4. அத்தகாமபாரிசரியஸிக்கா²பத³வண்ணனா

290. தேன ஸமயேன பு³த்³தோ⁴ ப⁴க³வாதி அத்தகாமஸிக்கா²பத³ம். தத்த² குலூபகோதி குலபயிருபாஸனகோ சதுன்னம் பச்சயானம் அத்தா²ய குலூபஸங்கமனே நிச்சப்பயுத்தோ.

சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரந்தி சீவரஞ்ச பிண்ட³பாதஞ்ச ஸேனாஸனஞ்ச கி³லானபச்சயபே⁴ஸஜ்ஜபரிக்கா²ரஞ்ச. கி³லானபச்சயபே⁴ஸஜ்ஜபரிக்கா²ரந்தி சேத்த² பதிகரணத்தே²ன பச்சயோ, யஸ்ஸ கஸ்ஸசி ஸப்பாயஸ்ஸேதம் அதி⁴வசனம். பி⁴ஸக்கஸ்ஸ கம்மம் தேன அனுஞ்ஞாதத்தாதி பே⁴ஸஜ்ஜம். கி³லானபச்சயோவ பே⁴ஸஜ்ஜம் கி³லானபச்சயபே⁴ஸஜ்ஜம், யம்கிஞ்சி கி³லானஸ்ஸ ஸப்பாயம் பி⁴ஸக்ககம்மம் தேலமது⁴பா²ணிதாதீ³தி வுத்தம் ஹோதி. பரிக்கா²ரோதி பன ‘‘ஸத்தஹி நக³ரபரிக்கா²ரேஹி ஸுபரிக்க²தம் ஹோதீ’’திஆதீ³ஸு (அ. நி. 7.67) பரிவாரோ வுச்சதி. ‘‘ரதோ² ஸீஸபரிக்கா²ரோ ஜா²னக்கோ² சக்கவீரியோ’’திஆதீ³ஸு (ஸம். நி. 5.4) அலங்காரோ. ‘‘யே சிமே பப்³ப³ஜிதேன ஜீவிதபரிக்கா²ரா ஸமுதா³னேதப்³பா³’’திஆதீ³ஸு (ரோ. நி. 1.1.191) ஸம்பா⁴ரோ. இத⁴ பன ஸம்பா⁴ரோபி பரிவாரோபி வட்டதி. தஞ்ஹி கி³லானபச்சயபே⁴ஸஜ்ஜம் ஜீவிதஸ்ஸ பரிவாரோபி ஹோதி ஜீவிதவினாஸகாபா³து⁴ப்பத்தியா அந்தரம் அத³த்வா ரக்க²ணதோ, ஸம்பா⁴ரோபி யதா² சிரம் பவத்ததி ஏவமஸ்ஸ காரணபா⁴வதோ, தஸ்மா பரிக்கா²ரோதி வுச்சதி. ஏவம் கி³லானபச்சயபே⁴ஸஜ்ஜஞ்ச தம் பரிக்கா²ரோ சாதி கி³லானபச்சயபே⁴ஸஜ்ஜபரிக்கா²ரோ, தம் கி³லானபச்சயபே⁴ஸஜ்ஜபரிக்கா²ரந்தி ஏவமத்தோ² த³ட்ட²ப்³போ³.

வஸலந்தி ஹீனம் லாமகம். அத² வா வஸ்ஸதீதி வஸலோ, பக்³க⁴ரதீதி அத்தோ², தம் வஸலம், அஸுசிபக்³க⁴ரணகந்தி வுத்தம் ஹோதி. நிட்டு²ஹித்வாதி கே²ளம் பாதேத்வா.

கஸ்ஸாஹம் கேன ஹாயாமீதி அஹம் கஸ்ஸா அஞ்ஞிஸ்ஸா இத்தி²யா கேன போ⁴கே³ன வா அலங்காரேன வா ரூபேன வா பரிஹாயாமி, கா நாம மயா உத்தரிதராதி தீ³பேதி.

291. ஸந்திகேதி உபசாரே ட²த்வா ஸாமந்தா அவிதூ³ரே, பத³பா⁴ஜனேபி அயமேவஅத்தோ² தீ³பிதோ. அத்தகாமபாரிசரியாயாதி மேது²னத⁴ம்மஸங்கா²தேன காமேன பாரிசரியா காமபாரிசரியா. அத்தனோ அத்தா²ய காமபாரிசரியா அத்தகாமபாரிசரியா, அத்தனா வா காமிதா இச்சி²தாதி அத்தகாமா, ஸயம் மேது²னராக³வஸேன பத்தி²தாதி அத்தோ². அத்தகாமா ச ஸா பாரிசரியா சாதி அத்தகாமபாரிசரியா, தஸ்ஸா அத்தகாமபாரிசரியாய. வண்ணம் பா⁴ஸேய்யாதி கு³ணம் ஆனிஸம்ஸம் பகாஸேய்ய.

தத்ர யஸ்மா ‘‘அத்தனோ அத்தா²ய காமபாரிசரியா’’தி இமஸ்மிம் அத்த²விகப்பே காமோ சேவ ஹேது ச பாரிசரியா ச அத்தோ², ஸேஸம் ப்³யஞ்ஜனம். ‘‘அத்தகாமா ச ஸா பாரிசரியா சாதி அத்தகாமபாரிசரியா’’தி இமஸ்மிம் அத்த²விகப்பே அதி⁴ப்பாயோ சேவ பாரிசரியா சாதி அத்தோ², ஸேஸம் ப்³யஞ்ஜனம். தஸ்மா ப்³யஞ்ஜனே ஆத³ரம் அகத்வா அத்த²மத்தமேவ த³ஸ்ஸேதும் ‘‘அத்தனோ காமம் அத்தனோ ஹேதும் அத்தனோ அதி⁴ப்பாயம் அத்தனோ பாரிசரிய’’ந்தி பத³பா⁴ஜனம் வுத்தம். ‘‘அத்தனோ காமம் அத்தனோ ஹேதும் அத்தனோ பாரிசரிய’’ந்தி ஹி வுத்தே ஜானிஸ்ஸந்தி பண்டி³தா ‘‘ஏத்தாவதா அத்தனோ அத்தா²ய காமபாரிசரியா வுத்தா’’தி. ‘‘அத்தனோ அதி⁴ப்பாயம் அத்தனோ பாரிசரிய’’ந்தி வுத்தேபி ஜானிஸ்ஸந்தி ‘‘ஏத்தாவதா அத்தனா இச்சி²தகாமிதட்டே²ன அத்தகாமபாரிசரியா வுத்தா’’தி.

இதா³னி தஸ்ஸா அத்தகாமபாரிசரியாய வண்ணபா⁴ஸனாகாரம் த³ஸ்ஸேந்தோ ‘‘ஏதத³க்³க³’’ந்திஆதி³மாஹ. தம் உத்³தே³ஸதோபி நித்³தே³ஸதோபி உத்தானத்த²மேவ. அயம் பனேத்த² பத³ஸம்ப³ந்தோ⁴ ச ஆபத்திவினிச்ச²யோ ச – ஏதத³க்³க³ம்…பே… பரிசரேய்யாதி யா மாதி³ஸம் ஸீலவந்தம் கல்யாணத⁴ம்மம் ப்³ரஹ்மசாரிம் ஏதேன த⁴ம்மேன பரிசரேய்ய, தஸ்ஸா ஏவம் மாதி³ஸம் பரிசரந்தியா யா அயம் பாரிசரியா நாம, ஏதத³க்³க³ம் பாரிசரியானந்தி.

மேது²னுபஸம்ஹிதேன ஸங்கா⁴தி³ஸேஸோதி ஏவம் அத்தகாமபாரிசரியாய வண்ணம் பா⁴ஸந்தோ ச மேது²னுபஸம்ஹிதேன மேது²னத⁴ம்மபடிஸம்யுத்தேனேவ வசனேன யோ பா⁴ஸேய்ய, தஸ்ஸ ஸங்கா⁴தி³ஸேஸோதி.

இதா⁴னி யஸ்மா மேது²னுபஸம்ஹிதேனேவ பா⁴ஸந்தஸ்ஸ ஸங்கா⁴தி³ஸேஸோ வுத்தோ, தஸ்மா ‘‘அஹம்பி க²த்தியோ, த்வம்பி க²த்தியா, அரஹதி க²த்தியா க²த்தியஸ்ஸ தா³தும் ஸமஜாதிகத்தா’’தி ஏவமாதீ³ஹி வசனேஹி பாரிசரியாய வண்ணம் பா⁴ஸமானஸ்ஸாபி ஸங்கா⁴தி³ஸேஸோ நத்தி². ‘‘அஹம்பி க²த்தியோ’’திஆதி³கே பன ப³ஹூபி பரியாயே வத்வா ‘‘அரஹஸி த்வம் மய்ஹம் மேது²னத⁴ம்மம் தா³து’’ந்தி ஏவம் மேது²னப்படிஸம்யுத்தேனேவ பா⁴ஸமானஸ்ஸ ஸங்கா⁴தி³ஸேஸோதி.

இத்தீ² ச ஹோதீதிஆதி³ புப்³பே³ வுத்தனயமேவ. இத⁴ உதா³யித்தே²ரோ ஆதி³கம்மிகோ, தஸ்ஸ அனாபத்தி ஆதி³கம்மிகஸ்ஸாதி.

ஸமுட்டா²னாதி³ ஸப்³ப³ம் து³ட்டு²ல்லவாசாஸதி³ஸம். வினீதவத்தூ²னி உத்தானத்தா²னேவாதி.

அத்தகாமபாரிசரியஸிக்கா²பத³வண்ணனா நிட்டி²தா.