9. ஸாஸங்கஸிக்கா²பத³வண்ணனா

652. தேன ஸமயேனாதி ஸாஸங்கஸிக்கா²பத³ம். தத்த² வுத்த²வஸ்ஸா ஆரஞ்ஞகேஸூதி தே புப்³பே³பி அரஞ்ஞேயேவ விஹரிம்ஸு. து³ப்³ப³லசீவரத்தா பன பச்சயவஸேன கா³மந்தஸேனாஸனே வஸ்ஸம் வஸித்வா நிட்டி²தசீவரா ஹுத்வா ‘‘இதா³னி நிப்பலிபோ³தா⁴ ஸமணத⁴ம்மம் கரிஸ்ஸாமா’’தி ஆரஞ்ஞகேஸு ஸேனாஸனேஸு விஹரந்தி. கத்திகசோரகாதி கத்திகமாஸே சோரா. பரிபாதேந்தீதி உபத்³த³வந்தி, தத்த² தத்த² ஆதா⁴வித்வா உத்தாஸேந்தி பலாபேந்தி. அந்தரக⁴ரே நிக்கி²பிதுந்தி அந்தோகா³மே நிக்கி²பிதும். ப⁴க³வா யஸ்மா பச்சயா நாம த⁴ம்மேன ஸமேன து³ல்லபா⁴, ஸல்லேக²வா ஹி பி⁴க்கு² மாதரம்பி விஞ்ஞாபேதும் ந ஸக்கோதி. தஸ்மா சீவரகு³த்தத்த²ம் அந்தரக⁴ரே நிக்கி²பிதும் அனுஜானாதி. பி⁴க்கூ²னம் பன அனுரூபத்தா அரஞ்ஞவாஸம் ந படிக்கி²பி.

653. உபவஸ்ஸம் கோ² பனாதி ஏத்த² உபவஸ்ஸந்தி உபவஸ்ஸ; உபவஸித்வாதி வுத்தம் ஹோதி. உபஸம்பஜ்ஜந்திஆதீ³ஸு விய ஹி ஏத்த² அனுனாஸிகோ த³ட்ட²ப்³போ³. வஸ்ஸம் உபக³ந்த்வா வஸித்வா சாதி அத்தோ². இமஸ்ஸ ச பத³ஸ்ஸ ‘‘ததா²ரூபேஸு பி⁴க்கு² ஸேனாஸனேஸு விஹரந்தோ’’தி இமினா ஸம்ப³ந்தோ⁴. கிம் வுத்தம் ஹோதி? வஸ்ஸம் உபக³ந்த்வா வஸித்வா ச ததோ பரம் பச்சி²மகத்திகபுண்ணமபரியோஸானகாலம் யானி கோ² பன தானி ஆரஞ்ஞகானி ஸேனாஸனானி ஸாஸங்கஸம்மதானி ஸப்படிப⁴யானி; ததா²ரூபேஸு பி⁴க்கு² ஸேனாஸனேஸு விஹரந்தோ ஆகங்க²மானோ திண்ணம் சீவரானம் அஞ்ஞதரம் சீவரம் அந்தரக⁴ரே நிக்கி²பேய்யாதி. யஸ்மா பன யோ வஸ்ஸம் உபக³ந்த்வா யாவ பட²மகத்திகபுண்ணமம் வஸதி, ஸோ வுட்ட²வஸ்ஸானம் அப்³ப⁴ந்தரோ ஹோதி, தஸ்மா இத³ம் அதிக³ஹனம் ப்³யஞ்ஜனவிசாரணம் அகத்வா பத³பா⁴ஜனே கேவலம் சீவரனிக்கே²பாரஹம் புக்³க³லம் த³ஸ்ஸேதும் ‘‘வுட்ட²வஸ்ஸான’’ந்தி வுத்தம். தஸ்ஸாபி ‘‘பி⁴க்கு² ஸேனாஸனேஸு விஹரந்தோ’’தி இமினா ஸம்ப³ந்தோ⁴. அயஞ்ஹி ஏத்த² அத்தோ² ‘‘வுட்ட²வஸ்ஸானம் பி⁴க்கு² ஸேனாஸனேஸு விஹரந்தோ’’தி ஏவரூபானம் பி⁴க்கூ²னம் அப்³ப⁴ந்தரே யோ கோசி பி⁴க்கூ²தி வுத்தம் ஹோதி.

அரஞ்ஞலக்க²ணம் அதி³ன்னாதா³னவண்ணனாயம் வுத்தம். அயம் பன விஸேஸோ – ஸசே விஹாரோ பரிக்கி²த்தோ ஹோதி, பரிக்கி²த்தஸ்ஸ கா³மஸ்ஸ இந்த³கீ²லதோ அபரிக்கி²த்தஸ்ஸ பரிக்கே²பாரஹட்டா²னதோ பட்டா²ய யாவ விஹாரபரிக்கே²பா மினிதப்³ப³ம். ஸசே விஹாரோ அபரிக்கி²த்தோ ஹோதி, யம் ஸப்³ப³பட²மம் ஸேனாஸனம் வா ப⁴த்தஸாலா வா து⁴வஸன்னிபாதட்டா²னம் வா போ³தி⁴வா சேதியம் வா தூ³ரே சேபி ஸேனாஸனதோ ஹோதி, தம் பரிச்சே²த³ம் கத்வா மினிதப்³ப³ம். ஸசேபி ஆஸன்னே கா³மோ ஹோதி, விஹாரே டி²தேஹி க⁴ரமானுஸகானம் ஸத்³தோ³ ஸூயதி, பப்³ப³தனதீ³ஆதீ³ஹி பன அந்தரிதத்தா ந ஸக்கா உஜும் க³ந்தும், யோ சஸ்ஸ பகதிமக்³கோ³ ஹோதி, ஸசேபி நாவாய ஸஞ்சரிதப்³போ³, தேன மக்³கே³ன கா³மதோ பஞ்சத⁴னுஸதிகம் க³ஹேதப்³ப³ம். யோ ஆஸன்னகா³மஸ்ஸ அங்க³ஸம்பாத³னத்த²ம் ததோ ததோ மக்³க³ம் பித³ஹதி, அயம் ‘‘து⁴தங்க³சோரோ’’தி வேதி³தப்³போ³.

ஸாஸங்கஸம்மதானீதி ‘‘ஸாஸங்கானீ’’தி ஸம்மதானி; ஏவம் ஸஞ்ஞாதானீதி அத்தோ². பத³பா⁴ஜனே பன யேன காரணேன தானி ஸாஸங்கஸம்மதானி, தம் த³ஸ்ஸேதும் ‘‘ஆராமே ஆராமூபசாரே’’திஆதி³ வுத்தம்.

ஸஹ படிப⁴யேன ஸப்படிப⁴யானி, ஸன்னிஹிதப³லவப⁴யானீதி அத்தோ². பத³பா⁴ஜனே பன யேன காரணேன தானி ஸப்படிப⁴யானி; தம் த³ஸ்ஸேதும் ‘‘ஆராமே ஆராமூபசாரே’’திஆதி³ வுத்தம்.

ஸமந்தா கோ³சரகா³மே நிக்கி²பேய்யாதி ஆரஞ்ஞகஸ்ஸ ஸேனாஸனஸ்ஸ ஸமந்தா ஸப்³ப³தி³ஸாபா⁴கே³ஸு அத்தனா அபி⁴ருசிதே கோ³சரகா³மே ஸதியா அங்க³ஸம்பத்தியா நிக்கி²பேய்ய.

தத்ராயம் அங்க³ஸம்பத்தி – புரிமிகாய உபக³ந்த்வா மஹாபவாரணாய பவாரிதோ ஹோதி, இத³மேகம் அங்க³ம். ஸசே பச்சி²மிகாய வா உபக³தோ ஹோதி சி²ன்னவஸ்ஸோ வா, நிக்கி²பிதும் ந லப⁴தி. கத்திகமாஸோயேவ ஹோதி, இத³ம் து³தியம் அங்க³ம். கத்திகமாஸதோ பரம் ந லப⁴தி, பஞ்சத⁴னுஸதிகம் பச்சி²மமேவ பமாணயுத்தம் ஸேனாஸனம் ஹோதி, இத³ம் ததியம் அங்க³ம். ஊனப்பமாணே வா கா³வுததோ அதிரேகப்பமாணே வா ந லப⁴தி, யத்ர ஹி பிண்டா³ய சரித்வா புன விஹாரம் ப⁴த்தவேலாயம் ஸக்கா ஆக³ந்தும், ததே³வ இத⁴ அதி⁴ப்பேதம். நிமந்திதோ பன அத்³த⁴யோஜனம்பி யோஜனம்பி க³ந்த்வா வஸிதும் பச்சேதி, இத³மப்பமாணம். ஸாஸங்கஸப்படிப⁴யமேவ ஹோதி, இத³ம் சதுத்த²ம் அங்க³ம். அனாஸங்கஅப்படிப⁴யே ஹி அங்க³யுத்தேபி ஸேனாஸனே வஸந்தோ நிக்கி²பிதும் ந லப⁴தீதி.

அஞ்ஞத்ர பி⁴க்கு²ஸம்முதியாதி யா உதோ³ஸிதஸிக்கா²பதே³ கோஸம்ப³கஸம்முதி (பாரா. 475) அனுஞ்ஞாதா தஸ்ஸா ஸம்முதியா அஞ்ஞத்ர; ஸசே ஸா லத்³தா⁴ ஹோதி, சா²ரத்தாதிரேகம்பி விப்பவஸிதும் வட்டதி.

புன கா³மஸீமம் ஓக்கமித்வாதி ஸசே கோ³சரகா³மதோ புரத்தி²மாய தி³ஸாய ஸேனாஸனம்; அயஞ்ச பச்சி²மதி³ஸம் க³தோ ஹோதி, ஸேனாஸனம் ஆக³ந்த்வா ஸத்தமம் அருணம் உட்டா²பேதும் அஸக்கோந்தேன கா³மஸீமம்பி ஓக்கமித்வா ஸபா⁴யம் வா யத்த² கத்த²சி வா வஸித்வா சீவரப்பவத்திம் ஞத்வா பக்கமிதும் வட்டதீதி அத்தோ². ஏவம் அஸக்கோந்தேன தத்தே²வ டி²தேன பச்சுத்³த⁴ரிதப்³ப³ம், அதிரேகசீவரட்டா²னே ட²ஸ்ஸதீதி. ஸேஸம் உத்தானமேவ.

கதி²னஸமுட்டா²னம் – காயவாசதோ காயவாசாசித்ததோ ச ஸமுட்டா²தி, அகிரியா, நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மவசீகம்மம், திசித்தம், திவேத³னந்தி.

ஸாஸங்கஸிக்கா²பத³வண்ணனா நிட்டி²தா.