2. து³தியஅனியதஸிக்கா²பத³வண்ணனா

452. தேன ஸமயேன பு³த்³தோ⁴ ப⁴க³வாதி து³தியஅனியதஸிக்கா²பத³ம். தத்த² ப⁴க³வதா படிக்கி²த்தந்திஆதி³ம்ஹி ‘‘யம் ஏகோ ஏகாய ரஹோ படிச்ச²ன்னே ஆஸனே அலம்கம்மனியே நிஸஜ்ஜம் கப்பேய்ய, தம் நிஸஜ்ஜம் கப்பேதும் படிக்கி²த்த’’ந்தி ஏவம் ஸம்ப³ந்தோ⁴ வேதி³தப்³போ³. இதரதா² ஹி ‘‘ஏகஸ்ஸ ஏகாயா’’தி வத்தப்³ப³ம் ஸியா, கஸ்மா? ‘‘படிக்கி²த்த’’ந்தி வுத்தத்தா. ஸாமிஅத்தே² வா ஏதம் பச்சத்தவசனம் வேதி³தப்³ப³ம்.

453. ந ஹேவ கோ² பன படிச்ச²ன்னந்தி ஏத்த² பன யம்பி ப³ஹி பரிக்கி²த்தம் அந்தோ விவடம் பரிவேணங்க³ணாதி³, தம்பி அந்தோக³த⁴ந்தி வேதி³தப்³ப³ம். ஏவரூபஞ்ஹி டா²னம் அப்படிச்ச²ன்னேயேவ க³ஹிதந்தி மஹாபச்சரியம் வுத்தம். ஸேஸம் பட²மஸிக்கா²பத³னயேனேவ வேதி³தப்³ப³ம். கேவலஞ்ஹி இத⁴ இத்தீ²பி புரிஸோபி யோ கோசி விஞ்ஞூ அனந்தோ⁴ அப³தி⁴ரோ அந்தோத்³வாத³ஸஹத்தே² ஓகாஸே டி²தோ வா நிஸின்னோ வா விக்கி²த்தோபி நித்³தா³யந்தோபி அனாபத்திம் கரோதி. ப³தி⁴ரோ பன சக்கு²மாபி அந்தோ⁴ வா அப³தி⁴ரோபி ந கரோதி. பாராஜிகாபத்திஞ்ச பரிஹாபேத்வா து³ட்டு²ல்லவாசாபத்தி வுத்தாதி அயம் விஸேஸோ. ஸேஸம் புரிமஸதி³ஸமேவ. உப⁴யத்தா²பி உம்மத்தகஆதி³கம்மிகானம் அனாபத்தி.

ஸமுட்டா²னாதீ³ஸு இத³ம்ஸிக்கா²பத³ம் திஸமுட்டா²னம் – காயசித்ததோ, வாசாசித்ததோ, காயவாசாசித்ததோ ச ஸமுட்டா²தி. கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், ஸுக²மஜ்ஜ²த்தவேத³னாஹி த்³விவேத³னம். ஸேஸம் உத்தானத்த²மேவாதி.

து³தியஅனியதஸிக்கா²பத³வண்ணனா நிட்டி²தா.

ஸமந்தபாஸாதி³காய வினயஸம்வண்ணனாய

அனியதவண்ணனா நிட்டி²தா.