7. விஹாரகாரஸிக்கா²பத³வண்ணனா

365. தேன ஸமயேனாதி விஹாரகாரஸிக்கா²பத³ம். தத்த² கோஸம்பி³யந்தி ஏவம்னாமகே நக³ரே. கோ⁴ஸிதாராமேதி கோ⁴ஸிதஸ்ஸ ஆராமே. கோ⁴ஸிதனாமகேன கிர ஸேட்டி²னா ஸோ காரிதோ, தஸ்மா ‘‘கோ⁴ஸிதாராமோ’’தி வுச்சதி. ச²ன்னஸ்ஸாதி போ³தி⁴ஸத்தகாலே உபட்டா²கச²ன்னஸ்ஸ. விஹாரவத்து²ம், ப⁴ந்தே, ஜானாஹீதி விஹாரஸ்ஸ பதிட்டா²னட்டா²னம், ப⁴ந்தே, ஜானாஹி. ஏத்த² ச விஹாரோதி ந ஸகலவிஹாரோ, ஏகோ ஆவாஸோ, தேனேவாஹ – ‘‘அய்யஸ்ஸ விஹாரம் காராபேஸ்ஸாமீ’’தி.

சேதியருக்க²ந்தி ஏத்த² சித்தீகதட்டே²ன சேதியம், பூஜாரஹானம் தே³வட்டா²னானமேதம் அதி⁴வசனம், ‘‘சேதிய’’ந்தி ஸம்மதம் ருக்க²ம் சேதியருக்க²ம். கா³மேன பூஜிதம் கா³மஸ்ஸ வா பூஜிதந்தி கா³மபூஜிதம். ஏஸேவ நயோ ஸேஸபதே³ஸுபி. அபிசேத்த² ஜனபதோ³தி ஏகஸ்ஸ ரஞ்ஞோ ரஜ்ஜே ஏகேகோ கோட்டா²ஸோ. ரட்ட²ந்தி ஸகலரஜ்ஜம் வேதி³தப்³ப³ம், ஸகலரஜ்ஜம்பி ஹி கதா³சி கதா³சி தஸ்ஸ ருக்க²ஸ்ஸ பூஜம் கரோதி, தேன வுத்தம் ‘‘ரட்ட²பூஜித’’ந்தி. ஏகிந்த்³ரியந்தி காயிந்த்³ரியம் ஸந்தா⁴ய வத³ந்தி. ஜீவஸஞ்ஞினோதி ஸத்தஸஞ்ஞினோ.

366. மஹல்லகந்தி ஸஸ்ஸாமிகபா⁴வேன ஸம்யாசிககுடிதோ மஹந்தபா⁴வோ ஏதஸ்ஸ அத்தீ²தி மஹல்லகோ. யஸ்மா வா வத்து²ம் தே³ஸாபேத்வா பமாணாதிக்கமேனபி காதும் வட்டதி, தஸ்மா பமாணமஹந்ததாயபி மஹல்லகோ, தம் மஹல்லகம். யஸ்மா பனஸ்ஸ தம் பமாணமஹத்தம் ஸஸ்ஸாமிகத்தாவ லப்³ப⁴தி, தஸ்மா தத³த்த²த³ஸ்ஸனத்த²ம் ‘‘மஹல்லகோ நாம விஹாரோ ஸஸ்ஸாமிகோ வுச்சதீ’’தி பத³பா⁴ஜனம் வுத்தம். ஸேஸம் ஸப்³ப³ம் குடிகாரஸிக்கா²பதே³ வுத்தனயேனேவ வேதி³தப்³ப³ம் ஸத்³தி⁴ம் ஸமுட்டா²னாதீ³ஹி. ஸஸ்ஸாமிகபா⁴வமத்தமேவ ஹி ஏத்த² கிரியதோ ஸமுட்டா²னாபா⁴வோ பமாணனியமாபா⁴வோ ச விஸேஸோ, பமாணனியமாபா⁴வா ச சதுக்கபாரிஹானீதி.

விஹாரகாரஸிக்கா²பத³வண்ணனா நிட்டி²தா.