மிலிந்த³பஞ்ஹபுச்சா²விஸஜ்ஜனா

தே²ரோ ஆஹ ‘‘ஜானாஸி கோ², மஹாராஜ, ஸம்பதி கா வேலா’’தி? ‘‘ஆம, ப⁴ந்தே, ஜானாமி ‘ஸம்பதி பட²மோ யாமோ அதிக்கந்தோ, மஜ்ஜி²மோ யாமோ பவத்ததி, உக்கா பதீ³பீயந்தி, சத்தாரி படாகானி ஆணத்தானி க³மிஸ்ஸந்தி ப⁴ண்ட³தோ ராஜதே³ய்யானீ’’’தி.

யோனகா ஏவமாஹம்ஸு ‘‘கல்லோஸி, மஹாராஜ, பண்டி³தோ தே²ரோ’’தி. ‘‘ஆம, ப⁴ணே, பண்டி³தோ தே²ரோ, ஏதி³ஸோ ஆசரியோ ப⁴வேய்ய மாதி³ஸோ ச அந்தேவாஸீ, நசிரஸ்ஸேவ பண்டி³தோ த⁴ம்மம் ஆஜானேய்யா’’தி. தஸ்ஸ பஞ்ஹவேய்யாகரணேன துட்டோ² ராஜா தே²ரம் நாக³ஸேனம் ஸதஸஹஸ்ஸக்³க⁴னகேன கம்ப³லேன அச்சா²தே³த்வா ‘‘ப⁴ந்தே நாக³ஸேன, அஜ்ஜதக்³கே³ தே அட்ட²ஸதம் ப⁴த்தம் பஞ்ஞபேமி, யம் கிஞ்சி அந்தேபுரே கப்பியம், தேன ச பவாரேமீ’’தி ஆஹ. அலம் மஹாராஜ ஜீவாமீ’’தி. ‘‘ஜானாமி, ப⁴ந்தே நாக³ஸேன, ஜீவஸி, அபி ச அத்தானஞ்ச ரக்க², மமஞ்ச ரக்கா²ஹீ’’தி. ‘‘கத²ம் அத்தானம் ரக்க²ஸி, ‘நாக³ஸேனோ மிலிந்த³ம் ராஜானம் பஸாதே³தி, ந ச கிஞ்சி அலபீ⁴’தி பராபவாதோ³ [பரப்பவாதோ³ (க.)] ஆக³ச்சே²ய்யாதி, ஏவம் அத்தானம் ரக்க². கத²ம் மமம் ரக்க²ஸி, ‘மிலிந்தோ³ ராஜா பஸன்னோ பஸன்னாகாரம் ந கரோதீ’தி பராபவாதோ³ ஆக³ச்சே²ய்யாதி, ஏவம் மமம் ரக்கா²ஹீ’’தி. ‘‘ததா² ஹோது, மஹாராஜா’’தி. ‘‘ஸேய்யதா²பி, ப⁴ந்தே, ஸீஹோ மிக³ராஜா ஸுவண்ணபஞ்ஜரே பக்கி²த்தோபி ப³ஹிமுகோ² யேவ ஹோதி, ஏவமேவ கோ² அஹம், ப⁴ந்தே, கிஞ்சாபி அகா³ரம் அஜ்ஜா²வஸாமி ப³ஹிமுகோ² யேவ பன அச்சா²மி. ஸசே அஹம், ப⁴ந்தே, அகா³ரஸ்மா அனாகா³ரியம் பப்³ப³ஜேய்யம், ந சிரம் ஜீவேய்யம், ப³ஹூ மே பச்சத்தி²கா’’தி.

அத² கோ² ஆயஸ்மா நாக³ஸேனோ மிலிந்த³ஸ்ஸ ரஞ்ஞோ பஞ்ஹம் விஸஜ்ஜேத்வா உட்டா²யாஸனா ஸங்கா⁴ராமம் அக³மாஸி. அசிரபக்கந்தே ச ஆயஸ்மந்தே நாக³ஸேனே மிலிந்த³ஸ்ஸ ரஞ்ஞோ ஏதத³ஹோஸி ‘‘கிம் மயா புச்சி²தம், கிம் ப⁴த³ந்தேன நாக³ஸேனேன விஸஜ்ஜித’’ந்தி? அத² கோ² மிலிந்த³ஸ்ஸ ரஞ்ஞோ ஏதத³ஹோஸி ‘‘ஸப்³ப³ம் மயா ஸுபுச்சி²தம், ஸப்³ப³ம் ப⁴த³ந்தேன நாக³ஸேனேன ஸுவிஸஜ்ஜித’’ந்தி. ஆயஸ்மதோபி நாக³ஸேனஸ்ஸ ஸங்கா⁴ராமக³தஸ்ஸ ஏதத³ஹோஸி ‘‘கிம் மிலிந்தே³ன ரஞ்ஞா புச்சி²தம், கிம் மயா விஸஜ்ஜித’’ந்தி. அத² கோ² ஆயஸ்மதோ நாக³ஸேனஸ்ஸ ஏதத³ஹோஸி ‘‘ஸப்³ப³ம் மிலிந்தே³ன ரஞ்ஞா ஸுபுச்சி²தம், ஸப்³ப³ம் மயா ஸுவிஸஜ்ஜித’’ந்தி.

அத² கோ² ஆயஸ்மா நாக³ஸேனோ தஸ்ஸா ரத்தியா அச்சயேன புப்³ப³ண்ஹஸமயம் நிவாஸேத்வா பத்தசீவரமாதா³ய யேன மிலிந்த³ஸ்ஸ ரஞ்ஞோ நிவேஸனம் தேனுபஸங்கமி, உபஸங்கமித்வா பஞ்ஞத்தே ஆஸனே நிஸீதி³. அத² கோ² மிலிந்தோ³ ராஜா ஆயஸ்மந்தம் நாக³ஸேனம் அபி⁴வாதே³த்வா ஏகமந்தம் நிஸீதி³, ஏகமந்தம் நிஸின்னோ கோ² மிலிந்தோ³ ராஜா ஆயஸ்மந்தம் நாக³ஸேனம் ஏதத³வோச –

‘‘மா கோ² ப⁴த³ந்தஸ்ஸ ஏவம் அஹோஸி ‘நாக³ஸேனோ மயா பஞ்ஹம் புச்சி²தோ’தி தேனேவ ஸோமனஸ்ஸேன தம் ரத்தாவஸேஸம் வீதினாமேஸீதி ந தே ஏவம் த³ட்ட²ப்³ப³ம். தஸ்ஸ மய்ஹம், ப⁴ந்தே, தம் ரத்தாவஸேஸம் ஏதத³ஹோஸி ‘கிம் மயா புச்சி²தம், கிம் ப⁴த³ந்தேன விஸஜ்ஜித’ந்தி, ‘ஸப்³ப³ம் மயா ஸுபுச்சி²தம், ஸப்³ப³ம் ப⁴த³ந்தேன ஸுவிஸஜ்ஜித’’’ந்தி.

தே²ரோபி ஏவமாஹ – ‘‘மா கோ² மஹாராஜஸ்ஸ ஏவம் அஹோஸி ‘மிலிந்த³ஸ்ஸ ரஞ்ஞோ மயா பஞ்ஹோ விஸஜ்ஜிதோ’தி தேனேவ ஸோமனஸ்ஸேன தம் ரத்தாவஸேஸம் வீதினாமேஸீதி ந தே ஏவம் த³ட்ட²ப்³ப³ம். தஸ்ஸ மய்ஹம், மஹாராஜ, தம் ரத்தாவஸேஸம் ஏதத³ஹோஸி ‘கிம் மிலிந்தே³ன ரஞ்ஞா புச்சி²தம், கிம் மயா விஸஜ்ஜித’ந்தி, ‘ஸப்³ப³ம் மிலிந்தே³ன ரஞ்ஞா ஸுபுச்சி²தம், ஸப்³ப³ம் மயா ஸுவிஸஜ்ஜித’’’ந்தி இதிஹ தே மஹானாகா³ அஞ்ஞமஞ்ஞஸ்ஸ ஸுபா⁴ஸிதம் ஸமனுமோதி³ம்ஸூதி.

மிலிந்த³பஞ்ஹபுச்சா²விஸஜ்ஜனா நிட்டி²தா.