1. பட²மகதி²னஸிக்கா²பத³வண்ணனா

திம்ஸ நிஸ்ஸக்³கி³யா த⁴ம்மா, யே வுத்தா ஸமிதாவினா;

தேஸம் தா³னி கரிஸ்ஸாமி, அபுப்³ப³பத³வண்ணனம்.

459. தேன ஸமயேன பு³த்³தோ⁴ ப⁴க³வா வேஸாலியம் விஹரதி கோ³தமகே சேதியே. தேன கோ² பன ஸமயேன ப⁴க³வதா பி⁴க்கூ²னம் திசீவரம் அனுஞ்ஞாதம் ஹோதீதி ஏத்த² திசீவரந்தி அந்தரவாஸகோ உத்தராஸங்கோ³ ஸங்கா⁴டீதி இத³ம் சீவரத்தயம் பரிபு⁴ஞ்ஜிதும் அனுஞ்ஞாதம் ஹோதி. யத்த² பனேதம் அனுஞ்ஞாதம், யதா³ ச அனுஞ்ஞாதம், யேன ச காரணேன அனுஞ்ஞாதம், தம் ஸப்³ப³ம் சீவரக்க²ந்த⁴கே ஜீவகவத்து²ஸ்மிம் (மஹாவ. 326 ஆத³யோ) ஆக³தமேவ. அஞ்ஞேனேவ திசீவரேன கா³மம் பவிஸந்தீதி யேன விஹாரே அச்ச²ந்தி ந்ஹானஞ்ச ஓதரந்தி, ததோ அஞ்ஞேன, ஏவம் தி³வஸே தி³வஸே நவ சீவரானி தா⁴ரேந்தி.

460. உப்பன்னம் ஹோதீதி அனுபஞ்ஞத்தியா த்³வாரம் த³த³மானம் படிலாப⁴வஸேன உப்பன்னம் ஹோதி, நோ நிப்ப²த்திவஸேன.

ஆயஸ்மதோ ஸாரிபுத்தஸ்ஸ தா³துகாமோ ஹோதீதி ஆயஸ்மா கிர ஆனந்தோ³ ப⁴க³வந்தம் ட²பேத்வா அஞ்ஞோ ஏவரூபோ கு³ணவிஸிட்டோ² புக்³க³லோ நத்தீ²தி கு³ணப³ஹுமானேன ஆயஸ்மந்தம் ஸாரிபுத்தம் அதிமமாயதி. ஸோ ஸதா³பி மனாபம் சீவரம் லபி⁴த்வா ரஜித்வா கப்பபி³ந்து³ம் த³த்வா தே²ரஸ்ஸேவ தே³தி, புரேப⁴த்தே பணீதம் யாகு³க²ஜ்ஜகம் வா பிண்ட³பாதம் வா லபி⁴த்வாபி தே²ரஸ்ஸேவ தே³தி, பச்சா²ப⁴த்தே மது⁴பா²ணிதாதீ³னி லபி⁴த்வாபி தே²ரஸ்ஸேவ தே³தி, உபட்டா²ககுலேஹி தா³ரகே நிக்கா²மேத்வா பப்³பா³ஜேத்வாபி தே²ரஸ்ஸ ஸந்திகே உபஜ்ஜ²ம் கா³ஹாபேத்வா ஸயம் அனுஸாவனகம்மம் கரோதி. ஆயஸ்மாபி ஸாரிபுத்தோ ‘‘பிது கத்தப்³ப³கிச்சம் நாம ஜேட்ட²புத்தஸ்ஸ பா⁴ரோ, தம் மயா ப⁴க³வதோ கத்தப்³ப³ம் கிச்சம் ஆனந்தோ³ கரோதி, அஹம் ஆனந்த³ம் நிஸ்ஸாய அப்போஸ்ஸுக்கோ விஹரிதும் லபா⁴மீ’’தி ஆயஸ்மந்தம் ஆனந்த³ம் அதிவிய மமாயதி, ஸோபி மனாபம் சீவரம் லபி⁴த்வா ஆனந்த³த்தே²ரஸ்ஸேவ தே³தீதி ஸப்³ப³ம் புரிமஸதி³ஸமேவ. ஏவம் கு³ணப³ஹுமானேன மமாயந்தோ ததா³ உப்பன்னம்பி தம் சீவரம் ஆயஸ்மதோ ஸாரிபுத்தஸ்ஸ தா³துகாமோ ஹோதீதி வேதி³தப்³போ³.

நவமம் வா ப⁴க³வா தி³வஸம் த³ஸமம் வாதி ஏத்த² பன ஸசே ப⁴வேய்ய ‘‘கத²ம் தே²ரோ ஜானாதீ’’தி? ப³ஹூஹி காரணேஹி ஜானாதி. ஸாரிபுத்தத்தே²ரோ கிர ஜனபத³சாரிகம் பக்கமந்தோ ஆனந்த³த்தே²ரம் ஆபுச்சி²த்வாவ பக்கமதி ‘‘அஹம் ஏத்தகேன நாம காலேன ஆக³ச்சி²ஸ்ஸாமி, ஏத்த²ந்தரே ப⁴க³வந்தம் மா பமஜ்ஜீ’’தி. ஸசே ஸம்முகா² ந ஆபுச்ச²தி, பி⁴க்கூ² பேஸேத்வாபி ஆபுச்சி²த்வாவ க³ச்ச²தி. ஸசே அஞ்ஞத்த² வஸ்ஸம் வஸதி, யே பட²மதரம் பி⁴க்கூ² ஆக³ச்ச²ந்தி, தே ஏவம் பஹிணதி ‘‘மம வசனேன ப⁴க³வதோ ச பாதே³ ஸிரஸா வந்த³த², ஆனந்த³ஸ்ஸ ச ஆரோக்³யம் வத்வா மம் ‘அஸுகதி³வஸே நாம ஆக³மிஸ்ஸதீ’தி வத³தா²’’தி ஸதா³ ச யதா²பரிச்சி²ன்னதி³வஸேயேவ ஏதி. அபிசாயஸ்மா ஆனந்தோ³ அனுமானேனபி ஜானாதி ‘‘ஏத்தகே தி³வஸே ப⁴க³வதா வியோக³ம் ஸஹந்தோ அதி⁴வாஸேந்தோ ஆயஸ்மா ஸாரிபுத்தோ வஸி, இதோ தா³னி பட்டா²ய அஸுகம் நாம தி³வஸம் ந அதிக்கமிஸ்ஸதி அத்³தா⁴ ஆக³மிஸ்ஸதீ’’தி. யேஸம் யேஸஞ்ஹி பஞ்ஞா மஹதீ தேஸம் தேஸம் ப⁴க³வதி பேமஞ்ச கா³ரவோ ச மஹா ஹோதீதி இமினா நயேனாபி ஜானாதி. ஏவம் ப³ஹூஹி காரணேஹி ஜானாதி. தேனாஹ – ‘‘நவமம் வா ப⁴க³வா தி³வஸம் த³ஸமம் வா’’தி. ஏவம் வுத்தே யஸ்மா இத³ம் ஸிக்கா²பத³ம் பண்ணத்திவஜ்ஜம், ந லோகவஜ்ஜம்; தஸ்மா ஆயஸ்மதா ஆனந்தே³ன வுத்தஸதி³ஸமேவ பரிச்சே²த³ம் கரோந்தோ ‘‘அத² கோ² ப⁴க³வா…பே… தா⁴ரேது’’ந்தி. ஸசே பன தே²ரேன அத்³த⁴மாஸோ வா மாஸோ வா உத்³தி³ட்டோ² அப⁴விஸ்ஸ, ஸோபி ப⁴க³வதா அனுஞ்ஞாதோ அஸ்ஸ.

462-3. நிட்டி²தசீவரஸ்மிந்தி யேன கேனசி நிட்டா²னேன நிட்டி²தே சீவரஸ்மிம். யஸ்மா பன தம் சீவரம் கரணேனபி நிட்டி²தம் ஹோதி, நஸ்ஸனாதீ³ஹிபி தஸ்மாஸ்ஸ பத³பா⁴ஜனே அத்த²மத்தமேவ த³ஸ்ஸேதும் பி⁴க்கு²னோ சீவரம் கதம் வா ஹோதீதிஆதி³ வுத்தம். தத்த² கதந்தி ஸூசிகம்மபரியோஸானேன கதம், ஸூசிகம்மபரியோஸானம் நாம யம்கிஞ்சி ஸூசியா கத்தப்³ப³ம் பாஸபட்டக³ண்டி²கபட்டபரியோஸானம் கத்வா ஸூசியா படிஸாமனம். நட்ட²ந்தி சோராதீ³ஹி ஹடம், ஏதம்பி ஹி கரணபலிபோ³த⁴ஸ்ஸ நிட்டி²தத்தா நிட்டி²தந்தி வுச்சதி. வினட்ட²ந்தி உபசிகாதீ³ஹி கா²யிதம். த³ட்³ட⁴ந்தி அக்³கி³னா த³ட்³ட⁴ம். சீவராஸா வா உபச்சி²ன்னாதி ‘‘அஸுகஸ்மிம் நாம குலே சீவரம் லபி⁴ஸ்ஸாமீ’’தி யா சீவராஸா உப்பன்னா ஹோதி, ஸா வா உபச்சி²ன்னா, ஏதேஸம்பி ஹி கரணபலிபோ³த⁴ஸ்ஸேவ நிட்டி²தத்தா நிட்டி²தபா⁴வோ வேதி³தப்³போ³.

உப்³ப⁴தஸ்மிம் கதி²னேதி கதி²னே ச உப்³ப⁴தஸ்மிம். ஏதேன து³தியஸ்ஸ பலிபோ³த⁴ஸ்ஸ அபா⁴வம் த³ஸ்ஸேதி. தம் பன கதி²னம் யஸ்மா அட்ட²ஸு வா மாதிகாஸு ஏகாய அந்தருப்³பா⁴ரேன வா உத்³த⁴ரீயதி, தேனஸ்ஸ நித்³தே³ஸே ‘‘அட்ட²ன்னம் மாதிகான’’ந்திஆதி³ வுத்தம். தத்த² ‘‘அட்டி²மா, பி⁴க்க²வே, மாதிகா கதி²னஸ்ஸ உப்³பா⁴ராய – பக்கமனந்திகா, நிட்டா²னந்திகா, ஸன்னிட்டா²னந்திகா, நாஸனந்திகா, ஸவனந்திகா, ஆஸாவச்சே²தி³கா, ஸீமாதிக்கந்திகா, ஸஹுப்³பா⁴ரா’’தி ஏவம் அட்ட² மாதிகாயோ கதி²னக்க²ந்த⁴கே ஆக³தா. அந்தருப்³பா⁴ரோபி ‘‘ஸுணாது மே, ப⁴ந்தே, ஸங்கோ⁴; யதி³ ஸங்க⁴ஸ்ஸ பத்தகல்லம், ஸங்கோ⁴ கதி²னம் உத்³த⁴ரேய்ய, ஏஸா ஞத்தி. ஸுணாது மே, ப⁴ந்தே, ஸங்கோ⁴; ஸங்கோ⁴ கதி²னம் உத்³த⁴ரதி, யஸ்ஸாயஸ்மதோ க²மதி, கதி²னஸ்ஸ உப்³பா⁴ரோ, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய. உப்³ப⁴தம் ஸங்கே⁴ன கதி²னம், க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி (பாசி. 926) ஏவம் பி⁴க்கு²னீவிப⁴ங்கே³ ஆக³தோ. தத்த² யம் வத்தப்³ப³ம் தம் ஆக³தட்டா²னேயேவ வண்ணயிஸ்ஸாம. இத⁴ பன வுச்சமானே பாளி ஆஹரிதப்³பா³ ஹோதி, அத்தோ²பி வத்தப்³போ³. வுத்தோபி ச ந ஸுவிஞ்ஞேய்யோ ஹோதி, அட்டா²னே வுத்தத்தாய.

த³ஸாஹபரமந்தி த³ஸ அஹானி பரமோ பரிச்சே²தோ³ அஸ்ஸாதி த³ஸாஹபரமோ, தம் த³ஸாஹபரமம் காலம் தா⁴ரேதப்³ப³ந்தி அத்தோ². பத³பா⁴ஜனே பன அத்த²மத்தமேவ த³ஸ்ஸேதும் ‘‘த³ஸாஹபரமதா தா⁴ரேதப்³ப³’’ந்தி வுத்தம். இத³ஞ்ஹி வுத்தம் ஹோதி ‘‘த³ஸாஹபரம’’ந்தி ஏத்த² யா த³ஸாஹபரமதா த³ஸாஹபரமபா⁴வோ, அயம் ஏத்தகோ காலோ யாவ நாதிக்கமதி தாவ தா⁴ரேதப்³ப³ந்தி.

அதி⁴ட்டி²தவிகப்பிதேஸு அபரியாபன்னத்தா அதிரேகம் சீவரந்தி அதிரேகசீவரம். தேனேவஸ்ஸ பத³பா⁴ஜனே வுத்தம் ‘‘அனதி⁴ட்டி²தம் அவிகப்பித’’ந்தி.

ச²ன்னம் சீவரானம் அஞ்ஞதரந்தி கோ²மம், கப்பாஸிகம், கோஸேய்யம், கம்ப³லம், ஸாணம், ப⁴ங்க³ந்தி இமேஸம் ச²ன்னம் சீவரானம் அஞ்ஞதரம். ஏதேன சீவரஸ்ஸ ஜாதிம் த³ஸ்ஸேத்வா இதா³னி பமாணம் த³ஸ்ஸேதும் ‘‘விகப்பனுபக³ம் பச்சி²ம’’ந்தி ஆஹ. தஸ்ஸ பமாணம் தீ³க⁴தோ த்³வே வித³த்தி²யோ, திரியம் வித³த்தி². தத்ராயம் பாளி – ‘‘அனுஜானாமி, பி⁴க்க²வே, ஆயாமேன அட்ட²ங்கு³லம் ஸுக³தங்கு³லேன சதுரங்கு³லவித்த²தம் பச்சி²மம் சீவரம் விகப்பேது’’ந்தி (மஹாவ. 358).

தம் அதிக்காமயதோ நிஸ்ஸக்³கி³யம் பாசித்தியந்தி தம் யதா²வுத்தஜாதிப்பமாணம் சீவரம் த³ஸாஹபரமம் காலம் அதிக்காமயதோ, ஏத்த²ந்தரே யதா² அதிரேகசீவரம் ந ஹோதி ததா² அகுப்³ப³தோ நிஸ்ஸக்³கி³யம் பாசித்தியம், தஞ்ச சீவரம் நிஸ்ஸக்³கி³யம் ஹோதி, பாசித்தியாபத்தி சஸ்ஸ ஹோதீதி அத்தோ². அத² வா நிஸ்ஸஜ்ஜனம் நிஸ்ஸக்³கி³யம், புப்³ப³பா⁴கே³ கத்தப்³ப³ஸ்ஸ வினயகம்மஸ்ஸேதம் நாமம். நிஸ்ஸக்³கி³யமஸ்ஸ அத்தீ²தி நிஸ்ஸக்³கி³யமிச்சேவ. கிந்தம்? பாசித்தியம். தம் அதிக்காமயதோ ஸனிஸ்ஸக்³கி³யவினயகம்மம் பாசித்தியம் ஹோதீதி அயமேத்த² அத்தோ². பத³பா⁴ஜனே பன பட²மம் தாவ அத்த²விகப்பம் த³ஸ்ஸேதும் ‘‘தம் அதிக்காமயதோ நிஸ்ஸக்³கி³யம் ஹோதீ’’தி மாதிகம் ட²பேத்வா ‘‘ஏகாத³ஸே அருணுக்³க³மனே நிஸ்ஸக்³கி³யம் ஹோதி, நிஸ்ஸஜ்ஜிதப்³ப³’’ந்தி வுத்தம். புன யஸ்ஸ ச நிஸ்ஸஜ்ஜிதப்³ப³ம், யதா² ச நிஸ்ஸஜ்ஜிதப்³ப³ம், தம் த³ஸ்ஸேதும் ‘‘ஸங்க⁴ஸ்ஸ வா’’திஆதி³ வுத்தம். தத்த² ஏகாத³ஸே அருணுக்³க³மனேதி ஏத்த² யம் தி³வஸம் சீவரம் உப்பன்னம் தஸ்ஸ யோ அருணோ, ஸோ உப்பன்னதி³வஸனிஸ்ஸிதோ, தஸ்மா சீவருப்பாத³தி³வஸஏன ஸத்³தி⁴ம் ஏகாத³ஸே அருணுக்³க³மனே நிஸ்ஸக்³கி³யம் ஹோதீதி வேதி³தப்³ப³ம். ஸசேபி ப³ஹூனி ஏகஜ்ஜ²ம் ப³ந்தி⁴த்வா வா வேடே²த்வா வா ட²பிதானி ஏகாவ ஆபத்தி. அப³த்³தா⁴வேடி²தேஸு வத்து²க³ணனாய ஆபத்தியோ.

நிஸ்ஸஜ்ஜித்வா ஆபத்தி தே³ஸேதப்³பா³தி கத²ம் தே³ஸேதப்³பா³? யதா² க²ந்த⁴கே வுத்தம், கத²ஞ்ச தத்த² வுத்தம்? ஏவம் வுத்தம் – ‘‘தேன, பி⁴க்க²வே, பி⁴க்கு²னா ஸங்க⁴ம் உபஸங்கமித்வா ஏகம்ஸம் உத்தராஸங்க³ம் கரித்வா வுட்³டா⁴னம் பி⁴க்கூ²னம் பாதே³ வந்தி³த்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸ வசனீயோ – ‘அஹம், ப⁴ந்தே, இத்த²ன்னாமம் ஆபத்திம் ஆபன்னோ, தம் படிதே³ஸேமீ’’’தி (சூளவ. 239). இத⁴ பன ஸசே ஏகம் சீவரம் ஹோதி ‘‘ஏகம் நிஸ்ஸக்³கி³யம் பாசித்திய’’ந்தி வத்தப்³ப³ம். ஸசே த்³வே, ‘‘த்³வே’’தி வத்தப்³ப³ம். ஸசே ப³ஹூனி ‘‘ஸம்ப³ஹுலானீ’’தி வத்தப்³ப³ம். நிஸ்ஸஜ்ஜனேபி ஸசே ஏகம் யதா²பாளிமேவ ‘‘இத³ம் மே, ப⁴ந்தே, சீவர’’ந்தி வத்தப்³ப³ம். ஸசே த்³வே வா ப³ஹூனி வா, ‘‘இமானி மே, ப⁴ந்தே, சீவரானி த³ஸாஹாதிக்கந்தானி நிஸ்ஸக்³கி³யானி, இமானாஹம் ஸங்க⁴ஸ்ஸ நிஸ்ஸஜ்ஜாமீ’’தி வத்தப்³ப³ம். பாளிம் வத்தும் அஸக்கோந்தேன அஞ்ஞதா²பி வத்தப்³ப³ம்.

ப்³யத்தேன பி⁴க்கு²னா படிப³லேன ஆபத்தி படிக்³க³ஹேதப்³பா³தி க²ந்த⁴கே வுத்தனயேனேவ படிக்³க³ஹேதப்³பா³. ஏவஞ்ஹி தத்த² வுத்தம் – ‘‘ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

‘ஸுணாது மே ப⁴ந்தே ஸங்கோ⁴, அயம் இத்த²ன்னாமோ பி⁴க்கு² ஆபத்திம் ஸரதி விவரதி உத்தானிம் கரோதி தே³ஸேதி, யதி³ ஸங்க⁴ஸ்ஸ பத்தகல்லம், அஹம் இத்த²ன்னாமஸ்ஸ பி⁴க்கு²னோ ஆபத்திம் படிக்³க³ண்ஹேய்ய’ந்தி.

தேன வத்தப்³போ³ ‘பஸ்ஸஸீ’தி? ‘ஆம, பஸ்ஸாமீ’தி. ஆயதிம் ஸம்வரேய்யாஸீ’’தி (சூளவ. 239). த்³வீஸு பன ஸம்ப³ஹுலாஸு வா புரிமனயேனேவ வசனபே⁴தோ³ ஞாதப்³போ³.

சீவரதா³னேபி ‘‘ஸங்கோ⁴ இமம் சீவரம் இமானி சீவரானீ’’தி வத்து²வஸேன வசனபே⁴தோ³ வேதி³தப்³போ³. க³ணஸ்ஸ ச புக்³க³லஸ்ஸ ச நிஸ்ஸஜ்ஜனேபி ஏஸேவ நயோ.

ஆபத்திதே³ஸனாபடிக்³க³ஹணேஸு பனேத்த² அயம் பாளி – ‘‘தேன, பி⁴க்க²வே, பி⁴க்கு²னா ஸம்ப³ஹுலே பி⁴க்கூ² உபஸங்கமித்வா ஏகம்ஸம் உத்தராஸங்க³ம் கத்வா வுட்³டா⁴னம் பி⁴க்கூ²னம் பாதே³ வந்தி³த்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸு வசனீயா – ‘அஹம், ப⁴ந்தே, இத்த²ன்னாமம் ஆபத்திம் ஆபன்னோ தம் படிதே³ஸேமீ’தி. ப்³யத்தேன பி⁴க்கு²னா படிப³லேன தே பி⁴க்கூ² ஞாபேதப்³பா³ –

‘ஸுணந்து மே ஆயஸ்மந்தா, அயம் இத்த²ன்னாமோ பி⁴க்கு² ஆபத்திம் ஸரதி விவரதி உத்தானிம் கரோதி தே³ஸேதி. யதா³யஸ்மந்தானம் பத்தகல்லம், அஹம் இத்த²ன்னாமஸ்ஸ பி⁴க்கு²னோ ஆபத்திம் படிக்³க³ண்ஹேய்ய’ந்தி.

தேன வத்தப்³போ³ ‘பஸ்ஸஸீ’தி? ‘ஆம, பஸ்ஸாமீ’தி. ‘ஆயதிம் ஸம்வரேய்யாஸீ’தி.

தேன பி⁴க்கு²னா ஏகம் பி⁴க்கு²ம் உபஸங்கமித்வா ஏகம்ஸம் உத்தராஸங்க³ம் கரித்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸ வசனீயோ – ‘அஹம், ஆவுஸோ, இத்த²ன்னாமம் ஆபத்திம் ஆபன்னோ தம் படிதே³ஸேமீ’தி. தேன வத்தப்³போ³ ‘பஸ்ஸஸீ’தி, ஆம பஸ்ஸாமீதி ஆயதிம் ஸம்வரேய்யாஸீ’’தி (சூளவ. 239). தத்த² புரிமனயேனேவ ஆபத்தியா நாமக்³க³ஹணம் வசனபே⁴தோ³ ச வேதி³தப்³போ³.

யதா² ச க³ணஸ்ஸ நிஸ்ஸஜ்ஜனே ஏவம் த்³வின்னம் நிஸ்ஸஜ்ஜனேபி பாளி வேதி³தப்³பா³. யதி³ ஹி விஸேஸோ ப⁴வேய்ய, யதே²வ ‘‘அனுஜானாமி, பி⁴க்க²வே, திண்ணன்னம் பாரிஸுத்³தி⁴உபோஸத²ம் காதும், ஏவஞ்ச பன, பி⁴க்க²வே, காதப்³போ³. ப்³யத்தேன பி⁴க்கு²னா படிப³லேன தே பி⁴க்கூ² ஞாபேதப்³பா³’’திஆதி³னா நயேன ‘‘திண்ணன்னம் பாரிஸுத்³தி⁴உபோஸத²ம் காது’’ந்தி வத்வா புன ‘‘அனுஜானாமி, பி⁴க்க²வே, த்³வின்னம் பாரிஸுத்³தி⁴உபோஸத²ம் காதும், ஏவஞ்ச பன, பி⁴க்க²வே, காதப்³போ³. தே²ரேன பி⁴க்கு²னா ஏகம்ஸம் உத்தராஸங்க³’’ந்திஆதி³னா (மஹாவ. 168) நயேன விஸும்யேவ த்³வின்னம் பாரிஸுத்³தி⁴உபோஸதோ² வுத்தோ, ஏவமிதா⁴பி விஸும் பாளிம் வதே³ய்ய, யஸ்மா பன நத்தி², தஸ்மா அவத்வா க³தோதி, க³ணஸ்ஸ வுத்தா பாளியேவேத்த² பாளி.

ஆபத்திபடிக்³க³ஹணே பன அயம் விஸேஸோ, யதா² க³ணஸ்ஸ நிஸ்ஸஜ்ஜித்வா ஆபத்தியா தே³ஸியமானாய ஆபத்திபடிக்³கா³ஹகோ பி⁴க்கு² ஞத்திம் ட²பேதி, ஏவம் அட்ட²பேத்வா த்³வீஸு அஞ்ஞதரேன யதா² ஏகபுக்³க³லோ படிக்³க³ண்ஹாதி, ஏவம் ஆபத்தி படிக்³க³ஹேதப்³பா³. த்³வின்னஞ்ஹி ஞத்திட்ட²பனா நாம நத்தி², யதி³ ஸியா த்³வின்னம் பாரிஸுத்³தி⁴உபோஸத²ம் விஸும் ந வதே³ய்ய.

நிஸ்ஸட்ட²சீவரதா³னேபி யதா² ‘‘இமம் சீவரம் ஆயஸ்மதோ த³ம்மீ’’தி ஏகோ வத³தி, ஏவம் ‘‘இமம் மயம் சீவரம் ஆயஸ்மதோ தே³மா’’தி வத்தும் வட்டதி. இதோ க³ருகதரானி ஹி ஞத்திது³தியகம்மானிபி ‘‘அபலோகேத்வா காதப்³பா³னீ’’தி வுத்தானி அத்தி², தேஸம் ஏதம் அனுலோமம் நிஸ்ஸட்ட²சீவரம் பன தா³தப்³ப³மேவ அதா³தும் ந லப்³ப⁴தி, வினயகம்மமத்தஞ்ஹேதம். ந தம் தேன ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா தி³ன்னமேவ ஹோதீதி.

468. த³ஸாஹாதிக்கந்தே அதிக்கந்தஸஞ்ஞீதி த³ஸாஹம் அதிக்கந்தே சீவரே ‘‘அதிக்கந்தம் இத³’’ந்தி ஏவம்ஸஞ்ஞீ, த³ஸாஹே வா அதிக்கந்தே ‘‘அதிக்கந்தோ த³ஸாஹோ’’தி ஏவம்ஸஞ்ஞீ. நிஸ்ஸக்³கி³யம் பாசித்தியந்தி ந இத⁴ ஸஞ்ஞா ரக்க²தி. யோபி ஏவம்ஸஞ்ஞீ, தஸ்ஸபி தம் சீவரம் நிஸ்ஸக்³கி³யம் பாசித்தியாபத்தி ச. ஸனிஸ்ஸக்³கி³யவினயகம்மம் வா பாசித்தியந்தி உபோ⁴பி அத்த²விகப்பா யுஜ்ஜந்தி. ஏஸ நயோ ஸப்³ப³த்த².

அவிஸ்ஸஜ்ஜிதே விஸ்ஸஜ்ஜிதஸஞ்ஞீதி கஸ்ஸசி அதி³ன்னே அபரிச்சத்தே ‘‘பரிச்சத்தம் மயா’’தி ஏவம்ஸஞ்ஞீ.

அனட்டே² நட்ட²ஸஞ்ஞீதி அத்தனோ சீவரேன ஸத்³தி⁴ம் ப³ஹூனி அஞ்ஞேஸம் சீவரானி ஏகதோ ட²பிதானி சோரா ஹரந்தி. தத்ரேஸ அத்தனோ சீவரே அனட்டே² நட்ட²ஸஞ்ஞீ ஹோதி. ஏஸ நயோ அவினட்டா²தீ³ஸுபி.

அவிலுத்தேதி ஏத்த² பன க³ப்³ப⁴ம் பி⁴ந்தி³த்வா பஸய்ஹாவஹாரவஸேன அவிலுத்தேதி வேதி³தப்³ப³ம்.

அனிஸ்ஸஜ்ஜித்வா பரிபு⁴ஞ்ஜதி ஆபத்தி து³க்கடஸ்ஸாதி ஸகிம் நிவத்த²ம் வா ஸகிம் பாருதம் வா காயதோ அமோசேத்வா தி³வஸம்பி விசரதி, ஏகாவ ஆபத்தி. மோசேத்வா மோசேத்வா நிவாஸேதி வா பாருபதி வா பயோகே³ பயோகே³ து³க்கடம். து³ன்னிவத்த²ம் வா து³ப்பாருதம் வா ஸண்ட²பேந்தஸ்ஸ அனாபத்தி. அஞ்ஞஸ்ஸ தம் பரிபு⁴ஞ்ஜதோபி அனாபத்தி, ‘‘அனாபத்தி அஞ்ஞேன கதம் படிலபி⁴த்வா பரிபு⁴ஞ்ஜதீ’’தி (பாரா. 570) ஆதி³வசனஞ்சேத்த² ஸாத⁴கம். அனதிக்கந்தே அதிக்கந்தஸஞ்ஞினோ வேமதிகஸ்ஸ ச து³க்கடம் பரிபோ⁴க³ம் ஸந்தா⁴ய வுத்தம்.

469. ‘‘அனாபத்தி அந்தோத³ஸாஹம் அதி⁴ட்டே²தி, விகப்பேதீ’’தி ஏத்த² பன அதி⁴ட்டா²னுபக³ம் விகப்பனுபக³ஞ்ச வேதி³தப்³ப³ம். தத்ராயம் பாளி – அத² கோ² பி⁴க்கூ²னம் ஏதத³ஹோஸி – ‘‘யானி தானி ப⁴க³வதா அனுஞ்ஞாதானி ‘திசீவர’ந்தி வா ‘வஸ்ஸிகஸாடிகா’தி வா ‘நிஸீத³ன’ந்தி வா ‘பச்சத்த²ரண’ந்தி வா ‘கண்டு³ப்படிச்சா²தீ³’தி வா முக²புஞ்ச²னசோளகந்தி வா பரிக்கா²ரசோளந்தி வா ஸப்³பா³னி தானி அதி⁴ட்டா²தப்³பா³னீதி நு கோ² உதா³ஹு விகப்பேதப்³பா³னீ’’தி, ப⁴க³வதோ ஏதமத்த²ம் ஆரோசேஸும் –

‘‘அனுஜானாமி, பி⁴க்க²வே, திசீவரம் அதி⁴ட்டா²தும் ந விகப்பேதும்; வஸ்ஸிகஸாடிகம் வஸ்ஸானம் சாதுமாஸம் அதி⁴ட்டா²தும் ததோ பரம் விகப்பேதும்; நிஸீத³னம் அதி⁴ட்டா²தும் ந விகப்பேதும்; பச்சத்த²ரணம் அதி⁴ட்டா²தும் ந விகப்பேதும்; கண்டு³ப்படிச்சா²தி³ம் யாவஆபா³தா⁴ அதி⁴ட்டா²தும் ததோ பரம் விகப்பேதும்; முக²புஞ்ச²னசோளம் அதி⁴ட்டா²தும் ந விகப்பேதும்; பரிக்கா²ரசோளம் அதி⁴ட்டா²தும் ந விகப்பேது’’ந்தி (மஹாவ. 358).

‘‘தத்த² திசீவரம்’’ அதி⁴ட்ட²ஹந்தேன ரஜித்வா கப்பபி³ந்து³ம் த³த்வா பமாணயுத்தமேவ அதி⁴ட்டா²தப்³ப³ம். தஸ்ஸ பமாணம் உக்கட்ட²பரிச்சே²தே³ன ஸுக³தசீவரதோ ஊனகம் வட்டதி, லாமகபரிச்சே²தே³ன ஸங்கா⁴டியா உத்தராஸங்க³ஸ்ஸ ச தீ³க⁴தோ முட்டி²பஞ்சகம் திரியம் முட்டி²த்திகம் பமாணம் வட்டதி. அந்தரவாஸகோ தீ³க⁴தோ முட்டி²பஞ்சகோ திரியம் த்³விஹத்தோ²பி வட்டதி. பாருபணேனபி ஹி ஸக்கா நாபி⁴ம் படிச்சா²தே³துந்தி. வுத்தப்பமாணதோ பன அதிரேகம் ஊனகஞ்ச பரிக்கா²ரசோளந்தி அதி⁴ட்டா²தப்³ப³ம்.

தத்த² யஸ்மா ‘‘த்³வே சீவரஸ்ஸ அதி⁴ட்டா²னா – காயேன வா அதி⁴ட்டே²தி, வாசாய வா அதி⁴ட்டே²தீ’’தி (பரி. 322) வுத்தம், தஸ்மா புராணஸங்கா⁴டிம் ‘‘இமம் ஸங்கா⁴டிம் பச்சுத்³த⁴ராமீ’’தி பச்சுத்³த⁴ரித்வா நவம் ஸங்கா⁴டிம் ஹத்தே²ன க³ஹேத்வா ‘‘இமம் ஸங்கா⁴டிம் அதி⁴ட்டா²மீ’’தி சித்தேன ஆபோ⁴க³ம் கத்வா காயவிகாரம் கரோந்தேன காயேன அதி⁴ட்டா²தப்³பா³. இத³ம் காயேன அதி⁴ட்டா²னம், தம் யேன கேனசி ஸரீராவயவேன அபு²ஸந்தஸ்ஸ ந வட்டதி. வாசாய அதி⁴ட்டா²னே பன வசீபே⁴த³ம் கத்வா வாசாய அதி⁴ட்டா²தப்³பா³. தத்ர து³வித⁴ம் அதி⁴ட்டா²னம் – ஸசே ஹத்த²பாஸே ஹோதி ‘‘இமம் ஸங்கா⁴டிம் அதி⁴ட்டா²மீ’’தி வாசா பி⁴ந்தி³தப்³பா³. அத² அந்தோக³ப்³பே⁴ வா உபரிபாஸாதே³ வா ஸாமந்தவிஹாரே வா ஹோதி ட²பிதட்டா²னம் ஸல்லக்கே²த்வா ‘‘ஏதம் ஸங்கா⁴டிம் அதி⁴ட்டா²மீ’’தி வாசா பி⁴ந்தி³தப்³பா³. ஏஸ நயோ உத்தராஸங்கே³ அந்தரவாஸகே ச. நாமமத்தமேவ ஹி விஸேஸோ. தஸ்மா ஸப்³பா³னி ஸங்கா⁴டிம் உத்தராஸங்க³ம் அந்தரவாஸகந்தி ஏவம் அத்தனோ நாமேனேவ அதி⁴ட்டா²தப்³பா³னி. ஸசே அதி⁴ட்ட²ஹித்வா ட²பிதவத்தே²ஹி ஸங்கா⁴டிஆதீ³னி கரோதி, நிட்டி²தே ரஜனே ச கப்பே ச இமம் ‘‘பச்சுத்³த⁴ராமீ’’தி பச்சுத்³த⁴ரித்வா புன அதி⁴ட்டா²தப்³பா³னி. அதி⁴ட்டி²தேன பன ஸத்³தி⁴ம் மஹந்ததரமேவ து³தியபட்டம் வா க²ண்ட³ம் வா ஸம்ஸிப்³ப³ந்தேன புன அதி⁴ட்டா²தப்³ப³மேவ. ஸமே வா கு²த்³த³கே வா அதி⁴ட்டா²னகிச்சம் நத்தி².

திசீவரம் பன பரிக்கா²ரசோளம் அதி⁴ட்டா²தும் வட்டதி ந வட்டதீதி? மஹாபது³மத்தே²ரோ கிராஹ – ‘‘திசீவரம் திசீவரமேவ அதி⁴ட்டா²தப்³ப³ம். ஸசே பரிக்கா²ரசோளாதி⁴ட்டா²னம் லபே⁴ய்ய உதோ³ஸிதஸிக்கா²பதே³ பரிஹாரோ நிரத்த²கோ ப⁴வேய்யா’’தி. ஏவம் வுத்தே கிர அவஸேஸா பி⁴க்கூ² ஆஹம்ஸு – ‘‘பரிக்கா²ரசோளம்பி ப⁴க³வதாவ அதி⁴ட்டா²தப்³ப³ந்தி வுத்தம், தஸ்மா வட்டதீ’’தி. மஹாபச்சரியம்பி வுத்தம் ‘‘பரிக்கா²ரசோளம் நாம பாடேக்கம் நிதா⁴னமுக²மேதந்தி திசீவரம் பரிக்கா²ரசோளந்தி அதி⁴ட்ட²ஹித்வா பரிபு⁴ஞ்ஜிதும் வட்டதி. உதோ³ஸிதஸிக்கா²பதே³ பன திசீவரம் அதி⁴ட்ட²ஹித்வா பரிஹரந்தஸ்ஸ பரிஹாரோ வுத்தோ’’தி. உப⁴தோவிப⁴ங்க³பா⁴ணகோ புண்ணவாலிகவாஸீ மஹாதிஸ்ஸத்தே²ரோபி கிர ஆஹ – ‘‘மயம் புப்³பே³ மஹாதே²ரானம் அஸ்ஸும்ஹ, அரஞ்ஞவாஸினோ பி⁴க்கூ² ருக்க²ஸுஸிராதீ³ஸு சீவரம் ட²பேத்வா பதா⁴னம் பத³ஹனத்தா²ய க³ச்ச²ந்தி. ஸாமந்தவிஹாரே த⁴ம்மஸவனத்தா²ய க³தானஞ்ச நேஸம் ஸூரியே உட்டி²தே ஸாமணேரா வா த³ஹரபி⁴க்கூ² வா பத்தசீவரம் க³ஹேத்வா க³ச்ச²ந்தி, தஸ்மா ஸுக²பரிபோ⁴க³த்த²ம் திசீவரம் பரிக்கா²ரசோளந்தி அதி⁴ட்டா²தும் வட்டதீ’’தி. மஹாபச்சரியம்பி வுத்தம் புப்³பே³ ஆரஞ்ஞிகா பி⁴க்கூ² அப³த்³த⁴ஸீமாயம் து³ப்பரிஹாரந்தி திசீவரம் பரிக்கா²ரசோளமேவ அதி⁴ட்ட²ஹித்வா பரிபு⁴ஞ்ஜிம்ஸூ’’தி.

‘‘வஸ்ஸிகஸாடிகா’’ அனதிரித்தப்பமாணா நாமம் க³ஹேத்வா வுத்தனயேனேவ சத்தாரோ வஸ்ஸிகே மாஸே அதி⁴ட்டா²தப்³பா³, ததோ பரம் பச்சுத்³த⁴ரித்வா விகப்பேதப்³பா³. வண்ணபே⁴த³மத்தரத்தாபி சேஸா வட்டதி. த்³வே பன ந வட்டந்தி. ‘‘நிஸீத³னம்’’ வுத்தனயேன அதி⁴ட்டா²தப்³ப³மேவ, தஞ்ச கோ² பமாணயுத்தம் ஏகமேவ, த்³வே ந வட்டந்தி. ‘‘பச்சத்த²ரண’’ம்பி அதி⁴ட்டா²தப்³ப³மேவ, தம் பன மஹந்தம்பி வட்டதி, ஏகம்பி வட்டதி, ப³ஹூனிபி வட்டந்தி. நீலம்பி பீதகம்பி ஸத³ஸம்பி புப்ப²த³ஸம்பீதி ஸப்³ப³ப்பகாரம் வட்டதி. ஸகிம் அதி⁴ட்டி²தம் அதி⁴ட்டி²தமேவ ஹோதி. ‘‘கண்டு³ப்படிச்சா²தி³’’ யாவ ஆபா³தோ⁴ அத்தி², தாவ பமாணிகா அதி⁴ட்டா²தப்³பா³. ஆபா³தே⁴ வூபஸந்தே பச்சுத்³த⁴ரித்வா விகப்பேதப்³பா³, ஏகாவ வட்டதி. ‘‘முக²புஞ்ச²னசோளம்’’ அதி⁴ட்டா²தப்³ப³மேவ, யாவ ஏகம் தோ⁴வியதி, தாவ அஞ்ஞம் பரிபோ⁴க³த்தா²ய இச்சி²தப்³ப³ந்தி த்³வே வட்டந்தி. அபரே பன தே²ரா ‘‘நிதா⁴னமுக²மேதம் ப³ஹூனிபி வட்டந்தீ’’தி வத³ந்தி. பரிக்கா²ரசோளே க³ணனா நத்தி², யத்தகம் இச்ச²தி தத்தகம் அதி⁴ட்டா²தப்³ப³மேவ. த²விகாபி பரிஸ்ஸாவனம்பி விகப்பனுபக³ம் பச்சி²மசீவரப்பமாணம் ‘‘பரிக்கா²ரசோளக’’ந்தி அதி⁴ட்டா²தப்³ப³மேவ. ப³ஹூனி ஏகதோ கத்வா ‘‘இமானி சீவரானி பரிக்கா²ரசோளானி அதி⁴ட்டா²மீ’’தி அதி⁴ட்டா²தும்பி வட்டதியேவ. பே⁴ஸஜ்ஜனவகம்மமாதாபிதுஆதீ³னம் அத்தா²ய ட²பேந்தேனபி அதி⁴ட்டா²தப்³ப³மேவ. மஹாபச்சரியம் பன ‘‘அனாபத்தீ’’தி வுத்தம். மஞ்சபி⁴ஸி பீட²கபி⁴ஸி பி³ம்போ³ஹனம் பாவாரோ கோஜவோதி ஏதேஸு பன ஸேனாஸனபரிக்கா²ரத்தா²ய தி³ன்னபச்சத்த²ரணே ச அதி⁴ட்டா²னகிச்சம் நத்தி²யேவ.

அதி⁴ட்டி²தசீவரம் பன பரிபு⁴ஞ்ஜதோ கத²ம் அதி⁴ட்டா²னம் விஜஹதீதி? அஞ்ஞஸ்ஸ தா³னேன, அச்சி²ந்தி³த்வா க³ஹணேன, விஸ்ஸாஸக்³கா³ஹேன, ஹீனாயாவத்தனேன, ஸிக்கா²பச்சக்கா²னேன, காலம்கிரியாய, லிங்க³பரிவத்தனேன, பச்சுத்³த⁴ரணேன, சி²த்³த³பா⁴வேனாதி இமேஹி நவஹி காரணேஹி விஜஹதி. தத்த² புரிமேஹி அட்ட²ஹி ஸப்³ப³சீவரானி அதி⁴ட்டா²னம் விஜஹந்தி, சி²த்³த³பா⁴வேன பன திசீவரஸ்ஸேவ ஸப்³ப³அட்ட²கதா²ஸு அதி⁴ட்டா²னவிஜஹனம் வுத்தம், தஞ்ச நக²பிட்டி²ப்பமாணேன சி²த்³தே³ன. தத்த² நக²பிட்டி²ப்பமாணம் கனிட்ட²ங்கு³லினக²வஸேன வேதி³தப்³ப³ம், சி²த்³த³ஞ்ச வினிப்³பி³த்³த⁴சி²த்³த³மேவ. சி²த்³த³ஸ்ஸ ஹி அப்³ப⁴ந்தரே ஏகதந்து சேபி அச்சி²ன்னோ ஹோதி, ரக்க²தி. தத்த² ஸங்கா⁴டியா ச உத்தராஸங்க³ஸ்ஸ ச தீ³க⁴ந்ததோ வித³த்தி²ப்பமாணஸ்ஸ திரியந்ததோ அட்ட²ங்கு³லப்பமாணஸ்ஸ பதே³ஸஸ்ஸ ஓரதோ சி²த்³த³ம் அதி⁴ட்டா²னம் பி⁴ந்த³தி, பரதோ ந பி⁴ந்த³தி. அந்தரவாஸகஸ்ஸ பன தீ³க⁴ந்ததோ வித³த்தி²ப்பமாணஸ்ஸேவ திரியந்ததோ சதுரங்கு³லப்பமாணஸ்ஸ பதே³ஸஸ்ஸ ஓரதோ சி²த்³த³ம் அதி⁴ட்டா²னம் பி⁴ந்த³தி, பரதோ ந பி⁴ந்த³தி. தஸ்மா ஜாதே சி²த்³தே³ தம் சீவரம் அதிரேகசீவரட்டா²னே திட்ட²தி, ஸூசிகம்மம் கத்வா புன அதி⁴ட்டா²தப்³ப³ம். மஹாஸுமத்தே²ரோ பனாஹ – ‘‘பமாணசீவரஸ்ஸ யத்த² கத்த²சி சி²த்³த³ம் அதி⁴ட்டா²னம் பி⁴ந்த³தி, மஹந்தஸ்ஸ பன பமாணதோ ப³ஹி சி²த்³த³ம் அதி⁴ட்டா²னம் ந பி⁴ந்த³தி, அந்தோஜாதம் பி⁴ந்த³தீ’’தி. கரவீகதிஸ்ஸத்தே²ரோ ஆஹ – ‘‘கு²த்³த³கம் மஹந்தம் ந பமாணம், த்³வே சீவரானி பாருபந்தஸ்ஸ வாமஹத்தே² ஸங்க⁴ரித்வா ட²பிதட்டா²னே சி²த்³த³ம் அதி⁴ட்டா²னம் ந பி⁴ந்த³தி, ஓரபா⁴கே³ பி⁴ந்த³தி. அந்தரவாஸகஸ்ஸபி ஓவட்டிகம் கரோந்தேன ஸங்க⁴ரிதட்டா²னே சி²த்³த³ம் ந பி⁴ந்த³தி, ததோ ஓரம் பி⁴ந்த³தீ’’தி. அந்த⁴கட்ட²கதா²யம் பன திசீவரே மஹாஸுமத்தே²ரவாத³ம் பமாணம் கத்வா உத்தரிம்பி இத³ம் வுத்தம் ‘‘பச்சி²மப்பமாணம் அதி⁴ட்டா²னம் ரக்க²தீ’’தி. பரிக்கா²ரசோளே தீ³க⁴ஸோ அட்ட²ங்கு³லே ஸுக³தங்கு³லேன திரியம் சதுரங்கு³லே யத்த² கத்த²சி சி²த்³த³ம் அதி⁴ட்டா²னம் விஜஹதி. மஹந்தே சோளே ததோ பரேன சி²த்³த³ம் அதி⁴ட்டா²னம் ந விஜஹதி. ஏஸ நயோ ஸப்³பே³ஸு அதி⁴ட்டா²தப்³ப³கேஸு சீவரேஸூ’’தி.

தத்த² யஸ்மா ஸப்³பே³ஸம்பி அதி⁴ட்டா²தப்³ப³கசீவரானம் விகப்பனுபக³பச்சி²மப்பமாணதோ அஞ்ஞம் பச்சி²மப்பமாணம் நாம நத்தி², யஞ்ஹி நிஸீத³ன-கண்டு³ப்படிச்சா²தி³-வஸ்ஸிகஸாடிகானம் பமாணம் வுத்தம், தம் உக்கட்ட²ம், ததோ உத்தரி படிஸித்³த⁴த்தா ந பச்சி²மம் ததோ ஹேட்டா² அப்படிஸித்³த⁴த்தா. திசீவரஸ்ஸாபி ஸுக³தசீவரப்பமாணதோ ஊனகத்தம் உக்கட்ட²ப்பமாணமேவ. பச்சி²மம் பன விஸும் ஸுத்தே வுத்தம் நத்தி². முக²புஞ்ச²னபச்சத்த²ரணபரிக்கா²ரசோளானம் உக்கட்ட²பரிச்சே²தோ³ நத்தி²யேவ. விகப்பனுபக³பச்சி²மேன பன பச்சி²மபரிச்சே²தோ³ வுத்தோ. தஸ்மா யம் தாவ அந்த⁴கட்ட²கதா²யம் ‘‘பச்சி²மப்பமாணம் அதி⁴ட்டா²னம் ரக்க²தீ’’தி வத்வா தத்த² பரிக்கா²ரசோளஸ்ஸேவ ஸுக³தங்கு³லேன அட்ட²ங்கு³லசதுரங்கு³லபச்சி²மப்பமாணம் த³ஸ்ஸேத்வா இதரேஸம் திசீவராதீ³னம் முட்டி²பஞ்சகாதி³பபே⁴த³ம் பச்சி²மப்பமாணம் ஸந்தா⁴ய ‘‘ஏஸ நயோ ஸப்³பே³ஸு அதி⁴ட்டா²தப்³ப³கேஸுசீவரேஸூ’’தி வுத்தம், தம் ந ஸமேதி.

கரவீகதிஸ்ஸத்தே²ரவாதே³பி தீ³க⁴ந்ததோயேவ சி²த்³த³ம் த³ஸ்ஸிதம், திரியந்ததோ ந த³ஸ்ஸிதம், தஸ்மா ஸோ அபரிச்சி²ன்னோ. மஹாஸுமத்தே²ரவாதே³ ‘‘பமாணசீவரஸ்ஸ யத்த² கத்த²சி சி²த்³த³ம் அதி⁴ட்டா²னம் பி⁴ந்த³தி, மஹந்தஸ்ஸ பன பமாணதோ ப³ஹி சி²த்³த³ம் அதி⁴ட்டா²னம் ந பி⁴ந்த³தீ’’தி வுத்தம். இத³ம் பன ந வுத்தம் – ‘‘இத³ம் நாம பமாணசீவரம் இதோ உத்தரி மஹந்தம் சீவர’’ந்தி. அபிசேத்த² திசீவராதீ³னம் முட்டி²பஞ்சகாதி³பே⁴த³ம் பச்சி²மப்பமாணந்தி அதி⁴ப்பேதம். தத்த² யதி³ பச்சி²மப்பமாணதோ ப³ஹி சி²த்³த³ம் அதி⁴ட்டா²னம் ந பி⁴ந்தே³ய்ய, உக்கட்ட²பத்தஸ்ஸாபி மஜ்ஜி²மபத்தஸ்ஸ வா ஓமகப்பமாணதோ ப³ஹி சி²த்³த³ம் அதி⁴ட்டா²னம் ந பி⁴ந்தே³ய்ய, ந ச ந பி⁴ந்த³தி. தஸ்மா அயம்பி வாதோ³ அபரிச்சி²ன்னோ.

யோ பனாயம் ஸப்³ப³பட²மோ அட்ட²கதா²வாதோ³, அயமேவேத்த² பமாணம். கஸ்மா? பரிச்சே²த³ஸப்³பா⁴வதோ. திசீவரஸ்ஸ ஹி பச்சி²மப்பமாணஞ்ச சி²த்³த³ப்பமாணஞ்ச சி²த்³து³ப்பத்திதே³ஸப்பமாணஞ்ச ஸப்³ப³அட்ட²கதா²ஸுயேவ பரிச்சி²ந்தி³த்வா வுத்தம், தஸ்மா ஸ்வேவ வாதோ³ பமாணம். அத்³தா⁴ ஹி ஸோ ப⁴க³வதோ அதி⁴ப்பாயம் அனுக³ந்த்வா வுத்தோ. இதரேஸு பன நேவ பரிச்சே²தோ³ அத்தி², ந புப்³பா³பரம் ஸமேதீதி.

யோ பன து³ப்³ப³லட்டா²னே பட²மம் அக்³க³ளம் த³த்வா பச்சா² து³ப்³ப³லட்டா²னம் சி²ந்தி³த்வா அபனேதி, அதி⁴ட்டா²னம் ந பி⁴ஜ்ஜதி. மண்ட³லபரிவத்தனேபி ஏஸேவ நயோ. து³பட்டஸ்ஸ ஏகஸ்மிம் படலே சி²த்³தே³ வா ஜாதே க³ளிதே வா அதி⁴ட்டா²னம் ந பி⁴ஜ்ஜதி, கு²த்³த³கம் சீவரம் மஹந்தம் கரோதி, மஹந்தம் வா கு²த்³த³கம் கரோதி, அதி⁴ட்டா²னம் ந பி⁴ஜ்ஜதி. உபோ⁴ கோடியோ மஜ்ஜே² கரோந்தோ ஸசே பட²மம் சி²ந்தி³த்வா பச்சா² க⁴டேதி, அதி⁴ட்டா²னம் பி⁴ஜ்ஜதி. அத² க⁴டேத்வா சி²ந்த³தி, ந பி⁴ஜ்ஜதி, ரஜகேஹி தோ⁴வாபேத்வா ஸேதம் காராபேந்தஸ்ஸாபி அதி⁴ட்டா²னம் அதி⁴ட்டா²னமேவாதி. அயம் தாவ ‘‘அந்தோத³ஸாஹம் அதி⁴ட்டே²தி விகப்பேதீ’’தி ஏத்த² அதி⁴ட்டா²னே வினிச்ச²யோ.

விகப்பனே பன த்³வே விகப்பனா – ஸம்முகா²விகப்பனா ச பரம்முகா²விகப்பனா ச. கத²ம் ஸம்முகா²விகப்பனா ஹோதீதி? சீவரானம் ஏகப³ஹுபா⁴வம் ஸன்னிஹிதாஸன்னிஹிதபா⁴வஞ்ச ஞத்வா ‘‘‘இமம் சீவர’ந்தி வா ‘இமானி சீவரானீ’தி வா ‘ஏதம் சீவர’ந்தி வா ‘ஏதானி சீவரானீ’’’தி வா ‘‘துய்ஹம் விகப்பேமீ’’தி வத்தப்³ப³ம், அயமேகா ஸம்முகா²விகப்பனா. ஏத்தாவதா நிதே⁴தும் வட்டதி, பரிபு⁴ஞ்ஜிதும் பன விஸ்ஸஜ்ஜேதும் வா அதி⁴ட்டா²தும் வா ந வட்டதி. ‘‘மய்ஹம் ஸந்தகம், மய்ஹம் ஸந்தகானி பரிபு⁴ஞ்ஜ வா விஸ்ஸஜ்ஜேஹி வா யதா²பச்சயம் வா கரோஹீ’’தி ஏவம் பன வுத்தே பச்சுத்³தா⁴ரோ நாம ஹோதி. ததோபபு⁴தி பரிபோ⁴கா³த³யோபி வட்டந்தி.

அபரோபி நயோ – ததே²வ சீவரானம் ஏகப³ஹுபா⁴வம் ஸன்னிஹிதாஸன்னிஹிதபா⁴வஞ்ச ஞத்வா தஸ்ஸேவ பி⁴க்கு²னோ ஸந்திகே ‘‘‘இமம் சீவர’ந்தி வா ‘இமானி சீவரானீ’தி வா ‘ஏதம் சீவர’ந்தி வா ‘ஏதானி சீவரானீ’’’தி வா வத்வா பஞ்சஸு ஸஹத⁴ம்மிகேஸு அஞ்ஞதரஸ்ஸ அத்தனா அபி⁴ருசிதஸ்ஸ யஸ்ஸ கஸ்ஸசி நாமம் க³ஹேத்வா ‘‘‘திஸ்ஸஸ்ஸ பி⁴க்கு²னோ விகப்பேமீ’தி வா ‘திஸ்ஸாய பி⁴க்கு²னியா, ஸிக்க²மானாய, திஸ்ஸஸ்ஸ ஸாமணேரஸ்ஸ, திஸ்ஸாய ஸாமணேரியா விகப்பேமீ’’’தி வா வத்தப்³ப³ம், அயம் அபராபி ஸம்முகா²விகப்பனா. ஏத்தாவதா நிதே⁴தும் வட்டதி, பரிபோ⁴கா³தீ³ஸு பன ஏகம்பி ந வட்டதி. தேன பன பி⁴க்கு²னா ‘‘திஸ்ஸஸ்ஸ பி⁴க்கு²னோ ஸந்தகம்…பே… திஸ்ஸாய ஸாமணேரியா ஸந்தகம் பரிபு⁴ஞ்ஜ வா விஸ்ஸஜ்ஜேஹி வா யதா²பச்சயம் வா கரோஹீ’’தி வுத்தே பச்சுத்³தா⁴ரோ நாம ஹோதி. ததோபபு⁴தி பரிபோ⁴கா³த³யோபி வட்டந்தி.

கத²ம் பரம்முகா²விகப்பனா ஹோதீதி? சீவரானம் ததே²வ ஏகப³ஹுபா⁴வம் ஸன்னிஹிதாஸன்னிஹிதபா⁴வஞ்ச ஞத்வா ‘‘‘இமம் சீவர’ந்தி வா ‘இமானி சீவரானீ’தி வா ‘ஏதம் சீவர’ந்தி வா ‘ஏதானி சீவரானீ’’’தி வா வத்வா ‘‘துய்ஹம் விகப்பனத்தா²ய த³ம்மீ’’தி வத்தப்³ப³ம். தேன வத்தப்³போ³ – ‘‘கோ தே மித்தோ வா ஸந்தி³ட்டோ² வா’’தி? ததோ இதரேன புரிமனயேனேவ ‘‘திஸ்ஸோ பி⁴க்கூ²தி வா…பே… திஸ்ஸா ஸாமணேரீ’’தி வா வத்தப்³ப³ம். புன தேன பி⁴க்கு²னா ‘‘அஹம் திஸ்ஸஸ்ஸ பி⁴க்கு²னோ த³ம்மீதி வா…பே… திஸ்ஸாய ஸாமணேரியா த³ம்மீ’’தி வா வத்தப்³ப³ம், அயம் பரம்முகா²விகப்பனா. ஏத்தாவதா நிதே⁴தும் வட்டதி, பரிபோ⁴கா³தீ³ஸு பன ஏகம்பி ந வட்டதி. தேன பன பி⁴க்கு²னா து³தியஸம்முகா²விகப்பனாயம் வுத்தனயேனேவ ‘‘இத்த²ன்னாமஸ்ஸ ஸந்தகம் பரிபு⁴ஞ்ஜ வா விஸ்ஸஜ்ஜேஹி வா யதா²பச்சயம் வா கரோஹீ’’தி வுத்தே பச்சுத்³தா⁴ரோ நாம ஹோதி. ததோபபு⁴தி பரிபோ⁴கா³த³யோபி வட்டந்தி.

த்³வின்னம் விகப்பனானம் கிம் நானாகரணம்? ஸம்முகா²விகப்பனாயம் ஸயம் விகப்பேத்வா பரேன பச்சுத்³த⁴ராபேதி. பரம்முகா²விகப்பனாய பரேனேவ விகப்பாபேத்வா பரேனேவ பச்சுத்³த⁴ராபேதி, இத³மேத்த² நானாகரணம். ஸசே பன யஸ்ஸ விகப்பேதி, ஸோ பஞ்ஞத்திகோவிதோ³ ந ஹோதி, ந ஜானாதி பச்சுத்³த⁴ரிதும், தம் சீவரம் க³ஹேத்வா அஞ்ஞஸ்ஸ ப்³யத்தஸ்ஸ ஸந்திகம் க³ந்த்வா புன விகப்பேத்வா பச்சுத்³த⁴ராபேதப்³ப³ம். விகப்பிதவிகப்பனா நாமேஸா வட்டதி. அயம் ‘‘விகப்பேதீ’’தி இமஸ்மிம் பதே³ வினிச்ச²யோ.

‘‘அனுஜானாமி, பி⁴க்க²வே, திசீவரம் அதி⁴ட்டா²தும் ந விகப்பேது’’ந்திஆதி³வசனதோ ச இத³ம் ‘‘விகப்பேதீ’’தி அவிஸேஸேன வுத்தவசனம் விருத்³த⁴ம் விய தி³ஸ்ஸதி, ந ச விருத்³த⁴ம் ததா²க³தா பா⁴ஸந்தி. தஸ்மா ஏவமஸ்ஸ அத்தோ² வேதி³தப்³போ³, திசீவரம் திசீவரஸங்கே²பேனேவ பரிஹரதோ அதி⁴ட்டா²துமேவ அனுஜானாமி, ந விகப்பேதும். வஸ்ஸிகஸாடிகம் பன சாதுமாஸதோ பரம் விகப்பேதுமேவ ந அதி⁴ட்டா²தும். ஏவஞ்ச ஸதி யோ திசீவரே ஏகேன சீவரேன விப்பவஸிதுகாமோ ஹோதி, தஸ்ஸ திசீவராதி⁴ட்டா²னம் பச்சுத்³த⁴ரித்வா விப்பவாஸஸுக²த்த²ம் விகப்பனாய ஓகாஸோ தி³ன்னோ ஹோதி. த³ஸாஹாதிக்கமே ச அனாபத்தீதி ஏதேனுபாயேன ஸப்³ப³த்த² விகப்பனாய அப்படிஸித்³த⁴பா⁴வோ வேதி³தப்³போ³.

விஸ்ஸஜ்ஜேதீதி அஞ்ஞஸ்ஸ தே³தி. கத²ம் பன தி³ன்னம் ஹோதி, கத²ம் க³ஹிதம்? ‘‘இமம் துய்ஹம் தே³மி த³தா³மி த³ஜ்ஜாமி ஓணோஜேமி பரிச்சஜாமி நிஸ்ஸஜ்ஜாமி விஸ்ஸஜ்ஜாமீதி வா ‘‘இத்த²ன்னாமஸ்ஸ தே³மி…பே… நிஸ்ஸஜ்ஜாமீ’’தி வா வத³தி, ஸம்முகா²பி பரம்முகா²பி தி³ன்னம்யேவ ஹோதி. ‘‘துய்ஹம் க³ண்ஹாஹீ’’தி வுத்தே ‘‘மய்ஹம் க³ண்ஹாமீ’’தி வத³தி, ஸுதி³ன்னம் ஸுக்³க³ஹிதஞ்ச. ‘‘தவ ஸந்தகம் கரோஹி, தவ ஸந்தகம் ஹோது, தவ ஸந்தகம் கரிஸ்ஸஸீ’’தி வுத்தே ‘‘மம ஸந்தகம் கரோமி, மம ஸந்தகம் ஹோது, மம ஸந்தகம் கரிஸ்ஸாமீ’’தி வத³தி, து³த்³தி³ன்னம் து³க்³க³ஹிதஞ்ச. நேவ தா³தா தா³தும் ஜானாதி, ந இதரோ க³ஹேதும். ஸசே பன ‘‘தவ ஸந்தகம் கரோஹீ’’தி வுத்தே ‘‘ஸாது⁴, ப⁴ந்தே, மய்ஹம் க³ண்ஹாமீ’’தி க³ண்ஹாதி, ஸுக்³க³ஹிதம். ஸசே பன ‘‘ஏகோ க³ண்ஹாஹீ’’தி வத³தி, இதரோ ‘‘ந க³ண்ஹாமீ’’தி புன ஸோ ‘‘தி³ன்னம் மயா துய்ஹம், க³ண்ஹாஹீ’’தி வத³தி, இதரோபி ‘‘ந மய்ஹம் இமினா அத்தோ²’’தி வத³தி. ததோ புரிமோபி ‘‘மயா தி³ன்ன’’ந்தி த³ஸாஹம் அதிக்காமேதி, பச்சி²மோபி ‘‘மயா படிக்கி²த்த’’ந்தி. கஸ்ஸ ஆபத்தீதி? ந கஸ்ஸசி ஆபத்தி. யஸ்ஸ பன ருச்சதி, தேன அதி⁴ட்ட²ஹித்வா பரிபு⁴ஞ்ஜிதப்³ப³ம்.

யோ பன அதி⁴ட்டா²னே வேமதிகோ, தேன கிம் காதப்³ப³ம்? வேமதிகபா⁴வம் ஆரோசேத்வா ஸசே அனதி⁴ட்டி²தம் ப⁴விஸ்ஸதி, ஏவம் மே கப்பியம் ஹோதீதி வத்வா வுத்தனயேனேவ நிஸ்ஸஜ்ஜிதப்³ப³ம். ந ஹி ஏவம் ஜானாபேத்வா வினயகம்மம் கரோந்தஸ்ஸ முஸாவாதோ³ ஹோதி. கேசி பன ‘‘ஏகேன பி⁴க்கு²னா விஸ்ஸாஸம் க³ஹேத்வா புன தி³ன்னம் வட்டதீ’’தி வத³ந்தி, தம் ந யுஜ்ஜதி. ந ஹி தஸ்ஸேதம் வினயகம்மம், நாபி தம் ஏத்தகேன அஞ்ஞம் வத்து²ம் ஹோதி.

நஸ்ஸதீதிஆதி³ உத்தானத்த²மேவ. யோ ந த³தே³ய்ய ஆபத்தி து³க்கடஸ்ஸாதி ஏத்த² ‘‘மய்ஹம் தி³ன்னம் இமினா’’தி இமாய ஸஞ்ஞாய ந தே³ந்தஸ்ஸ து³க்கடம். தஸ்ஸ ஸந்தகபா⁴வம் பன ஞத்வா லேஸேன அச்சி²ந்த³ந்தோ ப⁴ண்ட³ம் அக்³கா⁴பேத்வா காரேதப்³போ³தி.

ஸமுட்டா²னாதீ³ஸு இத³ம் ஸிக்கா²பத³ம் கதி²னஸமுட்டா²னம் நாம காயவாசாதோ ச காயவாசாசித்ததோ ச ஸமுட்டா²தி, அனதி⁴ட்டா²னேன ச அவிகப்பனேன ச ஆபஜ்ஜனதோ அகிரியம், ஸஞ்ஞாய அபா⁴வேபி ந முச்சதி, அஜானந்தோபி ஆபஜ்ஜதீதி நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

பட²மகதி²னஸிக்கா²பத³வண்ணனா நிட்டி²தா.