1. பட²மஅனியதஸிக்கா²பத³வண்ணனா

443. தேன ஸமயேன பு³த்³தோ⁴ ப⁴க³வாதி பட²மஅனியதஸிக்கா²பத³ம். தத்த² காலயுத்தம் ஸமுல்லபந்தோதி காலம் ஸல்லக்கே²த்வா யதா³ ந அஞ்ஞோ கோசி ஸமீபேன க³ச்ச²தி வா ஆக³ச்ச²தி வா ததா³ தத³னுரூபம் ‘‘கச்சி ந உக்கண்ட²ஸி, ந கிலமஸி, ந சா²தாஸீ’’திஆதி³கம் கே³ஹஸ்ஸிதம் கத²ம் கதே²ந்தோ. காலயுத்தம் த⁴ம்மம் ப⁴ணந்தோதி காலம் ஸல்லக்கே²த்வா யதா³ அஞ்ஞோ கோசி ஸமீபேன க³ச்ச²தி வா ஆக³ச்ச²தி வா ததா³ தத³னுரூபம் ‘‘உபோஸத²ம் கரேய்யாஸி, ஸலாகப⁴த்தம் த³தே³ய்யாஸீ’’திஆதி³கம் த⁴ம்மகத²ம் கதே²ந்தோ.

ப³ஹூ தீ⁴தரோ ச புத்தா ச அஸ்ஸாதி ப³ஹுபுத்தா. தஸ்ஸா கிர த³ஸ புத்தா த³ஸ தீ⁴தரோ அஹேஸும், ப³ஹூ நத்தாரோ அஸ்ஸாதி ப³ஹுனத்தா. யதே²வ ஹி தஸ்ஸா ஏவமஸ்ஸா புத்ததீ⁴தானம்பி வீஸதி வீஸதி தா³ரகா அஹேஸும், இதி ஸா வீஸுத்தரசதுஸதபுத்தனத்தபரிவாரா அஹோஸி. அபி⁴மங்க³லஸம்மதாதி உத்தமமங்க³லஸம்மதா. யஞ்ஞேஸூதி தா³னப்பதா³னேஸு. ச²ணேஸூதி ஆவாஹவிவாஹமங்க³லாதீ³ஸு அந்தருஸ்ஸவேஸு. உஸ்ஸவேஸூதி ஆஸாள்ஹீபவாரணனக்க²த்தாதீ³ஸு மஹுஸ்ஸவேஸு. பட²மம் போ⁴ஜேந்தீதி ‘‘இமேபி தா³ரகா தயா ஸமானாயுகா நிரோகா³ ஹோந்தூ’’தி ஆயாசந்தா பட²மம்யேவ போ⁴ஜேந்தி, யேபி ஸத்³தா⁴ ஹோந்தி பஸன்னா, தேபி பி⁴க்கூ² போ⁴ஜேத்வா தத³னந்தரம் ஸப்³ப³பட²மம் தம்யேவ போ⁴ஜேந்தி. நாதி³யீதி தஸ்ஸா வசனம் ந ஆதி³யி, ந க³ண்ஹி, ந வா ஆத³ரமகாஸீதி அத்தோ².

444-5. அலம்கம்மனியேதி கம்மக்க²மம் கம்மயோக்³க³ந்தி கம்மனியம், அலம் பரியத்தம் கம்மனியபா⁴வாயாதி அலம்கம்மனியம், தஸ்மிம் அலம்கம்மனியே, யத்த² அஜ்ஜா²சாரம் கரோந்தா ஸக்கோந்தி, தம் கம்மம் காதும் தாதி³ஸேதி அத்தோ². தேனேவஸ்ஸ பத³பா⁴ஜனே வுத்தம் – ‘‘ஸக்கா ஹோதி மேது²னம் த⁴ம்மம் படிஸேவிது’’ந்தி, யத்த² மேது²னம் த⁴ம்மம் ஸக்கா ஹோதி படிஸேவிதுந்தி வுத்தம் ஹோதி. நிஸஜ்ஜம் கப்பேய்யாதி நிஸஜ்ஜம் கரேய்ய, நிஸீதே³ய்யாதி அத்தோ². யஸ்மா பன நிஸீதி³த்வாவ நிபஜ்ஜதி, தேனஸ்ஸ பத³பா⁴ஜனே உப⁴யம்பி வுத்தம். தத்த² உபனிஸின்னோதி உபக³ந்த்வா நிஸின்னோ. ஏவம் உபனிபன்னோபி வேதி³தப்³போ³. பி⁴க்கு² நிஸின்னேதி பி⁴க்கு²ம்ஹி நிஸின்னேதி அத்தோ². உபோ⁴ வா நிஸின்னாதி த்³வேபி அபச்சா² அபுரிமம் நிஸின்னா. ஏத்த² ச கிஞ்சாபி பாளியம் ‘‘ஸோதஸ்ஸ ரஹோ’’தி ஆக³தம், சக்கு²ஸ்ஸ ரஹேனேவ பன பரிச்சே²தோ³ வேதி³தப்³போ³. ஸசேபி ஹி பிஹிதகவாடஸ்ஸ க³ப்³ப⁴ஸ்ஸ த்³வாரே நிஸின்னோ விஞ்ஞூ புரிஸோ ஹோதி, நேவ அனாபத்திம் கரோதி. அபிஹிதகவாடஸ்ஸ பன த்³வாரே நிஸின்னோ அனாபத்திம் கரோதி. ந கேவலஞ்ச த்³வாரே அந்தோத்³வாத³ஸஹத்தே²பி ஓகாஸே நிஸின்னோ, ஸசே ஸசக்கு²கோ விக்கி²த்தோபி நித்³தா³யந்தோபி அனாபத்திம் கரோதி. ஸமீபே டி²தோபி அந்தோ⁴ ந கரோதி, சக்கு²மாபி நிபஜ்ஜித்வா நித்³தா³யந்தோ ந கரோதி. இத்தீ²னம் பன ஸதம்பி அனாபத்திம் ந கரோதியேவ.

ஸத்³தே⁴ய்யவசஸாதி ஸத்³தா⁴தப்³ப³வசனா. ஸா பன யஸ்மா அரியஸாவிகாவ ஹோதி, தேனஸ்ஸ பத³பா⁴ஜனே ‘‘ஆக³தப²லா’’திஆதி³ வுத்தம். தத்த² ஆக³தம் ப²லம் அஸ்ஸாதி ஆக³தப²லா படிலத்³த⁴ஸோதாபத்திப²லாதி அத்தோ². அபி⁴ஸமேதாவினீதி படிவித்³த⁴சதுஸச்சா. விஞ்ஞாதம் ஸிக்க²த்தயஸாஸனம் ஏதாயாதி விஞ்ஞாதஸாஸனா. நிஸஜ்ஜம் பி⁴க்கு² படிஜானமானோதி கிஞ்சாபி ஏவரூபா உபாஸிகா தி³ஸ்வா வத³தி, அத² கோ² பி⁴க்கு² நிஸஜ்ஜம் படிஜானமானோயேவ திண்ணம் த⁴ம்மானம் அஞ்ஞதரேன காரேதப்³போ³, ந அப்படிஜானமானோதி அத்தோ².

யேன வா ஸா ஸத்³தே⁴ய்யவசஸா உபாஸிகா வதே³ய்ய தேன ஸோ பி⁴க்கு² காரேதப்³போ³தி நிஸஜ்ஜாதீ³ஸு ஆகாரேஸு யேன வா ஆகாரேன ஸத்³தி⁴ம் மேது²னத⁴ம்மாதீ³னி ஆரோபேத்வா ஸா உபாஸிகா வதே³ய்ய, படிஜானமானோவ தேன ஸோ பி⁴க்கு² காரேதப்³போ³. ஏவரூபாயபி உபாஸிகாய வசனமத்தேன ந காரேதப்³போ³தி அத்தோ². கஸ்மா? யஸ்மா தி³ட்ட²ம் நாம ததா²பி ஹோதி, அஞ்ஞதா²பி ஹோதி.

தத³த்த²ஜோதனத்த²ஞ்ச இத³ம் வத்து²ம் உதா³ஹரந்தி – மல்லாராமவிஹாரே கிர ஏகோ கீ²ணாஸவத்தே²ரோ ஏகதி³வஸம் உபட்டா²ககுலம் க³ந்த்வா அந்தோகே³ஹே நிஸீதி³, உபாஸிகாபி ஸயனபல்லங்கம் நிஸ்ஸாய டி²தா ஹோதி. அதே²கோ பிண்ட³சாரிகோ த்³வாரே டி²தோ தி³ஸ்வா ‘‘தே²ரோ உபாஸிகாய ஸத்³தி⁴ம் ஏகாஸனே நிஸின்னோ’’தி ஸஞ்ஞம் படிலபி⁴த்வா புனப்புனம் ஓலோகேஸி. தே²ரோபி ‘‘அயம் மயி அஸுத்³த⁴லத்³தி⁴கோ ஜாதோ’’தி ஸல்லக்கே²த்வா கதப⁴த்தகிச்சோ விஹாரம் க³ந்த்வா அத்தனோ வஸனட்டா²னம் பவிஸித்வா அந்தோவ நிஸீதி³. ஸோபி பி⁴க்கு² ‘‘தே²ரம் சோதே³ஸ்ஸாமீ’’தி ஆக³ந்த்வா உக்காஸித்வா த்³வாரம் விவரி. தே²ரோ தஸ்ஸ சித்தம் ஞத்வா ஆகாஸே உப்பதித்வா கூடாகா³ரகண்ணிகம் நிஸ்ஸாய பல்லங்கேன நிஸீதி³. ஸோபி பி⁴க்கு² அந்தோ பவிஸித்வா மஞ்சஞ்ச ஹேட்டா²மஞ்சஞ்ச ஓலோகேத்வா தே²ரம் அபஸ்ஸந்தோ உத்³த⁴ம் உல்லோகேஸி, அத² ஆகாஸே நிஸின்னம் தே²ரம் தி³ஸ்வா ‘‘ப⁴ந்தே, ஏவம் மஹித்³தி⁴கா நாம தும்ஹே மாதுகா³மேன ஸத்³தி⁴ம் ஏகாஸனே நிஸின்னபா⁴வம் வதா³பேத² ஏவா’’தி ஆஹ. தே²ரோ ‘‘அந்தரக⁴ரஸ்ஸேவேஸோ ஆவுஸோ தோ³ஸோ, அஹம் பன தம் ஸத்³தா⁴பேதும் அஸக்கோந்தோ ஏவமகாஸிம், ரக்கே²ய்யாஸி ம’’ந்தி வத்வா ஓதரீதி.

446. இதோ பரம் ஸா சே ஏவம் வதே³ய்யாதிஆதி³ ஸப்³ப³ம் படிஞ்ஞாய காரணாகாரத³ஸ்ஸனத்த²ம் வுத்தம், தத்த² மாதுகா³மஸ்ஸ மேது²னம் த⁴ம்மம் படிஸேவந்தோதி மாதுகா³மஸ்ஸ மக்³கே³ மேது²னம் த⁴ம்மம் படிஸேவந்தோதி அத்தோ². நிஸஜ்ஜாய காரேதப்³போ³தி நிஸஜ்ஜம் படிஜானித்வா மேது²னத⁴ம்மபடிஸேவனம் அப்படிஜானந்தோ மேது²னத⁴ம்மபாராஜிகாபத்தியா அகாரேத்வா நிஸஜ்ஜாமத்தேன யம் ஆபத்திம் ஆபஜ்ஜதி தாய காரேதப்³போ³, பாசித்தியாபத்தியா காரேதப்³போ³தி அத்தோ². ஏதேன நயேன ஸப்³ப³சதுக்கேஸு வினிச்ச²யோ வேதி³தப்³போ³.

451. ஸிக்கா²பத³பரியோஸானே பன ஆபத்தானாபத்திபரிச்சே²த³த³ஸ்ஸனத்த²ம் வுத்தேஸு க³மனம் படிஜானாதீதிஆதீ³ஸு க³மனம் படிஜானாதீதி ‘‘ரஹோனிஸஜ்ஜஸ்ஸாத³த்த²ம் க³தோம்ஹீ’’தி ஏவம் க³மனம் படிஜானாதி, நிஸஜ்ஜந்தி நிஸஜ்ஜஸ்ஸாதே³னேவ நிஸஜ்ஜம் படிஜானாதி. ஆபத்திந்தி தீஸு அஞ்ஞதரம் ஆபத்திம். ஆபத்தியா காரேதப்³போ³தி தீஸு யம் படிஜானாதி, தாய காரேதப்³போ³. ஸேஸமேத்த² சதுக்கே உத்தானாதி⁴ப்பாயமேவ. து³தியசதுக்கே பன க³மனம் ந படிஜானாதீதி ரஹோ நிஸஜ்ஜஸ்ஸாத³வஸேன ந படிஜானாதி, ‘‘ஸலாகப⁴த்தாதி³னா அத்தனோ கம்மேன க³தோம்ஹி, ஸா பன மய்ஹம் நிஸின்னட்டா²னம் ஆக³தா’’தி வத³தி. ஸேஸமேத்தா²பி உத்தானாதி⁴ப்பாயமேவ.

அயம் பன ஸப்³ப³த்த² வினிச்ச²யோ – ரஹோ நிஸஜ்ஜஸ்ஸாதோ³தி மேது²னத⁴ம்மஸன்னிஸ்ஸிதகிலேஸோ வுச்சதி. யோ பி⁴க்கு² தேனஸ்ஸாதே³ன மாதுகா³மஸ்ஸ ஸந்திகம் க³ந்துகாமோ அக்கி²ம் அஞ்ஜேதி, து³க்கடம். நிவாஸனம் நிவாஸேதி, காயப³ந்த⁴னம் ப³ந்த⁴தி, சீவரம் பாருபதி, ஸப்³ப³த்த² பயோகே³ பயோகே³ து³க்கடம். க³ச்ச²தி, பத³வாரே பத³வாரே து³க்கடம். க³ந்த்வா நிஸீத³தி, து³க்கடமேவ. மாதுகா³மே ஆக³ந்த்வா நிஸின்னமத்தே பாசித்தியம். ஸசே ஸா இத்தீ² கேனசி கரணீயேன உட்டா²யுட்டா²ய புனப்புனம் நிஸீத³தி, நிஸஜ்ஜாய நிஸஜ்ஜாய பாசித்தியம். யம் ஸந்தா⁴ய க³தோ, ஸா ந தி³ட்டா², அஞ்ஞா ஆக³ந்த்வா நிஸீத³தி, அஸ்ஸாதே³ உப்பன்னே பாசித்தியம். மஹாபச்சரியம் பன ‘‘க³மனகாலதோ பட்டா²ய அஸுத்³த⁴சித்தத்தா ஆபத்தியேவா’’தி வுத்தம். ஸசே ஸம்ப³ஹுலா ஆக³ச்ச²ந்தி, மாதுகா³மக³ணனாய பாசித்தியானி. ஸசே உட்டா²யுட்டா²ய புனப்புனம் நிஸீத³ந்தி, நிஸஜ்ஜாக³ணனாய பாசித்தியானி. அனியமேத்வா தி³ட்ட²தி³ட்டா²ய ஸத்³தி⁴ம் ரஹஸ்ஸாத³ம் கப்பேஸ்ஸாமீதி க³ந்த்வா நிஸின்னஸ்ஸாபி ஆக³தாக³தானம் வஸேன புனப்புனம் நிஸஜ்ஜாவஸேன ச வுத்தனயேனேவ ஆபத்தியோ வேதி³தப்³பா³. ஸசே ஸுத்³த⁴சித்தேன க³ந்த்வா நிஸின்னஸ்ஸ ஸந்திகம் ஆக³ந்த்வா நிஸின்னாய இத்தி²யா ரஹஸ்ஸாதோ³ உப்பஜ்ஜதி அனாபத்தி.

ஸமுட்டா²னாதீ³னி பட²மபாராஜிகஸதி³ஸானேவாதி.

பட²மஅனியதஸிக்கா²பத³வண்ணனா நிட்டி²தா.