7. ததுத்தரிஸிக்கா²பத³வண்ணனா

522-4. தேன ஸமயேனாதி ததுத்தரிஸிக்கா²பத³ம். தத்த² அபி⁴ஹட்டு²ந்தி அபீ⁴தி உபஸக்³கோ³, ஹரிதுந்தி அத்தோ², க³ண்ஹிதுந்தி வுத்தம் ஹோதி. பவாரேய்யாதி இச்சா²பேய்ய, இச்ச²ம் ருசிம் உப்பாதே³ய்ய, வதே³ய்ய நிமந்தேய்யாதி அத்தோ². அபி⁴ஹட்டு²ம் பவாரேந்தேன பன யதா² வத்தப்³ப³ம், தம் ஆகாரம் த³ஸ்ஸேதும் ‘‘யாவதகம் இச்ச²ஸி தாவதகம் க³ண்ஹாஹீ’’தி ஏவமஸ்ஸ பத³பா⁴ஜனம் வுத்தம். அத² வா யதா² ‘‘நேக்க²ம்மம் த³ட்டு² கே²மதோ’’தி (ஸு. நி. 426, 1104; சூளனி. ஜதுகண்ணிமாணவபுச்சா²னித்³தே³ஸ 67) ஏத்த² தி³ஸ்வாதி அத்தோ², ஏவமிதா⁴பி ‘‘அபி⁴அட்டு²ம் பவாரேய்யா’’தி அபி⁴ஹரித்வா பவாரேய்யாதி அத்தோ². தத்த² காயாபி⁴ஹாரோ வாசாபி⁴ஹாரோதி து³விதோ⁴ அபி⁴ஹாரோ, காயேன வா ஹி வத்தா²னி அபி⁴ஹரித்வா பாத³மூலே ட²பேத்வா ‘‘யத்தகம் இச்ச²ஸி தத்தகம் க³ண்ஹாஹீ’’தி வத³ந்தோ பவாரேய்ய, வாசாய வா ‘‘அம்ஹாகம் து³ஸ்ஸகோட்டா²கா³ரம் பரிபுண்ணம், யத்தகம் இச்ச²ஸி தத்தகம் க³ண்ஹாஹீ’’தி வத³ந்தோ பவாரேய்ய, தது³ப⁴யம்பி ஏகஜ்ஜ²ம் கத்வா ‘‘அபி⁴ஹட்டு²ம் பவாரேய்யா’’தி வுத்தம்.

ஸந்தருத்தரபரமந்தி ஸஅந்தரம் உத்தரம் பரமம் அஸ்ஸ சீவரஸ்ஸாதி ஸந்தருத்தரபரமம், நிவாஸனேன ஸத்³தி⁴ம் பாருபனம் உக்கட்ட²பரிச்சே²தோ³ அஸ்ஸாதி வுத்தம் ஹோதி. ததோ சீவரம் ஸாதி³தப்³ப³ந்தி ததோ அபி⁴ஹடசீவரதோ ஏத்தகம் சீவரம் க³ஹேதப்³ப³ம், ந இதோ பரந்தி அத்தோ². யஸ்மா பன அச்சி²ன்னஸப்³ப³சீவரேன திசீவரிகேனேவ பி⁴க்கு²னா ஏவம் படிபஜ்ஜிதப்³ப³ம், அஞ்ஞேன அஞ்ஞதா²பி, தஸ்மா தம் விபா⁴க³ம் த³ஸ்ஸேதும் ‘‘ஸசே தீணி நட்டா²னி ஹோந்தீ’’திஆதி³னா நயேனஸ்ஸ பத³பா⁴ஜனம் வுத்தம்.

தத்ராயம் வினிச்ச²யோ – யஸ்ஸ தீணி நட்டா²னி, தேன த்³வே ஸாதி³தப்³பா³னி, ஏகம் நிவாஸேத்வா ஏகம் பாருபித்வா அஞ்ஞம் ஸபா⁴க³ட்டா²னதோ பரியேஸிஸ்ஸதி. யஸ்ஸ த்³வே நட்டா²னி, தேன ஏகம் ஸாதி³தப்³ப³ம். ஸசே பகதியாவ ஸந்தருத்தரேன சரதி, த்³வே ஸாதி³தப்³பா³னி. ஏவம் ஏகம் ஸாதி³யந்தேனேவ ஸமோ ப⁴விஸ்ஸதி. யஸ்ஸ தீஸு ஏகம் நட்ட²ம், ந ஸாதி³தப்³ப³ம். யஸ்ஸ பன த்³வீஸு ஏகம் நட்ட²ம், ஏகம் ஸாதி³தப்³ப³ம். யஸ்ஸ ஏகம்யேவ ஹோதி, தஞ்ச நட்ட²ம், த்³வே ஸாதி³தப்³பா³னி. பி⁴க்கு²னியா பன பஞ்சஸுபி நட்டே²ஸு த்³வே ஸாதி³தப்³பா³னி. சதூஸு நட்டே²ஸு ஏகம் ஸாதி³தப்³ப³ம், தீஸு நட்டே²ஸு கிஞ்சி ந ஸாதி³தப்³ப³ம், கோ பன வாதோ³ த்³வீஸு வா ஏகஸ்மிம் வா. யேன கேனசி ஹி ஸந்தருத்தரபரமதாய டா²தப்³ப³ம், ததோ உத்தரி ந லப்³ப⁴தீதி இத³மேத்த² லக்க²ணம்.

526. ஸேஸகம் ஆஹரிஸ்ஸாமீதி த்³வே சீவரானி கத்வா ஸேஸம் புன ஆஹரிஸ்ஸாமீதி அத்தோ². ந அச்சி²ன்னகாரணாதி பா³ஹுஸச்சாதி³கு³ணவஸேன தே³ந்தி. ஞாதகானந்திஆதீ³ஸு ஞாதகானம் தே³ந்தானம் ஸாதி³யந்தஸ்ஸ பவாரிதானம் தே³ந்தானம் ஸாதி³யந்தஸ்ஸ அத்தனோ த⁴னேன ஸாதி³யந்தஸ்ஸ அனாபத்தீதி அத்தோ². அட்ட²கதா²ஸு பன ‘‘ஞாதகபவாரிதட்டா²னே பகதியா ப³ஹும்பி வட்டதி, அச்சி²ன்னகாரணா பமாணமேவ வட்டதீ’’தி வுத்தம். தம் பாளியா ந ஸமேதி. யஸ்மா பனித³ம் ஸிக்கா²பத³ம் அஞ்ஞஸ்ஸத்தா²ய விஞ்ஞாபனவத்து²ஸ்மிம்யேவ பஞ்ஞத்தம், தஸ்மா இத⁴ ‘‘அஞ்ஞஸ்ஸத்தா²யா’’தி ந வுத்தம். ஸேஸம் உத்தானத்த²மேவ.

ஸமுட்டா²னாதீ³ஸு இத³ம்பி ச²ஸமுட்டா²னம், கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மவசீகம்மம், திசித்தம், திவேத³னந்தி.

ததுத்தரிஸிக்கா²பத³வண்ணனா நிட்டி²தா.