6. அஞ்ஞாதகவிஞ்ஞத்திஸிக்கா²பத³வண்ணனா

515. தேன ஸமயேனாதி அஞ்ஞாதகவிஞ்ஞத்திஸிக்கா²பத³ம். தத்த² உபனந்தோ³ ஸக்யபுத்தோதி அஸீதிஸஹஸ்ஸமத்தானம் ஸக்யகுலா பப்³ப³ஜிதானம் பி⁴க்கூ²னம் பதிகிட்டோ² லோலஜாதிகோ. பட்டோதி சே²கோ ஸமத்தோ² படிப³லோ ஸரஸம்பன்னோ கண்ட²மாது⁴ரியேன ஸமன்னாக³தோ. கிஸ்மிம் வியாதி கிம்ஸு விய கிலேஸோ விய, ஹிரோத்தப்பவஸேன கம்பனம் விய ஸங்கம்பனம் விய ஹோதீதி அத்தோ².

அத்³தா⁴னமக்³க³ந்தி அத்³தா⁴னஸங்கா²தம் தீ³க⁴மக்³க³ம், ந நக³ரவீதி²மக்³க³ந்தி அத்தோ². தே பி⁴க்கூ² அச்சி²ந்தி³ம்ஸூதி முஸிம்ஸு, பத்தசீவரானி நேஸம் ஹரிம்ஸூதி அத்தோ². அனுயுஞ்ஜாஹீதி பி⁴க்கு²பா⁴வஜானனத்தா²ய புச்ச². அனுயுஞ்ஜியமானாதி பப்³ப³ஜ்ஜாஉபஸம்பதா³பத்தசீவராதி⁴ட்டா²னாதீ³னி புச்சி²யமானா. ஏதமத்த²ம் ஆரோசேஸுந்தி பி⁴க்கு²பா⁴வம் ஜானாபேத்வா யோ ‘‘ஸாகேதா ஸாவத்தி²ம் அத்³தா⁴னமக்³க³ப்படிபன்னா’’திஆதி³னா நயேன வுத்தோ, ஏதமத்த²ம் ஆரோசேஸும்.

517. அஞ்ஞாதகம் க³ஹபதிம் வாதிஆதீ³ஸு யம் பரதோ ‘‘திணேன வா பண்ணேன வா படிச்சா²தே³த்வா’’தி வுத்தம், தம் ஆதி³ம் கத்வா ஏவம் அனுபுப்³ப³கதா² வேதி³தப்³பா³. ஸசே சோரே பஸ்ஸித்வா த³ஹரா பத்தசீவரானி க³ஹேத்வா பலாதா, சோரா தே²ரானம் நிவாஸனபாருபனமத்தம்யேவ ஹரித்வா க³ச்ச²ந்தி, தே²ரேஹி நேவ தாவ சீவரம் விஞ்ஞாபேதப்³ப³ம், ந ஸாகா²பலாஸம் ப⁴ஞ்ஜிதப்³ப³ம். அத² த³ஹரா ஸப்³ப³ம் ப⁴ண்ட³கம் ச²ட்³டே³த்வா பலாதா, சோரா தே²ரானம் நிவாஸனபாருபனம் தஞ்ச ப⁴ண்ட³கம் க³ஹேத்வா க³ச்ச²ந்தி, த³ஹரேஹி ஆக³ந்த்வா அத்தனோ நிவாஸனபாருபனானி ந தாவ தே²ரானம் தா³தப்³பா³னி, ந ஹி அனச்சி²ன்னசீவரா அத்தனோ அத்தா²ய ஸாகா²பலாஸம் ப⁴ஞ்ஜிதும் லப⁴ந்தி, அச்சி²ன்னசீவரானம் பன அத்தா²ய லப⁴ந்தி, அச்சி²ன்னசீவராவ அத்தனோபி பரேஸம்பி அத்தா²ய லப⁴ந்தி. தஸ்மா தே²ரேஹி வா ஸாகா²பலாஸம் ப⁴ஞ்ஜித்வா வாகாதீ³ஹி க³ந்தே²த்வா த³ஹரானம் தா³தப்³ப³ம், த³ஹரேஹி வா தே²ரானம் அத்தா²ய ப⁴ஞ்ஜித்வா க³ந்தே²த்வா தேஸம் ஹத்தே² த³த்வா வா அத³த்வா வா அத்தனா நிவாஸேத்வா அத்தனோ நிவாஸனபாருபனானி தே²ரானம் தா³தப்³பா³னி, நேவ பூ⁴தகா³மபாதப்³யதாய பாசித்தியம் ஹோதி, ந தேஸம் தா⁴ரணே து³க்கடம்.

ஸசே அந்தராமக்³கே³ ரஜகத்த²ரணம் வா ஹோதி, அஞ்ஞே வா தாதி³ஸே மனுஸ்ஸே பஸ்ஸந்தி, சீவரம் விஞ்ஞாபேதப்³ப³ம். யானி ச நேஸம் தே வா விஞ்ஞத்தமனுஸ்ஸா அஞ்ஞே வா ஸாகா²பலாஸனிவாஸனே பி⁴க்கூ² தி³ஸ்வா உஸ்ஸாஹஜாதா வத்தா²னி தே³ந்தி, தானி ஸத³ஸானி வா ஹோந்து அத³ஸானி வா நீலாதி³னானாவண்ணானி வா கப்பியானிபி அகப்பியானிபி ஸப்³பா³னி அச்சி²ன்னசீவரட்டா²னே டி²தத்தா தேஸம் நிவாஸேதுஞ்ச பாருபிதுஞ்ச வட்டந்தி. வுத்தம்பிஹேதம் பரிவாரே –

‘‘அகப்பகதம் நாபி ரஜனாய ரத்தம்;

தேன நிவத்தோ² யேன காமம் வஜேய்ய;

ந சஸ்ஸ ஹோதி ஆபத்தி;

ஸோ ச த⁴ம்மோ ஸுக³தேன தே³ஸிதோ;

பஞ்ஹா மேஸா குஸலேஹி சிந்திதா’’தி. (பரி. 481);

அயஞ்ஹி பஞ்ஹோ அச்சி²ன்னசீவரகம் பி⁴க்கு²ம் ஸந்தா⁴ய வுத்தோ. அத² பன தித்தி²யேஹி ஸஹக³ச்ச²ந்தி, தே ச நேஸம் குஸசீரவாகசீரப²லகசீரானி தே³ந்தி, தானிபி லத்³தி⁴ம் அக்³க³ஹேத்வா நிவாஸேதும் வட்டந்தி, நிவாஸேத்வாபி லத்³தி⁴ ந க³ஹேதப்³பா³.

இதா³னி ‘‘யம் ஆவாஸம் பட²மம் உபக³ச்ச²தி, ஸசே தத்த² ஹோதி ஸங்க⁴ஸ்ஸ விஹாரசீவரம் வா’’திஆதீ³ஸு விஹாரசீவரம் நாம மனுஸ்ஸா ஆவாஸம் காரேத்வா ‘‘சத்தாரோபி பச்சயா அம்ஹாகம்யேவ ஸந்தகா பரிபோ⁴க³ம் க³ச்ச²ந்தூ’’தி திசீவரம் ஸஜ்ஜேத்வா அத்தனா காராபிதே ஆவாஸே ட²பேந்தி, ஏதம் விஹாரசீவரம் நாம. உத்தரத்த²ரணந்தி மஞ்சகஸ்ஸ உபரி அத்த²ரணகம் வுச்சதி. பு⁴மத்த²ரணந்தி பரிகம்மகதாய பூ⁴மியா ரக்க²ணத்த²ம் சிமிலிகாஹி கதஅத்த²ரணம் தஸ்ஸ உபரி தட்டிகம் பத்த²ரித்வா சங்கமந்தி. பி⁴ஸிச்ச²வீதி மஞ்சபி⁴ஸியா வா பீட²பி⁴ஸியா வா ச²வி, ஸசே பூரிதா ஹோதி விது⁴னித்வாபி க³ஹேதும் வட்டதி. ஏவமேதேஸு விஹாரசீவராதீ³ஸு யம் தத்த² ஆவாஸே ஹோதி, தம் அனாபுச்சா²பி க³ஹேத்வா நிவாஸேதும் வா பாருபிதும் வா அச்சி²ன்னசீவரகானம் பி⁴க்கூ²னம் லப்³ப⁴தீதி வேதி³தப்³ப³ம். தஞ்ச கோ² லபி⁴த்வா ஓத³ஹிஸ்ஸாமி புன ட²பேஸ்ஸாமீதி அதி⁴ப்பாயேன ந மூலச்சே²ஜ்ஜாய. லபி⁴த்வா ச பன ஞாதிதோ வா உபட்டா²கதோ வா அஞ்ஞதோ வா குதோசி பாகதிகமேவ காதப்³ப³ம். விதே³ஸக³தேன ஏகஸ்மிம் ஸங்கி⁴கே ஆவாஸே ஸங்கி⁴கபரிபோ⁴கே³ன பரிபு⁴ஞ்ஜனத்தா²ய ட²பேதப்³ப³ம். ஸசஸ்ஸ பரிபோ⁴கே³னேவ தம் ஜீரதி வா நஸ்ஸதி வா கீ³வா ந ஹோதி. ஸசே பன ஏதேஸம் வுத்தப்பகாரானம் கி³ஹிவத்தா²தீ³னம் பி⁴ஸிச்ச²விபரியந்தானம் கிஞ்சி ந லப்³ப⁴தி, தேன திணேன வா பண்ணேன வா படிச்சா²தே³த்வா ஆக³ந்தப்³ப³ந்தி.

519. யேஹி கேஹிசி வா அச்சி²ன்னந்தி ஏத்த² யம்பி அச்சி²ன்னசீவரா ஆசரியுபஜ்ஜா²யா அஞ்ஞே ‘‘ஆஹரத², ஆவுஸோ, சீவர’’ந்தி யாசித்வா வா விஸ்ஸாஸேன வா க³ண்ஹந்தி, தம்பி ஸங்க³ஹம் க³ச்ச²தீதி வத்தும் யுஜ்ஜதி.

பரிபோ⁴க³ஜிண்ணம் வாதி ஏத்த² ச அச்சி²ன்னசீவரானம் ஆசரியுபஜ்ஜா²யாதீ³னம் அத்தனா திணபண்ணேஹி படிச்சா²தே³த்வா தி³ன்னசீவரம்பி ஸங்க³ஹம் க³ச்ச²தீதி வத்தும் யுஜ்ஜதி. ஏவஞ்ஹி தே அச்சி²ன்னசீவரட்டா²னே நட்ட²சீவரட்டா²னே ச டி²தா ப⁴விஸ்ஸந்தி, தேன நேஸம் விஞ்ஞத்தியம் அகப்பியசீவரபரிபோ⁴கே³ ச அனாபத்தி அனுரூபா ப⁴விஸ்ஸதி.

521. ஞாதகானம் பவாரிதானந்தி ஏத்த² ‘‘ஏதேஸம் ஸந்தகம் தே³தா²’’தி விஞ்ஞாபேந்தஸ்ஸ யாசந்தஸ்ஸ அனாபத்தீதி ஏவமத்தோ² த³ட்ட²ப்³போ³. ந ஹி ஞாதகபவாரிதானம் ஆபத்தி வா அனாபத்தி வா ஹோதி. அத்தனோ த⁴னேனாதி ஏத்தா²பி அத்தனோ கப்பியப⁴ண்டே³ன கப்பியவோஹாரேனேவ சீவரம் விஞ்ஞாபேந்தஸ்ஸ சேதாபேந்தஸ்ஸ பரிவத்தாபேந்தஸ்ஸ அனாபத்தீதி ஏவமத்தோ² த³ட்ட²ப்³போ³. பவாரிதானந்தி ஏத்த² ச ஸங்க⁴வஸேன பவாரிதேஸு பமாணமேவ வட்டதி. புக்³க³லிகபவாரணாய யம் யம் பவாரேதி, தம் தம்யேவ விஞ்ஞாபேதப்³ப³ம். யோ சதூஹி பச்சயேஹி பவாரேத்வா ஸயமேவ ஸல்லக்கே²த்வா காலானுகாலம் சீவரானி தி³வஸே தி³வஸே யாகு³ப⁴த்தாதீ³னீதி ஏவம் யேன யேனத்தோ² தம் தம் தே³தி, தஸ்ஸ விஞ்ஞாபனகிச்சம் நத்தி². யோ பன பவாரேத்வா பா³லதாய வா ஸதிஸம்மோஸேன வா ந தே³தி, ஸோ விஞ்ஞாபேதப்³போ³. யோ ‘‘மய்ஹம் கே³ஹம் பவாரேமீ’’தி வத³தி, தஸ்ஸ கே³ஹம் க³ந்த்வா யதா²ஸுக²ம் நிஸீதி³தப்³ப³ம் நிபஜ்ஜிதப்³ப³ம், ந கிஞ்சி க³ஹேதப்³ப³ம். யோ பன ‘‘யம் மய்ஹம் கே³ஹே அத்தி², தம் பவாரேமீ’’தி வத³தி. யம் தத்த² கப்பியம், தம் விஞ்ஞாபேதப்³ப³ம், கே³ஹே பன நிஸீதி³தும் வா நிபஜ்ஜிதும் வா ந லப்³ப⁴தீதி குருந்தி³யம் வுத்தம்.

அஞ்ஞஸ்ஸத்தா²யாதி ஏத்த² அத்தனோ ஞாதகபவாரிதே ந கேவலம் அத்தனோ அத்தா²ய, அத² கோ² அஞ்ஞஸ்ஸத்தா²ய விஞ்ஞாபேந்தஸ்ஸ அனாபத்தீதி அயமேகோ அத்தோ². அயம் பன து³தியோ அஞ்ஞஸ்ஸாதி யே அஞ்ஞஸ்ஸ ஞாதகபவாரிதா, தே தஸ்ஸேவ ‘‘அஞ்ஞஸ்ஸா’’தி லத்³த⁴வோஹாரஸ்ஸ பு³த்³த⁴ரக்கி²தஸ்ஸ வா த⁴ம்மரக்கி²தஸ்ஸ வா அத்தா²ய விஞ்ஞாபேந்தஸ்ஸ அனாபத்தீதி. ஸேஸம் உத்தானத்த²மேவ.

ஸமுட்டா²னாதீ³ஸு இத³ம்பி ச²ஸமுட்டா²னம், கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மவசீகம்மம், திசித்தம், திவேத³னந்தி.

அஞ்ஞாதகவிஞ்ஞத்திஸிக்கா²பத³வண்ணனா நிட்டி²தா.