³தி³ஸ்ஸ கதம் உபக்க²டம் பரிபோ⁴க³ம் அந்தராயம் கரேய்ய, முத்³தா⁴ வாஸ்ஸ ப²லேய்ய ஸததா⁴ வா ஸஹஸ்ஸதா⁴ வா, காயோ வாஸ்ஸ பு⁴ஸமுட்டி² விய விகிரேய்ய, ஸாது⁴, ப⁴ந்தே நாக³ஸேன, ஏவமேதம் ததா² ஸம்படிச்சா²மீ’’தி.

பு³த்³த⁴லாப⁴ந்தராயபஞ்ஹோ பஞ்சமோ.

6. அபுஞ்ஞபஞ்ஹோ

6. ‘‘ப⁴ந்தே நாக³ஸேன, தும்ஹே ப⁴ணத² ‘யோ அஜானந்தோ பாணாதிபாதம் கரோதி, ஸோ ப³லவதரம் அபுஞ்ஞம் பஸவதீ’தி. புன ச ப⁴க³வதா வினயபஞ்ஞத்தியா ப⁴ணிதம் ‘அனாபத்தி அஜானந்தஸ்ஸா’தி. யதி³, ப⁴ந்தே நாக³ஸேன, அஜானித்வா பாணாதிபாதம் கரோந்தோ ப³லவதரம் அபுஞ்ஞம் பஸவதி, தேன ஹி ‘அனாபத்தி அஜானந்தஸ்ஸா’தி யம் வசனம், தம் மிச்சா². யதி³ அனாபத்தி அஜானந்தஸ்ஸ, தேன ஹி ‘அஜானித்வா பாணாதிபாதம் கரோந்தோ ப³லவதரம் அபுஞ்ஞம் பஸவதீ’தி தம்பி வசனம் மிச்சா². அயம்பி உப⁴தோ கோடிகோ பஞ்ஹோ து³ருத்தரோ து³ரதிக்கமோ தவானுப்பத்தோ, ஸோ தயா நிப்³பா³ஹிதப்³போ³’’தி.

‘‘பா⁴ஸிதம்பேதம், மஹாராஜ, ப⁴க³வதா ‘யோ அஜானந்தோ பாணாதிபாதம் கரோதி, ஸோ ப³லவதரம் அபுஞ்ஞம் பஸவதீ’தி. புன ச வினயபஞ்ஞத்தியா ப⁴க³வதா ப⁴ணிதம் ‘அனாபத்தி அஜானந்தஸ்ஸா’தி. தத்த² அத்த²ந்தரம் அத்தி². கதமம் அத்த²ந்தரம்? அத்தி², மஹாராஜ, ஆபத்தி ஸஞ்ஞாவிமோக்கா², அத்தி² ஆபத்தி நோஸஞ்ஞாவிமோக்கா². யாயம், மஹாராஜ, ஆபத்தி ஸஞ்ஞாவிமோக்கா², தம் ஆபத்திம் ஆரப்³ப⁴ ப⁴க³வதா ப⁴ணிதம் ‘அனாபத்தி அஜானந்தஸ்ஸா’’தி. ‘‘ஸாது⁴, ப⁴ந்தே நாக³ஸேன, ஏவமேதம் ததா² ஸம்படிச்சா²மீ’’தி.

அபுஞ்ஞபஞ்ஹோ ச²ட்டோ².

7. பி⁴க்கு²ஸங்க⁴பரிஹரணபஞ்ஹோ

7. ‘‘ப⁴ந்தே நாக³ஸேன, பா⁴ஸிதம்பேதம் ப⁴க³வதா ‘ததா²க³தஸ்ஸ கோ², ஆனந்த³, ந ஏவம் ஹோதி ‘‘அஹம் பி⁴க்கு²ஸங்க⁴ம் பரிஹரிஸ்ஸாமீ’’’தி வா, ‘‘மமுத்³தே³ஸிகோ பி⁴க்கு²ஸங்கோ⁴’’தி வா’தி. புன ச மேத்தேய்யஸ்ஸ ப⁴க³வதோ ஸபா⁴வகு³ணம் பரிதீ³பயமானேன ப⁴க³வதா ஏவம் ப⁴ணிதம் ‘‘ஸோ அனேகஸஹஸ்ஸம் பி⁴க்கு²ஸங்க⁴ம் பரிஹரிஸ்ஸதி, ஸேய்யதா²பி அஹம் ஏதரஹி அனேகஸதம் பி⁴க்கு²ஸங்க⁴ம் பரிஹராமீ’’தி. யதி³, ப⁴ந்தே நாக³ஸேன, ப⁴க³வதா ப⁴ணிதம் ‘ததா²க³தஸ்ஸ கோ², ஆனந்த³, ந ஏவம் ஹோதி ‘‘அஹம் பி⁴க்கு²ஸங்க⁴ம் பரிஹரிஸ்ஸாமீ’’தி வா, ‘‘மமுத்³தே³ஸிகோ பி⁴க்கு²ஸங்கோ⁴’’தி வா’தி, தேன ஹி அனேகஸதம் பி⁴க்கு²ஸங்க⁴ம் பரிஹராமீதி யம் வசனம், தம் மிச்சா². யதி³ ததா²க³தேன ப⁴ணிதம் ‘ஸோ அனேகஸஹஸ்ஸம் பி⁴க்கு²ஸங்க⁴ம் பரிஹரிஸ்ஸதி, ஸேய்யதா²பி அஹம் ஏதரஹி அனேகஸதம் பி⁴க்கு²ஸங்க⁴ம் பரிஹராமீ’தி, தேன ஹி ததா²க³தஸ்ஸ கோ², ஆனந்த³, ந ஏவம் ஹோதி ‘அஹம் பி⁴க்கு²ஸங்க⁴ம் பரிஹரிஸ்ஸாமீ’தி வா, ‘மமுத்³தே³ஸிகோ பி⁴க்கு²ஸங்கோ⁴’தி வாதி தம்பி வசனம் மிச்சா², அயம்பி உப⁴தோ கோடிகோ பஞ்ஹோ தவானுப்பத்தோ, ஸோ தயா நிப்³பா³ஹிதப்³போ³’’தி.

‘‘பா⁴ஸிதம்பேதம், மஹாராஜ, ப⁴க³வதா ‘ததா²க³தஸ்ஸ கோ², ஆனந்த³, ந ஏவம் ஹோதி ‘‘அஹம் பி⁴க்கு²ஸங்க⁴ம் பரிஹரிஸ்ஸாமீ’’தி வா, ‘‘மமுத்³தே³ஸிகோ பி⁴க்கு²ஸங்கோ⁴’’தி வா’தி. புன ச மேத்தேய்யஸ்ஸாபி ப⁴க³வதோ ஸபா⁴வகு³ணம் பரிதீ³பயமானேன ப⁴க³வதா ப⁴ணிதம் ‘ஸோ அனேகஸஹஸ்ஸம் பி⁴க்கு²ஸங்க⁴ம் பரிஹரிஸ்ஸதி, ஸேய்யதா²பி அஹம் ஏதரஹி அனேகஸதம் பி⁴க்கு²ஸங்க⁴ம் பரிஹராமீ’தி. ஏதஸ்மிஞ்ச, மஹாராஜ, பஞ்ஹே ஏகோ அத்தோ² ஸாவஸேஸோ, ஏகோ அத்தோ² நிரவஸேஸோ. ந, மஹாராஜ, ததா²க³தோ பரிஸாய அனுகா³மிகோ, பரிஸா பன ததா²க³தஸ்ஸ அனுகா³மிகா. ஸம்முதி, மஹாராஜ, ஏஸா ‘அஹ’ந்தி ‘மமா’தி, ந பரமத்தோ² ஏஸோ, விக³தம், மஹாராஜ, ததா²க³தஸ்ஸ பேமம், விக³தோ ஸினேஹோ, ‘மய்ஹ’ந்திபி ததா²க³தஸ்ஸ க³ஹணம் நத்தி², உபாதா³ய பன அவஸ்ஸயோ ஹோதி.

‘‘யதா², மஹாராஜ, பத²வீ பூ⁴மட்டா²னம் ஸத்தானம் பதிட்டா² ஹோதி உபஸ்ஸயம், பத²விட்டா² சேதே ஸத்தா, ந ச மஹாபத²வியா ‘மய்ஹேதே’தி அபேக்கா² ஹோதி, ஏவமேவ கோ², மஹாராஜ, ததா²க³தோ ஸப்³ப³ஸத்தானம் பதிட்டா² ஹோதி உபஸ்ஸயம், ததா²க³தட்டா² [ததா²க³தபதிட்டா² ஏவ (ஸீ.)] சேதே ஸத்தா, ந ச ததா²க³தஸ்ஸ ‘மய்ஹேதே’தி அபேக்கா² ஹோதி. யதா² வா பன, மஹாராஜ, மஹதிமஹாமேகோ⁴ அபி⁴வஸ்ஸந்தோ திணருக்க²பஸுமனுஸ்ஸானம் வுட்³டி⁴ம் தே³தி ஸந்ததிம் அனுபாலேதி. வுட்டூ²பஜீவினோ சேதே ஸத்தா ஸப்³பே³, ந ச மஹாமேக⁴ஸ்ஸ ‘மய்ஹேதே’தி அபேக்கா² ஹோதி. ஏவமேவ கோ², மஹாராஜ, ததா²க³தோ ஸப்³ப³ஸத்தானம் குஸலத⁴ம்மே ஜனேதி அனுபாலேதி, ஸத்தூ²பஜீவினோ சேதே ஸத்தா ஸப்³பே³, ந ச ததா²க³தஸ்ஸ ‘மய்ஹேதே’தி அபேக்கா² ஹோதி. தம் கிஸ்ஸ ஹேது? அத்தானுதி³ட்டி²யா பஹீனத்தா’’தி.

‘‘ஸாது⁴, ப⁴ந்தே நாக³ஸேன, ஸுனிப்³பே³டி²தோ பஞ்ஹோ ப³ஹுவிதே⁴ஹி காரணேஹி, க³ம்பீ⁴ரோ உத்தானீகதோ, க³ண்டி² பி⁴ன்னோ, க³ஹனம் அக³ஹனம் கதம், அந்த⁴காரோ ஆலோகோ கதோ, ப⁴க்³கா³ பரவாதா³, ஜினபுத்தானம் சக்கு²ம் உப்பாதி³த’’ந்தி.

பி⁴க்கு²ஸங்க⁴பரிஹரணபஞ்ஹோ ஸத்தமோ.

8. அபே⁴ஜ்ஜபரிஸபஞ்ஹோ

8. ‘‘ப⁴ந்தே நாக³ஸேன, தும்ஹே ப⁴ணத² ‘ததா²க³தோ அபே⁴ஜ்ஜபரிஸோ’தி, புன ச ப⁴ணத² ‘தே³வத³த்தேன ஏகப்பஹாரம் பஞ்ச பி⁴க்கு²ஸதானி பி⁴ன்னானீ’தி. யதி³, ப⁴ந்தே நாக³ஸேன, ததா²க³தோ அபே⁴ஜ்ஜபரிஸோ, தேன ஹி தே³வத³த்தேன ஏகப்பஹாரம் பஞ்ச பி⁴க்கு²ஸதானி பி⁴ன்னானீதி யம் வசனம், தம் மிச்சா². யதி³ தே³வத³த்தேன ஏகப்பஹாரம் பஞ்ச பி⁴க்கு²ஸதானி பி⁴ன்னானி, தேன ஹி ‘ததா²க³தோ அபே⁴ஜ்ஜபரிஸோ’தி தம்பி வசனம் மிச்சா². அயம்பி உப⁴தோ கோடிகோ பஞ்ஹோ தவானுப்பத்தோ, க³ம்பீ⁴ரோ து³ன்னிவேடி²யோ, க³ண்டி²தோபி க³ண்டி²தரோ, ஏத்தா²யம் ஜனோ ஆவடோ நிவுதோ ஓவுதோ பிஹிதோ பரியோனத்³தோ⁴, ஏத்த² தவ ஞாணப³லம் த³ஸ்ஸேஹி பரவாதே³ஸூ’’தி.

‘‘அபே⁴ஜ்ஜபரிஸோ, மஹாராஜ, ததா²க³தோ, தே³வத³த்தேன ச ஏகப்பஹாரம் பஞ்ச பி⁴க்கு²ஸதானி பி⁴ன்னானி, தஞ்ச பன பே⁴த³கஸ்ஸ ப³லேன, பே⁴த³கே விஜ்ஜமானே நத்தி², மஹாராஜ, அபே⁴ஜ்ஜம் நாம. பே⁴த³கே ஸதி மாதாபி புத்தேன பி⁴ஜ்ஜதி, புத்தோபி மாதரா பி⁴ஜ்ஜதி, பிதாபி புத்தேன பி⁴ஜ்ஜதி, புத்தோபி பிதரா பி⁴ஜ்ஜதி, பா⁴தாபி ப⁴கி³னியா பி⁴ஜ்ஜதி, ப⁴கி³னீபி பா⁴தரா பி⁴ஜ்ஜதி, ஸஹாயோபி ஸஹாயேன பி⁴ஜ்ஜதி, நாவாபி நானாதா³ருஸங்க⁴டிதா ஊமிவேக³ஸம்பஹாரேன பி⁴ஜ்ஜதி, ருக்கோ²பி மது⁴கப்பஸம்பன்னப²லோ அனிலப³லவேகா³பி⁴ஹதோ பி⁴ஜ்ஜதி, ஸுவண்ணம்பி ஜாதிமந்தம் [ஜாதரூபம்பி (ஸீ.)] லோஹேன பி⁴ஜ்ஜதி. அபி ச, மஹாராஜ, நேஸோ அதி⁴ப்பாயோ விஞ்ஞூனம், நேஸா பு³த்³தா⁴னம் அதி⁴முத்தி, நேஸோ பண்டி³தானம் ச²ந்தோ³ ‘ததா²க³தோ பே⁴ஜ்ஜபரிஸோ’தி. அபி சேத்த² காரணம் அத்தி², யேன காரணேன ததா²க³தோ வுச்சதி ‘அபே⁴ஜ்ஜபரிஸோ’தி. கதமம் ஏத்த² காரணம்? ததா²க³தஸ்ஸ, மஹாராஜ, கதேன அதா³னேன வா அப்பியவசனேன வா அனத்த²சரியாய வா அஸமானத்ததாய வா யதோ குதோசி சரியம் சரந்தஸ்ஸபி பரிஸா பி⁴ன்னாதி ந ஸுதபுப்³ப³ம், தேன காரணேன ததா²க³தோ வுச்சதி ‘அபே⁴ஜ்ஜபரிஸோ’தி. தயாபேதம், மஹாராஜ, ஞாதப்³ப³ம் ‘அத்தி² கிஞ்சி நவங்கே³ பு³த்³த⁴வசனே ஸுத்தாக³தம், இமினா நாம காரணேன போ³தி⁴ஸத்தஸ்ஸ கதேன ததா²க³தஸ்ஸ பரிஸா பி⁴ன்னா’தி? ‘‘நத்தி² ப⁴ந்தே, நோ சேதம் லோகே தி³ஸ்ஸதி நோபி ஸுய்யதி. ஸாது⁴, ப⁴ந்தே நாக³ஸேன, ஏவமேதம் ததா² ஸம்படிச்சா²மீ’’தி.

அபே⁴ஜ்ஜபரிஸபஞ்ஹோ அட்ட²மோ.

அபே⁴ஜ்ஜவக்³கோ³ து³தியோ.

இமஸ்மிம் வக்³கே³ அட்ட² பஞ்ஹா.