5. சீவரபடிக்³க³ஹணஸிக்கா²பத³வண்ணனா

508. தேன ஸமயேனாதி சீவரபடிக்³க³ஹணஸிக்கா²பத³ம். தத்த² பிண்ட³பாதபடிக்கந்தாதி பிண்ட³பாததோ படிக்கந்தா. யேன அந்த⁴வனம் தேனுபஸங்கமீதி அபஞ்ஞத்தே ஸிக்கா²பதே³ யேன அந்த⁴வனம் தேனுபஸங்கமி. கதகம்மாதி கதசோரிககம்மா, ஸந்தி⁴ச்சே²த³னாதீ³ஹி பரப⁴ண்ட³ம் ஹரிதாதி வுத்தம் ஹோதி. சோரகா³மணிகோதி சோரஜேட்ட²கோ. ஸோ கிர புப்³பே³ தே²ரிம் ஜானாதி, தஸ்மா சோரானம் புரதோ க³ச்ச²ந்தோ தி³ஸ்வா ‘‘இதோ மா க³ச்ச²த², ஸப்³பே³ இதோ ஏதா²’’தி தே க³ஹேத்வா அஞ்ஞேன மக்³கே³ன அக³மாஸி. ஸமாதி⁴ம்ஹா வுட்ட²ஹித்வாதி தே²ரீ கிர பரிச்சி²ன்னவேலாயம்யேவ ஸமாதி⁴ம்ஹா வுட்ட²ஹி. ஸோபி தஸ்மிம்யேவ க²ணே ஏவம் அவச, தஸ்மா ஸா அஸ்ஸோஸி, ஸுத்வா ச ‘‘நத்தி² தா³னி அஞ்ஞோ ஏத்த² ஸமணோ வா ப்³ராஹ்மணோ வா அஞ்ஞத்ர மயா’’தி தம் மம்ஸம் அக்³க³ஹேஸி. தேன வுத்தம் – ‘‘அத² கோ² உப்பலவண்ணா பி⁴க்கு²னீ’’திஆதி³.

ஓஹிய்யகோதி அவஹீயகோ அவஸேஸோ, விஹாரவாரம் பத்வா ஏகோவ விஹாரே டி²தோதி அத்தோ². ஸசே மே த்வம் அந்தரவாஸகம் த³தே³ய்யாஸீதி கஸ்மா ஆஹ? ஸண்ஹம் க⁴னமட்ட²ம் அந்தரவாஸகம் தி³ஸ்வா லோபே⁴ன, அபிச அப்பகோ தஸ்ஸா அந்தரவாஸகே லோபோ⁴, தே²ரியா பன ஸிகா²ப்பத்தா கோட்டா²ஸஸம்பத்தி தேனஸ்ஸா ஸரீரபாரிபூரிம் பஸ்ஸிஸ்ஸாமீதி விஸமலோப⁴ம் உப்பாதே³த்வா ஏவமாஹ. அந்திமந்தி பஞ்சன்னம் சீவரானம் ஸப்³ப³பரியந்தம் ஹுத்வா அந்திமம், அந்திமந்தி பச்சி²மம். அஞ்ஞம் லேஸேனாபி விகப்பேத்வா வா பச்சுத்³த⁴ரித்வா வா ட²பிதம் சீவரம் நத்தீ²தி ஏவம் யதா²அனுஞ்ஞாதானம் பஞ்சன்னம் சீவரானம் தா⁴ரணவஸேனேவ ஆஹ, ந லோபே⁴ன, ந ஹி கீ²ணாஸவானம் லோபோ⁴ அத்தி². நிப்பீளியமானாதி உபமம் த³ஸ்ஸேத்வா கா³ள்ஹம் பீளயமானா.

அந்தரவாஸகம் த³த்வா உபஸ்ஸயம் அக³மாஸீதி ஸங்கச்சிகம் நிவாஸேத்வா யதா² தஸ்ஸ மனோரதோ² ந பூரதி, ஏவம் ஹத்த²தலேயேவ த³ஸ்ஸேத்வா அக³மாஸி.

510. கஸ்மா பாரிவத்தகசீவரம் அப்படிக³ண்ஹந்தே உஜ்ஜா²யிம்ஸு? ‘‘ஸசே ஏத்தகோபி அம்ஹேஸு அய்யானம் விஸ்ஸாஸோ நத்தி², கத²ம் மயம் யாபேஸ்ஸாமா’’தி விஹத்த²தாய ஸமபி⁴துன்னத்தா.

அனுஜானாமி பி⁴க்க²வே இமேஸம் பஞ்சன்னந்தி இமேஸம் பஞ்சன்னம் ஸஹத⁴ம்மிகானம் ஸமஸத்³தா⁴னம் ஸமஸீலானம் ஸமதி³ட்டீ²னம் பாரிவத்தகம் க³ஹேதும் அனுஜானாமீதி அத்தோ².

512. பயோகே³ து³க்கடந்தி க³ஹணத்தா²ய ஹத்த²ப்பஸாரணாதீ³ஸு து³க்கடம். படிலாபே⁴னாதி படிக்³க³ஹணேன. தத்த² ச ஹத்தே²ன வா ஹத்தே² தே³து, பாத³மூலே வா ட²பேது, உபரி வா கி²பது, ஸோ சே ஸாதி³யதி, க³ஹிதமேவ ஹோதி. ஸசே பன ஸிக்க²மானாஸாமணேரஸாமணேரீஉபாஸகஉபாஸிகாதீ³னம் ஹத்தே² பேஸிதம் படிக்³க³ண்ஹாதி, அனாபத்தி. த⁴ம்மகத²ம் கதே²ந்தஸ்ஸ சதஸ்ஸோபி பரிஸா சீவரானி ச நானாவிராக³வத்தா²னி ச ஆனேத்வா பாத³மூலே ட²பேந்தி, உபசாரே வா ட²த்வா உபசாரம் வா முஞ்சித்வா கி²பந்தி, யம் தத்த² பி⁴க்கு²னீனம் ஸந்தகம், தம் அஞ்ஞத்ர பாரிவத்தகா க³ண்ஹந்தஸ்ஸ ஆபத்தியேவ. அத² பன ரத்திபா⁴கே³ கி²த்தானி ஹோந்தி, ‘‘இத³ம் பி⁴க்கு²னியா, இத³ம் அஞ்ஞேஸ’’ந்தி ஞாதும் ந ஸக்கா, பாரிவத்தககிச்சம் நத்தீ²தி மஹாபச்சரியம் குருந்தி³யஞ்ச வுத்தம், தம் அசித்தகபா⁴வேன ந ஸமேதி. ஸசே பி⁴க்கு²னீ வஸ்ஸாவாஸிகம் தே³தி, பாரிவத்தகமேவ காதப்³ப³ம். ஸசே பன ஸங்காரகூடாதீ³ஸு ட²பேதி, ‘‘பம்ஸுகூலம் க³ண்ஹிஸ்ஸந்தீ’’தி பம்ஸுகூலம் அதி⁴ட்ட²ஹித்வா க³ஹேதும் வட்டதி.

513. அஞ்ஞாதிகாய அஞ்ஞாதிகஸஞ்ஞீதி திகபாசித்தியம். ஏகதோ உபஸம்பன்னாயாதி பி⁴க்கு²னீனம் ஸந்திகே உபஸம்பன்னாய ஹத்த²தோ க³ண்ஹந்தஸ்ஸ து³க்கடம், பி⁴க்கூ²னம் ஸந்திகே உபஸம்பன்னாய பன பாசித்தியமேவ.

514. பரித்தேன வா விபுலந்தி அப்பக்³க⁴சீவரேன வா உபாஹனத்த²விகபத்தத்த²விகஅம்ஸப³த்³த⁴ககாயப³ந்த⁴னாதி³னா வா மஹக்³க⁴ம் சேதாபேத்வா ஸசேபி சீவரம் படிக்³க³ண்ஹாதி, அனாபத்தி. மஹாபச்சரியம் பன ‘‘அந்தமஸோ ஹரீதகீக²ண்டே³னாபீ’’தி வுத்தம். விபுலேன வா பரித்தந்தி இத³ம் வுத்தவிபல்லாஸேன வேதி³தப்³ப³ம். அஞ்ஞம் பரிக்கா²ரந்தி பத்தத்த²விகாதி³ம் யம் கிஞ்சி விகப்பனுபக³பச்சி²மசீவரப்பமாணம் பன படபரிஸ்ஸாவனம்பி ந வட்டதி. யம் நேவ அதி⁴ட்டா²னுபக³ம் ந விகப்பனுபக³ம் தம் ஸப்³ப³ம் வட்டதி. ஸசேபி மஞ்சப்பமாணா பி⁴ஸிச்ச²வி ஹோதி, வட்டதியேவ; கோ பன வாதோ³ பத்தத்த²விகாதீ³ஸு. ஸேஸம் உத்தானத்த²மேவ.

ஸமுட்டா²னாதீ³ஸு இத³ம் ச²ஸமுட்டா²னம், கிரியாகிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம்வசீகம்மம், திசித்தம், திவேத³னந்தி.

சீவரபடிக்³க³ஹணஸிக்கா²பத³வண்ணனா நிட்டி²தா.