6. அபுஞ்ஞபஞ்ஹோ

6. ‘‘ப⁴ந்தே நாக³ஸேன, தும்ஹே ப⁴ணத² ‘யோ அஜானந்தோ பாணாதிபாதம் கரோதி, ஸோ ப³லவதரம் அபுஞ்ஞம் பஸவதீ’தி. புன ச ப⁴க³வதா வினயபஞ்ஞத்தியா ப⁴ணிதம் ‘அனாபத்தி அஜானந்தஸ்ஸா’தி. யதி³, ப⁴ந்தே நாக³ஸேன, அஜானித்வா பாணாதிபாதம் கரோந்தோ ப³லவதரம் அபுஞ்ஞம் பஸவதி, தேன ஹி ‘அனாபத்தி அஜானந்தஸ்ஸா’தி யம் வசனம், தம் மிச்சா². யதி³ அனாபத்தி அஜானந்தஸ்ஸ, தேன ஹி ‘அஜானித்வா பாணாதிபாதம் கரோந்தோ ப³லவதரம் அபுஞ்ஞம் பஸவதீ’தி தம்பி வசனம் மிச்சா². அயம்பி உப⁴தோ கோடிகோ பஞ்ஹோ து³ருத்தரோ து³ரதிக்கமோ தவானுப்பத்தோ, ஸோ தயா நிப்³பா³ஹிதப்³போ³’’தி.

‘‘பா⁴ஸிதம்பேதம், மஹாராஜ, ப⁴க³வதா ‘யோ அஜானந்தோ பாணாதிபாதம் கரோதி, ஸோ ப³லவதரம் அபுஞ்ஞம் பஸவதீ’தி. புன ச வினயபஞ்ஞத்தியா ப⁴க³வதா ப⁴ணிதம் ‘அனாபத்தி அஜானந்தஸ்ஸா’தி. தத்த² அத்த²ந்தரம் அத்தி². கதமம் அத்த²ந்தரம்? அத்தி², மஹாராஜ, ஆபத்தி ஸஞ்ஞாவிமோக்கா², அத்தி² ஆபத்தி நோஸஞ்ஞாவிமோக்கா². யாயம், மஹாராஜ, ஆபத்தி ஸஞ்ஞாவிமோக்கா², தம் ஆபத்திம் ஆரப்³ப⁴ ப⁴க³வதா ப⁴ணிதம் ‘அனாபத்தி அஜானந்தஸ்ஸா’’தி. ‘‘ஸாது⁴, ப⁴ந்தே நாக³ஸேன, ஏவமேதம் ததா² ஸம்படிச்சா²மீ’’தி.

அபுஞ்ஞபஞ்ஹோ ச²ட்டோ².