2. உதோ³ஸிதஸிக்கா²பத³வண்ணனா

471. தேன ஸமயேன பு³த்³தோ⁴ ப⁴க³வாதி உதோ³ஸிதஸிக்கா²பத³ம். தத்த² ஸந்தருத்தரேனாதி அந்தரந்தி அந்தரவாஸகோ வுச்சதி, உத்தரந்தி உத்தராஸங்கோ³, ஸஹ அந்தரேன உத்தரம் ஸந்தருத்தரம், தேன ஸந்தருத்தரேன, ஸஹ அந்தரவாஸகேன உத்தராஸங்கே³னாதி அத்தோ². கண்ணகிதானீதி ஸேதே³ன பு²ட்டோ²காஸேஸு ஸஞ்ஜாதகாளஸேதமண்ட³லானி. அத்³த³ஸ கோ² ஆயஸ்மா ஆனந்தோ³ ஸேனாஸனசாரிகம் ஆஹிண்ட³ந்தோதி தே²ரோ கிர ப⁴க³வதி தி³வா படிஸல்லானத்தா²ய க³ந்த⁴குடிம் பவிட்டே² தம் ஓகாஸம் லபி⁴த்வா து³ன்னிக்கி²த்தானி தா³ருப⁴ண்ட³மத்திகாப⁴ண்டா³னி படிஸாமேந்தோ அஸம்மட்ட²ட்டா²னம் ஸம்மஜ்ஜந்தோ கி³லானேஹி பி⁴க்கூ²ஹி ஸத்³தி⁴ம் படிஸந்தா²ரம் கரோந்தோ தேஸம் பி⁴க்கூ²னம் ஸேனாஸனட்டா²னம் ஸம்பத்தோ அத்³த³ஸ. தேன வுத்தம் – ‘‘அத்³த³ஸ கோ² ஆயஸ்மா ஆனந்தோ³ ஸேனாஸனசாரிகம் ஆஹிண்ட³ந்தோ’’தி.

473. அவிப்பவாஸஸம்முதிம் தா³துந்தி அவிப்பவாஸே ஸம்முதி அவிப்பவாஸஸம்முதி, அவிப்பவாஸாய வா ஸம்முதி அவிப்பவாஸஸம்முதி. கோ பனேத்த² ஆனிஸம்ஸோ? யேன சீவரேன விப்பவஸதி, தம் நிஸ்ஸக்³கி³யம் ந ஹோதி, ஆபத்திஞ்ச நாபஜ்ஜதி. கித்தகம் காலம்? மஹாஸுமத்தே²ரோ தாவ ஆஹ – ‘‘யாவ ரோகோ³ ந வூபஸமதி, வூபஸந்தே பன ரோகே³ ஸீக⁴ம் சீவரட்டா²னம் ஆக³ந்தப்³ப³’’ந்தி. மஹாபது³மத்தே²ரோ ஆஹ – ‘‘ஸீக⁴ம் ஆக³ச்ச²தோ ரோகோ³ படிகுப்பேய்ய, தஸ்மா ஸணிகம் ஆக³ந்தப்³ப³ம். யதோ பட்டா²ய ஹி ஸத்த²ம் வா பரியேஸதி, ‘க³ச்சா²மீ’தி ஆபோ⁴க³ம் வா கரோதி, ததோ பட்டா²ய வட்டதி. ‘ந தா³னி க³மிஸ்ஸாமீ’தி ஏவம் பன து⁴ரனிக்கே²பம் கரோந்தேன பச்சுத்³த⁴ரிதப்³ப³ம், அதிரேகசீவரட்டா²னே ட²ஸ்ஸதீ’’தி. ஸசே பனஸ்ஸ ரோகோ³ படிகுப்பதி, கிம் காதப்³ப³ந்தி? பு²ஸ்ஸதே³வத்தே²ரோ தாவ ஆஹ – ‘‘ஸசே ஸோயேவ ரோகோ³ படிகுப்பதி, ஸா ஏவ ஸம்முதி, புன ஸம்முதிதா³னகிச்சம் நத்தி². அத²ஞ்ஞோ குப்பதி, புன தா³தப்³பா³ ஸம்முதீ’’தி. உபதிஸ்ஸத்தே²ரோ ஆஹ – ‘‘ஸோ வா ரோகோ³ ஹோது, அஞ்ஞோ வா புன ஸம்முதிதா³னகிச்சம் நத்தீ²’’தி.

475-6. நிட்டி²தசீவரஸ்மிம் பி⁴க்கு²னாதி இத⁴ பன புரிமஸிக்கா²பதே³ விய அத்த²ம் அக்³க³ஹேத்வா நிட்டி²தே சீவரஸ்மிம் பி⁴க்கு²னோதி ஏவம் ஸாமிவஸேன கரணவசனஸ்ஸ அத்தோ² வேதி³தப்³போ³. கரணவஸேன ஹி பி⁴க்கு²னா இத³ம் நாம காதப்³ப³ந்தி நத்தி². ஸாமிவஸேன பன பி⁴க்கு²னோ சீவரஸ்மிம் நிட்டி²தே கதி²னே ச உப்³ப⁴தே ஏவம் சி²ன்னபலிபோ³தோ⁴ ஏகரத்தம்பி சே பி⁴க்கு² திசீவரேன விப்பவஸேய்யாதி ஏவம் அத்தோ² யுஜ்ஜதி. தத்த² திசீவரேனாதி அதி⁴ட்டி²தேஸு தீஸு சீவரேஸு யேன கேனசி. ஏகேன விப்பவுத்தோ²பி ஹி திசீவரேன விப்பவுத்தோ² ஹோதி, படிஸித்³த⁴பரியாபன்னேன விப்பவுத்த²த்தா. தேனேவஸ்ஸ பத³பா⁴ஜனே ‘‘ஸங்கா⁴டியா வா’’திஆதி³ வுத்தம். விப்பவஸேய்யாதி விப்பயுத்தோ வஸேய்ய.

477-8. கா³மோ ஏகூபசாரோதிஆதி³ அவிப்பவாஸலக்க²ணவவத்தா²பனத்த²ம் வுத்தம். ததோ பரம் யதா²க்கமேன தானேவ பன்னரஸ மாதிகாபதா³னி வித்தா²ரேந்தோ ‘‘கா³மோ ஏகூபசாரோ நாமா’’திஆதி³மாஹ. தத்த² ஏககுலஸ்ஸ கா³மோதி ஏகஸ்ஸ ரஞ்ஞோ வா போ⁴ஜகஸ்ஸ வா கா³மோ. பரிக்கி²த்தோதி யேன கேனசி பாகாரேன வா வதியா வா பரிக்கா²ய வா பரிக்கி²த்தோ. ஏத்தாவதா ஏககுலகா³மஸ்ஸ ஏகூபசாரதா த³ஸ்ஸிதா. அந்தோகா³மே வத்த²ப்³ப³ந்தி ஏவரூபே கா³மே சீவரம் நிக்கி²பித்வா கா³மப்³ப⁴ந்தரே யதா²ருசிதே டா²னே அருணம் உட்டா²பேதும் வட்டதி. அபரிக்கி²த்தோதி இமினா தஸ்ஸேவ கா³மஸ்ஸ நானூபசாரதா த³ஸ்ஸிதா. ஏவரூபே கா³மே யஸ்மிம் க⁴ரே சீவரம் நிக்கி²த்தம், தத்த² வத்த²ப்³ப³ம். ஹத்த²பாஸா வா ந விஜஹிதப்³ப³ந்தி அத² வா தம் க⁴ரம் ஸமந்ததோ ஹத்த²பாஸா ந விஜஹிதப்³ப³ம், அட்³ட⁴தேய்யரதனப்பமாணப்பதே³ஸா உத்³த⁴ம் ந விஜஹிதப்³ப³ந்தி வுத்தம் ஹோதி. அட்³ட⁴தேய்யரதனப்³ப⁴ந்தரே பன வத்து²ம் வட்டதி. தம் பமாணம் அதிக்கமித்வா ஸசேபி இத்³தி⁴மா பி⁴க்கூ² ஆகாஸே அருணம் உட்டா²பேதி, நிஸ்ஸக்³கி³யமேவ ஹோதி. ஏத்த² ச யஸ்மிம் க⁴ரேதி க⁴ரபரிச்சே²தோ³ ‘‘ஏககுலஸ்ஸ நிவேஸனம் ஹோதீ’’திஆதி³னா (பாரா. 480) லக்க²ணேன வேதி³தப்³போ³.

479. நானாகுலஸ்ஸ கா³மோதி நானாராஜூனம் வா போ⁴ஜகானம் வா கா³மோ, வேஸாலிகுஸினாராதி³ஸதி³ஸோ. பரிக்கி²த்தோதி இமினா நானாகுலகா³மஸ்ஸ ஏகூபசாரதா த³ஸ்ஸிதா. ஸபா⁴யே வா த்³வாரமூலே வாதி ஏத்த² ஸபா⁴யந்தி லிங்க³ப்³யத்தயேன ஸபா⁴ வுத்தா. த்³வாரமூலேதி நக³ரத்³வாரஸ்ஸ ஸமீபே. இத³ம் வுத்தம் ஹோதி – ஏவரூபே கா³மே யஸ்மிம் க⁴ரே சீவரம் நிக்கி²த்தம், தத்த² வா வத்த²ப்³ப³ம். தத்த² ஸத்³த³ஸங்க⁴ட்டனேன வா ஜனஸம்பா³தே⁴ன வா வஸிதும் அஸக்கோந்தேன ஸபா⁴யே வா வத்த²ப்³ப³ம் நக³ரத்³வாரமூலே வா. தத்ரபி வஸிதும் அஸக்கோந்தேன யத்த² கத்த²சி பா²ஸுகட்டா²னே வஸித்வா அந்தோஅருணே ஆக³ம்ம தேஸம்யேவ ஸபா⁴யத்³வாரமூலானம் ஹத்த²பாஸா வா ந விஜஹிதப்³ப³ம். க⁴ரஸ்ஸ பன சீவரஸ்ஸ வா ஹத்த²பாஸே வத்தப்³ப³மேவ நத்தி².

ஸபா⁴யம் க³ச்ச²ந்தேன ஹத்த²பாஸே சீவரம் நிக்கி²பித்வாதி ஸசே க⁴ரே அட்ட²பேத்வா ஸபா⁴யே ட²பேஸ்ஸாமீதி ஸபா⁴யம் க³ச்ச²தி, தேன ஸபா⁴யம் க³ச்ச²ந்தேன ஹத்த²பாஸேதி ஹத்த²ம் பஸாரேத்வா ‘‘ஹந்தி³மம் சீவரம் ட²பேமீ’’தி ஏவம் நிக்கே²பஸுகே² ஹத்த²பாஸக³தே கிஸ்மிஞ்சி ஆபணே சீவரம் நிக்கி²பித்வா புரிமனயேனேவ ஸபா⁴யே வா வத்த²ப்³ப³ம் த்³வாரமூலே வா, ஹத்த²பாஸா வா ந விஜஹிதப்³ப³ம்.

தத்ராயம் வினிச்ச²யோ – பு²ஸ்ஸதே³வத்தே²ரோ தாவ ஆஹ – ‘‘சீவரஹத்த²பாஸே வஸிதப்³ப³ம் நத்தி², யத்த² கத்த²சி வீதி²ஹத்த²பாஸேபி ஸபா⁴யஹத்த²பாஸேபி த்³வாரஹத்த²பாஸேபி வஸிதும் வட்டதீ’’தி. உபதிஸ்ஸத்தே²ரோ பனாஹ – ‘‘நக³ரஸ்ஸ ப³ஹூனிபி த்³வாரானி ஹோந்தி ப³ஹூனிபி ஸபா⁴யானி, தஸ்மா ஸப்³ப³த்த² ந வட்டதி. யஸ்ஸா பன வீதி²யா சீவரம் ட²பிதம் யம் தஸ்ஸா ஸம்முக²ட்டா²னே ஸபா⁴யஞ்ச த்³வாரஞ்ச தஸ்ஸ ஸபா⁴யஸ்ஸ ச த்³வாரஸ்ஸ ச ஹத்த²பாஸா ந விஜஹிதப்³ப³ம். ஏவஞ்ஹி ஸதி ஸக்கா சீவரஸ்ஸ பவத்தி ஜானிது’’ந்தி. ஸபா⁴யம் பன க³ச்ச²ந்தேன யஸ்ஸ ஆபணிகஸ்ஸ ஹத்தே² நிக்கி²த்தம், ஸசே ஸோ தம் சீவரம் அதிஹரித்வா க⁴ரே நிக்கி²பதி, வீதி²ஹத்த²பாஸோ ந ரக்க²தி, க⁴ரஸ்ஸ ஹத்த²பாஸே வத்த²ப்³ப³ம். ஸசே மஹந்தம் க⁴ரம் ஹோதி, த்³வே வீதி²யோ ப²ரித்வா டி²தம் புரதோ வா பச்ச²தோ வா ஹத்த²பாஸேயேவ அருணம் உட்டா²பேதப்³ப³ம். ஸபா⁴யே நிக்கி²பித்வா பன ஸபா⁴யே வா தஸ்ஸ ஸம்முகே² நக³ரத்³வாரமூலே வா தேஸம்யேவ ஹத்த²பாஸே வா அருணம் உட்டா²பேதப்³ப³ம்.

அபரிக்கி²த்தோதிஇமினா தஸ்ஸேவ கா³மஸ்ஸ நானூபசாரதா த³ஸ்ஸிதா. ஏதேனேவுபாயேன ஸப்³ப³த்த² ஏகூபசாரதா ச நானூபசாரதா ச வேதி³தப்³பா³. பாளியம் பன ‘‘கா³மோ ஏகூபசாரோ நாமா’’தி ஏவம் ஆதி³ம்ஹி ‘‘அஜ்ஜோ²காஸோ ஏகூபசாரோ நாமா’’தி ஏவம் அந்தே ச ஏகமேவ மாதிகாபத³ம் உத்³த⁴ரித்வா பத³பா⁴ஜனம் வித்தா²ரிதம். தஸ்மா தஸ்ஸேவ பத³ஸ்ஸானுஸாரேன ஸப்³ப³த்த² பரிக்கே²பாதி³வஸேன ஏகூபசாரதா ச நானூபசாரதா ச வேதி³தப்³பா³.

480-1. நிவேஸனாதீ³ஸு ஓவரகாதி க³ப்³பா⁴னம்யேவேதம் பரியாயவசனம். ஹத்த²பாஸா வாதி க³ப்³ப⁴ஸ்ஸ ஹத்த²பாஸா. த்³வாரமூலே வாதி ஸப்³பே³ஸம் ஸாதா⁴ரணே க⁴ரத்³வாரமூலே. ஹத்த²பாஸா வாதி க³ப்³ப⁴ஸ்ஸ வா க⁴ரத்³வாரமூலஸ்ஸ வா ஹத்த²பாஸா.

482-7. உதோ³ஸிதோதி யானாதீ³னம் ப⁴ண்டா³னம் ஸாலா. இதோ பட்டா²ய ச நிவேஸனே வுத்தனயேனேவ வினிச்ச²யோ வேதி³தப்³போ³. அட்டோதி படிராஜாதி³படிபா³ஹனத்த²ம் இட்ட²காஹி கதோ ப³ஹலபி⁴த்திகோ சதுபஞ்சபூ⁴மிகோ பதிஸ்ஸயவிஸேஸோ. மாளோதி ஏககூடஸங்க³ஹிதோ சதுரஸ்ஸபாஸாதோ³. பாஸாதோ³தி தீ³க⁴பாஸாதோ³. ஹம்மியந்தி முண்ட³ச்ச²த³னபாஸாதோ³.

489. ஸத்தப்³ப⁴ந்தராதிஏத்த² ஏகம் அப்³ப⁴ந்தரம் அட்ட²வீஸதிஹத்த²ம் ஹோதி. ஸசே ஸத்தோ² க³ச்ச²ந்தோ கா³மம் வா நதி³ம் வா பரியாதி³யித்வா திட்ட²தி அந்தோபவிட்டே²ன ஸத்³தி⁴ம் ஏகாப³த்³தோ⁴ ஹுத்வா ஓரஞ்ச பாரஞ்ச ப²ரித்வா டி²தோ ஹோதி, ஸத்த²பரிஹாரோவ லப்³ப⁴தி. அத² கா³மே வா நதி³யா வா பரியாபன்னோ ஹோதி அந்தோபவிட்டோ², கா³மபரிஹாரோ சேவ நதீ³பரிஹாரோ ச லப்³ப⁴தி. ஸசே விஹாரஸீமம் அதிக்கமித்வா திட்ட²தி, அந்தோஸீமாய ச சீவரம் ஹோதி, விஹாரம் க³ந்த்வா வஸிதப்³ப³ம். ஸசே ப³ஹிஸீமாய சீவரம் ஹோதி ஸத்த²ஸமீபேயேவ வஸிதப்³ப³ம். ஸசே க³ச்ச²ந்தோ ஸகடே வா ப⁴க்³கே³ கோ³ணே வா நட்டே² அந்தரா சி²ஜ்ஜதி, யஸ்மிம் கோட்டா²ஸே சீவரம் தத்த² வஸிதப்³ப³ம்.

490. ஏககுலஸ்ஸ கே²த்தே ஹத்த²பாஸோ நாம சீவரஹத்த²பாஸோயேவ, நானாகுலஸ்ஸ கே²த்தே ஹத்த²பாஸோ நாம கே²த்தத்³வாரஸ்ஸ ஹத்த²பாஸோ. அபரிக்கி²த்தே சீவரஸ்ஸேவ ஹத்த²பாஸோ.

491-4. த⁴ஞ்ஞகரணந்தி க²லம் வுச்சதி. ஆராமோதி புப்பா²ராமோ வா ப²லாராமோ வா. த்³வீஸுபி கே²த்தே வுத்தஸதி³ஸோவ வினிச்ச²யோ. விஹாரோ நிவேஸனஸதி³ஸோ. ருக்க²மூலே அந்தோசா²யாயந்தி சா²யாய பு²ட்டோ²காஸஸ்ஸ அந்தோ ஏவ. விரளஸாக²ஸ்ஸ பன ருக்க²ஸ்ஸ ஆதபேன பு²ட்டோ²காஸே ட²பிதம் நிஸ்ஸக்³கி³யமேவ ஹோதி, தஸ்மா தாதி³ஸஸ்ஸ ஸாகா²ச்சா²யாய வா க²ந்த⁴ச்சா²யாய வா ட²பேதப்³ப³ம். ஸசே ஸாகா²ய வா விடபே வா ட²பேதி, உபரி அஞ்ஞஸாகா²ச்சா²யாய பு²ட்டோ²காஸேயேவ ட²பேதப்³ப³ம். கு²ஜ்ஜருக்க²ஸ்ஸ சா²யா தூ³ரம் க³ச்ச²தி, சா²யாய க³தட்டா²னே ட²பேதும் வட்டதியேவ. இதா⁴பி ஹத்த²பாஸோ சீவரஹத்த²பாஸோயேவ.

அகா³மகே அரஞ்ஞேதி அகா³மகம் நாம அரஞ்ஞம் விஞ்ஜா²டவீஆதீ³ஸு வா ஸமுத்³த³மஜ்ஜே² வா மச்ச²ப³ந்தா⁴னம் அக³மனபதே² தீ³பகேஸு லப்³ப⁴தி. ஸமந்தா ஸத்தப்³ப⁴ந்தராதி மஜ்ஜே² டி²தஸ்ஸ ஸமத்தா ஸப்³ப³தி³ஸாஸு ஸத்தப்³ப⁴ந்தரா, வினிப்³பே³தே⁴ன சுத்³த³ஸ ஹோந்தி. மஜ்ஜே² நிஸின்னோ புரத்தி²மாய வா பச்சி²மாய வா தி³ஸாய பரியந்தே ட²பிதசீவரம் ரக்க²தி. ஸசே பன அருணுக்³க³மனஸமயே கேஸக்³க³மத்தம்பி புரத்தி²மம் தி³ஸம் க³ச்ச²தி, பச்சி²மாய தி³ஸாய சீவரம் நிஸ்ஸக்³கி³யம் ஹோதி. ஏஸ நயோ இதரஸ்மிம். உபோஸத²காலே பன பரிஸபரியந்தே நிஸின்னபி⁴க்கு²தோ பட்டா²ய ஸத்தப்³ப⁴ந்தரஸீமா ஸோதே⁴தப்³பா³. யத்தகம் பி⁴க்கு²ஸங்கோ⁴ வட்³ட⁴தி, ஸீமாபி தத்தகம் வட்³ட⁴தி.

495. அனிஸ்ஸஜ்ஜித்வா பரிபு⁴ஞ்ஜதி ஆபத்தி து³க்கடஸ்ஸாதி ஏத்த² ஸசே பதா⁴னிகோ பி⁴க்கு² ஸப்³ப³ரத்திம் பதா⁴னமனுயுஞ்ஜித்வா பச்சுஸஸமயே ‘‘ந்ஹாயிஸ்ஸாமீ’’தி தீணிபி சீவரானி தீரே ட²பேத்வா நதி³ம் ஓதரதி, ந்ஹாயந்தஸ்ஸேவ சஸ்ஸ அருணம் உட்ட²ஹதி, கிம் காதப்³ப³ம். ஸோ ஹி யதி³ உத்தரித்வா சீவரம் நிவாஸேதி, நிஸ்ஸக்³கி³யசீவரம் அனிஸ்ஸஜ்ஜித்வா பரிபு⁴ஞ்ஜனபச்சயா து³க்கடம் ஆபஜ்ஜதி. அத² நக்³கோ³ க³ச்ச²தி, ஏவம்பி து³க்கடம் ஆபஜ்ஜதீதி? ந ஆபஜ்ஜதி. ஸோ ஹி யாவ அஞ்ஞம் பி⁴க்கு²ம் தி³ஸ்வா வினயகம்மம் ந கரோதி, தாவ தேஸம் சீவரானம் அபரிபோ⁴கா³ரஹத்தா நட்ட²சீவரட்டா²னே டி²தோ ஹோதி. நட்ட²சீவரஸ்ஸ ச அகப்பியம் நாம நத்தி². தஸ்மா ஏகம் நிவாஸேத்வா த்³வே ஹத்தே²ன க³ஹேத்வா விஹாரம் க³ந்த்வா வினயகம்மம் காதப்³ப³ம். ஸசே தூ³ரே விஹாரோ ஹோதி, அந்தராமக்³கே³ மனுஸ்ஸா ஸஞ்சரந்தி. ஏகம் நிவாஸேத்வா ஏகம் பாருபித்வா ஏகம் அம்ஸகூடே ட²பேத்வா க³ந்தப்³ப³ம். ஸசே விஹாரே ஸபா⁴க³பி⁴க்கூ² ந பஸ்ஸதி, பி⁴க்கா²சாரம் க³தா ஹோந்தி, ஸங்கா⁴டிம் ப³ஹிகா³மே ட²பேத்வா ஸந்தருத்தரேன ஆஸனஸாலம் க³ந்த்வா வினயகம்மம் காதப்³ப³ம். ஸசே ப³ஹிகா³மே சோரப⁴யம் ஹோதி, பாருபித்வா க³ந்தப்³ப³ம். ஸசே ஆஸனஸாலா ஸம்பா³தா⁴ ஹோதி ஜனாகிண்ணா, ந ஸக்கா ஏகமந்தே சீவரம் அபனேத்வா வினயகம்மம் காதும், ஏகம் பி⁴க்கு²ம் ஆதா³ய ப³ஹிகா³மம் க³ந்த்வா வினயகம்மம் கத்வா சீவரானி பரிபு⁴ஞ்ஜிதப்³பா³னி.

ஸசே பி⁴க்கூ² த³ஹரானம் ஹத்தே² பத்தசீவரம் த³த்வா மக்³க³ம் க³ச்ச²ந்தா பச்சி²மே யாமே ஸயிதுகாமா ஹோந்தி, அத்தனோ அத்தனோ சீவரம் ஹத்த²பாஸே கத்வாவ ஸயிதப்³ப³ம். ஸசே க³ச்ச²ந்தானம்யேவ அஸம்பத்தேஸு த³ஹரேஸு அருணம் உக்³க³ச்ச²தி, சீவரம் நிஸ்ஸக்³கி³யம் ஹோதி, நிஸ்ஸயோ பன ந படிப்பஸ்ஸம்ப⁴தி, த³ஹரானம்பி புரதோ க³ச்ச²ந்தானம் தே²ரேஸு அஸம்பத்தேஸு ஏஸேவ நயோ. மக்³க³ம் விரஜ்ஜி²த்வா அரஞ்ஞே அஞ்ஞமஞ்ஞம் அபஸ்ஸந்தேஸுபி ஏஸேவ நயோ. ஸசே பன த³ஹரா ‘‘மயம், ப⁴ந்தே, முஹுத்தம் ஸயித்வா அஸுகஸ்மிம் நாம ஓகாஸே தும்ஹே ஸம்பாபுணிஸ்ஸாமா’’தி வத்வா யாவ அருணுக்³க³மனா ஸயந்தி, சீவரஞ்ச நிஸ்ஸக்³கி³யம் ஹோதி, நிஸ்ஸயோ ச படிப்பஸ்ஸம்ப⁴தி, த³ஹரே உய்யோஜேத்வா தே²ரேஸு ஸயந்தேஸுபி ஏஸேவ நயோ. த்³வேதா⁴பத²ம் தி³ஸ்வா தே²ரா ‘‘அயம் மக்³கோ³’’ த³ஹரா ‘‘அயம் மக்³கோ³’’தி வத்வா அஞ்ஞமஞ்ஞஸ்ஸ வசனம் அக்³க³ஹேத்வா க³தா, ஸஹ அருணுக்³க³மனா சீவரானி ச நிஸ்ஸக்³கி³யானி ஹோந்தி, நிஸ்ஸயோ ச படிப்பஸ்ஸம்ப⁴தி. ஸசே த³ஹரா மக்³க³தோ ஓக்கம்ம ‘‘அந்தோஅருணேயேவ நிவத்திஸ்ஸாமா’’தி பே⁴ஸஜ்ஜத்தா²ய கா³மம் பவிஸித்வா ஆக³ச்ச²ந்தி. அஸம்பத்தானம்யேவ ச தேஸம் அருணோ உக்³க³ச்ச²தி, சீவரானி நிஸ்ஸக்³கி³யானி ஹோந்தி, நிஸ்ஸயோ பன ந படிப்பஸ்ஸம்ப⁴தி. ஸசே பன தே⁴னுப⁴யேன வா ஸுனக²ப⁴யேன வா ‘‘முஹுத்தம் ட²த்வா க³மிஸ்ஸாமா’’தி ட²த்வா வா நிஸீதி³த்வா வா க³ச்ச²ந்தி, அந்தரா அருணே உக்³க³தே சீவரானி நிஸ்ஸக்³கி³யானி ஹோந்தி, நிஸ்ஸயோ ச படிப்பஸ்ஸம்ப⁴தி. ஸசே ‘‘அந்தோஅருணேயேவ ஆக³மிஸ்ஸாமா’’தி அந்தோஸீமாயம் கா³மம் பவிட்டா²னம் அந்தரா அருணோ உக்³க³ச்ச²தி, நேவ சீவரானி நிஸ்ஸக்³கி³யானி ஹோந்தி, ந நிஸ்ஸயோ படிப்பஸ்ஸம்ப⁴தி. ஸசே பன ‘‘விபா⁴யது தாவா’’தி நிஸீத³ந்தி, அருணே உக்³க³தேபி ந சீவரானி நிஸ்ஸக்³கி³யானி ஹோந்தி, நிஸ்ஸயோ பன படிப்பஸ்ஸம்ப⁴தி. யேபி ‘‘அந்தோஅருணேயேவ ஆக³மிஸ்ஸாமா’’தி ஸாமந்தவிஹாரம் த⁴ம்மஸவனத்தா²ய ஸஉஸ்ஸாஹா க³ச்ச²ந்தி, அந்தராமக்³கே³யேவ ச நேஸம் அருணோ உக்³க³ச்ச²தி, சீவரானி நிஸ்ஸக்³கி³யானி ஹோந்தி, நிஸ்ஸயோ பன ந படிப்பஸ்ஸம்ப⁴தி. ஸசே த⁴ம்மகா³ரவேன ‘‘யாவ பரியோஸானம் ஸுத்வாவ க³மிஸ்ஸாமா’’தி நிஸீத³ந்தி, ஸஹ அருணஸ்ஸுக்³க³மனா சீவரானிபி நிஸ்ஸக்³கி³யானி ஹோந்தி, நிஸ்ஸயோபி படிப்பஸ்ஸம்ப⁴தி. தே²ரேன த³ஹரம் சீவரதோ⁴வனத்தா²ய கா³மகம் பேஸேந்தேன அத்தனோ சீவரம் பச்சுத்³த⁴ரித்வாவ தா³தப்³ப³ம். த³ஹரஸ்ஸாபி சீவரம் பச்சுத்³த⁴ராபேத்வா ட²பேதப்³ப³ம். ஸசே அஸ்ஸதியா க³ச்ச²தி, அத்தனோ சீவரம் பச்சுத்³த⁴ரித்வா த³ஹரஸ்ஸ சீவரம் விஸ்ஸாஸேன க³ஹேத்வா ட²பேதப்³ப³ம். ஸசே தே²ரோ நஸ்ஸரதி, த³ஹரோ ஏவ ஸரதி, த³ஹரேன அத்தனோ சீவரம் பச்சுத்³த⁴ரித்வா தே²ரஸ்ஸ சீவரம் விஸ்ஸாஸேன க³ஹேத்வா க³ந்த்வா வத்தப்³போ³ ‘‘ப⁴ந்தே, தும்ஹாகம் சீவரம் அதி⁴ட்ட²ஹித்வா பரிபு⁴ஞ்ஜதா²’’தி அத்தனோபி சீவரம் அதி⁴ட்டா²தப்³ப³ம். ஏவம் ஏகஸ்ஸ ஸதியாபி ஆபத்திமோக்கோ² ஹோதீதி. ஸேஸம் உத்தானத்த²மேவ.

ஸமுட்டா²னாதீ³ஸு பட²மகதி²னஸிக்கா²பதே³ அனதி⁴ட்டா²னம் அவிகப்பனஞ்ச அகிரியம், இத⁴ அபச்சுத்³த⁴ரணம் அயமேவ விஸேஸோ. ஸேஸம் ஸப்³ப³த்த² வுத்தனயமேவாதி.

உதோ³ஸிதஸிக்கா²பத³வண்ணனா நிட்டி²தா.