5. ஸஞ்சரித்தஸிக்கா²பத³வண்ணனா

296. தேன ஸமயேன பு³த்³தோ⁴ ப⁴க³வாதி ஸஞ்சரித்தம். தத்த² பண்டி³தாதி பண்டி³ச்சேன ஸமன்னாக³தா க³திமந்தா. ப்³யத்தாதி வேய்யத்தியேன ஸமன்னாக³தா, உபாயேன ஸமன்னாக³தா உபாயஞ்ஞூ விஸாரதா³. மேதா⁴வினீதி மேதா⁴ய ஸமன்னாக³தா, தி³ட்ட²ம் தி³ட்ட²ம் கரோதி. த³க்கா²தி சே²கா. அனலஸாதி உட்டா²னவீரியஸம்பன்னா. ச²ன்னாதி அனுச்ச²விகா.

கிஸ்மிம் வியாதி கிச்ச²ம் விய கிலேஸோ விய, ஹிரி விய அம்ஹாகம் ஹோதீதி அதி⁴ப்பாயோ. குமாரிகாய வத்துந்தி ‘‘இமம் தும்ஹே க³ண்ஹதா²’’தி குமாரிகாய காரணா வத்தும்.

ஆவாஹாதீ³ஸு ஆவாஹோதி தா³ரகஸ்ஸ பரகுலதோ தா³ரிகாய ஆஹரணம். விவாஹோதி அத்தனோ தா³ரிகாய பரகுலபேஸனம். வாரேய்யந்தி ‘‘தே³த² நோ தா³ரகஸ்ஸ தா³ரிக’’ந்தி யாசனம், தி³வஸனக்க²த்தமுஹுத்தபரிச்சே²த³கரணம் வா.

297. புராணக³ணகியாதி ஏகஸ்ஸ க³ணகஸ்ஸ ப⁴ரியாய, ஸா தஸ்மிம் ஜீவமானே க³ணகீதி பஞ்ஞாயித்த², மதே பன புராணக³ணகீதி ஸங்க²ம் க³தா. திரோகா³மோதி ப³ஹிகா³மோ, அஞ்ஞோ கா³மோதி அதி⁴ப்பாயோ. மனுஸ்ஸாதி உதா³யிஸ்ஸ இமம் ஸஞ்சரித்தகம்மே யுத்தபயுத்தபா⁴வம் ஜானனகமனுஸ்ஸா.

ஸுணிஸபோ⁴கே³னாதி யேன போ⁴கே³ன ஸுணிஸா பு⁴ஞ்ஜிதப்³பா³ ஹோதி ரந்தா⁴பனபசாபனபஅவேஸனாதி³னா, தேன பு⁴ஞ்ஜிம்ஸு. ததோ அபரேன தா³ஸிபோ⁴கே³னாதி மாஸாதிக்கமே யேன போ⁴கே³ன தா³ஸீ பு⁴ஞ்ஜிதப்³பா³ ஹோதி கே²த்தகம்மகசவரச²ட்³ட³னஉத³காஹரணாதி³னா, தேன பு⁴ஞ்ஜிம்ஸு. து³க்³க³தாதி த³லித்³தா³, யத்த² வா க³தா து³க்³க³தா ஹோதி தாதி³ஸம் குலம் க³தா. மாய்யோ இமம் குமாரிகந்தி மா அய்யோ இமம் குமாரிகம். ஆஹாரூபஹாரோதி ஆஹாரோ ச உபஹாரோ ச க³ஹணஞ்ச தா³னஞ்ச, ந அம்ஹேஹி கிஞ்சி ஆஹடம் ந உபாஹடம் தயா ஸத்³தி⁴ம் கயவிக்கயோ வோஹாரோ அம்ஹாகம் நத்தீ²தி தீ³பேந்தி. ஸமணேன ப⁴விதப்³ப³ம் அப்³யாவடேன, ஸமணோ அஸ்ஸ ஸுஸமணோதி ஸமணேன நாம ஈதி³ஸேஸு கம்மேஸு அப்³யாவடேன அப்³யாபாரேன ப⁴விதப்³ப³ம், ஏவம் ப⁴வந்தோ ஹி ஸமணோ ஸுஸமணோ அஸ்ஸாதி, ஏவம் நம் அபஸாதே³த்வா ‘‘க³ச்ச² த்வம் ந மயம் தம் ஜானாமா’’தி ஆஹம்ஸு.

298. ஸஜ்ஜிதோதி ஸப்³பூ³பகரணஸம்பன்னோ மண்டி³தபஸாதி⁴தோ வா.

300. து⁴த்தாதி இத்தி²து⁴த்தா. பரிசாரேந்தாதி மனாபியேஸு ரூபாதீ³ஸு இதோ சிதோ ச ஸமந்தா இந்த்³ரியானி சாரேந்தா, கீளந்தா அபி⁴ரமந்தாதி வுத்தம் ஹோதி. அப்³பு⁴தமகம்ஸூதி யதி³ கரிஸ்ஸதி த்வம் ஏத்தகம் ஜிதோ, யதி³ ந கரிஸ்ஸதி அஹம் ஏத்தகந்தி பணமகம்ஸு. பி⁴க்கூ²னம் பன அப்³பு⁴தம் காதும் ந வட்டதி. யோ கரோதி பராஜிதேன தா³தப்³ப³ந்தி மஹாபச்சரியம் வுத்தம்.

கத²ஞ்ஹி நாம அய்யோ உதா³யீ தங்க²ணிகந்தி ஏத்த² தங்க²ணோதி அசிரகாலோ வுச்சதி. தங்க²ணிகந்தி அசிரகாலாதி⁴காரிகம்.

301. ஸஞ்சரித்தம் ஸமாபஜ்ஜேய்யாதி ஸஞ்சரணபா⁴வம் ஸமாபஜ்ஜேய்ய. யஸ்மா பன தம் ஸமாபஜ்ஜந்தேன கேனசி பேஸிதேன கத்த²சி க³ந்தப்³ப³ம் ஹோதி, பரதோ ச ‘‘இத்தி²யா வா புரிஸமதி’’ந்தி ஆதி³வசனதோ இத⁴ இத்தி²புரிஸா அதி⁴ப்பேதா, தஸ்மா தமத்த²ம் த³ஸ்ஸேதும் ‘‘இத்தி²யா வா பஹிதோ புரிஸஸ்ஸ ஸந்திகே க³ச்ச²தி, புரிஸேன வா பஹிதோ இத்தி²யா ஸந்திகே க³ச்ச²தீ’’தி ஏவமஸ்ஸ பத³பா⁴ஜனம் வுத்தம். இத்தி²யா வா புரிஸமதிம் புரிஸஸ்ஸ வா இத்தி²மதிந்தி ஏத்த² ஆரோசேய்யாதி பாட²ஸேஸோ த³ட்ட²ப்³போ³, தேனேவஸ்ஸ பத³பா⁴ஜனே ‘‘புரிஸஸ்ஸ மதிம் இத்தி²யா ஆரோசேதி, இத்தி²யா மதிம் புரிஸஸ்ஸ ஆரோசேதீ’’தி வுத்தம்.

இதா³னி யத³த்த²ம் தம் தேஸம் மதிம் அதி⁴ப்பாயம் அஜ்ஜா²ஸயம் ச²ந்த³ம் ருசிம் ஆரோசேதி, தம் த³ஸ்ஸேந்தோ ‘‘ஜாயத்தனே வா ஜாரத்தனே வா’’திஆதி³மாஹ. தத்த² ஜாயத்தனேதி ஜாயாபா⁴வே. ஜாரத்தனேதி ஜாரபா⁴வே. புரிஸஸ்ஸ ஹி மதிம் இத்தி²யா ஆரோசேந்தோ ஜாயத்தனே ஆரோசேதி, இத்தி²யா மதிம் புரிஸஸ்ஸ ஆரோசேந்தோ ஜாரத்தனே ஆரோசேதி; அபிச புரிஸஸ்ஸேவ மதிம் இத்தி²யா ஆரோசேந்தோ ஜாயத்தனே வா ஆரோசேதி நிப³த்³த⁴ப⁴ரியாபா⁴வே, ஜாரத்தனே வா மிச்சா²சாரபா⁴வே. யஸ்மா பனேதம் ஆரோசேந்தேன ‘‘த்வம் கிரஸ்ஸ ஜாயா ப⁴விஸ்ஸஸீ’’திஆதி³ வத்தப்³ப³ம் ஹோதி, தஸ்மா தம் வத்தப்³ப³தாகாரம் த³ஸ்ஸேதும் ‘‘ஜாயத்தனே வாதி ஜாயா ப⁴விஸ்ஸஸி, ஜாரத்தனே வாதி ஜாரீ ப⁴விஸ்ஸஸீ’’தி அஸ்ஸ பத³பா⁴ஜனம் வுத்தம். ஏதேனேவ ச உபாயேன இத்தி²யா மதிம் புரிஸஸ்ஸ ஆரோசனேபி பதி ப⁴விஸ்ஸஸி, ஸாமிகோ ப⁴விஸ்ஸஸி, ஜாரோ ப⁴விஸ்ஸஸீதி வத்தப்³ப³தாகாரோ வேதி³தப்³போ³.

அந்தமஸோ தங்க²ணிகாயபீதி ஸப்³ப³ந்திமேன பரிச்சே²தே³ன யா அயம் தங்க²ணே முஹுத்தமத்தே படிஸம்வஸிதப்³ப³தோ தங்க²ணிகாதி வுச்சதி, முஹுத்திகாதி அத்தோ². தஸ்ஸாபி ‘‘முஹுத்திகா ப⁴விஸ்ஸஸீ’’தி ஏவம் புரிஸமதிம் ஆரோசேந்தஸ்ஸ ஸங்கா⁴தி³ஸேஸோ. ஏதேனேவுபாயேன ‘‘முஹுத்திகோ ப⁴விஸ்ஸஸீ’’தி ஏவம் புரிஸஸ்ஸ இத்தி²மதிம் ஆரோசேந்தோபி ஸங்கா⁴தி³ஸேஸம் ஆபஜ்ஜதீதி வேதி³தப்³போ³.

303. இதா³னி ‘‘இத்தி²யா வா புரிஸமதி’’ந்தி ஏத்த² அதி⁴ப்பேதா இத்தி²யோ பபே⁴த³தோ த³ஸ்ஸேத்வா தாஸு ஸஞ்சரித்தவஸேன ஆபத்திபே⁴த³ம் த³ஸ்ஸேதும் ‘‘த³ஸ இத்தி²யோ’’திஆதி³மாஹ. தத்த² மாதுரக்கி²தாதி மாதரா ரக்கி²தா. யதா² புரிஸேன ஸம்வாஸம் ந கப்பேதி, ஏவம் மாதரா ரக்கி²தா, தேனஸ்ஸ பத³பா⁴ஜனேபி வுத்தம் – ‘‘மாதா ரக்க²தி கோ³பேதி இஸ்ஸரியம் காரேதி வஸம் வத்தேதீ’’தி. தத்த² ரக்க²தீதி கத்த²சி க³ந்தும் ந தே³தி. கோ³பேதீதி யதா² அஞ்ஞே ந பஸ்ஸந்தி, ஏவம் கு³த்தட்டா²னே ட²பேதி. இஸ்ஸரியம் காரேதீதி ஸேரிவிஹாரமஸ்ஸா நிஸேதே⁴ந்தீ அபி⁴ப⁴வித்வா பவத்ததி. வஸம் வத்தேதீதி ‘‘இத³ம் கரோஹி, இத³ம் மா அகாஸீ’’தி ஏவம் அத்தனோ வஸம் தஸ்ஸா உபரி வத்தேதி. ஏதேனுபாயேன பிதுரக்கி²தாத³யோபி ஞாதப்³பா³. கோ³த்தம் வா த⁴ம்மோ வா ந ரக்க²தி, ஸகோ³த்தேஹி பன ஸஹத⁴ம்மிகேஹி ச ஏகம் ஸத்தா²ரம் உத்³தி³ஸ்ஸ பப்³ப³ஜிதேஹி ஏகக³ணபரியாபன்னேஹி ச ரக்கி²தா ‘‘கோ³த்தரக்கி²தா த⁴ம்மரக்கி²தா’’தி வுச்சதி, தஸ்மா தேஸம் பதா³னம் ‘‘ஸகோ³த்தா ரக்க²ந்தீ’’திஆதி³னா நயேன பத³பா⁴ஜனம் வுத்தம்.

ஸஹ ஆரக்கே²னாதி ஸாரக்கா². ஸஹ பரித³ண்டே³னாதி ஸபரித³ண்டா³. தாஸம் நித்³தே³ஸா பாகடாவ. இமாஸு த³ஸஸு பச்சி²மானம் த்³வின்னமேவ புரிஸந்தரம் க³ச்ச²ந்தீனம் மிச்சா²சாரோ ஹோதி, ந இதராஸம்.

த⁴னக்கீதாதீ³ஸு அப்பேன வா ப³ஹுனா வா த⁴னேன கீதா த⁴னக்கீதா. யஸ்மா பன ஸா ந கீதமத்தா ஏவ ஸம்வாஸத்தா²ய பன கீதத்தா ப⁴ரியா, தஸ்மாஸ்ஸ நித்³தே³ஸே த⁴னேன கிணித்வா வாஸேதீதி வுத்தம்.

ச²ந்தே³ன அத்தனோ ருசியா வஸதீதி ச²ந்த³வாஸினீ. யஸ்மா பன ஸா ந அத்தனோ ச²ந்த³மத்தேனேவ ப⁴ரியா ஹோதி புரிஸேன பன ஸம்படிச்சி²தத்தா, தஸ்மாஸ்ஸ நித்³தே³ஸே ‘‘பியோ பியம் வாஸேதீ’’தி வுத்தம்.

போ⁴கே³ன வஸதீதி போ⁴க³வாஸினீ. உது³க்க²லமுஸலாதி³க⁴ரூபகரணம் லபி⁴த்வா ப⁴ரியாபா⁴வம் க³ச்ச²ந்தியா ஜனபதி³த்தி²யா ஏதம் அதி⁴வசனம்.

படேன வஸதீதி படவாஸினீ. நிவாஸனமத்தம்பி பாவுரணமத்தம்பி லபி⁴த்வா ப⁴ரியாபா⁴வம் உபக³ச்ச²ந்தியா த³லித்³தி³த்தி²யா ஏதம் அதி⁴வசனம்.

ஓத³பத்தகினீதி உபி⁴ன்னம் ஏகிஸ்ஸா உத³கபாதியா ஹத்தே² ஓதாரேத்வா ‘‘இத³ம் உத³கம் விய ஸம்ஸட்டா² அபே⁴ஜ்ஜா ஹோதா²’’தி வத்வா பரிக்³க³ஹிதாய வோஹாரனாமமேதம், நித்³தே³ஸேபிஸ்ஸ ‘‘தாய ஸஹ உத³கபத்தம் ஆமஸித்வா தம் வாஸேதீ’’தி ஏவமத்தோ² வேதி³தப்³போ³.

ஓப⁴டம் ஓரோபிதம் சும்ப³டமஸ்ஸாதி ஓப⁴டசும்ப³டா, கட்ட²ஹாரிகாதீ³னம் அஞ்ஞதரா, யஸ்ஸா ஸீஸதோ சும்ப³டம் ஓரோபேத்வா க⁴ரே வாஸேதி, தஸ்ஸா ஏதம் அதி⁴வசனம்.

தா³ஸீ சாதி அத்தனோயேவ தா³ஸீ ச ஹோதி ப⁴ரியா ச.

கம்மகாரீ நாம கே³ஹே ப⁴தியா கம்மம் கரோதி, தாய ஸத்³தி⁴ம் கோசி க⁴ராவாஸம் கப்பேதி அத்தனோ ப⁴ரியாய அனத்தி²கோ ஹுத்வா. அயம் வுச்சதி ‘‘கம்மகாரீ ச ப⁴ரியா சா’’தி.

த⁴ஜேன ஆஹடா த⁴ஜாஹடா, உஸ்ஸிதத்³த⁴ஜாய ஸேனாய க³ந்த்வா பரவிஸயம் விலும்பித்வா ஆனீதாதி வுத்தம் ஹோதி, தம் கோசி ப⁴ரியம் கரோதி, அயம் த⁴ஜாஹடா நாம. முஹுத்திகா வுத்தனயாஏவ, ஏதாஸம் த³ஸன்னம்பி புரிஸந்தரக³மனே மிச்சா²சாரோ ஹோதி. புரிஸானம் பன வீஸதியாபி ஏதாஸு மிச்சா²சாரோ ஹோதி, பி⁴க்கு²னோ ச ஸஞ்சரித்தம் ஹோதீதி.

305. இதா³னி புரிஸோ பி⁴க்கு²ம் பஹிணதீதிஆதீ³ஸு படிக்³க³ண்ஹாதீதி ஸோ பி⁴க்கு² தஸ்ஸ புரிஸஸ்ஸ ‘‘க³ச்ச², ப⁴ந்தே, இத்த²ன்னாமம் மாதுரக்கி²தம் ப்³ரூஹி, ஹோஹி கிர இத்த²ன்னாமஸ்ஸ ப⁴ரியா த⁴னக்கீதா’’தி ஏவம் வுத்தவசனம் ‘‘ஸாது⁴ உபாஸகா’’தி வா ‘‘ஹோதூ’’தி வா ‘‘ஆரோசேஸ்ஸாமீ’’தி வா யேன கேனசி ஆகாரேன வசீபே⁴த³ம் கத்வா வா ஸீஸகம்பனாதீ³ஹி வா ஸம்படிச்ச²தி. வீமம்ஸதீதி ஏவம் படிக்³க³ண்ஹித்வா தஸ்ஸா இத்தி²யா ஸந்திகம் க³ந்த்வா தம் ஸாஸனம் ஆரோசேதி. பச்சாஹரதீதி தேன ஆரோசிதே ஸா இத்தீ² ‘‘ஸாதூ⁴’’தி ஸம்படிச்ச²து வா படிக்கி²பது வா லஜ்ஜாய வா துண்ஹீ ஹோது, புன ஆக³ந்த்வா தஸ்ஸ புரிஸஸ்ஸ தம் பவத்திம் ஆரோசேதி.

ஏத்தாவதா இமாய படிக்³க³ஹணாரோசனபச்சாஹரணஸங்கா²தாய திவங்க³ஸம்பத்தியா ஸங்கா⁴தி³ஸேஸோ ஹோதி. ஸா பன தஸ்ஸ ப⁴ரியா ஹோது வா மா வா, அகாரணமேதம். ஸசே பன ஸோ மாதுரக்கி²தாய ஸந்திகம் பேஸிதோ தம் அதி³ஸ்வா தஸ்ஸா மாதுயா தம் ஸாஸனம் ஆரோசேதி, ப³ஹித்³தா⁴ விமட்ட²ம் நாம ஹோதி, தஸ்மா விஸங்கேதந்தி மஹாபது³மத்தே²ரோ ஆஹ. மஹாஸுமத்தே²ரோ பன மாதா வா ஹோது பிதா வா அந்தமஸோ கே³ஹதா³ஸீபி அஞ்ஞோ வாபி யோ கோசி தம் கிரியம் ஸம்பாதே³ஸ்ஸதி, தஸ்ஸ வுத்தேபி விமட்ட²ம் நாம ந ஹோதி, திவங்க³ஸம்பத்திகாலே ஆபத்தியேவ.

நனு யதா² ‘‘பு³த்³த⁴ம் பச்சக்கா²மீ’’தி வத்துகாமோ விரஜ்ஜி²த்வா ‘‘த⁴ம்மம் பச்சக்கா²மீ’’தி வதே³ய்ய பச்சக்கா²தாவஸ்ஸ ஸிக்கா². யதா² வா ‘‘பட²மம் ஜா²னம் ஸமாபஜ்ஜாமீ’’தி வத்துகாமோ விரஜ்ஜி²த்வா ‘‘து³தியம் ஜா²னம் ஸமாபஜ்ஜாமீ’’தி வதே³ய்ய ஆபன்னோவஸ்ஸ பாராஜிகம். ஏவம்ஸம்பத³மித³ந்தி ஆஹ. தம் பனேதம் ‘‘படிக்³க³ண்ஹாதி, அந்தேவாஸிம் வீமம்ஸாபேத்வா அத்தனா பச்சாஹரதி, ஆபத்தி ஸங்கா⁴தி³ஸேஸஸ்ஸா’’தி இமினா ஸமேதி, தஸ்மா ஸுபா⁴ஸிதம்.

யதா² ச ‘‘மாதுரக்கி²தம் ப்³ரூஹீ’’தி வுத்தஸ்ஸ க³ந்த்வா தஸ்ஸா ஆரோசேதும் ஸமத்தா²னம் மாதாதீ³னம்பி வத³தோ விஸங்கேதோ நத்தி², ஏவமேவ ‘‘ஹோஹி கிர இத்த²ன்னாமஸ்ஸ ப⁴ரியா த⁴னக்கீதா’’தி வத்தப்³பே³ ‘‘ஹோஹி கிர இத்த²ன்னாமஸ்ஸ ப⁴ரியா ச²ந்த³வாஸினீ’’தி ஏவம் பாளியம் வுத்தேஸு ச²ந்த³வாஸினிஆதீ³ஸு வசனேஸு அஞ்ஞதரவஸேன வா அவுத்தேஸுபி ‘‘ஹோஹி கிர இத்த²ன்னாமஸ்ஸ ப⁴ரியா ஜாயா பஜாபதி புத்தமாதா க⁴ரணீ க⁴ரஸாமினீ ப⁴த்தரந்தி⁴கா ஸுஸ்ஸூஸிகா பரிசாரிகா’’திஏவமாதீ³ஸு ஸம்வாஸபரிதீ³பகேஸு வசனேஸு அஞ்ஞதரவஸேன வா வத³ந்தஸ்ஸாபி விஸங்கேதோ நத்தி² திவங்க³ஸம்பத்தியா ஆபத்தியேவ. ‘‘மாதுரக்கி²தம் ப்³ரூஹீ’’தி பேஸிதஸ்ஸ பன க³ந்த்வா அஞ்ஞாஸு பிதுரக்கி²தாதீ³ஸு அஞ்ஞதரம் வத³ந்தஸ்ஸ விஸங்கேதம். ஏஸ நயோ ‘‘பிதுரக்கி²தம் ப்³ரூஹீ’’திஆதீ³ஸுபி.

கேவலஞ்ஹேத்த² ஏகமூலகது³மூலகாதி³வஸேன ‘‘புரிஸஸ்ஸ மாதா பி⁴க்கு²ம் பஹிணதி, மாதுரக்கி²தாய மாதா பி⁴க்கு²ம் பஹிணதீ’’தி ஏவமாதீ³னம் மூலட்டா²னஞ்ச வஸேன பேய்யாலபே⁴தோ³யேவ விஸேஸோ. ஸோபி புப்³பே³ வுத்தனயத்தா பாளிஅனுஸாரேனேவ ஸக்கா ஜானிதுந்தி நாஸ்ஸ விபா⁴க³ம் த³ஸ்ஸேதும் ஆத³ரம் கரிம்ஹ.

338. படிக்³க³ண்ஹாதீதிஆதீ³ஸு பன த்³வீஸு சதுக்கேஸு பட²மசதுக்கே ஆதி³பதே³ன திவங்க³ஸம்பத்தியா ஸங்கா⁴தி³ஸேஸோ, மஜ்ஜே² த்³வீஹி து³வங்க³ஸம்பத்தியா து²ல்லச்சயம், அந்தே ஏகேன ஏகங்க³ஸம்பத்தியா து³க்கடம். து³தியசதுக்கே ஆதி³பதே³ன து³வங்க³ஸம்பத்தியா து²ல்லச்சயம், மஜ்ஜே² த்³வீஹி ஏகங்க³ஸம்பத்தியா து³க்கடம், அந்தே ஏகேன அங்கா³பா⁴வதோ அனாபத்தி. தத்த² படிக்³க³ண்ஹாதீதி ஆணாபகஸ்ஸ ஸாஸனம் படிக்³க³ண்ஹாதி. வீமம்ஸதீதி பஹிதட்டா²னம் க³ந்த்வா தம் ஆரோசேதி. பச்சாஹரதீதி புன ஆக³ந்த்வா மூலட்ட²ஸ்ஸ ஆரோசேதி.

ந பச்சாஹரதீதி ஆரோசேத்வா ஏத்தோவ பக்கமதி. படிக்³க³ண்ஹாதி ந வீமம்ஸதீதி புரிஸேன ‘‘இத்த²ன்னாமம் க³ந்த்வா ப்³ரூஹீ’’தி வுச்சமானோ ‘‘ஸாதூ⁴’’தி தஸ்ஸ ஸாஸனம் படிக்³க³ண்ஹித்வா தம் பமுஸ்ஸித்வா வா அப்பமுஸ்ஸித்வா வா அஞ்ஞேன கரணீயேன தஸ்ஸா ஸந்திகம் க³ந்த்வா கிஞ்சிதே³வ கத²ம் கதே²ந்தோ நிஸீத³தி, ஏத்தாவதா ‘‘படிக்³க³ண்ஹாதி ந வீமம்ஸதி நாமா’’தி வுச்சதி. அத² நம் ஸா இத்தீ² ஸயமேவ வத³தி ‘‘தும்ஹாகம் கிர உபட்டா²கோ மம் கே³ஹே காதுகாமோ’’தி ஏவம் வத்வா ச ‘‘அஹம் தஸ்ஸ ப⁴ரியா ப⁴விஸ்ஸாமீ’’தி வா ‘‘ந ப⁴விஸ்ஸாமீ’’தி வா வத³தி. ஸோ தஸ்ஸா வசனம் அனபி⁴னந்தி³த்வா அப்படிக்கோஸித்வா துண்ஹீபூ⁴தோவ உட்டா²யாஸனா தஸ்ஸ புரிஸஸ்ஸ ஸந்திகம் ஆக³ந்த்வா தம் பவத்திம் ஆரோசேதி, ஏத்தாவதா ‘‘ந வீமம்ஸதி பச்சாஹரதி நாமா’’தி வுச்சதி. ந வீமம்ஸதி ந பச்சாஹரதீதி கேவலம் ஸாஸனாரோசனகாலே படிக்³க³ண்ஹாதியேவ, இதரம் பன த்³வயம் ந கரோதி.

ந படிக்³க³ண்ஹாதி வீமம்ஸதி பச்சாஹரதீதி கோசி புரிஸோ பி⁴க்கு²ஸ்ஸ டி²தட்டா²னே வா நிஸின்னட்டா²னே வா ததா²ரூபிம் கத²ம் கதே²தி, பி⁴க்கு² தேன அப்பஹிதோபி பஹிதோ விய ஹுத்வா இத்தி²யா ஸந்திகம் க³ந்த்வா ‘‘ஹோஹி கிர இத்த²ன்னாமஸ்ஸ ப⁴ரியா’’திஆதி³னா நயேன வீமம்ஸித்வா தஸ்ஸா ருசிம் வா அருசிம் வா புன ஆக³ந்த்வா இமஸ்ஸ ஆரோசேதி. தேனேவ நயேன வீமம்ஸித்வா அபச்சாஹரந்தோ ‘‘ந படிக்³க³ண்ஹாதி வீமம்ஸதி ந பச்சாஹரதீ’’தி வுச்சதி. தேனேவ நயேன க³தோ அவீமம்ஸித்வா தாய ஸமுட்டா²பிதம் கத²ம் ஸுத்வா பட²மசதுக்கஸ்ஸ ததியபதே³ வுத்தனயேன ஆக³ந்த்வா இமஸ்ஸ ஆரோசேந்தோ ‘‘ந படிக்³க³ண்ஹாதி ந வீமம்ஸதி பச்சாஹரதீ’’தி வுச்சதி. சதுத்த²பத³ம் பாகடமேவ.

ஸம்ப³ஹுலே பி⁴க்கூ² ஆணாபேதீதிஆதி³னயா பாகடாயேவ. யதா² பன ஸம்ப³ஹுலாபி ஏகவத்து²ம்ஹி ஆபஜ்ஜந்தி, ஏவம் ஏகஸ்ஸபி ஸம்ப³ஹுலவத்தூ²ஸு ஸம்ப³ஹுலா ஆபத்தியோ வேதி³தப்³பா³. கத²ம்? புரிஸோ பி⁴க்கு²ம் ஆணாபேதி ‘‘க³ச்ச², ப⁴ந்தே, அஸுகஸ்மிம் நாம பாஸாதே³ ஸட்டி²மத்தா வா ஸத்ததிமத்தா வா இத்தி²யோ டி²தா தா வதே³ஹி, ஹோத² கிர இத்த²ன்னாமஸ்ஸ ப⁴ரியாயோ’’தி. ஸோ ஸம்படிச்சி²த்வா தத்த² க³ந்த்வா ஆரோசேத்வா புன தம் ஸாஸனம் பச்சாஹரதி. யத்தகா இத்தி²யோ தத்தகா ஆபத்தியோ ஆபஜ்ஜதி. வுத்தஞ்ஹேதம் பரிவாரேபி –

‘‘பத³வீதிஹாரமத்தேன, வாசாய ப⁴ணிதேன ச;

ஸப்³பா³னி க³ருகானி ஸப்படிகம்மானி;

சதுஸட்டி² ஆபத்தியோ ஆபஜ்ஜேய்ய ஏகதோ;

பஞ்ஹாமேஸா குஸலேஹி சிந்திதா’’தி. (பரி. 480);

இமம் கிர அத்த²வஸம் படிச்ச அயம் பஞ்ஹோ வுத்தோ. வசனஸிலிட்ட²தாய சேத்த² ‘‘சதுஸட்டி² ஆபத்தியோ’’தி வுத்தம். ஏவம் கரோந்தோ பன ஸதம்பி ஸஹஸ்ஸம்பி ஆபஜ்ஜதீதி. யதா² ச ஏகேன பேஸிதஸ்ஸ ஏகஸ்ஸ ஸம்ப³ஹுலாஸு இத்தீ²ஸு ஸம்ப³ஹுலா ஆபத்தியோ, ஏவம் ஏகோ புரிஸோ ஸம்ப³ஹுலே பி⁴க்கூ² ஏகிஸ்ஸா ஸந்திகம் பேஸேதி, ஸப்³பே³ஸம் ஸங்கா⁴தி³ஸேஸோ. ஏகோ ஸம்ப³ஹுலே பி⁴க்கூ² ஸம்ப³ஹுலானம் இத்தீ²னம் ஸந்திகம் பேஸேதி, இத்தி²க³ணனாய ஸங்கா⁴தி³ஸேஸா. ஸம்ப³ஹுலா புரிஸா ஏகம் பி⁴க்கு²ம் ஏகிஸ்ஸா ஸந்திகம் பேஸேந்தி, புரிஸக³ணனாய ஸங்கா⁴தி³ஸேஸா. ஸம்ப³ஹுலா ஏகம் ஸம்ப³ஹுலானம் இத்தீ²னம் ஸந்திகம் பேஸேந்தி, வத்து²க³ணனாய ஸங்கா⁴தி³ஸேஸா. ஸம்ப³ஹுலா ஸம்ப³ஹுலே ஏகிஸ்ஸா ஸந்திகம் பேஸேந்தி, வத்து²க³ணனாய ஸங்கா⁴தி³ஸேஸா. ஸம்ப³ஹுலா புரிஸா ஸம்ப³ஹுலே பி⁴க்கூ² ஸம்ப³ஹுலானம் இத்தீ²னம் ஸந்திகம் பேஸேந்தி, வத்து²க³ணனாய ஸங்கா⁴தி³ஸேஸா. ஏஸ நயோ ‘‘ஏகா இத்தீ² ஏகம் பி⁴க்கு²’’ந்திஆதீ³ஸுபி. ஏத்த² ச ஸபா⁴க³விபா⁴க³தா நாம அப்பமாணம், மாதாபிதுனம்பி பஞ்சஸஹத⁴ம்மிகானம்பி ஸஞ்சரித்தகம்மம் கரோந்தஸ்ஸ ஆபத்தியேவ.

புரிஸோ பி⁴க்கு²ம் ஆணாபேதி க³ச்ச² ப⁴ந்தேதி சதுக்கம் அங்க³வஸேன ஆபத்திபே⁴த³ த³ஸ்ஸனத்த²ம் வுத்தம். தஸ்ஸ பச்சி²மபதே³ அந்தேவாஸீ வீமம்ஸித்வா ப³ஹித்³தா⁴ பச்சாஹரதீதி ஆக³ந்த்வா ஆசரியஸ்ஸ அனாரோசேத்வா ஏத்தோவ க³ந்த்வா தஸ்ஸ புரிஸஸ்ஸ ஆரோசேதி. ஆபத்தி உபி⁴ன்னம் து²ல்லச்சயஸ்ஸாதி ஆசரியஸ்ஸ படிக்³க³ஹிதத்தா ச வீமம்ஸாபிதத்தா ச த்³வீஹங்கே³ஹி து²ல்லச்சயம், அந்தேவாஸிகஸ்ஸ வீமம்ஸிதத்தா ச பச்சாஹடத்தா ச த்³வீஹங்கே³ஹி து²ல்லச்சயம். ஸேஸம் பாகடமேவ.

339. க³ச்ச²ந்தோ ஸம்பாதே³தீதி படிக்³க³ண்ஹாதி சேவ வீமம்ஸதி ச. ஆக³ச்ச²ந்தோ விஸம்வாதே³தீதி ந பச்சாஹரதி. க³ச்ச²ந்தோ விஸம்வாதே³தீதி ந படிக்³க³ண்ஹாதி. ஆக³ச்ச²ந்தோ ஸம்பாதே³தீதி வீமம்ஸதி சேவ பச்சாஹரதி ச. ஏவம் உப⁴யத்த² த்³வீஹங்கே³ஹி து²ல்லச்சயம். ததியபதே³ ஆபத்தி, சதுத்தே² அனாபத்தி.

340. அனாபத்தி ஸங்க⁴ஸ்ஸ வா சேதியஸ்ஸ வா கி³லானஸ்ஸ வா கரணீயேன க³ச்ச²தி உம்மத்தகஸ்ஸ ஆதி³கம்மிகஸ்ஸாதி ஏத்த² பி⁴க்கு²ஸங்க⁴ஸ்ஸ உபோஸதா²கா³ரம் வா கிஞ்சி வா விப்பகதம் ஹோதி. தத்த² காருகானம் ப⁴த்தவேதனத்தா²ய உபாஸகோ வா உபாஸிகாய ஸந்திகம் பி⁴க்கு²ம் பஹிணேய்ய, உம்பாஸிகா வா உபாஸகஸ்ஸ, ஏவரூபேன ஸங்க⁴ஸ்ஸ கரணீயேன க³ச்ச²ந்தஸ்ஸ அனாபத்தி. சேதியகம்மே கயிரமானேபி ஏஸேவ நயோ. கி³லானஸ்ஸ பே⁴ஸஜ்ஜத்தா²யபி உபாஸகேன வா உபாஸிகாய ஸந்திகம் உபாஸிகாய வா உபாஸகஸ்ஸ ஸந்திகம் பஹிதஸ்ஸ க³ச்ச²தோ அனாபத்தி. உம்மத்தகஆதி³கம்மிகா வுத்தனயா ஏவ.

பத³பா⁴ஜனீயவண்ணனா நிட்டி²தா.

ஸமுட்டா²னாதீ³ஸு இத³ம் ஸிக்கா²பத³ம் ச²ஸமுட்டா²னம், ஸீஸுக்கி²பனாதி³னா காயவிகாரேன ஸாஸனம் க³ஹேத்வா க³ந்த்வா ஹத்த²முத்³தா³ய வீமம்ஸித்வா புன ஆக³ந்த்வா ஹத்த²முத்³தா³ய ஏவ ஆரோசேந்தஸ்ஸ காயதோ ஸமுட்டா²தி. ஆஸனஸாலாய நிஸின்னஸ்ஸ ‘‘இத்த²ன்னாமா ஆக³மிஸ்ஸதி, தஸ்ஸா சித்தம் ஜானேய்யாதா²’’தி கேனசி வுத்தே ‘‘ஸாதூ⁴’’தி ஸம்படிச்சி²த்வா தம் ஆக³தம் வத்வா தஸ்ஸா க³தாய புன தஸ்மிம் புரிஸே ஆக³தே ஆரோசேந்தஸ்ஸ வாசதோ ஸமுட்டா²தி. வாசாய ‘‘ஸாதூ⁴’’தி ஸாஸனம் க³ஹேத்வா அஞ்ஞேன கரணீயேன தஸ்ஸா க⁴ரம் க³ந்த்வா அஞ்ஞத்த² வா க³மனகாலே தம் தி³ஸ்வா வசீபே⁴தே³னேவ வீமம்ஸித்வா புன அஞ்ஞேனேவ கரணீயேன ததோ அபக்கம்ம கதா³சிதே³வ தம் புரிஸம் தி³ஸ்வா ஆரோசேந்தஸ்ஸாபி வாசதோவ ஸமுட்டா²தி. பண்ணத்திம் அஜானந்தஸ்ஸ பன கீ²ணாஸவஸ்ஸாபி காயவாசதோ ஸமுட்டா²தி. கத²ம்? ஸசே ஹிஸ்ஸ மாதாபிதரோ குஜ்ஜி²த்வா அலம்வசனீயா ஹோந்தி, தஞ்ச பி⁴க்கு²ம் க⁴ரம் உபக³தம் தே²ரபிதா வத³தி ‘‘மாதா தே தாத மம் மஹல்லகம் ச²ட்³டே³த்வா ஞாதிகுலம் க³தா, க³ச்ச² தம் மம் உபட்டா²தும் பேஸேஹீ’’தி. ஸோ சே க³ந்த்வா தம் வத்வா புன பிதுனோ தஸ்ஸா ஆக³மனம் வா அனாக³மனம் வா ஆரோசேதி, ஸங்கா⁴தி³ஸேஸோ. இமானி தீணி அசித்தகஸமுட்டா²னானி.

பண்ணத்திம் பன ஜானித்வா ஏதேஹேவ தீஹி நயேஹி ஸஞ்சரித்தம் ஸமாபஜ்ஜதோ காயசித்ததோ வாசாசித்ததோ காயவாசாசித்ததோ ச ஸமுட்டா²தி. இமானி தீணி பண்ணத்திஜானனசித்தேன ஸசித்தகஸமுட்டா²னானி. கிரியம், நோஸஞ்ஞாவிமோக்க²ம், பண்ணத்திவஜ்ஜம், காயகம்மம், வசீகம்மம், குஸலாதி³வஸேன சேத்த² தீணி சித்தானி, ஸுகா²தி³வஸேன திஸ்ஸோ வேத³னாதி.

341. வினீதவத்தூ²ஸு ஆதி³தோ வத்து²பஞ்சகே படிக்³க³ஹிதமத்தத்தா து³க்கடம்.

கலஹவத்து²ஸ்மிம் ஸம்மோத³னீயம் அகாஸீதி தம் ஸஞ்ஞாபேத்வா புன கே³ஹக³மனீயம்

அகாஸி. நாலம்வசனீயாதி ந பரிச்சத்தாதி அத்தோ². யா ஹி யதா² யதா² யேஸு யேஸு ஜனபதே³ஸு பரிச்சத்தா பரிச்சத்தாவ ஹோதி, ப⁴ரியாபா⁴வம் அதிக்கமதி, அயம் ‘‘அலம்வசனீயா’’தி வுச்சதி. ஏஸா பன ந அலம்வசனீயா கேனசிதே³வ காரணேன கலஹம் கத்வா க³தா, தேனேவேத்த² ப⁴க³வா ‘‘அனாபத்தீ’’தி ஆஹ. யஸ்மா பன காயஸம்ஸக்³கே³ யக்கி²யா து²ல்லச்சயம் வுத்தம், தஸ்மா து³ட்டு²ல்லாதீ³ஸுபி யக்கி²பேதியோ து²ல்லச்சயவத்து²மேவாதி வேதி³தப்³பா³. அட்ட²கதா²ஸு பனேதம் ந விசாரிதம். ஸேஸம் ஸப்³ப³த்த² உத்தானத்த²மேவாதி.

ஸஞ்சரித்தஸிக்கா²பத³வண்ணனா நிட்டி²தா.