10. ராஜஸிக்கா²பத³வண்ணனா

537. தேன ஸமயேனாதி ராஜஸிக்கா²பத³ம். தத்த² உபாஸகம் ஸஞ்ஞாபேத்வாதி ஜானாபேத்வா, ‘‘இமினா மூலேன சீவரம் கிணித்வா தே²ரஸ்ஸ தே³ஹீ’’தி ஏவம் வத்வாதி அதி⁴ப்பாயோ. பஞ்ஞாஸப³ந்தோ⁴தி பஞ்ஞாஸகஹாபணத³ண்டோ³தி வுத்தம் ஹோதி. பஞ்ஞாஸம் ப³த்³தோ⁴திபி பாடோ², பஞ்ஞாஸம் ஜிதோ பஞ்ஞாஸம் தா³பேதப்³போ³தி அதி⁴ப்பாயோ. அஜ்ஜண்ஹோ, ப⁴ந்தே, ஆக³மேஹீதி ப⁴ந்தே, அஜ்ஜ ஏகதி³வஸம் அம்ஹாகம் திட்ட², அதி⁴வாஸேஹீதி அத்தோ². பராமஸீதி க³ண்ஹி. ஜீனோஸீதி ஜிதோஸி.

538-9. ராஜபோ⁴க்³கோ³தி ராஜதோ போ⁴க்³க³ம் பு⁴ஞ்ஜிதப்³ப³ம் அஸ்ஸத்தீ²தி ராஜபோ⁴க்³கோ³, ராஜபோ⁴கோ³திபி பாடோ², ராஜதோ போ⁴கோ³ அஸ்ஸ அத்தீ²தி அத்தோ².

பஹிணேய்யாதி பேஸேய்ய, உத்தானத்த²த்தா பனஸ்ஸ பத³பா⁴ஜனம் ந வுத்தம். யதா² ச ஏதஸ்ஸ, ஏவம் ‘‘சீவரம் இத்த²ன்னாமம் பி⁴க்கு²’’ந்திஆதீ³னம்பி பதா³னம் உத்தானத்த²த்தாயேவ பத³பா⁴ஜனம் ந வுத்தந்தி வேதி³தப்³ப³ம். ஆப⁴தந்தி ஆனீதம். காலேனகப்பியந்தி யுத்தபத்தகாலேன, யதா³ நோ அத்தோ² ஹோதி, ததா³ கப்பியம் சீவரம் க³ண்ஹாமாதி அத்தோ².

வேய்யாவச்சகரோதி கிச்சகரோ, கப்பியகாரகோதி அத்தோ². ஸஞ்ஞத்தோ ஸோ மயாதி ஆணத்தோ ஸோ மயா, யதா² தும்ஹாகம் சீவரேன அத்தே² ஸதி சீவரம் த³ஸ்ஸதி, ஏவம் வுத்தோதி அத்தோ². அத்தோ² மே ஆவுஸோ சீவரேனாதி சோத³னாலக்க²ணனித³ஸ்ஸனமேதம், இத³ஞ்ஹி வசனம் வத்தப்³ப³ம், அஸ்ஸ வா அத்தோ² யாய காயசி பா⁴ஸாய; இத³ம் சோத³னாலக்க²ணம். ‘‘தே³ஹி மே சீவர’’ந்திஆதீ³னி பன நவத்தப்³பா³காரத³ஸ்ஸனத்த²ம் வுத்தானி, ஏதானி ஹி வசனானி ஏதேஸம் வா அத்தோ² யாய காயசி பா⁴ஸாய ந வத்தப்³போ³.

து³தியம்பி வத்தப்³போ³ ததியம்பி வத்தப்³போ³தி ‘‘அத்தோ² மே ஆவுஸோ சீவரேனா’’தி இத³மேவ யாவததியம் வத்தப்³போ³தி. ஏவம் ‘‘த்³வத்திக்க²த்தும் சோதே³தப்³போ³ ஸாரேதப்³போ³’’தி ஏத்த² உத்³தி³ட்ட²சோத³னாபரிச்சே²த³ம் த³ஸ்ஸேத்வா இதா³னி ‘‘த்³வத்திக்க²த்தும் சோத³யமானோ ஸாரயமானோ தம் சீவரம் அபி⁴னிப்பா²தே³ய்ய, இச்சேதம் குஸல’’ந்தி இமேஸம் பதா³னம் ஸங்கே²பதோ அத்த²ம் த³ஸ்ஸேந்தோ ‘‘ஸசே அபி⁴னிப்பா²தே³தி, இச்சேதம் குஸல’’ந்தி ஆஹ. ஏவம் யாவததியம் சோதே³ந்தோ தம் சீவரம் யதி³ நிப்பா²தே³தி, ஸக்கோதி அத்தனோ படிலாப⁴வஸேன நிப்பா²தே³தும், இச்சேதம் குஸலம் ஸாது⁴ ஸுட்டு² ஸுந்த³ரம்.

சதுக்க²த்தும் பஞ்சக்க²த்தும் ச²க்க²த்துபரமம் துண்ஹீபூ⁴தேன உத்³தி³ஸ்ஸ டா²தப்³ப³ந்தி டா²னலக்க²ணனித³ஸ்ஸனமேதம். ச²க்க²த்துபரமந்தி ச பா⁴வனபும்ஸகவசனமேதம், ச²க்க²த்துபரமஞ்ஹி ஏதேன சீவரம் உத்³தி³ஸ்ஸ துண்ஹீபூ⁴தேன டா²தப்³ப³ம், ந அஞ்ஞம் கிஞ்சி காதப்³ப³ம், இத³ம் டா²னலக்க²ணம். தத்த² யோ ஸப்³ப³ட்டா²னானம் ஸாதா⁴ரணோ துண்ஹீபா⁴வோ, தம் தாவ த³ஸ்ஸேதும் பத³பா⁴ஜனே ‘‘தத்த² க³ந்த்வா துண்ஹீபூ⁴தேனா’’திஆதி³ வுத்தம். தத்த² ந ஆஸனே நிஸீதி³தப்³ப³ந்தி ‘‘இத⁴, ப⁴ந்தே, நிஸீத³தா²’’தி வுத்தேனாபி ந நிஸீதி³தப்³ப³ம். ந ஆமிஸம் படிக்³க³ஹேதப்³ப³ந்தி யாகு³க²ஜ்ஜகாதி³பே⁴த³ம் கிஞ்சி ஆமிஸம் ‘‘க³ண்ஹத², ப⁴ந்தே’’தி யாசியமானேனாபி ந க³ண்ஹிதப்³ப³ம். ந த⁴ம்மோ பா⁴ஸிதப்³போ³தி மங்க³லம் வா அனுமோத³னம் வா பா⁴ஸதா²தி யாசியமானேனாபி கிஞ்சி ந பா⁴ஸிதப்³ப³ம், கேவலம் ‘‘கிம் காரணா ஆக³தோஸீ’’தி புச்சி²யமானேன ‘‘ஜானாஸி, ஆவுஸோ’’தி வத்தப்³போ³. புச்சி²யமானோதி இத³ஞ்ஹி கரணத்தே² பச்சத்தவசனம். அத² வா புச்ச²ம் குருமானோ புச்சி²யமானோதி ஏவம்பேத்த² அத்தோ² த³ட்ட²ப்³போ³. யோ ஹி புச்ச²ம் கரோதி, ஸோ ஏத்தகம் வத்தப்³போ³தி டா²னம் ப⁴ஞ்ஜதீதி ஆக³தகாரணம் ப⁴ஞ்ஜதி.

இதா³னி யா திஸ்ஸோ சோத³னா, ச² ச டா²னானி வுத்தானி. தத்த² வுட்³டி⁴ஞ்ச ஹானிஞ்ச த³ஸ்ஸேந்தோ ‘‘சதுக்க²த்தும் சோதே³த்வா’’திஆதி³மாஹ. யஸ்மா ச ஏத்த² ஏகசோத³னாவுட்³டி⁴யா த்³வின்னம் டா²னானம் ஹானி வுத்தா, தஸ்மா ‘‘ஏகா சோத³னா தி³கு³ணம் டா²ன’’ந்தி லக்க²ணம் த³ஸ்ஸிதம் ஹோதி. இதி இமினா லக்க²ணேன திக்க²த்தும் சோதே³த்வா ச²க்க²த்தும் டா²தப்³ப³ம், த்³விக்க²த்தும் சோதே³த்வா அட்ட²க்க²த்தும் டா²தப்³ப³ம், ஸகிம் சோதே³த்வா த³ஸக்க²த்தும் டா²தப்³ப³ந்தி. யதா² ச ‘‘ச²க்க²த்தும் சோதே³த்வா ந டா²தப்³ப³’’ந்தி வுத்தம், ஏவம் ‘‘த்³வாத³ஸக்க²த்தும் ட²த்வா ந சோதே³தப்³ப³’’ந்திபி வுத்தமேவ ஹோதி. தஸ்மா ஸசே சோதே³தியேவ ந திட்ட²தி, ச² சோத³னா லப்³ப⁴ந்தி. ஸசே திட்ட²தியேவ ந சோதே³தி, த்³வாத³ஸ டா²னானி லப்³ப⁴ந்தி. ஸசே சோதே³திபி திட்ட²திபி, ஏகாய சோத³னாய த்³வே டா²னானி ஹாபேதப்³பா³னி. தத்த² யோ ஏகதி³வஸமேவ புனப்புனம் க³ந்த்வா ச²க்க²த்தும் சோதே³தி, ஸகிம்யேவ வா க³ந்த்வா ‘‘அத்தோ² மே, ஆவுஸோ, சீவரேனா’’தி ச²க்க²த்தும் வத³தி. ததா² ஏகதி³வஸமேவ புனப்புனம் க³ந்த்வா த்³வாத³ஸக்க²த்தும் திட்ட²தி, ஸகிம்யேவ வா க³ந்த்வா தத்ர தத்ர டா²னே திட்ட²தி, ஸோபி ஸப்³ப³சோத³னாயோ ஸப்³ப³ட்டா²னானி ச ப⁴ஞ்ஜதி. கோ பன வாதோ³ நானாதி³வஸேஸு ஏவம் கரோந்தஸ்ஸாதி ஏவமேத்த² வினிச்ச²யோ வேதி³தப்³போ³.

யதஸ்ஸ சீவரசேதாபன்னம் ஆப⁴தந்தி யதோ ராஜதோ வா ராஜபோ⁴க்³க³தோ வா அஸ்ஸ பி⁴க்கு²னோ சீவரசேதாபன்னம் ஆனீதம். யத்வஸ்ஸாதிபி பாடோ². அயமேவத்தோ². ‘‘யத்த²ஸ்ஸா’’திபி பட²ந்தி, யஸ்மிம் டா²னே அஸ்ஸ சீவரசேதாபன்னம் பேஸிதந்தி ச அத்த²ம் கதே²ந்தி, ப்³யஞ்ஜனம் பன ந ஸமேதி. தத்தா²தி தஸ்ஸ ரஞ்ஞோ வா ராஜபோ⁴க்³க³ஸ்ஸ வா ஸந்திகே; ஸமீபத்தே² ஹி இத³ம் பு⁴ம்மவசனம். ந தம் தஸ்ஸ பி⁴க்கு²னோ கிஞ்சி அத்த²ம் அனுபோ⁴தீதி தம் சீவரசேதாபன்னம் தஸ்ஸ பி⁴க்கு²னோ கிஞ்சி அப்பமத்தகம்பி கம்மம் ந நிப்பா²தே³தி. யுஞ்ஜந்தாயஸ்மந்தோ ஸகந்தி ஆயஸ்மந்தோ அத்தனோ ஸந்தகம் த⁴னம் பாபுணந்து. மா வோ ஸகம் வினஸ்ஸாதி தும்ஹாகம் ஸந்தகம் மா வினஸ்ஸது. யோ பன நேவ ஸாமம் க³ச்ச²தி, ந தூ³தம் பாஹேதி, வத்தபே⁴தே³ து³க்கடம் ஆபஜ்ஜதி.

கிம் பன ஸப்³ப³கப்பியகாரகேஸு ஏவம் படிபஜ்ஜிதப்³ப³ந்தி? ந படிபஜ்ஜிதப்³ப³ம். அயஞ்ஹி கப்பியகாரகோ நாம ஸங்கே²பதோ து³விதோ⁴ நித்³தி³ட்டோ² ச அனித்³தி³ட்டோ² ச. தத்த² நித்³தி³ட்டோ² து³விதோ⁴ – பி⁴க்கு²னா நித்³தி³ட்டோ², தூ³தேன நித்³தி³ட்டோ²தி. அனித்³தி³ட்டோ²பி து³விதோ⁴ – முக²வேவடிக கப்பியகாரகோ, பரம்முக²கப்பியகாரகோதி. தேஸு பி⁴க்கு²னா நித்³தி³ட்டோ² ஸம்முகா²ஸம்முக²வஸேன சதுப்³பி³தோ⁴ ஹோதி. ததா² தூ³தேன நித்³தி³ட்டோ²பி.

கத²ம்? இதே⁴கச்சோ பி⁴க்கு²ஸ்ஸ சீவரத்தா²ய தூ³தேன அகப்பியவத்து²ம் பஹிணதி, தூ³தோ தம் பி⁴க்கு²ம் உபஸங்கமித்வா ‘‘இத³ம், ப⁴ந்தே, இத்த²ன்னாமேன தும்ஹாகம் சீவரத்தா²ய பஹிதம், க³ண்ஹத² ந’’ந்தி வத³தி, பி⁴க்கு² ‘‘நயித³ம் கப்பதீ’’தி படிக்கி²பதி, தூ³தோ ‘‘அத்தி² பன தே, ப⁴ந்தே, வேய்யாவச்சகரோ’’தி புச்ச²தி, புஞ்ஞத்தி²கேஹி ச உபாஸகேஹி ‘‘பி⁴க்கூ²னம் வேய்யாவச்சம் கரோதா²’’தி ஆணத்தா வா, பி⁴க்கூ²னம் வா ஸந்தி³ட்டா² ஸம்ப⁴த்தா கேசி வேய்யாவச்சகரா ஹோந்தி, தேஸம் அஞ்ஞதரோ தஸ்மிம் க²ணே பி⁴க்கு²ஸ்ஸ ஸந்திகே நிஸின்னோ ஹோதி, பி⁴க்கு² தம் நித்³தி³ஸதி ‘‘அயம் பி⁴க்கூ²னம் வேய்யாவச்சகரோ’’தி. தூ³தோ தஸ்ஸ ஹத்தே² அகப்பியவத்து²ம் த³த்வா ‘‘தே²ரஸ்ஸ சீவரம் கிணித்வா தே³ஹீ’’தி க³ச்ச²தி, அயம் பி⁴க்கு²னா ஸம்முகா²னித்³தி³ட்டோ².

நோ சே பி⁴க்கு²ஸ்ஸ ஸந்திகே நிஸின்னோ ஹோதி, அபிச கோ² பி⁴க்கு² நித்³தி³ஸதி – ‘‘அஸுகஸ்மிம் நாம கா³மே இத்த²ன்னாமோ பி⁴க்கூ²னம் வேய்யாவச்சகரோ’’தி, ஸோ க³ந்த்வா தஸ்ஸ ஹத்தே² அகப்பியவத்து²ம் த³த்வா ‘‘தே²ரஸ்ஸ சீவரம் கிணித்வா த³தே³ய்யாஸீ’’தி ஆக³ந்த்வா பி⁴க்கு²ஸ்ஸ ஆரோசேத்வா க³ச்ச²தி, அயமேகோ பி⁴க்கு²னா அஸம்முகா²னித்³தி³ட்டோ².

ந ஹேவ கோ² ஸோ தூ³தோ அத்தனா ஆக³ந்த்வா ஆரோசேதி, அபிச கோ² அஞ்ஞம் பஹிணதி ‘‘தி³ன்னம் மயா, ப⁴ந்தே, தஸ்ஸ ஹத்தே² சீவரசேதாபன்னம், சீவரம் க³ண்ஹேய்யாதா²’’தி, அயம் து³தியோ பி⁴க்கு²னா அஸம்முகா²னித்³தி³ட்டோ².

ந ஹேவ கோ² அஞ்ஞம் பஹிணதி, அபிச கோ² க³ச்ச²ந்தோவ பி⁴க்கு²ம் வத³தி ‘‘அஹம் தஸ்ஸ ஹத்தே² சீவரசேதாபன்னம் த³ஸ்ஸாமி, தும்ஹே சீவரம் க³ண்ஹேய்யாதா²’’தி, அயம் ததியோ பி⁴க்கு²னா அஸம்முகா²னித்³தி³ட்டோ²தி ஏவம் ஏகோ ஸம்முகா²னித்³தி³ட்டோ² தயோ அஸம்முகா²னித்³தி³ட்டா²தி இமே சத்தாரோ பி⁴க்கு²னா நித்³தி³ட்ட²வேய்யாவச்சகரா நாம. ஏதேஸு இமஸ்மிம் ராஜஸிக்கா²பதே³ வுத்தனயேனேவ படிபஜ்ஜிதப்³ப³ம்.

அபரோ பி⁴க்கு² புரிமனயேனேவ தூ³தேன புச்சி²தோ நத்தி²தாய வா, அவிசாரேதுகாமதாய வா ‘‘நத்த²ம்ஹாகம் கப்பியகாரகோ’’தி வத³தி, தஸ்மிஞ்ச க²ணே கோசி மனுஸ்ஸோ ஆக³ச்ச²தி, தூ³தோ தஸ்ஸ ஹத்தே² அகப்பியவத்து²ம் த³த்வா ‘‘இமஸ்ஸ ஹத்த²தோ சீவரம் க³ண்ஹேய்யாதா²’’தி வத்வா க³ச்ச²தி, அயம் தூ³தேன ஸம்முகா²னித்³தி³ட்டோ².

அபரோ தூ³தோ கா³மம் பவிஸித்வா அத்தனா அபி⁴ருசிதஸ்ஸ கஸ்ஸசி ஹத்தே² அகப்பியவத்து²ம் த³த்வா புரிமனயேனேவ ஆக³ந்த்வா ஆரோசேதி, அஞ்ஞம் வா பஹிணதி, ‘‘அஹம் அஸுகஸ்ஸ நாம ஹத்தே² சீவரசேதாபன்னம் த³ஸ்ஸாமி, தும்ஹே சீவரம் க³ண்ஹேய்யாதா²’’தி வத்வா வா க³ச்ச²தி, அயம் ததியோ தூ³தேன அஸம்முகா²னித்³தி³ட்டோ²தி ஏவம் ஏகோ ஸம்முகா²னித்³தி³ட்டோ², தயோ அஸம்முகா²னித்³தி³ட்டா²தி இமே சத்தாரோ தூ³தேன நித்³தி³ட்ட²வேய்யாவச்சகரா நாம. ஏதேஸு மேண்ட³கஸிக்கா²பதே³ வுத்தனயேன படிபஜ்ஜிதப்³ப³ம். வுத்தஞ்ஹேதம் – ‘‘ஸந்தி, பி⁴க்க²வே, மனுஸ்ஸா ஸத்³தா⁴ பஸன்னா, தே கப்பியகாரகானம் ஹத்தே² ஹிரஞ்ஞம் உபனிக்கி²பந்தி – ‘இமினா அய்யஸ்ஸ யம் கப்பியம் தம் தே³தா²’தி. அனுஜானாமி, பி⁴க்க²வே, யம் ததோ கப்பியம் தம் ஸாதி³தும், ந த்வேவாஹம், பி⁴க்க²வே, கேனசி பரியாயேன ஜாதரூபரஜதம் ஸாதி³தப்³ப³ம் பரியேஸிதப்³ப³ந்தி வதா³மீ’’தி (மஹாவ. 299). ஏத்த² ச சோத³னாய பமாணம் நத்தி², மூலம் அஸாதி³யந்தேன ஸஹஸ்ஸக்க²த்தும்பி சோத³னாய வா டா²னேன வா கப்பியப⁴ண்ட³ம் ஸாதி³தும் வட்டதி. நோ சே தே³தி, அஞ்ஞம் கப்பியகாரகம் ட²பேத்வாபி ஆஹராபேதப்³ப³ம். ஸசே இச்ச²தி மூலஸாமிகானம்பி கதே²தப்³ப³ம்; நோ சே இச்ச²தி ந கதே²தப்³ப³ம்.

அபரோ பி⁴க்கு² புரிமனயேனேவ தூ³தேன புச்சி²தோ ‘‘நத்த²ம்ஹாகம் கப்பியகாரகோ’’தி வத³தி, தத³ஞ்ஞோ ஸமீபே டி²தோ ஸுத்வா ‘‘ஆஹர போ⁴ அஹம் அய்யஸ்ஸ சீவரம் சேதாபேத்வா த³ஸ்ஸாமீ’’தி வத³தி. தூ³தோ ‘‘ஹந்த³ போ⁴ த³தே³ய்யாஸீ’’தி தஸ்ஸ ஹத்தே² த³த்வா பி⁴க்கு²ஸ்ஸ அனாரோசேத்வாவ க³ச்ச²தி, அயம் முக²வேவடிககப்பியகாரகோ. அபரோ பி⁴க்கு²னோ உபட்டா²கஸ்ஸ வா அஞ்ஞஸ்ஸ வா ஹத்தே² அகப்பியவத்து²ம் த³த்வா ‘‘தே²ரஸ்ஸ சீவரம் த³தே³ய்யாஸீ’’தி ஏத்தோவ பக்கமதி, அயம் பரம்முக²கப்பியகாரகோதி இமே த்³வே அனித்³தி³ட்ட²கப்பியகாரகா நாம. ஏதேஸு அஞ்ஞாதகஅப்பவாரிதேஸு விய படிபஜ்ஜிதப்³ப³ம். ஸசே ஸயமேவ சீவரம் ஆனேத்வா த³த³ந்தி, க³ஹேதப்³ப³ம். நோ சே, கிஞ்சி ந வத்தப்³பா³. தே³ஸனாமத்தமேவ சேதம் ‘‘தூ³தேன சீவரசேதாபன்னம் பஹிணேய்யா’’தி ஸயம் ஆஹரித்வாபி பிண்ட³பாதாதீ³னம் அத்தா²ய த³த³ந்தேஸுபி ஏஸேவ நயோ. ந கேவலஞ்ச அத்தனோயேவ அத்தா²ய ஸம்படிச்சி²தும் ந வட்டதி, ஸசேபி கோசி ஜாதரூபரஜதம் ஆனேத்வா ‘‘இத³ம் ஸங்க⁴ஸ்ஸ த³ம்மி, ஆராமம் வா கரோத² சேதியம் வா போ⁴ஜனஸாலாதீ³னம் வா அஞ்ஞதர’’ந்தி வத³தி, இத³ம்பி ஸம்படிச்சி²தும் ந வட்டதி. யஸ்ஸ கஸ்ஸசி ஹி அஞ்ஞஸ்ஸத்தா²ய ஸம்படிச்ச²ந்தஸ்ஸ து³க்கடம் ஹோதீதி மஹாபச்சரியம் வுத்தம்.

ஸசே பன ‘‘நயித³ம் பி⁴க்கூ²னம் ஸம்படிச்சி²தும் வட்டதீ’’தி படிக்கி²த்தே ‘‘வட்³ட⁴கீனம் வா கம்மகரானம் வா ஹத்தே² ப⁴விஸ்ஸதி, கேவலம் தும்ஹே ஸுகதது³க்கடம் ஜானாதா²’’தி வத்வா தேஸம் ஹத்தே² த³த்வா பக்கமதி, வட்டதி. அதா²பி ‘‘மம மனுஸ்ஸானம் ஹத்தே² ப⁴விஸ்ஸதி மய்ஹமேவ வா ஹத்தே² ப⁴விஸ்ஸதி, கேவலம் தும்ஹே யம் யஸ்ஸ தா³தப்³ப³ம், தத³த்தா²ய பேஸேய்யாதா²’’தி வத³தி, ஏவம்பி வட்டதி.

ஸசே பன ஸங்க⁴ம் வா க³ணம் வா புக்³க³லம் வா அனாமஸித்வா ‘‘இத³ம் ஹிரஞ்ஞஸுவண்ணம் சேதியஸ்ஸ தே³ம, விஹாரஸ்ஸ தே³ம, நவகம்மஸ்ஸ தே³மா’’தி வத³ந்தி, படிக்கி²பிதும் ந வட்டதி. ‘‘இமே இத³ம் ப⁴ணந்தீ’’தி கப்பியகாரகானம் ஆசிக்கி²தப்³ப³ம். ‘‘சேதியாதீ³னம் அத்தா²ய தும்ஹே க³ஹேத்வா ட²பேதா²’’தி வுத்தேன பன ‘‘அம்ஹாகம் க³ஹேதும் ந வட்டதீ’’தி படிக்கி²பிதப்³ப³ம்.

ஸசே பன கோசி ப³ஹும் ஹிரஞ்ஞஸுவண்ணம் ஆனேத்வா ‘‘இத³ம் ஸங்க⁴ஸ்ஸ த³ம்மி, சத்தாரோ பச்சயே பரிபு⁴ஞ்ஜதா²’’தி வத³தி, தம் சே ஸங்கோ⁴ ஸம்படிச்ச²தி, படிக்³க³ஹணேபி பரிபோ⁴கே³பி ஆபத்தி. தத்ர சே ஏகோ பி⁴க்கு² ‘‘நயித³ம் கப்பதீ’’தி படிக்கி²பதி, உபாஸகோ ச ‘‘யதி³ ந கப்பதி, மய்ஹமேவ ப⁴விஸ்ஸதீ’’தி க³ச்ச²தி. ஸோ பி⁴க்கு² ‘‘தயா ஸங்க⁴ஸ்ஸ லாப⁴ந்தராயோ கதோ’’தி ந கேனசி கிஞ்சி வத்தப்³போ³. யோ ஹி தம் சோதே³தி, ஸ்வேவ ஸாபத்திகோ ஹோதி, தேன பன ஏகேன ப³ஹூ அனாபத்திகா கதா. ஸசே பன பி⁴க்கூ²ஹி ‘‘ந வட்டதீ’’தி படிக்கி²த்தே ‘‘கப்பியகாரகானம் வா ஹத்தே² ப⁴விஸ்ஸதி, மம புரிஸானம் வா மய்ஹம் வா ஹத்தே² ப⁴விஸ்ஸதி, கேவலம் தும்ஹே பச்சயே பரிபு⁴ஞ்ஜதா²’’தி வத³தி, வட்டதி.

சதுபச்சயத்தா²ய ச தி³ன்னம் யேன யேன பச்சயேன அத்தோ² ஹோதி, தத³த்த²ம் உபனேதப்³ப³ம், சீவரத்தா²ய தி³ன்னம் சீவரேயேவ உபனேதப்³ப³ம். ஸசே சீவரேன தாதி³ஸோ அத்தோ² நத்தி², பிண்ட³பாதாதீ³ஹி ஸங்கோ⁴ கிலமதி, ஸங்க⁴ஸுட்டு²தாய அபலோகேத்வா தத³த்தா²யபி உபனேதப்³ப³ம். ஏஸ நயோ பிண்ட³பாதகி³லானபச்சயத்தா²ய தி³ன்னேபி, ஸேனாஸனத்தா²ய தி³ன்னம் பன ஸேனாஸனஸ்ஸ க³ருப⁴ண்ட³த்தா ஸேனாஸனேயேவ உபனேதப்³ப³ம். ஸசே பன பி⁴க்கூ²ஸு ஸேனாஸனம் ச²ட்³டே³த்வா க³தேஸு ஸேனாஸனம் வினஸ்ஸதி, ஈதி³ஸே காலே ஸேனாஸனம் விஸ்ஸஜ்ஜேத்வாபி பி⁴க்கூ²னம் பரிபோ⁴கோ³ அனுஞ்ஞாதோ, தஸ்மா ஸேனாஸனஜக்³க³னத்த²ம் மூலச்சே²ஜ்ஜம் அகத்வா யாபனமத்தம் பரிபு⁴ஞ்ஜிதப்³ப³ம்.

ந கேவலஞ்ச ஹிரஞ்ஞஸுவண்ணமேவ, அஞ்ஞம்பி கே²த்தவத்தா²தி³ அகப்பியம் ந ஸம்படிச்சி²தப்³ப³ம். ஸசே ஹி கோசி ‘‘மய்ஹம் திஸஸ்ஸஸம்பாத³னகம் மஹாதளாகம் அத்தி², தம் ஸங்க⁴ஸ்ஸ த³ம்மீ’’தி வத³தி, தம் சே ஸங்கோ⁴ ஸம்படிச்ச²தி, படிக்³க³ஹணேபி பரிபோ⁴கே³பி ஆபத்தியேவ. யோ பன தம் படிக்கி²பதி, ஸோ புரிமனயேனேவ ந கேனசி கிஞ்சி வத்தப்³போ³. யோ ஹி தம் சோதே³தி, ஸ்வேவ ஸாபத்திகோ ஹோதி, தேன பன ஏகேன ப³ஹூ அனாபத்திகா கதா.

யோ பன ‘‘தாதி³ஸம்யேவ தளாகம் த³ம்மீ’’தி வத்வா பி⁴க்கூ²ஹி ‘‘ந வட்டதீ’’தி படிக்கி²த்தோ வத³தி ‘‘அஸுகஞ்ச அஸுகஞ்ச ஸங்க⁴ஸ்ஸ தளாகம் அத்தி², தம் கத²ம் வட்டதீ’’தி. ஸோ வத்தப்³போ³ – ‘‘கப்பியம் கத்வா தி³ன்னம் ப⁴விஸ்ஸதீ’’தி. கத²ம் தி³ன்னம் கப்பியம் ஹோதீதி? ‘‘சத்தாரோ பச்சயே பரிபு⁴ஞ்ஜதா²’’தி வத்வா தி³ன்னந்தி. ஸோ ஸசே ‘‘ஸாது⁴, ப⁴ந்தே, சத்தாரோ பச்சயே ஸங்கோ⁴ பரிபு⁴ஞ்ஜதூ’’தி தே³தி, வட்டதி. அதா²பி ‘‘தளாகம் க³ண்ஹதா²’’தி வத்வா ‘‘ந வட்டதீ’’தி படிக்கி²த்தோ ‘‘கப்பியகாரகோ அத்தீ²’’தி புச்சி²த்வா ‘‘நத்தீ²’’தி வுத்தே ‘‘இத³ம் அஸுகோ நாம விசாரேஸ்ஸதி, அஸுகஸ்ஸ வா ஹத்தே², மய்ஹம் வா ஹத்தே² ப⁴விஸ்ஸதி, ஸங்கோ⁴ கப்பியப⁴ண்ட³ம் பரிபு⁴ஞ்ஜதூ’’தி வத³தி, வட்டதி. ஸசேபி ‘‘ந வட்டதீ’’தி படிக்கி²த்தோ ‘‘உத³கம் பரிபு⁴ஞ்ஜிஸ்ஸதி, ப⁴ண்ட³கம் தோ⁴விஸ்ஸதி, மிக³பக்கி²னோ பிவிஸ்ஸந்தீ’’தி வத³தி, ஏவம்பி வட்டதி. அதா²பி ‘‘ந வட்டதீ’’தி படிக்கி²த்தோ வத³தி ‘‘கப்பியஸீஸேன க³ண்ஹதா²’’தி. ‘‘ஸாது⁴, உபாஸக, ஸங்கோ⁴ பானீயம் பிவிஸ்ஸதி, ப⁴ண்ட³கம் தோ⁴விஸ்ஸதி, மிக³பக்கி²னோ பிவிஸ்ஸந்தீ’’தி வத்வா பரிபு⁴ஞ்ஜிதும் வட்டதி.

அதா²பி ‘‘மம தளாகம் வா போக்க²ரணிம் வா ஸங்க⁴ஸ்ஸ த³ம்மீ’’தி ‘‘வுத்தே, ஸாது⁴, உபாஸக, ஸங்கோ⁴ பானீயம் பிவிஸ்ஸதீ’’திஆதீ³னி வத்வா பரிபு⁴ஞ்ஜிதும் வட்டதியேவ. யதி³ பன பி⁴க்கூ²ஹி ஹத்த²கம்மம் யாசித்வா ஸஹத்தே²ன ச கப்பியபத²விம் க²னித்வா உத³கபரிபோ⁴க³த்தா²ய தளாகம் காரிதம் ஹோதி, தம் சே நிஸ்ஸாய ஸஸ்ஸம் நிப்பா²தே³த்வா மனுஸ்ஸா விஹாரே கப்பியப⁴ண்ட³ம் தே³ந்தி, வட்டதி. அத² மனுஸ்ஸா ஏவ ஸங்க⁴ஸ்ஸ உபகாரத்தா²ய ஸங்கி⁴கபூ⁴மிம் க²னித்வா தம் நிஸ்ஸாய நிப்ப²ன்னஸஸ்ஸதோ கப்பியப⁴ண்ட³ம் தே³ந்தி, ஏவம்பி வட்டதி. ‘‘அம்ஹாகம் ஏகம் கப்பியகாரகம் ட²பேதா²’’தி வுத்தே ச ட²பேதும்பி லப்³ப⁴தி. அத² பன தே மனுஸ்ஸா ராஜப³லினா உபத்³து³தா பக்கமந்தி, அஞ்ஞே படிபஜ்ஜந்தி, ந ச பி⁴க்கூ²னம் கிஞ்சி தே³ந்தி, உத³கம் வாரேதும் லப்³ப⁴தி. தஞ்ச கோ² கஸிகம்மகாலேயேவ, ந ஸஸ்ஸகாலே. ஸசே தே வத³ந்தி ‘‘நனு, ப⁴ந்தே, புப்³பே³பி மனுஸ்ஸா இமம் நிஸ்ஸாய ஸஸ்ஸம் அகம்ஸூ’’தி. ததோ வத்தப்³பா³ – ‘‘தே ஸங்க⁴ஸ்ஸ இமஞ்ச இமஞ்ச உபகாரம் அகம்ஸு, இத³ஞ்சித³ஞ்ச கப்பியப⁴ண்ட³ம் அத³ம்ஸூ’’தி. ஸசே வத³ந்தி – ‘‘மயம்பி த³ஸ்ஸாமா’’தி, ஏவம்பி வட்டதி.

ஸசே பன கோசி அப்³யத்தோ அகப்பியவோஹாரேன தளாகம் படிக்³க³ண்ஹாதி வா காரேதி வா, தம் பி⁴க்கூ²ஹி ந பரிபு⁴ஞ்ஜிதப்³ப³ம், தம் நிஸ்ஸாய லத்³த⁴ம் கப்பியப⁴ண்ட³ம்பி அகப்பியமேவ. ஸசே பி⁴க்கூ²ஹி பரிச்சத்தபா⁴வம் ஞத்வா ஸாமிகோ வா தஸ்ஸ புத்ததீ⁴தரோ வா அஞ்ஞோ வா கோசி வம்ஸே உப்பன்னோ புன கப்பியவோஹாரேன தே³தி, வட்டதி. பச்சி²ன்னே குலவம்ஸே யோ தஸ்ஸ ஜனபத³ஸ்ஸ ஸாமிகோ, ஸோ அச்சி²ந்தி³த்வா புன தே³தி, சித்தலபப்³ப³தே பி⁴க்கு²னா நீஹடஉத³கவாஹகம் அளனாக³ராஜமஹேஸீ விய, ஏவம்பி வட்டதி.

கப்பியவோஹாரேபி உத³கவஸேன படிக்³க³ஹிததளாகே ஸுத்³த⁴சித்தானம் மத்திகுத்³த⁴ரணபாளிப³ந்த⁴னாதீ³னி ச காதும் வட்டதி. தம் நிஸ்ஸாய பன ஸஸ்ஸம் கரோந்தே தி³ஸ்வா கப்பியகாரகம் ட²பேதும் ந வட்டதி. யதி³ தே ஸயமேவ கப்பியப⁴ண்ட³ம் தே³ந்தி, க³ஹேதப்³ப³ம். நோ சே தே³ந்தி, ந சோதே³தப்³ப³ம், ந ஸாரேதப்³ப³ம். பச்சயவஸேன படிக்³க³ஹிததளாகே கப்பியகாரகம் ட²பேதும் வட்டதி. மத்திகுத்³த⁴ரணபாளிப³ந்த⁴னாதீ³னி பன காதும் ந வட்டதி. ஸசே கப்பியகாரகா ஸயமேவ கரோந்தி, வட்டதி. அப்³யத்தேன பன லஜ்ஜிபி⁴க்கு²னா காராபிதேஸு கிஞ்சாபி படிக்³க³ஹணே கப்பியம், பி⁴க்கு²ஸ்ஸ பயோக³பச்சயா உப்பன்னேன மிஸ்ஸகத்தா விஸக³தபிண்ட³பாதோ விய அகப்பியமம்ஸரஸமிஸ்ஸகபோ⁴ஜனம் விய ச து³ப்³பி³னிப்³போ⁴க³ம் ஹோதி, ஸப்³பே³ஸம் அகப்பியமேவ.

ஸசே பன ‘‘உத³கஸ்ஸ ஓகாஸோ அத்தி², தளாகஸ்ஸ பாளி தி²ரா, யதா² ப³ஹும் உத³கம் க³ண்ஹாதி, ஏவம் கரோஹி, தீரஸமீபே உத³கம் கரோஹீ’’தி ஏவம் உத³கமேவ விசாரேதி, வட்டதி. உத்³த⁴னே அக்³கி³ம் ந பாதேந்தி, ‘‘உத³ககம்மம் லப்³ப⁴து உபாஸகா’’தி வத்தும் வட்டதி. ‘‘ஸஸ்ஸம் கத்வா ஆஹரதா²’’தி வத்தும் பன ந வட்டதி. ஸசே பன தளாகே அதிப³ஹும் உத³கம் தி³ஸ்வா பஸ்ஸதோ வா பிட்டி²தோ வா மாதிகம் நீஹராபேதி, வனம் சி²ந்தா³பேத்வா கேதா³ரே காராபேதி, போராணகேதா³ரேஸு வா பகதிபா⁴க³ம் அக்³க³ஹேத்வா அதிரேகம் க³ண்ஹாதி, நவஸஸ்ஸே வா அகாலஸஸ்ஸே வா அபரிச்சி²ன்னபா⁴கே³ ‘‘ஏத்தகே கஹாபணே தே³தா²’’தி கஹாபணே உட்டா²பேதி, ஸப்³பே³ஸம் அகப்பியம்.

யோ பன ‘‘கஸ்ஸத² வபதா²’’தி அவத்வா ‘‘ஏத்தகாய பூ⁴மியா, ஏத்தகோ நாம பா⁴கோ³’’தி ஏவம் பூ⁴மிம் வா பதிட்ட²பேதி, ‘‘ஏத்தகே பூ⁴மிபா⁴கே³ அம்ஹேஹி ஸஸ்ஸம் கதம், ஏத்தகம் நாம பா⁴க³ம் க³ண்ஹதா²’’தி வத³ந்தேஸு கஸ்ஸகேஸு பூ⁴மிப்பமாணக்³க³ஹணத்த²ம் ரஜ்ஜுயா வா த³ண்டே³ன வா மினாதி, க²லே வா ட²த்வா ரக்க²தி, க²லதோ வா நீஹராபேதி, கோட்டா²கா³ரே வா படிஸாமேதி, தஸ்ஸேவ தம் அகப்பியம்.

ஸசே கஸ்ஸகா கஹாபணே ஆஹரித்வா ‘‘இமே ஸங்க⁴ஸ்ஸ ஆஹடா’’தி வத³ந்தி, அஞ்ஞதரோ ச பி⁴க்கு² ‘‘ந ஸங்கோ⁴ கஹாபணே கா²த³தீ’’தி ஸஞ்ஞாய ‘‘ஏத்தகேஹி கஹாபணேஹி ஸாடகே ஆஹர, ஏத்தகேஹி யாகு³ஆதீ³னி ஸம்பாதே³ஹீ’’தி வத³தி. யம் தே ஆஹரந்தி, ஸப்³பே³ஸம் அகப்பியம். கஸ்மா? கஹாபணானம் விசாரிதத்தா.

ஸசே த⁴ஞ்ஞம் ஆஹரித்வா இத³ம் ஸங்க⁴ஸ்ஸ ஆஹடந்தி வத³ந்தி, அஞ்ஞதரோ ச பி⁴க்கு² புரிமனயேனேவ ‘‘ஏத்தகேஹி வீஹீஹி இத³ஞ்சித³ஞ்ச ஆஹரதா²’’தி வத³தி. யம் தே ஆஹரந்தி, தஸ்ஸேவ அகப்பியம். கஸ்மா? த⁴ஞ்ஞஸ்ஸ விசாரிதத்தா.

ஸசே தண்டு³லம் வா அபரண்ணம் வா ஆஹரித்வா ‘‘இத³ம் ஸங்க⁴ஸ்ஸ ஆஹட’’ந்தி வத³ந்தி, அஞ்ஞதரோ ச பி⁴க்கு² புரிமனயேனேவ ‘‘ஏத்தகேஹி தண்டு³லேஹி இத³ஞ்சித³ஞ்ச ஆஹரதா²’’தி வத³தி. யம் தே ஆஹரந்தி, ஸப்³பே³ஸம் கப்பியம். கஸ்மா? கப்பியானம் தண்டு³லாதீ³னம் விசாரிதத்தா. கயவிக்கயேபி அனாபத்தி, கப்பியகாரகஸ்ஸ ஆசிக்கி²தத்தா.

புப்³பே³ பன சித்தலபப்³ப³தே ஏகோ பி⁴க்கு² சதுஸாலத்³வாரே ‘‘அஹோ வத ஸ்வே ஸங்க⁴ஸ்ஸ ஏத்தகப்பமாணே பூவே பசேய்யு’’ந்தி ஆராமிகானம் ஸஞ்ஞாஜனனத்த²ம் பூ⁴மியம் மண்ட³லம் அகாஸி, தம் தி³ஸ்வா சே²கோ ஆராமிகோ ததே²வ கத்வா து³தியதி³வஸே பே⁴ரியா ஆகோடிதாய ஸன்னிபதிதே ஸங்கே⁴ பூவம் க³ஹேத்வா ஸங்க⁴த்தே²ரம் ஆஹ – ‘‘ப⁴ந்தே, அம்ஹேஹி இதோ புப்³பே³ நேவ பிதூனம் ந பிதாமஹானம் ஏவரூபம் ஸுதபுப்³ப³ம், ஏகேன அய்யேன சதுஸ்ஸாலத்³வாரே பூவத்தா²ய ஸஞ்ஞா கதா, இதோ தா³னி பபு⁴தி அய்யா அத்தனோ அத்தனோ சித்தானுரூபம் வத³ந்து, அம்ஹாகம்பி பா²ஸுவிஹாரோ ப⁴விஸ்ஸதீ’’தி. மஹாதே²ரோ ததோவ நிவத்தி, ஏகபி⁴க்கு²னாபி பூவோ ந க³ஹிதோ. ஏவம் புப்³பே³ தத்ருப்பாத³ம்பி ந பரிபு⁴ஞ்ஜிம்ஸு. தஸ்மா –

ஸல்லேக²ம் அச்சஜந்தேன, அப்பமத்தேன பி⁴க்கு²னா;

கப்பியேபி ந காதப்³பா³, ஆமிஸத்தா²ய லோலதாதி.

யோ சாயம் தளாகே வுத்தோ, போக்க²ரணீ-உத³கவாஹகமாதிகாதீ³ஸுபி ஏஸேவ நயோ.

புப்³ப³ண்ணாபரண்ணஉச்சு²ப²லாப²லாதீ³னம் விருஹனட்டா²னம் யம் கிஞ்சி கே²த்தம் வா வத்து²ம் வா த³ம்மீதி வுத்தேபி ‘‘ந வட்டதீ’’தி படிக்கி²பித்வா தளாகே வுத்தனயேனேவ யதா³ கப்பியவோஹாரேன ‘‘சதுபச்சயபரிபோ⁴க³த்தா²ய த³ம்மீ’’தி வத³தி, ததா³ ஸம்படிச்சி²தப்³ப³ம், ‘‘வனம் த³ம்மி, அரஞ்ஞம் த³ம்மீ’’தி வுத்தே பன வட்டதி. ஸசே மனுஸ்ஸா பி⁴க்கூ²ஹி அனாணத்தாயேவ தத்த² ருக்கே² சி²ந்தி³த்வா அபரண்ணாதீ³னி ஸம்பாதே³த்வா பி⁴க்கூ²னம் பா⁴க³ம் தே³ந்தி, வட்டதி; அதே³ந்தா ந சோதே³தப்³பா³. ஸசே கேனசிதே³வ அந்தராயேன தேஸு பக்கந்தேஸு அஞ்ஞே கரோந்தி, ந ச பி⁴க்கூ²னம் கிஞ்சி தே³ந்தி, தே வாரேதப்³பா³. ஸசே வத³ந்தி – ‘‘நனு, ப⁴ந்தே, புப்³பே³பி மனுஸ்ஸா இத⁴ ஸஸ்ஸானி அகம்ஸூ’’தி, ததோ தே வத்தப்³பா³ – ‘‘தே ஸங்க⁴ஸ்ஸ இத³ஞ்சித³ஞ்ச கப்பியப⁴ண்ட³ம் அத³ம்ஸூ’’தி. ஸசே வத³ந்தி – ‘‘மயம்பி த³ஸ்ஸாமா’’தி ஏவம் வட்டதி.

கஞ்சி ஸஸ்ஸுட்டா²னகம் பூ⁴மிப்பதே³ஸம் ஸந்தா⁴ய ‘‘ஸீமம் தே³மா’’தி வத³ந்தி, வட்டதி. ஸீமா பரிச்சே²த³னத்த²ம் பன த²ம்பா⁴ வா பாஸாணா வா ஸயம் ந ட²பேதப்³பா³. கஸ்மா? பூ⁴மி நாம அனக்³கா⁴ அப்பகேனாபி பாராஜிகோ ப⁴வேய்ய, ஆராமிகானம் பன வத்தப்³ப³ம் – ‘‘இமினா டா²னேன அம்ஹாகம் ஸீமா க³தா’’தி. ஸசேபி ஹி தே அதி⁴கம் க³ண்ஹந்தி, பரியாயேன கதி²தத்தா அனாபத்தி. யதி³ பன ராஜராஜமஹாமத்தாத³யோ ஸயமேவ த²ம்பே⁴ ட²பாபேத்வா ‘‘சத்தாரோ பச்சயே பரிபு⁴ஞ்ஜதா²’’தி தே³ந்தி, வட்டதியேவ.

ஸசே கோசி அந்தோஸீமாய தளாகம் க²னதி, விஹாரமஜ்ஜே²ன வா மாதிகம் நேதி, சேதியங்க³ணபோ³தி⁴யங்க³ணாதீ³னி து³ஸ்ஸந்தி, வாரேதப்³போ³. ஸசே ஸங்கோ⁴ கிஞ்சி லபி⁴த்வா ஆமிஸக³ருகதாய ந வாரேதி, ஏகோ பி⁴க்கு² வாரேதி, ஸோவ பி⁴க்கு² இஸ்ஸரோ. ஸசே ஏகோ பி⁴க்கு² ந வாரேதி, ‘‘நேத² தும்ஹே’’தி தேஸம்யேவ பக்கோ² ஹோதி, ஸங்கோ⁴ வாரேதி, ஸங்கோ⁴வ இஸ்ஸரோ. ஸங்கி⁴கேஸு ஹி கம்மேஸு யோ த⁴ம்மகம்மம் கரோதி, ஸோவ இஸ்ஸரோ. ஸசே வாரியமானோபி கரோதி, ஹேட்டா² க³ஹிதம் பம்ஸும் ஹேட்டா² பக்கி²பித்வா, உபரி க³ஹிதம் பம்ஸும் உபரி பக்கி²பித்வா பூரேதப்³பா³.

ஸசே கோசி யதா²ஜாதமேவ உச்சு²ம் வா அபரண்ணம் வா அலாபு³கும்ப⁴ண்டா³தி³கம் வா வல்லிப²லம் தா³துகாமோ ‘‘ஏதம் ஸப்³ப³ம் உச்சு²கே²த்தம் அபரண்ணவத்து²ம் வல்லிப²லாவாடம் த³ம்மீ’’தி வத³தி, ஸஹ வத்து²னா பராமட்ட²த்தா ‘‘ந வட்டதீ’’தி மஹாஸுமத்தே²ரோ ஆஹ. மஹாபது³மத்தே²ரோ பன ‘‘அபி⁴லாபமத்தமேதம் ஸாமிகானம்யேவ ஹி ஸோ பூ⁴மிபா⁴கோ³ தஸ்மா வட்டதீ’’தி ஆஹ.

‘‘தா³ஸம் த³ம்மீ’’தி வத³தி, ந வட்டதி. ‘‘ஆராமிகம் த³ம்மி, வேய்யாவச்சகரம் த³ம்மி, கப்பியகாரகம் த³ம்மீ’’தி வுத்தே வட்டதி. ஸசே ஸோ ஆராமிகோ புரேப⁴த்தம்பி பச்சா²ப⁴த்தம்பி ஸங்க⁴ஸ்ஸேவ கம்மம் கரோதி, ஸாமணேரஸ்ஸ விய ஸப்³ப³ம் பே⁴ஸஜ்ஜபடிஜக்³க³னம்பி தஸ்ஸ காதப்³ப³ம். ஸசே புரேப⁴த்தமேவ ஸங்க⁴ஸ்ஸ கம்மம் கரோதி, பச்சா²ப⁴த்தம் அத்தனோ கம்மம் கரோதி, ஸாயம் நிவாபோ ந தா³தப்³போ³. யேபி பஞ்சதி³வஸவாரேன வா பக்க²வாரேன வா ஸங்க⁴ஸ்ஸ கம்மம் கத்வா ஸேஸகாலே அத்தனோ கம்மம் கரோந்தி, தேஸம்பி கரணகாலேயேவ ப⁴த்தஞ்ச நிவாபோ ச தா³தப்³போ³. ஸசே ஸங்க⁴ஸ்ஸ கம்மம் நத்தி², அத்தனோயேவ கம்மம் கத்வா ஜீவந்தி, தே சே ஹத்த²கம்மமூலம் ஆனேத்வா தே³ந்தி, க³ஹேதப்³ப³ம். நோ சே தே³ந்தி, ந கிஞ்சி வத்தப்³பா³. யம் கிஞ்சி ரஜகதா³ஸம்பி பேஸகாரதா³ஸம்பி ஆராமிகனாமேன ஸம்படிச்சி²தும் வட்டதி.

ஸசே ‘‘கா³வோ தே³மா’’தி வத³ந்தி, ‘‘ந வட்டதீ’’தி படிக்கி²பிதப்³பா³. இமா கா³வோ குதோதி பண்டி³தேஹி பஞ்ச கோ³ரஸபரிபோ⁴க³த்தா²ய தி³ன்னாதி, ‘‘மயம்பி பஞ்சகோ³ரஸபரிபோ⁴க³த்தா²ய தே³மா’’தி வுத்தே வட்டதி. அஜிகாதீ³ஸுபி ஏஸேவ நயோ. ‘‘ஹத்தி²ம் தே³ம, அஸ்ஸம் மஹிஸம் குக்குடம் ஸூகரம் தே³மா’’தி வத³ந்தி, ஸம்படிச்சி²தும் ந வட்டதி. ஸசே கேசி மனுஸ்ஸா ‘‘அப்போஸ்ஸுக்கா, ப⁴ந்தே, தும்ஹே ஹோத², மயம் இமே க³ஹேத்வா தும்ஹாகம் கப்பியப⁴ண்ட³ம் த³ஸ்ஸாமா’’தி க³ண்ஹந்தி, வட்டதி. ‘‘குக்குடஸூகரா ஸுக²ம் ஜீவந்தூ’’தி அரஞ்ஞே விஸ்ஸஜ்ஜேதும் வட்டதி. ‘‘இமம் தளாகம், இமம் கே²த்தம், இமம் வத்து²ம், விஹாரஸ்ஸ தே³மா’’தி வுத்தே படிக்கி²பிதும் ந லப்³ப⁴தீதி. ஸேஸமேத்த² உத்தானத்த²மேவ.

ஸமுட்டா²னாதீ³ஸு இத³ம்பி ச²ஸமுட்டா²னம் கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மவசீகம்மம், திசித்தம், திவேத³னந்தி.

ராஜஸிக்கா²பத³வண்ணனா நிட்டி²தா.

நிட்டி²தோ சீவரவக்³கோ³ பட²மோ.